Ylli MANJANI

Kështu u katandis kjo qeveri tani, duhet të komunikojmë përmes medias, sepse edhe Ëhats Upp dhe sms-të nuk funksionojnë… Unë ju jam mirënjohës juve mediave, që bashkë me ju më keni dhënë mundësinë të përçoj mesazhe publike profesionale dhe parimore, sepse në jetën time kam qenë gjithmonë profesionist dhe mbeten profesionist.
Politika ka qenë dhe mbetet për të zhvilluar parimet profesionale. Sigurisht të qenit ministër është një nga detyrat më të rëndësishme, aq më tepër ministër i Drejtësisë. Për çdo jurist është një karrierë shumë e rëndësishme, shumë e spikatur dhe mua m’u dha kjo mundësi. Ma dha LSI-ja, ma dha Ilir Meta, të cilit i jam mirënjohës sepse në fakt, pas gjithë investimit tim publik profesional dhe personal, i mungonte karrierës sime dhe kjo detyrë. E kreva sigurisht, ashtu si dita, bëra më të mirën që kisha mundësi. Nuk ishte ajo që doja dhe do t’ua them pse:
Sepse kur kam hyrë në qeveri kam gjetur një praktikë, një procedurë, një proces, që jo vetëm s’kishte asnjë lidhje me profesionalizmin, por as me Kushtetutën e vendit dhe as me ligjet.

Mbledhjet e qeverisë, antikushtetuese

Mbledhja e qeverisë është një akt formal, tejet antikushtetues dhe këto janë qëndrime permante që unë i kam mbajtur në qeveri. Ministrat nuk janë të lejuar të flasin në mbledhjen e qeverisë. Kjo ka qenë e papranueshme për mua. Sigurisht, mënyra sesi funksion Këshilli i Ministrave dihet, se është e shkruar në ligjin e KM.
Me Kryeministrin Rama ne nuk kemi debatuar për çështje personale; gjithmonë për çështje parimore, ligjore; kjo është detyra e ministrit të Drejtësisë dhe ç’kam pasur, nuk kam asnjë pishmanllëk. E kanë aty të regjistruar në memorien e KM-së; nëse e kanë fshirë pastaj, është një histori tjetër, por janë të gjitha aty një e nga një. Kështu që nga kjo pikëpamje unë nuk i kam ndonjë borxh askujt.
Që prej verës së kaluar, Kryeministri ka harxhuar kohë nga dita e tij e punës për të bërë presion – jo mua, se mua s’më ka kërkuar dhe në këtë çast, asgjë – por kryetarit të Parlamentit, të më shkarkonte. Arsyeja? E di ai! Por ajo që thotë është se unë flas pa leje në media! Pa lejen e Fugës!!!
Besojeni ose jo, në një sistem demokratik, ministrit kërkohet t’i mbyllet goja! Ministri ka një status ligjor dhe kushtetues në këndvështrimin tim dhe politik dhe unë kam një ndarje të madhe me kryeministrin në këtë pjesë dhe nuk është se kam ndonjë besim tek kryeministri, sepse kryeministri mua më ka përjashtuar nga opozita, kur s’kishim asgjë në dorë, jo më sot në pushtet. Por nuk dua ta bëj personale, sepse nuk kemi asgjë personale. Kjo është çështje parimore. Pra, po fole pa lejen e Fugës, shkarkohesh! Ky është mesazhi i kryeministrit. Por po mendove, po guxove të mendosh, shkarkohesh!
Rri urtë, bëj ndonjë tender, bëj ndonjë koncesion, je burrë i mirë! Ky është mesazhi që jep kryeministri këto 6 muajt e fundit.
Sigurisht, kryetari i Parlamentit nuk i ka pranuar këto gjëra dhe unë jam shumë i nderuar që kryetari i Parlamentit ka qenë dhe mbetet plotësisht në anën e ligjit, në anën e Kushtetutës, jo thjesht në anën time, se e thashë që këto nuk janë gjëra personale, por kjo ka qenë e vërteta. 6 muaj me radhë.
Sigurisht, ne kemi debatuar në qeveri. Kemi debatuar edhe për shkak të nuhatjes sime profesionale për disa praktika që në këndvështrimin tim kanë qenë korruptive. Për shembull, ju e keni bërë publike, nuk është zëdhënia ime, që është e ndaluar në bazë të ligjit të KM që ministrat të flasin për çfarë ndodh në qeveri.

Afera me konçesionin e ndriçimit të rrugëve

Një debat të parë që kemi bërë për një vendim që erdhi nga Ministria e Energjisë për të dhënë me koncesion, ndriçimin e rrugëve. Parandjeva dhe parandalova, e denoncova madje, se kjo është një praktikë korruptive, megjithatë qeveria e kaloi me dhunë një ditë që unë nuk isha në mbledhjen e qeverisë!
Kjo ka qenë përplasja e parë për shkak të ligjit, për shkak të detyrës!
Nuhata dhe denoncova se shteti nuk po mbronte investimet e huaja dhe për fat të keq, pas kësaj deklarate timen në Këshillin e Ministrave, e theksoj për fat të keq, u rrah në mënyrë barbare një biznesmen dhe u përzu nga Shqipëria! Janë në “rekorde” të Këshillit të Ministrave, ju kërkoj t’i shihni. Janë paralajmërime të miat për akte korruptive!
Kam marrë disa nisma për këto çështje. Nuk është e vërtetë që nuk kam marrë, por refuzohen në mënyrë të tmerrshme! Dhe e dini nga kush?! Nga sekretari i Përgjithshëm i Këshillit të Ministrave, që nuk ka lidhje fare! Që është një nëpunës civil atje, që del edhe mbi ministrat, del edhe mbi KM dhe krijon këto situata të paqena.
Sigurisht këto janë të papranueshme. Kanë qenë të papranueshme si ministër dhe do të jenë gjithmonë të papranueshme.
Këto kanë qenë pak a shumë debate! Por sigurisht debati më i madh ka qenë “pse flet në media”. Dhe sikur të ishin të gjithë këto, do të ishin harruar, se nuk ishte kjo thelbi i gjësë. Po pse u shtua presioni për largimin tim?!
U shtua presioni për largimin tim ditën që kam bërë deklaratën për kanabisin!
Ajo ka qenë një ndarje shumë e madhe dhe të jem i sinqertë, se nuk kam gjë për të fshehur, e bëra atë deklaratë krejtësisht “inkonjito” dhe si qytetar i shqetësuar, sepse ky është fakti, për përhapjen e fenomenit dhe nuk kisha asnjë paragjykim, asnjë prapamendim! Por Kryeministri u nervozua. Shtyu me radhë dy ministra të reagonin kundër meje – i falënderoj me thënë të drejtën, sepse nuk kam asgjë me kolegët ministra. Janë të gjithë absolutisht njerëz shumë të arsyeshëm, më shkelin syrin, por kanë frikë të flasin – është problem i tyre dhe u bë ajo skenë që u bë.
Pas asaj situate u shtua presioni – jo ndaj meje personalisht, por ndaj kryetarit të Parlamentit për largimin tim dhe unë e di pse. Unë e di pse!

Ministrat e Ramës flinin me dashnoret në Santa Quaranta të Balilit

Nuk është e rastësishme që është tentuar të asociohet me emrin tim, dosja e Klement Balilit! Dhe ndërkohë që në Tiranë bëhej thashethemi i asocimit të emrit tim me Klement Balilin, në Santa Quaranta, ministrat e Edi Ramës flinin me dashnoret! Kjo është e vërteta! Flinin aty!
Dhe unë nuk i di se jam i mençur, por këto i dinë shumë mirë dhe janë të regjistruara nga shërbimet partnere. Dhe ju lutem mos m’i kërkoni, se unë nuk i di, nuk i disponoj ato, por jam informuar për këtë gjë. Dhe kam marrë përgëzime po ju them për denoncimin me shumë kurajo të asaj çështjeje! Të çështjes së kanabisit! Kam marrë përgëzime!
Pse u bë tani? Për të shmangur vëmendjen, sigurisht!
Kryeministri priste një dorëheqje! Unë nuk do të jap dorëheqjen, se s’kam bërë ndonjë krim! Kam bërë detyrën! Dhe do ta bëj prapë me të njëjtin pasion, me të njëjtin vullnet, deri ditën që do të kem një detyrë publike.
Se nuk është krim të flasësh! Është demokratike! Liria e shprehjes dhe e mendimit është e garantuar në Konventën Europiane të të Drejtave të Njeriut. Dhe e dini çfarë përgjigje është “në qeverinë time nuk flitet!”.
Po si nuk flitet? Në qeverinë e Cameron-it dolën dy ministra kundër Cameron-it dhe nuk i shkarkoi! Po çfarë është ai, antidemokratik?!
Po në qeverinë gjermane, sa herë flasin ministrat rrugëve dhe bëjnë deklarata publike! Dhe ministri ështe personalitet politik, dreqi e mori.
Nuk mund të jetë ministri, zëdhënës shtypi i propagandës së qeverisë, që jemi shumë mirë dhe s’kemi asnjë problem ndërkohë që njerëzit dalin “partizan” në mal dhe e dini sa është: 20 mijë lekë dita është në veri dhe 40 mijë lekë në jug! Dita e punës! Shumë konkurruese!
Kjo është qeveria që kemi bërë për fat të keq dhe sigurisht mua s’më lidh gjë me këtë qeveri. Ndihem i nderuar që jam i shkarkuar!
Do të isha shumë i fyer po të jepja dorëheqjen! Sepse unë nuk mund të marr përgjegjësitë e kanabizimit të këtij vendi dhe nuk mund të marr përgjegjësinë e marrjes së vendimeve në kushtet e presionit të bizneseve të paligjshme dhe të trafikut. Këtë përgjegjësi ta harrojë cilido që e ka ndërmend ta faturojë tek unë! Edhe sikur kjo të jetë dita ime e fundit e politikës. Nuk kam asnjë problem. Unë jam profesionist. Por këtë e kam shumë sinqerisht. Dhe me shumë dashuri dhe me shumë dashamirësi. Realisht jam i nderuar që m’u dha kjo mundësi, i jam mirënjohës LSI-së dhe unë nuk hyj në debate të mëtejshme të mëtejshme politike.

Kjo qeveri është e kapur

Kjo qeveri është e kapur dhe është jashtë çdo lloj standardi kushtetues dhe ligjor.
E dini ju që ka që më 30 dhjetor pa u mbledhur?! Verifikojeni tek TIMS-i se gjysma e ministrave janë jashtë shtetit dhe ai vendim duhej marrë sigurisht, se u shkarkua një i dekriminalizuar aty. Por u dha për mediat. Epo të guxojë ta bëjë një ngjarje të tillë, të guxojë të firmosë një copë letër një qytetar i thjeshtë! E harrojnë në burg për falsifikim dokumentesh. Kryeministri firmos vendime qeverie që nuk kanë ndodhur! Çfarë quhet kjo?! E si mund të jetë dakord ministri i Drejtësisë me këtë çështje?! Cili ministër Drejtësie do të binte dakord me këtë histori?! Ja këto janë gjërat, këto janë historitë, ky është profesionalizmi! Këto janë ndarjet parimore! Këto gjëra “nuk duhen thënë”!
Dhe çfarë “them” unë?! Asgjë fare nga ato që kanë ndodhur! Asgjë fare, zero!
Ç’kam thënë unë: Të arrestohet Klement Balili! I vetmi zyrtar që e kam bërë sistematikisht. Dhe ndërkohë unë bëja këtë, drejtorët e Policisë hanin e pinin tek Santa Quaranta! Janë të regjistruara këto të gjitha dhe i kanë shërbimet partnere.
“Të arrestohet”: Më gjeni një zyrtar të dytë që e ka bërë këtë gjë përveç meje. Dhe nuk kisha ndonjë kompleks unë me këtë gjë, se s’kam kompleks. As më intereson fare! Por nuk mund të asociohen gjëra të paqena për të luajtur politikisht! Për të shmangur vëmendjen!

Partnerët i kërkuan Ramës shkarkimin e Tahirit

Kryeministrit i është kërkuar shkarkimi i ministrit të Brendshëm. Jo e imja. Duhej ta shkarkonte! Ia kanë kërkuar partnerët. E di mirë ai, por do të shmangë vëmendjen, kjo është arsyeja. Dhe sigurisht që unë nuk kam ndonjë problem të ndahem me Kryeministrin. Unë me Edi Ramën jam ndarë. Nuk është kjo tema. Këtu ishte: A do të bëjmë një qeveri të përbashkët në favor të këtyre njerëzve – në favor pse jo dhe të majtës – kam qenë dhe mbetem një nga besnikët e së majtës së bashkuar, por jo të së majtës së bashkuar në emër të krimit që t’i themi të majtëve ejani na votoni se s’ka rrugë tjetër dhe pastaj të qeverisin me të tjerë! Kjo ka qenë një ndarje shumë e madhe. Mbetet një ndarje shumë e madhe politike.
Si mundet Kryeministri i vendit të hedhë interesat e vendit në bast elektoral në Shtetet e Bashkuara të Amerikës?! Bast të cilin e humbi! Me turp! Dhe ai duhet të ishte i shkarkuari sot, jo unë! Si mund të vësh në satër, interesat e vendit :“Kush fiton në Amerikë?”. Çfarë domethënë kjo?! Kush i tha atij?! Nga mori autorizimin për të folur për këto gjëra?!
E pra, është kollaj të më kërkosh mua, t’i kërkosh ministrit llogari pse flet pa leje. Po kur ai flet pa lejen tonë?! Jemi dy parti të ndryshme, dreqi e mori!
E pra, këto janë historira. Duhen thënë këto gjëra! Unë i kam thënë, prandaj u shkarkova! Jam i nderuar!
Nuk mund të pajtohem unë me Kryeministrin që në fund të ditës hap librin e shtëpisë kundër gjyqtarëve që vendosin kundër qeverisë.
Pse u duhet telefonuar gjyqtarëve që të fusin njerëz në burg?! Imagjinoni Angela Merkel të marrë në telefon gjyqtarin e t’i thotë fut në burg një katunar!
Para se të shohim, vilat e gjyqtarëve, duhet të shohim së pari vilën tonë! Po kush do ta shohë vilën tonë, prokurori që ndiqet nga policia?!
Gjesti i Kryeministrit është hakmarrje e pastër e Kryeministrit ndaj meje, sidomos për deklaratën për kanabisin.
Për qëndrimin e Ilir Metës, ai është kryetar i LSI-së dhe sigurisht, në krye të partisë duhet të marrësh vendime më të balancuara dhe më gjithpërfshirëse se kjo që them unë. Në fund fare, unë Ilir Metës i mbetem mirënjohës sepse më ka dhënë mundësinë të tregoj se çfarë di të bëj në jetën politike.

10 denoncimet e Manjanit

Ministrat nuk janë të lejuar të flasin në mbledhjen e qeverisë. Kjo ka qenë e papranueshme për mua

Nuhata dhe denoncova se shteti nuk po mbronte investimet e huaja dhe për fat të keq, pas kësaj deklarate timen në Këshillin e Ministrave, e theksoj për fat të keq, u rrah në mënyrë barbare një biznesmen dhe u përzu nga Shqipëria

Kam marrë disa nisma për këto çështje. Nuk është e vërtetë që nuk kam marrë, por refuzohen në mënyrë të tmerrshme! Dhe e dini nga kush?! Nga sekretari i Përgjithshëm i Këshillit të Ministrave

U shtua presioni për largimin tim ditën që kam bërë deklaratën për kanabisin! Ajo ka qenë një ndarje shumë e madhe

Ç’kam thënë unë: Të arrestohet Klement Balili! I vetmi zyrtar që e kam bërë sistematikisht. Dhe ndërkohë unë bëja këtë, drejtorët e Policisë hanin e pinin tek Santa Quaranta! Janë të regjistruara këto të gjitha dhe i kanë shërbimet partnere

Kryeministrit i është kërkuar shkarkimi i ministrit të Brendshëm. Jo e imja. Duhej ta shkarkonte! Ia kanë kërkuar partnerët. E di mirë ai, por do të shmangë vëmendjen, kjo është arsyeja

Kryeministri firmos vendime qeverie që nuk kanë ndodhur! Çfarë quhet kjo?! E si mund të jetë dakord ministri i Drejtësisë me këtë çështje?!

Para se të shohim, vilat e gjyqtarëve, duhet të shohim së pari vilën tonë! Po kush do ta shohë vilën tonë, prokurori që ndiqet nga policia?!

Si mundet Kryeministri i vendit të hedhë interesat e vendit në bast elektoral në Shtetet e Bashkuara të Amerikës?! Bast të cilin e humbi! Me turp! Dhe ai duhet të ishte i shkarkuari sot, jo unë!

Pse u duhet telefonuar gjyqtarëve që të fusin njerëz në burg?! Imagjinoni Angela Merkel të marrë në telefon gjyqtarin e t’i thotë fut në burg një katunar!

– Zoti Berisha ishte një fundjavë ku u duk, nëse shprehemi në mënyrë figurative mund të themi se, “doli fundi i kazanit”, po Edi Rama dhe Ilir Meta vazhdojnë qeverisin bashkë dhe Ylli Manjani është ministri i shkarkuar. Ju me siguri dhe portalet mes pikëpyetjesh e paralajmëruan largimin e tij, ndërkohë ju u shprehët se fitoi Eskobari, duke ju referuar Klement Balilit, i cili është ende në kërkim i pakapur. Si e komentoni këtë zhvillim të këtyre dy-tre ditëve të fundit, si dhe deklaratat e zotit Manjani?
Ky zhvillim ndodh në një pseudomazhorancë, e cila është unike në planet, dy palë që nuk lënë intrigë pa bërë kundër njëra-tjetrës, nuk lënë akuzë pa bërë kundër njëra-tjetrës. Pretendojnë ose tallen me një vend ose tallen me një popull, tallen me një shoqëri, qëndrojnë në pushtet me ato vota si një organizatë e vërtetë kriminale. Mund të ketë patur njerëz që e kanë quajtur të rëndë këtë shprehje kur e kam thënë në fillim, bazuar në një libër të famshëm “Hajdutët e Shtetit” të Sarah Chayce, por çdonjëri që sheh zhvillimet në Shqipëri absolutisht kjo qeveri tejkalon qeverinë të cilës i kushtohet ky libër, ish-qeveria e Afganistanit dhe del kjo në vend të parë. Çfarë ndodh, çfarë po ndodh? Ministri i Drejtësisë, i cili për pozicionin që ka është dhe më i informuari nga të gjithë ministrat e tjerë, ka informacionin e të gjithë veprimtarisë të qeverisë dhe të shtetit, por ka dhe informacionin e burgjeve, të botës së nëndheshme që është dhe një nga burimet më kryesore për krimin, trafiqet dhe zhvillimet kriminale në një vend. Pra, ky ministër shkarkohet në kulmin e një krize që është kriza e Eskobarit, sepse, siç rezulton dhe unë më vjen keq, por e theksova dhe vetë, ky është i pari që ka kërkuar arrestimin e Balilit. Ky paguan çmimin. Natyrisht duhet të jemi realistë. Akuza të rënda mbi këtë mazhorancë këtë javë ka lëshuar dhe Lefter Koka, Vangjel Tavo. Por Lefterit u mjaftua duke i thënë qentë le të lehin. Jo se nuk tha gjërat më të rënda, por problemi është se videot e Kokës e shakullosin Ramën dhe gjysmën e udhëheqjes socialiste që në momentin që t’i teket atij t’i nxjerrë, dhe për Ramën i ka të plota ato.
Por kthehemi tek Manjani. Manjani është qartë viktimë kryesore e lidhjeve të krimit, e mbrojtjes dhe proteksionit të krimit. Por Manjani, kush ndoqi intervistën e tij, deklaroi një gjë të padëgjuar kurrë, që kryeministri firmos akte për gjëra që nuk kanë ndodhur, për mbledhje që s’janë mbajtur. Pra, kryeministri është një falsifikator i tillë saqë përdor fuqinë e ekzekutivit për të urdhëruar pagesa, zhvillime, për të paraqitur ndodhira, të cilat s’kanë ndodhur kurrë. Kryeministri pra shndërrohet, përdor fuqinë e ekzekutivit si një instrument kryesor për veten e tij për qëllimet e tij. Sepse një njëri, një kryeministër të firmosë vendime, akte për gjëra që nuk kanë ndodhur, ai vë veten e tij në këto akte dhe ndaj Manjani tha se me krijimin e SPAK ai do të flasë. Manjani, për pozicionin që ka patur, ka patur mundësi të ketë një vështrim mbi të gjithë sistemin e prokurimeve dhe koncesioneve apo vendimeve. Manjani ka pra, kështu të gjithë biografinë kriminale të kryeministrit shqiptar, të Niko Kapuranit, të Saje qorrit, të Damian hajdutit dhe me radhë e me radhë. Çfarë del këtu tjetër? Del këtu se që në këtë moment Ylli Manjani është njeriu më i kërcënuar i Shqipërisë, sepse me njohuritë e tij të pakufishme, ai, ekzistenca e tij përbën problemin më madhor për Edi Ramën dhe organizatën e tij kriminale të përbërë nga Saje qorri, Damian hajduti, Ilir Beqaj, Niko Kapurani siç po e quan Korça tani. Mendoj se në kushtet aktuale, një komision hetimor parlamentar, në të cilin Manjani të zbardhë për publikun shqiptar dosjen e tmerrshme të organizatës kriminale që quhet qeveri, aferat e mëdha të Edi Ramës që firmos vendime për gjëra që s’kanë ndodhur, vjedh pra me firmën e tij, situatën dhe informacionet e mëdha që ai ka. Një gjë duhet të kemi parasysh, se bota më e informuar nuk është kjo që shohim ne, nuk është as komuniteti i inteligjencës, nuk është as qytetari dixhital, bota më e informuar është bota e nëndheshme, bota e burgjeve. Ata janë një univers informacioni. Ndaj dhe del e domosdoshme krijimi me urgjencë i një komisioni hetimor parlamentar në të cilën zoti Manjani të bëjë transparencë duke i bërë një shërbim shumë të madh vendit, ndofta një nga shërbimet më të rëndësishme në 26 vitet e fundit.

– Nëse i marrim në mënyrë kronologjike ngjarjet, pra kemi kërkesën e zotit Meta për thirrjen e Këshillit të Sigurisë drejtuar Presidentit Nishani, i cili ka paralajmëruar se do të mblidhet, kemi një deklaratë të Vasilit, i cili i referohet takimeve që zoti Meta ka patur me zyrtarët amerikanë lidhur edhe me këtë çështje; kemi pastaj deklaratat e zotit Lefter Koka dhe të zotit Tavo, dhe më pas dhe ato të zotit Manjani. A ra Ilir Meta sot?
Pa diskutim që është një kapitullim pa kushte i të gjithë këtyre. Natyrisht unë kam thënë dhe e them. Kërkesa e Metës për të mbledhur Këshillin e Sigurisë Kombëtare ishte një kërkesë e drejtë. Këshilli sjell më shumë transparencë dhe uroj që kryetari i Këshillit, pra presidenti i Republikës të njohë publikun me shqyrtimin dhe konkluzionet e kësaj mbledhje. Historia e Balilit, e cila ish-ministri Manjani theksoi se ka një datë të rëndësishme që është 17 maj, ishte një histori unike. Edi Rama, Sajmir Tahiri ju thanë të gjitha përfaqësive diplomatike në Shqipëri dhe atyre jashtë Shqipërisë, se Eskobarit të Ballkanit nuk kemi ç’t’i bëjmë sepse e mbron Ilir Meta. Majde arritën deri aty sa e thanë se e fsheh Meta. Ilir mund ta ketë fshehur, ai mund ta ketë mbrojtur, por ka një problem. Ilir Meta, si kryetar Parlamenti ka zero fuqi ekzekutive mbi Policinë e Shtetit. Ilir Meta as nuk mund ta urdhërojë, as dhe s’mund t’ja bllokojë hetimin asaj. Atëherë, normal lindte ideja që këta po e përdorin, s’po e arrestojnë Balilin vetëm e vetëm që të mund të akuzojnë Metën. Unë nuk e di se çfarë i kanë thënë në Uashington Ilir Metës, por mosarrestimi i Balilit ishte kryekëput mbrojtje që i bënte Edi Rama dhe Sajmir Tahiri. Meta në një moment kërkoi mbledhjen e Këshillit të Sigurisë Kombëtare, për të dëshmuar që janë të tjerët, të cilët po mbrojnë Balilin. U çudita kur pati njerëz që thanë se a duhej kjo mbledhje. Asnjë problem më madhor sot në rrafshin e sigurisë kombëtare se Balili nuk ka. Aq sa ishte Pablo Eskobari për Amerikën Latine, kaq është Balili për Ballkanin, për rajonin. U përpoq Rama me Tahirin duke përhapur lajmin se ja kishin besuar DEA-s arrestimin. DEA është një organizatë që kryeson në botë luftën kundër drogës, por secili vend ka detyrimin të arrestojë trafikantët e vetë. Pra, kjo është një organizatë kriminale. Manjani e tha, por e kam thënë dhe unë në Parlament, se partnerët, mbi bazë dosjesh të paktën tre herë kanë kërkuar largimin e Sajmir Tahirit nga kjo detyrë. Sepse ata kanë konstatuar lidhjet e tij të tmerrshme me krimin. Erdhi shefi i agjencisë qendrore të zbulimit të SHBA, takoi kryepolicin, por nuk takoi ministrin. Pra, nuk i kishte kredencialet për ta takuar.
A e dini pse nuk arrestohet Balili? Se Balili qenka kontraktor kryesor i Habilajve, i drogës së Balilajve, pra i drogës së Tahirit se çfarë është droga e Habilajve është e Tahirit. Këtu e kam informacionin që më ka ardhur këto ditë. Pra, një kupolë e tmerrshme krimi rëndon sot mbi çdo shqiptar. Këto zhvillime faktojnë katërcipërisht se krimi sot është qeveri.

– Zoti Basha deklaroi se SHBA nuk e mbështesin Ramën ndërkohë që në këtë situatë sa e fuqishme duket PD për të përfituar qoftë nga pikëpamja e krediteve qoftë në elektorat?
Unë mendoj se opozita së bashku me qytetarët shqiptarë do t’ja dalë me sukses të plotë të largojë këtë bandë nga qeverisja. Kjo është një bandë, është një organizatë kriminale. Cilido që mund të më thotë jo, i paraqes secilit koncesionet e Beqes, e Gjiknurit, veprimtarinë oskure të Niko Kapuranit, që hiqet si xhentëllmen, por i kapur nga të katër anët më thonë korçarët, nga banda famose e Partisë Siçiliste. Pra, janë qytetarët shqiptarë, të cilët pa diskutim, të udhëhequr nga opozita do të japin verdiktin. Çështja e qëndrimit të SHBA është një çështje themelore sepse Edi Rama, në një akt megakorrupsioni politik, i korruptuar nga Xhorxh Soros, i lejoi vetes të thotë në mediat kryesore të botës sharjet prej një halabaku politik, që s’i tha asnjëri në planet, ndaj presidentit aktual Donald Trump. Unë paraqita në Parlament dokumentet e qarta se si ndryshoi vota nga tetori në dhjetor. Edi Rama për çdo shqiptar përbën një rrezik serioz për sigurinë kombëtare dhe të ardhmen e vendit.

– A shkon Ilir Meta me Edi Ramën në zgjedhje?
Unë mendoj se shkojnë, por nuk mund të them me siguri se cili do të jetë kompozimi i koalicionit të tyre, por çdo lloj kompozimi kam bindjen se opozita e mbështetur nga qytetarët shqiptarë do t’i japë vendin e merituar.

Rebelim kundër elitave të korruptuara ka paralajmëruar kreu i PD, Basha të dielën nga Elbasani, ndërsa ka deklaruar se vala e ndryshimeve politike pritet të përfshijë Shqipërinë.
Basha ishte në Elbasan me rastin e 26-vjetorit të themelimit të PD në këtë qytet, ndërsa garantoi se PD do t’i fitojë zgjedhjet e qershorit. “Lajmi i mirë që vjen nga bota është që vala e ndryshimeve politike po shtrihet kudo dhe do të vijë dhe në Shqipëri. Bota po kalon një tronditje nga themelet, një shkundje, madje disa e quajnë revolucion politik: njerëzit e thjeshtë po rebelohen kundër elitave të korruptuara dhe të shkëputura nga njerëzit dhe hallet e tyre.
Njerëzit kudo po kërkojnë që pushteti të kontrollohet prej tyre dhe të punojë për ta. Është pikërisht kjo frymë që ka përqafuar edhe Partia Demokratike prej muajsh”, tha Basha.
Duke u ndalur tek takimet e zhvilluara gjatë vizitave në SHBA dhe Europë, kreu i PD theksoi se qeveria Rama ka izoluar tërësisht Shqipërinë duke e shndërruar në një vend pa mbështetje politike dhe ekonomike gjithashtu. Basha theksoi se me këtë qeveri marrëdhëniet me SHBA janë të pamundura, ndërsa procesi i integrimit në BE është bllokuar.
“Sikurse e thashë në fillim, isha në një tur të ngjeshur politik në Amerikë dhe në Europë. U takova me drejtues të lartë në Kongresin amerikan, me përfaqësues të lartë të administratës së Presidentit Donald J.Trump, u takova po kështu me drejtues dhe përfaqësues të lartë të qeverive europiane, të Bundestagut gjerman dhe qeverisë gjermane.
Lajmi i parë që sjell me vete është i keq:
Shqipëria është sot më e izoluar se kurrë më parë në këto 2 vite, politikisht dhe ekonomikisht. Nuk jemi të izoluar më nga mbyllja e kufijve si dikur, por jemi të izoluar nga mungesa e interesit dhe e bashkëpunimit me ne.
Sot nuk ka asnjë interes për investime të huaja në Shqipëri. Nuk ka asnjë interes për bashkëpunim ekonomik me Shqipërinë. Mbasi të mbarojnë së ndërtuari edhe të vetmet investime të mëdha që siguroi qeveria jonë, si TAP dhe Devolli, nuk ka më asgjë tjetër.
Për Shqipërinë nuk ka interes dhe mbështetje politike. Marrëdhëniet tona me Amerikën janë të pamundura me këtë qeveri dhe Kryeministër aventurier e të papërgjegjshëm. Procesi i integrimit në BE ka ndalur dhe perspektiva e integrimit është e paqartë”, tha Basha.
Ai shprehu shqetësimin se marrëdhëniet me fqinjët janë më të dobëta dhe më shterpe se kurrë më parë që nga koha e komunizmit.
“Mjafton të shikoni se si i ka dëmtuar interesat e Kosovës ky kryeministër me dalldisjen e tij romantike me Vuçiç.
Për pak i futi në qorrsokak edhe partitë politike që përfaqësojnë vëllezërit dhe motrat tona në Maqedoni. Por nuk ia doli dhe dua të përfitoj nga rasti këtu, nga kjo sallë, nga Elbasani, nyja kryesore e Korridorit 8-të, t’i uroj shqiptarët e Maqedonisë, partitë politike në Maqedoni për lajmet mbi arritjen e marrëveshjes dhe formimin e qeverisë në Maqedoni. Me arritje të rëndësishme me gjuhën shqipe si gjuhë zyrtare në të gjithë vendin. Me përfaqësim dinjitoz në qeverinë e ardhshme maqedonase si garanci për avancimin e të drejtave legjitime të shqiptarëve.
Bota tashmë e njeh mirë gjendjen e Shqipërisë. Fasadat dhe propaganda shterpë qeveritare nuk e fshehin dot më nga sytë e botës, realitetin e dhembshëm shqiptar. Bota e di gjendjen tonë dhe është e shqetësuar. Drejtuesit politikë, institucionet dhe mediat amerikane dhe europiane e njohin gjendjen e krimit të organizuar, të drogës, të kriminalizimit të politikës, të korrupsionit total në Shqipëri.
Dhe ata e kanë bërë të qartë: Kështu nuk mund të vazhdohet më! Deri më sot partnerët e huaj na kanë ndihmuar shumë, shpesh kanë anashkaluar problemet, disa nga problemet tona duke shpresuar se ato janë kalimtare. Por tashmë kemi arritur në një pikë kur partnerët nuk kanë më besim.
Jemi në një pikë kur ata nuk gënjehen më dhe nuk manipulohen më nga propaganda dhe nga gënjeshtrat e atyre që nuk iu skuqet faqja kur mashtrojnë për interesa të tyre.
Këtë ma shprehën qartë si politikanët amerikanë edhe ata europianë.
Tani ka vetëm një rrugë, vetëm një zgjidhje: zgjedhje të lira dhe të ndershme, dhe ndryshim themelor të kursit të Shqipërisë dhe shqiptarëve, një Shqipëri tjetër, demokratike, të shtetit ligjor, një Shqipëri të shqiptarëve, një Shqipëri të qytetarëve, një Shqipëri të njerëzve të lirë”, tha Basha.
Kreu i PD theksoi se, koha e ndryshimit po afron përsëri. “Ora e ndryshimit për çdo shqiptar dhe çdo shqiptare do të thotë t’i japim fund një politike që vendos qeveritarët para qytetarëve. Jo! Të parët do të jenë qytetarët.
PD do t’i fitojë zgjedhjet e qershorit.
Dhe do ta çojmë Shqipërinë përpara duke vendosur të parët qytetarët, duke vendosur të parët njerëzit e thjeshtë. Duke vendosur të parët zhvillimin, progresin, ndryshimin që funksionon për çdo familje dhe jo vetëm për një grusht politikanësh.
Do t’ia dalim kësaj sfide, siç ia kemi dalë përherë. Dhe këtu nga Elbasani ka trokitur përherë një orë ndryshimi që ka shoqëruar çdo shqiptar dhe shqiptare të këtij vendi”, tha Basha.

Mesazhi i SHBA, Brukselit dhe Berlinit për vjedhjen e zgjedhjeve

“Krimi në politikë, korrupsioni total qeveritar dhe vjedhja e zgjedhjeve janë të patolerueshme dhe nuk do të tolerohen as nga Amerika dhe as nga Evropa”. Ka qenë ky mesazhi që kreu i PD, Basha ka marrë në takimet e tij në Uashington e Bruksel në vizitat e zhvilluara në Uashington, në Bruksel dhe në Berlin. Kreu i PD tha se qeverisja Rama ka qenë eksperimenti më i keq politik që kanë provuar shqiptarët në kurriz që nga rënia e komunizmit.
“Edi Rama po shkatërron thelbin e ekonomisë, të shoqërisë dhe të rendit politik të vendit. Modeli i tij është modeli i kapjes së gjithë pushtetit politik, ekonomik dhe mediatik të vendit nga një grup njerëzish, të cilët duan ta mbajnë vendin nën zgjedhën e tyre me çdo kusht”, tha kreu i PD.
Duke theksuar se Elbasani është një nga rastet më të dukshëm të dështimit të kësaj qeverie, Basha përmendi autostradën Tiranë–Elbasan, si dhe zhvatjen e parave publike përmes landfillit.
“Ne e filluam, ndërtuam tunelin dhe pjesën më të vështirë. Edi Rama duhet vetëm të mbaronte pjesën më të lehtë. Por nuk investoi në të. Investoi në fasada.
Kjo autostradë ndryshon ekonominë dhe çdo gjë në Elbasan, sepse ajo e lidh Elbasanin me ekonominë e Tiranës. Për një qytet të goditur keq nga mungesa e mundësive ekonomike, nga papunësia, autostrada është jetike. Por nuk është ky prioriteti i Ramës. Prioriteti i tij është t’u shërbejë miqve me milionat e qytetarëve.
Në Elbasan është ndërtuar një landfill dhe tani duan të bëjnë edhe inceneratorin. Ky landfill financohet me miliona euro nga buxheti dhe lekët e qytetarët. Ky landfill është ngritur nga klientët e Edi Ramës për të zhvatur paratë publike, jo për të zgjidhur problemin e mbetjeve dhe të ndotjes.
Shikoni qendrën e Elbasanit, dhe shikoni rrugët pak metra nga qendra në çfarë gjendje të mjeruar që janë. Sepse Edi Rama dhe Sejdini i tij mendojnë për fasadat, jo për njerëzit. Kjo është arsyeja pse shumica dërrmuese e elbasanllijve nuk mbyllin dot muajin. Mijëra familje pa punë, pa lekë. Pa lekë, pa punë, pa të ardhme. Faturat e energjisë në qiell, nafta, taksat, çmimet në qiell. Por lekë nuk ka. Punë nuk ka.
Nuk ka për njerëzit e thjeshtë. Nuk ka për ata që shtyhen drejt dëshpërimit ekstrem. Nuk ka për nënat dhe baballarët që ulin kokat para fëmijëve.
Por, ka lekë për derrat e pushtetit. Ka miliarda lekë për një grusht pushtetarësh dhe miqtë e tyre hajdutë. Të ngopur e të nginjur me fondet publike të buxhetit të shtetit. Lekët e popullit të varfër i kanë bërë pasuri për veten e tyre.
Sepse pushtetin e kanë vetëm për t’i shërbyer vetes. Vetëm për t’u pasuruar. Kapardiset Kryeministri mbi varfërinë, mjerimin dhe krizën së solli për një popull të tërë. Kapardiset nëpër ekspozita dhe qejfe dhe udhëtime luksoze me lekët e popullit. Kapardiset nga zyra i rrethuar me piktura dhe luks. I izoluar në botën e tij të luksit sulmon opozitën, sulmon mediat, sulmon gazetarët. Fyen dhe shan me arrogancë hajduti çdo qytetar që e ballafaqon me të vërtetat.
Tani që ka vajtur aty ku s’mban më, i quan qenër edhe ministrat që guxojnë më në fund të pohojnë atë që opozita dhe qytetarët kanë 3 vjet që denoncojnë me zë të lartë: Krimin e veshur me pushtet. Pushtetin e veshur me krim.
Kjo është e vërteta, ky është realiteti dhe ju gjithë këtë e dini mirë”.

PD, veting kandidaturave për deputetë

Partia Demokratike ka filluar një proces të hapjes, të gjithpërfshirjes dhe të kalimit të pushtetit nga drejtuesit e lartë tek anëtarët, nga Kryetari tek baza e partisë. Basha bëri të ditur se ky proces do të sigurojë që drejtuesit dhe të zgjedhurit e PD-së të jenë përfaqësues të denjë të anëtarëve të PD dhe qytetarëve dhe të punojnë për interesin publik dhe jo atë privat, ndërsa paralajmëroi se kandidaturat e PD të propozuara për deputetë do t’i nënshtrohen procesit të vetingut.
Ai theksoi se kjo qasje e re do të zbatohet fillimisht me përzgjedhjen e listës së kandidatëve demokratë për deputetë. “Sikurse e dini të gjithë, për herë të parë në historinë tonë politike anëtarët dhe mbështetësit e PD-së po propozojnë kandidaturat për deputetë.
Unë ju nxis të gjithëve që të identifikoni njerëzit më të aftë, më të denjë mes jush dhe t’i propozoni lirisht në këtë proces.
Kur ky proces të përfundojë, do të nisë kontrolli i brendshëm, vetingu i brendshëm i kandidaturave të propozuara. Partia Demokratike në mënyrë vullnetare do të kryejë vetingun e figurës të përfaqësuesve të vetë politikë.
Me këtë proces ne do të garantojmë që deputetët demokratë nuk do të jenë të lidhur me krimin, nuk do të jenë të korruptuar apo pa integritet. Ky proces do të mundësojë që ata të jenë të aftë profesionalisht dhe të denjë politikisht për t’u përfaqësuar ju dhe qytetarëve të Shqipërisë dhe Elbasanit”, tha kreu i PD.
Basha deklaroi se vetingu do të përfshijë dhe të shkuarën e kandidatëve gjatë komunizmit, ndërsa theksoi se mes deputetëve të PD-së nuk do të ketë ish-punonjës të Sigurimit të Shtetit dhe as funksionarë të gjyqeve politike të diktaturës. “Procesi në tërësi do të sigurojë që PD të jetë e hapur. Por mbi të gjitha do të garantojë që karriera në PD të sigurohet vetëm përmes fitimit dhe ruajtjes së besimit dhe mbështetjes së anëtarëve dhe qytetarëve, anëtarit dhe qytetarit, jo kryetarit.
Pushteti është i njerëzve, është i anëtarëve dhe Partia Demokratike do të jetë e mbështetur mbi këtë proces. Në të gjithë këto procese historike që ne po përqafojmë duhet të jemi bashkë. Hapja dhe gjithëpërfshirja duhet të na bëjë më të bashkuar dhe më të lidhur, sepse sot ka më shumë arsye për t’ju bashkuar dhe për të qenë pjesë e PD-së”, u shpreh kreu i PD.
Basha garantoi se të gjithëve do t’u jepet mundësia dhe ndershmëria për të konkurruar është ajo që ofron PD. “Ata që mbështetjen ndaj PD e kushtëzojnë vetëm me futjen në lista deputetësh nuk kanë interesin e PD-së apo të anëtarëve të saj, por kanë vetëm interesin e tyre. Ata që e duan PD-në vetëm kur janë në poste apo në ofiqe, nuk punojnë për PD, por vetëm për veten dhe për pasurimin e tyre. Nëse dashuria për PD-në është e lidhur me futjen në lista deputetësh, kjo është dashuri e shtirë. Ndaj kushdo që merr përsipër që të bëjë opozitën e opozitës, nuk i shërben njerëzve dhe kauzës së tyre, por qeverisë dhe kastës së korruptuar që është në fuqi. Por sot të gjithë demokratët janë të bashkuar e janë të bashkuar jo vetëm për të mirën e opozitës, për të mirën e PD, por për të mirën e Shqipërisë”, tha Basha, ndërsa shtoi se në PD ka vend për të gjithë dhe është sot e hapur për të gjithë.

A.Shahini