27.5 C
Tirana
E shtunë, 23 Gusht, 2025
type here...

Kërcënohen nga Rama, japin dorëheqjen anëtarët e KED

Kreyeministri Edi Rama, duke folur gjate nje seance parlamentare, ku eshte diskutuar projektligji per autoritetet e drejtimit dhe komandimit ne Forca e Armatosura te Shqiperise./r/n/r/nPrime Minister Edi Rama, speaks during a parliamentary session.

Armand MAHO

Fushata e egër për të kapur gjyqësorin është kthyer në gjueti shtrigash, ku sulmin e orkestron dhe e dirgjon direkt Edi Rama i ndihmuar dhe nga mediat që ai ka nën urdhra
Kërcënimet dhe shantazhet të kryera direkt nga Edi Rama, po çojnë në dorëheqjen e gjyqtarëve, që u përzgjodhën me short për anëtarë të Këshillit të Emërimeve në Drejtësi (KED). Pa kaluar as dy ditë nga hedhja e këtij shorti dha dorëheqjen nga detyra dhe gjykatësi veteran Vladimir Kristo, anëtar i Gjykatës Kushtetuese, i cili kritikoi ashpër vettingun e servirur nga Rama, duke e cilësuar si minues të besimit që publiku ka tek gjykatat. Kristo është gjyqtari i dytë që jep dorëheqjen pas shortit të dy ditëve më parë për anëtar në Këshillin e Emërimeve në Drejtësi, ku rezultoi fitues. Më parë kishin dhënë dorëheqjen nga detyra një prokuror dhe katër gjyqtarë të tjerë, mes të cilëve Mirela Fana edhe kjo e përzgjedhur nga shorti i dy ditëve më parë. Në fakt nuk është rasti që pikërisht ditën që u hodh shorti, dha dorëheqjen dhe ministri i Drejtësisë Ylli Manjani. Mosdakortësia e Ramës u vu re nga deklarata që dha atë ditë deputetja socialiste Vasilika Hysi, kur tha se gjykatat dhe prokuroria nuk kanë përpiluar lista të “ndershme”.  Kërcënimeve të Ramës nuk i kanë shpëtuar dhe gjyqtarë e prokurorë të tjerë, që ai si ka shumë për zemër. Në Vlorë u dorëhoq dhe kryetari i Gjykatës së Apelit të këtij qarku Ilir Çeliku, i emëruar në këtë post në nëntor nga KLD. Në Tiranë u dorëhoq gjyqtari Ilir Pashaj, në Kukës Drita Velaj, ndërsa në Krujë prokurori Sulejman Tola. Duket se fushata e egër për të kapur gjyqësorin është kthyer në gjueti shtrigash, ku sulmin e orkestron dhe e dirgjon direkt Edi Rama i ndihmuar dhe nga mediat që ai ka nën urdhra. Pasi i vuri për muaj të tërë nën survejim nga policia e Tahirit dhe kur pa që s’mund t’i nënshtronte, Rama ka marrë vetë frenat e shantazhit direkt, duke i kërcënuar ata që ta japin me çdo kusht dorëheqjen nga pozicioni që kanë. Me një gjuhë të denjë për kumbarët e mafias, ai nuk lë rast pa i kujtuar trupës gjyqësore dhe prokurorëve Vettingun e tij të famshëm.

Kërcënimi i hapur

Por zellin e tij për të futur në dorë gjyqësorin me anë të shantazhit, Rama e shfaqi dhe dje, kur përshëndeti dorëheqjet e gjyqtarëve në faqen e tij zyrtare në rrjetet sociale. Ja se çfarë shkruan Rama: “Përshëndes largimet vullnetare të gjykatësve/prokurorëve që s’duan të kalojnë vetingun! Drejtësia e Re nuk kapet dot si e Vjetra që po bie!”. Të njëjtën gjë e përsëriti dhe në një takim të djeshëm kur tha se nuk është dakort me gjysmën e atyre që u përzgjodhën sipas ligjit, duke i paralajmëruar publikisht se do të shkarkohen në rast se nuk japing dorëheqjen “Kjo drejtësi e korruptuar, që të kujton atë shprehjen e vjetër “jep shpirt, po s’heq dorë”, siç u pa edhe nga shorti që u hodh aty, ku gjysma e tyre janë për të shkuar në shtëpi, sapo të fillojë ligji i Vetting-ut”. Cili kryeministër apo president në ndonjë vend të botës mund të përshëndesë dorëheqjen e gjyqtarëve të tij, përveç se në vendet ku sundon mafia dhe krimi i organizuar?

Akuzat e Manjanit

Në fakt loja sapo është hapur. Mjetin e shantazhit e paralajmëroi një ditë më parë në ditën e dorëheqjes dhe ish-ministri i Drejtësisë Ylli Manjani, kur akuzoi direkt kryeministrin për shantazh ndaj trupës gjyqësore. Manjani tha se është Rama ai që merr direkt në telefon gjyqtarët për të burgosur persona të ndryshëm. “Pse duhet t’i telefonohet gjyqtarit që të fusë njerëz në burg, pse duhet t’i bëjë këto qeveria? Cila qeveri demokratike i bën këto? Imagjinoni Angela Merkel-in të marrë në telefon një gjyqtar dhe t’i thotë më fut në burg një katundar. Ç’janë këto histori”. tha Manjani. Por ish- ministri nuk do ndalej me kaq. Ai konfirmoi dhe një herë shqetësimin e ngritur se trupa e gjyqtarëve dhe prokurorëve janë vënë nën vëzhgimin e policisë prej kohësh, që kur u përgatit skenari për të kapur drejtësinë. “Pa diskutim që ne duhet ta bëjmë Reformën në Drejtësi, pa diskutim që gjykata duhet t’i përgjigjet sfidave të sotme, pa diskutim që duhet bërë Vetingu, pa diskutim që gjykata duhet të pastrohet, pa diskutim që na duhet një gjykatë krejt tjetër, nga kjo që kemi deri më sot, sepse ato kanë mëkatet e veta, por mëkati i tyre kryesor është se nuk godasin qeverinë. Se para se të shohim vilat e gjyqtarëve, duhet të shohim vilat tona. Kush do na i shohë vilat tona, gjyqësori i kapur? Prokurori që nuk guxon, sepse shahet me libër shtëpie. E dini, që prokurorët gjurmohen nga trupa operacionale speciale të policisë pa urdhër”, do shprehej ish-ministri i Drejtësisë.

Pas shortit të  KED, Rama kërkoi shkarkimin e Manjanit

Por pakënaqësia e Ramës u vu re që në deklaratat e asaj dite, ku deputetja socialiste Vasilika Hysi, një bashkëpunëtore e vjetër e fondacionit Soros në Shqipëri, u shpreh e pakënqaur me procedurën që u ndoq për përzgjedhjen e anëtarëve të KED. Hysi do të shprehej se listat e dërguara në Kuvend ishin përpiluar në mënyrë “të pandershme” nga trupa gjyqësore dhe Prokuroria. Në fakt, kjo deklaratë s’mund të përkthet ndryshe vetëm se listat që i janë dërguar Kuvendit, sipas Hysit nuk kanë marrë pëlqimin e Ramës. Kjo ka bërë që të shpërthejë një valë zemërimi i Ramës, i cili po atë natë i kërkoi Metës shkarkimin e Ylli Manjanit, me paranojën se ai është “puçisti” që i ka minuar Ramës dhe kapjen e sistemit të gjyqësorit, megjithëse Meta ishte vetë i pranishëm në shortin e hedhur. Duket qartë tashmë, se etja për të pasur pushtet të pakufishëm në të gjitha qelizat e shoqërisë po e bën kryeministrin të papërmbajtshëm. Njeriu, i cili nuk pranon asnjë kundërshti, dhe asnjë pushtet që është jashtë kontrollit të tij po hidhet në sulm për ta kapur drejtësinë in bllock. Eshtë pikërisht alarmi që opozita e ka dhënë prej kohësh, se Vettingu ashtu siç është i hartuar s’mund të jetë gjë tjetër vetëm se arma e Ramës për të shantazhuar në çdo qelizë sistemin gjyqësor, pasojat e të cilit janë parë këto ditë me dorëheqjet e gjyqtarëve, ndërsa kulmi do ishte shkarkimi i Manjanit.

Organizatat e Soros “detyruan” Xhafën të ripërsërisë garën për Avokatin e Popullit

Në ditët e fundit të vitit të shkuar Komisioni i Ligjeve vendosi që të rihapë edhe një herë garën për kandidimin e atyre që synojnë të marrin postin e rëndësishëm të Avokatit të Popullit. Por duket se ashtu si fillimisht në Reformën në Drejtësi, edhe në këtë “puç institucional” kanë dorë organizatat e Sorosit në Tiranë. Është zbuluar së fundmi një dokument, në të cilin tregohet se kanë qenë pikërisht këto klone të Sorosit që kanë ndërhyrë te kreu i Komisionit të Ligjeve, Fatmir Xhafa, për të rihapur edhe një herë procesin e regjistrimit të kandidatëve pasi ai ishte mbyllur një herë, në kundërshtim të plotë me ligjin. Dhe në fakt ashtu u bë, siç donin sorosianët e Tiranës. Tashmë në lojë janë futur, edhe ata që kërkon kryeministri Rama me çdo kusht, që të bëhen Avokat i Popullit.
Në atë kohë ishte Partia Socialiste që këmbënguli në rihapjen e garës për aplikimet për Avokat të Popullit me pretendimin se të interesuarit nuk ishin njoftuar siç duhet. Në një mbledhje jashtë radhe, Komisioni i Ligjeve, që është dhe komisioni përgjegjës, vendos mes debatesh rihapjen e garës dhe shtrirjen e afatit për aplikimet me 20 ditë. Lëvizja Socialiste për Integrim përmes anëtarit të saj në Komisionin e Ligjeve, Petrit Vasili, kundërshtoi socialistët që argumentonin se kishte më shumë të interesuar se sa 3 personat që kishin aplikuar brenda afateve ligjore. Anëtarët e LSI në Komisionin e Ligjeve votuan kundër rihapjes së garës, që siç shihet u ka dhënë mundësinë të aplikojnë edhe shumë të interesuar të tjerë.
Avokati i Popullit zgjidhet me 84 vota, ndërsa PD tha se kandidati për Avokat të Popullit i takon asaj sipas një marrëveshjeje të bërë vite më parë kur PS ka qenë në opozitë. Përveç pretendimeve të Partisë Demokratike, se sipas një marrëveshjeje të bërë 5 vjet më parë Avokati i Popullit i takon opozitës, duket se ka një rivalitet të hapur edhe mes Partisë Socialiste dhe Lëvizjes Socialiste për Integrim. Ilir Meta mbështet hapur Igli Totozanin dhe Lefterie Luzin.
Por Edi Rama me futjen në lojë të Genci Gjonçajt dhe kunatës së ministrit Bled Çuçi, i ka lënë për të kuptuar aleatit të tij se Avokatin e Popullit e do për vete dhe vetëm për vete. Edhe ky luan me gur rezervë, sepse në listë është edhe një familjar i një prej ministrave të tij. Në fakt ajo që e bën Ramën të hapë këtë lloj lufte të re ndaj aleatit të tij janë kompetencat e reja kushtetuese, që merr ky institucion pas Reformës në Drejtësi. Kjo përplasje nuk bëhet për emra, por për të pasur njerëzit e tyre dhe kontroll në procesin e Vettingut.
Prandaj duket se Rama e ka ndarë mendjen, që ta shkelë marrëveshjen e kërkuar vetë 5 vite më parë kur ishte në opozitë që Avokati i Popullit të propozohet gjithmonë nga opozita. Dhe kjo u duk që kur këmbënguli në rihapjen e garës me pretendimin, se të interesuarit nuk ishin njoftuar siç duhet, duke shkelur hapur ligjin. Pavarësisht kundërshtimeve edhe votave kundër të aleatit të saj LSI-së, e cila e kishte nuhatur qëllimin e vërtetë të kryeministrit, me shumicë votash u vendos shtrirja e afatit për aplikimet me 20 ditë. Dhe kështu ndodhi, shtyrja u bë vetëm për një emër që në fakt siç del edhe nga dokumenti që po botojmë sot, ka dalë nga rrjeti i organizatave të Sorosit që veprojnë fuqishëm në Tiranë.

Rama, 1.5 miliardë euro koncesione para zgjedhjeve

Kryeministri Edi Rama, Ministri i Zhvillimit Ekonomik, Turizmit, Tregtise dhe Sipermarrjes, Arben Ahmetaj dhe Ministri i Financave Shkelqim Cani, gjate nje takimi me strukturat tatimore te perfshire ne aksionin kunder informalitetit dhe evazionit fiskal./r/n/r/nPrime Minister Edi Rama, Minister of Economic Development, Tourism, Trade and Entrepreneurship, Arben Ahmetaj and Shkelqim Cani, Minister of Finance, during a meeting with tax structures involved in action against informality and tax evasion.

Kryeministria Edi Rama dhe ministri i Ahmetaj lajmërojnë dhënien e koncesioneve masive në 5 muajt në vijim sipas formës me partneritet publik privat- me një vlerë investimi 1 miliard euro. Kryeministri e prezantoi skemën e investimeve në një takim të posaçëm me sipërmarrës dhe bankat. Koncesionet do të jepen vetëm pak javë para zgjedhjeve parlamentare dhe ato janë një rast i paprecedent.
Para largimit nga qeveria Rama thotë se do të ushqejë mirë klientelën e tij me qëllim të sigurimit të përfitimeve personale për një kohë të gjatë. Edhe pasi të shporret nga pushteti.
Skema e investimit është e tillë: Projektet do të jenë në bashkëpunim me sipërmarrjen dhe bankat në vend, duke shtuar kapital nëpërmjet investimeve private.
Rëndësia e këtij projekti lidhet me faktin se nuk do të shtojë borxhin, ka nënvizuar Rama.
Në bazë të prioriteteve të qeverisë, sipërmarrjet do të hartojnë projektet. Dy vitet e para, sipërmarrjet do të financojnë vetë projektin dhe pas vitit të tretë qeveria do të fillojë të shlyejë detyrimet.
Ministri i Financave, Arben Ahmetaj, tha se  partneritetet publike private tani do të jepen me procedurë të përshpejtuar, brenda 130 ditëve, duke lehtësuar kështu procesin e dhënies me koncesion.
Kjo është parë si një mundësi strategjike, nga ana e Shoqatës së Bankave, për të pasur shërbime më të mira.
Rama, shtoi se projekti është i fuqishëm edhe se bankat janë shumë likuide dhe do të mundësojnë  financimin e projekteve të mëdha dhe bindëse me garancitë përkatëse.
Programi do të koordinohet nga zv.kryeministri, Niko Peleshi dhe ne jemi të gatshëm të japim të gjithë informacionin. Legjislacioni aktual i ka të gjithë hapësirat për të garantuar programin, ndërsa për projektet që shkojnë përtej një volumi të caktuar, do t’i drejtohemi Parlamentit. Për projekte më të vogla, kjo nuk do të jetë e nevojshme. Kemi hartuar një udhërrëfyes me hapat që do të ndiqen, ka shtuar Kryeministri. Udhërrëfyesi ka dhe modelet e kontratave standarde, instrumentet dhe hallkat që duhen të ndiqen. Për një pjesë të madhe të këtyre prioriteteve ne do të na duhet projekti nga sipërmarrjet. Është një program ambicioz që kërkon koordinim të mirë, ka përfunduar Rama.
Nikolin Jaka, nga Dhoma e Tregtisë dhe Industrisë, tha se mirëpresin këtë projekt, por ajo çfarë ngelet për të diskutuar me kujdes është se sa fleksibël dhe si do të jetë marrëdhënia e sipërmarrjes me sistemin bankar. Gjithsesi shpresojmë që sistemi bankar të jetë më fleksibël. Duhet të dimë se kush janë prioritetet e qeverisë që sipërmarrja të bëjë projektet bazuar mbi to, ka shtuar Jaka.
Rama, kemi të përgatitur listën e prioriteteve dhe do t’i vihet në dispozicion të gjitha bankave.
Alban Zusi, nga Shoqata e Eksportuesve, tha se prioritet duhet të jetë dhe investimi në shërbimet e munguara në vend, në mënyrë që të kanalizohen investimet dhe burimet financiare të biznesit, të cilat në ekonominë tonë duhet thënë se janë të kufizuara. Vlerësojmë shumë të rëndësishme prioritetin e dhënë ndaj arsimit dhe shëndetësisë, por duhet dhënë prioritet dhe bujqësisë. Duhet përmirësuar infrastruktura në bujqësi, kjo do të jetë shumë e rëndësishme. Konsideroj shumë të rëndësishme që PPP të futet dhe në shërbimet e munguara, siç është fusha e sigurisë ushqimore ku 60% e produkteve shqiptare janë të paeksportueshme për shkak se mungon ky shërbim.

Freedom House: Shqipëria më pak e lirë se më parë

Shqipëria është një vend pjesërisht i lirë. Raporti për vitin 2017 i Freedom House e rendit Shqipërinë në vendin e 68 nga 195 vende të marra në analizë. Kjo renditje është më e ulët se e një viti më parë, ku ishim të 67-t.
Sa u përket të drejtave politike, Shqipëria merr 3 pikë (vlerësimi 1:7, ku 1 është më e lira dhe 7 më pak e lira). I njëjti vlerësim vlen edhe për të drejtat civile (3:7).
Ky është viti i 11 që organizata Freedom House boton këtë raport.
Edhe Kosova, në këtë raport, kategorizohet në mesin e vendeve “pjesërisht të lira”, ashtu siç ishte edhe vitin e kaluar.
Në vendet që raporti cilëson si të “lira” renditen vende të tilla si: Brazili, Republika Çeke, Danimarka, Franca, Hungaria, Polonia, Serbia, Afrika e Jugut, Koreja e Jugut, Spanja, Tunizia dhe Shtetet e Bashkuara të Amerikës. Nga 195 shtete të marra në vlerësim, 87 (45%) janë klasifikuar si të “lira”, 59 (30%) si “pjesërisht të lira” (ku përfshihet edhe Shqipëria) dhe 49 (25%) si “jo të lira”. Lindja e Mesme dhe Afrika e Veriut kanë renditjen më të keqe në botë për vitin 2016, të ndjekur nga afër nga Euroazia.
Një prej shkelësve më të mëdhenj në vitin 2016 ishte Rusia, vlerëson Freedom House.
“Rusia, në paraqitjen e jashtëzakonshme të arrogancës dhe armiqësisë, ka ndërhyrë në proceset politike në Shtetet e Bashkuara dhe demokracitë e tjera, e ka përshkallëzuar mbështetjen e saj ushtarake për pushtetin diktatorial të Bashar al-Assadit në Siri dhe e ka forcuar okupimin e saj ilegal në territorin e Ukrainës”, thotë raporti.
Sa i përket Ballkanit, raporti “Liria në botë 2017” vlerëson se proceset korrekte zgjedhore dhe sundimi i ligjit janë përkeqësuar edhe më tutje, derisa Bashkimi Europian e ka neglizhuar rolin e vet në promovimin e demokracisë në mesin e shteteve që synojnë pranim.
Përfaqësues të organizatës Freedom House thonë se kanë “shqetësime, meqë duket se BE-ja dhe SHBA-të janë më tepër të fokusuara në çështjet e brendshme”. Në këtë aspekt, zëdhënësja e grupit Freedom House, Sarah Repucci, tha:
“Këtë vit, ne jemi veçanërisht të shqetësuar, pasi duket sikur Bashkimi Europian dhe Shtetet e Bashkuara mund të jenë më tepër të shqetësuara për çështjet e brendshme sesa të shërbejnë si shembull për vendet e tjera ose për t’i ndihmuar demokracitë e tyre. Pra, është shqetësim veçanërisht për ato vende, që janë në krahun lindor të Rusisë dhe po ashtu, në Ballkan, ku ne mund të fillojmë të shohim më tepër lëvizje të kundërta”.
Në raport argumentohet se demokracitë madhore “janë të zhytura në ankth dhe pavendosmëri, pas zhvillimeve siç ishte votimi për dalje të Britanisë nga BE-ja” dhe “përfitimet nga partitë ksenofobike nacionaliste gjetkë në Europë, si dhe fitorja e Donald Trump-it në zgjedhjet presidenciale në Shtetet e Bashkuara”.

Kosova, kreditë e këqija u ulën në 5.1%

Banka Qendrore e Kosovës (BQK) deklaroi se sektori bankar regjistroi rënie të kredive joperformuese dhe përmirësim të mbulimit të tyre me provigjone. “Pjesëmarrja e kredive joperformuese në gjithsej kreditë e sektorit u zvogëlua në 5.1 për qind si rezultat i rënies vjetore prej 18.7 për qind të vlerës së kredive joperformuese, si dhe përshpejtimit të rritjes së gjithsej kredive. Kjo ndihmoi edhe në rritjen e mbulueshmërisë së kredive joperformuese me provizione, e cila u rrit në 122.1 për qind”, thuhet në raportin e fundit të BQK-së, për Vlerësimin Tremujor të Ekonomisë. Sipas BQK-së, sektori vazhdon të ketë nivel të lartë të kapitalizmit, me treguesin e mjaftueshmërisë së kapitalit që qëndroi në 18.3 për qind në shtator 2016. “Treguesi i likuiditetit shënoi rënie në krahasim me vitin paraprak, si pasojë e zbatimit të normës negative të interesit në rezervat e mbajtura nga bankat komerciale në BQK mbi rezervën e detyrueshme, e që rrjedhimisht ndikoi në zvogëlimin e vlerës së parasë së gatshme dhe bilancit me BQK-në gjatë kësaj periudhe. Megjithatë, sektori bankar vazhdon të shfaqë pozicion të kënaqshëm të likuiditetit”, thuhet në raportin e fundit të BQK-së, për Vlerësimin Tremujor të Ekonomisë.

Remitancat në Kosovë përdoren për mbijetesë

Mbi gjysmë miliard euro llogariten remitancat në Kosovë. Por, këto para, sipas ekspertëve, kryesisht janë destinuar për mbijetesën e familjeve dhe shumë pak për investime në biznes. Remitancat sipas të dhënave të Bankës Qendrore të Kosovës, vijnë kryesisht nga Gjermania dhe Zvicra, vende nga të cilat dërgohen 35.1 për qind, përkatësisht 24 për qind të totalit. Eksperti i çështjeve ekonomike, Ismail Kastrati, në një prononcim për Radion Europa e Lirë, thotë se dërgesat e emigrantëve kanë ndikuar në zbutjen e varfërisë dhe në mirëqenien e familjeve në Kosovë, vite me radhë. Megjithatë, tani sipas tij, është koha që t’iu ndërrohet orientimi këtyre mjeteve. “Remitancat janë një faktor i rëndësishëm për përmirësimin e gjendjes sociale dhe të konsumit në Kosovë, por ne duhet të bëjmë përpjekje që remitancat të marrin një karakter tjetër, karakterin zhvillimor. Remitancat do të duhej të shërbenin më shumë për investime, sesa për një gjendje të mbijetesës ekonomike apo sociale”, thekson Kastrati. Që këto mjete të diasporës të orientohen në investime në sektorë të ndryshëm ekonomikë, autoritetet e vendit, thekson Kastrati, duhet të krijojnë një ambient të favorshëm biznesor. “Për këtë, qeveria e Kosovës duhet të ketë një rol të rëndësishëm përmes bashkëpunimit dhe komunikimit me diasporën ekonomikisht më të fuqishme dhe përmes krijimit të një ambienti më të favorshëm biznesor brenda Kosovës”, shton Kastrati. Gjatë vitit të kaluar, përfaqësues të bizneseve të Kosovës thanë se kanë zhvilluar takime me diasporën e Kosovës nëpër vende të ndryshme të botës. Kryetari i Aleancës Kosovare të Biznesit, Agim Shahini, në një prononcim për Radion Europa e Lirë thotë se edhe diaspora është e interesuar që këtyre mjeteve t’iu ndërrohet orientimi, por se duhet të krijohen kushte për ata investitorë potencialë. “Gjithë ato mjete që ne i marrim nga diaspora pothuajse mbi 90 për qind shkojnë në konsum e ai konsum i dedikohet pothuajse më shumë se 50 për qind të importit të produkteve nga Serbia, dhe kapitali i diasporës po shkon në Serbi e ky është një shqetësim i madh i diasporës që ata e kishin ngritur në një Forum ekonomik në Austri”, ka bërë të ditur Shahini. Të dhënat e Agjencisë të Statistikave të Kosovës tregojnë se Serbia vazhdon të jetë importuesi kryesor në Kosovë, me 14 për qind. Emigrantët kosovarë që jetojnë në vende të ndryshme të botës vite më parë patën shprehur interesim për të krijuar fonde të veçanta zhvillimore, por deri më tani nuk ka pasur asgjë konkrete. Nga ekspertë të fushës ishte vlerësuar që marrëdhënia me diasporën kosovare të kalojë nga një marrëdhënie e solidaritetit në një marrëdhënie të ekonomisë të tregut, ku emigrantët do të investojnë fondet e tyre, Kosova duhet të bëhet një vend ku sundon ligji, ku zhvillohet luftë e ashpër kundër korrupsionit dhe ku mbizotëron një mjedis i favorshëm për biznes.

Faqja e pare

Vrasja e Ministrit

Frrok ÇUPI

Ky ishte dëmi më i vogël që ndodhi sot.
Në historinë tonë të re kombëtare janë shënuar disa si kjo, kjo është vrasja e katërt “në gjueti”.
E para ishte në “Gjahun e Malësorëve” që me sa duket ishin malësorë të Skraparit (edhe pse ka emra Gjergj e Gjon),  përderisa ngjarja zhvillohet në malin e Tomorit. Konstandin Kristoforidhi e shkroi tregimin në vitin 1844 por që mundi ta shikojë dritën e botimit pas gjysmë shekulli. Sipas studiuesve, ka dy arsye pse nuk u botua deri atëherë: E para, se Kristoforidhi ishte i frikësuar ndaj skraparllinjve dhe prandaj ua transplantoi emrat, nga bektashinj në emra katolikë të Veriut (dhe kjo u quajt përrallë e pasinqertë). Dhe e dyta se në tregim nuk ka konflikt, domethënë nuk ka vrasje, vetëm tentativë.
Vrasja e dytë shënohet në një teatër amatoresk me gjuetinë e kryeministrit komunist, i cili vriste derra dhe poshtëronte njerëz.
Në vrasjen e  tretë, që ishte prej vërteti, u vra kryeministri. Dhe, e katërta, tani, kur u “vra” ministri i Drejtësisë; nga e njëjta parti që vrau Mehmet Shehun. Partia Socialiste (ish komuniste) sot vrau “gjahun” e shokut, dmth., të aleatit. Tërë jetën, në kulisat bllokmene, kështu ka ndodhur.
Po të mos ishte “vrarë” Ministri i Drejtësisë që në mëngjes, mbrëmja mund të kishte ardhur shumë e rëndë.
Çfarë do të kishte ndodhur deri në mbrëmje?
1.
Në tentativën për të vrarë Klement Balilin, që është mision i të dy palëve, ka shumë frikë. Klement Balili, një viktimë e veprave shtetërore, mban me vete shumë fakte, shumë prova, shumë sekrete. Këtu në Shqipëri, siç thonë në të folmen gegnishte “asht ba nami” me krimin dhe me drogën këto pak vitet e fundit. Klementi iu ka shërbyer, dhe më në fund “e prenë në besë”. Sipas ligjeve në mafie, Balili është i destinuar për një fat shumë të keq. Me siguri ai e di këtë, por nuk ka ku të dorëzohet. Gruaja e tij tha po kështu, publikisht: “Ku të dorëzohet burri, te politika?…”. Me siguri kjo provë është shënuar në analet e studiuesve kriminalë botëror.
Të dy palët, pa dyshim, e dinë vendndodhjen e të kërkuarit Klement Balili- i shpallur nga shteti fqinj si “Escobar i Ballkanit”. Po të mos ishte kështu, Ilir Meta nuk do t’i kërkonte presidentit të Republikës që të mblidhte Këshillin e Lartë të Sigurisë “për të kapur” Balilin… Por sepse qeveria e socialistëve mund ta përdorë Balilin që të flasë çfarë di për Metën. Për t’i mbyllur gojën, sillet në qeli, ku flet me “prokurorët”, jo me Ramën… Po të mos ishte “vrarë” ministri i drejtësisë (i LSI) sot në mëngjes, do të kishte shanse që të zbatohej  skema e Metës që me dorën e presidentit të kontrolloheshin dëshmitë e Balilit. Prandaj kryeministri vrapoi që në mëngjes në zyrën e kryetarit Meta për të kërkuar kokën e ministrit Manjani.  Kryeministri ka menduar se fitoi, por në fakt ka thelluar greminën e tij.
3.
LSI e Ilir Metës bëri një hap të favorshëm për integritetin e saj. Shumë kush tha  “humbi Meta”, sepse rivali i “vrau” një ministër. Me siguri Ilir Meta ka qeshur dhe ka heshtur pse skema funksionoi në dobi të tij.  Shkarkimi i ministrit të Drejtësisë, Manjani, nga dora e kryeministrit, është provë në dorë të aleatit numër Dy qeverisës. Që sonte, me siguri, Ilir Meta ka tentuar të kontaktojë me aleatët e mëdhenj Perëndimor, ku hyn edhe Amerika; dhe t’u provojë se kryeministri po shkarkon ministrat që e kanë denoncuar për lidhjet e Policisë me krimin, për “urdhrat fiktiv të kryeministrit në vjedhjen e fondeve”, për ndërhyrjen në Drejtësi, etj. Ylli Manjani ishte më aktivi në denoncimin e mbjelljes së vendit me drogë nën kujdesin e policisë, për aferat e rënda korruptive, për ‘moçalin’ e qeverisë.
4.
Gjithë ngjarja e “Gjahut të… qeveritarëve”, (jo e Kristoforidhit) ka një lidhje me Perëndimin, sidomos me Shtetet e Bashkuara. “Vrasja” e ministrit ishte më e vogla që ndodhi sot, dhe që shpëtoi ngjarje të tjera tronditëse. Sot mund të ishte kapur Klement Balili, ose jo kapur i gjallë… Sot mund të ishte rrëzuar qeveria…. Sot aleati numër Dy kishte shansin ta dërgonte vendin në qeveri teknike ku garantoheshin zgjedhje më të ndershme. Por u zgjodh gjëja më e thjeshtë: Manjani.
Në qeveri ka shumë nervozizëm dhe nxitim- siç e shikoni me ditën e  sotme. Njëri nga aleatët- LSI po nxiton për t’i dhënë besim administratës së re të Presidentit Trump në Amerikë. Por nis një hap…, dhe kthehet, nuk ka siguri. Nis të rrëzojë qeverinë e Ramës, por pendohet… Kjo dëshmon se akoma nuk ka kontakte me administratën amerikane… Por ndërkohë aleatin Rama e kërcënon, sepse e di që kryeministri nuk mund të bëjë as edhe një thirrje telefonike në Amerikë. Europa “e tij” Merel është në punën e saj. Erdogan i Turqisë nuk po arrin ta zbatojë “neo-otomanizimin e tokave shqiptare”  sipas planit Soros- Rama- Thaçi. Aleati Meta është shumë më përpara në taktikat gjeopolitike dhe diplomatike; por krejt i pasigurt, edhe pse tha (pastaj tërhoqi) se ka porosi “nga Amerika”…
Megjithatë vetë nuhasin se ka ardhur fundi i kësaj lloj qeverisjeje. Era e ndryshimit, në Amerikë dhe në Europën Perëndimore, i merr me vete.
Këtej vjen nervozizmi dhe nxitimi që i çon në “vrasje” si të Kristoforidhit: “Kaf kuf, ham, bam!…”.

Ylli Manjani dhe Rilindja rumpalle alla Qosje!

Enver Bytyçi

Dita e parë e javës u hap me një lajm përmbyllës në fund të një odiseje akuzash e kundërakuzash në kampin e Rilindjes: Shkarkohet ministri i Drejtësisë, Ylli Manjani. Akuza: Ka folur pa lejen e Endri Fugës, dmth të Padishahut, Sulltan Aladin Edi Rama! Ylli Manjanin e zëvendëson Petrit Vasili. Kështu një mjek do ta shërojë drejtësinë e sëmurë, sepse juristi Manjani nuk ishte “i aftë” ta bënte këtë!!! Megjithatë u vu në krye të dikasterit të Drejtësisë një kritik tjetër i spikatur i qeverisë Rama! Dhe nuk u shkarkua ai që tronditi në themel aleancën rilindase, ministri i Mjedisit, Lefter Koka! Ilir Meta priti në zyrë mëngjesin e sotëm kreun e ekzekutivit, zotin Rama dhe pranoi ultimatumin e tij: “Ose shkarkohet Ylli Manjani, ose largohuni nga koalicioni”! Vënia para kësaj alternative e vështirësoi pozicionin e kreut të LSI-së, ndërkohë që ai dha sinjalet e një tërheqjeje që të shtunën, kur kërkoi të ulen tensionet retorike e të “bëhet më shumë punë”.
Vetë i kishte nxitur vartësit e tij në qeveri të ngrinin tonet dhe ta telendisnin qeverisjen e zotit Rama dhe po vetë u tërhoq, përkohësisht ose jo, megjithatë me “bisht nën shalë”. Ilir Meta në mënyrë të pazakontë u vu nën çizmen e Edi Ramës, madje për një ministër, të cilin e dërgoi aty pikërisht për kundërpeshë me aleatin e tij. U duk se debati i nisur para dy javësh do të përfundonte me një divorc të PS-së dhe LSI-së dhe vendi do të shkonte kështu në 45 ditë në zgjedhje të reja, ndoshta me një qeveri ekspertësh ose teknike.
Në fakt, epilogu i betejës kalorsiake midis dy kokave të qeverisjes përfundoi me prerjen e njërës prej tyre, “të kokës më të vogël”. Shumë njerëz kanë shtruar sot pyetjen se kush fitoi dhe kush humbi në këtë spektakël politik unikal në llojin e vet. Nga pikëpamja politike fitoi kryeministri Rama. Ai provokoi dhe e vuri nën gjunjë aleatin “e fuqishëm” në koalicion. Ju deshën vetëm 45 minuta të qëndronte në ring, jo më shumë. Pas 45 minutash ngriti flamurin e fitores.
Humbi kreu i LSI-së, zoti Meta, qoftë dhe përkohësisht! Ndërsa çmimin më të madh nga të tilla lojëra politike duket se do ta paguajnë shqiptarët. Bazuar në deklaratën e ministrit të shkarkuar, zotit Manjani, shqiptarët do të paguajnë dhomat luksoze të hotelit të Balilit, ku ministrat e Ramës bëjnë orgji me paratë e shqiptarëve!
Qytetarët e këtij vendi do të paguajnë, gjithnjë sipas zotit Manjani, korrupsionin që bëhet në tavolinën ovale të zbukuruar me flamurin kuq e zi e në sfond portretin e Ismail Qemalit të qeverisë shqiptare, ku votohen vendime korruptive, ku favorizohen bizneset e miqve të kryeministrit e kështu me radhë. Ndërsa fatura e korrupsionit nën tavolinë është shumëfish më e lartë.
Ne do të paguajmë kufizimin pa limit të demokracisë, transparencës dhe fjalës së lirë, sepse gardiani i tyre do të vazhdojë të jetë kryeministri Rama dhe shefi i tij i kabinetit, Endri Fuga, i ngarkuar gjithashtu të vëzhgojë shpërndarjen e parave për NGO-të që i bëjnë fresk qeverisë në fushatë zgjedhore! Ne do të paguajmë në votime investimin që qeveria ka bërë dhe bën për përhapjen e kultivimit dhe trafikut të drogave! Ne do të paguajmë kështu rilindjen e diktaturës, të diskriminimit, të dhunës, të luftës për mbijetesë, atë rilindje, të cilën Rexhep Qosja ia kumtoi zotit Rama, që kur ky i fundit ishte në opozitë, me qëllim që t’i nënshtronte, përdhunonte dhe poshtëronte shqiptarët! Po jo vetëm kaq. Zoti Manjani u tha shqiptarëve se qeveria Rama është një qeveri e kapur nga mafia dhe një qeveri mafioze është kostoja më e lartë e një kombi.
Ai u shkarkua nga detyra menjëherë, pasi kërkoi arrestimin e Balilit, që do të thotë se ministrat në këtë vend i emëron dhe shkarkon eskobari, kreu i mafies ballkanike e shqiptare, jo kryeministri i vendit, që do të thotë se ekzekutivin shqiptar e drejton mafia dhe jo politika, aq më pak një elitë politike e orientuar nga interesat e vendit e të kombit!
Manjani tha se aleatët i kanë kërkuar zotit Rama shkarkimin e ministrit të Brendshëm, Sajmir Tahiri. Por kryeministri në vend të shkarkojë Tahirin, i cili akuzohet për mbrojtjen e trafikantëve të drogës dhe kriminelëve që marrin peng shtetin, shkarkon kritikët e panënshtruar nga mëkëmbësi i tij, Fuga! Kush tjetër, veç shqiptarëve, do ta paguajë gjithashtu këtë kosto të bashkëpunimit me krimin, trafikun, padrejtësinë, antiligjin, antishtetin?! Këto ishin mesazhet e paradites së sotme!
Shkarkimi i Ylli Manjanit nga posti i ministrit të Drejtësisë në fakt ishte simbolikë, nuk është zgjidhja. Simbolika është e dukshme në dritë të diellit. Hashashi është aty edhe pa Ylli Manjanin. Po ashtu ministrat e Ramës në mos fjetshin tashmë në hotelin e Klement Balilit, do të flenë në hotelet e Balilajve të Vlorës ose të Shullazëve të Tiranës. Simbolika shkon edhe më tej: Pa lejen e kryeministrit nuk mund të marrin frymë jo vetëm ministrat, por askush në oborrin e tij, madje edhe ata që jetojnë në periferi të këtij oborri kryeministror! Kush guxon, përballet me “shpatën e mprehtë” të Zeusit shqiptar të shekullit të XXI.
Në konferencën për shtyp zoti Manjani foli përsëri dhe duket se tani do të jetë “i lirë” nga Rama që t’i shprehë shumë të vërteta të hidhura të qeverisjes së Rilindjes. Gjithnjë, nëse zoti Meta do ia japë lejen dhe lirinë e shprehjes. Por së paku, Rama nuk ka në dorë ta pengojë më atë. Ka në dorë vetëm të urdhërojë mediat, që ta ndalojnë përhapjen e fjalës së tij. Megjithatë dhe për kaq sa ka folur zoti Manjani ka krijuar identitetin e tij të veçantë, i ka dhënë një dimension të caktuar frymës së lirisë në këtë vend. Por nuk mjafton. Ose duhet shkarkuar gjithashtu ministri Koka, ose duhen deklasifikuar motivet, arsyeja dhe shkaku i shkarkimit të zotit Manjani. Sepse Lefter Koka tha ndoshta diçka më shumë sesa Ylli Manjani. Ndërkaq duhet të shohim në javët në vazhdim, nëse Petrit Vasili do të shfaqet si më parë “parimor e kritik”, apo do të struket nën tavolinën ovale të kabinetit me gojën mbyllur dhe dorën lart në miratim të aferave të reja të Rilindjes alla Qosja-Rama. Duhet të shohim edhe eksponentët e tjerë të LSI-së, nëse do të guxojnë pas këtij presioni e diversioni që bëri kryeministri të shprehen lirshëm me kritika për qeverisjen e Rilindjes. Shkarkimi i Ylli Manjanit ishte diversion politik e njëkohësisht test për Ilir Metën.
Në finish Rama provoi se është i aftë t’i imponohet aleatit të tij, ndoshta deri në atë masë sa t’ia diktojë kushtet për vazhdimin e koalicionit qeveritar të Rilindjes 2 pas 18 qershorit, nëse ky koalicion do të marrë votat e shqiptarëve. Modeli i Bashkisë së Durrësit është provuar si produktiv. Duket që zoti Rama do ta detyrojë zotin Meta që të bëjë të njëjtën gjë për Partinë Socialiste në zgjedhjet e përgjithshme. Ndërkaq opozita duhet të jetë më e fokusuar për t’i fituar zgjedhjet e ardhshme parlamentare me aleatët e saj, të cilët i qëndruan asaj besnikë në këto vite shumë të vështira për të, për shkak të arrogancës së shfrenuar të Rilindjes së dështuar të bëjë shtet demokratik, human, liberal dhe funksional.
Opozita duhet të vijë në pushtet, jo pse koalicioni qeverisës grindet dhe pa përfituar nga konflikti në gjirin e mazhorancës. Opozita ka mundësi, aftësi, resurse, energji, eksperiencë, dije dhe kapacitete të krijojë frymë anti-Rilindje me qëllim që t’u japë shqiptarëve shpresën për një kthesë rrënjësore në zhvillimin e vendit.
Opozita e Manjanit, Kokës, madje dhe e Ben Blushit e disa të tjerëve që shfaqen si antiRamë me porosi të Ramës nuk e kthen shpresën te shqiptarët. Eshtë opozita reale, e dhunuar, e etiketuar deri në ekstrem me fjalët më fyese nga kreu i mazhorancës, ajo që i bashkon shqiptarët dhe bën të mundur ndryshimin. Mjafton t’i bindë qytetarët e këtij vendi se ky ndryshim nuk do të sjellë zhgënjim.

Basha: Rama peng i krimit, Meta peng i Ramës, zgjidhja, largimi i të dyve

Klanet kriminale me përfaqësues Sajmir Tahirin janë sot bashkëkryetarë të qeverisë.
Edi Rama as nuk denjoi t’ju japë sot shqiptarëve një shpjegim se pse e shkarkoi ministrin Manjani.
Kryeministri duhet të kishte një shpjegim për njerëzit. Çfarë dinë shqiptarët nga ai? Çfarë motivimi ju ka dhënë për shkarkimin e ministrit?
Por sigurisht shqiptarët e dinë se pse. Ministri Manjani u shkarkua sepse foli hapur për krimin që ka marrë peng qeverinë, për drogën, për Balilin, për urdhërimin me telefon të gjyqtarëve nga Rama, për tenderat dhe koncesionet korruptive.
Kjo është arsyeja. Manjani theu kodin e heshtjes. Manjani theu OMERTA-n që Rama i ka imponuar një qeverie të zhytur në krim, drogë dhe korrupsion.
Deklarata e Manjanit është një tjetër konfirmim i të vërtetave që opozita ka denoncuar këto 3 vite. Propaganda qeveritare nuk mund t’i mbulojë më këto të vërteta.
Lidhjet e qeverisë me krimin, drogën dhe rrezikun për zgjedhjet e lira i denoncoi edhe një tjetër ministër i kësaj qeverie, madje kumbari i koalicionit të 1 prillit, Lefter Koka.
Por sot Edi Rama nuk ka më nevojë për asnjë aleat politik, as për Ilir Metën. Sot Edi Rama nuk ka më nevojë për një qeveri politike. Ai ka ngritur dhe fuqizuar një aleancë interesash private dhe kriminale dhe pushtetin e tij e mban në këmbë me anë të krimit dhe parasë.
Arroganca me të cilën Rama shkarkoi ministrin Manjani dhe nënshtroi Ilir Metën është shprehje e sigurisë që jep pushteti i krimit dhe i parasë. Është edhe një sinjal i qartë për këdo që guxon të përmendë apo kritikojë lidhjet e krimit me qeverinë dhe korrupsionin e qeverisë.
Me shkarkimin e Manjanit u provua edhe një herë se Edi Rama është peng i krimit dhe Ilir Meta peng i tij. Pengjet e krimit dhe korrupsionit nuk mund të luftojnë as krimin, as korrupsionin. Zgjidhja është largimi i tyre.

1...7 3777 3787 379...8 382Faqja 7 378 nga 8 382

Kryesore

Continue to the category
Më shumë
© 2024 Rilindja Demokratike Euroatlantike