Klement Balili, i njohur si “Eskobari i Ballkanit” po pret që Rama të kapë drejtësinë dhe pastaj të dorëzohet. Këtë sinjal e dha dje bashkëshortja e tij, e cila u shpreh për mediat se, Balili do vijojë të qëndrojë i fshehur dhe do të dorëzohet vetëm kur të vendost vettingu. “Do të dorëzohet, kur të vendoset vettingu, sepse drejtësia jonë është e korruptuar, ai nuk ka sesi të dorëzohet”, u shpreh bashkëshortja e Balilit.
Duket qartë se bashkëshortja e Balilit ka folur me gjuhën e Ramës. Balili u shpall në kërkim nga Interpoli që në 17 maj të vitit 2016 për trafik ndërkombëtar droge, por u la i lirë me urdhër të Ramës. “Eskobari i Ballkanit” shëtiste i lirë në Sarandë ditë dhe natë, i pashqetësuar nga askush. Balili ishte shpallur në kërkim pas një hetimi nga DEA amerikane, policia greke e disa polici të vendeve evropiane, si kreu i një organizate kriminale ndërkombëtare që trafikonte sasi të mëdha të hashashit dhe kokainës në vendet e BE.
Ai ishte emëruar nga Rama drejtor i Transportit Rrugor Sarandë për dy vjet e gjysëm, deri kur në fillim të muajit maj u kap në Greqi ngarkesa e tij prej 700 kg kanabis dhe u shpall në kërkim ndërkombëtar për trafik droge. Duke pasur këtë funksion të lartë shtetëror, Balili e kishte më të lehtë për të zhvilluar trafikun e drogës drejt vendeve perëndimore, pa patur asnjë problem nga policia shqiptare.

Balili shoqërohej me zyrtarë të lartë

Ndonëse ishte në kërkim, Balili jo vetëm që lëvizte lirshëm, por ai shoqërohej nga zyrtarë të lartë dhe oficerë policie, të cilët kishin për detyrë ta denonconin dhe ta arrestonin si një person të kërkuar për aktivitet kriminal. Në shtator të vitit të kaluar, Balili u fotografua duke festuar deri në orët e para të mëngjesit në resortin e tij “Santa Quaranta”, ku ishte i ftuar në një dasmë. Personi që martohej është aktualisht drejtori i Transporteve në Sarandë, pozicion që më parë e mbante vetë Klement Balili, përpara se të shkarkohej kur u shpall në kërkim nga policia greke, si kreu i një bande që trafikonte drogë në vendet e BE. Gjatë gjithë kohës, ai ka qenë i ulur në tavolinën e dasmës bashkë me kreun e Partisë Socialiste në Tepelenë, Dino Selimi, që mban edhe postin e drejtorit të Drejtorisë Rajonale të Transporteve në Gjirokastër.
Në muajin tetor u publikua në media edhe një foto ku, “Eskobari i Ballkanit” shfaqej në strofkullën e tij me nipërit e tij, një prej të cilëve mbahej si peng për të siguruar transportin e drogës. Ish-kryeministri Berisha publikoi në rrjetin social Facebook bashkë me fotografinë edhe mesazhin e një qytetari, i cili e informonte se si Balili vazhdonte trafikun e drogës drejt vendeve perëndimore nga shtëpia e tij në Sarandë, ndonëse ishte i shpallur në kërkim ndërkombëtar. “Denis Balili zakonisht rri peng tek blerësit e drogës, deri në momentin kur transporti ka përfunduar”, shkruante qytetari nga Saranda. Pas publikimit të fotos dhe lajmit për vijimin e trafikut të drogës nga Klement Balili nuk pati asnjë reagim nga policia dhe as nga Ministria e Brendshme, ndërkohë Balili vazhdon i qetë trafikun e drogës.
Këto fakte vërtetojnë më së miri se Klement Balili, ashtu siç raportohej nga agjencitë ndërkombëtare të antidrogës, ka pasur mbështetje nga Rama dhe Tahiri, si gjatë aktivitetit të tij të dyshuar kriminal, ashtu edhe në mosveprimet për ndalimin e tij.

Pse nuk ka shpërblim nga policia për kapjen e Balilit?

Policia u vu në lëvizje për gjetjen e Balilit pas deklaratës së ambasadorit amerikan Donald Lu, i cili u shpreh se policia ka dështuar në arrestimin e Klement Balilit. Edhe pas kësaj deklarate nuk pati seriozitet nga policia për arrestimin e shumë të kërkuarit. Policia nuk vuri në dispozicion asnjë shpërblim për cilindo person që do të informonte për vendndodhjen e Balilit, në një kohë që një gjë të tillë e ka bërë për persona që kërkoheshin për vjedhje dhe precedentë të tjerë të rëndomtë. Prej një kohe të gjatë, policia nuk ndërmori asnjë aksion për kapjen e Balilit, por e la në heshtje këtë çështje.
Klement Balili akuzohet për disa vepra penale, mes tyre “Trafik ndërkombëtar droge në bashkëpunim”, “Krijim e pjesëmarrje në grup kriminal”, “Kryerje të veprave penale nga organizata kriminale”. Ai është cilësuar nga mediat greke si “Eskobari i Ballkanit”. Gjatë hetimeve të kryera nga DEA u zbulua se, rrjeti i trafikut të drejtuar nga Balili shtrihej në Greqi, Belgjikë, Bullgari, Spanjë, Holandë, Britani, Austri dhe Norvegji. Droga dërgohej me skafe nga Shqipëria drejt Greqisë dhe më pas prej andej shpërndahej në Europë me kamionë. Pak kohë më parë, autoritetet greke dorëzuan në Prokurorinë shqiptare një dosje voluminoze prej 10 mijë faqesh, për çështjen “Balili”.

Policia ndërhyri dje pas reagimit të Presidentit

Policia e Shtetit bëri të ditur dje se ka ndërmarrë një operacion kërkimi për arrestimin e Klement Balilit, i shpallur në kërkim ndërkombëtar, pasi akuzohet nga drejtësia greke si kreu i një organizate të fuqishme të narkotrafikut që vepronte në disa vende të Europës.
Operacioni i policisë për arrestimin e Balilit u ndërmor pas deklaratës së Presidentit Nishani se ai do të mblidhte Këshillin Kombëtar të Sigurisë për çështjen ‘Balili’. Thirrja e Këshillit Kombëtar të Sigurisë dhe mos arrestimi i Balilit prej rreth 8 muajash, pasi ai ishte shpallur në kërkim nga Interpoli, kanë vënë në lëvizje Policinë e Shtetit, e cila ka dalë në terren për kapjen e tij.
Policia bëri të ditur se ka kontrolluar 10 banesa, mes tyre dhe atë të Klement Balilit dhe tre hotele, ndërsa ka shoqëruar 11 persona, mes tyre edhe djalin e Klement Balilit. Në një njoftim zyrtar, Policia informon se ka pasur urdhër të lëshuar nga Prokuroria e Shkallës së Parë për Krimet e Rënda Tiranë për kontrollin e banesave të familjarëve të Balilit.
Ndërkohë, pas 10 orësh qëndrimi në Drejtorinë e Policisë së Gjirokastrës janë lënë të lirë djali i Klement Balilit, sëbashku me 10 personat e tjerë që u shoqëruan nga policia. Jeton Balili së bashku me të afërm të tij, u shoqëruan pas kontrollit të policisë në banesat dhe objektet në pronësi të Klement Balilit dhe familjarëve të tij.

R.POLISI

Një motoskaf me 760 kilogram marijuanë, dy persona nga Brindizi dhe një qytetar me kombësi shqiptare janë kapur në brigjet e San Cataldos nga forcat e Guardia di Financas. Në burg kanë përfunduar Oliviero Ferraro, 47 vjeç dhe Lazzaro di Lauro, 58 vjeç, së bashku me Admir Quacaj, 31 vjeç nga Vlora. Policia shqiptare bëri të ditur mbrëmjen e të premtes se ka bashkëpunuar me Guarda di Finanza për zhvillimin e operacionit për kapjen e skafit me drogë të nisur nga Vlora, por Guarda di Finanza nuk e përmend në asnjë rresht bashkëpunimin me policinë shqiptare.
Operacioni është kryer gjatë mbasdites së të premtes. Që të tre, me urdhër të prokurorit të Prokurorisë së Leçes, i cili është kompetent për këtë territor, u arrestuan për posedim dhe trafikim ndërkombëtar droge dhe u dërguan në burg në pritje të seancës gjyqësore përpara trupit gjykues në prani të mbrojtësve Daniela d’Amuri e Giovanni Brigante.
Mediat italiane shkruajnë se, operacioni u krye nga Njësitë e Departamentit të Operacioneve Aerodetare të Policisë Financiare të Barit dhe Grupit Aerodetar të Guardia di Financës së Tarantos, e cila kryen shërbimet e qendrës së koordinimit lokal FRONTEX për operacionin “Triton”, i dërguar drejt motoskafit të dyshuar për ta kontrolluar atë, sapo ai është zbuluar.
Të kapur në flagrancë në mes të ditës, ekuipazhi i skafit vendosi që të arratiset dhe për të fituar shpejtësi më të madhe hoqi qafe pjesë të ngarkesës, duke e hedhur në det. Gjithçka e padobishme, pasi pas një ndjekjeje të shkurtër dhe intensive të kryer nga ajri dhe me Njësitë Detare të Financës e gjitha përfundoi me lënien e motoskafit rreth 20 milje në brigjet e San Cataldo.
Mjeti lundrues i përdorur për transportin e drogës, 8 metra i gjatë, me një motor të fuqishëm jashtë bordit me 225 kuaj fuqi, u shoqërua deri në Marinën e Seksionit të Operacioneve të Policisë Financiare të Otrantos dhe u sekuestrua. Menjëherë kanë nisur hetime më të thelluara në bashkëpunim me policinë shqiptare dhe Grupin e Kufirit Detar të Guardia di Financës të vendosur në Durrës, për të gjetur grupin kriminal të përfshirë në trafikim.
I kalon 5 tonelatat e marijuanës në sasi totale nga Guardia di Finanza në Pulia në këto javët e para të 2017, duke i shtuar edhe 20 tonë të konfiskuara në vitin 2016. Por pikërisht shpeshtësia e këtyre operacioneve tregon përmasat kriminale të zhvillimit të krimit midis bregdetit shqiptar dhe atij të Pulias Jugore, e cila sfidon kontrollet e pajisjeve në det, e cila gjithashtu ka funksione edhe për të gjurmuar trafikun e klandestinëve.
Elementi i dytë që gjen konfirmim të mëtejshëm në shërbimin e kryer dje nga burimet aerodetare të Guardia di Financas, është përfshirja e plotë në narkotrafik që përdor ngushticën e Otrantos të pjesës së Brindisit, të përdorur nga klanet shqiptare që dërgojnë në Itali marijuanën e punuar në malet e Vlorës, ku fshatra të tërë janë të përfshirë në kultivimin e cannabis indica dhe përpunimin e mëvonshëm për të marrë marijuanë dhe hashash.
Pra, ka një kriminalitet, që pas më shumë se 15 vjetësh që nga shkatërrimi i ekipeve kontrabandiste midis Brindizit dhe Monopolit me “Operacionin pranverë”, rishfaqet gjithnjë e më i shumtë në rrugët e vjetra të Durrësit dhe Vlorës të përdorur për kontrabandën e cigareve, dhe – si është përmendur tashmë – edhe në rolin e partnerëve të mafias shqiptare. Në këtë kufi është hetuar prej kohësh, por sot kjo shtrirje e detit tërheq vëmendjen edhe për praninë në Kosovë dhe Shqipëri të enklavave fondamentaliste të lidhura me shkollat kuranore dhe xhamitë të lindura me financime të përbashkëta nga Turqia, Arabia Saudite dhe Emiratet e Gjirit.

“E vërteta e menaxherit nga Milano. Kështu sillte drogën e trafikanteve”. Ky është titulli i “Corriere Della Sera”  për pilotin italian Guido Guidi i cili dy ditë më parë u largua nga Tirana. Prej shtatorit ai ishte i ndaluar nga policia shqiptare pasi avioni me të cilin udhëtonte u rrëzua në Ishëm të Durrësit.
Fillimisht qëndronte i heshtur deri në mohim të akuzave, duke filluar nga 200 kilogramë marijuanë në avionin e tij të turizmit i cili për pak sa nuk u përplas ndërsa ulej në Ishëm pranë Durrësit. Por tashmë menaxheri Guido Andrea Guidi, 68 vjeç nuk hesht më. Rrëfim pas rrëfimi, duke vënë në alarm grupet shqiptare të trafikantëve, duke detyruar hetuesit shqiptarë ti merrnin pasaportën, duke e vendosur në mbrojtje për 24 orë në vend sekret për të evituar hakmarrjen apo dhe vrasjen e tij.
Guidi rrezikon shumë, dhe pse në të kaluarën ka pasur të tjera probleme me ligjin, si atëherë kur bëri marrëveshje për një incident ajror që shkaktoi vdekjen e dy pilotëve të kompanisë së tij të vogël ajrore. Më pas, ai do të lidhej me trafikantët e Ballkanit për të rregulluar problemet e tij ekonomike. Kontrata, nëse mund të quhet e tillë, parashikonte transportimin e drogës nga Shqipëria në Lombardi, dhe me destinacion final Milanon. Udhëtimet paguheshin nga 20 deri në 25 mijë euro. Ai duhej të fluturonte në lartësi të ulët për të evituar radarët, dhe do të ulej në dhjetëra aeroporte turizmi, por dhe në pista private të improvizuara në fshatra. E pikërisht këtu ai merrte ngarkesën me marijuanë nga trafikantët.
Çdo gjë ishte e lehtë, dhe kushti i vetëm ishte që të mos kapej. Incidenti në muajin shtator ndodhi në një zonë të izoluar, por që tregonte shumë për trafikantët se cilët mund të ishin ata, dhe Guidi sapo i kishte prishur maskimin. Agjentët e policisë prisnin mbërritjen e bashkëpunëtorëve të Guidit, ndërsa ky i fundit merrej në pyetje. E më pas ishte sistemuar në një hotel. Ndoshta menaxheri milanez ishte përpjekur të arratisej, por nuk kishte gjetur mbështetje, pasi bashkëpunëtorët e tij e kishin braktisur. E më pas shpresonte se do e kishin liruar dhe çështja kundër tij do të pushohej, por gjërat u përkeqësuan shumë shpejt dhe për shkak të gjetjes së një axhende në xhepat e tij, ku ishin shkruar emra të njohur dhe personazhe me influencë në jetën publike shqiptare.
Nga hoteli, Guidi mbahej i fshehur në kazermat e ushtrisë, por pozicioni i tij mbetej shumë delikat. Në momentin që Guidi gjen sigurinë tek hetuesit nis të flasë, duke dhënë informacione të vlefshme. Por përpara se të rikthehej në Itali do të kalonte dhe pak kohë, pasi hetuesit shqiptarë nuk kishin ndërmend ta lironin. Më pare, duhej të përfundonte hetimi, një nga shumë të tilla. Orët e fundit agjentë policie dhe karabinierë në Pulia, konfirmojnë mbërritjen sidomos në Salento të gomoneve të ngarkuara me drogë, pavarësisht temperaturave të ulëta dhe detit të trazuar.
Skafistët nuk dinë të pushojnë, pasi kërkesat janë të shumta dhe ofertat e mira. Sipas të dhënave më të fundit të Gurdia di Finanza, të ardhurat që vijnë nga trafikimi i marijuanës përbëjnë ¼ e prodhimit të brendshëm të Shqipërisë. Ka pasur kriminelë që u pasuruan me transportimin e emigrantëve në vitet e dëshpëruara të luftës civile në Shqipëri, e që tashmë kanë blerë shtëpi dhe hotele në Vlorë. Por pavarësisht jetës luksoze nuk i kanë rezistuar pasionit për krimin, duke u rikthyer në aktivitet, por kësaj here duke transportuar marijuanë. Një nga më aktivët, ka një epitet që i është dhënë për meritat e tij në këtë fushë: e quajnë “Çakalli”.