Nga mushkonjat tek dhelpra e kuqe. Policia në kohë korrje dhe transporti të drogës me avionë i servir opinionit alibi të ndryshme për të fshehur skanalin. Dy vite më parë Rama tha në Parlament se avionët që fluturonin në Divjakë me ngarkesat me drogë nuk ishin ashtu sikurse thuhej, por ishin avionë për spërkatjen e pyllit nga mushkonjat.
Dy vite pas asaj deklarate të Ramës, policia ka bërë të njëjtën gjë 10 ditë më parë me avionët e drogës që fluturojnë mbi Seman dhe që u evidentuan edhe dy ditë më parë. Sipas deklaratës zyrtare të policisë ata avionë që fluturuan mbi Seman 10 ditë më parë nuk ishin për transportin e drogës, por për spërkatjen e vendit kundër tërbimit për dhelprën e kuqe.
Ajo çfarë e nxjerr bllof policinë nuk është opozita, por një institucion tjetër i shtetit. Drejtoria e Shëndetit Publik në një prononcim për televizonoin ABC News nuk e ka konfirmuar alibinë e policisë. Sipas kësaj drejtorie në të tilla procese duhet njoftuar Drejtoria e Shëndetit Publik me qëllim marrjen e masave mbrojtëse për banorët e zonës ku kryhet ky lloj vaksinimi. Kjo nuk ka ndodhur. Këtë vit DSHP nuk ka marrë asnjë njoftim për vaksinim të kafshëve të egra.
Një mashtrim i tillë i policisë i rrëzuar nga Drejtoria e Shëndetit Publik flet për të vërtetën e drogës. Nëse do të kishim një spërkatje sikurse pretendonte policia, atëherë ajo nuk mund të bëhej pa Drejtorinë e Shëndetit Publik. Po përse gënjen policia? Arsyet janë mjaft të thjeshta. Ata po kërkojnë të fshehin transportin e të mbjellave me drogë ku policia është kthyer në një ushtri të trafikantëve të drogës. Dhe kjo ushtri ka një titullar, i cili është koka e kartelit të drogës që lëviz nga Shqipëria në drejtim të Europës dhe ky është ministri i Brendshëm.
Policia e Fierit pranoi se mbi zonën e Semanit të dielën kanë fluturuar tre avionë të tjerë, por arsyet sipas saj ishin turistike dhe kishin destinacion Tivarin e Malit të Zi. Nëse qëllimet ishin turistike, atëherë si është e mundur që rruga për në plazhin e Semanit u bllokua nga forcat e policisë në mënyrë që qytetarët të mos kalonin nga zona ku po zhvillohej operacioni?

Denoncimi

Denoncimi i qytetarëve është bërë në rrjetet sociale. Në portalin “Jeta osh qef” disa qytetarë kanë denoncuar bllokimin që Policia e Fierit, përmes efektivëve të armatosur i ka bërë kryqëzimit të hyrjes për në Seman, duke mos lejuar lëvizjen në të. Qytetarët hedhin dyshime se këta efektivë mbronin trafikun e drogës me avionë, ndërsa kanë postuar dhe disa foto. “Përshëndetje Jeta osh qef! Në qiellin e Semanit janë parë tre avionë të bardhë, të cilët janë ulur me radhë në bregdet dhe po mbushen, e dini vetë ju. Policia ka bërë postbllok në kryqëzimin në hyrje të Semanit dhe nuk i lejon qytetarët të shkojnë në plazh. Të gjithë fierakët e dinë këtë gjë, prandaj dhe policia rri aty e armatosur”, është shprehur një nga denoncuesit.

Banorët pohojnë se kanë parë avionët

Banorët e Semanit konfirmojnë se kanë qenë prej kohësh dëshmitarë të avionëve që kanë kaluar, ndërsa pohojnë se kanë parë edhe tre avionë të vegjël që kanë fluturuar të dielën që kaloi. Banorët, të cilët kanë frikë të flasin para kamerave, pohojnë se kanë parë shpesh avionë të tillë në këtë zonë, madje të dielën njëri prej tyre fluturoi shumë ulët. Megjithëse nuk ka shenja të uljes së tyre, historitë e avionëve me drogë në këto zona, siç ishte dhe Divjaka, nuk janë të padëgjuara për shqiptarët. Rreth orës 15 e 20 të pasdites së të dielës, tre avionë të vegjël ngjyrë të bardhë, kanë fluturuar në një lartësi të ulët në plazhin e Semanit në Fier.
Kjo konfirmohet nga banorë të zonës, të cilët kanë frikë të flasin para kamerave, por pohojnë se një prej avionëve ka fluturuar shumë ulët pranë pikës së kontrollit detar në plazhin e Semanit. Në këtë zonë nuk janë gjetur shenja të uljes të avionëve. Banorët thonë se nuk është hera e parë që shohin avionë të tillë të fluturojnë në këtë zonë, që ndodhet mbi 300 metër larg plazhit. Fillimisht denoncimi për fluturimin e këtyre avionëve është bërë në rrjetet sociale, ku u hodhën dyshime për furnizim të tyre me drogë pikërisht pranë plazhit të Semanit.
Madje në denoncimet e bëra nga qytetarët, të cilët kishin filmuar avionët që fluturuan në zonë përmendej edhe një postbllok i ngritur nga ana e Policisë së Fierit pranë kryqëzimit të Semanit, ku sipas denoncuesit, ky postbllok është ngritur për të favorizuar avionët e drogës. Por sipas Policisë së Fierit, postblloku ekziston prej disa muajsh, me një vendimi të Këshillit të Ministrave për mbrojtjen e pyjeve, pas hyrjes në fuqi të moratoriumit. Në këtë postbllok janë katër shërbime: Policia e Shtetit, Policia Ushtarake, Policia Tatimore dhe Policia Pyjore, dhe kryejnë kontrolle ndaj të gjithë personave që kalojnë aty për të shkuar në plazhin e Semanit, Darzezë apo zonën pyjore.
Ende nuk ka reagim zyrtar nga organet përkatëse për avionët që janë parë të fluturojnë mbi zonën e plazhit në Seman, pasi nëse ata rezultojnë të kenë leje për të fluturuar në vendin tonë, atëherë autoritetet tona kanë dijeni dhe mund ta faktojnë lehtësisht këtë gjë. Avionët me drogë nuk janë histori të padëgjuara për Shqipërinë. Rreth dy muaj më parë, avionë të vegjël që ngarkoheshin me drogë u denoncuan se ishin ulur në zonën e Bishtporës në Vlorë, madje nga pala italiane u bënë publike edhe foto të avionit që dyshohej se ulej në këtë zonë, ku u gjetën dhe gjurmë të avionit. Për të mos harruar 2014, që shënoi një rast flagrant. Avioni tip “Piper” u rrëzua në plazhin e Divjakës, teksa transportonte sasi të konsiderueshme drogë.

Policia kërcënime me armë qytetarëve të mos dëshmonin për avionët

Partia Demokratike akuzoi dje se trupa të armatosura bashkë me policinë izoluan zonën në Seman ku u ngritën avionët e vegjël, ndërsa kërcënuan me armë banorët që të mos jepnin dëshmitë e tyre mbi atë çfarë kishin parë.
Përmes një deklarate për mediat, nënkryetari i Komisionit të Sigurisë, Flamur Noka denoncoi rrethimin e menjëhershëm të zonës nga trupat e armatosura të policisë me qëllim kërcënimin e banorëve që të mos flisnin mbi atë që po ndodhte.
“Qytetarët e Fierit kanë denoncuar uljen dhe ngritjen e avionëve të vegjël në plazhin e Semanit dhe ndërkohë që kjo ndodhte, policia me forca të armatosura kishte bllokuar rrugët për të mbajtur larg dëshmitarët. Denoncimi është bërë me foto dhe të gjitha dëshmitë janë, se kemi të bëjmë me avionë tipikë të transportit të drogës. Edhe më të besueshme e ka bërë këtë ngjarje policia, e cila paska reaguar e paska thënë se trupat e armatosura gjenden aty për të mbrojtur pyjet. E vërteta është se policia gjendet aty me urdhër të Saimir Tahirit për të mbrojtur trafikun e drogës”, u shpreh Noka.
Nënkryetari i Komisionit të Sigurisë deklaroi se e gjithë policia është vendosur në shërbim të trafikut të drogës, ndërsa citoi kushërinjtë trafikantë të ministrit Tahiri, vëllezërit Habilaj si personat që kanë zaptuar gjithë Qarkun e Vlorës duke mbjellë mijëra hektarë plantacione me drogë.
“Shefat e policisë aty, janë në shërbim të Habilajve dhe kanë hisen e tyre në këtë biznes kriminal. Fieri, ashtu si gjithë Shqipëria është mbuluar nga droga dhe avionët e vegjël që vijnë e ngarkohen janë pjesë e trafikut ndërkombëtar të drogës.
Është kjo arsyeja, pse Edi Rama prej 34 ditësh nuk përgjigjet pas letrës zyrtare që unë i kam dërguar në cilësinë e nënkryetarit të Komisionit të Sigurisë Kombëtare. I kam kërkuar që të fotografojë urgjentisht gjithë territorin, përmes avionëve italianë, sipas marrëveshjes mes dy vendeve dhe të bëjë publike rezultatet e këtij monitorimi”, tha Noka.
“Siç e shihni, avionët e monitorimit nuk vijnë, por venë e vijnë avionët e trafikut të drogës. Nuk përgjigjet Rama dhe sigurisht nuk ka ndërmend ta fotografojë territorin, pasi e di mirë se çdo kodër e çdo pëllëmbë e vendit është mbjellë me kanabis.
E di mirë dhe se kush e ka mbjellë, kush e kontrollon dhe ku ndahen përfitimet.
Prandaj Shqipëria është në vendin e parë të prodhimit dhe trafikimit të drogës në raportin e Bashkimit Europian, prandaj nervozohet Rama kur gazetarja e ‘Euronews’ e pyet për trafikun e drogës e për trafikantët.
Mbulimi i vendit me kanabis, bandat, trupat e armatosura në ara që ruajnë, avionët transportues, shefat e policisë që japin garanci e siguri, janë e gjitha pjesë e biznesit qeveritar të drogës. Një biznes që sjell fitime marramendësi për Ramën, Tahirin e bandat e tyre, por që rrënon vendin. Droga duhet shkulur, por duhen shkulur së pari rrënjët e saj në qeveri”, është shprehur Noka.

Deputeti i Partisë Demokratike, Flamur Noka deklaron se shumë shpejt një kërkesë zyrtare do t’i drejtohet Parlamentit italian për të nisur hetimet në lidhje me skandalin e pajisjes së përgjimit. Në një intervistë për “Report TV”, deputeti demokrat bën të ditur se PD është e vendosur për të çuar deri në fund zbardhjen e kësaj çështjeje. “Sot jemi më të bindur për të zbardhur këtë çështje, është skandali më i madh që ka ndodhur ndonjëherë. Është futur një pajisje në mënyrë të paligjshme, e përdor edhe për trajnim, për përgjim, qoftë edhe për trajnim të e-mail është e paligjshme. Ligji e cilëson në mënyrë taksative që Prokuroria është e vetmja përgjegjëse”, tha Noka. I pyetur se a do të kërkohet nga Parlamenti italian nisja e një hetimi mbi këtë çështje, ai tha: “Patjetër që po, do të bëjmë kërkesën. Në rastin që ministri dhe drejtori donin të bënin një krim çfarë e shtynte Grillon t’i mbronte ato? Çfarë lidhje ka me ta? Mbetet në kuadrin e pyetjes”. Deputeti demokrat thotë se për këtë skandal, për të cilin është cenuar siguria kombëtare, duhet të ishin prapa hekurave përgjegjësit e një veprimi të tillë. Noka tha gjithashtu se Prokuroria është penguar në hetim sa kohë nuk i është vënë në dispozicion pajisja e përgjimit.

– Z. Noka, gjatë javës së kaluar, vendosët në qendër të opinionit publik thirrjen tuaj ndaj ministrit Tahiri, prokurorit të Përgjithshëm për përgjimin. Pas hetimit, a mendoni se e gjithë ajo që ngritët si opozitë ishte një stuhi në gotë?
Sot jemi më të bindur për të zbardhur këtë çështje, është skandali më i madh që ka ndodhur ndonjëherë. Është futur një pajisje në mënyrë të paligjshme, e përdor edhe për trajnim, për përgjim, qoftë edhe për trajnim të e-mail është e paligjshme. Ligji e cilëson në mënyrë taksative që Prokuroria është e vetmja përgjegjëse.

– Në bazë të Konventës së Vjenës, që parashikon të drejtat e trupit diplomatik mund të kalohet në doganë pa u deklaruar?
Nuk ka konventë që lejon kalimin e pajisjeve përgjuese në vend. Kështu që dikush duhet të mbajë përgjegjësi dhe të shkojë pas hekurave. Drejtori i policisë e tha live që nuk ka lidhje me këtë pajisje, ministri tha që ka një pajisje që kontrollon e-mail-e. Është shkelur rëndë ligji, është rrezikuar siguria në vend.

– Në kohën kur ishit ministër i Brendshëm a trajnoheshin policët?
Në kohën që kam qenë unë janë trajnuar gjithmonë, por jo për çështje përgjimi, janë trajnuar për kapacitete, për kapjen e kriminelëve, për qitje, disa lloje stërvitjesh, por nuk ka pasur kurrë për çështje përgjimi.

– Si drejtori, si ministri, ju deklaruan se pajisja që zotëron Interforca italiane nuk disponon soft përgjimi, por gjurmimi?
Emsy catcher është një pajisje super moderne, soft-i mund të përshtatet si të duash. Nuk është ndonjë shkencë e madhe. Po ju them me siguri është përgjuar, të gjithë janë përgjuar. Në një shtet normal, përgjegjësit shkojnë përpara drejtësisë. Ky diskutim kërkon përgjegjësin.

– Ju përmendët Watergate, por në Watergate u gjendën pajisje?
Ata kishin metoda të vjetër dhe u gjendën, edhe sot është gjetur pajisja. Pse nuk u dorëzua pajisja?

– Ju thoni që Prokuroria është bllokuar gjatë hetimit?
Prokuroria është penguar gjatë hetimit duke mos iu dorëzuar pajisja.

– Si mund të dorëzojë pajisje policia, diçka që nuk e ka, pajisja zotërohet nga italianët?
A mund të na ofronte dikush një dokument që të na tregonte që kjo zotërohet nga të tjerët? Ajo është futur në mënyrë ilegale. Drejtori i policisë duhet të shkojë në burg për mosdorëzimin e pajisjes.

– Ju e pyetët prokurorin e Përgjithshëm gjatë hetimit dhe ai e mohoi se ka pengim nga policia?
Unë i besoj medias, për sa kohë që media thotë që Prokuroria ka çuar dy oficerë tek drejtori i Përgjithshëm dhe ai ka refuzuar të dorëzojë pajisjen. Ai ka gënjyer për ekzistencën e saj.

– Ku ndodhet pajisja?
Pajisja ka qenë deri ditën e enjte nën menaxhimin e Ministrisë së Brendshme, më pas është kaluar tek Interforca. Sot është atje. Tani a mund të jetë përfshirë oficeri i Interforcës, kemi të dhëna për këtë.

– Çfarë interesi ka shefi i Interforcës italiane për të përgjuar opozitën shqiptare?
Unë nuk thashë që po përgjon, por mendoj se çfarë e lidh këtë zotëri me ministrin Tahiri dhe me Çakon. Çfarë kishte këtu për të fshehur? Ne nuk po e akuzojmë, por po ngremë një pikëpyetje. Çfarë e shtyn që të fshehë krimin e Tahirit dhe Çakos?

– Ai u thirr dhe nga Presidenti, çfarë informacione keni?
Unë nuk kam informacion, këto janë çështje që i përkasin Presidentit. Unë kam vetëm një shqetësim, çfarë e shtyu Grillon t’i dilte në mbrojtje Tahirit dhe Çakos?

– Kishim një lloj përplasje, rasti i Visho Ajazi nuk informon direkt Kryeministrin, por informon Presidentin?
Nuk është kështu siç thoni ju, ky është skenar i gatuar në kuzhinën e qeverisë për t’ju servirur publikut. Shefi i Shërbimit pasi ka marrë informacionin, do të informonte prokurorin e Përgjithshëm. Do të thoni ju pse nuk e informoi Kryeministrin? Këtë e ka pasur për detyrë drejtori i Përgjithshëm të informojë për pajisjen e përgjimit. Presidenti me burime të tij është njoftuar për këtë çështje dhe më pas ka thirrur kreun e Shërbimit, por mund ta bënte këtë gjë edhe Kryeministri, por nuk e bënte se ishte pala.

– Në mënyrë institucionale, shefi i Shërbimit pse nuk njofton Kryeministrin për përgjimin e prezumuar?
Shefi i Shërbimit nuk ka njoftuar për përgjim. Ai ka njoftuar për informacione për ekzistencën e një pajisjeje të mundshme përgjimi në territorin e Shqipërisë. Kjo është detyra e tij. Por duhet thërritur për informacione të mëtejshme.

– Çfarë mendoni se do të ndodhë më tej?
Duhet zbuluar e vërteta, por që të zbulohet e vërteta duhet të dorëhiqen ministri Tahiri dhe drejtori Çako. Të zbardhet historia, sepse ata do të pengojnë hetimit.

– Do të bëni konkluzione ju?
Ne i bëmë konkluzionet, pajisja është pajisje përgjimi. Ajo është përdorur në kundërshtim me ligjin. Ajo është fshehur në momentin që Prokuroria e ka kërkuar. Fshehja është shkelje e ligjit që bie mbi Çakon dhe Tahirin. Ne do të bëjmë çmos që të zbardhim këtë skandal.

– Do të kërkoni një hetim edhe nga Parlamenti italian?
Patjetër që po, do të bëjmë kërkesën. Në rastin që ministri dhe drejtori donin të bënin një krim çfarë e shtynte Grillon t’i mbronte ato? Çfarë lidhje ka me ta? Mbetet në kuadrin e pyetjes.

– Pse këmbëngulni kaq shumë tek lufta e hashashit, kur ata mendojnë se shifra e kapur e hashashit është sasia më e madhe e kapur ndonjëherë?
Kjo është e vërtetë, sepse është gjelbëruar çdo cep i Shqipërisë. Kudo ka hashash, një rast i fundit është në Dibër. Është 5-fishuar mbjellja e hashashit, është rrënjë vietnameze që rritet shpejt.

– Ka nisur Interforca të fotografojë?
Jo nuk ka nisur, duhet të vijnë më shpejt. Qeveria duhet t’i kërkojë të vijë sepse po të vijnë në korrik nuk do të gjejnë asgjë sepse është korrur. Jemi bërë gazi i botës. Jemi kthyer në kohën 2000 që shqiptarët kanë filluar të kryqëzohen si banditë, kriminelë që e mbushin Europën me drogë. Sivjet të gjitha bandat paguajnë 30% tek ministri të Brendshëm.

Marrë me shkurtime nga “Reprot TV”

Kontrolli i Lartë i Shtetit i ka kërkuar Kryeministrit Edi Rama shkarkimin nga detyra të drejtoreshës së Qendrës Spitalore “Nënë Tereza”, Ogerta Manastirlliu. Sipas Hashtag.al, ky propozim erdhi pas një kontrolli që zbuloi se drejtoresha Manastirlliu kishte shpenzuar rreth 795 mijë dollarë duke lidhur dy kontrata mirëmbajtjeje me kompani private shqiptare për disa aparatura mjekësore që ishin sjellë në Shqipëri në përdorim nga kompania “Siemens”.
Por audituesit kanë zbuluar se sipas kontratës fillestare të QSUT-së me “Siemens” i takonte vetë QSUT-së të realizonte mirëmbajtjen.
Dokumentet kanë zbuluar se drejtoresha Manastirlliu i ka dhënë dritë jeshile hapjes së një tenderi për mirëmbajtjen, duke nënkontraktuar dy kompani shqiptare në vlerën e 795 mijë dollarëve. Ndërsa dëmi neto i konstatuar nga KLSH-ja është në vlerën e 590 mijë dollarëve.
Për rrjedhojë audituesit kërkojnë shkarkimin e drejtoreshës:
“I rekomandojmë Kryeministrit të fillojë procedurat për dhënien e masës disiplinore nga ‘Vërejtje’ deri në ‘Largim nga detyra’ për znj. Ogerta Manastirlliu me detyrë drejtor i Përgjithshëm i Qendrës Spitalore Universitare ‘Nënë Tereza’ Tiranë.
Për arsye se në tenderin me objekt dhënien e shërbimit të ‘Mirëmbajtjes së pajisjeve mjekësore’ zhvilluar në vitin 2014 nga MSH, nuk ka bashkëvepruar me të, për të saktësuar se ky shërbim, është përcaktuar të bëhet nga QSUT. Si rezultat i këtij veprimi/mosveprimi, QSUT rezulton të ketë shpenzuar fonde publike pa efektivitet deri në përfundim të auditimit në vlerën 59,751 mijë lekë”, thuhet në dokumentin e KLSH-së.
Raporti i KLSH-së ndër të tjera ka zbuluar se dhe sistemi elektronik i përdorur në QSUT, për regjistrimin e kartelave ka mangësi të shumta duke krijuar hapësira për abuzime dhe favorizime, sidomos të listës së ilaçeve të regjistruara për përdorim.
Një tjetër aspekt i rëndësishëm i raportit thekson se për vite me radhë QSUT-ja nuk ka mbajtur regjistra për trajtimin e hermodializës dhe të dhënat janë kontradiktore. Mbi këto të dhëna, qeveria vendosi më pas ta jepte me koncesion këtë shërbim.

Shkeljet e drejtoreshës së Ramës me tenderat

Rasti me aferën “Siemens”, nuk është rasti i vetëm ku drejtoresha e QSUT kapet në vjedhjen e parave publike. Një tender i majmë prej 10 miliardë lekësh e shndërroi QSUT në qendër të akuzave për zhvatjen e parave publike. QSUT çon deri në fund pazaret e nisura më 2014 me tenderin miliarda lekësh për lavanderinë, duke ia dhënë atë kompanisë së paracaktuar “AGS SHPK”. Kjo e fundit, e cila akuzohej se ishte favorizuar gjatë procedurës së parë të prokurimit, e cila u anulua nga Komisioni i Prokurimit Publik, KPP, është shpallur fituese me një ofertë prej 1,097 miliardë lekësh. Oferta fituese është e barabartë me 99.2 për qind e çmimit limit të tenderit. Fondi limit qe 1,160 miliardë lekë. Oferta e dytë në tender ka qenë ajo e bashkimit të operatorëve “Devis SHPK”, “Dimensione të reja”, “Univers Servis SHPK” dhe “A-K Company SHPK” me 1.1 miliard lekë. Në tenderin e parë ky konsorcium kompanish kishte dhënë një ofertë për të njëjtin shërbim relativisht më të ulët. “Balkan Laundry”, një ndërmarrje italo-shqiptare, si dhe një nga kompanitë ofertuese në tenderin e parë, thotë se ishte e gatshme të mbulonte shërbimin e lavanderisë në QSUT me më pak se gjysmën e fondit limit të përcaktuar nga autoriteti kontraktor, por “kriteret e vendosura nga ky i fundit ishin të paarritshme”. Drejtuesit e kompanisë pretendojnë se pavarësisht investimit modern prej miliona eurosh, kompania u skualifikua pasi ishte shumë e re në tregun shqiptar. Tenderi i parë i mbajtur më 16 shkurt me autoritet kontraktues QSUT, pati 6 oferta nga kompani ose bashkime operatorësh. Në tenderin e dytë të mbajtur nga Ministria e Brendshme më 3 gusht pati dy oferta, shenjë që një pjesë e kompanive ka humbur besimin në procedurën e prokurimit. Fituesja e tenderit të dytë, “AGS SHPK” është akuzuar nga KLSH se ka përfituar nga favorizimi i padrejtë i Komisionit të Vlerësimit të Ofertave, KVO, në QSUT, në një tender tjetër për lavanderinë që mbulonte periudhën janar-prill 2014, duke i shkaktuar taksapaguesve një dëm prej 10.8 milionë lekësh. Anëtarët e KVO-së në QSUT janë paditur nga KLSH në Prokurori, por kjo e fundit i tha “BIRN” se është ende në procesin e verifikimit të akuzave. Ankesa për favorizim nga QSUT për “AGS SHPK” ka pasur dhe nga operatorët e tjerë që morën pjesë në tender. Tenderi për shërbimin e lavanderisë dhe hotelerisë në QSUT e ka zanafillën në janar 2014, kur procedura u hap nga spitali kryesor publik i vendit me një “procedurë të hapur mbi kufirin monetar”.