19.5 C
Tirana
E hënë, 11 Gusht, 2025
type here...

Mziu në Turqi me ftesë të Unionit të Bashkive në Samitin Ndërkombëtar për Integrimin Social

 

Kryetari i Bashkisë Kamëz, z. Xhelal Mziu, gjendet në Turqi, i ftuar nga Unioni i Bashkive të Turqisë për të marrë pjesë në Samitin Ndërkombëtar për Integrimin Social. Unioni i Bashkive të Turqisë dhe Komisioni Evropian kanë bashkëfinancuar projektin ISKEP, me temën e përfshirjes sociale nga viti 2014. Projekti ka për qëllim rritjen e punësimit të grupeve të pafavorizuara. Si aktiviteti i fundit ndërkombëtar për projektin, organizohet “Samiti për përfshirjen sociale” në datat 16-19 maj. Konferenca do të mbledhë politikanë dhe ekspertë nga UCLG, Këshilli i Evropës, CEMR dhe organizata të tjera. Duke qenë se Unioni i Bashkive të Turqisë synon të zhvillojë marrëdhënie të ndërsjella në rajonin e Ballkanit dhe përpiqet për të krijuar platforma për shkëmbimin e përvojave, ka ftuar nga data 16 deri më19 maj 2016 ekspertë dhe politikanë, mes të cilëve edhe kryetarin e Bashkisë Kamëz, z. Xhelal Mziu.
Mes temave që diskutohen në këtë samit është “Integrimi social në dritën e krizës së refugjateve”, “Integrimi dhe axhenda ndërkombëtare”, “Sfida e përfshirjes sociale të grupeve të pafavorizuara në vendet e zhvilluara”, “Sfida e valëve të reja të refugjatëve në përfshirjen sociale në shoqëri të ndryshme”, “Sfida e pjesëmarrjes së plotë të personave me aftësi të kufizuara në shoqëri” etj.
Zhvillimet aktuale në Evropë dhe Turqi kanë bërë të qartë se përfshirja sociale është një proces që duhet të trajtohet në mënyrë efikase dhe të drejtë. Kjo vlen jo vetëm për nivelin kombëtar, por edhe për bashkëpunimin në mes vendeve, në mënyrë që të jepet një prioritet më i lartë për përmirësimin e gjendjes ekonomike dhe sociale të popullit dhe për të siguruar më shumë kohezionin social. Turqia dhe autoritetet turke, sidomos ato vendore, të cilat janë të angazhuara në ISKEP dhe në luftimin e përjashtimit social në nivel vendor, mund të përfitojnë nga përvoja ndërkombëtare si një mënyrë për të mbështetur cilësinë e nismave të saj dhe të zgjerojë gamën e eksperiencave.
Samiti në thelb do të jetë një platformë për diskutim dhe reflektim mbi atë se çfarë mund të arrihet në përmirësimin e jetesës së grupeve të pafavorizuara. Diskutimet do të adresojnë nevojat e grupeve të pafavorizuara në Turqi dhe në Evropë, në përgjithësi, me theks të veçantë në sfidat e tanishme dhe të ardhshme. Samiti do t’u ofrojë pjesëmarrësve një mundësi të shkëlqyer për të krijuar rrjete, gjë që do të hapë rrugën për bashkëpunime të mëtejshme.

Shukriu fshihej në Tiranë kur u arrestua nga Prokuroria

Ish-kreu i Bashkisë Dibër, Shukri Xhelili është arrestuar pasditen e djeshme me akuzën për “Korrupsion pasiv” në formën e kërkimit të favoreve seksuale. Gjykata ka vendosur të pranojë kërkesën e Prokurorisë së Krimeve të Rënda dhe ka vendosur dje masën e sigurisë “arrest me burg” për kryetarin e Bashkisë Dibër deri para pak ditësh. Xhelilit i janë vënë prangat si i dyshuar për veprën penale të “Korrupsionit pasiv” në formën e kërkimit të favoreve seksuale prej shtetases A.A, në këmbim të emërimit në një vend pune në strukturat e varësisë së Bashkisë Dibër. Bëhet e ditur se vendimi i Gjykatës është ekzekutuar nga ana e forcave të Policisë së Shtetit.
Kryetari i Bashkisë së Dibrës fshihej në Tiranë që pas publikimit të skandalit seksual në media. Ai menjëherë pas lirimit nga Policia e Dibrës është vendosur në kryeqytet. Ndërkohë, arrestimi i tij është bërë dje rreth orës 19 e 45 pas lëshimit të urdhër arrestit nga Prokuroria e Krimeve të Rënda. Kapja dhe ndalimi i tij u bë në Tiranë nga Strukturat e Drejtorisë për Krimin Ekonomik e Financiar në Policinë e Shtetit, bën të ditur Policia e Shtetit.
Xhelili u përfshi në një skandal seksual pas publikimit të video-përgjimit nga një 20-vjeçare me iniciale A. A., të cilës i kishte kërkuar marrëdhënie seksuale në këmbim të një vendi pune. Mbi ish-kreun e Bashkisë së Dibrës rëndojnë tri akuza, të cilat mund të ndëshkojnë Shukri Xhelilin deri në 18 vjet burg. Akuza e parë është ajo për marrëdhënie seksuale, duke shpërdoruar detyrën, akuza tjetër është ajo e shpërdorimit të detyrës, ndërsa akuza e tretë ndaj ish Kryebashkiakut të Peshkopisë është ajo e korrupsionit pasiv i personave që ushtrojnë funksione publike.
Para pak ditësh, Tv “Ora News” publikoi një videoskandal ku kreu i Bashkisë së Peshkopisë i kërkonte seks një vajze 20-vjeçare në këmbim të një vendi pune në Bashki. Pretendimi i saj ishte se Kryetari i kësaj bashkie i kishte premtuar se do t’i gjente një punë në administratën e Bashkisë, nëse vajza pranonte të kryente marrëdhënie seksuale me të. Denoncuesja nëpërmjet telefonit, kishte lënë takim në zyrën e kryetarit për t’i kërkuar një vend pune, teksa ai, sipas saj, i kishte kërkuar favore seksuale.
I zgjedhuri socialist i zgjedhjeve lokale të vitit 2013 është “kapur mat”, ndërsa premton vende pune për vajzat e reja, duke kërkuar favore seksuale. Shukri Xhelili është kapur në shtratin e një hoteli privat në Tiranë, ku shfaqet në video madje dhe me mbathje të grisura.
Pas publikimit të video-skandalit seksual që kishte në qendër ish-kreun e Bashkisë Peshkopi, Shukri Xhelilin, i cili premtonte punë dhe rritje rroge kundrejt favoreve seksuale, protagonistja e kësaj historie është kërcënuar nga njerëzit e tij. 20-vjeçarja është shprehur se nuk është penduar për realizimin e videos, ndërsa kërkon të largohet nga Shqipëria, pasi ndihet e rrezikuar.
20-vjeçarja me iniciale A. A. rrëfen se videon e ka bërë, pasi ndihej nën presionin e kryetarit të Bashkisë dhe se pas kësaj çështje nuk ka arsye politike apo premtime për para. Edhe nëna e saj është shprehur se kanë marrë kërcënime dhe nuk del dot nga shtëpia.

R.POLISI

DEA amerikane përjashtoi Tahirin nga hetimi për baronin e drogës, Balilaj

DEA: DEA agents in Detroit, Michigan Spike TV

Për shkak të lidhjeve të drejtpërdrejta me atë që u quajt nga mediat dhe “CNN” si “Eskobari i Ballkanit”, ministri i Brendshëm, Saimir Tahiri u përjashtua nga aksioni ndërkombëtar, i organizuar nga policia greke, DEA amerikane dhe polici të vendeve të tjera të BE-së për kapjen e Klement Balilit. Më pak se dy muaj më parë, autoritetet greke njoftoi policinë dhe Prokurorinë shqiptare se një shtetas me emrin “Keli” ishte kreu i një organizate trafiku droge, me shtrirje në disa vende të Europës.   Ndërkohë, një javë nga operacioni me 15 të arrestuar në Greqi dhe dy shqiptarë të prangosur në Belgjikë si pjesë e të njëjtit rrjet, në Shqipëri nuk ka asnjë të dhënë rreth të dyshuarve si krerë të grupit të narkotrafikut. Lidhjet e forta politike të Klement Balilit, të theksuara nga “CNN” grek, mund të jetë një nga arsyet përse DEA dhe Prokuroria greke përjashtuan nga hetimet dhe finalizimi i operacionit palën shqiptare. Edhe pse fillimisht pala shqiptare kishte bashkëpunim me atë greke në hetimin e këtij grupi, në përfundim gjithçka ndryshoi. Tashmë nuk ka më asnjë dyshim se Prokuroria dhe policia shqiptare janë përjashtuar nga hetimi i këtij rrjeti, pasi nuk e kanë justifikuar besimin e DEA-s dhe Prokurorisë greke. Faktet e deritanishme e konfirmojnë këtë gjë, duke hedhur dyshime të forta për rolin e vërtetë të institucioneve të hetimit shqiptar. Ndërkohë në mars të këtij viti, Prokuroria e Krimeve të Rënda ka regjistruar procedimin nr. 44 për akuzën e trafikut të lëndëve narkotike, kryer në bashkëpunim. Informacioni për këtë procedim Prokurorisë i është përcjellë nga policia, e cila kishte marrë të dhëna nga autoritetet greke. Gjatë marsit, autoritetet greke i kishin përcjellë njësisë kundër krimit të organizuar në Policinë e Shtetit të dhëna rreth një shtetasi shqiptar, që dyshohej si drejtues i një rrjeti narkotrafiku, me shtrirje në disa vende të Europës. Bëhet fjalë për një shtetas shqiptar me emrin “Keli”, i cili jetonte në Jug të Shqipërisë dhe përdorte një numër grek. Menjëherë policia është vënë në lëvizje dhe me autorizimin e Prokurorisë ka nisur punën për identifikimin e shtetasit Keli, i cili sipas dokumenteve të Prokurorisë greke rezulton të jetë Klement Balili, deri para pak ditësh drejtor i Transporteve në qytetin e Sarandës. Policia ka hasur vështirësi në përgjimin e numrit grek që përdorte Balili, por ka vënë në përgjim numrin e tij shqiptar, si dhe ka mbajtur në vëzhgim të dyshuarin. Të dhënat rreth identitetit të tij i janë përcjellë Prokurorisë greke, e cila në bashkëpunim me zyrën e DEA-s në Athinë kishte mundur të identifikonte pjesën tjetër të grupit.

PD: Tahiri të largohet nga detyra

Sekretari i Përgjithshëm në Partinë Demokratike, Arben Ristani ndërsa solli në vëmendje faktin e përjashtimit të Tahirit nga aksioni i autoriteteve greke theksoi krijimin e lehtësirave nga ana e tij dhe Ramës në mënyrë që Balili të arratisej nga Shqipëria pa lënë asnjë gjurmë.   “Është dita e katërt e arratisjes së Klement Balilajt i akuzuar si një prej krerëve të trafikut ndërkombëtar të drogës, ndërkohë që paturpësisht Tahiri doli e foli për suksese. Tahiri ishte përjashtuar nga ky aksion ndërkombëtar, i organizuar nga policia greke, nga DEA amerikane dhe polici të vendeve të tjera të BE-së, për shkak të lidhjeje të drejtpërdrejta me atë që u quajt nga mediat dhe ‘CNN’ si Eskobari i Ballkanit. E megjithatë Tahiri, Rama dhe krerët e tyre të policisë u bënë pjesë e këtij aksioni duke e dëmtuar atë, duke ndihmuar njeriun e tyre, Klement Balili, t’i shpëtojë kërkimit, duke e ndihmuar të arratiset”, u shpreh Ristani.
“Qëndrimet kontradiktore të policisë, për hetimin e organizatës kriminale tregojnë se ata janë komprometuar për shkak të lidhjeve të Balilajve me drejtues të lartë politikë në vend, me Tahirin në veçanti. Ndërkohë që policia greke ka nxjerrë urdhër ndalimi duke përmendur me emër dhe mbiemër, Klement Balilajn, i njohur me pseudonimin Keli, si një prej krerëve të trafikut ndërkombëtar të drogës, policia shqiptare nuk e di nëse ky person është apo jo nën hetim. Ndonëse pjesa më e madhe e anëtarëve të organizatës janë arrestuar, Policia e Shtetit nuk ka bërë asnjë prej atyre deklaratave zyrtare të saj, ku ajo mburret për gjoja suksese në bashkëpunim me partnerët ndërkombëtarë, siç vrapoi ta quante në fillim të publikimit të të dhënave”, tha Ristani.
“Dhe e gjitha kjo ka vetëm një shpjegim. Autoritetet shqiptare janë përjashtuar nga hetimi pasi janë vërtetuar lidhjet e Balilajt me politikanë të lartë dhe është vërtetuar mbrojtja që i japin atij drejtuesit e Policisë së Shtetit në trafikun e drogës. Lidhja dhe mbrojtja që Klement Balilaj ka quhet Saimir Tahiri. Është ky ministër, i njohur si mburojë e trafikantëve dhe e krimit prej tre vitesh, nga Viluni te Habilajt, nga Durim Bami te Shullazi, nga Marku te Arben Frroku, e së fundmi tek Eskobari Balili. Lidhjet e Saimir Tahirit me bandat kriminale dhe organizatat e narkotrafikut janë tashmë të njohura edhe nga partnerët tanë europianë dhe amerikanë. Është emergjente që ai të largohet një orë e më parë nga detyra, e një hetim i plotë e i gjithanshëm të nisë për lidhjet e tij kriminale”, bëri të ditur ndër të tjera sekretari i Përgjithshëm në PD, Ristani.
Arben Shahini

Darkat e shefave të komisariatit me Klement e Rigers Balilin

Ish-Kryeministri Berisha ka publikuar dje denoncimet e tre qytetarëve dixhitalë të cilët faktojnë “urdhrin e Saje Qorrit për Klement Balilin për t’u larguar nga Shqipëria. Lidhjet e ngushta të Eskobarit me drejtuesit e policisë së jugut dhe kryetarin e Bashkisë Delvinë. Përcjelljen nga Policia e Sarandës të skafit me drogë që u kap në Greqi”.
“Mirëmëngjesi Doktor, urdhrin e Tahirit, Klement Balili për t’u larguar nga Shqipëria e ka marrë direkt nga shefi i Komisariatit të Sarandës. Po kështu kushërinjtë e Saimir Tahirit janë të lidhur ngushtë me Klement dhe Rigers Balilin, të cilët ka qenë tek ‘Santa Kuaranta’ mbas datës 8 maj, një ditë më mbrapa kapjes së skafit me kanabis në Greqi. Gjithashtu, shefi i Komisariatit të Sarandës, shefi i Komisariatit të Delvinës dhe shefi i Komisariatit të Kufirit Sarandë, kjo treshe darkonin së bashku me K.B., dhe kryetarin e Bashkisë Delvinë çdo natë tek kompleksi ‘Santa Kuaranta’, ai dhe vëllezërit e tij, u njoftuan nga këta shefa dhe nga kushërinjtë e Tahirit për kontroll nga policia”.
“Përshëndetje Doktor, në këtë trafik droge është i përfshirë edhe nipi i Klemend Balilit, kryetari aktual i Bashkisë Delvinë, i cili ka pasur pjesën e tij në ngarkesën e kapur nga policia greke para një jave, kryetari i bashkisë Rigers Balili, e bën këtë profesion (trafik droge) kur ka kryer detyrën e përmbaruesit në qytetin e Gjirokastrës, ku shkonte e blente dhe e paketonte vetë në Lazarat. Kjo verifikohet nëse pyet banorët e këtij fshati dhe për përfshirjen e tij në këtë trafik me shtetin e Holandës, t’i verifikojnë tabulatet e numrave të telefonit dhe në ngarkesën e fundit e kapur në Greqi ka pasur pjesën e vet së bashku me xhaxhanë e tij tashmë i arratisur”.
“Përshëndetje Doktor, mund t’ju them një info lidhur me të dyshuarin Klemend Balili, se një ditë para se skafi me drogë të ndalohej nga policia greke, ky skaf ka kaluar para Komisariatit të Policisë Kufitare Sarandë, afër portit. Kjo mund të verifikohet nga kamerat e këtij komisariati, skafi shkoi drejt plazhit Era, në lagjen Kodër të Sarandës, e rimorkuar nga një makinë e tipit ‘Renxh’, me shofër një i afërm i tyre dhe nga ky plazh niset të nesërmen drejt Greqisë, i cili u ndalua nga policia greke”.

“CNN”: Brenda 48 orëve në Tiranë urdhër arresti ndërkombëtar për Balilin

Brenda 48 orëve pritet të mbërrijë në Shqipëri urdhër arresti ndërkombëtar për Klemend Balilin. Kështu bëri të ditur dje “CNN” grek, duke iu referuar burimeve nga hetuesit e dosjes për organizatën kriminale që bënte trafik ndërkombëtar të drogës. Sipas “CNN” urdhri i arrestit ndërkombëtar i lëshuar nga autoritetet greke do të shpërndahet në të gjithë Evropën, ndërsa dosja e plotë hetimore ndaj biznesmenit nga Saranda do të jetë në duart e palës shqiptare në ditët e ardhshme.
Dyshohet që Klemend Balili të ketë llogari bankare në së paku 10 vende të Evropës, prandaj hetimet do të fokusohen edhe në këtë drejtim.
Mediat greke e cilësuan Balilin si “Eskobarin e Ballkanit”, pasi ai sipas dosjes hetimore të autoriteteve greke dhe amerikane, rezulton si financuesi kryesor i rrjetit kriminal që çonte drogë në shumë vende të Evropës. Po pavarësisht se urdhër arresti ndërkombëtar do të jetë në duart e palës shqiptare, tashmë prej 4 ditësh Klemend Balili rezulton i zhdukur.
Dyshohet se ai është larguar për në Kolumbi, ndërsa autoritetet shqiptare kanë heshtur që prej fillimit, duke faktuar pretendimet e palës greke se ky njeri nuk mund të preket për shkak të lidhjeve të tij të fuqishme politike në Tiranë.

PS nuk pranon që të dëgjohen Llalla dhe Ajazi

Deputetët socialistë refuzuan dje thirrjen në seancë dëgjimore të ministrit të Brendshëm, Saimir Tahiri, Prokurorit të Përgjithshëm, kreut të Policisë së Shtetit dhe atij të SHISH për të raportuar mbi çështjen e skandalit të përgjimeve. Deputeti demokrat Flamur Noka, në cilësinë e nënkryetarit të Komisionit të Sigurisë kërkoi dje që komisioni të thërrasë autoritetet përkatëse të raportojnë për shkak të rëndësisë së kësaj çështje, e cila përbën kërcënim për sigurinë kombëtare.
Noka kërkoi që ministri i Brendshëm, Saimir Tahiri, të paraqitet në Komisionin e Sigurisë për të dhënë shpjegime lidhur me pajisjen e përfolur të përgjimit, si dhe për çështjen e Klement Balilit dhe Arben Frrokut. Sipas Nokës, përgjimi nga Policia përbën krim të rëndë dhe shkelje të të drejtave.
“Ka dalë lajmi i një pajisjeje përgjimi, që fillimisht u mohua. Më vonë rezultoi se Prokuroria ka nisur një hetim. Kjo përbën krim të rëndë ndaj një grupi deputetësh të opozitës ndaj kemi thirrur Tahirin, Llallën, Vishën dhe Çakon. Sepse ekzistenca e pajisjes shkel ligjin dhe të drejtat e njeriut. Nesër (Sot)  në ora 10:00 presim Tahirin të japë përgjigje. Në 11:00 presim Adriatik Llallën. Në 12:00 do thirret Haki Çako, dhe në 13:00 kreun e SHISH, për të dhënë shpjegime”, deklaroi Noka.
Por kjo kërkesë e Nokës ka sjellë reagimin e menjëhershëm të deputetëve socialistë, të cilët refuzuan thirrjen në Komision të autoriteteve në fjalë me qëllim kalimin e skandalit të përgjimit në heshtje.  Ata i kanë kërkuar opozitës më shumë informacion për çështjen në mënyrë që të mbështesin kërkesën e tyre.
“Po të jetë, sigurisht që është hataja, por nuk e dimë në është apo nuk është. Ne jemi të prirur të marrim një vendim të pjekur, sepse kjo çështje është sensitive. Keni dy alternativa, ose të na sillni materiale informacione që i keni, t’i diskutojmë dhe të marrim vendim, ose ushtroni kompetencën që ju jep rregullorja me 1/3 të firmave tuaja”, është shprehur Pirro Lutaj.
Në debat me deputetët demokratë, përfaqësuesit e Partisë Socialiste në Komisionin e Sigurisë parlamentare braktisën mbledhjen, duke i thënë opozitës se kërkesa për të thirrur në seancë dëgjimore ministrin e Brendshëm, drejtuesin e Policisë së Shtetit, Prokurorin e Përgjithshëm dhe kreun e Shërbimit Informativ nuk është e bazuar në rregullore.
Lëvizja Socialiste për Integrim ishte në mbështetje të kërkesës së Partisë Demokratike, por sipas deputetit Luan Rama, seancat dëgjimore duhet të nisin me kreun e Shërbimit Informativ. Rama tha se, nëqoftesë kjo çështje rezulton e vërtetë, skandali është i madh dhe nuk prek thjeshtë Ministrinë e Brendshme.  “Nëse kjo praktikë provohet, atëherë hyjmë në një kapitull tjetër, të trajtimit të një skandali që ka të bëjë me zbatimin e ligjshmërisë në këtë vend, me rolin e institucioneve në këtë vend”, tha Luan Rama.
Në mungesë të deputetëve socialistë, anëtarët e Lëvizjes Socialiste për Integrim dhe ata të Partisë Demokratike kanë rënë dakort që t’i përcillet kërkesa për të dhënë sqarime para Komisionit të Sigurisë Kombëtare, ministrit të Brendshëm, Prokurorit të Përgjithshëm, kreut të Shërbimit Informativ dhe drejtorit të Përgjithshëm të Policisë.
Pak minuta më vonë socialistët jashtë sallës së Komisionit parlamentar të Sigurisë Kombëtare e zbutën qëndrimin. “Ne i kemi kërkuar kolegëve të opozitës të formatojnë kërkesën në bazë të Nenit 36 të rregullores. Autoritetet e Kuvendit të komunikojnë me drejtuesit e institucioneve të shtetit, qoftë me ministrin e Brendshëm, qoftë me kreun e SHISH dhe secili prej tyre do të vijë në komision për të raportuar”, u shpreh Lutaj.

Pajisja përgjon të gjithë rrjetet sociale që përmban spartphon-i

Kjo pajisje përgjon të gjithë rrjetet sociale që ka smartpohne. Ndryshe nga pajisjet e tjera të përgjimit, kjo ka antenë falco, e cila përforcon valët e telefonit. Problemi është se nuk duhet të hyjmë kaq thellë, por kjo pajisje është kapur në punë. Janë përgjuar, sepse janë kapur frekuenca. Deputeti demokrat, Flamur Noka, e ka cilësuar një skandal dhe krim të rëndë shtetëror, pajisjen e përgjimit, për të cilën është folur gjerësisht dy ditët e fundit. Në një prononcim për “News 24”, Noka tha se sipas ligjit për përgjimet, ky atribut i takon Prokurorisë së Përgjithshme, dhe jo ndonjë institucioni tjetër. Sipas deputetit demokrat, me këtë pajisje përgjimesh, cenohet rëndë siguria kombëtare si dhe cenohen të drejtat e liritë e qytetarëve. “Nisur nga informacionet mediatike apo jo mediatike, u shqetësuam, dhe e përcollëm këtë në komision. Kërkuam seancë dëgjimore me ministrin, kreun e SHISH dhe kryeprokurorin. U pranua se ekziston një pajisje e tillë, por sipas ministrit Tahiri, përdoret për çështje trajnimesh. Është një rast i paprecedentë që të futet kështu në vend një pajisje e tillë e paligjshme. Nuk ka bërë vaki në gjithë vitet e pluralizmit kjo gjë. Në përpëlitje për të shpëtuar nga kjo histori, thonë se është pajisje për trajnim. Unë kam qenë ministër i Brendshëm, por edhe kushdo që e njeh ligjin për përgjimet, thotë se atributi i përgjimeve i takon Prokurorisë së Përgjithshme. Mund të iniciojnë institucionet e ndryshme, por duhet miratimi i Prokurorit të Përgjithshëm. Por edhe ky i fundit duhet të marrë konfirmimin e Gjykatës për hetime në kohë të gjatë. Çfarë trajnimi u bëka me një pajisje që nuk përdoret për përgjim. Ky është skandal, është një krim i rëndë shtetëror, një krim i paprecedentë. Në rast se deri sot kemi ecur mbi bazën e aludimeve, por sot flasim ndryshe, kur e pranon ministri, pasi cenohen të drejtat dhe liritë e njeriut. Kjo pajisje e instalua në një institucion të paligjshëm sa i takon përgjimit, përbën krim. Të gjithë ata që kanë konsumuar këtë vepër penale, këtë krim, do të përgjigjen para ligjit. Në SHBA ka ndodhur një skandal i ngjashëm me këtë që po flasim ne, dhe ka dhënë dorëheqjen një president, pasi cenohet rëndë siguria kombëtare.

Debatet në komision, LSI: Jemi para një skandali

Flamur Noka: “Do kërkojmë që nesër (sot) në 10:00 ministri Tahiri të jetë në Komision për të dhënë shpjegime.
Në 11:00 do thirret Llalla për të dhënë detaje mbi hetimin çfarë ka rezultuar.
Në orën 12:00 do thirret kreu i Policisë së Shtetit, Haki Çako.
Në orën 13:00 do thirret kreu i SHISH, Visho Ajazi Lika për raportim.
Pirro Lutaj: “S’mund të thirren krerët e institucioneve kur ka nisur hetim për çështjen”tha Lutaj, i cili kërkoi hedhjen në votim të kërkesës.
Luan Rama: “Tani kemi një denoncim mediatik mbi përgjuesin. Parimisht mbështes rritjen e rolit të Komisionit për çështje të tilla. Të kërkojmë informacion zyrtar para thirrjes së drejtuesve. Unë rezervoj të drejtën ta besoj informacionin. Nëse policia ka vepruar në kundërshtim me ligjin jemi para një skandali. Nuk do paragjykojmë pa patur një informacion zyrtar. Nëse është e vërtetë çështja duhet trajtuar shumë më thellë. Nëse kjo pajisje ka hyrë në vend implikimi është më i madh se Policia. Implikohen disa individë e institucione, duke nisur nga dogana”.
Sterkaj-Luan Ramës: Po e bëni fakt çështjen e pajisjes së përgjimit.
Luan Rama: Nuk e bëj fakt, por të kërkojmë informacion zyrtar.
Noka: Pajisja është fakt dhe kjo është e vërtetuar.
Luan Rama: Të formalizojmë informacionin për të mësuar të vërtetën. Jam i prirur të besoj se pajisja e përgjimit nuk ekziston. Pajisja mund të ketë lajthitje të drejtuesve të Policisë së Shtetit.
Sterkaj: Nuk mund të bëjmë analiza sikur pajisjen e kemi në tavolinë. Duhet të marrim informacion nga njerëzit kompetentë. Informacioni është thjesht mediatik. Ne ta çmojmë nëqoftëse e duam ministrin apo jo dhe e hedhim në votë. Nëse ka nisur një hetim s’mund t’i ftojmë autoritetet në Komision, nuk mund të dalim jashtë kompetencave.
Luan Rama:Çështja ka dalë në gazetë, se po ta kishte thënë Doktori do ta besoja. Të marrim informacion nga institucionet, më pas thërrasim titullarët.
Noka: Ne jemi përpara një skandali me përmasa kombëtare. Titullarët janë thirrur për çështje më me pak rëndësi. Ky është skandal i paprecedentë në historinë e vendit. Ne e kemi thënë, seancë dëgjimore dhe marrim informacionin.
Lutaj: Na sillni informacion që kërkesën ta kemi të bazuar.
Deputetët e PS, Lutaj, Qefalia, Çuko dhe Ndreu largohen nga mbledhja e Komisionit të Sigurisë.
Patozi: Deputetët e PS ikën se janë të shqetësuar për titullarët më shumë se për skandalin. Nëse skandali i përgjimit rezulton i vërtetë përmbys pushtetin pajisja e përgjimit. Është media që në shumë raste ka zbuluar skandalet, ndaj nuk duhet injoruar. Titullarët të vijnë për të dhënë versionin e tyre e të hedhin dritë për ngjarjen.
Luan Rama: Nuk e nënvlerësoj rolin e medias për çështje. Të jemi të matur për të zbardhur çështjen mbi bazën e një logjike që hedh dritë. SHISH të jetë institucioni i parë që do na japë informacion. Ta trajtojmë çështjen hap pas hapi, të mos bëjmë propagandë.
Noka: Unë nuk çmoj renditjen e titullarëve, por thelbin e ngjarjes.
Luan Rama: Drejtori i SHISH është ai që na nis proçesin, kjo çështje është logjike.

Tahiri të tregojë si hyri pajisja në Shqipëri

Noka: Kjo pajisje është e paligjshme, është prodhuar në Itali, kanë tentuar ta fusin në procesin ligjor dhe nuk është lejuar. Mund të na thotë ky ministër si ka hyrë kjo pajisje, është dhuruar, është regjistruar në doganë? Duhet të ketë një dokument për secilin rast, dhe duhet një regjistrim në regjimin e përkohshëm. Në momentin që e merr për pak kohë, futet në regjimin e përkohshëm doganor. Nëse e merr një pajisje jashtë çdo procedure ligjore, t’i je bandë. Është momenti për të vënë alarmin, siguria kombëtare në këtë vend, nuk ka qenë kurrë në rrezikun që është sot. Unë do konkludoj kur të shoh një dokument të Interforzës. Jam i prirur të besoj se nuk mund t’i shkojë mendja asnjë zyrtari të saj të përgjojë në Shqipëri”, është shprehur Noka. Deputeti demokrat bëri të ditur se kjo pajisje përgjon të gjithë rrjetet sociale që ka smartpohne. “Ndryshe nga pajisjet e tjera të përgjimit, kjo ka antenë falco, e cila përforcon valët e telefonit. Problemi, është se nuk duhet të hyjmë kaq thellë, por kjo pajisje është kapur në punë. Janë përgjuar, sepse janë kapur frekuenca.

Arben Shahini

Tahiri pastron dosjen e Balilit në polici dhe sistemin TIMS

Dosja e Klement Balilit në Policinë e Shtetit dhe sistemin TIMS është e pastër. ABC News ka arritur të kontrollojë dosjen personale të biznesmenit Balili, e cila ndodhet e regjistruar në mënyrë elektronike. Nga këqyrja e këtyre të dhënave, në formën e kartelës personale, Balili rezulton i pastër dhe i pa shoqëruar ndonjëherë në Policine e Shtetit apo i proceduar penalisht. Në këtë faqe është ndërhyrë për të fshirë të dhënat e arrestimit të tij në korrik të 2006, ku është arrestuar së bashku me dy inspektorë policie për akuzën e trafikut të 750 kg drogë, por që më pas, akuzat ndaj tij janë pushuar me urdhër të Prokurorisë. Por pavarësisht pushimit të akuzave, në sistem duhet të ishte e regjistruar rasti i procedimit, arrestimit apo edhe pushimit.
Për Balilin nuk figuron në kartelë edhe kallëzimi penal i Bashkisë së Sarandës për ndërtim të paligjshëm të kompleksit turistik “Santa Quaranta”, ku kompania e tij dhe ai vet personalisht janë kallëzuar nga ish-kreu i Bashkisë tashmë me detyrën e zv/ministrit të Brendshëm. Por pavarësisht se është detyrim ligjor, që në këtë kartelë të evidentohen këto raste, për Klement Balilin nuk ka asnjë të dhënë për të kaluarën e tij penale. Ndryshe ndodh me shtetasit e tjerë shqiptarë, ku për çdo kallëzim, shoqërim apo informacion tjetër, agjentët e policisë i hedhin në programin e sistemit TIMS.
Nga ana tjetër, ABC News ka mësuar se Kelment Balili udhëtimin e fundit nga Shqipëria e ka bërë më 18 prill të këtij viti, duke kaluar në orët e para të mëngjesit në Kosovë nga ku është kthyer në darkë. Për të vazhduar po me një udhëtim brenda ditës më 10 prill po në Kosovë dhe më pas më 22 mars po të këtij viti ka kaluar në Malin e Zi, nëpërmjet pikës së kalimit kufitar të Muriqanit dhe është kthyer brenda ditës. Por pavarësisht se nuk figuron që ka kaluar zyrtarisht me dokumentin e tij personal në pikat e kalimit kufitar të Shqipëri, Klement Balili për Policinë është në arrati. Për këtë fakt, Policia e Shtetit në sistemin TIMS më datë 11 maj, ka hedhur në sistem emrin e Klement Balilit. Duke njoftuar të gjitha pikat e kalimit kufitar, se nëse paraqitet ky shtetas për të dalë apo hyrë në territorin shqiptar të njoftohet shefi i Krimit të organizuar pranë Policisë së Shtetit. Ky njoftim, thuhet në kartelë, të bëhet për shkak se duhet të merret në pyetje për llogari të procedimit penal ku dyshohet se është përfshirë në trafikun ndërkombëtar të drogës.
Për këtë procedim, në Greqi janë arrestuar 13 shtetas grekë dhe dy shtetasit shqiptarë Petro Dalanaj dhe Kleanthi Palaj. Si pjesë e këtij rrjeti në Belgjikë janë arrestuar dy vëllezërit nga Kukësi, Dhimitër dhe Xhevahir Poti.

Dokumentat e policisë greke: Çfarë ndodh me hashashin në Shqipëri?

Dokumenta të Policisë greke, të publikuara nga mediat e vendit fqinj zbardhin të gjithë skemën si funksiononte trafiku i drogës, që drejtohej nga Klement Balili. Pjesë e shkrimeve të mediave të huaja është edhe roli i shqiptarëve në trafik. Celula e trafikantëve që kultivonin drogën dhe garantonin dërgimin e hashashit në kufi me Greqinë ishte një celulë e veçuar nga ajo e Greqisë dhe e Belgjikës.
Ndërkohë që në Greqi dhe Belgjikë janë arrestuar tashmë të gjithë trafikantët, në Shqipëri nuk është ndërmarrë asnjë veprim dhe për më tepër nuk jepet asnjë informacion në media. Në Athinë është arrestuar Georgios Alifantis bashkëpunëtori më i ngushtë i Balilit. Në Bruksel janë arrestuar dy vëllezërit Dhimitër dhe Xhevahir Poti. Për Balilin ende nuk është nxjerrë një mandat arresti nga Policia shqiptare, ndërkohë që pala greke e ka shpallur në kërkim.
Grupi përdorte agjencitë e udhëtimeve dhe agjencitë e transporteve si brenda dhe jashtë vendit për të fshehur drogën, ku shpesh herë e ka bërë këtë gjë në trajlera të mbushur me gurë dekorativë (Mermer), trajlera të ngarkuar me çokollata dhe drurë për zjarr.
Shqiptarët e përfshirë në trafikun e drogës: Klement Balili 44 vjeç, shtetas shqiptar, banues Sarandë Shqipëri. Petro Dalanaj 59 vjeç, profesioni peshkatar, Sarandë. Kleanth Palaj 22 vjeç, profesioni peshkatar, Sarandë. Zaharia Rondo 50 vjeç, profesioni shofer, lindur Himarë, banues Kifisia Athinë. Stefan Zoto 43 vjeç, profesioni shofer, lindur Himarë, banues Pagrati Athinë

“Baroni i Ballkanit”, 20 milionë euro për “Santa Quaranta”

Gazeta greke “Ethnos” ka bërë një artikull të gjatë për “Baronin e Ballkanit”, kreun e organizatës kriminale që trafikonte drogë në të gjithë Evropën. Gazeta greke ka pasqyruar të gjitha deklaratat dhe akuzat politike në Shqipëri për këtë çështje, dhe njësoj si mediat e tjera në shtetin fqinj, thotë se Escobari shqiptar është Klement Balili. Duke folur rreth këtij personazhi, e përshkruar atë me lidhje të forta politike dhe thekson edhe fatin që është pronar i resortit luksoz “Santa Quaranta” në Sarandë, një investim 20 milionë euro shkruan kjo media.
Ndryshe, nga sa u deklarua një vit më parë në inaugurimin e resortit ku morën pjesë drejtues të lartë të qeverisë, ku u tha se kushtoi 3 milionë euro. “Biznesmeni 44-vjeçar, përveç “Santa Quaranta” është gjithashtu pronar edhe i hotel “Olivia” në bregdetin e Butrintit. Edhe “Santa Quaranta” është një investim prej 20 milionë euro. Sot është hoteli më modern dhe luksoz në bregdetin shqiptar. Hoteli organizon shpesh “netët greke”, ku janë të ftuar shumë emra të muzikës greke, duke përfshirë Katerina Stikoudi, George Tsalikis, Ilias Vrettos, Stavento etj”, shkruan gazeta greke “Ethnos”. Balili, ndërkohë është edhe pronar i hotel “Olivias” në bregdetin e Butrintit, një ndër hotelet më të njohura të zonës. Po ashtu është pronar i hotel “Butrinti” në Sarandë. Së bashku me vëllezërit e tij, Klement Balili është pronar i shoqërisë së sigurisë private “Balili shpk”, e cila operon në Qarkun e Vlorës.
Klement Balili, 44-vjeç, konsiderohet nga mediat në Greqi si “Eskobar i Ballkanit” i cili drejton një kartel që trafikon sasi të mëdha lëndë narkotike në vendet e BE-së. Në një operacion të para pak ditëve, policia greke arrestoi në total 15 persona, ku pesë prej tyre në Zakynthos dhe dy në Belgjikë. Policia zbuloi në ishull 678 kg marijuanë, e cila në treg do të kapte një vlerë prej 1.5 milionë euro. Sipas hetuesve lënda narkotike është transportuar nga Shqipëria në Zakynthos në fund të muajit prill.

Balili kishte planifikuar të fuste në Francë 60 kg kokainë

Rrjeti i drogës në të cilin dyshohet se ka qenë përfshirë edhe Klement Balili, kishte planifikuar të fuste në Francë 60 kg kokainë. Kjo ishte planifikuar të realizohej më 18 nëntor 2015. Droga ishte magazinuar në një vend të panjohur në Belgjikë dhe që andej do të dërgohej në Itali e më pas në Francë. Mirëpo masat e larta të sigurisë, pas sulmeve terroriste në Paris, që ishin kryer pesë ditë më parë, i detyruan krerët e organizatës që ta anulonin operacionin. Kështu bën të ditur portali grek, “The Toc”, që pretendon se ka në dorë gjithë dosjen penale të çështjes. Sipas “The Toc”, operacioni financohej nga kreu shqiptar, me moshë 44 vjeç (që sipas gjithë mediave greke në fakt, është Balili).
Një tjetër operacion ka dështuar sërish, në shkurt 2016. Një sasi droge do të transportohej nga Spanja për në Itali, me një kamion të transportit ndërkombëtar. Përgjegjës për sigurimin e drogës ishte një pjesëtar i rrjetit, shtetas shqiptar, me moshë 43 vjeç. Për transportin ishin destinuar 100.000 euro, nga të cilat 20.000 do t’u jepeshin drejtuesve të mjetit dhe 80.000 do t’u shpërndaheshin pjesëtarëve të tjerë, me rol mbështetës. Kamioni u nis më 20 shkurt nga Vjena e Austrisë, hyri në Itali dhe përmes Portit Civitavecchia mbërriti me traget në Portin e Barcelonës, për të marrë ngarkesën e drogës. Mirëpo, edhe ky aksion u anulua, për shkak të kontrollit  të kamionit nga autoritetet spanjolle, gjë që krijoi dyshime tek drejtuesit e rrjetit.
Por edhe më herët, në prill 2015, kishte dështuar një tentativë për të transportuar drogë nga Belgjika për në kryeqytetin e Norvegjisë, Oslo, siç citon dosjen penale portali grek, “The Toc”. Kamioni ishte nisur me një ngarkesë të ligjshme nga Greqia, me stacion tranzit Mynihun, ku do të shkarkohej e do të merrte një ngarkesë tjetër, gjithashtu të ligjshme, për në Oslo. Kamioni ishte planifikuar të kalonte nga Belgjika, ku në vendet e posaçme do të fshihej sasia e drogës. Por edhe ky aksion u anulua, pasi skadoi afati i marrjes në dorëzim të ngarkesës së ligjshme. Por edhe për një arsye tjetër: Karroceria e kamionit kishte lartësi më të madhe nga sa lejohej që të qarkullonte në rrugët e Norvegjisë…
Në dosjen penale, gjithmonë sipas citimeve të portalit grek “The Toc”, ka edhe një detaj interesant sa i përket qëndrimit të Policisë shqiptare, kur homologët grekë u folën mbi veprimtarinë e “Kelit”, siç përmendet Balili. Përfaqësuesit e autoriteteve shqiptare, “kur dëgjuan emrin, u thanë se nevojiteshin prova të pakundërshtueshme, me qëllim që ata ta gjenin e ta arrestonin”. Dhe kjo, shpjegon “The Toc”, për arsye se “Keli” sillej të kishte lidhje të fuqishme me aparatin shtetëror të vendit fqinj”. Gjithsesi, “The Toc” nënvizon se ka interes të shihet se si do të lëvizin autoritetet shqiptare, pasi të lëshohet urdhër arresti ndërkombëtar për Balilin, çka sipas portalit grek do të bëhet brenda kësaj jave.

R.POLISI

Raporti: 1 në çdo 2 qytetarë, ryshfet për shërbimet falas nën presionin e zyrtarëve

Studimi i fundit i Southeast Europe Leadership for Development and Integrity mbi korrupsionin në Shqipëri për vitin 2016 tregon se numri i qytetarëve që pranojnë se iu është dashur të paguajnë ryshfet për të marrë shërbimin që ju takon u rrit me 5% krahasuar me vitin paraardhës. Plot 49.6% apo 1 në çdo 2 qytetarë janë detyruar të japin ryshfet në këmbim të marrjes së shërbimeve të detyrueshme falas në zyrat e shtetit.
Përmes një deklarate për shtyp, zëdhënësja e PD, Ina Zhupa i cilësoi të dhënat e këtij raporti si dëshmi e realitetit në Shqipëri se korrupsioni është i kudondodhur, i përhapur në çdo nivel të qeverisjes.
“Qeverisë Rama-Meta po i rrëzohen përditë e më shumë alibitë dhe zhurma propagandistike që qeveria paraqet përpara publikut duket gjithnjë e më e shpërfytyruar përballë realitetit dhe përballë studimeve ndërkombëtare që dëshmojnë gjendjen e mjeruar të vendit. ‘Korrupsioni i kudogjendur’ është vlerësimi në çdo raport ndërkombëtar për Shqipërinë dhe pasojat e tij i ndjen çdo qytetar që sot është më i varfër, më i pasigurtë dhe nuk i ofrohet shërbimi nga zyrat e shtetit pa paguar më parë”, u shpreh Zhupa.
Ajo thekson se këto të dhëna demonstrojnë vetëm njërën anë të përkeqësimit të situatës së korrupsionit në Shqipëri, sepse siç deklaron raporti vjetor i Departamentit amerikan të Shtetit korrupsioni është i kudogjendur
“Në dy vjet 2.2 miliardë euro u janë vjedhur shqiptarëve nga doganat, tatimet, tenderat, koncesionet, CEZ, OSHEE  etj.
Ndërsa papunësia dhe varfëria rriten, qeveria ka harxhuar në mënyrë korruptive rreth 90 milionë euro për luks, karburant, bileta avioni e makina. Vetëm me këto para do të ishin punësuar të paktën 14 mijë shqiptarë për një vit me rrogën 500 dollarë në muaj ose do të kishin marrë ndihmën e plotë ekonomike prej 68 mijë lekësh të vjetra në muaj, plot 109 mijë familje”, shprehet zëdhënësja e PD.
Nga ana tjetër, ajo vë në dukje se korrupsioni është shkaktari kryesor që vendi ndodhet në krizë totale ekonomike, në varfëri, në papunësi, në pamundësi për të mbyllur muajin. “Korrupsioni është arsyeja që 46% shqiptarëve, siç e shfaqin edhe statistikat e fundit të Bankës Botërore, jetojnë në varfëri me vetëm 5 dollarë për familje në ditë. Korrupsioni është një nga arsyet kryesore të përkeqësimit të klimës së biznesit, largimit të investitorëve të huaj dhe mbylljes së mijëra vendeve të punës.
Ky raport është një tjetër dëshmi tronditëse në pak javë për korrupsionin e ngritur në sistem nga qeveria Rama, përmes vjedhjes dhe abuzimit me taksat dhe pasuritë e shqiptarëve dhe ryshfetit të shumëfishuar në çdo zyrë publike dhe shtetërore”, shprehet PD në reagimim e saj.

Raporti

Lidershipi i Evropës Juglindore për Zhvillim dhe Integritet, një koalicion i rreth 30 OSHC-ve me mendime dhe bindje të përbashkëta, kreu në vitin 2016 raundin e katërt të Sistemit të Monitorimit të Korrupsionit në Evropën Juglindore dhe në Shqipëri. Partneri lokal i SELDI-së, Qendra Shqiptare për Kërkime Ekonomike (ACER) ndërmori në fillim të këtij viti një sondazh kombëtar me 1000 të anketuar në të gjithë Shqipërinë, ku u gjurmuan përvojat e qytetarëve me presionin e korrupsionit dhe përfshirjen në të (viktimizimit), si dhe perceptimet e tyre mbi nivelin e përpjekjeve për korrupsion dhe antikorrupsion. Ky studim, duke u bazuar në të njëjtën metodologji, është zhvilluar në vitin 2001, 2002 dhe 2014, duke ofruar një prirje të veçantë të të dhënave. Rezultatet e Sistemi të Monitorimit të Korrupsionit në Shqipëri 2016 tregon se 1 në 2 qytetarë shqiptarë në moshë madhore pranon se në mënyrë të drejtpërdrejtë ose të tërthortë i është kërkuar ryshfet nga zyrtarët publikë (49.6%). Kjo tregon përkatësisht një përkeqësim me rreth 5% në krahasim me studimin e 2014-tës. Kjo shifër paraqet një shtim të presionit korruptiv nga ana e zyrtarëve publikë ndaj qytetarëve. Si rrjedhojë, përfshirja e qytetarëve në korrupsion është rritur gjithashtu në mënyrë margjinale. Ka një rritje të lehtë prej afërsisht 1% të të anketuarve që pranojnë se u kanë dhënë ryshfet zyrtarëve publikë, krahasuar me dy vite më parë.
A.Shahini

Dhënia e ryshfetit pësoi rritje krahasuar me 2014

Një pjesë e konsiderueshme e të anketuarve (38.2%) deklarojnë se janë përfshirë në ryshfet nën presionin e zyrtareve publikë. Vetëm 1.6% janë bërë pjesë e një transaksioni korruptiv, pa qenë nën presion prej tyre. Dhënia e ryshfetit duke qenë nën presion, ka pësuar një rritje të lehtë krahasuar me vitin 2014. Këto të dhëna tregojnë se masat antikorrupsion të ndërmarra nga qeveria, shoqëria civile dhe bashkësia ndërkombëtare nuk kanë krijuar ende rrënjë të forta, gjë që bën të domosdoshme shtimin e përpjekjeve në këtë drejtim. Të dhënat mund të reflektojnë edhe faktorë të përkohshëm, por tregojnë ende një mungesë të ndryshimeve thelbësore, të cilat priten nga të dyja palët: shoqëria shqiptare dhe partnerët evropianë. Nivelet e larta të ndjeshmërisë dhe të pranueshmërisë së korrupsionit në shoqërinë shqiptare cenojnë në vijimësi përpjekjet për të luftuar ndikimin e tij negativ. Si shembull, të pyetur nëse do të ishin në pozicionin e zyrtarit publik, 2/3 e të anketuarve (66%) janë shprehur se do të pranonin ryshfet (nëse do të kishin një problem madhor). Ky rezultat është në të njëjtën linjë me rezultatet e indeksit të përfshirjes në praktikat korruptive pa presion.

Përfshirja në korrupsion në nivele shumë të larta

Në vitin 2016, qytetarët që janë pak a shumë të ndjeshëm, përfaqësojnë shumicën dërrmuese të popullsisë mbi 18 vjeç (91%). Nga viti 2001 deri në vitin 2016, pjesa e të anketuarve që janë plotësisht të pandjeshëm ndaj korrupsionit (që do të thotë nuk do të përfshiheshin kurrë në praktika korruptive) është rritur me 3%. Sipas rezultateve të anketimit, në vitin 2016 grupet që perceptohen si më të korruptuarit janë gjyqtarët, doganierët, prokurorët, zyrtarët e administratës në sistemin e drejtësisë, partitë politike dhe liderët politikë. Rezultatet tregojnë që gjatë dy viteve të fundit, nuk është shënuar asnjë përmirësim në besimin e qytetarëve në këto grupe. Sipas perceptimit të publikut, niveli i përfshirjes së tyre në praktika korruptive mbetet në nivele shumë të larta. Vlerësimi më i lartë negativ për gjyqtarët mbetet një pasqyrim i realitetit. Sistemi gjyqësor në Shqipëri vuan nga një sërë problemesh duke nisur me mënyrën e organizimit, statusin e funksionarëve të drejtësisë, administrimin dhe me mungesën e standardeve evropiane në funksionim.

76% e qytetarëve mendojnë se korrupsioni nuk mund të reduktohet

3/4 e të anketuarve (76%) mendojnë se “Korrupsioni nuk mund të reduktohet ndjeshëm”, ndërkohë që pak më shumë se 1/5 e tyre (22%) mendojnë se “Korrupsioni mund të reduktohet ndjeshëm ose të çrrënjoset”. Mosbesimi në rritje i qytetarëve në kapacitetet dhe efektivitetin e shoqërisë shqiptare për t’u përballur me problemin e korrupsionit, duket se tregon një lodhje të rrezikshme nga përpjekjet e institucioneve shtetërore për të luftuar korrupsionin. Për më tepër, numri i të anketuarve që mendojnë se korrupsioni mund të reduktohet në mënyrë drastike është zvogëluar në krahasim me gjetjet në vitet 2001, 2002 dhe 2014. Ky vlerësim, ndërkohë që pasqyron përvojën e vendeve të tjera evropiane me nivele të larta të korrupsionit, tregon gjithashtu një zbehje të mbështetjes për aksionet e zakonshme politike dhe e bën antikorrupsionin në mënyrë të rrezikshme të papëlqyeshëm politikisht. Kjo nënkupton një angazhim më të madh të fokusuar në qëndrueshmërinë afatgjatë të shoqërisë civile dhe masmedias, si dhe shtimin e përpjekjeve për menaxhimin e përshtatshëm të pritshmërive të publikut shqiptar në lidhje me korrupsionin, pa zvogëluar presionin për veprim nga ana e politikanëve. Grupet e perceptuara si më pak të korruptuara janë mësuesit, gazetarët, anëtarët e këshillave të qyteteve, si dhe trupa pedagogjike e fakulteteve dhe universiteteve. Kjo krijon një dëshmi se ku mund të kërkohen shembuj të integritetit personal për të përmirësuar pozitën e sistemeve të tjera.

Berisha me USAID: Krimi i lidhur me qeverinë rrezikon stabilitetin

Ish-Kryeministri ka denoncuar lidhjet e krerëve të qeverisë me krimin e organizuar gjatë një takimi që ka zhvilluar dje me Thomas O’Melia, ndihmës administrator i USAID për Europën dhe Euroazinë, i cili shoqërohej në këtë takim nga ambasadori amerikan në vendin tonë, zoti Donald Lu.
“Bashkëpunimi i qeverisë me krimin është i qartë si kristali në shumë e shumë raste, ndër ta rasti i Arben Frrokut dhe Emiljano Shullazit, për të cilët ambasadori amerikan u detyrua të denoncojë publikisht qenien e tyre të lirë, por ata ishin të lirë sepse Edi Rama me konceptin e krimit të dobishëm nuk lejonte arrestimin e tyre. Ndaj dhe bashkëpunimi në fushën e zbatimit të ligjit me qeverinë amerikane është jashtëzakonisht i rëndësishëm”, u shpreh Berisha.
Berisha është shprehur se problemi më kardinal me të cilin sot përballet vendi është krimi, krimi i lidhur me nivelet më të larta të qeverisë, i cili po rrënon çdo ditë reputacionin e Shqipërisë dhe që kërcënon si stabilitetin e vendit ashtu dhe progresin drejt BE-së.
Në këtë kontekst, zoti Berisha e njohu ndihmës administratorin e USAID për Europën dhe Euroazinë me ngjarjen më të fundit, ku javën e kaluar, autoritetet greke, së bashku me DEA-n, duke hetuar një grup të fuqishëm trafikantësh gjetën se bosi i tyre, të cilin ata e quajtën Eskobari i Ballkanit, ishte drejtor në një ministri të qeverisë. Autoritetet policore shqiptare, pas këtij lajmi, u thanë shqiptarëve se prej disa muajsh, ata, së bashku me partnerët, po e hetonin këtë rast ndërkohë që Klement Balilit i dhanë të gjitha mundësitë për të ikur nga Shqipëria, dhe pasi e përcollën jashtë vendi u thanë se nuk kishte asnjë problem.
Zoti Berisha shprehu falënderimet për Shtetet e Bashkuara të Amerikës dhe USAID, për mbështetjen e madhe dhe ndihmën thelbësore që i kanë dhënë vendit tonë në qindra projekte të suksesshme, të financuara dhe zbatuara gjatë këtyre viteve, të cilat kanë ndryshuar shumë jetën e shqiptarëve. Zoti Berisha vlerësoi se mbështetja e USAID për Shqipërinë është e pazëvendësueshme ndaj dhe shprehu mirënjohjen që USAID vazhdon ende të mbështesë vendin tonë në të gjitha fushat në përpjekjen e shqiptarëve për konsolidimin e demokracisë, ndërtimin e ekonomisë së tregut, institucioneve etj.
Në këtë takim u diskutua për Reformën në Drejtësi, për të cilën zoti Berisha shprehu falënderimet për mbështetjen e ambasadorit Lu dhe të qeverisë amerikane për këtë reformë, e cila, theksoi ai, është jetike për vendin dhe progresin e tij drejt BE. Zoti Berisha u shpreh se reforma u shty dhe u ngadalësua shumë pasi Edi Rama, duke i bërë vendit një dëm shumë të madh, refuzoi konsensusin dhe doli me tezën se në Shqipëri nuk është punuar ndonjëherë me konsensus, në një kohë që çdo reformë e madhe në këtë vend, në këto 25 vite, është bërë vetëm me konsensus.
Zoti Berisha theksoi se tashmë palët janë ulur dhe po punojnë me njëra-tjetrën dhe shprehu besimin se do të ecet drejt finalizimit të saj.

Watergate çoi 48 persona në pranga

Skandali i përgjimeve të paligjshme të kryera nga Kryeministri Edi Rama është akti më i rëndë që ka bërë kjo qeveri. Presidenti, kryeparlamentari, lideri i opozitës, kryegjykatësit e të gjitha niveleve, kryeprokurori, kreu i shërbimit të fshehtë, deputetë, drejtues dhe anëtarë të një sërë institucionesh të rëndësishme kushtetuese, ambasadorë të vendeve partnere, gazetarë janë përgjuar prej muajsh në fshehtësi nga Kryeministri përmes një pajisjeje të sofistikuar, të futur në Shqipëri në mënyrë të paligjshme. Përtej dhunimit të privatësisë, të drejtave dhe lirive njerëzore, dëmi më i madh në këtë rast i është bërë sigurisë kombëtare të Shqipërisë. Atentatori ndaj sigurisë kombëtare ka një emër dhe ky është Kryeministri Edi Rama.
Ministri i Brendshëm, Saimir Tahiri, drejtori i Përgjithshëm i Policisë së Shtetit, Haki Çako dhe një sërë vartësish të tjerë janë thjesht vegla të verbëra të Kryeministrit të inkriminuar, që nuk kanë hezituar në asnjë rast të vihen nën shërbimin e mafias apo të bëhen anëtarë të mafias. Plantacionet e drogës që kanë mbuluar çdo pjesë të vendit janë dëshmia e asaj se çfarë janë Tahiri dhe banda që ka vënë në krye të policisë. Supervrasës, supertrafikantë dhe superpërdhunues që merren nën mbrojtjen e tyre tregojnë se ata nuk kanë asnjë lidhje me titujt dhe uniformat që mbajnë, por janë thjesht drejtues-anëtarë aktivë të organizatës kriminale, që është pa asnjë simbolikë qeveria e Kryeministrit Rama.
Por, mënyra se si Kryeministri, ministri i Brendshëm, Policia e Shtetit, doganat arrijnë të injorojnë çdo ligj, procedurë dhe të fusin paligjshmërisht në përdorim një pajisje klandestine na bën të besojmë se arsyet e këtij anashkalimi të Kushtetutës dhe ligjeve të vendit janë tërësisht jo ligjore. Kur marrim në konsideratë çështjet e sigurisë kombëtare, shqetësimi bëhet alarm.
Çfarë pajisjesh apo armësh të tjera ka futur Rama me njerëzit e tij në Shqipëri, tinëz shtetit? Nëse nuk e bëjnë për shtetin, për kë po punojnë Rama dhe njerëzit e tij? Kujt i shkojnë këto përgjime dhe kush i ka porositur? Për çfarë përgjohen të gjithë ata që nuk janë pjesë e ngushtë e bandës së Edi Ramës? Çfarë planesh ka ky grup kriminal që vepron në fshehtësi duke përdorur autoritetin?
Ministri Tahiri pranoi dje në emisionin “Top Story” se përgjimet janë kryer prej tij dhe ai do të vazhdojë t’i bëjë, pavarësisht se nuk ia lejon ligji dhe Parlamenti ka refuzuar t’ia japë këtë të drejtë. Ai u justifikua se në fokus të përgjimeve janë 0,01 për qind e popullsisë dhe këtë e bën për të ndihmuar pjesën tjetër të shqiptarëve që të jenë të sigurtë. Por kush e ka bërë përgjegjës atë që të marrë çdo kompetencë, çdo fuqi ligjore dhe institucionale për të përgjuar në emër të sigurisë së fëmijëve tanë? Saimir Tahiri, një drogaxhi ministër, por edhe po të ishte ndryshe nuk mund të fshijë Kushtetutë, ligje dhe institucione për t’u bërë supermeni i Edi Ramës.
Gjithë ky skandal përgjimesh ka vetëm një frymëzim dhe interes, t’i shërbejë pushtetit personal dhe interesave mafioze të Edi Ramës. Askush nuk mund të thotë se të marrësh në fshehtësi një pajisje – e ndaluar nga gjykatat britanike të përdoret qoftë edhe ligjërisht, – t’ia japësh ortakëve të Shullazit dhe të përgjosh këdo që kërcënon karrigen, pazaret dhe trafiqet e Kryeministrit, është për qëllime të mira.
Nëse Tahiri ka qëllime të mira ndaj fëmijëve të shqiptarëve, të ndalojë policinë të mbjellë dhe trafikojë kanabis, të shpërndajë nëpër shkolla kokainë e heroinë; të ndalojë vrasësit dhe trafikantët që lëvizin në kufijtë e Shqipërisë me aeroplanë, gomone, makina dhe mushka nën mbrojtjen e ministrit; të ndalë vrullin e krimit që ka pushtuar qytetet dhe fshatrat e Shqipërisë.
Në të gjitha rastet Kryeministri Rama, Tahiri dhe banda përgjegjëse për përgjimet e paligjshme duhen hetuar. Rreth 40 vite më parë, një skandal i ngjashëm në SHBA, i njohur me emrin Watergate, dërgoi në burg 48 vetë. Presidenti Nikson dha dorëheqjen dhe mori faljen nga pasardhësi i tij. Edi Rama duhet të arrestohet dhe të shkojë në burg. Presidenti Ford ka vdekur!

Një italian në aferën e përgjimeve

“Il Secolo XIX.it”

Skandali më i fundit u regjistrua të premten e shkuar, kur Prokuroria e Tiranës në vazhdën e disa sinjalizimeve të shërbimeve sekrete lokale, i kërkoi policisë shqiptare që të sqaronte përdorimin e një aparati mjaft të avacuar (dhe kontrovers) në gjendje për të përgjuar çdo lloj përdorimi elektronik brenda zonave të përcaktuara dhe që përdoret nga disa agjenci inteligjente perëndimore. Quhet “Imci Catcher” dhe është një lloj “Vëllai i Madh” që ka krijuar jo pak problem sa i takon çështjeve të privacisë dhe lirive personale.
Por ajo që ka krijuar zhurmën mediatike ka qenë një përgjigje e dhënë nga prokurorët, të cilët shprehen mjaft të shqetësuar që Policia e Shtetit po e përdor këtë aparaturë përgjimi pa marrë asnjë autorizim: më herët blerja e kësaj aparature ishte ndaluar nga prokurorët shqiptarë për arsye të juridiksionit. Por aparatura sipas asaj që kanë arritur të mësojnë prokurorët shqiptarë i është furnizuar Shqipërisë nga kanale diplomatike italiane, të cilat në Tiranë kanë një zyrë strategjike të bashkëpunimit Interforcë që koordinon hetimet për llogari të dy vendeve. Dhe sipas këtyre burimeve, ky aparat nuk është përdorur për përgjime, por vetëm për qëllime “formacioni”. Po a është vërtet kështu? Cila është përfshirja e Italisë në këtë histori?
Është hera e dytë në më pak se një vit që struktura investigative italiane në Tiranë përfshihet në atë që ka natyrën e një përplasjeje ndërmjet pushtetesh që po shkund asetet institucionale në Shqipëri. Kriza e fundit diplomatike u regjistrua prej Dritan Zaganit, ish-shef i Antidrogës së Vlorës që kishte “futur hundët” në një linjë avionësh të mbushur me drogë, të cilët nga Shqipëria fluturonin drejt territorit italian. Gjatë zhvillimeve të hetimit së bashku me disa hetues italianë, Zagani akuzoi drejtpërdrejtë ministrin e Brendshëm të Shqipërisë se ishte i lidhur direkt me disa trafikantë dhe për këtë ai e gjeti veten të prangosur dhe i akuzuar për trafik droge dhe spiunazh.
Një histori-spiunazhi që asokohe ndezi reflektorët mbi ish-shefen e zyrës së bashkëpunimit Interforcë italiane, Anna Poggi, zyrtare e policisë gjenoveze e emëruar në atë detyrë pavarësisht se ishte e dënuar për dhunën e ushtruar nga kazerma e Bolzanetos gjatë protestave të G8-ës më 2001. Zagani paraqiti edhe një padi për dezinformim, sepse në thelb vetëm pasi ai bashkëpunoi me italianët, ai u shkarkuar nga krerët shqiptarë dhe u trajtua si kriminel.
Nuk është vetëm aspekti i mjegullt i kësaj çështjeje. Në mes të skandalit Zagani, kjo funksionare u transferua në Slloveni. Dhe pikërisht në kuadrin e nisjes së saj nga Shqipëria, asaj i njihet një nderim i pazakontë për atë që mbulon një rol investigativ dhe diplomatik në një vend të huaj, asaj i jepet nënshtetësia honorifike shqiptare. Që prej një viti, në atë post tashmë është shefi i ri, Michele Grillo, edhe ai një polic. Mund edhe të vesh bast se rasti “Vëllai i Madh” mund të mos jetë përzierja e fundit e në këtë luftë klandestine.

Pranga Tahirit, deklaron në intervistë përgjimet pa ligj

Ministri i Krimit, Tahiri deklaroi dje gjatë një interviste në “Top Story” se qeveria është e vendosur që të përgjojë qytetarët edhe pse ligji i përgjimeve u hodh poshtë nga Parlamenti. Tahiri e bëri deklaratën në përgjigje të pyetjes së gazetarit se si mund të bëhet ky përgjim në një kohë që Parlamenti e hodhi poshtë një ligj të tillë. “E di që Parlamenti e ka hedhur poshtë, por ne do të gjejmë mënyrën për ta bërë një gjë të tillë”, u shpreh Tahiri, duke deklaruar në mënyrë të qartë se përgjimet bëhen edhe pa ligj. Deklarata e ministrit të Krimit vjen në një moment kur e gjithë Shqipëria është mbërthyer nga skandali i përgjimeve masive të bandës në pushtet, duke nisur nga kreu i shtetit dhe kryetari i opozitës dhe tek të gjithë krerët e institucioneve të tjera. Përmes deklaratës së mbrëmshme Tahiri e bëri të qartë se qeveria nuk pyet për ligj kur vjen puna tek përgjimet.

Prokuroria në ambasadën italiane për pajisjen e përgjimeve

Prokurorja Anisa Qilimi, e cila po heton dosjen mbi ekzistencën apo jo të pajisjes së përgjimit nga Policia e Shtetit, i ka shkruar ambasadës italiane. Prokurorja Qilimi, duke iu referuar të dhënave të policisë, ka kërkuar nga ambasada italiane në Shqipëri të njoftojë organin e akuzës se me çfarë programesh dhe çfarë pajisjesh asiston Policinë e Shtetit në trajnime Interforca italiane. Kjo shkresë, mësohet se është dërguar të premten, pasi Policia e Shtetit gjatë kontaktit me oficerët e Prokurorisë, i ka njoftuar se një pajisje të tillë nuk e disponojnë ata, por Interforca italiane që asiston në trajnime. Sipas akuzës, dyshimet janë se kjo pajisje përgjimi ka hyrë në Shqipëri pa u regjistruar në Doganën shqiptare dhe se me të policia kryen përgjime të paligjshme.

Refuzimi i Tahirit

Prokuroria ka urdhëruar sekuestrimin e pajisjes përgjuese të paautorizuar që është instaluar në zyrat e Policisë së Shtetit. Por oficerët e Policisë Gjyqësore nuk kanë mundur dot të ekzekutojnë urdhrin e sekuestros.
Ata mësohet se kanë kërkuar takim me titullarin, drejtorin e Përgjithshëm të Policisë. Por nga stafi i tij, hetuesit janë njoftuar se kreu i policisë dhe zëvendësi i tij ndodhen në një aktivitet në Akademinë e Sigurisë, ku përveç pjesës së aktivitetit ishte parashikuar edhe një drekë për të pranishmit, shkruan “Balkanweb”.
Sipas medias, oficerëve të Prokurorisë iu është dashur të presin për rreth 5 orë për të marrë kontakt me kreun e Policisë së Shtetit, Haki Çako.
Ata e kanë njohur kryepolicin me urdhrin e sekuestros së pajisjes përgjuese, që sipas SHISH ndodhet në zyrat e policisë, por Çako ka deklaruar se kjo pajisje nuk është nën administrimin e policisë shqiptare, raporton “BW”.
Drejtori i Përgjithshëm i Policisë ka pranuar se ekziston një pajisje e tillë, por që administrohet nga partnerët italianë të misionit Interforza, të cilët e përdorin atë për trajnimin e policisë shqiptare.
Pas këtij shpjegimi të kreut të policisë, hetuesit e Prokurorisë kanë mbajtur një procesverbal me thëniet e z. Çako, duke pasqyruar faktin se policia shqiptare nuk ka në administrim një pajisje të tillë përgjuese.
Sipas informacionit të SHISH dërguar presidentit të Republikës dhe prokurorit të Përgjithshëm, bëhet fjalë për një pajisje shumë të sofistikuar të instaluar në Policinë e Shtetit. Ajo shërben për realizimin e përgjimeve, por nuk është e autorizuar nga Prokuroria e Përgjithshme.

“IMCI Catcher”, aparati i përgjimit masiv

“IMCI Catcher” është pajisja që po përdoret për trajnimin e oficerëve të Policisë së Shtetit, por që Prokuroria dyshon se mund të përdoret për përgjime të paligjshme.
Telefonat celularë nuk e verifikojnë sinjalin që vjen nga një operator telefonik. Mjafton që sinjali të jetë i fortë dhe celulari lidhet automatikisht me operatorin telefonik. Ky fakt është shfrytëzuar nga shpikësit e pajisjes së përgjimit “IMSI-Catcher” që disponohet nga policia shqiptare dhe është në Tiranë. Ajo vepron si një antenë false e telefonisë celulare dhe çdo telefon pranë saj mund të përgjohet në tekst dhe audio.
Në shumë vende të botës përgjimi nga një pajisje e tillë ka shkaktuar debate për shkak të shkeljes së privatësisë dhe është pasur me hartimin e ligjeve të rrepta. Jo të gjithë telefonat pranë pajisjes bëhen pjesë e përgjimit. Vetëm ato që përzgjidhen nga personat që e kontrollojnë pajisjen mund të përgjohen. Mjafton që telefoni të jetë në gjendje pritjeje dhe që pajisja të jetë e lidhur me operatorin e duhur të telefonisë.
Më pas telefonatat audio dhe mesazhet janë të lehta për t’u përgjuar, por tek to nuk mund të ndërhyhet. Në shumë raste një celular nuk jep shenja se po përgjohet. Por disa prej tyre tregojnë një simbol në ekran. Kjo varet edhe nga operatori përkatës i telefonisë celulare.
Aplikacioni në Android (AIMSICD) IMSI-Catcher Detector është i vlefshëm në Google play, por jo gjithmonë efektiv. Vetë operatorët telefonikë, gjithashtu janë duke zhvilluar teknologjinë për të zbuluar përdorimin e një pajisjeje të tillë përgjimi.

Nishani: Siguria kombëtare, e kërcënuar

Presidenti Bujar Nishani ka reaguar ashpër dje ndaj çështjes së futjes në mënyrë ilegale të pajisjes së përgjimit dhe përdorimit të kësaj pajisjeje nga Policia e Shtetit, duke e cilësuar këtë si një akt që ka kërcënuar sigurinë kombëtare.  Nishani i ka bërë thirrje Prokurorisë së Përgjithshme të hetojë gjithë procesin. “Nga kjo sallë bëj thirrje dhe i kërkoj Prokurorisë së Shtetit që të mbrojë dinjitetin e shtetit dhe qytetarëve të tij, të mbrojë dimensionin e sigurisë sonë kombëtare. I bëj thirrje Prokurorisë që të hetojë procesin e sjelljes në Shqipëri të kësaj pajisjeje ilegale që kërcënon secilin. Të hetojë kush ka qenë ai autoritet doganor që ka lejuar të hyjë ajo pajisje në Shqipëri. I kërkoj Prokurorisë të hetojë deri në fund të gjithë ata elementë dhe autoritete që kanë përdorur këtë pajisje të paligjshme. Pajisja ka kërcënuar sigurinë kombëtare të Shqipërisë. Ka kërcënuar integritetin e të gjitha institucioneve dhe të çdo qytetari të thjeshtë. Një pajisje e tillë as nuk mund të vijë në Shqipëri pa lejen e Prokurorisë së Shtetit. I bëj thirrje të gjithë atyre institucioneve që pengojnë hetimet, të mos bëhen pengesë e zbatimit të ligjit”, u shpreh kreu i shtetit. Nishani deklaroi se ky skandal përbën një rrezik të drejtpërdrejtë për sigurinë kombëtare. “Pajisje përgjimi ilegale, një instrument antikushtetues, nuk e besoja në fakt kur e pashë në media, por tashmë është konfirmuar nga institucione shtetërore. Pra, ky mekanizëm funksionon dhe kjo është shkelje e së drejtës së sakrificës për të cilën u sakrifikuan të parët tuaj. Dinjiteti i qytetarit, i çdo njeriu të thjeshtë, burri, fëmije, djali dhe vajze është vlera më e madhe që duhet ta mbrojmë fort si shoqëri, dinjiteti i individit është lidhur me dinjitetin e kombit. Kjo ishte filozofia e atyre që u përballën me diktaturën”.

1...8 2218 2228 223...8 382Faqja 8 222 nga 8 382

Kryesore

Continue to the category
Më shumë
© 2024 Rilindja Demokratike Euroatlantike