Rritje e pagës minimale, ulje e çmimit të energjisë për familjet që konsumojnë më pak se 300 kw, pagesë nga buxheti i shtetit të faturës së ujit dhe energjisë elektrike deri në 200 kw për familjet në nevojë ekonomike, ulje e çmimit të energjisë për biznesin, rishikim të reformës së pensioneve në funksion të interesit të qytetarëve, janë disa nga pikat e platformës qeverisëse të Partisë Demokratike të shpalosura nga kryetari i Partisë Demokratike, Lulzim Basha në takimin me punëdhënës dhe punëmarrës të Vorës.
Zoti Basha vizitoi dy biznese fason, të cilat kanë të punësuar rreth 700 punonjëse. Këto biznese sot përballen me vështirësi të shumta që nga energjia elektrike, e cila u ikën vazhdimisht tek taksat e larta, çmimi i lartë i energjisë, mungesa e sigurisë etj.
Duke bashkëbiseduar me punonjëset, zoti Basha ka bërë të ditur se, Partia Demokratike krahas uljes së taksave dhe tatim fitimit për biznesin do të rrisë pagën minimale. Në këtë mënyrë me uljen e taksave dhe lehtësirat për biznesin, do të ketë paga më të mira dhe më shumë vende pune.
“Që t’ua bëjmë jetën pak më të lehtë gjithsecilës prej jush e para është që t’ju rrisim rrogën apo jo?! Çmime më të ulura, për shembull për energjinë elektrike. 56 për qind e shqiptarëve harxhojnë më pak se 300 kw. Po për këta 56 për qind që është pjesa më e varfër e shqiptarëve, çmimi është rritur. Do të ulim çmimin e energjisë për 300 kw e parë. Fatura e energjisë që do të paguani për familjet tuaja do të jetë më e ulur. Po kështu fatura e energjisë për biznesin do të duhet të ulet sepse është rritur nga 9 lekë/kw orë në 14 lekë/kw orë”, u shpreh kreu i PD.
Një nga shqetësimet e punonjësve ishte dhe pensioni. Kryetari i Partisë Demokratike, Lulzim Basha tha se pseudoreforma nuk ishte gjë tjetër veçse heqje e përgjegjësisë së qeverisë ndaj qytetarëve. Basha tha se kjo pseudoreformë do të zhbëhet dhe reforma e pensioneve do të ketë në qendër mosrritjen e moshës së pensionit. Basha garantoi rritje pensionesh përtej indeksimit për inflacionin.
Kryetari i Partisë Demokratike, Lulzim Basha u ndal dhe në biznesin e Nikollaq Neranxit, biznesmeni që kundërshtoi fort arbitraritetin e shtetit ndaj biznesit. Basha tha se, Partia Demokratike sot dhe qeveria e tij nesër do të jetë në krah të biznesit, në krah të punëdhënësve dhe do t’u krijojë të gjitha lehtësitë që ata të krijojnë më shumë mundësi për punësim e punësim me paga më të larta.
“Partia Demokratike do t’i mbrojë punëdhënësit e Shqipërisë me çdo çmim e me çdo kosto. Jemi dhe do të jemi në krahun e çdo biznesmeni që hap vende pune, ku shqiptarët jetojnë me djersën e ballit dhe ku shteti që sot është përballë jush me një makineri kriminale shpeshherë, duke abuzuar me uniformën e shtetit, nesër do të jetë në krahun tuaj, në mbështetjen tuaj. Duke patur shtetin aleat të biznesit dhe punëdhënësve, ne do të garantojmë që punëmarrësit, të punësuarit këtu dhe anembanë vendit nesër të kenë paga më të larta, siguri më të madhe pune dhe më shumë vende pune për të punësuar mijëra e mijëra të rinj të papunë.
Platforma jonë për rritjen ekonomike, për hapjen e vendeve të punës dhe për vende pune me paga më të larta është platforma e taksës së sheshtë 9 për qind, 9 për qind tatim mbi fitimin, 9 për qind kontributet shoqërore, 0 për qind taksë mbi dividentin, 15 për qind tatim mbi vlerën e shtuar. Këto janë disa nga stimujt fiskalë që ne do t’i japim sipërmarrjes shqiptare”, u shpreh kreu i PD.
“Ju falënderoj për ndihmën që i bëni gjithë biznesit në Shqipëri. Ne do të ecim së bashku se po shikoj që kemi të njëjtin program bashkë. Dhe programi jonë i përbashkët është që të mbrojmë biznesmenët shqiptarë, të mbrojmë tregun shqiptar”, tha Neranxi.
Kryetari i Partisë Demokratike ka nisur një tur të prezantimit të alternativës së demokratëve në mënyrë që çdo qytetar të ketë mundësi të gjykojë drejt, lidhur me platformën që e nxjerr vendin nga kriza e mashtrimeve qeveritare.
Rritje pagës minimale, ulje çmimit të energjisë nën 300 kw
Dëbohen me dhunë gazetarët e përfaqësues të shoqërisë civile
Me urdhër të Ramës, përfaqësues të shoqërisë civile, gazetarë dhe analistë nuk janë lejuar të hyjnë në sallën e Hotel “Tiranës” ku do të bëhej dëgjesa publike e projektit të stadiumit “Arena Kombëtare”. Garda ka ushtruar dhunë ndaj tyre duke mos i lejuar të hynin në sallë. Mes të ndaluarve ishte gazetari i emisionit “Të Paekspozuarit” dhe drejtori i Përgjithshëm i “Ora News”, Ylli Rakipi, analisti Fatos Lubonja, kryeredaktori i “Lapsi.al”, Andi Bushati dhe kryetari i Forumit për Trashëgiminë Kulturore, Gjergj Bojaxhi. Rreth orës 14:00 (të 29 prillit) ata janë penguar nga rojet e hotelit, por dhe më pas nga truprojet e Kryeministrit duke i dalë përpara dhe duke mos i lejuar të hipin në shkallët që të çonin tek salla ku po bëhej prezantimi i projektit. Ndërkohë një person, i cili prezantohet si shef i i sigurisë së hotelit thotë se ishte pronë private. “Dëgjesa është publike”, thonë përfaqësuesit e Shoqërisë Civile. “Po pse e bën atëherë në pronë private?”, dëgjohet të thotë Lubonjë, Andi Bushati dhe Ylli Rakipi. Në momentin kur ata marrin të ngjisin shkallët drejt sallës ku po bëhej prezantimi ata nuk janë lejuar nga tri roje. Prapa në mbështetje të tyre kanë dalë dhe truprojet e Kryeministrit. “Kemi dy palë roje që nuk na lejojnë. Një palë janë rojet private dhe një palë të Kryeministrit”, u shpreh një nga përfaqësuesit në videon që është shpërndarë online. Lubonja, Rakipi dhe Bushati kanë qenë kritikë me projektin e prezantuar pak ditë më parë për ndërtimin e “Arenës Kombëtare” në vendin ku sot është stadiumi “Qemal Stafa”. Një nga pikat më të kritikueshme të këtij projekti është pikërisht kulla që është parashikuar të ngrihet bashkë me projektin e stadiumit. “Po përdor badigardët e Ram Gecit për të mos lejuar”, tha Fatos Lubonja në një prononcim për median. Dje është përgatitur ky prezantim. “Bëhen gjërat me ngut për të fshehur të vërtetën që qytetarët të mos kuptojnë thelbin e problematikës së stadiumit. Të gjithë duam një stadium, por ai nuk mund të jetë modern vetëm me karrige moderne, por me standard europian”, tha Gjergj Bojaxhi. Ndërkohë Andi Bushati u shpreh: “Edi Ramën e kanë kapur privatët”.
Pjesë nga përplasja:
Lubonja: S’e kuptoj a ishte për publikun e hapur kjo, thotë Bojaxhiu që nuk hyj dot.
Gardisti: Këtu është pronë private dhe nuk keni të drejtë ju, thotë përfaqësuesi.
Lubonja: Pse e bën këtu Kryeministri?
Bushati: E organizon qeveria, kush do të na ndalojë ne?!
Lubonja: Ku është takimi? Ore jeni në terezi apo jo?!
Lubonja: Na u tha për dëgjesë publike. Erdhëm, na lini të hyjmë të dëgjojmë…
Gardisti: Ju nuk keni asnjë lloj të drejte të hyni brenda në sallë…
Lubonja: Është pronë private? Po nuk po e marrim vesh në çfarë shteti po jetojmë…
Gardisti: Unë jam në shërbim…
Lubonja: Po Kryeministri është lejuar të hyjë?
Gardisti: Ju lutem, është pronë private, unë jam në shërbim, mos më protestoni këtu.
Rakipi: Hapeni ore rrugën. Gjithë ky shtet ndalon 5 vetë, hapeni ore rrugën.
Lubonja: Nuk e lënë me privatin, ky është skandal kemi thënë ne ky është privatizimi i shtetit, kulmi i degjenerimit të shtetit, shikoni ça transparence, skandal, paturpësia s’mund të arrijë deri këtu.
Bushati: Është pronë private vëlla, kanë kap edhe Edi Ramën privatët e kanë trembur.
Lubonja: Është një shtet që ka degjeneruar përtej fashizmit dhe kështu do t’i vijë fundi.
Ulërima… ku del zv/kryeministri Niko Peleshi.
Andi Bushati: Edhe Berisha më 21 janar kështu u ruajt me badigardë privatë përpara se të vriste. E mbani mend kjo qe akuza kryesore e opozitës së asaj kohe.
Aktivisit Eljan Tanini: Por në një shtet që toka publike e stadiumit i falet privatit, ku veprat publike i ndërtojnë të njëjtit njerëz dhe ku edhe Kryeministri i prezanton projektet nën mbrojtjen e gorrillave private, nuk mund të presësh gjë tjetër.
Fatos Lubonja: Nuk na lejojnë të hyjmë e të shohim projektin, jo vetëm që është bërë në mënyrën skandaloze, bëhet fakt projekti, pa u diskutuar me publikun, kundër edhe ligjeve të shtetit, se është monument kulture aty, sot marrim vesh që zonja që duhet të firmoste nuk ka firmosur, e ka bërë projektin me dhunë, projekti.
Ku është Fidel Ylli që na ftoi mbrëmë në televizion për të ardhur? (Ylli ftoi në emisionin “Të paekspozuarit” analistët që të merrnin pjesë në mbledhjen e KRT-së për të dëgjuar projektin e stadiumit).
Ylli Rakipi: Rama, njeri hilacak
Gazetari i emisionit “Të Paekspozuarit” në “Ora News”, Ylli Rakipi, i cili të enjten i dedikoi një emision pikërisht projektit të stadiumit pas incidentit në Hotel “Tirana”, ku një grup gazetarësh dhe të Shoqërisë Civile s’u lejuan të hyjnë në dëgjesën për stadiumin u shpreh se nuk ishte lejuar edhe pse kishte pasur një ftesë. “Unë isha i ftuar. Paraqita ftesën, por më thanë nuk do të hysh. Nuk më kishte ndodhur”, tha Rakipi. I pyetur se nga kush ishte ndaluar, Rakipi e cilësoi Ramën si një njeri hilacak, ndërsa theksoi se Kryeministri u kishte kërkuar autoriteteve të sigurisë së hotelit që ta ndalonin. “Nga autoritetet e sigurisë së hotelit, të cilët kooperojnë me qeverinë sa herë i dalin probleme qeverisë. Edhe tek parku qeveria vendosi autoritetet e sigurisë së kompanisë private të merren me qytetarët. Ky është veprimi që bën Edi Rama, i cili është një njeri hilacak dhe vepron në këtë mënyrë”.
Arkitekti italian: Do lidhem me zinxhirë që të mos ndërtohet Arena Kombëtare
“Do vij dhe do lidhem me zinxhirë që të mos ndërtohet Arena Kombëtare”. Ky ka qenë reagimi i arkitektit të njohur italian Paolo di Nardo, sapo ka parë projektin e stadiumit që pritet të ndërtohet në Tiranë. Këtë shpërthim kundër të arkitektit italian e bëri publik arkitekti Artan Raça, në studion e emisionit “Të Paekspozuarit” në “Ora News”. Sipas Raçës, projekti i propozuar për stadiumin e ri nuk duhet të realizohet aty ku sot qëndron “Qemal Stafa”, pasi kjo do të shkatërronte jo vetëm sheshet “Italia” dhe “Nënë Tereza”, por të gjithë qendrën e kryeqytetit. Arkitekti theksoi se, nëse do të hapet një konkurs, do ketë dhjetëra propozime për ta rikthyer stadiumin “Qemal Stafa” në qendër multifunksionale, por duke ruajtur identitetin dhe trashëgiminë.
“S’jam specialist i ligjeve. Më duket se nuk po kuptohet mirë, që ai vend atje është qendra e Tiranës, kur e ka bërë Bosio stadiumin ai ishte periferi, ka qenë tokë djerr. Po bëjmë një stadium në qendër të Tiranës. Ai është një kompleks, i cili është shumë i vyer për ne. Duhet të hapen konkurse që të vijnë me qindra ide fantastike, që të ruhet fasada. Stadiumi duhet të ikë që andej dhe për një arsye tjetër. E shoh me pikëpamje më qytetare, qyteti ka nevojë që periferitë të rindërtohen. Këto vepra janë që ndërtojnë qytetin në tërësi. Kur Bosio erdhi në Tiranë dhe e rilindi këtë qytet, e rilindi në një vend tjetër, atje kur s’ia merrte mendja askujt që metri katror do të shkonte dy mijë euro. T’i thërresim mendjes për këtë që po bëjmë. Dhe, sa për ta inkuadruar më mirë, nëse do t’i merrnim mendim komshinjve italianë, e quajnë skontata, që nuk ndërtohet më atje, që s’duhet prekur projekti aktual.
Më lejoni, megjithëse s’jam i autorizuar, por po e them; Në Facebook pash një ndërhyrje interesante të një prej kolegëve të arkitektit italian Marco Casamonti, që është edhe ai pedagog në Fakultetin në Firence, një shok i tij, që quhet Paulo Di Nardo. Në Facebook shkroi një gjë, kur mori vesh që stadiumi i Bosios do të prishej. Thoshte “do organizoj një çartër dhe do vij aty me arkitektë italianë që të lidhemi me zinxhirë te stadiumi i Bosios”. Këtë mos ta marrim si të vërtetë absolute, por të themi që sensibiliteti i tyre na bën që të mendojmë gjatë për këtë punë. Kur themi të mendojmë gjatë, është një thirrje e sinqertë. Unë nuk jam kundër këtij ndërtimi, të shkatërrojmë dhe të ndërtojmë, se qyteti që të bëhet i bukur ka nevojë për shkatërrim dhe ndërtim, por jo kjo, nuk është vendi i duhur. E fundit fare, meqë jam para televizorit, kam një propozim ndaj Këshillit Bashkiak i Tiranës, që t’i vënë emrin e Bosios, Brasinit një sheshi, sepse do të ishte një nderim për këta njerëz, të cilët na kanë lënë një Tiranë që të paktën kemi një arsye për të jetuar. Të ruhet ky Monument, atij sheshit “Italia” t’i vemë emrin e Bosios” u shpreh Raça.
Bozdo: Rama injoroi edhe tifozët për aferën me stadiumin
Ish nënkryetari i Bashkisë Tiranë, Enno Bozdo e ka cilësuar skandaloz projektin klientelist të Ramës për stadiumin e ri, ndërsa dënoi gjithashtu edhe injorimin që Rama u bëri tifozëve duke anashkaluar opinionin e tyre mbi stadiumin.
“Edi Rama pati guximin të deklarojë se të gjithë arkitektët që ai kishte pyetur, i kishin sugjeruar që stadiumi i ri të ishte domosdoshmërisht brenda unazës së vogël të Tiranës! Por nevoja për një stadium të ri, nuk mund të fshehë aferën korruptive! Afera korruptive nuk mund të justifikohet nga gjoja sugjerimet e arkitektëve për pallat me stadium në mes të Tiranës. Pallavrave të zakonshme të Ramës se “…më thanë arkitektët etj., etj..”, u ka dalë boja me kohë me betonizimin e Tiranës dhe korrupsionin e kudondodhur. Pra, me pak fjalë, Rama po përdor arkitektët për të ndërtuar stadiumin në qendër. Por si çdo stadium, ai duhet të ndërtohet në radhë të parë për sportin, ekipet dhe sportdashësit. Dhe ndërsa ka nxituar për të “pyetur” arkitektët, nuk ka pyetur aspak tifozët! Tifozët, që e ndjekin ekipet në çdo cep të Shqipërisë. Tifozët që ndjekin Kombëtaren në Shkodër dhe Elbasan. Këta tifozë nuk i ka pyetur kërkush. Sepse po t`i pyeste, do t`i kishin thënë se do të preferonin një stadium modern buzë një bulevardi të ri, vetëm 2 km larg qendrës së Tiranës. Sepse do t`i kishin thënë se preferojnë një mijë herë një stadium pa pallat, sesa një pallat me fushë te Qemal Stafa. Por Rama nuk i pyeti. Sepse është mbërthyer nga një dëshirë të ethshme për të ndërtuar sëbashku me miqtë e tij vetëm në qendër të kryeqytetit. Dhe për këtë anuloi dhe Planin Rregullues të kryeqytetit. Plani Rregullues i Tiranës, i vetmi ekzistues që prej 1990, që u shtri në dy vite dhe që u konsultua gjerësisht me qytetarët, parashikon një stadium olimpik në zgjatim të Bulevardit të ri të Tiranës. Por Rama që ia do Bashës Bulevardin (edhe pse e bllokoi për dy vjet), nuk ia do stadiumin aty. Stadiumin, ai dhe miqtë e tij arkitektë, do ta ndërtojnë m’u në qendër të Tiranës. Pa çka se kryeqyteti po betonizohet në çdo cep, pa çka se trafiku rëndohet, pa çka se qytetarët po e vuajnë çdo ditë. Rëndësi ka xhepi o miq. Dhe për sa kohëe xhepi është plot, edhe humori është i lartë. Të zakonshmit e këtij vendi, ata që nuk bëjnë dot pazar në Milano dhe me Milanon, pak rëndësi kanë” tha Bozdo.
Projekti i stadiumit, si kërcënoi Rama kryetarin e arkitektëve
Pasi i dështoi fabula e prezantimit publik të projektit të stadiumit, Edi Rama ka shantazhuar të gjithë njerëzit që do të merrnin pjesë në këtë shfaqje që përligjte ndërtimin e stadiumit me kullë. Shumë gazetarë dhe njerëz publikë kanë të ruajtura mesazhet private të Ramës në celularët e tyre, për të mbrojtur projektin e arkitektit italian Casamonti. Por me njerëzit që ishin më të shantazhueshëm, ai ka përdorur edhe mjete të tjera. Kështu, sipas burimeve nga Shoqata e Arkitektëve, ai ka shantazhuar kryetarin e Shoqatës së Arkitektëve, Maksi Mitrojorgji (foto lart), duke u nisur nga fakti se e bija e tij punon në Ministrinë e Kulturës. Pse çfarë ka ndodhur? Sot në mëngjes, zëra mes këshilltarëve të Ramës filluan ta quajnë projektin një çmenduri. Qershia mbi tortë qe kur nënkryetari i Shoqatës së Arkitektëve, Arben Bicoku (ish-mbështetës i Ramës) u shfaq sot me një shkrim kundër projektit të stadiumit. I tmerruar se shfaqja e tij butaforike do të prishej, pasi nuk la gazetarët dhe Shoqërinë Civile, ai filloi edhe përpunimin e përfaqësuesit të Shoqatës së Arkitektëve, Mitrojorgji, të cilit i punon vajza në ministri. Kaq u desh që Mitrojorgji të bënte obortarin e devotshëm. Në reagimin e tij në Facebook, Biçoku distancohet nga ky qëndrim, ndërsa shprehet: “Distancohem nga qendrimi i ark. Maksim Mitrojorgji në mbledhjen e Këshillit Kombëtar të Territorit, të ditës së sotme, 29.04.2016, ku u shqyrtua projekti i Stadiumit të ri të Tiranës, duke deklaruar që ai ishte qendrim personal dhe jo rezultantja e mendimit të Shoqatës së Arkitektëve. Pozicionet hyra me mendjen time, por po dal me mendjen e shefit janë të papranueshme për mua personalisht, dhe tregojnë mungesa karakteriale të theksuara. Në dheun tonë jemi mësuar me njerëz që shërbejnë për interesa të vogla”.
Lame braktisi mbledhjen. Rama: Projekti i stadiumit mund ta çojë prapë në spital
Arroganca e Kryeministrit dhe ministrit Tahiri nuk kursen as miqtë e bashkëpunëtorët: “Është njëri në sallë që mund të përfundojë prapë në spital me këtë lajm”. Artan Lame braktisi Ramën në takimin, ku u ndalua të hynte Fatos Lubonja, Gjergj Bojaxhiu, Andi Bushati, Ylli Rakipi dhe disa aktivistë të shoqërisë civile. Drejtori i ALUIZNI-t, Artan Lame është solidarizuar me aktivistët duke braktisur mbledhjen e Kryeministrit, i cili me ironi është shprehur: “E di që është njëri në sallë që mund të përfundojë prapë në spital me këtë lajm, por ne kemi vendosur ta miratojmë projektin dhe të shkojmë përpara”. Menjëherë pas Ramës ka reaguar ministri i Brendshëm, Saimir Tahiri duke “qetësuar” Kryeministrin: “Ka ikur Lame nuk është në sallë…”. Pak ditë më parë, drejtori i ALUIZNI-t, pati një ndërhyrje në zemër, e cila i rrezikoi seriozisht jetën. Megjithatë Rama e Tahiri, nuk hezitojnë të tallen edhe me jetën e mikut e bashkëpunëtorit të tyre kur është nevoja të bëjnë ironi therrëse kundër atyre që i kundërshtojnë. Sipas mediave të pranishme në sallë, Artan Lame është larguar nga salla, pak çaste pas përplasjes së Gardës me gazetarët që kërkonin të ishin pjesë e dëgjesës. Bashkë me ta ishin edhe disa pjesëtarë të Shoqërisë Civile. Artan Lame është larguar duke thënë se “nuk ndjehem mirë”, por ka ikur pa dëgjuar fjalimin e Ramës apo të tjerëve që folën në këtë dëgjesë për projektin e shumëpërfolur të stadiumit të ri.
Berisha-Ramës: ‘98-ta do duket lule nëse ndërsen bandat a armatosura
Opozita nuk mund të asgjësohet
Ish-kryeministri Berisha ka paralajmëruar Edi Ramën, se nëse do të vazhdojë të mbajë afër bandat dhe Shullazët, “98-a do t’i duket lule”. Ai i është referuar në këtë mënyrë revoltës së opozitës në 14 shtator 1998, kur u sulmua Kryeministria. Deklaratat e forta Berisha i bëri gjatë një interviste për Abc News, me gazetaren Mimoza Koçiu. Disa herë ai u kujdes të thotë, që këtë paralajmërim, Edi Rama duhet ta marrë edhe si një mesazh personal. “Ndaj dhe i them Edi Ramës se armët nuk duhet t’i ketë kurrë frikë një qeveri e një vendi të lire, por ta ketë të qartë se do ti duket lule 98-ta ccfarë do mund ti ndodhë nëse ndërsen bandat a armatosura të tij. Pse e them këtë…Sulmet ndaj institucioneve janë gjithmonë të papranueshme. Prandaj po dal atyy. E them këtë se në 98-tën bëra gjithcka për ta kontrolluar, por nuk e kontrollova dot, por të jesh e sigurtë që nga 98-ta e mbrapa, kush më nuk mund t’i kontrollojë. Po them nëse përsëritet, nëse përdor bandat e veta kundër opozitës e kam fjalën. SE duhet ta ndajmë, qytetarët nuk i konsideroj opozitë, qytetarët kanë një interes, nuk kanë interesin e opozitës por kanë interesin e sigurisë së tyre ndërsa opozita ka interesat e veta”, tha Berisha. Ndërkohë Berisha mbështeti idenë për armatosje të qytetarëve sipas modelit amerikan, duke thënë se kryeministri Rama s’ka përse të ketë frikë nga armët e popullit.
– Z. Berisha, që pas thirrjes që keni bërë në një transmetim të drejtpërdrejtë TV për armatosje. Po ju citoj: “Ju bëj thirrje qytetarëve shqiptarë që për sigurinë e tyre të armatosen, të sigurojnë armë, për të mbrojtur veten, vatrat, pasuritë e tyre, sepse nuk kanë asnjë siguri… Të armatosen, sepse armatosen amerikanët, armatosen të gjithë qytetarët që duan të mbrojnë veten e tyre dhe me urgjencë të sjellim ligjin. T’u japim të drejtë qytetarëve të mbajnë armë”. Kjo thirrje që u interpretua si në kufijtë e shkeljes kushtetuese, ju e kishit paramenduar apo ishte spontane meqë po flisnit për Shullazin dhe efektet e denoncimit tuaj publik në media?
Gjëja e fundit që unë bëj kur flas është të flas spontanisht. Para se të shkoj në Parlament, unë parapërgatitem, kurse si ide, kjo është e para disa muajve, që e përpunoj me veten time sepse unë gjykoj se sot asnjeri, përveç atyre që kanë roje, shumë roje, nuk ndihet më i sigurtë në një kohë kur bandat dhe qeveria janë bërë një. Vijmë tek thirrja ime. Thirrja ime vjen në një vend që u njeh të drejtën e armëve, të drejtën për të bërë kërkesë për armatosje qytetarëve edhe mbi bazën e kërcënimit personal… Pse kjo oshëtimë? U ndeshën me këtë rast dhe unë ç’është e vërteta nuk parashikoja të kishte këtë efekt të mrekullueshëm që pati kjo deklaratë e imja. Them të mrekullueshëm sepse nxori, u hoqi maskën kundërshtarëve… Regjimet diktatoriale i mbledhin ato “manu militarum”. I mbledhin ato kundrejt dhunës, terrorit, torturave dhe të gjitha mjeteve të tjera. Pra, Edi Rama me këtë rast nxori fytyrën e tij të vërtetë prej neobllokmeni, tregoi tmerrin që ka ai nga armët në duart e qytetarëve. Kjo thirrje, ky qëndrim ndan sistemet, sistemin demokratik me sistemin diktatorial, përndryshe është i njohur amendamenti i dytë i Kushtetutës amerikane që sanksionon të drejtën kushtetuese të qytetarëve amerikanë për të patur dhe mbajtur armë….
– Besoj e keni parasysh se Shqipëria nuk është një demokraci e konsoliduar si ajo e SHBA-ve apo jo dhe atje ky debat për armët bëhet ndryshe…
Sot është më e konsoliduar si demokraci Shqipëria se ç’ishin në vitin 1792 SHBA-të, kur etërit themelues të Kushtetutës dhe të pavarësisë e vendosën të dytin këtë amendament… Ka një ligj. E kanë amenduar dhe e kanë përmirësuar në një shkallë. Për mua e kanë përmirësuar, pse? Sepse kanë futur blerjen e armës, domethënë qytetarët ta blejnë. Por çfarë ndodh me ta? Armë këta u japin vetëm banditëve. Armë këta u japin vetëm akrabasë së tyre, armë u japin vetëm kundrejt 1000 eurove, kundrejt 1 mijë eurove. Atëherë, po sot cila është situata Mimoza? Situata është më dramatike se kurrë. Unë ju garantoj se siç u vodh tjetri para Hotel “Sheratonit”, hotelit kryesor të vendit, siç u nda tjetri mu në zemër të Tiranës etj., etj., me radhë, kjo situatë mungese totale rendi, ekziston në çdo skaj të Shqipërisë. Fshatra të tëra devastohen nga hajdutë që u vjedhin lopë, kuaj, dele, gjënë e gjallë. Imagjino ti një fshatar që varet aq shumë, ushqimi i familjes së tij nga një apo dy lopë…
– Nuk është më e thjeshtë që këta individë si Shullazi thjesht të arrestohen e të mos propozohet armatosja e shoqërisë z. Berisha, sepse si ish-President, ish-Kryeministër ju jeni Kryeministri që mbaheni mend se e keni futur Shqipërinë në NATO, keni liberalizuar vizat, e afruat vendin me BE dhe po propozoni një gjendje natyrore hobsiane, e keni parasysh? Qeveria është Leviathani dhe njerëzit duhet të kthehen kundër njëri-tjetrit?
Absolutisht jo hobsiane. Kur unë drejtoja Partinë Demokratike, platforma ime ka qenë zero tolerancë ndaj krimit dhe unë jua faktova shqiptarëve. Nga viti 2005 në shtator gjer në janar-shkurt të 2007, njëra pas tjetrës u eliminuan 204 grupe kriminale, u arrestuan të gjithë bosët e tyre. Banda e Dritan Dajtit, ky ishte leitnant, Lul Berisha, Aldo Bare, Nehat Kulla e dhjetëra e dhjetëra të tjerë bosë kudo që ishin. Dondollaku në Itali etj., kudo që ishin. Në Shqipëri, Itali, Turqi, Suedi, Gjermani në çdo vend që ishin. U arrestuan mbi një mijë bosë të këtyre bandave.
– Pikërisht, këtë gjë e bëri shteti…
Po, po, sigurisht shteti po Edi Rama po bën të kundërtën. Edi Rama ka adhurim për bandat, sepse me bandat ai do të realizojë gjithçka që ai nuk do realizojë dot me ligje. Ai nuk mund të kërcënojë, t’i thotë se do të marr kokën kryetarit të opozitës, se e di që kjo ka një çmim të madh. Por për këtë i çon vrasësin e partisë Shullazin dhe i thotë nxirre kokën në dritare po deshe, po më përmende më emrin. Ai nuk mund të përjashtojë, nuk mund të grabisë tokën e stadiumit dhe të ndërtojë kullën e Olsit, sepse askush në këtë garë nuk do të pranojë, prandaj gjen një njeri ku me Shullazin i përjashton gjithë të tjerët nga gara dhe shkon e merr bukur-bukur dhuratë tokën publike dhjetëra mijëra metra katrorë, e cila iu dorëzua nga qeveria ime Federatës Shqiptare të Futbollit, si një ent shtetëror iu dorëzua dhe kurrë për t’iu bërë dhuratë një privati, për t’iu bërë dhuratë Olsi Ramës apo dikujt tjetër.
– Qëndrojmë edhe pak tek armët, sepse ende nuk m’u përgjigjët. Në qoftë se ju thoni se njerëzit duhet të armatosen për këtë situatë që ju paraqisni, do të thotë që opozita nuk ka alternativë tjetër, por ka nevojë që qytetarët të marrin armët dhe të vetëmbrohen? Sepse ju jeni zgjedhur për të dhënë zgjidhje…
Opozita nuk ka këtë alternativë. E thashë edhe një herë, kjo është alternativa ime. Sepse ka një dallim thelbësor mes meje dhe Lul Bashës. Lul Basha është përfaqësuesi i opozitës kandidat për Kryeministër, kurse Sali Berisha e ka mbyllur kapitullin… PD-ja nuk mund ta ketë këtë alternativë sepse PD-ja kur drejtohej nga unë kishte zero tolerancë ndaj krimit. Unë besoj se edhe z. Basha do i përmbahet këtij parimi që presin qytetarët… Dhe pse s’merr një gjë Mimoza, çfarë impakti pozitiv pati në shtypin ndërkombëtar kjo thirrje? Impakt të shkëlqyer…
– Ju e lexoni si pozitiv faktin se thuhet që në Shqipëri bëhet thirrje që qytetarët të marrin armët?
Thirrje për qytetarët, sepse qeveria nuk po i mbron qytetarët…
– Jemi vend i NATO-s z. Berisha…
Vend i NATO-s? Vendi i sekretarit të Përgjithshëm të NATO-s që ka qenë edhe Kryeministër, ka përqindjen më të lartë të armëve në Europë pas Zvicrës, Norvegjia, vend themelues i NATO-s…
– Por nuk kanë një histori të ‘97-ës siç e kemi ne…
Jo. ‘97-a nuk është një histori që, çfarëdo që t’i japësh, është një histori malavite dhe bandash…
– Dakord, por ajo tregon se çfarë ndodh kur qytetarët marrin armët…
Absolutisht jo! Ka dy gjëra. Armët me të cilat u vranë shqiptarët u sollën nga deti. Shqiptarët nuk duhet të gabojnë. Armët, të cilat mbrojtën shqiptarët ishin armë të depove. Armët e depove ishin armë që mbrojtën shqiptarët në Shqipëri, mbrojtën shqiptarët në Kosovë…
– Por u desh një forcë ndërkombëtare paqeruajtëse që të stabilizohej situata apo jo?
Ajo ishte qëllim tjetër. Ajo kishte qëllim tërësisht të politikës së jashtme, kërcënime të jashtme. Ishte një gjë tjetër, se duhet t’i analizojmë gjërat. Pra, armë, të cilat u morën nga depot. Depot u hapën. E kuptoni vetë domethënë…
– Gjithçka u fshi me marrëveshjen e 9 marsit, që bëtë ju si President…
U hapën jo pa qëllim depot. Shqiptarët nuk mund t’i merrnin bandat. Shteti kishte një alternativë: o t’u binte me armë këtyre dhe mund të krijonte një konflikt civil, ose të armatoste qytetarët dhe nuk kishte më konflikt civil dhe një pjesë e madhe e këtyre armëve do t’u shkonin shqiptarëve në Kosovë për t’u mbrojtur nga serbët.
– Po thoni që shteti zgjodhi alternativën e dytë?
Absolutisht po! Pa asnjë diskutim, pa asnjë diskutim!
– Kjo është deklaratë e fortë z. Berisha…
Jo, e kam thënë unë këtë. Kjo në mënyrë të padiskutueshme. Po qe se ti nuk siguron dot qytetarët, ti do t’u japësh mundësi atyre të sigurojnë veten e tyre, se përndryshe… Dhe kjo, kjo e qetësoi situatën. Kjo ndihmoi shumë shqiptarët si në Shqipëri edhe në Kosovë për t’u mbrojtur tek pragu i derës. Nuk luftuan shqiptarët kundër njëri-tjetrit. U mbrojtën tek pragu i derës.
– …Kur thuhet nga armët ka frikë shteti, duket se bëhet thirrje për reagim të armatosur, diçka që ju vetë e keni provuar…
Atëherë në qoftë se unë iu referova ligjit, në qoftë se unë iu referova Kushtetutës amerikane, besoj se këtu pastaj mund të ndërtojë kush ç’të dojë. Po në atë paragraf që ke ti, them të ndryshojmë ligjin në mënyrë që ta nxjerrim nga korrupsioni etj., etj…
– Pra ta rishikoni ligjin…
Po rishikim i ligjit dhe unë i referohem Kushtetutës amerikane. Unë nuk them opozita e armatosur. Unë them qytetarë shqiptarë armatosuni dhe këtë e them me bindjen më të thellë, në këto kushte kur nuk më thotë dot një njeri i vetëm se është i sigurtë. Çfarë po ndodh me Shullazin, me gjyqin e Shullazit? Edi Rama njëri pas tjetrit po terrorizon me pushtetin të gjithë dëshmitarët. Po i detyron ata të tërhiqen. Cili shqiptar ndihet i sigurtë sot, përveç qeveritarëve që rrinë në makina të blinduara dhe veshin antiplumb? Kjo është situata. Situata është katastrofale përsa i përket rendit.
– Po a do ta përktheni në aksion, sepse do ju duhet edhe mbështetje…
Unë nuk e marr me nxitim. Unë e marr gradualisht. Unë kam kohë që bëj thirrje për revolucion demokratik. Dhe unë do të vazhdoj të bëj thirrje… Ka frikë Edi Rama sepse e di që për shumicën e shqiptarëve sot, më e urryer se çdo diktaturë tjetër është ajo e krimit. Ka frikë Edi Rama se ai përdor këtu Shullazin, aty Hakmarrjen për Drejtësi, aty bandën tjetër për të zgjidhur të gjitha problemet e klanit të tij, të vetes së tij.
– Juve ju duhet njohur krediti në fakt që keni folur vazhdimisht për Shullazin, jo vetëm para dy javësh, kur denoncuat se ishte kërcënuar kandidati për rektor dhe rektori i UT, por e keni bërë këtë gjë prej tre vjetësh në Parlament. Keni denoncuar çka ju i quani lidhje të Shullazit me Kryeministrin dhe ministrin e Brendshëm.
Dhe do të vazhdoj të denoncoj. Kam denoncuar edhe Hakmarrjen për Drejtësi…
– Por duhet parë edhe ana tjetër sepse z. Rama ju kujtoi në Parlament se në kohën kur ai ishte në opozitë Shullazi i prishte takimet e Partisë Socialiste. Për llogari të kujt i prishte takimet dhe nëse ishte një keqbërës i rëndomtë, përse i shpëtonte rregullisht burgut?
U arrestua 7 herë. Gjatë periudhës që unë kam qenë Kryeministër Emiljano Shullazi është arrestuar 7 herë. Bosi i tij Dritan Dajti është këputur në mes, në mes… Çfarë është incidenti që përmendi Edi Rama? Vasilika Hysi dhe Besnik Bare ndërtuan zyrën elektorale karshi shtëpisë së tij. Por bosi i krimit nuk mund të duronte altoparlantin e zyrës elektorale të PS.
– Pra, ju thoni që nuk ishte reagim politik…
Jo, ai ishte shef aty. Ai ishte kryetar i PS dhe shkoi ua hoqi, ua mori. Nuk u ka prishur miting ai. U hoqi altoparlantin që i çonte zhurmën tek shtëpia. Çfarë ndodhi me të? U arrestua brenda 12 orëve. Çfarë ndodhi më tej me të? U dënua nga gjykata me 20 ditë për këtë vepër. Çfarë bëri Edi Rama? Edi Rama i dha qindarkë për qindarkë të gjitha ditët e burgut, duke shkelur në mënyrë flagrante ligjin… Emiljano Shullazi është i vetmi shqiptar, që me vendim të Edi Ramës, të qeverisë së Edi Ramës mori dëmshpërblimin, vetëm me vendim të Shkallës së Parë, sepse me të dytën Shullazi s’fitonte kurrë pafajësinë. Edi Rama prishi të gjitha provat e përleshjes së Qafë Kasharit, pasi tha Drejtoria e Tiranës se ai u plagos në shpinë, se u gjet me 7200 euro, se u gjet me kaq fishekë etj., etj. Pas dy orësh Saje Qorri, Didi me urdhër të Ramës, ndryshuan çdo gjë, se Shullazi nuk është i plagosur, se ngjarja e Qafë Kasharit nuk ka asnjë lidhje me ngjarjen në Rrugën e Kavajës etj., etj. Çfarë bën Edi Rama? Ka një drejtor policie që s’ka lëvizur që nga dita e parë që është emëruar e deri sot? Pleurat kanabisi, Pleurat droga që e kemi të filmuar në arat e kanabisit si triumfator në arat personale të tij. Çfarë bën ai? Gjithë ato vrasje në Durrës. Ai garanton vrasjet e Shullazit. Çfarë bën ky Pleurati? Ky nis kamionat me drogë e kapen në Itali. Shumica nga Shullazi. As ferrë në këmbë nuk i hyn sepse bosi i vërtetë i tij është Shullazi. E arrestuan një herë këtë Gilmandon, e arrestuan një ditë. Një polic qe guximtar e kapi në mes të autostradës. E merr nga ministria, nga policia Ardian Çipa. I thotë oficerit “liroje menjëherë”. Jo, i thotë nuk e liroj, më fal. Mua duhet të më thotë Drejtori i Policisë së Durrësit. Pas dy minutash e merr Pleurat kanabisi e i thotë “mos guxo ta sjellësh në komistariat”. U detyrua oficeri e liroi në autostradë. Çfarë ndodhi me vrasjet që bëri? A nuk e morën tjetrin nga qendra e Durrësit dhe e çuan në Fushë-Krujë dhe e ekzekutuan duke mos i nxjerrë Pleurati as edhe një patrullë gjëkundi? Që nga Durrësi deri në Fushë-Krujë mund të nxirrje tre pa asnjë vështirësi.
– Ideja është që njerëzit të vihen para përgjegjësisë për këto veprime…
Qeveria siç ka shndërruar në korporatë krimi veten dhe policinë, ka hedhur tentakulat e veta edhe në Prokurori, në gjykata dhe kudo. Kjo është e vërtetë. Çfarë mund të thoni ju për gjykatësit që lirojnë Armando Prengën? Dhe që e sjellin në Parlament. Këto mund të çojnë në luftëra civile sot.
– Ju vlerësuat së fundmi rolin e Prokurorisë për arrestimin e Shullazit, në një linjë me z. Basha… Gjithmonë shumë të kujdesshëm në artikulimet për Prokurorinë, edhe pse në këto tre vjet ne nuk kemi parë ndonjë aksion për t’u shënuar. Ju keni bërë shumë denoncime z. Berisha. Prokuroria është organi që ngre akuzën, por nuk kemi parë raste për t’u shënuar.
Nuk mund të akuzoj unë Prokurorinë që u përball dhëmbë për dhëmbë me bandat më të rrezikshme të Shqipërisë dhe të Europës. Ata aty janë dhe i kanë bërë shërbime të mëdha vendit të tyre. Por nuk mund të pajtohem kurrë me prokurorin që shet dosjen. Ai prokuror që shet dosjen është më kriminel se çdo kriminel se nuk shitet kurrë sekreti i shtetit. Ai bën një tradhti të lartë ndaj shtetit, ndaj ligjit, ndaj parimeve, ndaj gjithçkaje.
– Atëherë dalim tek çështja që duhet Reforma në Drejtësi apo jo?
Pa diskutim që duhet!
– Çfarë po e vonon reformën, se zëra të ndryshëm, në korridore të medias, politikës, ndërkombëtarë, thonë se nuk është thjesht PD, por është Sali Berisha që nuk e do Reformën në Drejtësi.
Unë ç’është e vërteta nuk besoj ta thotë dikush nga komuniteti ndërkombëtar, por në qoftë se e thotë ndokush prej tyre janë thjesht mercenarë të një regjimi kriminal. Sali Berisha është më i interesuar se kushdo tjetër dhe unë publikisht dhe privatisht në çdo diskutim timin i kam kërkuar Partisë Demokratike të jetë aktive në Reformën e Drejtësisë dhe fakti është, a ka ndikuar apo jo ky qëndrim i imi, s’mund ta them.
– Megjithatë ka disa javë që varianti final ka ardhur nga Venecia…
Venecia e rrëzoi draftin e dytë në 11 shtylla. E këputi në mes. Venecia asgjësoi Byronë e Hetimit në variantin e Edi Ramës, ku Edi Rama bëhej kryehetuesi i Shqipërisë. Venecia denoncoi shkeljen e Konventës Europiane të të Drejtave të Njeriut dhe të Kushtetutës shqiptare nga drafti. Venecia denoncoi përpjekjen e qeverisë për të kapur drejtësinë. Të gjitha këto. Dhe siç e di ti në mars erdhi opinioni i dytë i Venecias, pra u shtynë edhe 3 muaj. Nga 5 u bë 8 muaj vonesa nga Edi Rama dhe përpjekja e tij monstruoze për të kapur drejtësinë.
– Sot ai ju thotë po ju pres në tavolinë…
Prit një minutë, prit një minutë. Çfarë bëri ndërkohë? Edi Rama përgatiti, kaloi në qeveri draftin famoz të BKH-së, ku vinte Saje Qorrin në krye të saj. Pse e bëri këtë? Ai e dinte që ajo s’pranohej kurrë. Po e bëri vetëm për të bllokuar. Pse e bëri për të bllokuar? Sepse tani hyn faktori Ponta dhe Surreli. Një vizitë të shpejtë në Rumani bashkë me tellallin e tij Balla, drejt e tek Viktor Ponta. Viktori u tha, “në qoftë se e bën, shihe këtë, do ta kesh më të ngushtë qelinë, se ç’e kam unë sot”…
Po çfarë u tha tjetër? Unë tha në ligj e kisha që e emëroja vetë. E emërova, por ma morën e m’i bënë “brain washing” (shpëlarje truri). A e kishte fjalën për ndonjë vend europian apo për Amerikën, këtë nuk e di. M’i bënë brain washing dhe të parit që iu kthyen, m’u kthyen mua. A do të t’i jap unë emra deputetësh e të them për bisedën që ka bërë Edi Rama në sallën e Parlamentit për reformën? Edi Rama, haptas kundër reformës.
– Atëherë pse nuk e nxisni ju si opozitë?
Opozita nuk mund të asgjësohet. Sepse nëse opozita bënte të paqenë rastin e Prengës dhe në rastin e dy shkeljeve të rënda të Kushtetutës, opozita asgjëson veten e vet, vërtet merr pjesë në një proces, por bëhet absolutisht inekzistente. Çfarë bëri tani? Unë bëra një deklaratë dhe po të them një gjë, që kjo është e mjaftueshme për të bojkotuar Parlamentin dhe unë nuk e këshilloj këtë dhe nuk do bojkotohet.
– Cili është roli i opozitës në këtë periudhë, sepse kam parasysh që juve jeni njeri i aksionit, ju propozoni deri armatosjen e qytetarëve, ndërsa opozitën e shoh me denoncime nga foltorja e PD, denoncime të tipit që sot i bëjnë edhe mediat dhe njerëzit në rrjetet sociale. Keni një strategji që konvergon në drejtime të ndryshme?
Edhe një herë: armatosja e qytetarëve ka një konotacion për sigurinë e qytetarëve. Pse e merr Edi Rama se është armë kundër tij, Zoti e shpëtoftë atë, ajo është punë tjetër.
– Pse nuk ka aksion në PD ose më mirë pse ka më shumë denoncime se sa le të themi frymëzim. Opozita duhet të frymëzojë sot dhe ju e dini këtë gjë nga eksperienca juaj 8-vjeçare në opozitë…
Unë mendoj se opozita nuk ka vetëm denoncime. Opozita paraqet në mënyrë të përditshme alternativat.
– Nuk ka aksion të përditshëm…
Ka dhe aksion dhe mund të ketë edhe më shumë aksion, jam dakord, por alternativë opozita po paraqet, të them të vërtetën më shumë se çdo opozitë në historinë e vendit. Paraqet vazhdimisht alternativa për ekonominë e për të gjitha problemet, por problemi është se sot ekziston një terror. Ju e dëgjuat në një nga emisionet e “Opinion” kur moderatori i emisionit, Blendi Fevziu tha se 36 gazetarë dhe zyrtarë refuzuan të vijnë në këtë studio të flasin për Shullazin. Kjo është gjendja më katastrofale…
– Dhe këtu po e mbyll me pyetjen e fundit, ju përmendët që jeni ish, por ju keni një ndikim të jashtëzakonshëm në publik. I hodha një sy përpara kësaj interviste Facebook-ut tuaj, keni mesatarisht 3 statuse në ditë, të cilat marrin nga 2-3 deri në 5-6 mijë pëlqime çfarë është një rekord, pra keni shumë ndikim. Më kujtohet, ju kam bërë një pyetje në një studio televizive dhe ju kam thënë, a do të jepni dorëheqjen nëse do të humbni zgjedhjet dhe përgjigjja juaj ishte “burri njihet nga pasionet dhe pasioni juaj ishte politika”, çka u vërtetua në fakt pasi ju e dhatë dorëheqjen, por vërtet qëndruat në politikë. Tani, cili është pasioni i Sali Berishës i radhës, sfida e radhës, sepse nuk ju shoh si njeri që mund të jeni pasiv, ju duhet të keni një sfidë, një pikësynim dhe a keni një afat për këtë?
Unë ju siguroj se unë kam vetëm një qëllim, imediat, afatmesëm dhe afatgjatë; mbrojtja e interesit publik, ashtu siç e quaj unë. Unë nuk pretendoj kurrë që të jem barometri i tij, as dhe të kem monopolin e të vërtetës, por në mënyrën siç e konceptoj unë. Ka një shprehje Eduard Burke “asgjë s’i duhet të keqes më shumë të triumfojë sesa heshtja e njerëzve të ndershëm, heshtja e atyre që nuk duhet të heshtin”, dhe unë nuk do të hesht kurrë para asaj që e konsideroj të keqe për publikun.
– Edhe me rrezikun që do të përjashtoheni sepse u bë hera e dytë… Megjithëse grupi duket sikur nuk rri dot pa ju në Parlament…
Përkundrazi jam nderuar shumë nga ky vendim. Unë them një gjë, në qoftë se marrëdhëniet e mia nga Parlamenti deri diku m’i kushtëzon edhe grupi, sepse unë nuk dua të ndikoj në vendime që nuk besoj se i interesojnë PD-së dhe grupit ndaj Parlamentit. U tmerrua nga kërkesa ime që qytetarët të kenë armë sipas ligjit, tregoi se ka mendësinë e Spiro Kolekës dhe të atit të tij biologjik, mendësinë e atyre që kanë frikë dhe tmerr nga armët në duart e qytetarëve. Edi Rama për hir të së vërtetës, më 14 shtator të vitit ‘98, pasi kriminelë me uniforma, majorë, kolonelë etj., ekzekutuan para selisë së PD Azem Hajdarin dhe të nesërmen, me gjithë përpjekjet e mëdha të mia që ai të mos shndërrohej në një konflikt më të gjerë, ajo ndodhi. Dhe Edi Rama e di mirë kur ka ardhur në televizionin shtetëror u zhduk, hyri në bunker, ka qenë i verdhë e i zbehtë sikur kish dalë nga arkivoli. Ndaj dhe i them Edi Ramës se armët nuk duhet t’i ketë kurrë frikë një qeveri e një vendi të lirë, por ta ketë të qartë se do t’i duket lule ‘98-ta çfarë do mund t’i ndodhë nëse ndërsen bandat e armatosura të tij. Pse e them këtë?
– Sulmet ndaj institucioneve janë gjithmonë të papranueshme…
Prandaj po dal aty. E them këtë se më ‘98-tën bëra gjithçka për ta kontrolluar, por nuk e kontrollova dot, por të jesh e sigurtë që nga ‘98-ta e mbrapa, kush më nuk mund t’i kontrollojë. Po them nëse përsëritet, nëse përdor bandat e veta kundër opozitës e kam fjalën. Se duhet ta ndajmë, qytetarët nuk i konsideroj opozitë, qytetarët kanë një interes, nuk kanë interesin e opozitës, por kanë interesin e sigurisë së tyre, ndërsa opozita ka interesat e veta… Po qe se vepron me praktika të tilla, në mënyrë absolute vrimë miu të gjejë dhe ta marrë personale këtë, ja kam bërë një herë. E mori personale dhe e dëgjoi mirë.
– Zoti Berisha, unë vërtet shpresoj që opozita të gjejë një alternativë tjetër më të mirë sesa armët…
Më vjen keq dhe unë ju garantoj dhe një herë se kjo nuk është e opozitës, armët nuk janë alternativë e opozitës.
Alternativa ime është kjo, opozita ka alternativën e vet. Opozita nuk e arreston dot Shullazin, nuk arreston dot bandat. Opozita duhet të përgatisë alternativën e vet kur të vijë në pushtet. Për kohën kur opozita nuk është në pushtet, rendin dhe sigurinë e ka qeveria, por rendin dhe sigurinë e ka marrë Shullazi dhe Edvin Shullazi.
– Nuk tërhiqeni nga qëndrimi?
Absolutisht kurrë. Në asnjë mënyrë, pse do të tërhiqem?
Marrë nga ABC News
Basha: Rama, bunkeri i fundit që shqiptarëve u ka dalë për detyrë ta shembin
Kryetari i PD, Lulzim Basha ka dënuar dje me ashpërsi sulmin e dhunshëm të urdhëruar nga Rama kundër gazetarëve e analistëve të njohur që kërkonin të merrnin pjesë në dëgjesën publike të qeverisë për projektin e stadiumit të ri. Përmes një reagimi të menjëhershëm, Basha ka cilësuar Ramën si bunkerin e fundit që shqiptarët kanë për detyrë të rrëzojnë. “Ky është bunkeri ku qeveriset vendi, ku vendoset për pasuritë publike, ku shkelet ligji, ku ndahen copat e mëdha të tortës mes miqve. Bunkeri ku, hapësira për qytetarët në stadium zvogëlohet dhe rritet e zmadhohet pjesa e biznesit, e kullës, e dyqaneve për klientin e Ramës. Nga ky bunker rritet zullumi i qeveritarëve, fryhen llogaritë bankare, vidhen miliardat, ndërsa qytetarët varfërohen me përdhunë çdo ditë. Ky është bunkeri i fundit që shqiptarëve u ka dalë për detyrë ta shembin, 26 vite pasi rrëzuan bunkerin e madh të regjimit komunist”, është shprehur kreu i PD. Basha e ka cilësuar dhunën ndaj gazetarëve si sjellje tipike e një qeverie-bandë me një bandit-Kryeministër. “Akt i rëndë, i paprecedentë dhe i papranueshëm, ndalimi me forcë i gazetarëve të njohur dhe përfaqësuesve të shoqërisë civile për të marrë pjesë në një aktivitet, që sipas emërtesës duhej të ishte dëgjesë publike për projektin e stadiumit. Rojet e Edi Ramës, janë urdhëruar të mos lejojnë futjen në këtë ‘dëgjesë’, të Fatos Lubonjës, Andi Bushatit, Ylli Rakipit dhe aktivistëve të shoqërisë civile, të cilët kanë kundërshtuar projektin për stadiumin. Sjellje tipike e një qeverie-bandë me një bandit-Kryeministër. Një qeverie, që merr vendime për interesat e saj, të cilës i bie maska e dëgjesës publike në rastin më të parë. Nuk ishte pra, një aktivitet i hapur siç e propaganduan, por një teatër-bunker me regji ku flet Rama, jep mendime Rama, vendos Rama, firmos Rama dhe të tjerët që janë administratë, oligarkë, e klientë dëgjojnë e duartrokasin”, shprehet Basha.
Skema e Tahirit për lirimin më 17 maj të Frrokut në Holandë
Në rast se ish-Kryeministri Berisha nuk do të denonconte arrestimin në Holandë të Arben Frrokut dhe makinacionin e Ministrisë së Brendshme, atëherë vrasësi i komisar Lamajt do të lirohej më 17 maj. Autoritetet holandeze kanë kërkuar nga autoritetet shqiptare dosjen e të dhënave të Arben Frrokut të arrestuar që më 6 mars. Nga ajo datë dhe deri ditën e denoncimit që bëri ish-Kryeministri Berisha, policia shqiptare kishte heshtur. Arsyeja e kësaj zvarritjeje nga ana e Tahirit ishte e thjeshtë. Ai kërkonte që të lirohej vrasësi Frroku dhe për këtë i duhej që ta vononte përgjigjen për autoritetet holandeze deri më 17 maj, kohë kur përfundonte edhe koha e paraburgimit në Holandë të Frrokut.
Gjithçka ka shkuar sipas planit të Tahirit, deri në momentin kur ish-Kryeministri Berisha e ka denoncuar këtë skandal kriminal të Ramës dhe Tahirit.
Pse u vonua arrestimi
Arrestimi i Arben Frrokut nga autoritetet holandeze është vonuar për shkak të një problemi me shenjat e gishtërinjve të hedhura në faqen e Interpolit nga policia shqiptare. Autoritetet në Amsterdam kanë gjetur përputhshmëri në foton, gjeneralitetet e gjithçka tjetër, por jo tek shenjat e gishtërinjve. Policia tha dje, se ditët e fundit ka patur disa komunikime me autoritetet holandeze, por vetëm dje u konfirmua arrestimi.
Problemet me shenjat e gishtërinjve të të shumëkërkuarit, Arben Frroku të hedhura në faqen e Interpolit nga Ministria jonë e Brendshme ka qenë shkaku i vonesës së arrestimit të tij nga policia holandeze.
Mësohet se policia holandeze nuk ka mundur të verifikojë menjëherë shkencërisht se personi i arrestuar ishte Arben Frroku, pasi nuk hapej sistemi ku ruheshin të dhënat e këtij personi të shpallur në kërkim, mes te cilave gjurmët e gishtave për të bërë krahasimin.
Burimet bëjnë me dije se të dhënat për Frrokun jepnin problem dhe nuk hapeshin dhe kjo ka bërë që policia holandeze t’i kërkonte të dhëna të reja policisë shqiptare, por edhe asaj greke, për shkak se personi që kishin ndaluar mbante pasaportë greke, por i lindur në Korçë.
Reagimi i Prokurorisë
Prokuroria e Përgjithshme dorëzoi në Ministrinë e Drejtësisë kërkesën për ekstradimin e Arben Frrokut, i arrestuar në Holandë.
Zyra e shtypit pranë kryeprokurorit Adriatik Llalla konfirmoi faktin se prokurorët e Krimeve të Rënda e kanë dorëzuar tashmë dosjen e plotë të Arben Frrokut në ministri, së bashku me shkresën përcjellëse ku kërkohet ekstradimi i tij në Shqipëri. Sipas këtyre burimeve, në dosjen e kërkesës për ekstradim, Prokuroria ka renditur krahas gjurmëve të gishtave, fotove të reja edhe vendimin e Gjykatës së Apelit për Krime të Rënda, të cilët e dënuan me burgim të përjetshëm. Një kopje e këtyre materialeve, thonë burimet i është dërguar edhe zyrës qendrore të Interpolit.
Nga ana tjetër, burimet pranë Ministrisë së Drejtësisë i thanë “ABC News” se kjo dosje, pasi është administruar nga zyra e marrëdhënieve me jashtë dhe ekstradimeve, brenda javës që vjen do të përkthehet i gjithi dhe më pas do t’i niset autoriteteve të drejtësisë holandeze, duke kërkuar ekstradimin e Frrokut. Këto burime sqaruan se shteti shqiptar nuk ka marrëveshje reciproke me shtetin holandez për ekastradimin. Për këtë fakt, kërkesa për ekstradim bazohet në Konventën Ndërkombëtare të Ekstradimeve që si shteti shqiptar ashtu edhe holandez e ka të ratifikuar.
Burimet thonë se brenda një afati të përcaktuar nga legjislacioni holandez, shtetasi Arben Frroku do të dalë para një gjykate në Amsterdam ku do t’i komunikohet kërkesa e palës shqiptare për ekstradimin e tij. Pritet që të zhvillohet një proces gjyqësor, ku Prokuroria holandeze që përfaqëson shtetin shqiptar të kërkojë ekstradimin e tij dhe i arrestuari Arben Frroku të shprehë qëndrimin e tij, pro ose kundër ekstradimit.
Arben Frroku është arrestuar pak ditë më parë në Holandë me pasaportë të falsifikuar greke me emrin Renato Tsepa. Ai është dënuar me burgim të përjetshëm për ngjarjen e shkurtit të 2012, ku u ekzekutua me kallashnikov komisar Dritan Lamaj. Për të provuar vrasjen e kryer nga Frroku, Prokuroria kishte siguruar një dëshmitar të mbrojtur fjalët e të cilit nuk u morën parasysh nga Gjykata e Shkallës së Parë për Krime të Rënda, që e shpalli të pafajshëm Frrokun. Pas këtij vendimi, ai arriti të largohet nga Shqipëria pa u regjistruar në sistemin TIMS. Vetëm pak ditë pas largimit të tij, Gjykata e Apelit për krime të rënda prishi vendimin e Shkallës së Parë dhe e deklaroi fajtor Frrokun për vrasjen e komisarit, duke dënuar me burg të përjetshëm.
Lubonja: Dhunës do t’i përgjigjemi me dhunë
Analisti i njohur, Fatos Lubonja ka reaguar ashpër dje ndaj dhunës së ushtruar me urdhër të Ramës nga gardistët ndaj tij dhe analistëve të tjerë të njohur, të cilin tentuan të merrnin pjesë në dëgjesën publike të qeverisë në lidhje me projektin e ri për stadiumin.
Në një pronocim për mediat, Lubonja ka deklaruar se dhunës së urdhëruar nga Rama do t’i përgjigjen me dhunë. “Këtu bashkohet arroganca, dhunë e pastër kjo e sotmja. Shoqëria Civile është prononcuar për këtë projekt, shumë individë janë prononcuar dhe pse na u shfaq në këtë mënyrë, si rezultat i këtij presioni na thanë hajdeni dëgjoni dhe nuk na lanë. Ne do të përdorim çdo mjet të mundshëm, siç tha arkitekti italian, do të lidhem me litar që të mos shembet kjo vepër. Po këto akte duhet që të ndalohen, këto akte të turpshme. Por nëse do të përdoret dhuna, fatkeqësisht dhunës i përgjigjet me dhunë. Bashkohet injoranca, arroganca, mungesa e çdo lloj diplomacie për një politikan, është dhunë e pastër, mos të dalin e të thonë aty pse thotë Berisha rrëmbeni armët, kështu vjen puna kur ti nuk ke asnjë lloj diplomacie për popullin, pse organizon takim me publikun në një objekt privat”, u shpreh Lubonja”.
Ndërkohë që gjoja dje hap qendër dialog, por dialog është kur merr një vendim dhe merr mendimin e të tjerëve, dëgjon ekspertët dhe këtu ke gjithë shoqërinë civile që duan të mësojnë. Tani del bodigardi të ndalon, kjo është skandaloze, nuk qëndron”, tha Lubonja. Ai denoncoi mënyrën e paskrupullt që zgjodhi Rama për të prezantuar projektin klientelist dhe skandaloz të stadiumit. “Me sjelljen e tij Kryeministri tregoi se partneriteti publik privat është për të penguar transparencën ndaj shoqërisë civile dhe të ashtuquajturat prezantime janë vetëm propaganda mediatike për të mos lejuar një debat të shëndetshëm dhe të plotë mbi efektet negative që shkakton ky projekt për qytetarët e Tiranës. Me pretekstin për të ndërtuar një stadium me standarde europiane qeveria është duke përkeqësuar standardin urban të qytetit. U ftuam si publik për prezantimin e një projekti si stadiumi kombëtar. Çuditërisht ky takim u organizua në ambientet e një privati (klient i tenderave të Kryeministrit) dhe jo në një ambient publik. Çudia s’mbaron këtu. Rojet e këtij privati ndalojnë me dhunë hyrjen në sallë të atyre që Kryeministri i ka në listë si kritikë të projektit. Në sallë hyjnë vetëm yesmen-ët e tij. Dhe e gjithë shfaqja transmetohet live si paraqitje para publikut e projektit. Kjo është për mua zhveshja krejtësisht e maskës”, u shpreh ndër të tjera Lubonja.
“Treguesi se në çfarë shkalle shteti është kapur nga privatët, të cilët në bashkëpunim me maskat e tyre si Kryeministri e shërbëtorët e tij grabisin publikun dhe rrahin apo ndalojnë sa herë tentojnë të mbrojnë pronën publike që po u grabitet. Përdorimi i policëve privatë për të bërë akte të tilla, ndërkohë që projekti është kryer në kundërshtim edhe me ligjet në fuqi tregon se shteti ynë funksionon si organizatë kriminale. E gjitha kjo që ndodhi e tejkalon shumë çështjen e një projekt stadiumi. Dhe meqë është folur shumë për ‘Wemblin’ si shembull i një stadiumi historik që prishet duke na krahasuar me britanikët, po ju them se po të ishte vepruar kështu siç veproi sot ky Kryeministër në Londër sot do të ishte djegur nga londinezët selia nr. 10 në Downing Street, jo thjesht për të mbrojtur një stadium, por për të mbrojtur demokracinë, lirinë dhe dinjitetin qytetar. Kjo paturpësi nuk mund të arrijë deri këtu. Ky është privatizim i shtetit, kuptoni apo jo”, tha Lubonja.
Pas ngjarjes, një replikë Rama-Shoqëria Civile është kryer në distancë. Kryeministri Edi Rama është pritur me protestë jashtë “Hotel Tiranës” ku ka prezantuar projektin për stadiumin e ri “Qemal Stafa” për anëtarët e kabinetit të tij dhe deputetët e PS-së. Disa dhjetëra aktivistë të shoqërisë civile dhe gazetarë e kanë pritur atë në fund të mbledhjes pasi ka dalë për të hipur në makinë, me një pankartë të madhe “Stop Arrogancës”.
Por Rama është mjaftuar vetëm me një replikë me shoqërinë civile: “Merrni votat një herë pastaj hajdeni…”.
Makina e Kryeministrit Rama u mbulua nga truprojat e Gardës, ndërkohë që pasi ai u largua me eskortën e tij, pas tij kanë dalë të gjithë anëtarët e kabinetit qeveritar dhe deputetë të PS-së, që ishin në takim.
Arben Shahini
Kryesore
Continue to the category
