OSHEE është shndërruar në një hambar tenderash për klientët dhe bandën pranë qeverisë. Janë me dhjetëra tendera, të pajustifikuara si për shërbimin ashtu edhe për kostot marramendëse që u janë dhënë dhe vijojnë t’u jepen klientëve të qeverisë.
Vetëm në 3 muajt e parë të vitit OSHEE ka tenderuar 23 miliardë lekë pa asnjë eficencë e vetëm për dy vite në shpenzime luksi janë harxhuar 21 milionë dollarë. OSHEE mbetet institucioni që promovon dhe krijon tendera nga më korruptivët duke rënduar shqiptarët me fatura që vetëm për vitin e shkuar kanë qenë mbi 91 mijë të tilla. Janë këto mbifaturime që i shtohen barrës së madhe që çdo qytetar paguan në sportelet e OSHEE, para që dalin nga xhepat e varfëruar të shqiptarëve për të shkuar në llogaritë e fryra të oligarkëve të qeverisë, përmes tenderave korruptivë duke filluar në trajtimin e stresit, trajnimin e stafit, parashikimin e motit e çdo shërbim tjetër të paimagjinueshëm. Në një deklaratë për mediat, zëdhënësja e Partisë Demokratike i bëri thirrje OSHEE të bëjë transparencën mbi tenderin për vendosjen e matësave, ku për një shërbim që kushton 1 miliard lekë, OSHEE ka akorduar 7 miliardë lekë, pra 6 miliardë lekë shkojnë në xhepin e klientit të qeverisë pa kryer asnjë shërbim.
“OSHEE thesari i madh i parave që Edi Rama ndan me miqtë e tij nuk ndalet në tenderimin pa shpallje, me negocim, me një operator të vetëm në garë, duke dhënë në çdo rast pothuajse fondin limit. Dje ne denoncuam skandalin e vendosjes së 50 mijë matësve me 7 miliardë lekë, ndërkohë që kostoja sipas tregut është vetëm 1 miliard. OSHEE nuk u përgjigj se ku kanë shkuar 6 miliardë, por zgjodhi të sulmojë opozitën. Po paraqesim sot disa raste të tjera, se çfarë bën kjo bandë e Edi Ramës, me paratë që u merren shqiptarëve me dhunë, me burg, me mbifaturim e me ndëshkim me errësirë”, tha Zhupa. Ajo bëri të ditur se 60 mijë euro OSHEE ia ka dhënë një koncesionari makinash, “Tirana Auto”, për këtë vit. “I duhen bandës makina luksi për të marrë dhe qindarkën e fundit të shqiptarëve. Ndërkohë që po tek ky operator ka marrë dhe vitin që shkoi makina me qira, 68 milionë lekë.
Vazhdon trajnimi i punonjësve, ku 670 milionë lekë i jepen të vetmit operator në garë, për 6 muaj punë. Mbi 100 milionë lekë në muaj, për trajnim, për letra”. Zhupa demonstroi para mediave dokumentin, i cili dëshmon se vetëm për evente e aktivitete OSHEE ka shpenzuar milionë para për kompaninë e lidhur me Erion Veliajn. “Ja ku keni dokumentin. Ka evente OSHEE, meqë çmimi i energjisë është rritur për qytetarët, meqë familjet mbifaturohen, meqë përfundojnë në errësirë kur një pjesë e mirë s’kanë mundësi të paguajnë. 66 milionë lekë në vit për këto ahengje të OSHEE merr Prosaundi i famshëm i fushatës së partisë dhe i festave të Veliajt. Këto pra janë disa nga bëmat e OSHEE-së, e bandës hajdute që Edi Rama ka vërsulur kundër popullit, për të marrë miliardat që i duhen oligarkisë. Shpejt do të vijë koha që populli t’u kthejë reston e banda e OSHEE me kryehajdutin e saj në krye të japin llogari para ligjit”, u shpreh Zhupa.
Si ndan OSHEE tenderat miliarda lekë për klientët dhe bandën
Pse na duhet përballja!?
Frrok ÇUPI
Këta nuk dinë ç’thonë. As çfarë bëjnë! Kanë ngritur rè të mëdha (Majakovski, poet i revolucionit socialist, këtë lloj reje e quante “ré në pantallona”); kanë ngritur ré kundër ish-kryeministrit të Republikës pse tha se vendit i duhet “përballje kundër krimit”! Ai foli si deputet i Kuvendit dhe idenë e formuloi kështu: Të bëjmë ligj për të armatosur popullin!.. Mirëpo këta mbrojtjen nga krimi e cilësuan si çështje kriminale.
Këta nuk dinë ç’bëjnë… Këta përballen orë e çast me popullin e pambrojtur dhe njëkohësisht duan të thonë se “populli kryen krim po u përball”. Këta e kanë çuar të keqen në kockën e njeriut, por i thonë njeriut “mo luaj!”. Kjo është qeveri “one way”, dmth., vetëm urdhëron qeveria popullin, por jo populli qeverinë.
As e dinë çfarë bëjnë, as e dinë nga vijnë. Këta vijnë nga origjinë që në thelb ka përballjen, ka “populli më këmbë”, “gjithë populli ushtar”, dmth i armatosur!…, por tani nuk e pranojnë përballjen. Një nga filmat që diktatori komunist e çmonte pa asnjë vërejtje, ishte filmi i tyre “Përballimi”.
Këta tani ngrejnë ré tymi kundër përballjes.
Pse na duhet përballja?
1.
Na duhet sepse kemi humbur qeverinë.
Qysh se lindi qeveria e “Rilindjes”, lindi si e dyshimtë. U paraqit si socialiste, garantoi si reformatore në koalicion me aleatin e demokratëve, por në fakt u ndërtua as ashtu e as kështu, veç si përfaqësuese e një pakice fluide që u quajt “Rilindje”. Të parët, socialistët, nisën të kërkojnë qeverinë e tyre. Pastaj u bashkuan edhe pjesët e tjera të shoqërisë. Qeveria që u votua nuk dukej gjëkundi, domethënë programi i qeverisë për të qeverisur popullin, u fsheh. Premtimet me të cilat Parti mori votat, nuk ishte dhe nuk është më. Në këtë rast, besoj se nuk është më e nevojshme të përmenden çfarë dështoi, çfarë u fsheh, e çfarë ndryshoi krejtësisht. Asgjë nuk u duk nga programi, veç e kundërta e tij.
Atëherë, populli ka të “drejtën e Zotit” që të dalë në kërkim të qeverisë. Të dalë dhe të kërkojë përballje me qeverinë. Fillimisht përballje do të thotë që populli i dukshëm dhe qeveria e fshehur të shihen sy më sy, t’i thonë njëri-tjetrit “Cili jam unë e cili je ti”. Aty le të vendosë populli nëse e pranon qeverinë; sepse qeveria nuk ka asnjë shans që të shtrojë çështjen për të mos pranuar popullin. Në përballje ka veç një fitimtar.
2.
Është koha për përballje.
Jo më kot mijëra njerëz, mes tyre popull i thjeshtë dhe pastaj politikanë, analistë, mendimtarë, etj., po përkrahim mendimin e Sali Berishës, kryeministër i Republikës deri në shtator 2013, se populli duhet të marrë në dorë të drejtën e vet për përballje. Kjo mund të bëhet sa kohë që populli mund të qëndrojë më këmbë. Se po u gjunjëzua populli, atëherë flasim për post mortum. Populli ynë është gjunjëzuar për gati gjysmë shekulli. Nuk po them se tani do të kthehet diktatura komuniste, por gjunjëzimi po vjen ndryshe. Po vjen, sipas analistëve dhe mendimtarëve perëndimorë, si korrupsion, si një mafie e re komuniste. Kësaj here populli mund të gjunjëzohet nga dy faktorë shumë njerëzorë: Nga uria dhe nga sëmundja! Uria ka kapluar mijëra e mijëra. 400 mijë familje jetojnë në varfëri ekstreme, me dy a tre dollarë në ditë për familje. Të tjerë janë të paregjistruar, por mund të jenë edhe pa dy dollarë. Deflacioni, që është gjendja ekonomike “rrasë për rrasë”, (dmth., nuk ke çfarë blen e nuk ke me çfarë blen), ka trokitur. Rreth 35 për qind e të rinjve janë pa punë. Në emigracionin e madh që ka përfshirë shtetet në luftë, Shqipëria renditet mes vendeve të para… Po të pritet më tej për përballjen, atëherë njerëzit nuk ngrihen dot më në gjunjë për shkak të urisë.
Pastaj edhe për shkak të sëmundjeve. Qeveria rrëmbeu fondet e kujdesit shëndetësor dhe i ktheu në Bono Thesari. Me çfarë do të blihen ilaçet? Po vijnë sëmundjet. Qeveria ka në plan që ta akuzojë popullin e vet si të infektuar nga sëmundjet venale. Nesër populli mund të deklarohet tërësisht i sëmurë mendor, nga sifilizi, nga marrëzia ose nga lebra, etj. Atëherë qeveria nuk mban më përgjegjësi; askush nuk ka përgjegjësi përballë sëmundjes venale… Po të mos përballet populli sa kohë nuk ka ndodhur sëmundja totale venale, atëherë kurrë më nuk mund të përballet. Populli kërkon zgjidhje, dmth., përballje me qeverinë sa kohë është në gjendje që ta bëjë këtë.
3.
Tani është momenti i përballjes, prandaj edhe zuri vend kërkesa e kryeministrit të Republikës (2005-2013) për t’u përballur me qeverinë. Sepse sapo ka filluar të shfaqet akuza e qeverisë kundër popullit të vet sikur e ka zënë sëmundja e pashërueshme. Qeveria e ka shtuar dozën e akuzës kundër popullit të vet si i sëmurë. Para dy ditësh kryeministri akuzoi popullin si “dembel e të paaftë për punë”. Më herët e kishte akuzuar si “popull qorr”, dmth., i infektuar nga sindroma shogren. Akoma më herët e kishte akuzuar popullin e vet si “popull budalla” që voton për tjetrin. Akoma më herët e ka quajtur popull “dele”. Në veri të vendit, ku përqendron neverinë më të madhe deklaroi se, “këtu më neveritet atdheu”…
Veç një popull që nuk përballet, veç ai e duron fyerjen në masë. Rreziku i fyerjes në masë është shumë i madh. Sepse kur fyen në masë makina shtetërore, jo veç fyen në masë, edhe fajëson e dënon në masë. Siç na ka ndodhur para 25 vjetësh. Nga ana tjetër, veç një qeveri që nuk përballet me popullin, mund të guxojë të fyejë në masë.
Atëherë duhet përballja. Duhet të zgjidhet çështja mes dy palëve, mes popullit dhe qeverisë. Njëri duhet të fitojë, të dy nuk mund të jenë fitimtarë.
4.
Nuk është e thjeshtë kjo që ndodh, që qeveria fyen në masë. Disa djem e vajza, pardje e quajtën kryeministrin “Arrogant” dhe i vunë një pankartë me këtë fjalë para hotelit 15 katësh. Mirëpo sjellja e kryeministrit nuk është thjesht arrogancë. Nuk e dëgjuat kryeministrin si u përgjigj? “Bëni votat-tha-dhe pastaj ejani” të përballemi! Këtu u duk gjithë strategjia antipopullore e qeverisë. Domethënë qeveria mbahet mbi votat e popullit që i paska marrë me shumicë! Domethënë, qeveria përballet me popullin në emër të popullit!… Prandaj duhet bërë e qartë, duke u përballur populli me qeverinë, dmth., të qërohet çështja cili është populli e cila qeveria. Të rinumërohen edhe votat që qenkan dhënë një herë e një kohë, para se të veprohet kundër popullit.
Qeveria e quan prapë popullin “të marrë”. Sepse i mori votat dhe i thotë se “ti popull nuk ke vota”. Pas kësaj qeveria po i vjedh gjithë pasurinë dhe po e lë lakuriq. Domethënë po e quan popull me sëmudje venale dhe po e rrjep nga gjithçka ka.
Në qoftë se do të pritet edhe më gjatë, atëherë populli nuk do të ketë më aftësinë e përballjes. Prandaj u tha se përballja duhet tani.
… Çudi. Këta nuk dinë çfarë bëjnë, as çfarë thonë.
Këta nuk ia japin vetes shansin që të përballen, dmth., të shtrojnë kartat mbi tavolinë dhe loja të nisë nga e para. Ka ardhur momenti kur çështja do një konkluzion e një përfundim.
Përballja bën të mundur më të mirën.
Pa kacidhe
Edison YPI
Nuk jam aq perfekt sa mbahem. Edhe kam gabuar. Kam dhënë kontribute për forcimin e regjimit të kurvit dhe kalitjen e diktaturës së proletariatit. Në Politeknikum, kur isha 17 vjeç, punova me imagjinatë dhe kreativitet në stilin MFM “Me Forcat e Mia” për të prodhuar një torno në ofiçinën e shkollës, të cilën e quajtën MFT “Me Forcat Tona”. Kjo ishte e para, por jo e vetmja, rropatje që bëra për të mos më ngordhur delli i kreativitetit brenda diktaturës së proletariatit
Ushtar në Vlorë. 19 vjeç. Duke u menduar si të mos bëja roje me pushkë dhe helmetë, por të vazhdoja të isha Zog i Qiejve brenda një reparti ushrarak kurvist, nuk e ndala kreativitetin.
Avionë të vegjël mësimorë vërtiteshin dhe bënin kollotumba nga Sazani në Kaninë. Këta mistreca, njëri prej të cilëve gjatë një kollotumbe ra në det, i rrëmbeja me radhë në mënyra të ndryshme nëpër ëndërra dhe arratisesha.
Bëra mullinj kafeje me gëzhojat e topave kundërajrorë 37 milimetra. Pse u duheshin mullinj kafeje atyre që s’kishin kafe?! Këtë as sot nuk e di.
Pas mullinjve të kafes pa kafe, më erdhi një rast për kreativitet serioz. Oficerat bënin qitje me kobure mbi disa tabela që dukeshin e zhdukeshin, duke ua rrotulluar bishtin një ushtar që rrinte fshehur në një gropë në tabelë. Për çdo tabelë nga një ushtar dhe nga një gropë, plus nervozizmi i oficerave që u bërtisnin ushtarëve të strukur në fund të gropës që me zor dëgjonin urdhërin për rrotullimin e tabelës, këtyre vështirësive u duhej bërë derman. Vajta tek fabrika e çimentos. U hoqa disa kamionëve të dalë jashtë përdorimit elektromagnetat e motorinove. Bëra tabela qitje me bisht metalik dhe bazament. Në fundin e bishtave të tabelave vura nga një levë të shkurtër. Një kapterr shtypte butonin për të lëshuar korentin. Magneti tërhiqte levën. Leva rrotullonte tabelën, voilaaaaaa oficerat e vrërët qeshën frikshëm nga qefi që tash e tutje do ta çponin më kollaj me plumba surratin mbi tabelë të revizionistit më të rrezikshëm të botës, Brezhnjevit.
Avionët armiq nuk u çfaqën kurrë mbi Vlorë. Pak kilometra më tutje mbi det gumëzhinte korridori ajror ndërkombëtar. Avionët shfaqeshin si pikëza mbi ekranin e radiolokatorit. Pse të mos shfaqeshin ato pikëza jo vetëm brenda radiolokatorit, por edhe në një vend që t’i shihnin të gjithë ?! ishte pyetja që ja bëra një kapterri. Kapterri ja tha komandantit. Komandanti përmes kësaj pyetje zbuloi arsyen pse prej ca kohësh nuk ndjehej mirë me shëndet, i krruhej kurrizi, i ishin skuqur sytë, i buçisnin veshët. Dha urdhër të prerë të bëhej urgjent diçka në atë drejtim. U mendova disa netë me sytë në tavanin e kapanonit. Dhe ju futa punës. Ndërtova një tavolinë katrore 2 metra me 2 metra të mbuluar me pleksiglas që dikush e quajti “planshet”. Në qëndër të planshetit-hartë ishte vendi ku ndodhej bateria kundërajrore, rretheqark Vlora ndarë në kuadrata. Solla një kabëll nga radiolokatori. E lidha kabllin me dy elektromotora të vegjël të quajtur “selsina” që punonin me impulse që i merrnin nga radiolokatori. Njërin nga selsinat e vura të lëvizte një akrep të madh të padukshëm nën pleksiglasin e planshetit. Tjetrin e bëra të afronte dhe largonte mbi akrep një dritëz të vogël i vetmi element që dukej nga lart mbi planshet. Para se mrekullia që do çudiste botën të inaugurohej, ndodhi një incident. Dola një pasdite te rruga transballkanike i hipa një Skode dhe u nisa të iki në shtëpi, pa leje. Te ura e Rrogozhinës Skodën e ndali policia pak para mesit të natës. Më kthyen në Lushnjë. Më plasën në një dhomë bosh në një repart ushtarak. Ndoshta ishte burg ajo dhomë, por s’dua ta quaj të tillë se s’jam aq trim. Me t’u zbardhur, kapërceva murin e repartit. Dola te kthesa e Beratit. Gjeta një makinë. U ktheva në Vlorë. Për një ikje të tillë para disa muajsh një ushtar shijaks e kishin rrasur në burg. Mua jo. Sepse u duhesha. Ende s’kisha mbaruar planshetin. Rrezikohej inaugurimi për të cilin tashmë ishte vënë në dijeni komanda në Tiranë. Komandanti i repartit, një Cane që kishte qënë në Bashkimin Sovjetik, e kaloi këtë incident duke më bërë mua një Sarisaltik, një Shën Naum, që bën hapa kilometrikë. Gjatë një rreshtimi mëngjezor tha Cania për mua; Një këmbë në Rrogozhinë, një në Lushnjë, një në Fier, hop në Vlorë. U zgërdhinë. Incidenti u mbyll. Në inaugurim erdhi Komandanti i madh me mustaqe si të Stalinit. Më thanë ta prezantoj planshetin. S’më dolën fjalët. I dha dum një tjetër.
Pas ushtrie më dhanë të bëj një coptues të ashklave të makinave metalprerëse. E bëra. Kaluan ca muaj, dikush solli një revistë ku tregohej një coptues italian me përmasat kryesore. U mahnita nga përputhja e përmasave dhe proporcioneve të coptyesit tim me coptuesin italian.
Bëra dhe një pompë betoni, një pedanë fasade, si dhe adaptova mbi tre të katërtat e një vinçi italian gjysëm toni.
Vazhdova me kreativitete të tjera në ndërmarrjen e asfaltimit të rrugëve.
Makineritë e asfaltobetonit ardhur pas lufte nga Rusia ishin katandisur mos më keq. Përzierjen asfaltike e përgatisnin me tahmin. J’u futa të bëj një dozator preciz të bitumiti të lëngshëm të nxehtë. E bëra me shumë qef. Pasi e kisha mbaruar, drejtori, një korçar i poshtër me mbiemrin Trebicka, u ngrit e tha në një mbledhje; Pse u kujtua tani ky Edison Ypi për këtë shpikje dhe nuk e bëri më parë?!
Bëra dhe të tjera mrekullira; tymthithës, djegës solari, dozator granili, coptues të rërës bituminoze që nuk coptoi gjë se para se të fillonte të coptonte coptuesi, u coptua sistemi.
E mbajta gjallë kreativitetin.
E ç’e do që e mbajta gjallë. Më mirë ta kisha vdekur. Atëhere zgjata jetën e diktaturës me hekura. Tani po zgjas agoninë e demokracisë me shkrime. Gabova në të dy kohërat. Punova badihava. Me kreativitet. Pa kacidhe.
Ministri britanik: Krizë në BE? Prisni kur të anëtarësohet edhe Shqipëria
Vazhdon që të përdoret Shqipëria nga zyrtarët britanik si një fenomen i keq për të bindur qytetarët për të votuar pro daljes nga Bashkimi Europian. Në një shkrim për “Daily Mail” Sekretari britanik i Drejtësisë thekson, se BE do të bëhet dhe më keq me anëtarësimin e Shqipërisë.
Ashtu siç ishte parashikuar nga “Financial Times”, Shqipëria po vazhdon që të përmendet dhe më shumë në Britaninë e Madhe. Kësaj here është një replikë që Sekretari britanik i Drejtësisë, Majkëll Gove, i bën kryeministrit shqiptar Edi Rama për deklaratat në lidhje me përdorimin e modelit shqiptar për fushatën “Brexit”.
Në një shkrim për “Daily Mail”, Gove thekson se modeli shqiptar duket si një novelë e John le Carré, me një histori të politikës intriguese, shuma të mëdha parash që shkojnë në rrugë të gabuar, kriminalitet dhe marrëveshje të dyfishta. Por sipas tij, modeli shqiptar nuk është një lexim vetëm fantazi, por është një fakt diplomatik.
Gove thekson se, me taksat e britanikëve, qeveria angleze do t’i japë BE rreth 2 milionë paundë deri në 2020 për të financuar vende aspirant si Shqipëria që pretendojnë të hyjnë në union.
Sipas Sekretarit të Drejtësisë britanike, anëtarësimi i vendeve si Shqipëria në BE do të jetë një gabim i madh, pasi do të fillojnë dyndjet e shqiptarëve në vendet e Europës dhe sidomos Britanisë. Gove nënvizon se me ardhjen e shqiptarëve në Mbretërinë e Bashkuar do të sjellin me vete problem si korrupsioni, krimi i organizuar e deri tek terrorizmi. Ai bën të ditur se 10% e të burgosurve në BE janë nga Shqipëria, ndërsa thotë se vetëm këtë vit janë arrestuar rreth 20 gangsterë shqiptarë që drejtojnë banda droge në Mançester.
Më 23 qershor Britania do të zhvillojë një referendum për të qëndruar ose jo në Bashkimin Europian. Pjesë e debatit për fushatën pro dhe kundër daljes nga BE është bërë dhe Shqipëria, ku thuajse asnjëherë nuk përdoret në mënyrë pozitive.
Mediu: Çdo gjë për të garantuar votën e lirë
Kryetari i Partisë Republikane, Fatmir Mediu, bashkë me anëtarë të Kryesisë zhvilluan një takim me strukturat e kësaj partie në rrethin e Shkodrës. Në këtë takim, zoti Mediu dhe drejtuesit lokalë, diskutuan mbi gjendjen e rëndë ekonomike dhe politike në vend. “Shqipëria është zhytur në një krizë të rëndë ekonomike me pasoja afatgjatë dhe sociale të rënda për familjet dhe biznesin shqiptar. Shteti i pretenduar ligjor është zëvendësuar me krimin e lidhur me pushtetin që gjobit biznesin, reformat janë vetëm koncesione me paratë publike për përfitime korruptive. Largimi i bizneseve dhe kapitaleve dhe mungesa e klimës për investime janë alarm për Shqipërinë”, theksoi zoti Mediu gjatë këtij takimi. Gjithashtu, duke u ndaluar në aksionin politik të së djathtës, zoti Mediu shprehu bindjen se një qëndrimi i unfikuar i opozitës, me synim garantimin e zgjedhjeve të lira dhe të ndershme, duhet të jetë prioriteti parësor për partitë e djathta. “Përballë kësaj situate opozita duhet të unifikohet dhe bashkohet me shqiptarët në rrugën për të ndërtuar shtetin e së drejtës, i cili bazohet në zgjerimin e lirive dhe uljen e taksave, respektimin e pronës private. Bashkëpunimi me biznesin, rininë, të përndjekurit dhe pronarët janë rruga e suksesit të opozitës. Qeveria e pazareve PS-LSI apo prishja e pazareve të tyre nuk mund të jenë shpresa e së djathtës. Reforma zgjedhore dhe vetëm reforma zgjedhore, garantimi i zgjedhjeve të lira dhe të ndershme është detyra Nr.1 e opozitës, prandaj nuk mund të humbasim asnjë çast për të garantuar votën e lirë nëpërmjet votimit dhe numërimit elektronik si dhe t’i japim të drejtën votuesve të gjykojnë me votë se kush duhet të jenë deputetët në Kuvend. Unë shpreh bindjen time të palëkundër se Partia Republikane do të ketë deputetin e saj në Shkodër”, nënvizoi kryetari republikan.
Korrupsioni dhe keqmenaxhimi kanë futur shëndetësinë në kolaps
“Centralizmi shtetëror, korrupsioni, keqmenaxhimi, mungesa e vizionit, kanë futur shëndetësinë në kolaps”, u shpreh deputeti i PD, Tritan Shehu gjatë prezantimit në Vlorë të platformës së PD për Shëndetësinë. Në një njoftim për shtyp të PD thuhet se, Departamenti i Shëndetësisë në Partinë Demokratike bëri publike dhe debatoi platformën me mjekë dhe specialistë në qytetin e Vlorës. “Shëndet dhe dinjitet”, ishte moto e prezantimit të Platformës së Shëndetësisë në tryezën në të cilën ishin të pranishëm profesionistë të fushës së shëndetësisë, Shoqëri Civile dhe drejtues të PD-së në Vlorë.
Në fjalën e tij kreu i Departamentit, Tritan Shehu, tha se sot vendi përballet me një sistem shëndetësor në të cilën nuk respektohen të drejtat e qytetarit për shërbim bashkëkohor dhe nuk mbrohet dinjiteti i personelit shëndetësor.
“Kemi një sistem shëndetësor ku dhe depozitat shëndetësore të qytetarëve në Fondin e Sigurimeve “sekuestrohen” nga shteti për të mbushur deficitet e tij, në vend që këto 25 milionë dollarë të investohen për përmirësimin e shërbimit”, tha Shehu.
Më tej ai shtoi se, në shërbimin tonë nuk programohet e financohet për specializimet, kualifikimet e personelit, për ngritjen e tij shkencore, e cila është bazë e dinjitetit profesional, për hapjen e shërbimeve të reja etj.
Karakteristikë e sistemit tonë është “varfëria falas” e tij, centralizmi shtetëror, keqmenaxhimi, mungesa e vizionit zhvillues, theksoi Shehu. Ai shtoi se, duke e vendosur në qendër të sistemit pacientin e qytetarin, duke konsideruar thelbësor rolin e vlerat e personelit, ne mund t’i japim shoqërisë e kolegëve tanë atë që është thelbësore: Shëndet e dinjitet për të gjithë.
OSHEE mbifaturime të energjisë për qindra banorë në Elbasan
Qindra banorë të Elbasanit ankohen për faturat e energjisë elektrike. Ata pretendojnë se janë mbifaturuar dhe në sportelet e OSHEE-së askush nuk u jep zgjidhje. Faturat e energjisë elektrike për disa banorë janë shumë të frikshme. Kjo i ka revoltuar banorët e Elbasanit. Eshtë shumë i lartë numri i atyre që kanë ngritur ankesat pranë zyrave të OSHEE, por askush nuk përgjigjet për dyfishimin e vlerës së faturuar.
Zemërimi kolektiv në Elbasan shikohet edhe pranë sporteleve. Ka prej tyre që fatura u ka ardhur me shuma marramendëse. Një invalid thotë se ka qenë për kurim në spital jashtë Shqipërisë, por fatura e energjisë i ka ardhur për tre muaj me një vlerë një milionë e 25 mijë lekë. Ai është detyruar ta paguajë, sepse i janë ndërprerë dritat. Invalidi shprehet se ka shpresuar se zgjidhja do të vinte më pas, por në asnjë zyrë nuk i kanë dhënë zgjidhje.
Qytetarët e zemëruar në Elbasan janë shumë. Pranë tyre shkoi edhe deputeti i Partisë Demokratike Luçiano Boçi. Ai tha se, situata në Elbasan është dramatike. Boçi, thonë se përgjigja që marrin është se duhet të paguajnë faturën, dhe më pas t’u shqyrtohet ankesa. “Ka qytetarë që kanë mbifaturim disa muaj”, thotë Boçi.
“Benzi” bie në liqenin e Shkopetit, dy të vdekur dhe dy të plagosur
Një aksident i rëndë ka ndodhur mesditën e djeshme në aksin rrugor Burrel-Peshkopi. Sipas burimeve, një makinë tip “Benz” me targë AA 923 FH ka dalë nga rruga dhe ka përfunduar në liqenin e Shkopetit, ku si pasojë kanë humbur jetën dy persona dhe janë plagosur dy të tjerë.
Burimet policore bëjnë me dije se makina ka rënë në afërsi të tunelit të Shkopetit, duke shkaktuar vdekjen e dy pasagjerëve dhe plagosjen e 2 të tjerëve. Sipas informacioneve që përcjell policia, në automjet udhëtonin 3 vëllezër dhe kushëriri i tyre. Ndërkohë, nga aksidenti tragjik kanë humbur jetën një nga vëllezërit, Afrim Rexhepi dhe kushëriri, Fitim Nelku, ndërkohë janë plagosur Artan dhe Ajet Rexhepi.
Të plagosurit u transportuan për në Spitalin e Laçit. Po sipas këtyre burimeve, të aksidentuarit po ktheshin nga puna, pasi ishin punëtorë ndërtimi në Shupenzë. Me të marrë informacionet në vendngjarje shkuan autoambulanca nga Burreli dhe forca të policisë së Burrelit, Laçit dhe Lezhës.
Nëpërmjet një njoftimi për shtyp, policia bëri të ditur se, më datë 30.04.2016, rreth orës 13.30 është njoftuar se në rrugën Milot-Burrel, në vendin e quajtur tuneli i Shkopetit në dalje, një mjet “Benz” me targa AA 923 FH ka humbur kontrollin dhe ka dalë nga rruga. “Në mjet po udhëtonin 3 vëllezër dhe kushëriri i tyre banues në Sukth Dibër. Si pasojë kanë mbetur të vdekur shtetasit: Afrim Rexhepi e Fitim Nelku. Kanë mbetur të plagosur dhe ndodhen në spital nën kujdesin e mjekëve: A.R. A.R. Këta shtetas janë punëtorë ndërtimi në Shupenzë Dibër ku kanë qenë duke u kthyer nga puna”, citohet në njoftimin e policisë.
Basha: ERE përgënjeshtroi Ramën, pranoi rritjen e çmimit të energjisë
Rama deklaroi se shqiptarët paguajnë fatura më të ulura energjie se më parë dhe e kundërta është propagandë e opozitës që i do të keqen. Por të dhënat e veta zyrtare e nxjerrin si shpeshherë zbuluar kryegënjeshtarin e Ballkanit. Sipas ERE 56% e familjeve kur çmimi i energjisë ishte përshkallëzuar për 300 kilovatët e parë paguanin 7.7 lekë për kilovat e sot paguajnë 9.52 lekë për kilovat. Çmimi mesatar po kështu kaloi nga 8.89 në 9.52. Qytetarët që paguajnë faturën e dinë më mirë se askush të vërtetën për faturën e energjisë. Ne jemi përditë me ta dhe pranë tyre dhe shohim e dëgjojmë përditë mbi faturat e kripura të energjisë. Edhe kokoshi 200 milionësh e di fare mire se po gënjen, por nuk ja ndjen fare, nuk i bëhet më vonë. E ka mendjen të mbushë xhepat dhe jo të qeverisë. 2.2 mld euro të vjedhura në 2 vjet, 90 milionë dollarë shpenzime luksi për qeveritarët, ndërsa shqiptarët mezi sigurojnë bukën e gojës. Ora po vjen e llogaridhënies me votë për mashtrimet e tij. Ne do të ulim çmimin e energjisë për ata që konsumojnë deri në 300 kw, buxheti i shtetit do të paguajë për familjet në ndihmë ekomomike faturën e energjisë deri në 200 kw dhe atë të ujit, me miliardat që sot shkojnë për zyra dhe “Jaguarë”, Koço, Papulë, Nushë dhe Carapulë.
Bregdeti i Jugut mbillet me ndërtime të paligjshme nën komandën e Kokëdhimës
Drejtuesi i Departamentit të Mjedisit në Partinë Demokratike, Jamarbër Malltezi, denoncoi abuzimet me ndërtimet pa leje në bregdetin e Jugut, të cilat kanë hyrë deri në det.
Nga Porto Palermo, Malltezi bëri publike shkatërrimin mjedisor që i bëhet bregdetit me ndërtime abuzive dhe të paligjshme.
“Këtu jemi në një zonë bregdetare, në një zonë të ndjeshme mjedisore dhe ligji duhet të jetë i njëjtë për të gjithë. Për fat të keq ne mund të shikojmë një lokal që po bie brenda në det. Jo vetëm që nuk po mban distanca, por po bie i gjithi në det, ndërtuar nga Koçot e pushtetit. Kjo është dyfytyrësi, ky është standard i dyfishtë në zbatimin e ligjit. Ligji normalisht duhet të jetë i njëjtë për të gjithë dhe nuk mund të jenë disa të favorizuar e disa të nëpërkëmbur”.
Ndërsa në një prej perlave të bregdetit shqiptar, në Qeparo, Malltezi denoncoi ndërtimin e deputetit të PS-së, Koço Kokëdhima, i cili është jashtë çdo kriteri ligjor dhe urbanistik.
“Jemi sot në Qeparo, në të cilin dyfytyrësia e qeverisjes është akoma më evidente. Për fat të keq qytetarëve edhe në majë të malit ose në mes të Tiranës u prishen shtëpitë e tyre, qoftë edhe të trashëguara, ndërkohë që lejohen ndërtime të paligjshme siç është rasti konkret i denoncuar me dhjetëra dhe qindra herë ndaj deputetit Koço Kokëdhima. Këtu shkelen disa ligje njëherësh. Ne kemi bërë denoncimin në Prokurorinë e Përgjithshme në të cilën kemi 10 ligje dhe 2 plane urbane, të cilat dhunohen nga deputeti Koço Kokëdhima. Për fat të keq kemi 1 miliard e 850 milionë lekë nga taksat tona që shfrytëzohen për t’i bërë një Lungomare vetëm Koço Kokëdhimës dhe askujt tjetër. Përse, kështu duhen shpenzuar paratë e taksapaguesve shqiptarë? Dhe po të shikojmë ky investim tjetër që bëhet, është për t’i bërë fresk sarajeve të Koços, por gjithashtu cenon edhe një ekosistem me vlera të mëdha mjedisore siç është ligatina e Qeparoit. I kanë vendosur një barrierë të pakapërcyeshme me tel gabion dhe gurë ligatinës së Qeparoit. Në çdo vend të botës, ligatinat janë ekosisteme shumë të rëndësishme, janë shumë sensitive, të cilat shërbejnë qoftë për shpendët migratorë, qoftë për botën e gjallë dhe duhej të ishin një objekt me shumë interes për turistët e zonës. Për fat të keq këtu thjesht vetëm nga interesat e Koços i gjithë shteti shkel ligjin dhe shpërdoron taksat tona. Vetëm për t’i bërë fresk z. Koço Kokëdhima. Kjo është një mënyrë tjetër e dyfytyrësisë së pushtetit e standardeve të dyfishta që po përdor kjo qeverisje e sotme”, tha Malltezi.
Kryesore
Continue to the category
