Rama ka hyrë si Kryeministër në Shtëpinë e Bardhë dhe ka dalë si kryeopozitar. Ka hyrë si lideri i rilindjes dhe ka dalë prej saj si votues i Bashës. Se për çfarë është biseduar është e vështirë të konstatosh, sepse janë bërë publike vetëm njoftimet e pabesueshëm të zyrës së shtypit të Ramës, pasi Shtëpia e Bardhë nuk ka postuar asnjë foto zyrtare dhe asnjë njoftim në lidhje me këtë takim deri në orët e para të mëngjesit të sotëm.
Menjëherë pas daljes nga Shtëpia e Bardhë përmes frazave haluçinante, Rama pohonte se do të votonte Bashën nëse do të ishte alternativë përballë Trumpit! Çfarë e ka bërë Ramën të jetë fiksuar aq shumë pas Bashës pas takimit në Shtëpinë e Bardhë, kjo pritet për t’u parë gjatë ditëve të ardhshme. Ajo çfarë u pa në atë intervistë të shkurtër për “Zërin e Amerikës” nga Rama ishte se ai nuk po fliste më si Kryeministër.
Deklarata e shpërndarë nga zyra e kryeministrit për takimin në Uashington ka një distancë të madhe nga fokusi i problematikës së qytetarëve shqiptarë që u shpreh një ditë më parë në raportin zyrtar të Departamentit Amerikan të Shtetit për lirinë dhe të drejtat njerëzore, ku Shqipëria përshkruhej me notat më të zeza për degradimin e demokracisë, korrupsionin dhe krimin e organizuar që kontrollon çdo nivel të qeverisjes. Deklarata e qeverisë na turpëron kur mendojmë se si një lolo-kryeministër përfaqëson sot shqiptarët dhe takimin më të rëndësishëm të jetës së tij e pasqyron sikur të jetë takuar me Shullazin.
Vëmendja dhe angazhimi i qeverisë amerikane për Shqipërinë dhe shqiptarët është gjithnjë në pritshmëritë që ka kombi ynë, ndaj ata janë të hapur, të drejtpërdrejtë dhe të sinqertë kur i qasen problemeve që ka vendi ynë. Një kosh basketbolli, mësimi i historisë së fesë në shkolla, apo të shash kandidadin republikan, nuk është axhenda amerikane në Shqipëri dhe as interesi jetik i shqiptarëve kundrejt Shteteve të Bashkuara të Amerikës.
Çdo lider normal shqiptar që do të vizitonte SHBA do të kërkonte investime për të mëkëmbur ekonominë e rrënuar nga korrupsioni dhe taksat, ndihmë ushqimore për të ushqyer mbi 1 milion e gjysëm shqiptarë që janë mbërthyer nga uria, ndihmë për t’u anëtarësuar në BE, mbështetje më të madhe për Kosovën, ndihmë për të modernizuar shërbimet publike, policinë, drejtësinë, ushtrinë dhe gjithçka tjetër që po shkatërrohet mjeshtërisht nga oligarkët në pushtet. Por, Raporti i Departamentit Amerikan të Shtetit, i shpërndarë një ditë para se Rama të shkelte Shtëpinë e Bardhë, na ka shpjeguar hollësisht se ky kryeministër dhe kjo qeveri është burimi i fatkeqësive që ka pllakosur vendin.
Interesante janë intervistat që Rama dha para dhe pas takimeve në Shtëpinë e Bardhë. Kur hyri foli si “partneri” që hartonte fjalime të denja për oborrin, por kur doli tha se do të ishte votuesi i liderit të Partisë Demokratike, Lulzim Bashës. Duket se subkoshienca e Ramës prej lideri suprem, i ka thënë se ky është edhe takimi i lamtumirës, para se të largohet nga pushteti.
Revoltat spontane popullore që kanë shpërthyer në çdo cep të Shqipërisë dëshmojnë një pakënaqësi deri në armiqësi që shqiptarët po krijojnë ndaj kësaj qeverie.
Abuzimet dhe skandalet e qeverisë, largimi masiv i biznesit të huaj, mbyllja e qindra mijëra vendeve të punës, barra e rëndë fiskale ndaj biznesit të vogël dhe braktisja e fermerëve nga qeveria kanë nxjerrë gjithnjë e më shumë njerëz në protesta para zyrave të shtetit, duke bllokuar rrugët e qyteteve dhe akset nacionale. Përshkallëzimi i betejës së opozitës drejt një mosbindjeje civile po tejkalohet nga qytetarët që mllefin dhe pakënaqësinë e tyre po e shprehin në forma të drejtpërdrejta të përplasjes fizike me pushtetin dhe strukturat e ndëshkuese që qeveria ka mobilizuar për të grabitur dhe terrorizuar qytetarët.
Ajo çfarë ka mbetur nga vizita e kryeministrit Rama në SHBA është “beteja” e tij heroike me kandidatin republikan Donald Trump, që ngjante si varianti modern i luftës së Don Kishotit me mullinjtë e erës.

rben Shahini

Banorët e Dumresë janë jo vetëm të zhgënjyer nga qeveria Rama, por dhe në situatë ekonomike tepër të vështirë. Jo vetëm nuk kanë përfituar asnjë subvencion nga qeveria, por rritja e çmimeve të imputeve bujqësore, energjisë etj., si dhe rënia e fuqisë blerëse e pamundësia e eksportit i ka zhytur në borxhe duke ua pamundësuar punimin e tokës këtë vit.
Fermer: Paratë e duhanit s’po na i japin.
Basha: Paratë e vitit të kaluar?
Fermer: Po.
Basha: Me sa e shitët vitin e kaluar?
Fermer: Pak më, me 2500. Çmim shumë i ulët. Qeveria na kishte premtuar 6 mijë lekë për kile.
Fermer: Të gjithë këto serra janë në borxhe, në borxhe komplet. Komplet në borxhe, komplet të falimentum. Kur të vish në korrik ti, do të llafosim bashkë. Sa serra do të gjesh të mbjella? Sepse nuk do të kenë më lekë të marrin fidanë. Nuk ia jep ai, bjeri lekët e vjetra të jap të rejat.
Basha: Problemi këtu është korrupsioni sepse në qoftë se taksat merren dhe kthehen në rrugë të reja, në ujësjellës, në kanalizime, në vaditje, në kullim apo subvencione për bujqësinë ju do t’ia shihni hajrin. Ne kemi vendosur të investojmë në fshatin shqiptar 150 milionë euro në vit. Si do të investohen? 50 milionë në vit do të investohen për infrastrukturën. Rrugë janë bërë, por s’kanë përfunduar. Vaditja, kullimi, ka zona ku nuk është vënë dorë në këto 2 vite e gjysmë, ka zona ku nuk është vënë dorë 10 vjet. Ne do të ndërtojmë një skemë subvencionimi që t’i vijë çdo familje fermeri në ndihmë. I vetmi kriter do të jetë, e punon apo s’e punon tokën? Ke apo nuk ke blegtori? Ju do të jeni në gjendje të shisni pa NIPT, por me kartë identiteti dhe pa kartë fermeri. Sepse karta e fermerit dhe NIPT-i janë instrumente të fshehta për të shkatërruar tregun.
Basha ka bashkëbiseduar me banorë të Belshit. Në shtëpinë e z. Aqif Merko, Basha u njoh me problemet që ka zona, ku kryesisht ishte papunësia.
Në takim me banorët e Belshit ata shprehën shqetësimin për korrupsionin e madh në polici, në OSHEE e kudo. Pa dhënë ryshfet s’mbaron dot punë, thanë banorët.
Fermer: Marrin asistencë 3-4 vetë në një familje. Një që është nevojtar nuk merr, ai që s’ka gjë fare.
Banor: E dinë të gjithë këta burra që unë kam 26 vjet që kur ka dalë Partia Socialiste mbrapa, mbrapa, mbrapa. Sot njerëzit nuk kanë bukë të hanë, o zotëri! Ka mbi tre javë ai kamioni që nuk është nis. Hera e para që po niset sot. Kam përzënë mbi 20 veta, vijnë njerëzit duan pllaka për të shtruar, të shkretit. E kemi keq me policinë, duan këtë, duan atë. Tjetri i jep 500 mijë lekë, 200 mijë lekë, 300 mijë lekë. Vendi më i korruptum.
Banor: Më vijnë dy burra me një palë gërshërë, vijnë të prisnin dritat. Ku vini ju? Do të presim dritat. I kam paguar unë ore, i kam paguar 69 mijë lekë dy muaj. E s’kam qenë këtu, kam qenë te çunat në Itali. Po megjithatë meqenëse është shkrujt, se ata nuk e shkrujnë kot, shif sahatin. Kemi urdhër më thanë. Si ore urdhër të më prisni dritat që i kam pagu.
Ndonëse politikat sociale zënë një vend të rëndësishëm në programin e Partisë Demokratike, Lulzim Basha thotë se kjo nuk është zgjidhje për varfërinë. Sipas tij, zgjidhja është nxitja e investimeve, lehtësive për biznesin që të hapen vende pune. “Ta shporrim me votë këtë kastë oligarkike që e provoi, jo vetëm që s’mbante premtimet, por kishte vetëm një qëllim, të pasurohej për vete”, theksoi Basha.
Basha: Ne do të shpenzojmë para për shtresat në nevojë. Sasia e energjisë elektrike deri në 200 kilovat dhe uji i përdorur nga familjet në nevojë do të financohet plotësisht nga buxheti i shtetit. E njëjta gjë për medikamentet, jo vetëm për familjet në nevojë, por edhe ata me status invaliditeti. Por kjo nuk është zgjidhja, të jemi të sinqertë. Shteti nuk mund të vazhdojë të rrisë faturën sociale, shteti duhet të punojë që të krijohen vende pune, që ekonomia të fillojë të xhirojë, që leku të fillojë të xhirojë dhe për këtë duhen masa radikale. Ulje taksash, investime publike të vërteta, jo falso, jo palma. Subvencionim të bujqësisë, ulje të energjisë elektrike dhe ky është propozimi për të cilin iu themi sot të gjithë shqiptarëve hajde të bashkohemi, dita e votimit nuk është larg. Ta shporrim me votë këtë kastë oligarkike që e provoi, jo vetëm që s’mbante premtimet, por kishte vetëm një qëllim, të pasuroheshe për vete e të kthejmë edhe një herë shanset për punësim, për mirëqenie, për prodhim në ekonominë shqiptare. Pra, në xhepat, në tavolinat dhe në familjet e Belshit, Dumresë dhe gjithë Shqipërisë.

Presidenti i Republikës, Bujar Nishani ka treguar arsyet që e çuan t’i bashkohej protestës së Shoqërisë Civile për ndërtimin tek Parku i Liqenit. Në një intervistë me gazetaren Desada Metaj për “Opinion”, Presidenti Nishani i bëri thirrje Prokurorisë që të nisë hetimet, pasi sipas tij për parkun po ndërhyn mafia e betonit. “Kundërshtarët më të egër dhe më të ashpër të atyre djemve dhe vajzave janë rrogëtarët e mafies së betonit në Tiranë. A mundem unë që si President i Republikës të trembem, kompleksohem apo të tërhiqem nga këto relacione, angazhime? Kurrsesi, përndryshe nuk do ta meritoj asnjë ditë qëndrimin tim në zyrën e Presidentit të Republikës. Prokuroria duhet ta hetojë, unë e denoncoj dhe ju siguroj do të vazhdojë ta denoncoj, pavarësisht nëse jam President apo qytetar i thjeshtë”, tha Nishani.
Presidenti Nishani tha më tej se, nuk ka mbështetur dhe nuk ka folur për akuzën penale dhe ligjore që kanë bërë qytetarët në Prokurori, por ka mbështetur kauzën e Shoqërisë Civile. “Unë kam mbështetur kauzën e tyre. Kauza e tyre shkon përtej aktit vandal që po ndodh tek Parku natyror i Liqenit. Me çfarë kam parë dhe reaguar unë, dhe ndihem mirë, në një situatë kur duket se shpresa ka humbur në Shqipëri, në një situatë kur duket se komuniteti dhe shoqëria është bërë inekzistente në Shqipëri, duket sikur fatalizmi po invadon çdo qelizë të mendjes dhe gjithë shpirtit shoqëror, tregoi që nuk është kështu, por ka vend për një lloj optimizmi, sepse pikërisht një grup djemsh dhe vajzash të reja absolutisht me vizion qytetar denoncuan një model, i cili është jo vetëm i vjetëruar, por dhe një model banal, një model, i cili mendon që do të imponohet përmes forcës së pushtetit, dhunës, instrumenteve, spekulimit, territ, asaj që ne kemi nevojë, emancipimit të shoqërisë. Ne kemi humbur shumë kohë në të shkuarën, duke qenë një vend i izoluar dhe ndoshta do të na duhet shumë e shumë kohë për të krijuar impaktin e një shoqërie, e cila e prezanton problemin dhe shqetësimin e saj në mënyrë të civilizuar dhe ne kemi shumë nevojë të emancipojmë shoqërinë dhe të krijojmë një model të ri.
Presidenti Nishani u shpreh se kauzën e Shoqërisë Civile nuk e sheh si një lëvizje politike, por një lëvizje qytetare. “Unë absolutisht nuk e shoh atë si një lëvizje të motivuar politikisht, por një lëvizje qytetare jo vetëm se vjen nga njerëz të painkuadruar në parti politike, por vjen nga njerëz, të cilët janë pedagogë në universitete, juristë, veprimtarë të Shoqërisë Civile, arkitektë të organizuar dhe të lidhur me njëri-tjetrin vetëm për shkak të kauzës që atë po mbrojnë dhe ka nisur një lëvizje, e cila po krijon një model të ri, të reagimit qytetar ndaj padrejtësive dhe për t’i thënë që në qytet, në Shqipëri, në komunitetin tonë, në këtë vendin tonë ata që zotërojnë pushtet nuk mund të jenë kurrë më të fuqishëm dhe të dhunshëm ndaj shoqërisë në tërësi. Qytetarët janë shumë e shumë më tepër se pushtetarët. Ata që duan emancipimin dhe zhvillimin e vendit janë shumë e shumë më tepër se sa një grup i vogël njerëzish që përfiton nga betoni. Pra, në këtë kontekst, unë mendoj që ajo lëvizje në një afat të mesëm në këtë vend do ta orientojë shoqërinë dhe shoqëria ka nevojë për mendimin intelektual, për mendje të tilla, për njerëz me kurajë, me guxim, që mund të duken pak në numër në një moment të caktuar, por jam i bindur që në një moment tjetër i bashkëngjiten ata që janë me mendjen dhe zemër sot atje dhe fizikisht dhe e udhëheqin shoqërinë në një model të ri. Ne kemi nevojë për një model të ri, për një model të qytetarisë edhe tek mënyra e komunikimit”, tha Presidenti Nishani.
Nishani iu përgjigj edhe pyetjes për gjuhën e përdorur nga kreu i Bashkisë Erion Veliaj ndaj Presidentit të Republikës. “A mundet që një i zgjedhur lokal t’i flasë Presidentit me një gjuhë të tillë të papranueshme? Nuk ka ndodhur kurrë më parë në Shqipëri, nuk ka ndodhur. Natyrisht, ajo është një çështje që reflekton formimin, kulturën, edukatën individuale, por reflekton nga ana tjetër edhe ambientin, i cili kultivon këtë mënyrë të sjelli dhe kontrasti i madh është me këtë pjesë tjetër të qytetarëve të Shqipërisë, të cilët qëndrojnë atje pavarësisht dhunës verbale, padrejtësisë së madhe sociale dhe shoqërore që u bëhet, qëndrojnë atje me dinjitet dhe kërkojnë të diskutohet, kërkojnë të qëndrohet dhe sillet në mënyrë të civilizuar për mënyrën që shqetësojnë sot qytetin e Tiranës apo gjithë qytetet e tjera në vend”, u shpreh Presidenti Nishani.

R.POLISI

Mazhoranca është tërhequr dje nga bllokimi i mandateve të deputetëve socialistë Leskaj dhe Suli, por nuk ka pranuar “dorëzimin” e mandatit të deputetit Armando Prenga, të akuzuar për veprën penale të plagosjes me armë zjarri, duke rrëzuar amendamentin e Partisë Demokratike për ligjin për dekriminalizimin. PS refuzoi dje në Parlament të miratonte amendamentin, i cili largonte Prengën nga Parlamenti automatikisht, duke i siguruar atij mandatin e deputetit.
Amendamenti i PD synonte që ligji për dekriminalizimin të përcaktonte si rast ndalues kur një zyrtar i lartë arrestohet në flagrancë për një krim kundër jetës. Ky amendament u hartua duke marrë shkas nga rikthimi në Parlament i deputetit Armando Prenga, që akuzohet dhe po gjykohet për plagosje me armë. Për anëtarët demokratë, kundërshtitë e mazhorancës për propozimin e tyre, por dhe deklaratat publike se ligji ka elementë antikushtetuesë, i cilësojnë si mungesë vullneti të hapur të mazhorancës për të respektuar dekriminalizimin. Mazhoranca i ka rrëzuar zyrtarisht tre kushtet e opozitës, të cilat ishin kushte për marrëdhënien e tyre me Kuvendin. Opozita vendosi marrëdhënie të kushtëzuara me Parlamentin duke kërkuar respektimin e vendimit të Gjykatës Kushtetuese për rastin e mandatit të deputetëve socialistë Rakip Suli dhe Valentina Leskaj, amendimin e ligjit për dekriminalizimin, duke synuar ndalimin dhe largimin nga funksioni publik i zyrtarëve që gjatë ushtrimit të mandatit kryenin vepër penale, si dhe mundësimin e funksionimit normal të komisioneve hetimore, duke eliminuar mundësinë e mazhorancës për të bllokuar punimet e këtij komisioni sa herë që hetohen afera apo pazare të qeverisë.
Mandatet e Leskajt e Sulit u mbajtën prej muajsh të bllokuara nga mazhoranca. PD i kërkoi Kuvendit dërgimin e tyre në Gjykatën Kushtetuese për shpalljen e tyre të papajtueshëm me Kushtetutën. Pavarësisht se shkelja është tërësisht flagrante nga pikëpamja kushtetuese dhe ligjore, përsëri mazhoranca në Këshill vendosi që t’i propozojë Kuvendit mosdërgimin e çështjes në Gjykatën Kushtetuese. Anëtarët e mazhorancës në Këshill, nuk dhanë asnjë argument të vlefshëm për të mbështetur propozimin e tyre. Dje mazhoranca u dorëzua duke pranuar kërkesën e PD. Suli dhe Leskaj rrezikojnë mandatin e tyre për shkak se kanë përfituar para publike përmes kompanive të tyre apo bizneseve të familjarëve të tyre. Në kalvarin e denoncimeve të tenderave, koncesioneve, milionat e shpërndara nga Edi Rama në rrethin e tij të ngushtë është përfshirë edhe deputeti Rakip Suli. OSHEE ka marrë me qira miliona lekë në muaj, një kat të godinës “Aurora Group”, biznes i deputetit Rakip Suli. Me porosi të Ramës, godina që ka në autostradën Tiranë-Durrës, “Aurora Group”, është marrë me qira nga OSHEE. Për një kat në këtë godinë, Rakip Suli, deputeti merr nga OSHEE miliona lekë në muaj. Ligji 9367, pika 1, e nenit 24, ndalon kontratat apo përfitimet me fondet publike edhe për familjarët e deputetit, fëmijët e tij madhorë, siç është në këtë rast me djalin e deputetit Suli. Në dhjetorin e kaluar, PD dorëzoi në Kuvend kërkesën për mbarimin e mandatit të deputetit Rakip Suli, pasi ky i fundit ka shkelur ligjin për konfliktin e interesit, duke përfituar fonde publike nga OSHEE. Kjo kërkesë vjen pas dy kërkesave të tjera, për Koço Kokëdhimën dhe Valentina Leskaj, që PD ka kërkuar heqjen e mandatit për shkak se kanë përfituar fonde publike. Janë miliona euro të përfituara nga kompanitë e bizneset e djemve të Valentina Leskajt, para këto të marra nga fondet publike. Sipas fakteve të parashtruara nga Grupi parlamentar i PD, nga verifikimi i procedurave të koncesionit për segmentin hekurudhor Fier-Ballsh dhe Fier-Vlorë, rezulton se është shpallur fitues dhe i është dhënë me koncesion 25 vjet bashkimit të përkohshëm të operatorëve “Alb-Star” sh.p.k. dhe “Matrix Konstruksion” sh.p.k. Nga të dhënat e QKR rezulton se, shoqëria “Matrix Konstruksion” shp.k. është në pronësi të djalit të deputetes së Kuvendit të Shqipërisë, Valentina Leskaj. Tani, pritet që Gjykata Kushtetuese të japë vendimin e saj mbi fatin e deputetëve që zhvatur paratë publike.

Mazhoranca bllokon komisionet hetimore

Mazhoranca bllokon komisionet hetimore. Parlamenti rrëzoi dje propozimin e PD për ti hequr mundësinë mazhorancës që të bllokojë në të ardhmen punimeve e komisioneve hetimore. Komisionet hetimore të Kuvendit shpeshherë janë bojkotuar nga mazhoranca duke bërë të pamundur edhe kryerjen e punimeve. Propozimi i PD parashikonte disa ndryshime për të bërë që mazhoranca të mos ketë mundësi të bllokojë pa asnjë arsye organizimin dhe funksionimin e komisioneve hetimore të Kuvendit. Në projektligjin e propozuar parashikohej se mbledhjet e komisionit janë të vlefshme kur:  Marrin pjesë së paku të gjithë anëtarët që i takojnë grupimit politik ku bëjnë pjesë nismëtarët e komisionit.. Komisioni merr vendime me shumicën e të gjithë anëtarëve të pranishëm. Komisioni voton zakonisht me ngritjen e dorës, përveç rastit kur me kërkesën e të paktën tri anëtarëve kërkohet që votimi të bëhet nominal ose i fshehtë. Kërkesa për hetime ose marrje provash nga çdo anëtar i komisionit pranohet nga komisioni pa votim.  Këto ndryshime sipas Partisë Demokratike bëhen pasi ushtrimi normal i veprimtarisë së Kuvendit kërkon ekzistencën e elementeve të domosdoshëm që kanë të bëjnë me krijimin e kushteve për respektimin e ligjeve nga të gjitha organet e tjera të pushtetit publik e shtetasit, si dhe pajisjen e tij me mjetet e përshtatshme për realizimin e kontrollit mbi mënyrën e zbatimit të ligjeve. Por kjo nismë që do ti hapte rrugën zhbllokimi të punimeve të komisioneve hetimore u rrëzua dje me votat e mazhorancës.

Rama-Meta lënë në fuqi ligjin e kapjes së medias

Me votat e mazhorancës, Parlamenti ka rrëzuar dje kthimin e ligjit për mediat audiovizive nga ana e Presidentit Nishani, i cili i kërkonte Kuvendit rishqyrtim të ligjit pasi ai shkelte dhe cenonte pavarësinë e medias. Ligji u kthye pak kohë parë nga Presidenti, por Parlamenti vendosi dje rrëzimin e dekretit të kreut të shtetit. Nishani cilësoi se ligji në fjalë binte ndesh me Kushtetutën dhe parimet bazë të funksionimit të shtetit të së drejtës. Kreu i shtetit jep tri arsye se pse ligji duhet të rishqyrtohet nga deputetët, duke nënvizuar se ligji i mëparshëm ishte në bazë të standardeve evropiane dhe se ishte miratuar me ekspertizën e ekspertëve të Këshillit të Evropës. Në pikën e parë të dekretit, Nishani thekson se mbetet i angazhuar për zbatimin e Kushtetutës dhe plotësimin e rekomandimeve të Komisionit të Bashkimit Evropian për lirinë, drejtimin dhe pavarësinë e RTSH-së. Thelbi i ndryshimit të radhës që ligjit të miratuar në vitin 2013, ishte kuorumi i 2/3 i anëtarëve të Këshillit Drejtues të RTSH-së, i cili praktikisht kërkon konsensus me opozitën për marrjen e vendimeve. Megjithatë, ligji vazhdon të jetë i bllokuar dhe nuk është zbatuar deri më tani duke lënë Televizionin Publik pa Këshill dhe pa drejtues të zgjedhur. Referuar relacionit të projektligjit dhe raportit të Komisionit për Edukimin dhe Mjetet e Informimit Publik, rezulton se shkaku i ndryshimit ligjor ka qenë pikërisht mosarritja e kuorumit të kërkuar nga ligji për zgjedhjen e drejtorit të RTSH-së dhe qëllimi ka qenë në drejtim të gjetjes së një zgjidhje fundore. Kreu i shtetit thekson se është e domosdoshme zgjedhja sa më parë e drejtorit të RTSH-së, por shton se po kaq e rëndësishme është edhe pavarësia e transmetuesit publik”. Sipas Presidentit është e kuptueshme që zgjedhja e drejtorit të RTSH-së është e domosdoshme, por pa u cenuar pavarësia e RTSH-së, që mund të ndikohet nga një drejtor politik që nuk është produkt i kompromisit mes anëtarëve të KDRTSH-së të mbështetur nga forcat përkatëse politike”.

Arben Shahini