13.5 C
Tirana
E shtunë, 26 Prill, 2025
type here...

Kthesa e fshehtë e Merkel

Kancelarja po përfiton tani nga një politikë, kundër së cilës ajo gjithnjë ka luftuar në nivel evropian. Por kjo do ta ndihmojë pak partinë e saj në zgjedhjet për parlamentet e landeve, mendon Christoph Hasselbach.
Në fakt, Angela Merkeli duhet të bënte gjithçka që kufiri midis Maqedonisë dhe Greqisë të hapej sërish për refugjatët. Dhe po të mos arrihej kjo, ajo duhej t’i merrte refugjatët direkt nga Greqia në Gjermani. Sepse situata e sotme është mjaft e krahasueshme me atë të shtatorit, kur mijëra vetë mbetën të bllokuar në Hungari dhe të cilët Merkeli i pranoi në Gjermani, duke i anashkaluar rregullat e BE.
Kancelarja i ka projektuar me këmbëngulje në opinionin publik parimet e saj:

– Në rastin e kërkesave për azil nuk ka kufi maksimal

– Gardhet nuk ndihmojnë

– Duhet një zgjidhje evropiane me një shpërndarje të refugjatëve

Ata që vepruan ishin të tjerë
Në Bruksel ajo e izoloi veten me këtë qëndrim, në një kohë kur vërshimi i refugjatëve vazhdoi. Por dikur, disa qeveri evropiane konstatuan se u teprua. “Më mirë është që të veprojmë të veçuar, se të rrimë së bashku duarkryq”, tha kryeministri hungarez, Viktor Orban. Austria shpalli kufirin e saj maksimal të pranimit të refugjatëve. Pastaj, disa anëtarë të BE dhe disa shtete ballkanike u mblodhën bashkë dhe sollën mbylljen e kufirit midis Maqedonisë dhe Greqisë.
Ky hap përfaqëson të kundërtën e gjithçkaje që ka mbrojtur gjithmonë Merkeli. Por që atëherë kanë rënë edhe shifrat e refugjatëve, që duan të vijnë në Gjermani. Pikërisht kjo është që donte të arrinte Merkeli me zgjidhjen e saj “evropiane”, por suksesi nuk u duk gjëkundi.
Në vend të fotografive selfie me refugjatët, tani ka këshilla të Kancelares për njerëzit në kufi, që hë për hë të qendrojnë në Greqi. Askush nuk ka të drejtë që ta zgjedhë vetë vendin se ku duhet të paraqesë kërkesën për azil, tha Merkeli. Para pak javësh, ajo tha papritur edhe se pret prej refugjatëve sirianë në Gjermani, që të kthehen në atdhe, kur atje të ketë sërish paqe. Po pse nevojitet atëherë integrimi?- pyesin që prej atëherë ata që angazhohen për integrimin duke bërë sakrifica të mëdha.
Ajo nuk do që ta kapin
Zëvendëkancelari Sigmar Gabriel tashmë e ka deklaruar se kthesa ka kohë që ka ardhur. Kjo në një kohë kur në rastin e tij nuk e di kurrë, si i duket atij kjo, e mirë apo e keqe dhe se cili do të jetë pozicioni i tij një javë më vonë. Një kthesë konstaton edhe Horst Seehofer, i cili ka kohë që përpiqet për të. Kurse në rastin e vetë Merkelit ke përshtypjen se ajo bën të gjitha përpjekjet që të mos e kapin, duke e ndryshuar kursin. Por pavarësisht, nëse ajo e pranon apo jo: është pikërisht politika, të cilën ajo e ka refuzuar si jo morale, të pazbatueshme dhe të dëmshme për Evropën, e cila tani po sjell një lloj shtensionimi të gjendjes. Nëse kthesa e fshehtë e Merkelit do t’i hyjë në punë CDU në tri zgjedhjet në lande të dielën e ardhshme, për këtë mund të dyshohet. Çdo zgjedhje që bëhet është për momentin krejtësisht një votim për politikën ndaj refugjatëve të qeverisë gjermane. Kështu ishte edhe në zgjedhjet e djeshme komunale në Hessen: CDU dhe SPD, pra partitë që qeverisin së bashku në nivel federal, humbën mjaft, kurse AfD populiste e djathtë u bë që herën e parë, kur mori pjesë në zgjedhje partia e tretë për nga votat. Vendimi i zgjedhësve pra mund të interpretohet edhe kështu: po të kishte pasur Merkeli sukses në BE me politikën e saj, shifrat e refugjatëve do të qenë po kaq të larta sa në vjeshtë.

“The Guardian”: Nga kush duhet të ketë më shumë frikë Turqia?

Mëngjesin e të shtunës, gazeta “Zaman” në numrin e fundit të shtypur përpara ekzekutimit të vendimit të Gjykatës, kundërshtoi hapur vendimin për sekuestrimin dhe caktimin e një administratori shtetëror për menaxhimin e gazetës. Ndërkohë numri i të dielës, i pari nën kontrollin e administratorëve të deleguar, ishte i mbushur me artikuj pro-qeveritarë
Nëse çështja “Zaman” do të ishte një rast i izoluar i abuzimit ndaj mediave në Turqi, padyshim që mund të shihej si pjesë e luftës së ashpër ndërmjet Partisë për Drejtësi dhe Zhvillim [AKP] dhe lëvizjes “Hizmet”
Gazetarë të mediave dhe bindjeve të ndryshme vazhdimisht janë frikësuar përmes veprimeve ligjore dhe në disa raste janë arrestuar
Që nga gushti i vitit 2014, janë regjistruar rreth 1845 raste të proceseve gjyqësore ndaj qytetarëve turq me pretendimin se ata kanë fyer presidentin e tyre. Shumë pak prej tyre kanë marrë dënime të rënda, por duket qartë se qëllimi kryesor i këtyre proceseve është frikësimi i tyre
Turqia tashmë është nën mëshirën e një njeriu me një temperament të keq. Përgjigja e Presidentit Rexhep Tajip Erdogan ndaj çdo sfide apo kritike që i bëhet atij, prej kohësh ka qenë shumë e ashpër, por tashmë është shndërruar në një reagim të papërmbajtshëm dhe mbi të gjitha hakmarrës.
Viktima e fundit e zemërimit të tij është gazeta me tirazhin më të madh në vend, “Zaman”, e cila javën e kaluar u sekuestrua dhe kaloi nën administrimin e autoriteteve turke, qartazi nën kërcënimin e armëve.
Ndaj protestuesve që përpiqeshin të parandalonin hyrjen e policisë në ambientet e gazetës, u përdor gaz lotsjellës dhe dhunë, kryeredaktori dhe shumë gazetarë me përvojë u pushuan nga puna nga “administratorët” e caktuar nga Gjykata dhe sipas stafit shkrimet editoriale janë bllokuar dhe më pas mund të jenë fshirë plotësisht.
Mëngjesin e të shtunës, gazeta “Zaman” në numrin e fundit të shtypur përpara ekzekutimit të vendimit të Gjykatës, kundërshtoi hapur vendimin për sekuestrimin dhe caktimin e një administratori shtetëror për menaxhimin e gazetës. Ndërkohë numri i të dielës, i pari nën kontrollin e administratorëve të deleguar, ishte i mbushur me artikuj pro-qeveritarë, të cilët i bënin jehonë punës së qeverisë.
Është ende e paqartë specifikisht se çfarë shkeljeje apo veprimi antiligjor mund të ketë kryer gazeta “Zaman”, ndërkohë që është shumë e qartë se përse z. Erdogan e konsideronte atë përgjithësisht si të dënueshme. Me kalimin e kohës, gazeta “Zaman” mori një pozicion të moderuar islamik, i cili në fakt nuk ishte shumë i ndryshëm nga ai i Partisë për Drejtësi dhe Zhvillim [AKP] të zotit Erdogan dhe punësoi analistë dhe gazetarë me pikëpamje të ndryshme politike, megjithëse asnjëri prej tyre nuk ishin në listën e të preferuarve të qeverisë. Por ajo mbështet lëvizjen me ndikim “Hizmet”, një lëvizje e frymëzuar nga Fethullah Gulen, një klerik dhe mendimtar në moshë të thyer, i cili prej vitesh jeton në ekzil në Shtetet e Bashkuara të Amerikës.
“Hizmeti” i është shmangur një roli dhe ndikimi të drejtpërdrejtë politik, duke preferuar të veprojë nëpërmjet mbështetësve të përkushtuar me profesione të ndryshme, si policë dhe arsimtarë dhe për vite të tëra ishte në një aleancë të ngushtë, por të matur me Partinë për Drejtësi dhe Zhvillim [AKP]. Por kjo marrëdhënie mori fund në vitin 2013, pasi dolën në pah dallimet mes tyre kryesisht për politikat e qeverisë ndaj kurdëve, Izraelit dhe Iranit dhe propozimeve për mbylljen e shkollave të kontrolluara nga lëvizja “Gylen”. Partia për Drejtësi dhe Zhvillim ka punuar për largimin e mbështetësve të Gylenit nga pozitat vendimmarrëse pranë pushtetit dhe ka nisur një proces gjyqësor në mungesë ndaj z. Gylen, duke e akuzuar atë për komplot për përmbysjen e qeverisë.
Sekuestrimi dhe marrja nën kontroll e gazetës “Zaman”, e shoqëruar dhe me arrestimin e katër anëtarëve të Bordit Drejtues të “Boydak”, një korporatë e njohur si mbështetëse e lëvizjes “Hizmet”, mund të shihet dhe si faza e fundit e kësaj fushate. Rasti në fjalë nuk është thjesht një përplasje mes demokratëve të pagabueshëm kundrejt forcave të errëta anti-demokratike. Të dyja palët, lëvizja “Hizmet” dhe Partia për Drejtësi dhe Zhvillim, në të kaluarën kanë bashkëvepruar në mënyra jo dhe aq demokratike, sidomos në rastin kur të dyja palët bashkëpunuan për të diskredituar forcat e armatosura të Turqisë. Gjeneralët janë akuzuar, me prova të cilat mund të kenë qenë të fabrikuara, për komplot për rrënimin e shtetit. Ushtarakët kërkuan rigjykim të çështjes dhe Partia për Drejtësi dhe Zhvillim, e cila dikur publikonte materiale mbi mënyrën se si ushtria ishte zhveshur nga kopetencat e saj shumë të gjera, më vonë deri në një farë mase ofroi një mbështetje ndaj tyre.
Nëse çështja “Zaman” do të ishte një rast i izoluar i abuzimit ndaj mediave në Turqi, padyshim që mund të shihej si pjesë e luftës së ashpër ndërmjet Partisë për Drejtësi dhe Zhvillim [AKP] dhe lëvizjes “Hizmet”. Në fakt, situata aktuale është shumë larg këtij realiteti. Gazetarë të mediave dhe bindjeve të ndryshme vazhdimisht janë frikësuar përmes veprimeve ligjore dhe në disa raste janë arrestuar. Botuesit dhe pronarët e mediave vazhdimisht kanë qenë nën kërcënimin dhe presionin ekstrem të autoriteteve për largimin nga puna të gazetarëve dhe opinionistë të padashirueshëm nga qeveria. Disa prej mediave kanë blerë biznesmenë të afërt me qeverinë. Kryeredaktori i të përditshmes opozitare “Cumhuriyet” dhe përgjegjësi i redaksisë së kësaj gazete në Ankara u akuzuan për spiunazh, pasi gazeta botoi një artikull, sipas të cilit qeveria kishte mbështetur me armatime rebelët ekstremistë në Siri. Kur Gjykata Kushtetuese urdhëroi lirimin dhe gjykimin e tyre në gjendje të lirë, zoti Edogan me një mospërfillje tipike ndaj sistemit ligjor deklaroi: “Unë nuk pajtohem më këtë vendim dhe nuk e respektoj atë”.
Në të vërtetë, i vetmi vendim që zoti Erdogan respekton dhe që në fakt pajtohet me të është qëndrimi i tij. Është e vërtetë që problemet me të cilat përballet sot Turqia janë të shumtë. Turqia po përballet me një numër të madh refugjatësh për shkak të luftës në Siri, situata dhe rritja ekonomike nuk është më në nivelet e dëshiruara dhe tensionet e një politike të jashtme kontradiktore që kanë për qëllim rrëzimin e qeverisë së Asadit në Damask, pa fuqizuar kurdët e Sirisë, tashmë janë mëse evidente.
Por personaliteti i zotit Erdogan nuk është i përshtatshëm për situata të tilla vështirësish dhe fatkeqësish. Përdorimi gjithnjë e më i shpeshtë i ligjit për të shndërruar në një vepër penale kritikat dhe fyerjet ndaj Presidentit, në fakt e ka bërë atë më të ndjeshëm ndaj këtyre kritikave. Që nga gushti i vitit 2014, janë regjistruar rreth 1845 raste të proceseve gjyqësore ndaj qytetarëve turq me pretendimin se ata kanë fyer presidentin e tyre. Shumë pak prej tyre kanë marrë dënime të rënda, por duket qartë se qëllimi kryesor i këtyre proceseve është frikësimi i tyre. Pavarësisht qëndrimeve të tij ndaj mediave dhe gjykatave, apo dhe ndaj publikut, mesazhi i z. Erdogan është i qartë dhe i njëjti: Do të ketë pasoja për këdo që më kritikon mua. Kjo nuk është aspak politikë e matur dhe sigurisht aspak demokratike.

Përfaqësuesit e FMN-së sot në Tiranë për taksat dhe ekonominë

Përfaqësues të Fondit Monetar Ndërkombëtar mbërrijnë sot në Shqipëri. Diskutimet pritet të përqendrohen në zhvillimet ekonomike në vend, por edhe në  ndërhyrjet që mund të realizohen në paketën fiskale për vitin 2017.Misioni i FMN-së pritet të takohet me drejtuesit më të lartë të institucioneve financiare në vend të të cilëve siç është bërë me dije do t’i shprehin rezervat në lidhje heqjen e disa taksave. Misioni i Fondit Monetar Ndërkombëtar pritet të mbërrijë në Tiranë ditën e mërkurë. Mësohet se në vëmendje të përfaqësuesve të Fondit do të jenë zhvillimet  ekonomiko-financiare, por edhe hartimi  i paketës fiskale për vitin 2017. Përfaqësuesi i  FMN në Shqipëri, Jens Reinke, në një intervistë për mediat shqiptare ka bërë me dije se ky mision pritet t’i kërkojë qeverisë heqjen e çdo përjashtimi taksash të bërë deri tani për sektorë të caktuar, siç është rasti i heqjes së taksave për biznesin e vogël apo edhe tarifat zero për shumë produkte. Përfaqësuesit e një prej institucioneve më të rëndësishme financiare në botë do të qëndrojë në Shqipëri, për rreth 2 jave. Ndër të tjera diskutimet me drejtuesit shqiptarë do të fokusohen edhe në pritshmerinë ekonomike për të ardhmen, nevoja për ndryshime në politikat si dhe parashikimet afatmesme për ekonominë. Misioni i FMN-së do të zhvillojë takime me Ministrin e ri të Financave, Arben Ahmetaj, me Guvernatorin Gent Sejko. Kjo vizitë e FMN-së në Tiranë vjen pas miratimit  të dy kësteve të kredisë për Shqipërinë me vlerë totale 72.4 milionë euro. Programi parashikon një mbështetje financiare prej rreth 330.9 milion euro në kohën e nënshkrimit dy vjet më parë, lëvrimi i së cilës është i ndarë në 9 këste.  Shqipëria pritet të ketë rritjen më të ulët në rajon të ekonomisë për këtë vit, prej 2.7%, ndërsa do të vazhdojnë të kryesojnë Maqedonia, Kosova, Mali i Zi, me 3.2% secila. Pasi ka zyrtarizuar rishikimin në ulje të rritjes ekonomike në 2015-ën në 2.7%, Fondi Monetar Ndërkombëtar, në raportin e tetorit të “Perspektivës ekonomike Globale” është treguar mjaft konservativ dhe për rritjen e Shqipërisë në afatin e mesëm. Sipas tabelave të publikuara vetëm një ditë më parë nga FMN, për vitin 2015, rritja është ulur nga 3% në 2.7%, një rishikim që është deklaruar tashmë prej muajsh dhe nga zyra e FMN-së në Tiranë. Por, raporti i djeshëm zbulon edhe pritshmëritë më pak optimiste për 2016 deri në afatin e gjatë (2020).

Ekonomia rrëshqet në deflacion, nuk ka konsum sepse s’ka para

Ekonomia rrëshqet në deflacion, nuk ka konsum sepse s’ ka para

Krahasuar me shkurtin e 2015, rritja më e madhe e çmimeve vërehet në grupin “Shërbimi arsimor” me 4,8 %
Inflacioni në muajin shkurt arriti në nivelin më të ulët historik që nga janari i vitit 2003, duke lajmëruar një situatë gati deflacioniste. Megjithë politikën agresive të lehtësimit monetar nga Banka e Shqipërisë dhe shtrëngimin fiskal të qeverisë inflacioni në muajin shkurt shënoi vetëm 0,2 për qind, duke dhëne sinjalet e thellimit të krizës në konsum. Një vit më parë ky ndryshim ishte 2,3 %.
Nga analiza e të dhënave të INSTAT mësohet se, rënia e çmimeve i dedikohet si krahut të ofertës dhe kërkesës. Ulja e e çmimeve të shërbimeve të transportit me 4,1 % me bazë vjetore i dedikohet rënies së çmimeve të naftës, por rënia e çmimeve në disa ushqimeve që nuk kanë lidhje me efektet sezonale tregon se, konsumi po gjendet në krizë.
INSTAT raportoi se, çmimet e nëngrupit “qumësht, djathë e vezë” u ulën me 6,1 %, pasuar nga nëngrupet “bukë e drithëra” me 2,4 %, dhe mishi me 1,3 %, etj. Ndërsa, ulja më e madhe e çmimeve vërehet edhe në grupet “Veshje dhe këpucë” me 3,4 %, pasuar nga grupet “Shëndeti” me 2,2 %, etj. Krahasuar me muajin janar 2016, rritja më e madhe mujore e çmimeve vërehet në grupin “Ushqime dhe pije alkoolike” me 3,3 %. Ulja më e madhe mujore e çmimeve vërehet në grupin “Veshje dhe këpucë” me 1,3 %.
Krahasuar me muajin shkurt 2015, rritja më e madhe e çmimeve vërehet në grupin “Shërbimi arsimor” me 4,8 % pasuar nga grupi, “Pije alkoolike dhe duhan” me 2,6 %, grupi “Ushqime dhe pije joalkoolike” me 2,2 %, etj. Brenda grupit të ushqimeve çmimet e nëngrupit “fruta” u rritën me 27,8 %, pasuar nga nëngrupi “zarzavate përfshirë patatet“ me 9,6 %, nëngrupi “sheqer, reçelra e ëmbëlsira” me 1,5 %, nëngrupi “vajra dhe yndyrna” me 0,2 % etj.
Rritja vjetore në muajin shkurt është ndikuar kryesisht nga grupi “Ushqime dhe pije joalkoolike” me +0,78 pikë përqindje. Çmimet e grupit “Shërbimi arsimor” kanë kontribuar me +0,19 pikë përqindje. Çmimet e grupit “Pije alkoolike dhe duhan” kanë kontribuar me +0,13 pikë përqindje. Çmimet e grupit “Hotele, kafene e restorante” kanë kontribuar me + 0,03 pikë përqindje dhe çmimet e grupit “Argëtim e kulturë” kanë kontribuar me + 0,02 pikë përqindje.
Çmimet e grupit “Qira, ujë, lëndë djegëse dhe energji” kanë kontribuar me -0,27 pikë përqindje. Çmimet e grupit “Transporti” kanë kontribuar me -0,26 pikë përqindje. Çmimet e grupit “Veshje dhe këpucë” kanë kontribuar me -0,14 pikë përqindje. Çmimet e grupeve “Shëndeti” dhe “Komunikimi” kanë kontribuar respektivisht me -0,09 dhe -0,03 pikë përqindje.
Nga ana tjetër, INSTAT bën të ditur se në tremujorin e katërt të 2015 ndryshimi vjetor i Indeksit të Çmimeve të Prodhimit është -2,3 %. Uljen më të lartë, sipas raportit, e kanë pasur çmimet e prodhimit në seksionin “ Industri nxjerrëse” me 9,5 %.  Brenda kësaj industrie vihet re ulja e çmimeve të prodhimit të produkteve në aktivitetin “Nxjerrja e naftës bruto dhe gazit natyror” me 15,3 %. Referuar të njëjtës periudhë krahasimi, Indeksi i Çmimeve të Prodhimit në aktivitetet e Industrisë përpunuese kanë shënuar rritje me 0,3 %. Ato që kanë pësuar rritje në këtë periudhë kanë qenë çmimet e prodhimit të produkteve kimike me 5,6 %, konfeksionet e veshjeve me 2,7 %, produktet e makinerive dhe pajisjeve me 5,1 %. Ndërsa çmimet e prodhimit të rafinerisë dhe nënprodukteve të naftës kanë shënuar ulje me 3,1 %.

Protestë para zyrës së Veliajt, taksistët bllokojnë rrugën me makinat e tyre

Sindikata e taksistëve ka dalë në protestë para Bashkisë si dhe kanë bllokuar rrugën me automjetet e tyre duke kërkuar ndalimin e informalitetit. Dhjetëra taksistë i kanë parkuar mjetet pranë pedonales. Ata kanë kërkuar të largohen taksitë e qyteteve të tjera pasi në këtë mënyrë po falimentojnë. Taksistët kanë kërkuar takim me kreun e bashkisë, Erion Veliaj për të diskutuar çështjen. “Të largohen taksitë e qyteteve të tjera. Stop informalitetit. Duam të takojmë Erion Veliaj”, kanë deklaruar ata.

Taksistët janë shprehur kundër ligjit për lejimin e taksive 6+1, pasi sipas tyre favorizon kompaninë. “Ky ligj ishte një dështim. Duke liberalizuar u futën shumë taksi, përveç 4+1 edhe 6+1. Në gjithë botën nuk ndodh kjo. Ne kemi ankesa ndaj këtij ligji që favorizon kompanitë dhe shkel kushtetutën. 1000 banorë një taksi. Kemi pjesën tjetër për biletën për prenotim-rezervim. Ne mund të shkojmë në Durrës me klientë por nëse kthehemi sërish me klientë na heqin licencën se nuk lejohet. Sot është fillimi por ne kemi probleme në të gjitha rrethet. I njëjti problem”, thanë taksistët.

Ata kërcënuan se nëse nuk marrin një zgjidhje do të bllokojnë të gjitha rrugët. “Protesta jonë do shtrihet edhe në rrugë të tjera dhe do bllokojmë qarkullimin. Informaliteti është në pikë të parë. Në Bulevardin Zogu i Parë ke 100 taksi pa licencë”, tha një taksist. Më pas ata janë lajmëruar se një përfaqësi e tyre do të pritet nga bashkia për të diskutuar çështjen.

Basha: Shqipëria, i vetmi vend në Europë ku populli po varfërohet e qeveria po pasurohet

Kryetari i Partisë Demokratike Lulzim Basha u takua me tregtarë në Poshnje si dhe me banorë të Lapardhasë, Velabishtit dhe Urës Vajgurore të rrethit të Beratit. Basha u takua me tregtarët të zonës së Poshnjes të cilët I shprehën kreut të opozitës problemet e tyre për mungesën e xhiros për shkak të papunësisë dhe varfërisë që sa vjen dhe rritet. Tregtarët deklaruan se askush nuk vjen ti pyes për çmimin dhe jo që dikush të blejë.  Tregtarët deklarojnë se nuk arrin të mbulojnë dot as taksën dhe naftën që u nevoitet për ta ardhur deri në treg. “Ky na ka futur në dhe. Shiko xhiron ditore që ne kemi bërë sot. Është turpi i botës, nuk kemi kokërr leku në xhep. Kokërr leku të paguajmë taksat, i kemi paguar kemi 20 vjet. Ky na ka futur në gropë. Kemi kalamajtë në shkollë. Që në mëngjes këtu të hapësh mallin janë 25 mijë lekë minus. Do  të çojmë kalamajtë në shkollë, do të vejmë ne në punë, do blejmë naftë” u shpreh njarë prej tregtareve. Më e ashpër ishte reagimi I një zonje tjetër. Ajo deklaroi se nëse nuk do kishte fëmijët në megrim dhe do kishte fëmijë për të rritur me këtë gjendje ekonomike që është zhyrur vendi do kishte gjetur si zgjidhje vetëflijimin. “Unë jam një tregtare 60 -vjeçe. Po vij në punë e sëmurë edhe as lekë, as gjë kam bërë sot. Shiko sa kam bërë sot, xhiroja ime që pastaj ai kërkon lekë nga ne. Shiko xhiron time. Gjithë atë mall kam unë atje, as s’po ha dot as bukë. Dëgjo këtu motrën, unë kam tre fëmijë, dy i kam jashtë, një e kam këtu. Shyqyr Zotit  që s’kam fëmijë për të ushqyer se po të kisha fëmijë për të ushqyer unë do të mbytesha” tha ajo. Pasi dëgjojë shqetësimet e tregtarëve Basha se këto janë pasojat e një qeverie e cila ka si qëllim pasurimin e vet ndërsa qytetarët duhet të përballen me çmimet e larta papunësinë dhe taksat e rritura të qeverisë.  Pas takimit me tregtarët e Poshnjes Basha ka vijuar  me banorët e Lapardhasë, ku ka theksuar se Shqipëria është i vetmi vend në Europë sot ku populli po varfërohet e qeveria po pasurohet. “Shqiptarët po jetojnë ditë të vështira. Leku është zhdukur nga qarkullimi. Puna ka rënë. Papunësia është rritur, varfëria është thelluar. Çmimet janë rritur, taksat janë rritur, fuqia blerëse ka rënë. Shumë shqiptarë e shqiptare i janë drejtuar emigracionit në dëshpërim. Mijëra familje kanë preokupim kryesor si ta mbyllin ditën sepse lekët e janë në duart e një grushti njerëzish të cilët i kanë bërë pallate, saraje, vila, pishina, konto bankare. Ky është i vetmi vend në Europë sot ku populli po varfërohet e qeveria po pasurohet”u shpreh Basha. Në takimin me banorë të Velabishtit dhe të Urës Vajgurore, zoti Basha u njoh me shqetësimin e banorëve për papunësinë, mungesën e investimeve, rritjen e taksave etj. Vetëm vitin e kaluar tha zoti Basha, shqiptarëve iu kanë vjedhur 400 euro për frymë. 1.2 miliardë të tjera i kanë marrë borxh këto dy vite e gjysëm dhe s’kanë bërë asnjë investim. “Vendin në këtë situatë e ka katandisur keqqeverisja, mos qeverisja, qeverisja me krimin dhe korrupsioni në qeverisje. Vetëm vitin e kaluar shqiptarëve iu kanë vjedhur 1.2 miliardë euro. Vetëm vitin e kaluar shqiptarëve iu kanë vjedhur 400 euro për frymë.1.2 miliardë të tjera i kanë marrë borxh këto dy vite e gjysëm. Por a keni parë gjë ju nga këto para të marra borxh? Keni parë ndonjë urë, a ndonjë rrugë, ndonjë shkollë të re këtu në Urën Vajgurore? A keni parë ndonjë vend pune të hapet? A keni parë ndonjë të mirë të kthehet tek ju?  Policit dhe burgut si ilaç për gjithçka ky i thotë reforma, këto janë reformat. Po ana tjetër? Po shëndetësia falas? Po 300 mijë vendet e punës? Po çmimet e ulura ku janë?  Pra, është një qeverisje që ka ardhur vetëm për të plaçkitur. Plaçkitja nuk është reformë. Plaçkitjes dem baba dem ne i themi vjedhje” deklaroi Basha.

Si deputeti Kokëdhima shiste internet edhe për azilin e pleqve

Kompania “ABISSNET” në të cilën Kokëdhima zotëronte 100% aksionet e saj i ka shitur internet edhe azilit të pleqve në Fier. Data e realizimit të kontratës sipas dokumentacionit zyrtar është  ajo e 22 janarit 2014, pikërisht koha kur Kokëdhima kishte në pronësi të vet 100% aksionet e “ABISSNET”. Janë një sërë institucionesh shtetërore, të cilat kanë lidhur apo rinovuar kontrata e tyre me kompaninë e Kokëdhimës gjatë kohës që ai ka mbajtur edhe mandatin e deputetit edhe zotëronte 100% të aksioneve. Këtë e pohojnë dokumentet zyrtare. Kështu Teatri Kombëtar i Komedisë po ashtu ka lidhur kontratë me “ABISSNET” gjatë kohës që Kokëdhima ka zotëruar 100% të aksioneve të kompanisë dhe data përkon më 20 janar 2014. Avokati i Popullit po ashtu ka lidhur kontratë dhe ka bërë pagesën me “ABISSNET” më 6 janar 2014. Dogana Pogradec e ka lidhur kontratën më 23 janar 2014. Qendra Kombëtare e Transfuzionit të Gjakut e ka lidhur kontratën me “ABISSNET” më 9 janar 2014. Bashkia e Durrësit më 6 shkurt të këtij viti. Ndërmarrja e Shërbimeve Publike më 4 shkurt 2014. Të gjitha këto kontrata janë nënshkruar gjatë kohës që Kokëdhima sikurse e pohoi edhe vetë në një deklaratë ka zotëruar 100% të aksioneve të “ABISSNET”. Ai ka bërë shkëputjen fiktive nga kjo kompani më datën 6 shkurt të vitit 2014, ndërkohë që gjatë gjithë këtyre muajve ka vazhduar fushatën e vjedhjes së parave nga fondet publike. Lidhja e kontratave dhe ripërtëritja e tyre është një proces, i cili ka pak ndryshim. Çdo kontratë e ripërsëritur është një kontratë e re. Klienti e rifreskon kontratën kur ajo i mbaron me një kompani të caktuar, duke riparë të gjithë tregun. Klienti përzgjedh kompaninë që i intereson dhe ripërtërin kontratat. Kjo kontratë për këdo konsiderohet si një kontratë e re, sepse në të njëjtën kohë ofrohet shërbim i ri dhe kryhet pagesë e re. Nëse do t’i përmbaheshin kontratave të vjetra, ato bëhen nul në kohën që u skadon afati dhe institucioni nuk merr asnjë shërbim, sepse nuk paguan para. Të gjitha këto institucione, pra të gjitha ato 176 kontrata me institucionet shtetërore janë lidhur dhe kanë bërë pagesat e tyre gjatë kohës ka zotëruar 100% të aksioneve të kompanisë “ABISSNET”. Kokëdhima thotë se një pjesë e këtyre kompanive kanë bërë ripërtëritje të kontratave që janë lidhur më parë. Edhe nëse është e tillë, kjo nuk e shpëton Kokëdhimën nga shkelja e ligjit dhe Kushtetutës. Pagesat janë kryer po nga institucione publike. Fondet e tyre kanë qenë para të taksapaguesve. Nuk ka asnjë sens që sipas Kokëdhimës taksapaguesit shqiptarë duhet të paguajnë Kokëdhimën, këtë mendje të ndritur të kombit, edhe si deputet edhe si pronar i kompanisë “ABISSNET”.
Disa nga kontratat kur Kokëdhima, deputet zotëronte 100% të aksioneve

Dogana Pogradec (1529) –  “ABISSNET” Pogradec 8,250    2014.01.22    2014.01.23
Qendra Kombëtare e Transfuzionit të Gjakut (3535) – “ABISSNET” Tiranë 9,000       2013.12.31    2014.01.09
Teatri Kombëtar i Komedisë (3535) – “ABISSNET”    Tiranë    9,151    2014.1.0    2014.1.0
Avokati i Popullit (3535) –    “ABISSNET”    Tiranë              32,000    2014.1.6    2014.1.6
Bashkia Durrës (0707) – “ABISSNET”    Durrës                39,000    2014-02-05    2014.02.06
Bashkia Durrës (0707) –    “ABISSNET”    Durrës                41,536    2014.2.5    2014.2.6
Bashkia Elbasan (0808) –  “ABISSNET”    Elbasan                25,182    2014.1.7    2014.1.8
Ndërmarrja e Shërbimeve Publike Fier (0909)- “ABISSNET”    Fier 2,840 2014.2.4    2014.2.4
Ndërmarrja e Shërbimeve Publike Fier (0909) –    “ABISSNET” Fier      3,080 2014.2.4  2014.2.4
Shtëpia e të Moshuarve Fier (0909)- “ABISSNET”    Fier          2,840    2014.01.22    2014.01.22
Shtëpia e të Moshuarve Fier (0909)- “ABISSNET” Fier      2,840    2014.01.22    2014.01.22
Shtëpia e të Moshuarve Fier (0909)  “ABISSNET” Fier         5,950    2014.01.22    2014.01.22
Shtëpia e të Moshuarve Fier (0909)  “ABISSNET” Fier            6,958    2014.01.22    2014.01.22
Komuna Petrelë (3535) – “ABISSNET”    Tiranë                     8,000    2013.12.03    2014.01.16
Komuna Rashbull (0707) – “ABISSNET”    Durrës                   20,000    2014.01.28    2014.01.28
Komuna Petrelë (3535) – “ABISSNET”    Tirane                    8,000    2014.01.17    2014.01.17
Komuna Prezë (3535)  – “ABISSNET”    Tiranë                  11,000    2014.01.24    2014.01.27

Miliona nga fondet publike

Përmes një investigimi në sistemin e të dhënave Open Data numri i institucioneve shtetërore që paguajnë në favor të kompanisë së Kokëdhimës nuk ka fund, ndërsa shuma totale e transaksioneve të kryera midis institucioneve dhe kompanisë së Koço Kokëdhimës shkon jo pak, por plot 2,951,169.00 lekë (të reja). Nën presionin e fortë të Ramës dhe Kokëdhimës institucionet publike të drejtuara nga të majtët janë detyruar të gjithë të lidhin kontratata disa vjeçare me kompaninë e Kokëdhimës. Përfitimi i milionave nga kompania e tij e shërbimeve të internetit është vetëm një nga shumë tentakulat që Kokëdhima dhe bizneset e tij kanë kapur shtetin. Një tjetër burim miliona lekësh fitimprurës është edhe agjencia e tij e reklamave, agjenci e posaçme që merret me ekspozimin e reklamave citylight që me bekimin e Ramës përmes buxhetit të shtetit apo fondeve publike i garanton Kokëdhimës qindra milionë para. Ky rast përbën një nga rastet flagrante të korrupsionit të Ramës. Dihen lidhjet e Ramës me Kokëdhimën sikurse tani po faktohet edhe mënyra se si vjedhin paratë e taksapaguesve kjo dyshe ortake në miqësi dhe në qeveri.  Urdhri i Ramës për të gjitha agjencitë shtetërore është që të lidhin kontrata me kompaninë e Kokëdhimës. Të ashtuquajturat tender janë zhdukur dhe nuk ekzistojnë më. Ato janë zëvendësuar me urdhrin e Kryeministrit.  Në këtë mënyrë bëhet shumë e thjeshtë edhe ndarja e parave mes këtyre dy ortakëve. Kemi të bëjmë me një sistem mafioz të ndërtimit dhe funksionimit të qeverisë dhe pushtetit, ku gjithçka ndahet mes atyre që e konsiderojnë qeverinë jo si një angazhim qytetar, por si një ortakëri biznesi. Shqiptarët po vidhen haptazi. Miliardat e taksave të tyre po shkojnë për xhepat e Ramës dhe Koçove në qeveri. Kjo është një aferë e rëndë, e cila kërkon një hetim të plotë, pasi këto transaksione parash është e sigurtë që shkojnë mes këtyre dy ortakëve në qeveri. Kjo nuk është afera e vetme mes tyre. E gjithë qeveria është vënë në funksion të skemës Rama të biznesit personal dhe miqve të tij.

Shkelja e nenit 70 të Kushtetutës

Deputeti Koço Kokëdhima nëpërmjet shoqërisë së tij “ABISSNET sh.a.” ka përfituar fonde publike nga realizimi i veprimtarisë fitimprurëse të kompanisë së tij me organet publike, në kundërshtim me nenin 70/3 të Kushtetutës. Disa nga fondet publike të përfituara nga shoqëria tregtare në pronësi të deputetit Koço Kokëdhima paraqitet në linkun e mëposhtëm:
http://www.spending.data.al/sq/treasury/list/faqe/1/year/2014/perf_id/ABISSNET.
Duke nxituar të fshihnin këtë fakt të rëndë dhe shkelje flagrante të Kushtetutës, shoqëria “ABISSNET sh.a.” në një deklarim për mediat u shpreh se: “Zoti Koço Kokëdhima ka qenë aksioner në shoqërinë ‘ABISSNET sh.a’ deri më datë 06.02.2014, datë në të cilën ka shitur aksionet e tij tek një person tjetër juridik”. Në fakt një deklarim i tillë “përputhet” edhe me ekstraktin e QKR (një kopje të të cilit e gjeni bashkëlidhur), ku pasqyrohet se më datë 07.02.2014 është regjistruar çështja CN-352180-02-14, e cila ka të bëjë me: “Depozitimi i vendimit të Asamblesë së Përgjithshme të ortakëve të shoqërisë ‘2K GROUP’ ku është vendosur – Blerja e 100% të aksioneve të shoqërisë ‘ABISSNET sha’. Depozitimi i kontratës jo noteriale datë 06.02.2014 për kalimin e aksioneve dhe si rrjedhojë shoqëria ‘2K GROUP’ mbetet me ortak të vetëm shoqërinë ‘2K GROUP’”.

Venecia foli! Pse Rama po e bllokon Byronë e Hetimit?

Reforma në Drejtësi dhe në veçanti ngritja e Byrosë Kombëtare të Hetimit është një moment delikat i politikës shqiptare, ku dallohen edhe më qartë diferencat mes mazhorancës dhe opozitës. Komisioni i Venecias, në mënyrë të përsëritur dhe të qartë, në të dy rekomandimet e dhëna, ato paraprake dhe përfundimtare e kërkon Byronë Kombëtare të Hetimit një institucion të pavarur krejtësisht nga qeveria, duke respektuar Kushtetutën e Shqipërisë, vendimin e Gjykatës Kushtetuese dhe qëndrimin e palëkundur të Partisë Demokratike.

“Modelet për përzgjedhjen e këtyre zyrave variojnë. Në disa raste zyra e prokurorit të kësaj njësie mbetet zyrtarisht pjesë e strukturës së Prokurorisë së Përgjithshme, por si një njësi e pavarur, që nuk mund të instruktohet nga të tjerë, shefa të tjerë, qoftë prokurorë apo nga qeveria”. Ky është vendimi përfundimtar rreth Byrosë Kombëtare të Hetimit që ka dhënë Komisioni Venecias më 26 shkurt të këtij viti, duke rrëzuar në kosh të plehrave projektligjin e qeverisë që kërkonte ta vinte këtë institucion nën varësinë e ministrit të Brendshëm, kupto kryeministrin. Ekspertët e Venecias kanë thënë se ky institucion mund të jetë tërësisht i pavarur, por kurrë nën varësinë e qeverisë.

Ka mbi dhjetë ditë që opinioni është bërë publik dhe kryeministri Rama nuk ka bërë asnjë hap, qoftë edhe procedurial për tërheqjen mbrapsht të projektligjit të tij dhe rikthimit tek varianti kushtetues i ngritjes së njësisë antikorrupsion. Mungesa e gatishmërisë së tij për t’u rikthyer në hullitë e ligjit dhe Kushtetutës nuk është ndonjë surprizë, pasi e ka treguar se informaliteti, krminaliteti dhe korrupsioni janë politikat e zgjedhura nga Rama dhe banda e tij për të grabitur këtë vend dhe dhunuar këtë popull.

Byroja, e ëndërruar prej tij si një njësi gjuetie në dorën e kryeministrit për të ndëshkuar kundërshtarët e tij politikë, tani që Venecia thotë se duhet ngritur dhe të funksionojë e pavarur, është shndërruar në një tmerr për këtë pushtet, që është mbuluar me skandale të përditshme aferash kriminale dhe korruptive, që po mbajnë erë dhe kanë ngritur qytetarët në protesta të përditshme. Rama e bllokon ngritjen e njësisë antikorrupsion, pasi e di se ai dhe banda që qeveris janë të ekspozuar ndaj veprimit të ligjit dhe nuk ka vrimë ku të futet pa dhënë llogari për vilat që ka në mbarë vendin, për 200 milionë dollarët që ka dërguar në parajsat fiskale, për tenderat dhe koncesionet, për Parkun e Spitallës që i dha vëlla Olsit, për procedurat korruptive që ndjek në vijimësi, për grabitjen banditeske që i bën pasurive kombëtare dhe financave publike.

Bllokimi që i bën Byrosë e lë zbuluar në propagandën që bën për reformën në drejtësi, pasi ka dëshmuar se nëse nuk e merr nën kontroll këtë sistem, ai është gati ta lërë siç është dhe të injorojë çdo kërkesë të opozitës, Venecias, SHBA dhe Bashkimit Europian. Për të institucionet dhe pushtetet nuk janë instrumenta në shërbim të qytetarëve, por hallka që duhet t’i shërbejnë qëndrimit të tij sa më të gjatë në pushtet. Të njëjtin model uzurpimi dhe kapjeje që bën me statutin dhe institucionet e Partisë Socialiste kërkon ta bëjë edhe me Kushtetutën dhe institucionet e shtetit shqiptar. Në të dyja rastet përdor banditët e tij për të mbytur zërat kritikë dhe për të “votuar” ndryshimet që kërkon të realizojë.

Byroja Kombëtare e Hetimit, apo Njësia Speciale Antikorrupsion, sikurse edhe Reforma në Drejtësi sa janë imediate dhe të pashmangshme për t’u miratuar, kanë shërbyer jo thjesht si një ekspoze e dy filozofive qeverisëse që përfaqëson pushteti dhe opozita, por edhe si një grackë publike për kusarë dhe banditët si Rama dhe grupi i tij në pushtet. Qytetarëve të thjeshtë nuk ju është dashur të presin Byronë dhe Reformën në Drejtësi për të kuptuar se përse janë varfëruar më shumë, përse krimi ka mbuluar qytetet e tyre, përse nuk ofrohen më shërbime publike shëndetësore, arsimore dhe jetike për ta. Por, Byroja dhe Reforma në Drejtësi garantojnë largimin e kësaj klike kriminale që na qeveris, ndëshkimin e tyre të sigurtë, dhe nuk do lejojnë më që pushtetarë të tjerë të vijnë dhe të shkatërrojnë jetën e qytetarëve, duke përdorur forcën e bandave për të vjedhur votat dhe për të vjedhur pasuritë dhe çdo gjë të vlerëshme në këtë vend.

 

Pallat 12 katësh pa leje, në pranga kreu i INUV dhe 5 zyrtarë të Bashkisë Vlorë

Një kompleks ndërtesash 6, 11 dhe 12 kate në lagjen “Pavarësia” të Vlorës, pas hetimeve të Prokurorisë ka rezultuar se është bërë pa asnjë leje nga kompania “Endriu 008” dhe kjo ka çuar në pranga shefin e INUV-it në këtë qytet, disa inspektorë si dhe një ndërtues. Si pasojë David Tushe, kreu i Inspektoriatit Ndërtimor Urbanistik Vendor (INUV) të Vlorës, është arrestuar nga policia për shpërdorim detyre dhe ndërtim të paligjshëm.

Prokuroria e Vlorës njofton se nisi hetimin në bazë të kallëzimit të dy qytetarëve, sipas të cilëve firma e ndërtimit “Endriu 008” po ndërtonte një pallat të lartë, duke u zënë pronën. Prokuroria e Vlorës zhvilloi hetimet paraprake, nga ku rezultoi se kompania private kishte nisur punimet që prej vitit 2014, pa u pajisur me lejen e ndërtimit.

Sipas Prokurorisë, INUV-i ishte në dijeni të këtij pallati dhe në maj të vitit 2014 kishte pezulluar punimet me arsyetimin se firma nuk kishte asnjë dokument, por sërish punimet vijuan pa asnjë pengesë, sepse vendimi i pezullimit nuk është zbatuar. Deri në nëntor të vitit 2014 në krye të INUV-it ishte shtetasi i dyshuar Besnik Karabolli, më pas në këtë detyrë është emëruar David Tushaj, i cili gjithashtu nuk ka marrë asnjë masë pezullimi për ndërtimin.

Gjatë kohës së hetimit, më 22 janar, kryeinspektori mori vendim për pezullimin e ndërtimit. Prokuroria e Vlorës krijoi dyshime se nga ana e zyrtarëve janë konsumuar elementët e veprës penale të “shpërdorimit të detyrës”. Ndërsa për administratorin e kompanisë së ndërtimit janë krijuar dyshimet e arsyeshme se ka konsumuar elementët e veprës penale të “ndërtimit të paligjshëm”.

Në fund të hetimit, në pranga kanë rënë shtetasit Edmond Aliaj (ndërtues), David Tushaj, (kryeinspektor i INUV-it), ish-paraardhësi i tij Besnik Karabolli, si dhe inspektorët Iriald Dervishaj, Marjol Mustafaraj dhe Endri Zeneli, të gjithë punonjës të Bashkisë Vlorë.

Mbifaturimet, Prokuroria nis hetimet ndaj UKT-së

Prokuroria e Tiranës ka nisur hetimet në lidhje me skandalin e mbifaturimeve në Ujësjellësin e Tiranës. “Ndërhyrje e paligjshme në rrjetet kompjuterike” dhe “shpërdorim detyre” janë veprat penale për të cilat Prokuroria, pas verifikimit vetëm disaditor, ka vendosur të regjistrojë procedim penal. Burimet nga Prokuroria bëjnë me dije se hetimi ka nisur mbi bazën e materialit referues të për disa raste mbifaturimesh muajt e fundit.

Burimet e Prokurorisë thanë se, “pas konstatimit se objekti i kallëzimit dhe ai i materialeve të tjera referuese ishte i njëjtë, është vendosur bashkimi i të gjitha shkresave në një procedim penal”. Pas kësaj faze të ezauruar tashmë nga Prokuroria, grupi i hetimit ka nisur veprimet me qëllim zbardhjen e mekanizmit të anomalisë së ndodhur me sistemin informatik të Ujësjellësit të Tiranës.

Vetëm në muajin janar të gjitha familjeve dhe bizneseve u kanë ardhur faturat 10 herë më të larta se sa kanë harxhuar ujë. Qytetarët kërkojnë që të shikohen sahatet e ujit dhe të korrigjohen faturat, por askush nuk u jep zgjidhje.

1...8 2508 2518 252Faqja 8 251 nga 8 252

Kryesore

Continue to the category
Më shumë
© 2024 Rilindja Demokratike Euroatlantike