Hetimet e Prokurorisë për koncesionet e Ministrisë së Shëndetësisë do të nisin me pyetjet e zyrtarëve që janë të përfshirë drejtëpërdrejtë në proces. Gjatë hetimeve, është zbuluar se firma e ministrit Ilir Beqaj nuk është në kontratat e koncesioneve. Dy zëvëndësministrat e Shëndetësisë do të thirren në prokurori lidhur me hetimin që ka nisur për koncesionet që ministria ka dhënë dy vitet e fundit.
Milva Ikonomi që tashmë është ministre e Financave dhe Klodjan Rrjepaj kanë firmosur koncesionet ndërkohë që ministri Ilir Beqaj nuk ka firmë në dosje. Për këtë arsye, Ikonomi dhe Rrjepaj do të merren në pyetje ditët në vijim. Gjithashtu, akuza për korrupsion është rrëzuar dhe kanë mbetur vetëm dy akuzat shpërdorim detyre dhe shkelje të barazisë në tendera.
Hetimet për koncesionet e Shëndetësisë, edhe Ikonomi ka firmosur me Beqajn
Denoncimi, drejtori i OSHEE Shkodër, trafikant droge dhe prostitucioni
Drejtori i Komanduar i OSHEE Shkodër, Ersi Sulejmani është një tjetër person me precedent penal i emëruar në një post të lartë drejtues. Ish-Kryeministri Berisha publikoi denoncimin e një ish-punonjësi të OSHEE nga Shkodra, sipas të cilit drejtori i komanduar i OSHEE për këtë qytet ka qenë i lidhur me trafikun e lëndëve narkotike si dhe të prostitucionit. Nga ana tjetër, ai tregon se si sot shkodranët përballen me mbifaturimet e OSHEE. “Mirëdita z.Sali Berisha unë që po të shkruaj jam një punonjës i OSHEE Shkodër dhe doja të ju tregoja për drejtorin Rajonal të Komanduar Ersi Sulejmani si njeriu i afërt i Blendi Klosit një ish-trafikant prostitutash dhe i lëndëve narkotike. Ku në Shkodër njihet si mister 30% i çdo tenderi që organizon Drejtoria Rajonale OSHEE Shkodër. Gjobitës biznesesh ku kërkon 3 mijë deri në 5 mijë euro bizneseve për mos t’i ndjekur në bazë të ligjit si gjithë abonentët e tjerë, kur ato kapen me shkelje. Një person imoral ku gënjen vajzat e Shkodrës për një vend punë në këmbim të seksit. Një njeri ku ushtron presjon për t’i larguar nga puna në këmbim të parave, siç hoqi elektricistin me 35 vite punë në elektrik (Ferit Rama) ku pas stresit humbi jetën (infrakt). Po ju shkruaj ju z.S Berisha si zëri i vetëm i së vërtetës, sepse mediat ndodhen akoma në gjumë. Me urdhër të këtij drejtori mbi faturohen mijëra abonent me të pa drejtë për të mbuluar vjedhjen që bëjnë disa biznese në Shkodër me mbrojtjen e tij. Me persona si puna e këtij drejtori (përdurues i rregullt i kokainës dhe imoral) po bën rilindjen e sistemit energjetik kryeministri ynë shoku Edi Rama. Me respekt E.V.Anonim ju lutem”, thuhet në denoncimin e qytetarit.
220 milionë euro transhi i dytë i gjobës së marrëveshjes së ÇEZ-it “Rama-Fule” për shqiptarët!
Sali BERISHA
Me gjithë performancën e OSHEE, të reklamuar kudo nga Rama si të shkëlqyer, kjo sipërmarrje njoftoi këtë ditë se për shkak të pamundësisë së saj të shlyej borxhet e koheës së Saliut, po i merr një borxh të ri 220 milionë euro BERZH-it dhe madje nxorri dhe një anonim në sportel për të mashtruar qytetarët se ky borxh me garanci sovrane nuk do të rrise përqindjen e borxhit publik?!?! Po gënjeshtra i ka këmbët e shkurtra, si qendron e vërteta?
-Së pari në marrëveshjen kriminale “Rama – Fule” për CEZ-in, Edi Rama mori përsipër që qeveria shqiptare të paguajë të gjitha borxhet që CEZ kishte krijuar me vjedhjet masive dhe keq administrimin që e çuan atë në falimentim.
Me fatura, këto borxhe për sipërmarrjet, tatimet doganat, bankat, etj., arrinin në 630 milionë euro.
-Kështu që Rama, me marrëveshjen me CEZ jo vetëm gjobiti shqiptarët me 630 milionë euro, por i pagoi CEZ-it 120 milionë euro në dorë.
-Rama, për të mbuluar gropën nga kjo vjedhje e madhe që bëri me marrëveshjen e tij, rriti me 24% çminim e energjisë për konsumatorët familjarë dhe 120% për bizneset.
-Por përsëri kjo rritje nuk mjaftoi për të paguar borxhet e ÇEZ-it të falimentuar, prandaj ai tani po merr borxhin e ri prej 220 milionë euro për të shlyer borxhet që ky ja mori përsipër ÇEZ it që t’ja paguaj.
Por ky është vetëm transhi i dytë, se i treti dhe i katërti do jenë edhe më të mëdha!
Përsëri Rama do detyrohet të rrisë çmimin e energjisë deri sa të marrë të plotë gjobën prej 1250 euro që i vuri çdo shqiptari me marrëveshjen e tij korruptive me Fulen!
“Foreign Policy News”: Ministrat e Ramës, pastrim parash dhe trafik droge
Adam B. Fairmont
Më 19 mars të 2016-ës Partia Socialiste e Shqipërisë zhvilloi Kongresin e saj sipas stilit komunist, m’u në zemër të Tiranës, në po të njëjtin pallat ku partia e saj totalitare i mbante kongreset e stilit marksist rreth 30 vite më parë.
Ndërkohë pas skene, gjatë planifikimit të Kongresit të fundit Edi Rama, Kryeministër i Shqipërisë dhe kryetar i Partisë Socialiste pati në kontroll të plotë të gjithë listën e pjesëmarrësve dhe atyre që do të mbanin fjalime në media, e cila ishte e gatshme të regjistronte fjalimet më të spikatura të oligarkisë socialiste.
Auditori i Kongresit të Ramës u njollos nga ministrat e tij, të cilët shquhen për pastrim parash, trafik droge dhe që e shohin PS-në si strehëz për t’i shpëtuar Prokurorisë dhe drejtësisë. Guximi i Ramës për të dalë në publik me kriminelët më famëkeq të Europës është i pakrahasueshëm me asnjë lider tjetër në vendet e demokracisë perëndimore.
Gjithashtu projektimi i kryetarit të Bashkisë së Tiranës si një lider i ardhshëm i PS-së, pritet të shkaktojë një tronditje të madhe në partinë e sheikëve të Shqipërisë, por gjithashtu pritet të përkeqësojë nivelin e varfërisë në vend.
Refuzimi i përhershëm i zotit Rama për të dënuar skemat e pastrimit të parave të Koço Kokëdhimës; refuzimi për të mos përjashtuar nga partia kriminelë ordinerë si Arben Ndoka dhe Armando Prenga, (tashmë ish-anëtarë të Parlamentit), i cili prej gjashtë muajsh vazhdon t’i fshihet drejtësisë; dhe refuzon investigimin e skemës së pastrimit të parave nga ministri i tij i Jashtëm, Ditmir Bushati që është ndotësi më i madh i ajrit në Shqipëri.
Në vitin 1946, regjimi komunist në Shqipëri miratoi reformën agrare; 70 vjet më pas zoti Rama dhe qeveria e tij e braktisën sektorin agrikulturor dhe atë të prodhimit të ushqimeve, pavarësisht punës se rekomandueshme që kishte bërë ministri i tij i Bujqësisë, megjithëse ai i mëparshmi gjithmonë është margjinalizuar nga Kryeministri Rama dhe skuadra e tij.
Në Kongresin e tij socialist Kryeministri përsëriti edhe një herë gjithë mbështetjen e tij ndaj zotit Erion Veliaj, një njeri i George Soros, si një lider i ri të PS-së, gjë që ka shkaktuar shumë pakënaqësi në klubin e Rilindjes të zotit Kokëdhima, i cili ka rrëmbyer partinë e zotit Rama.
Është alarmante kur sheh se mbështetësit e zotit Veliaj kanë zënë kryesisht shumicën e vendeve në Asamblenë e Përgjithshme të PS-së, ndërsa Saimir Tahiri kryetar i degës së PS-së së Tiranës është parë si delja e zezë e tufës.
Kundërshtari kryesor i zotit Rama, Ben Blushi, i cili përfaqëson elitën e anëtarëve të vjetër të PS-së u kryqëzua përmes një sjelljeje të ngjashme me atë të politikanëve të Koresë së Veriut. Qeveria e Ramës është e paaftë dhe një pre e lehtë e influencës së Shtetit Islamik; duhet theksuar se Shteti Islamik ka infiltruar agjentë të tij të mirëtrajnuar në Shërbimet Sekrete shqiptare. Siguria Kombëtare e Shqipërisë është në rrezik. Tirana duhet të ndërmarrë nisma konkrete dhe imediate për të përforcuar kufijtë e saj dhe të forcojë shërbimet e saj të inteligjencës në Forcat e Armatosura dhe në polici.
Gjithashtu vazhdojnë të qëndrojnë si një tumor malinj figurat komuniste në PS. Siç janë Pandeli Majko, Ditmir Bushati, Taulant Balla dhe Saimir Tahiri, të cilët kërkojnë forcimin e interesave të partisë mbi ato të Shqipërisë. Dhe si rezultat zoti Arben Ahmetaj (një udhëtar pasionant me jet, avion privat), i cili së fundi është bërë dhe ministër i Financave dhe kolegët e tij synojnë që të mbrojnë skemat e tyre të pastrimit të parave, të cilat shtrihen që nga plazhet e Panamasë dhe deri në Oqeanin Indian, duke pasur fillimisht si prioritet zgjatjen e qëndrimit në pushtet të partisë së tyre dhe jo që të shikojnë mundësitë e zhvillimit ekonomik të vendit dhe përmirësimit të imazhit të Shqipërisë në botë.
Jeta e anëtarëve të qeverisë së Ramës është mjaft luksoze krahasuar me jetën e 1.5 milion shqiptarëve që jetojnë nën limitet e varfërisë me 5 euro në ditë. Ministrat e zotit Rama kanë privilegje në zyrat publike, ndërsa përdorin makinat më luksoze në treg, si: “Mercedes-Benz S Class”, “Audi A7”, “Audi Q7”, “Volkswagen Touareg”, “Porsche Cayenne” dhe “Jaguars”.
Pavarësisht mbështetjes së fortë të SHBA-së për të promovuar dhe miratuar reformën e dekriminalizimit, që synon të fusë në burg të gjithë politikanët me rekorde kriminale; e gjithë kjo e qartë se zoti Rama është pengesa kryesore e realizimit të kësaj reforme.
Në vitin 2013 shqiptarët nuk do të kishin menduar kurrë se anëtarët e qeverisë së Ramës do të copëtonin burimet e thesarit dhe do të vendosnin taksa të larta mbi supet e shqiptarëve në mënyrë që ata vetë të blinin “Jaguarë” dhe të bënin një jetë luksoze.
Gjithnjë e më shumë borxhi publik ka kapërcyer çdo limit që brezat e ardhshëm të shqiptarëve do të duhet të paguajnë.
Një legjislacion i komprometuar, i cili fatmirësisht nuk u mbështet nga LSI-ja, ishte një skemë e pastër korrupsioni e shpikur nga zoti Rama dhe synonte të rrezikonte asetet kombëtare të Shqipërisë, të cilat kontrollohen nga një grup oligarkësh që i përkasin sektit të tij.
Shqipëria e fundit në Ballkan për pensionet
Erion Veliaj e ka trumpetuar si një prej arritjeve të tij më të mëdha ligjin e ri të pensioneve. Ky ligji u miratua kur ai ishte Ministër i Mirëqënies Sociale. I gjithë drafti u përgatit dhe u mbrojt në parlament nga dikasteri i tij. Korrikun e vitit 2014, përpara deputetëve të Komisionit Parlamentar për Punën, Çështjet Sociale dhe Shëndetësinë, Veliaj dha disa argumenta në mbrojtje të projet/ligjit që u miratua më vonë me votat e mazhorancës. Ai tha, veç të tjerash, se skema e mëparshme “karakterizohej nga element të theksuar padrejtëise, pasi disa grupe kontributesh përfitojnë pensione shumë të larta dhe kontribuojnë shumë më pak se të tjerët” dhe se “skema e pensioneve vuan nga një deficit i lartë që e bën financiarisht të papërballueshme në vitet që po vijnë”. A i ka rregulluar ligji i ri këto probleme apo ka dështuar në adresimin e tyre? Naim Hasa, një ekspert i kësaj fushe dhe administrator i një prej shoqërive që operojnë në tregun e pensioneve vullnetare, duke folur për revistën Monitor shprehet se Shqipëria renditet e fundit në rajon përsa i përket vlerës mesatare të pensionit. Kjo vlerë përllogaritet në rreth 98 euro, ndërsa në Maqedoni ajo është 191 euro dhe në Bosnje rreht 179 Euro. “Ligji i ri nuk u ka dhënë zgjidhje një sërë problemesh që kanë të bëjnë me deficitin e lartë (rreth 1.7 % të PBB), shkallës së ulët të mbulimit apo faktit se gjenerohen kryesisht probleme minimale (65 % të numrit total”, shkruan Monitor, teksa thekson se “Shqipëria ka diferenca të mëdha sa i përket sistemit të pensioneve, si në vlerë mesatare ashtu edhe në shkallën e mbulimit”. E fundit, renditet edhe sa i përket shkallës së mbulimit që tregon vartësinë kontribues-përfitues e që është 1.2 me 1. Revista Monitor thekson se “probleme ka edhe me ritmet e rritjes së vlerës së pensionit ( mesatarisht 7-8%) çdo vit dhe numrit të kontribuesve ( 2-3%).” Nga viti 2005 deri në vitin 2013 deficiti mes të ardhurave nga kontributet dhe përfitimet është rritur me 160%. Ekspertët thonë se deficit vë në rrezik qëndrueshmërinë financiare të pensioneve dhe se këtij problemi, ligji i ri nuk i ka dhënë zgjidhje.
Skema për sistemin privat të detyruar në skemën e pensionit
Shqipëria po diskuton mundësinë për futjen e sistemit privat të detyruar në skemën e pensionit, për ta bazuar atë në tre kolona. Instituti i Sigurimeve Shoqërore, në mbledhjen e fundit të Këshillit Administrativ hodhi idenë e realizimit të një studimi që do të mund të hidhte dritë mbi mundësitë për të zbatuar sistemin e kursimit individual (privat), që mbështetet në konributet që paguan edhe vlerën e shtuar nga investimi i tyre. Kjo do të thotë që një pjesë e kontributit të sigurimeve shoqërore që në total sot llogaritet në 21.6% të mund të shkojë për këtë skemë. Vlera mund të jetë në rreth 3% sipas ndarjes rreth 1.6% të paguhet nga punëdhënësi dhe 1.4% për punëmarrësin. Këto mbeten ende hipoteza, megjithatë burime pranë Këshillit Administrativ thonë se, po shikohen mundësitë që në Shqipëri sistemi i pensioneve të bazohet në tri kolona (i detyruar shtetëror, i detyruar privat dhe vullnetar privat). Aktualisht vetëm në Shqipëri, Bosnje dhe Serbi, zbatohet sistemi shtetëror dhe ai vullnetar.
Ekspertët i bënë të ditura këto gjatë një trajnimi që Autoriteti i Mbikëqyrjes Financiare zhvilloi me përfaqësues të mediave për funksionimin e sistemit të pensioneve vullnetare. Sipas specialistëve të AMF-së, Këshilli i Ministrave ka aktualisht në dorë draftin e ri të amendimeve që pritet t’i bëhen projektligjit “Për fondet e pensioneve vullnetare” i miratuar në vitin 2009.
Ndryshimet (miratimi i të cilave është i vonuar) do të qartësojnë më shumë incentivat fiskale që kanë të bëjnë me taksimin e kontributit të paguar në sigurimet e pensioneve vullnetare. Shoqëritë që operojnë në këtë treg, që llogaritet në rreth 6 milionë euro, shprehen se ka pasur paqartësi në zbatimin e lehtësive fiskale. Sipas tyre, ka qenë një lapsus ajo që ka ndodhur deri tani me tatimin e përfitimeve. Me ndryshimet ligjore do të sanksionohet që të tatohet vetëm kontributi i derdhur dhe jo pjesa e përfitimit.
Ligji aktual njeh gjithashtu një vlerë tavan për lehtësitë fiskale që është 250,000 lekë dhe 25% të ardhura vjetore. Sipas shoqërive që operojnë në këtë segment është e nevojshme që të rishikohet ky nivel. Ndryshimet do të zbatohen edhe për një sërë elementësh të tjerë që do të synojnë nxitjen e zhvillimit të këtij tregu që konsiderohet modest, në krahasim me vendet e tjera të rajonit. Për ekspertët e Bankës Botërore që udhëhoqën këtë trajnim shprehen se vendet e rajonit po konsolidojnë sistemet e pensioneve, duke qenë se janë përballë sfidës së plakjes së popullsisë. Gjithnjë e më shumë thonë ekspertët e Bankës Botërore, po ngushtohet hendeku gjinor sa i përket pensioneve. Ndërsa drejtuesi e e shoqërive shqiptare te pensioneve private vullnetare thonë se këto skema kanë një sërë avantazhesh, si: zbatojnë moshën më të hershme për daljen në pension, ofrojnë përfitime më të mëdha, pasi të kthehet edhe investimi i bërë në masën 2-5 herë më i lartë se kontributi i derdhur; nga ana tjetër ky kontribut është i trashëgueshëm. Në lidhje me sistemin aktual të pensioneve në Shqipëri, ata rendisin disa probleme si: deficitin e lartë të financimit që llogaritet në mbi 1.67% të PBB-së; shkallën e lartë të kontribues/përfitues në raportin 1.2-1; shkallën e ulët të zëvendësimit (pension –pagë) 32-35% kundrejt 75% që është norma ligjore; mosfunksionimi për një kohë të gjatë të sistemit privat të pensioneve; sistemi gjeneron kryesisht pensione minimale (65% e numrit total).
FMN zbardh borxhet e reja, huatë e prapambetura të bashkive sa 0.6% e PBB-së
Teksa qeveria shqiptare në fund të vitit që shkoi pastroi mbi 60 miliardë lekë detyrime të prapambetura, borxhe të reja po duken në sfond. Fondi Monetar Ndërkombëtar gjatë Deklaratës në mbyllje të Misionit për Konsultimet për Nenin IV dhe shqyrtimin e shtatë të Marrëveshjes së Zgjeruar, vuri në dukje se, borxhet e prapambetura të pushtetit lokal tashmë janë një rrezik i ri fiskal. FMN duke ju referuar të dhënave të Ministrisë së Çështjeve Vendore ka zbuluar disa detyrime që mund të jenë të prapambetura, prej rreth 0,6 për qind të PBB-së, sipas të dhënave deri në mes të vitit 2015.
Sipas të dhënave të qeverisë shqiptare borxhi i prapambetur i zbuluar nga një proces auditi në njësitë e reja vendore kap shumën e 65 milionë eurove.
“Rekomandohet që autoritetet t’u kërkojnë njësive të qeverisjes vendore të kryejnë auditime dhe të hartojnë plane veprimi për t’i zgjidhur këto detyrime të prapambetura, duke siguruar integritetin e procesit përmes audituesve të jashtëm. Për të zbutur risqet fiskale nga decentralizimi fiskal në proces dhe për të përmirësuar raportimin dhe monitorimin, është mirë të përshpejtohet shqyrtimi i ligjit për financat publike vendore” sugjeron FMN.
Fondi Monetar Ndërkombëtar e ka këshilluar qeverinë se, për të parandaluar rikrijimin e detyrimeve të reja të prapambetura, është mirë të vihen sa më shpejt në zbatim tavanet e angazhimeve shumëvjeçare dhe zgjerimi i institucioneve përdoruese të sistemit të ri informatik të thesarit. Prioritet është miratimi i ligjit organik për buxhetin.
Fondi vlerëson si një rrezik fiskal edhe administrimin tatimor, duke këshilluar që fokusi të jetë në zbatimin në kohë i strategjisë organizative të Administratës tatimore, ku përfshihet ristrukturimi tërësor i Drejtorisë së Përgjithshme të Tatimeve, si edhe miratimi i instrumenteve bashkëkohore të menaxhimit të riskut.
Fondi sugjeron se Administrata Tatimore dhe ajo Doganore duhet të bashkërendojnë më nga afër për vlerësimin e risqeve dhe ruajnë angazhimin në fushatën kundër informalitetit, që ka filluar tashmë të japë rezultatin me një rritje të lartë të numrit të bizneseve të vogla dhe punëmarrësve të regjistruar.
Një tjetër shqetësim për stabilitetin fiskal mbetet edhe Menaxhimi i Investimeve Publike dhe Partneritetet Publike-Private.
Fuqizimi i Menaxhimit të Investimeve Publike dhe rritja e besueshmërisë së kuadrit buxhetor afatmesëm të autoriteteve ka rëndësi tejet të madhe për të ulur riskun e angazhimeve të pambuluara me fonde dhe detyrimeve të prapambetura.
Në veçanti, autoritetet duhet të shqyrtojnë të gjitha projektet e papërfunduara të investimeve që nuk janë të mbuluara me buxhet dhe të identifikojnë projektet që do të anulohen, në bazë të kritereve transparente, sugjeron Fondi.
Të gjitha propozimet për partneritet publik privat (PPP) t’i nënshtrohen studimit të hollësishëm të fizibilitetit dhe analizës kosto-përfitim, studim i cili duhet të vlerësohet nga Ministria e Financave përpara se të jepet aprovimi. Ndikimi që ka çdo PPP i ri në llogaritë fiskale të reflektohet me transparencë dhe në përputhje me normat ndërkombëtare, thuhet në deklaratën e FMN.
Konsolidimi fiskal të fokusohet të informaliteti
Pas vizitës së misionit të FMN-së në Shqipëri, FMN publikoi deklaratën përmbyllëse për vëzhgimin e ekonomisë në artikullin 4.
Ekspertët e Fondit pasi analizuan situatën buxhetore rekomanduan që duke pasur parasysh nivelin relativisht të ulët të shpenzimeve publike, rregullimi fiskal duhet të fokusohet kryesisht në anën e të ardhurave. Duke pasur parasysh nevojën për shpenzime më të mëdha në fusha të tilla si infrastruktura dhe arsimi, si dhe efikasitetit relativisht të ulët të taksave në Shqipëri, strategjia e konsolidimit duhet të fokusohet në zgjerimin e bazës tatimore dhe në forcimin e pajtueshmërisë dhe administrimit të të ardhurave, keshillon FMN.
Fondi kërkon që autoritetet shqiptare të përshpejtojnë punën për kadastrën fiskale, me qëllim të aplikimit të tatimit nbi pronën në deri në fund të vitit 2017. Fondi vuri në dukje gjithashtu se qeveria duhet të pezullojë përjashtimet e tjera tatimore apo trajtimet preferenciale të taksave dhe duhet të përpiqet për të hequr përjashtimet ekzistuese.
Stafi i FMN vuri në dukje se, Shqipëria gradualisht po shërohet nga një ngadalësim i zgjatur rritjes ekonomike. Rritja e Iinvestimeve të Huaja Direkte në projekte të mëdha që kanë të bëjnë me energjinë pritet gjithashtu nxisë rritjen në afat të shkurtër. Rritja e GDP parashikohet të përshpejtohet në 3.4 për qind në vitin 2016, nga 2.6 për qind në vitin 2015. Deficiti i llogarisë korente pritet të zgjerohet. Inflacioni është i ulët dhe ka të ngjarë të jetë i tillë edhe në të ardhmen e afërt.
Ekspertët e Fondit kërkuan që konsolidimi fiskal të vazhdojë për të ulur dobësitë fiskale dhe për të siguruar qëndrueshmërinë e borxhit. Bilanci primar pritet të përmirësojë me rreth 2¼ për qind të PBB-së në vitet 2014-2016, duke arritur një suficit primar këtë vit. “Pas kësaj, autoritetet duhet të vazhdojnë me objektivin e tyre të uljes së borxhit publik nën 60 për qind të PBB-së nga 2019, e cila kërkon ulje me rreth 1 për qind të PBB-së çdo vit”. Për të ankoruar pritjet afatgjata, autoritetet duhet të miratojnë një rregull fiskal mbështetur nga një këshilli fiskal i pavarur. Për më tepër, menaxhimi i borxhit duhet të zgjasë më tej pjekurinë e borxhit publik dhe të diversifikuar bazën e investitorëve, duke ulur rreziqet që dalin për financimin e nevojave, të cilat mbeten të larta.
Pikëpamjet e shprehura në këtë deklaratë janë ato të personelit të FMN-së dhe nuk përfaqësojnë domosdoshmërisht pikëpamjet e Bordit Ekzekutiv të FMN-së, thuhet ne deklarate.
Rama jep me koncesion edhe “Luadhin e Çelos”, banorët bllokojnë rrugën në Pogradec
Rreth 200 banorë të fshatit Zagorcan të Pogradecit u ngritën në protest sot duke bllokuar rrugën nacionale Korçë – Pogradec. Bëhet e ditur se banorët janë ngritur në protestë kundër dhënies me koncesion nga qeveria të një sipërfaqje toke prej 200 hektarësh, një qytetari nga Tepelena.
Toka gjendet në zonën e quajtur “Luadhi i Çelos”. Për 30 minuta ata e bllokuan qarkullimin e automjeteve në rrugë. Banorët thanë se protesta e sotme ishte vetëm paralajmërim dhe se ata do t’i përshkallëzojnë veprimet e tyre. Edhe njësia administrative Buçimas i ka mbështetur ata.
Basha bashkëbisedim me gazetarët: Mbështetje nga SHBA për “fatin” e Al Kaponëve shqiptarë
Kryetari i PD, Lulzim Basha ka zhvilluar sot një bashkëbisedim me gazetarët. Basha ka folur vizitën e suksesshme ën SHBA dhe për disa nga çështjet që ka biseduar me zyrtarët amerikanë, të cilët sipas tij kanë shprehur mbështetjen e plotë për Shqipërinë në sfidat me të cilat përballet. “Po e filloj për t’ju informuar për vizitat në SHBA, ndonëse ajo ka pasur jehonë në mediat sepse është një vizitë e rëndësishme për Shqipërinë”, e nisi fjalën kreu i opozitës Lulzim Basha.
“Të ndërtojmë një vektor kontribuimi që në këto 25 vjet të ekzistencës së shtetit shqiptar ka qënë vetem përfitimi. Vizita ime është e para si kryetar i opozitës dhe vjen në një kohë sfidash të mëdha globale dhe të brendshme të SHBA-së. Janë në valën e primareve presidenciale dhe bota përballet me sfidat e terrorizmit, krizat në Ukrainë etj, të reflektuara në partnerët kryesorë të SHBA, si BE. Megjithatë, zyrtarët amerikanë ndanë kohë dhe vëmendje duke më rezervuar mua jo vetëm kohën dhe vëmendjen, por edhe garancinë për Shqipërinë në sfidat me të cilat ajo përballet.
Dhe ky është në fakt një inkurajim i madh jo vetëm për ne, por të gjithë shqiptarët dhe më sjell para jush me një arsyetim të mbështetur se sfidat kryesore të Shqipërisë do të mbështeten dhe ligji për dekriminalizimin nuk do të mbeten në sirtar, se personat me rekorde kriminale do të nxirren nga institucionet dhe kjo është e papranueshme e theksoj e papranueshme për SHBA dhe nuk do të tolerohen. Ato do të jenë në krah të opozitës për zgjedhjet e lira dhe të ndershme dhe garancinë e votës së lirë.
Së treti, vij me inkurajimin se BKH dhe reforma në drejtësi do të kryhen sipas rekomandimeve të Venecias, sipas standartit europian, sepse askush nuk do të mund të ndalë këtë vullnet që në fakt buron nga qytetarët shqiptarë për të pasur një drejtësi të pakorruptuar për të vënë në presionin e politikë shd en gjendje të hetojë dhe politikën e ta vërë para përgjegjësisë. Ky është thelbi i reformës në drejtësi. Ajo nuk është abstrakte po konkrete. Reforma nuk është krekosje dhe arrogancë. Al kapones së ulur në karrigen e Kryeministrit që natyrisht përkthehet dhe përkthyer në dhjetra Al Kapone të tjerë”, u shpreh Basha.
Plagoset me pistoletë biznesmeni në Shkodër, autorët largohen me motor
Një biznesmen është plagosur me armë mëngjesin e sotëm në Shkodër. Ngjarja ka ndodhur në afërsi të Stadiumit “Loro Boriçi”. Viktimë e të shtënave me armë zjarri ka mbetur një biznesmen 52-vjeçar. Ai është dërguar në spital ku i është dhënë ndihma e parë mjekësore. Pas atentatit, autorët janë larguar nga vendngjarja. Mësohet se kanë qenë dy autrë, me skafandra të cilët lëviznin me një motor.
Sipas policisë Vendore të Shkodrës, plagosja ka ndodhur rreth orës 06:30 në lagjen “Kongresi Përmetit”, të qytetit. Policia bëri të ditur se është qëlluar në rrugë me armë zjarri Berhan Vishnja rreth 52 vjeç, i cili është dërguar në Spitalin Rajonal Shkodër momentalisht jashtë rrezikut për jetën.
Kambistit ju zu pritë pranë kryqëzimit të Zdrales, në afërsi të Stadiumit “Loro Borici”. Sapo 52- vjeçari Vishnja ka mbërritur në zonë dhe është ndaluar për të parkuar, pranë tij ka kaluar një motoçikletë me 2 persona, të cilët pasi iu afruan automjetit qëlluan disa herë në drejtim të tij. Për pasoje Vishnja ka mbetur i plagosur dhe u dergua me urgjencë në spitalin rajonal të Shkodrës. Autorët janë larguar menjëherë nga vendngjarja, ndersa dëshmitarët okular i kanë ardhur në ndihmë Vishnjes.
Pas ndërhyrjes kirurgjikale ai ndodhet jashtë rrezikut për jetën dhe sipas bluzave të bardha 3 plumba e kane prekur atë, 2 në krah dhe një 1 në pjesën e barkut. Menjëherë në vendngjarje kanë mbërritur forcat policore dhe po punojnë për identifikimin dhe kapjen e autorit/ve. Sipas dëshmive të para, 2 autorët që kanë qenë në motoçikletë kanë pasur në kokë skafandra çka e bën më të vështirë identifikimin e tyre.
Si prove materiale policia ka sekuestruar pamjet filmike të disa bizneseve aty pranë, për të mundësuar zbardhjen e ngjarjes. Ende nuk dihet nëse Vishnja ka pasur konflikte të mëparshme me shtetasit në fjalë apo ka qenë tentative grabitje. Grupi hetimor në vendngjarje po punon për sqarimin e rrethanave të ngjarjes.
Kryesore
Continue to the category
