Bajerni dhe Atletiko Madrid ritakohen pas një kohe shumë të gjatë, 42-vjeçare. Por, kujtimet dhe nostalgjia e sjell shumë afër vitin 1974 kur në finalen e Brukselit më 15 dhe 17 maj Bajerni triumfoi 5-1 kundër Atletikos, duke fituar kupën e parë të kampioneve.
Atletiko arrin për herë të dytë në gjysmëfinale në tri vitet e fundit dhe qëndron për herë të 5-të në këtë fazë gjatë historisë së saj. Bilanci është: dy fitore, dy humbje. Spanjollët nuk kanë humbur kurrë në gjysmëfinale në ndeshjet brenda fushe. Në katër takime, ata kanë fituar 3 dhe barazuar 1.
– Ekipi i Simeones ka humbur vetëm një nga shtatë duelet e fundit kundër ekipeve gjermane. Bilanci në “Kalderon” është: 11 fitore, 2 barazime dhe 3 humbje. Miqtë e fundit nga Gjermania kanë qenë “Aspirinat” sezonin e kaluar. Atletiko fitoi 1-0.
– Këtë sezon spanjollët kanë humbur vetëm një herë në shtëpi (1-2 ndaj Benfikës), si dhe ka fituar 24 nga 29 ndeshjet e Kupave të Europës në “Kalderon”.
– Bajerni kualifikohet për herë të pestë radhazi në gjysmëfinale, nga të cilat tri herë ka shkuar në finale (2010, 2012, 2013).
– Në dy vitet e fundit bavarezët i kanë humbur dy transfertat në Spanjë në gjysmëfinale (0-1 në Madrid; 0-3 në Barcelonë). Në 12 transfertat e fundit në Spanjë ka arritur të fitojë 2 dhe humbur 8. Bilanci në tokë spanjolle është: 6 fitore, 5 barazime dhe 12 humbje. Dy transfertat e fundit në Champions Bajerni i mbylli në barazim 2-2 në Torino dhe Lisbonë.
– Bajerni i Guardiolës ka mundur të fitojë vetëm dy nga nëntë transfertat e fundit në Champions, si dhe ka humbur 4. Ndërsa në fazën me eliminim direkt (nga 1/8-at), Bajerni ka mundur të fitojë vetëm 1 nga 7 transfertat e fundit (4 barazime, 3 humbje).
– Është hera e 10-të që Bajerni përballet në gjysmëfinale kundër një ekipi spanjoll. Bilanci është: 7 fitore, 3 humbje.
Portieri më i mirë në botë, Manuel Nojer, ndihet krenar që zgjodhi të braktisë Shalken për të arritur suksese të mëdha. Gjatë një interviste për “Kicker”, gardiani i Bajernit kritikon fansat e Shalkes, vlerëson rekordmenët, si dhe kërcënon Atletiko Madridin. “Në pesë vite me Bajernin kam arritur gjithçka. Këtë sukses nuk do ta kisha parë në ëndërr po të isha te Shalke. Vërshëllimat e tifozëve në atë kohë e kanë marrë përgjigjen. Qëllimi im i ardhshëm është të përmbush kontratën dhe, më pas, do vendos në varësi të gjendjes shëndetësore”, u shpreh Nojer për të ardhmen, duke shtuar për ndeshjen ndaj Atletikos ditën e mërkurë. “Ne e kemi mësuar nga trajneri si të luajmë përballë një ekipi të fortifikuar në mbrojtje apo në një stadium si ‘Kalderon’. Do të jemi të përgatitur për çdo detaj. Është gjysmëfinalja ime e gjashtë radhazi në Champions dhe kjo tregon se kam eksperiencën e duhur për të shkuar të paktën në finale”, deklaroi Nojer.

Kanë mjaftuar vetëm disa paraqitje mbresëlënëse që portieri i skuadrës së Paris Saint Germain, Salvatore Sirigu, të rifitojë vendin e titullarit tek kampionët e Francës. Gardiani i parizienëve falë formës së tij të mirë duket se i ka bindur të gjithë. Madje, mediat franceze nuk kanë nguruar të thurin elozhe për të. Sezonin e kaluar, Sirigu u cilësua si fajtor për eliminimin e PSG nga Champions League dhe vendin e tij e mori Trapp, por duket se nuk ishte ai problemi i skuadrës. Mund të konsiderohet një fitore e Sirigut rikthimi sërish si titullar në formacionin e Laurent Blanc.
Mbështetja e tifozëve nuk i ka munguar në asnjë moment 29-vjeçarit. Një gjë e tillë nuk ka ndodhur me portierin tjetër Trapp, ku në disa raste ka pasur dhe vërshëllima për shkak të gabimeve të rënda. 25-vjeçari gjerman erdhi me shumë bujë nga Eintrachti i Frankfurtit, duke u cilësuar si Manuel Neuer i ri, por në fakt nuk rezultoi kështu. Drejtuesit e klubit francez po mendojnë largimin e Trapp dhe në vend të tij të rikthejnë në shtëpi, portierin Areola, i cili është dhënë në formën e huazimit tek skuadra e Villarreal.

Ndaj Veronës ishte humbja e parë për Kristian Brokin në drejtimin e Milanit. Tekniku kuqezi ka marrë të gjitha përgjegjësitë për rezultatin dhe thotë se, kjo humbje tregon që skuadra duhet të punojë shumë. Ai pranon se të gjithë janë të zhgënjyer, por siguron se vendi i gjashtë nuk është në rrezik, sepse ka edhe 3 ndeshje në të cilat Milani duhet të fitojë. “Si trajner i skuadrës, më duhet të marr të gjitha përgjegjësitë për këtë humbje. Nuk luajtëm keq, por kjo humbje nuk na duhej. Është njëlloj sikur fik dritën. Kam folur me Galianin pas ndeshjes dhe ai ishte i zhgënjyer, por duhet të punojmë shumë për të ardhmen.
Europa? Nuk besoj se do ta rrezikojmë vendin e gjashtë. Kemi edhe 3 javë kampionat, ku na duhet të reagojmë dhe të fitojmë”, tha Broki. Ai vlerësoi Hondën si një nga lojtarët më të mirë të ndeshjes. “Bëri një ndeshje shumë të mirë, duke treguar kualitet dhe dëshirë. Nuk u shoqërua nga të gjithë lojtarët e tjerë, por jam i bindur se do të rikthehemi shumë shpejt në rrugën e duhur”, përfundoi trajneri i Milanit.
Kuqezinjtë e Milanit janë thyer në transfertë, duke iu larguar zonës në Ligën e Europës. Ekipi i Kristian Brokit humbi me rezultatin 1-2 ndaj Verona në ndeshjen e vlefshme për javën e 35-të të Serisë A.
Aktualisht, Milani ndodhet në kuotën e 53 pikëve, ndërsa Verona edhe me tri pikët e marra nuk mundet të dalë nga vendi i fundit, duke rrezikuar rënien nga kategoria. Fillimisht, fitorja e Milanit u duk e lehtë pas golit të avantazhit të realizuar nga Manez në minutën e 21′, por vendasit barazuan në pjesën e dytë me anë të 11-metërshit. Pacini barazoi shifrat në 1-1 në minutën e 72′ dhe Luka Siligardi përmbysi rezultatin në minutat shtesë.

Trajnerit të skuadrës së Leicesterit, Claudio Ranieri do t’i duhet të luaj pa sulmuesin e tij Jamie Vardy në transfertën përballë Man.United, takim ky i cili në rast se “Dheplrat” arrin të marrin një fitore mund të nisin zyrtarisht festën e titullit kampion për herë të parë në historinë e këtij klubi. Vardy këtë sezon ka arritur të shënojë 22 gola por, tani atij do t’i duhet të qëndrojë larg fushës së blertë për shkak të pezullimit. Ndaj 29-vjeçarit është marrë masë disiplinore për shkak të kundërshtimit të vendimit të arbirtrit në takimin kundër skuadrës së West Ham.
Gjithashtu si masë ndëshkuese u vendos dhe një gjobë prej 13 mijë eurosh. Vardy kërkoi që të jepte shpjegime përpara trupës disiplonore për reagimin e tij, por një gjë e tillë nuk u pranua, pasi vendimi ishte dhënë. Gjithashtu, disiplina i vendosi një gjobë prej 20 mijë paundësh klubit të Leicester. Numri 9 do të mund të jetë në dispozicion të trajnerit Ranieri, në ndeshjen e fundit të kampionatit kundër Everton. Tekniku italian po mendon që ndeshjen me Manchester United në sulm të vendosi argjentinasin Ulloa, i cili në takim kundër Swansea arriti të shënojë një dygolësh. Pas barazimit që mori Tottenham ndaj West Bromwich, “Dhelprat” janë shumë afër titullit kampion në Premier League me distancen ndaj Spurs që është 7 pikë, kur mbeten edhe 3 ndeshje për t’u luajtur.

Borussia e Dortmundit duket se e merr në konsideratë mundësinë për shitjen e Mats Hummels, por vetëm nëse oferta që mbërrin për të plotëson vlerën e duhur monetare të vendosur nga ekipi i Signal Iduna Park. Lajmin e konfirmon vetë shefi ekzekutiv i klubit Hans Joakim Watzke. 27 vjeçari Hummels është përfolur shumë gjatë këtyre kohëve të fundit për një largim të mundshëm nga verdhezinjtë, pasi për të duket se interesohen një sërë klubesh elitare, duke filluar që nga rivalët gjermanë të Bayern Munyh deri tek klubet e angleze të Premier të Ligës si Manchester City etj.
Watzke pohoi faktin se do të ishte e gabuar nga ana e Dortmundit të mos i lejonte Hummels mundësinë e largimit, nëse ai e dëshiron diçka të tillë, por njëherazi shtoi se klubi është i vendosur që të mos hedhë asnjë hap nëse ofertat e klubeve nuk do të përkojnë me çmimin e vendosur për kartonin e 27-vjeçarit.
“Duhet ta pranojmë se një lojtar, i cili luan për ekipin tonë prej tetë vitesh dhe që për pak do të mbushë 28 vjeç ka të drejtë që të bëjë zgjedhjen që dëshiron për të ardhmen e tij. Por nëse klubet që dëshirojnë të kenë shërbimet e tij nuk janë të gatshëm të paguajnë mjaftueshëm për të, atëherë mund të themi se, Hummels ka një kontratë me Dortmundin dhe nuk besoj se në një pozitë të tillë do ta kishte problem të vazhdonte të luante për ne”, u shpreh Watzke. Performanca e Hummels gjatë këtij sezoni ka qenë impresionuese, ndërkohë që kontrata e tij me Dortmund përfundon në 2017.
Ndërkohë, Arturo Vidal ka shprehur dëshirën për ta përfunduar karrierën tek Bayern Munich.  Mesfushori kilian Arturo Vidal ka insistuar se është në skuadrën më të mirë në botë dhe se dëshiron të pensionohet në Bayern Munich.
Vida verën e kaluar u transferua nga Juventus, por ai ndjehet shumë i lumtur në Gjermani.  “Faleminderit për gjithë mbështetjen, por tani jam në skuadrën më të mirë në botë. Shpresoj të mbetem këtu deri sa të pensionohem”, tha Vidal për ESPN. Për Vidalin, interesim kishte shprehur Chelsea, por ai mohon se do të largohet nga “Allianz Arena”.

Buffon e ka nisur duke ndezur një puro, Pogba që bërtet si i çmendur, shampanja është hapur nën thirrjet; “jemi ne kampionët e Italisë”, për të bërë më pas një dush me pijen klasike të festimeve, i cili nuk ka kursyer as Massimiliano Alegrin, me lojtarët që më pas janë bashkuar me tifozët për të filluar celebrimet. Festa e titullit të pestë radhazi në Vinovo ka nisur menjëherë pas barazimit të Romës me Napolin.
Juventus është kampione e Italisë për të pestin vit radhazi. Feston titullin ndoshta më të veçantë, me bardhezinjtë që treguan se forca për të mos u dorëzuar kurrë është në ADN e kësaj skuadre. Ky është një titull vërtet fantastik e deri në kufitjtë e të pabesueshmes po të kujtosh nisjen e sezonit.
“Të flasësh për titullin tani nuk ka kuptim”, kështu deklaronte Alegri në 29 tetor të 2015, kur Juventus ishte mposhtur 1-0 nga Suassulo, klasifikimi shikonte Romën në krye me 23 pikë ndërsa Juventusi renditej në vendin e 12 me 12 pikë. Për një skuadër tjetër do të flitej për një sezon të çuar dëm, por jo për Juventusin.
Alegri fiksoi objektivin, në Krishtlindje duhej arritur me 4-5 pikë pas kreut, por Juventusi bëri akoma dhe më shumë, duke fituar 24 ndeshje në 25 të luajtura, një seri e jashtëzakonshme. E përkthyer në pikë, bëjnë 73 pikë në 75 të mundshme. Rekordet janë bërë për t’u thyer, por nuk është ilegjitime të mendosh se kjo është një seri e destinuar të mbetet e pashoqe për një kohë të gjatë. Një seri që i lejoi Juventusit të fitonte titullin 3 javë para fundit të kampionatit, pikërisht si në 2012 me Conten, titulli i parë një serie prej 5 titujsh radhazi në shtëpinë e Juventus, nuk ndodhte që nga vitet 30 që Juventusi të fitonte 5 tituj radhazi.
Në 25 javë kampionat, bardhezinjtë rikuperuan plot 25 pikë ndaj Romës dhe 21 ndaj Napolit, thjesht e pabesueshme.
Një arritje e firmosur nga Alegri, Buffon, Dybala, Mandzukiç, e Pogba, një manifestim i pastër Superioriteti, të paktën në Itali, Juventus ka bërë sërish historinë.
Të gjitha rrugët të çojnë në Romë, madje dhe ato të titullit të Serisë A, me Juventusin që u kurorëzua kampione pikërisht në qytetin e përjetshëm, falë golit të Naingolan në minutën e 89-të, që i dha fitoren verdhekuqve ndaj Napolit, duke dorëzuar dhe titullin në duart e bardhezinjve, që fitojnë titullin e 32-të dhe të pestin radhazi, si askush tjetër më parë. Napoli në fakt në “Olimpico” shpërdoroi shumë për të marrë fitoren, që thjesht do të kishte shtyrë festën juventine, pasi titulli gjithsesi ishte një çështje e mbyllur.
Roma, që luajti një ndeshje përgjithësisht të kujdesshme, pati një mundësi që në minutën e parë me Salah, ndërsa pjesa tjetër e fraksionit ishte e tëra për Napolin. Jugorëve madje iu anullua dhe një gol në minutën e 26-të. Në pjesën e dytë Napoli gjithashtu krijoi shumë, dhe iu afrua golit dhe në minutat 65-të dhe 73-të me Mertens dhe Higuain, por pa mundur dot të dërgojë topin në rrjetë, gjë që bëri Naingolan pikërisht 1 minut para fundit, duke i dhënë dhe titullin kampion Juventusit.

Kur flet Diego Armando Maradona, të gjithë duhet ta dëgjojnë. El Pibe De Oro shigjeton pa frena Juventusin e saposhpallur kampion dhe Antonio Conten, por lëshon edhe disa “perla” për Napolin, skuadrën me të cilën ka shkruar historinë në futbollin italian. “Juvja e meriton titullin, sepse ka zhvilluar shumë ndeshje pa lënë pikë rrugës. Më duhet ta pranoj që ka fituar edhe me këllqe. Bardhezinjtë godisnin 2 herë drejt portës dhe shënonin 4 gola. Në momentet më të vështira, Juvja ka ditur t’i zgjidhë problemet. Bleu lojtarë, gjë që nuk e bëri Napoli. Sarri nuk kishte organikën e Alegrit, kjo është e vërteta”, u shpreh Maradona.
Por Maradona, nuk ka vetëm vlerësime pozitive për Juventusin, pasi sipas tij, bardhezinjtë ndihmohen edhe nga Federata Italianë e Futbollit. “Juvja ka lojtarë fenomenalë edhe në federatë dhe në sektorin e arbitrave. Kjo nuk është risi. Çfarëdo problemi që mund të ketë në fushë një lojtar i Juventusit, ai gjithmonë ka të drejtë. De Laurentiisit i këshilloj të vendosë lojtarët e tij në federatë, në mënyrë që ta respektojnë sikurse ka ndodhur me drejtues të tjerë të Napolit në të kaluarën. Vetëm në këtë mënyrë, Napoli do të ketë forcën e Juventusit. Goli që iu anulua Fiorentinës ishte një skandal. Dhe kjo ndodhi vetëm se përballë ishte fanella e Juves. Nëse Napoli nuk do të ishte në garë për titullin, Higuain do të dënohej vetëm një ose gjysmë ndeshjeje”, tha ai.
Maradona ka diçka edhe për Antonio Conten, trajnerin e ardhshëm të Chelseat. “Historia e Contes më duket një turp. Eshtë e shëmtuar që trajneri i kombëtares italiane, që ka një prestigj të pabesueshëm në tërë botën, shkon e firmos me Chelsean”, përfundoi Maradona.

Kina nuk heq dorë nga Zlatan Ibrahimoviç. Sulmuesi suedez, kontrata e të cilit me Paris Saint-Germain skadon në qershor, ua ka bërë të qartë kushtet e tij skuadrave që interesohen për të. 34-vjeçari kërkon 100 milionë euro në sezon për t’u transferuar në kampionatin kinez. Vetëm gjatë merkatos së janarit klubet e Superligës së Kinës shpenzuan plot 366 milionë euro, duke afruar lojtarë që luanin në Europë. Mirëpo në Kinë nuk kanë ndërmend të ndalen, kërkojnë Ibrën për të bërë goditjen e madhe. Sulmi ndaj Zlatan ka nisur me mbështetjen e Partisë Komunistë, pasi imazhi i gjigantit suedez do të kishte një impakt të menjëhershëm në futbollin kinez, ku luajnë gjithashtu emra të rëndësishëm si Lavezzi, Ramires, Gervinho, Guarin, Jackson Martinez e Alex Teixeira.