Me titullin e 5 kampion radhazi thuajse të arkivuar, në shtëpinë e Juventusit kanë nisur të mendojnë për sezonin e ardhshëm. Për të fituar edhe në Europë bardhezinjtë duhet të ruajnë grupin aktual dhe të përforcohen me të tjerë elementë cilësorë, edhe pse më e rëndësishme për “Zonjën e Vjetër”, aktualisht është të mbajë në skuadër xhevahirët e saj. Duke filluar nga Paul Pogba për të vazhduar me Paulo Dybalan dhe Alvaro Moratën. Për këtë të fundit po flitet shumë se Reali i Madridit do të riblejë kartonin e tij për shumën e 30 milionëve euro siç është përcaktuar në kontratë, megjithatë te Juventusi nuk dorëzohen dhe pas 20 milionë eurove fillestare janë gati t’i ofrojnë klubit Blanco, 25 milionë euro të tjera për të bërë përfundimisht të tyrin sulmuesin spanjoll. Pavarësisht ofertave edhe Paulo Dybala do të qëndrojë.
Një objektiv i bardhezinjve për sulmin është edhe Edinson Cavani, por uruguaiani kushton me të vërtetë shumë. Përsa i përket francezit Paul Pogba drejtuesit e Juventusit me kërkesë edhe të trajnerit Massimiliano Allegri mund të refuzojnë edhe shumën e çmendur që kap shifrën e 100 milionë eurove për të mbajtur në skuadër 23-vjeçarin. Për mesfushën Juventusi pëlqen disa lojtarë si Isco, Mkhitarayn e Kante, por kjo nuk do të thotë se kampionët e Italisë do të heqin dorë nga Pogba. Në mbrojtje objektivi i klubit bardhezi është t’i blindojë të gjithë, përfshirë këtu edhe Leonardo Bonuccin, ndërsa drejtuesit kanë hedhur sytë nga Benatia dhe Hummels.
Titulli i 5 kampion radhazi në Serinë A është vetëm 1 fitore larg për Juventusin. Juventus të dielën luan në transfertën delikate të Firenzes kundër Fiorentinës dhe në rast të një rezultati pozitiv, e vetmja gjë që i mbetet të bëjë është të ulet përpara televizorit dhe të ndjekë pa kurrfarë shqetësimi takimin mes Romës dhe Napolit. Festa mund të nisë më 25 prill, por nëse avantazhi vazhdon të mbetet në kuotën e 9 pikëve, atëherë do të ketë shtyrje të zyrtarizimit të titullit. Nëse 25 prilli nuk do të jetë data e shumëpritur, tifozëve të Juventusit do t’u duhet të presin datën 1 maj në takimin kundër Carpit. Sidoqoftë një gjë është e sigurt, titulli i pestë kampion qëndron pas derës dhe “Zonja e Vjetër” mjafton të presë kohën e duhur për të nisur festën bashkë me tifozët e saj në sheshin qendror të Torinos.

Objektivi i sezonit, që ishte renditja në një nga tre vendet që të çojnë në Ligën e Kampioneve duket i paarritshëm tashmë, por ky duket se nuk është problemi i vetëm për skuadrën e Interit. Së fundi lindi edhe një histori spiunazhi. Sipas asaj që shkruan e përditshmja italiane “La Repubblica”, drejtori i Përgjithshëm i zikaltërve, Michael Bolingbroke u ka kërkuar të gjithë vartësve të tij “të bëjnë sytë katër” dhe të tregojnë kujdes maksimal kur të diskutojnë për sekretet e klubit.
I gjithë ky udhëzim i tij, sipas të njëjtave burime, është bërë pasi ka gjetur nën tavolinën e tij një çimkë përgjuese. Rasti brenda klubit po merret me seriozitetin maksimal dhe po hetohet për gjetjen e “spiunit” edhe pse dikush brenda kampit mund ta ketë marrë me sportivitet këtë. Ndërkohë, në një tjetër zhvillim, presidenti Thohir dhe grupi “Suning” pritet të takohen së shpejti. Në tavolinën e bisedimeve janë 20 për qind të aksioneve të skuadrës dhe siç thonë mediat sportive italiane, negociatat janë në fazë të avancuar.
Ndërkohë, Milan dhe Carpi ndahen në një barazim pa gola mes tyre, ashtu si në fazën e parë vetëm se këtë herë në “San Siro”. Një pikë me vlera për Carpin që kërkon shpëtim në fund tabele përballë një Milani që në fund u vërshëllye dhe nga publiku i tij, duke dhuruar një 90 minutësh pa shumë emocione për të pranishmit në stadiumin e Milanos. Në një sfidë që vlente më shumë për Carpin sesa për Milanin sa i përket objektivave ishin kuqezinjtë që udhëhoqën ritmin, pavarësisht se pjesa e parë nuk rezervoi ndonjë rast të jashtëzakonshëm nga milanezët, që gjithsesi në pjesën e parë nuk u vunë asnjëherë në vështirësi nga miqtë.
Në pjesën e dytë, loja u balancua disi me Carpin që rrezikoi në minutën e 48-të me anë të Mbakogu, ndërsa Milani në krahun tjetër pa t’i anulohej një gol me Jose Maurin në minutën e 65-të. Gjithsesi Carpi në nevojë për pikë për qëndrimin në Serinë A u hap disi duke lënë hapësira pas për vendasit, që iu afruan golit sërish me Jose Maurin që në të 74-trën nuk shfrytëzoi siç duhet një pasim të Abates. Gjithsesi rastin e ndeshjes e pati Carpi në minutën e 90-të me Donnarumën që bëri një pritje të jashtëzakonshme, duke i mohuar golin e 3 pikëve miqve, që do të ishin aq të nevojshme për skuadrën mike për të prekur shpëtimin.

Talenti shqiptar i Interit, Rey Manaj ka shprehur haptazi synimet e tij për të qenë një prej kuqezinjve në Euro 2016. Edhe pse është vetëm 19 vjeç, në një intervistë për “Inter Channel”, kanalin zyrtar të klubit zikaltër, Manaj ka thënë se objektivi i tij më i afërt është të shkojë në Francë me Shqipërinë.
“Sigurisht që të shkoj në Europian është një objektiv i madh për mua, shpresoj ta realizoj këtë arritje. Me fanellën e kombëtares time shënova në debutim pas vetëm 12 sekondash dhe është diçka për të cilën jam krenar. Atë ditë sapo zbrita në fushë, De Biasi erdhi drejt meje duke më thënë se do të debutoja dhe unë iu përgjigja se edhe do të shënoja, por tani shpresoj të shënoj dhe në ndeshjet e Europianit. Ky kompeticion më ngacmon pasi kombëtarja jonë nuk kishte arritur kurrë një mision të tillë dhe do të shkojmë aty me një grup të mirë. Mezi po pres ta luaj”.
Nga kombëtarja te eksperienca e tij me Interin, Manaj rrëfehet gjerë e gjatë mbi shumë episode nga jeta e tij me zikaltërit, tregon se ka më tepër miqësi me Medel dhe merr shpesh këshilla nga Palacio e Jovetiç për sa i përket lëvizjeve në fushë, zbulon se futbollisti i tij i preferuar është Zlatan Ibrahimoviç dhe është një kampion në Play Station, ndërsa zbulon edhe disa prapaskena interesante në lidhje me transferimin e tij te zikaltërit, duke u shprehur. “Kishte shumë skuadra që më ndiqnin, por unë kam qenë gjithmonë interist. Kujtoj se gjatë sezonit nuk doja të mendoja për asgjë dhe të përqendrohesha vetëm në fushë. Pastaj më thanë se Inter dhe Juventusi ishin interesuar për mua dhe unë nuk pata asnjë dyshim se ku do të shkoja”.

Trabzonspor është bërë skuadra e fundit që dëshiron shërbimet e trajnerit të kombëtares shqiptare, Giani de Biasi. Sipas mediave turke, Trabzonspor ka filluar të mendojë për sezonin e ardhshëm me De Biasin në stol. Trabzonspor po përballet me vështirësi financiare, ndërsa De Biasi është trajneri që mund të bëjë gjëra të mëdha me shpenzime të vogla. Ata kujtojnë se si bëri historinë me Shqipërinë duke kualifikuar kombëtaren kuqezi në Europian. Kjo skuadër po bën një sezon poshtë pritshmërive dhe dëshiron që të ringrihet dhe çelësi i suksesit mund të jetë trajneri italian. Mediat turke shkruajnë se De Biasi është një trajner që bën një futboll të bukur duke aplikuar modulin 4-2-3-1.

Trajneri i kombëtares shqiptare, Gianni de Biasi këmbëngul se për momentin nuk po mendon për ofertat e mundshme, por vetëm për pjesëmarrjen me Shqipërinë në Europian. Në një intervistë të dhënë për “Il Messagero”, 59-vjeçari ka treguar se cila ishte formula e suksesit të tij me kuqezinjtë, falë së cilës është kthyer në një emër të njohur në arenën ndërkombëtare.
“Në Itali nuk e kuptuan se çfarë trajneri kishin në duar? Sigurisht që e kuptuan, unë jam krenar për atë që kam kaluar në Itali. Ndoshta do të përjetoj eksperienca të tjera italiane. Por të kthehemi te Shqipëria: do të shkojmë në Francë pasi jemi një skuadër. Jemi individualitete, por gjithmonë brenda një skuadre. Kjo është mënyra se si shumëfishohen forcat. Asnjë individualizëm. Jemi si Leicesteri i mikut tim Ranieri. Jo, në fakt ne dolëm në skenë përpara”, ishte batuta e De Biasit.
Suksesi me Shqipërinë e ka kthyer atë në një kandidat potencial për të marrë drejtimin e kombëtares italiane pas Euro 2016. “Çdo trajner italian ndjen kënaqësi kur sheh emrin e tij në orbitën e kombëtares. Jam italian, drejtoj Shqipërinë, do të shkojmë në Europian dhe duam të luajmë shanset tona aty. Pas Francës? Kurrë mos thuaj kurrë!”, vijoi De Biasi, i cili më pas u pyet nëse kishte marrë oferta nga klubet italiane.
“Asnjë. Në fakt jo, më ka mbërritur një dhe iu përgjigja: Faleminderit, por jam trajneri i Shqipërisë, po shkojmë të luajmë në Europian”, ishte përgjigjja e trajnerit që përsëri nuk zbuloi se cili ishte klubi që interesohej për të. De Biasi ka treguar për gazetën italiane disa detaje të jetës së dy futbollistëve shqiptarë që luajnë në Serinë A, Elseid Hysajt dhe Etrit Berishës.
“Babai i Hysajt ka bërë shtatë rrugë, e përsëris shtatë, me gomone për të sjellë familjen e tij në Itali. Ishte murator, ndërsa tani sheh të birin të luajë te Napoli dhe në Europian. Herën e parë që një bashkëpunëtor i imi takoi Berishën, ai po peshkonte. Jetonte dhe luante në Kallmar, në fakt jetonte në një qendër peshkatarësh pranë qytezës suedeze. Para se të stërvitej me ne, nuk kishte pasur asnjëherë një përgatitës portierësh. Më mjaftoi një ndeshje, një miqësore kundër Iranit, për të kuptuar se cili ishte potenciali i tij i jashtëzakonshëm”, tregoi De Biasi.