Tri stadiume të mbushur me kapacitet të plotë, me mijëra tifozë në krah të kombëtares. Në pjesëmarrjen historike në Euro 2016, Shqipëria pritet të jetë një prej skuadrave me mbështetjen më të madhe të evenimentit. Kjo jo vetëm në ndeshjen hapëse me Zvicrën apo edhe në sfidën me Francën organizatore, por edhe për duelin e fundit në Grupin A kundër Rumanisë.
Në ndeshjen që do të luhet më 19 qershor në Lion, të pranishëm në “Stade des Lumieres” do të jenë 59,286 spektatorë. Pra, impianti është i shitur me kapacitet të plotë, edhe pse vetëm një muaj më parë, UEFA njoftoi se kishte rinxjerrë në shitje bileta për sfidën Shqipëri-Rumani.
Tashmë në portalin zyrtar të Konfederatës Europiane të Futbollit, ku tifozët kanë aplikuar për bileta, shfaqet njoftimi i UEFA-s: “Momentalisht nuk ka bileta të disponueshme për ndeshjet e Euro 2016. Provoni më vonë, pasi disponueshmëria mund të ndryshojë”. Shitja e të gjitha biletave për ndeshjen e kombëtares kuqezi me Rumaninë është një lajm i mirë, jo vetëm për spektaklin, por mbi të gjitha për skuadrën e Gianni de Biasit.
Kjo për faktin se ndeshja e fundit në Grupin A pritet të jetë vendimtare për ambiciet e Shqipërisë, që të kualifikohet në fazën e 1/8-ave të turneut. Zgjerimi i Kampionatit Europian dhe ndryshimi i formulës, ku përveç dy ekipeve të para në gjashtë grupet e Euro 2016, kualifikohen edhe 4 të tretat më të mira, bëjnë që shanset për të kaluar grupin të jenë reale.
Shqipëri-Rumani, shiten të gjitha biletat
Ranieri shikon vetëm Leicester
Claudio Ranieri i dashuruar me Leicester. Trajneri i “dhelprave” është rrëfyer për të tashmen, të kaluarën dhe të ardhmen. Ai shprehet se është i gatshëm të qëndrojë tek skuadra e Leicester edhe për 8 vitet e ardhshme pavarësisht se interesi për të është i madh si pasojë e sezonit të mrekullueshëm me Leicester, me Ranierin që është një ndër kandidatët e stolit të kombëtares italiane, por vetë tekniku i premton besnikëri skuadrës angleze.
“Jam i gatshëm të qëndroj tek Leicester edhe për 8 vite të tjera. Dëshiroj që karrierën time si trajner ta mbyll këtu. Gjatë kohës kur unë drejtoja Interin, e vetmja gjë që bënë drejtuesit zikatër ishte që më shitën lojtarët më të mirë. Përsa i përket stolit të kombëtares nuk jam ende i gatshëm të marr mbi super një mision të tillë”, u shpreh Ranieri.
Më tej Ranieri ka folur dhe për marrëdhëniet mes tij dhe futbollistëve. Ai shprehet se ka një raport shumë të mirë me ta. “Djemtë janë duke përjetuar një moment fantastik. Jemi afër të bërit histori. Ky i joni është një tren që duhet të kalojë tani ose kurrë më. Kam një raport të shkëlqyer me futbollistët, i dua ata njësoj si të ishin djemtë e mi”, tha ai.
Kryesojnë renditjen me +7 pikë nga Totenhemi, kur kanë mbetur 5 javë nga fundi i Premier Ligës dhe vetëm 48 orë nga ndeshje me Uest Hemin. “Sindroma” Leicester ka përfshirë këdo, të gjithë globin, sepse ndryshe nuk shpjegohet prania e 70 gazetarëve në konferencën e djeshme të Claudio Ranierit, të cilët vinin nga çdo cep i botës: Italia, Japonia, Australia, Danimarka, Spanja, Kina, Tajlanda, SHBA dhe jo vetëm.
Leicesteri është fenomeni i ri i futbollit global dhe të gjithë bëjnë tifozllëk për Ranierin dhe skuadrën e tij, të cilët i ndajnë shumë pak sforco nga fitorja përrallore. Por nëse dikush mendon se tensioni në shtëpinë e “dhelprave” shtohet, trajneri italian nënvizon të kundërtën.
“Jam i përqendruar vetëm te ndeshja me Uest Hemin. Dua një skuadër grintoze, që të tregojë një karakter të fortë, edhe sikur gjërat të shkojnë keq. Ky sport të detyron të luftosh, sepse futbolli është shumë i çuditshëm. Hapi i sigurt i radhës për ne është pjesëmarrja në Ligën e Kampioneve. Më pëlqen himni i këtij kompeticioni, por mbi të gjitha më pëlqen kjo skuadër, tek e cila do të doja të mbyllja karrierën time, nëse pronari është dakord, normalisht. Do të qëndroja përjetë këtu”, tha Ranieri.
“Nervoz përpara Uest Hemit? Absolutisht jo. Nuk kemi arsye pse të kemi. Duhet të luajmë siç kemi bërë deri tani, duke buzëqeshur në fushë, çfarëdo gjëje që të ndodhë. Tashmë mbijetesën e kemi siguruar dhe sido që të shkojë, mrekullinë e kemi bërë gjithsesi. Ndonëse, nëse luajmë me të njëjtin shpirt siç bëmë kundër Sauthemptonit dhe Sandërlendit, ku nuk pësuam gol, mund të kalojmë edhe Uest Hemin dhe t’i afrohemi titullit kampion”.
Skema e vjedhjes së 400 milionë lekëve me barnat e veteranëve
Pas skandalit korruptiv të një viti më parë me Fondin e Rimbursimeve, një skemë e re vjedhjeje përfshin në një tjetër aferë në këtë institucion. Pak muaj më parë është bërë një kontroll në Drejtorinë Rajonale të Fondit të Sigurimeve të Kujdesit Shëndetësor Tiranë dhe është zbuluar një tjetër skemë mashtrimi, një skemë abuzive me barnat për veteranët e Luftës Nacional Çlirimtare. Kjo skemë është në vazhdën e ngritjes së skemave abuzive dhe heqjes qëllimisht të mekanizmit të kontrollit për barnat nga MSH në dy vitet e fundit. Nga kontrolli ka rezultuar se në periudhën shtator 2014 deri në fund të vitit 2015 në disa farmaci të Tiranës, Fondi i Sigurimeve Shëndetësore ka rimbursuar të ashtuquajturin Neuro AID, i cili edhe nga verifikimet nuk rezulton në Listën e Barnave të Rimbursuara nga Fondi, si edhe nuk figuron në regjistrin e Agjencisë Kombëtare të Barnave dhe çka është më e rënda rezulton se ky Neuro Aid-i nuk është bar apo medikament, por një suplement dhe për pasojë nuk është i regjistruar në Republikën e Shqipërisë. Në një situatë të tillë ky suplement nuk duhej të rimbursohej. Por për fatin e keq tonin, ky suplement është rimbursuar në rreth 4 farmaci në kryeqytet për muajt shtator 2014-tetor 2015 me një vlerë totale prej 40 milionë lekësh të reja. Këto farmaci nga të dhënat rezultojnë të jenë në pronësi të ish-drejtuesve të lartë të Fondit dhe njerëzve të lidhur me MSH (farmacia “Coli’s”, “Geni-Lori”, “Nikol 2”, etj). Nga informacioni që disponohet rezulton se ky suplement ka hyrë në Shqipëri me vlerë rreth 25.000 lekë (gjithmonë të reja), (1 kuti me 180 kapsula) dhe është rimbursuar nga Fondi për periudhën në fjalë duke variuar nga 170,000 lekë të reja për recetë çdo muaj gjatë vitit 2014 deri në vlerën 130.000 lekë të reja për recetë çdo muaj në vitin 2015. Pra, për rreth një vit e gjysmë është lejuar të funksionojë kjo skemë mashtrimi me Fondin e Rimbursimit, si edhe nga të dhënat tona rezulton se në shumicën e rasteve ky suplement nuk është marrë fare nga veteranët në Tiranë, por thjesht janë mbushur receta fiktive dhe janë rimbursuar lekët në farmacitë e pushtetit të sotëm. Mësohet se pas këtij kontrolli janë marrë masa administrative (për peshqit e vegjël), por nuk dihet se si është mbyllur vlera prej rreth 40 milionë lekësh (ose 400 milionë lekë të vjetra). (Kanë marrë vetëm vërejtje disa specialistë të Drejtorisë së Tiranës).
Vjedhjet me skemën e rimbursimit nisën më 2014
Prokuroria e Tiranës nisi hetimet vjet për veprat penale të “Mashtrimit me subvencione”, “Falsifikimit të dokumenteve shëndetësore”, “Pastrimit të produkteve të veprës penale” dhe “Shpërdorimit të detyrës” në datë 22 maj 2015, bazuar në informacionin e ardhur nga Fondi i Sigurimit të Detyrueshëm të Kujdesit Shëndetësor (FSDKSH). Skandali i vjedhjes së më shumë se 1.5 miliardë lekëve nga rimbursimi i ilaçeve ka përfshirë hetimin e disa farmacive private në Tiranë, që mësohet se janë nën pronësinë e njerëzve të zëvendësdrejtorit të Fondit të Sigurimeve të Kujdesit të Detyrueshëm Shëndetësor, Sokol Skura. Fillimisht nisën hetimet për 4 farmaci fiktive, të cilat me anë të recetave të rimbursueshme, që dyshohet se janë falsifikuar kanë përfituar rreth 550 milionë lekë. Kallëzimi u dorëzua vjet vetëm pak ditë më parë, pasi Fondi i Sigurimeve të Kujdesit të Detyrueshëm Shëndetësor ka rimbursuar të gjitha këto receta, që mendohet se janë falsifikuar. Burimet thonë se, nga verifikimi paraprak, dyshohet se recetat e rimbursuara janë lëshuar vetëm nga këto 4 farmaci, të cilat nuk ekzistojnë dhe nuk janë të regjistruar në asnjë nga institucionet shtetërore. Po ashtu, edhe recetat e rimbursuara, sipas akuzës, janë firmosur nga më shumë se 80 mjekë të ndryshëm të familjes në qendrën shëndetësore. Mësohet se çdo recetë ka emër konkret të pacientit, moshën dhe diagnozën, për të cilën kërkohet marrja e ilaçit, që në të shumtën e rasteve janë mjekime për sëmundjet kancerogjene. Vlera e këtyre ilaçeve të rimbursuara, sipas hetuesve, kap shifrën nga 350 deri 800 mijë lekë e që në total kap shifrën e rreth 550 milionë lekëve. Ky abuzim i rimbursimit tashmë, sipas burimeve nga Prokuroria e Përgjithshme ka ndodhur gjatë periudhës nëntor 2014 deri në prill të 2015, kur edhe është konstatuar abuzimi. Hetuesit thonë se referuar materialit kallëzues, thuajse të gjithë mjekët e pyetur, emrat dhe vulat e të cilëve ndodhen në recetë kanë mohuar se kanë lëshuar receta të tilla, për këtë fakt ka lindur dyshimi se po abuzohet me këto receta të rimbursimit. Hetimet e Prokurorisë kanë përfshirë rimbursimin e ilaçeve që nga fillimi i vitit 2014, ndryshe nga sa parashikohej në denoncimin e bërë nga Fondi i Sigurimeve, që përfshinte periudhën nga nëntori 2014 deri në prill të 2015. Recetat e falsifikuara nga organizatorët e kësaj skeme ishin ato të sëmundjeve kancerogjene. Kjo sepse, ilaçet për këto sëmundje kushtojnë më shtrenjtë dhe rimbursimi arrinte në shifrat e 350-800 mijë lekë për një ilaç. Gjithsej 420 mijë euro sipas padisë janë përfituar nga 4 farmaci fiktive vetëm në periudhën nëntor 2014-prill 2015. Menjëherë pas rimbursimit të kësaj shume, auditi i Zyrës së Antikorrupsionit në Kryeministri ka hartuar një raport prej 50 faqesh për këtë skandal. Por skandali është thelluar më tej, kur ky raport nuk është dorëzuar në Prokurori, por është mbajtur i fshehtë. Burime pranë Zyrës së Antikorrupsionit thanë se një kopje e raportit që evidentoi skandalin i është vënë në dispozicion zyrtarëve të Fondit të Sigurimeve Shëndetësore. Në raport konstatohen shkeljet e dhjetëra farmacive dhe shkelje të tjera që kapin shifra marramendëse, por këto u mbajtën të fshehta nga zyrtarët e Fondit.
A.Shahini
Bie ndjeshëm besimi në ekonomi në muajt e parë 2016, poshtë mesatares afatgjatë
Ndonëse ndërtimi është sektori që ka udhëhequr rritjen ekonomike në dy tremujorët e fundit të 2015, ai ka dhënë ndikimin kryesor në rënien e besimit në ekonomi në muajt e parë të 2016-ës, duke paralajmëruar se rritja e tij në muajt në vijim mund të vihet në dilemë.
Treguesi i ndjesisë ekonomike (TNE) ra me 5.7 pikë, në tremujorin e parë të vitit 2016, duke zbritur poshtë mesatares historike për herë të parë pas tre tremujorëve, raportoi Banka e Shqipërisë. Ecuria e këtij treguesi u përcaktua nga rënia e besimit në të gjithë sektorët e ekonomisë, ku rënie më të fortë regjistroi besimi në sektorin e ndërtimit. Në rënie ka qenë dhe besimi konsumator. Sipas grafikut të Bankës, ky është niveli më i ulët që nga tremujori i parë i vitit 2014.
Sektori i industrisë
Treguesi i besimit në sektorin e industrisë (TBI) u ul me 3 pikë përqindje, në tremujorin e parë të vitit 2016. Niveli i TBI-së është luhatur nëpër tremujorë, që nga fillimi i vitit 2015, por duke qëndruar sipër mesatares së tij historike. Aktualisht TBI-ja qëndron 4.5 pikë përqindje mbi mesataren. Në tremujorin e parë të këtij viti, rënia e TBI-së u përcaktua nga rënia në të tre përbërësit e tij: balanca e prodhimit ra me 8.1 pikë përqindje, balanca e gjendjes financiare ra me 7.7 pikë përqindje, dhe balanca e gjendjes së inventarëve u rrit me 6.6 pikë përqindje.
Balancat për pyetjet se si bizneset e vlerësojnë situatën ekonomike në vend dhe gjendjen e përgjithshme të biznesit, janë ulur përkatësisht me 9.7 dhe 5.8 pikë përqindje. Pritjet e bizneseve për gjendjen e përgjithshme të biznesit të tyre në tremujorin e dytë janë rritur lehtësisht (balanca u rrit me 1.3 pikë përqindje).
Balanca e kërkesës ka pësuar rënien më të theksuar në tremujorin e parë, me 12.4 pikë përqindje. Gjithashtu, kërkesa nga eksportet vlerësohet të ketë rënë (balanca ra me 2.6 pikë përqindje). Për tremujorin e dytë, bizneset presin një rikuperim të lehtë të kërkesës (balanca u rrit me 0.3 pikë përqindje).
Balanca e pyetjes mbi investimet e reja, të kryera gjatë gjashtëmujorit të fundit, si dhe ajo për investimet e pritura në gjashtë muajt e ardhshëm, janë rritur me 16.1 pikë përqindje dhe 20.2 pikë përqindje këtë periudhë. Bizneset kanë vlerësuar një rritje të lehtë të çmimeve të prodhimit për të dytin tremujor radhazi. Norma e shfrytëzimit të kapaciteteve në industri shënoi vlerën 69.0% në tremujorin e parë, 2.9 pikë përqindje më e ulët se mesatarja historike. Bizneset e industrisë i kanë shfrytëzuar më pak kapacitetet e tyre, në krahasim me tremujorin e katërt të vitit 2015 (me 4.6 pikë përqindje), por disi më shumë se i njëjti tremujor i një viti më parë (me 1.2 pikë përqindje).
Sektori i ndërtimit
Treguesi i besimit në sektorin e ndërtimit (TBN) ra me 16.7 pikë përqindje në tremujorin e parë të vitit 2016, pas dy tremujorësh me rritje. Niveli i tij qëndron poshtë mesatares historike me 15.4 pikë përqindje dhe poshtë mesatares së periudhës 2008 – 2015 me 9.0 pikë përqindje. Në rënien e TBN-së ndikuan të treja balancat formuese të tij: balanca e kërkesës, e prodhimit dhe e gjendjes së punësimit, të cilat ranë përkatësisht me 20.0, 15.5 dhe 14.4 pikë përqindje.
Gjatë tremujorit të parë janë vlerësuar me rënie të gjitha aspektet e biznesit në sektorin e ndërtimit. Rënien më të theksuar e shënoi balanca e gjendjes së përgjithshme të biznesit, me 23 pikë përqindje. Pritjet për gjendjen e përgjithshme të biznesit, për tremujorin e dytë të vitit, janë gjithashtu me rënie. Edhe balanca e gjendjes financiare regjistroi rënie me 21.2 pikë përqindje në tremujorin e parë. Në përputhje me rënien e kërkesës, gjendja e inventarëve vlerësohet të jetë rritur në këtë tremujor. Ndërkohë, balanca e pyetjes mbi investimet e reja, të kryera gjatë gjashtë muajve të fundit, është zvogëluar me 13.8 pikë përqindje, por pritjet për gjashtë muajt e ardhshëm janë rritur me 5.7 pikë përqindje. Çmimet e prodhimit janë raportuar në rritje në sektorin e ndërtimit.
Norma e shfrytëzimit të kapaciteteve në sektorin e ndërtimit, gjatë tremujorit në analizë, vijoi rënien. Aktualisht kjo normë shënon nivelin 54.7% ose 9.5 pikë përqindje më pak se mesatarja historike e saj. Në krahasim me të njëjtin tremujor të një viti më parë kjo normë është 2.5 pikë përqindje më e ulët.
Sektori i shërbimeve
Treguesi i besimit në sektorin e shërbimeve (TBSh) vijoi tendencën rënëse në tremujorin e parë të vitit 2016, duke qenë 1.0 pikë përqindje më poshtë nivelit të një tremujori më parë. Rënia e tij rezultoi disi më e ngadalësuar gjatë periudhës në analizë. Aktualisht niveli i TBSh-së mbetet 3.7 pikë përqindje nën mesataren historike. Vijimi i prirjes rënëse të TBSh-së u shkaktua nga rënia e dy prej balancave përbërëse të tij: kërkesa (balanca ra me 5.3 pikë përqindje) dhe ecuria e përgjithshme e biznesit (balanca ra me 1.7 pikë përqindje). Në të kundërt, gjendja financiare, balanca tjetër formuese e TBSh-së, rezultoi e përmirësuar (+4.1 pikë përqindje), por në një masë të pamjaftueshme për të ndërprerë rënien e treguesit.
Balancat e pyetjeve për ecurinë aktuale dhe të pritur të ekonomisë në vend shënuan rënie me përkatësisht 2.4 pikë përqindje dhe 4.9 pikë përqindje. Ndërkohë, vlerësimet dhe pritjet e bizneseve për çmimet e shërbimeve shënuan rritje. Për sa i takon pritjeve të bizneseve për kërkesën dhe ecurinë e përgjithshme të biznesit për tremujorin e dytë, ato rezultuan të përmirësuara. Balancat përkatëse u rritën me 4.3 dhe 2.7 pikë përqindje. Rritje shënoi edhe balanca e investimeve të reja për gjashtëmujorin e ardhshëm.
Norma e shfrytëzimit të kapaciteteve nga bizneset e shërbimeve rezultoi 68.0% në tremujorin e parë, duke shënuar një rënie të fortë prej 7.2 pikësh përqindjeje krahasuar me tremujorin e mëparshëm dhe prej 4.9 pikësh përqindjeje krahasuar me të njëjtin tremujor të një viti më parë. Kjo normë përfaqëson edhe shkallën më të ulët të shfrytëzimit të kapaciteteve në këtë sektor që prej vitit 2007, duke qenë 8.1 pikë përqindje nën mesataren historike.
Sektori i tregtisë
Treguesi i besimit në tregti (TBT), megjithë rënien me 4.1 pikë përqindje në tremujorin e parë të vitit 2016 vijoi të qëndrojë mbi mesataren historike afatgjatë. Të treja balancat formuese të treguesit kontribuan në rënien e nivelit të TBT-së gjatë tremujorit në analizë. Rënie të ndjeshme shënoi balanca e gjendjes financiare, me 5.8 pikë përqindje, dhe balanca e ecurisë së përgjithshme të biznesit, me 5.7 pikë përqindje. Ndërkohë, balanca e punësimit ra në një masë më të vogël, prej rreth 0.7 pikësh përqindjeje.
Vlerësimet dhe pritjet e bizneseve të përfshira në vrojtim kanë rezultuar të përkeqësuara për të gjitha aspektet e lidhura me aktivitetin e tyre. Më konkretisht, në nivele më të ulëta rezultuan balancat për pyetjen mbi ecurinë e aktuale të ekonomisë në vend (ra me 3.1 pikë përqindje) dhe atë të pritur (ra me 1.6 pikë përqindje). Gjithashtu, balancat për treguesin e kërkesës së vlerësuar dhe të pritur nga bizneset shënuan rënie me 7.3 pikë përqindje dhe me 3.0 pikë përqindje. Bizneset vijojnë të vlerësojnë ecuri rënëse të çmimeve (balanca ra me 1.0 pikë përqindje) në tremujorin e parë, ndërkohë që presin rritje të tyre në tremujorin e dytë (balanca u rrit me 1.1 pikë përqindje).
Norma e shfrytëzimit të kapaciteteve në tregti shënoi rënie me 5.7 pikë përqindje, duke qëndruar në nivelin 73.5% në tremujorin e parë të vitit 2016. Bizneset rezultojnë të kenë shfrytëzuar kapacitetet e tyre me një normë 5.2 pikë përqindje më të ulët se norma mesatare historike dhe 2.3 pikë përqindje më të ulët se norma e të njëjtës periudhë një vit më parë.
Bie dhe besimi konsumator
Treguesi i besimit konsumator (TBK) shënoi rënie me 2.5 pikë përqindje në tremujorin e parë të vitit 2016, pas përmirësimit të lehtë të shënuar në tremujorin e mëparshëm. Zhvillimet në përbërësit e TBK-së vijuan të reflektohen në një dinamikë të luhatshme të treguesit, duke e zhvendosur atë sërish nën mesataren afatgjatë. TBK-ja reflektoi përkeqësimin e tre prej balancave të tij formuese: – blerjet e mëdha, situata financiare e pritur e familjes dhe situata e të ardhurave/shpenzimeve. Niveli më i ulët i TBK-së u drejtua kryesisht nga rënia e balancës së blerjeve të mëdha, me 7.6 pikë përqindje, dhe në një masë më të vogël nga balancat më të ulëta të situatës financiare të pritur të familjes (-1.9 pikë përqindje) dhe të situatës së të ardhurave/shpenzimeve (-1.8 pikë përqindje). Ndërkohë, balanca tjetër përbërëse e TBK-së, situata e përgjithshme ekonomike në vend gjatë tremujorit të ardhshëm, u rrit me 1.5 pikë përqindje, duke dhënë sërish një kontribut të vogël në kahun rritës për treguesin.
Helikopteri s’kishte planifikim për të fluturuar në Dukagjin
Një pilot i repartit ushtarak të helikopterëve në Farkë deklaron se, fluturimi i helikopterit që u rrëzua në Liqenin e Shkodrës ka qenë jashtë planeve të fluturimit të asaj dite. Ish-Kryeministri Berisha në një postim në Facebook shkruan se, piloti dixhital denoncon mashtrimin e Mimit dhe gjeneral Trafikut për rrëzimin e helikopterit.
“Piloti flet për lidhje të dyshimtë midis fluturimit për në Dukagjin të helikopterit EC -145 dhe fluturimit për në Dukagjin të helikopterit “Shega Trans”! Mungesa e teknikut apo inxhinierit të fluturimit në bord dhe zëvendësimi i tyre me ushtarin profesionist është rreptësisht e ndaluar dhe akuzon për mision jo stërvitor. Mosaktivizimi i jastëkeve të ajrit dhe sistemeve të tjera të sigurisë së helikopterit EC-145, lidhet sipas pilotit dixhital me faktin se pilotët e rënë në krye të detyrës ishin ngarkuar më shumë se sa kishin kualifikimin e tyre. I bëj thirrje Prokurorisë së Shtetit, të hetojë me seriozitetin më të madh për të nxjerrë në dritë të vërtetën rreth kësaj ngjarje tejet të rëndë, nga e cila del qartë se, Mimi dhe gjeneral Trafiku përpiqen që ta fshehin në fundin e Liqenit të Shkodrës. Për më gjatë lexoni mesazhin e pilotit dixhital! Sb”, shkruan Berisha në Facebook, duke publikuar të plotë mesazhin e pilotit.
“Përshëndetje Berisha, ju falënderoj për qëndrimin që keni mbajtur këto ditë ndaj çështjes së rrëzimit të helikopterit EC-145. Si pilot i këtij reparti për të ndihmuar sadopak në zbardhjen e të vërtetës të kësaj ngjarje tragjike në të cilën humbën jetën dy kolegë të mi dua të theksoj se hetimi serioz i kësaj çështjeje duhet t’ju japë përgjigje pyetjeve që vijojnë. Pse u dërgua jashtë çdo plani të asaj dite të stërvitjes në Dukagjin helikopteri EC-145? Dukagjini nuk ishte në planin e stërvitjes të asaj dite. – A kishte lidhje fluturimi në Dukagjin i helikopterit EC-145 me fluturimin në të njëjtën kohë po në Dukagjin të helikopterit “Shega Trans”? – Koha e stërvitjes për helikopterët e regjimentit tonë është si rregull i prerë 1 orë e 30 min. – Pse qëndroi mbi dy orë në fluturim helikopteri EC-145? Ai është rrëzuar mbi Liqenin e Shkodrës pas 125 minutash fluturimi.
Zgjatja e fluturimit mund të krijojë probleme të rënda edhe nga karburanti sidomos ky i yni! – Pse në bordin e helikopterit në fluturim stërvitor nuk ishte ashtu siç e përcakton në mënyrë të prerë rregullorja, inxhinier apo teknik fluturimi, por ishte një ushtar profesionist që e ka të ndaluar kategorikisht fluturimin me helikopter në stërvitje. Çfarë misioni kishte në bordin e helikopterit ushtari profesionist? Pse nuk u aktivizuan jastëkët e ajrit në këmbët e helikopterit me të cilat ai mund të notojë në ujë dhe asnjëri nga sistemet e tjera të sigurisë dhe shpëtimit të tij dhe së fundi, a ka lidhje ky mosaktivizim i sistemeve të sigurisë të helikopterit të mbytur me faktin, se asnjëri nga kolegët e mi të ndjerë në bord nuk plotësonin kushtet teknike profesionale të kërkuara për pilotimin e helikopterit EC-145? A plotëson kushtet kompania e mirëmbajtjes, e cila thuhet se është përzgjedhur nga njohjet e Sekretarit të Përgjithshëm, Arjan Kraja me miratim të ministres? Dhe një herë ju falënderoj për insistimin tuaj në zbardhjen e të vërtetës të kësaj ngjarjeje shokuese për njësinë tonë, por mendoj se vetëm një hetim i guximshëm, i paanshëm i këtyre çështjeve do të mund të nxjerrë nga fundi i liqenit të vërtetën e kësaj ngjarjeje tragjike. Me shumë respekt F.B”, thuhet në denoncimin e pilotit.
600 mijë litra karburant për helikopterët në Lushnje
Cilësia e karburantit është një nga pistat kryesore të hetimit të rrëzimit të helikopterit EC 145 në Liqenin e Shkodrës, ku humbën jetën dy pilotë dhe u plagos rëndë një ushtarak. Burime nga grupi hetimor bënë të ditur se, ka dyshime të forta se karburanti është i një cilësie shumë më të ulët se sa e kërkojnë standardet për helikopterët. Por më e keqja është se nafta ndodhet tërësisht jashtë syve të ushtrisë dhe Repartit të Farkës. Burime të besueshme thanë për Droni.al se të paktën 600 mijë litra karburant që përdoret nga helikopterët është e magazinuar në Lushnjë dhe jo në Farkë.
Përveç kësaj ka edhe procedura fiktive të marrjes në dorëzim të sasisë së naftës. Gjithë kjo sasi është bërë hyrje në mënyrë fiktive në depot e Farkës, ndërkohë që ndodhet në tankerat në Lushnjë. Sikurse mësohet karburanti është blerë në Maqedoni, ku në fakt është përfituar me një çmim më të ulët se sa në Shqipëri. Por për ruajtjen e këtij karburanti depozitat e duhura i ka vetëm baza ajrore e Farkës dhe jo Lushnja, e cila nuk i ka depozitat sipas kritereve teknike të ruajtjes së karburantit për helikopterë.
Po ashtu bëhet e ditur se, helikopteri EC 145 është ngritur nga baza ajrore, por qendra e kontrollit dhe raportimit ose siç njihet ndryshe kulla e trafikut ajror nuk ka të regjistruar ngritjen e helikopterit. “Nuk kanë të regjistruar asgjë, nuk ka disk të fluturimeve që regjistrohen për çdo ngritje helikopteri. Ta vendosë audio nëse e ka, por është e sigurtë që nuk është zbatuar procedura standarde e komunikimit me kullën e trafikut ajror”, ka bërë të ditur një anëtar i personelit ushtarak që ka dijeni për këtë procedurë fluturimi që është shkelur.
Kulla e trafikut ajror në Farkë ka një personel prej 21 vetash, por dyshohet se nuk disponon gjurmë të ngritjes së helikopterit ditën e aksidentit tragjik, ku humbën jetën dy pilotët dhe u plagos një ushtarak. Nëse lëvizja e helikopterit nuk është shënuar, atëherë cili ka qenë qëllimi i fluturimit të tij?
Grupi hetimor po vijon hetimet për zbardhjen e ngjarjes. Ushtarakët e bazës ajrore në Farkë, gjatë marrjes në pyetje ditën e djeshme, kanë deklaruar se, Eurocopter EC 145, helikopteri që u rrëzua në Liqenin e Shkodrësu kontrollua para se të ngrihej në fluturim. Bëhet e ditur se, krahas komandantit të Bazës, Kuto Hasani, grupi hetimor mori në pyetje shefin e shtabit të bazës ajrore, shefin e sigurisë së bazës, përgjegjësin e teknikës në Farkë, si dhe inxhinierët e teknikët e regjimentit të helikopterëve. Ushtarakët vunë në dispozicion të akuzës urdhërat për zhvillimin e fluturimeve stërvitore, planet e fluturimit për datën 6 Prill dhe itinerarin e ndjekur, librin e përgatitjes për fluturimin e helikopterëve “EC 145” dhe librin e përgatitjes bazë, të cilat në përputhje me procedurat ligjore janë të sekretuara nga rreshterja Sofije Ramçaj. Kjo e fundit nuk u mor në pyetje, pasi ka dalë në rezervë disa muaj para rrëzimit të helikopterëve.
Ndërkohë, prokurorët që po hetojnë rrëzimin e helikopterit në Liqenin e Shkodrës, nuk i ka bindur dëshmia e parë e ushtarit të plagosur Gerald Baramuça. Ata kanë patur dyshime mbi vërtetësinë e pohimeve të tij, se nuk mbante mend asgjë nga aksidenti. Për këtë arsye, oficerët e Policisë Gjyqësore do të rikthehen përsëri në Spitalin e Traumës për ta pyetur sërish atë në lidhje me aksidentin, ku humbën jetën pilotët Floran Delia dhe Donald Hoxha.
Në dëshminë e parë, Baramuça u tha hetuesve se, nuk kujtonte asnjë detaj nga rrëzimi i helikopterit, duke lënë pa përgjigje shumë pikëpyetje të grupit hetimor. Këtë të martë, ai kreu një ndërhyrje tjetër kirurgjikale në shpatull dhe gjendja e tij paraqitet e përmirësuar. Pritet që këto ditë Baramuça të merret sërish në pyetje nga prokurorët e çështjes.
Po ashtu, grupi hetimor është në pritje edhe të ekspertizës së “kutisë së zezë” të helikopterit, e cila është dërguar në Gjermani. Nuk dihet nëse do të ketë provë materiale në kutinë e zezë, pasi ajo është dëmtuar në momentin e nxjerrjes nga helikopteri që ishte rrëzuar në Liqenin e Shkodrës.
R.POLISI
Revolta qytetare për prishjet masive të banesave në Vlorë
Qindra qytetarë në Vlorë protestuan dje, duke bllokuar rrugën për të kërkuar të drejtën e tyre të shpronësimit sipas ligjit, për ndërtimin e rrugës transballkanike. Protestuesit kërkuan një proces të drejtë të shpronësimit, pasi me vlerat e dhëna nga qeveria, ata nuk mund të sigurojnë dot strehim. Kryetari i degës së PD të Vlorës, Moisi Meminaj thotë se Partia Demokratike është vënë në mbështetje të qytetarëve.
-Zoti Moisi, a mund të na thoni si është bërë vlerësimi i banorëve nga qeveria për ndërtimin e rrugës Transballkanike?
Në Vlorë, rruga Transballkanike e projektuar dhe financuar gjatë qeverisjes së Partisë Demokratike ka përfunduar si trase deri në asfaltimin e plotë. Ky investim për qytetarët e Vlorës po përdoret sot si pretekst për të vjedhur pronat e qytetarëve që janë afër rrugës. Rama-Kokëdhima-Leli duan të prishin shtëpitë e banorëve që janë afër rrugës, ndërkohë që ngjitur me to kanë dhënë leje për pallate. Po dhunojnë invalidë, gra dhe fëmijë, sepse janë verbuar nga lukunia për para. Duan të ndërtojnë pallate në pronat 100-vjeçare të banorëve, duke i nxjerrë në rrugë të madhe.
-A do t’i vazhdojnë protestat banorët për të kërkuar vlerësimin real të pronës së tyre?
Protesta dhe rezistenca është e vetmja rrugë për qytetarët. Banorët kërkuan mbështetjen e PD dhe ne iu përgjigjëm kërkesës së tyre. Risia në këtë protestë është se banorët kërkuan mbështetjen e PD. Brenda dy ditëve kam marrë mesazhe nga qytetarë nga Vlora, por dhe emigrantë që kërkojnë mbështetjen e PD në çështje të ndryshme. Mesazhi është i qartë PD ka fituar besimin e qytetarëve, e cila ka qenë sfida jonë kryesore pas 2013.
-Cili do të jetë qëndrimi i PD të Vlorës në vijim?
Partia Demokratike qëndron në mbështetje të plotë të tyre. Kryetari i PD së Vlorës, Moisi Meminaj dhe dega e PD Vlorë po qendron në mbrojtje të qytetarëve, duke u angazhuar maksimalisht për shqetësimin e tyre. Së bashku me Sekretaren për Marrëdhëniet me Publikun, Grida Duma, ishim në mbështetje të banorëve. PD do të mbështesë qytetarët dhe do të ndjekë në çdo hallkë institucionale grabitjen dhe dhunimin e së drejtës së pronësisë.
-A ka patur mbështetje nga qytetarët vlonjatë për banorët që nuk u është bërë vlerësimi real i pronës nga qeveria?
Mjaft qytetarë vlonjatë i janë bashkuar protestës së banorëve që kërkojnë një proces të drejtë të shpronësimit, pasi me vlerat e dhëna nga qeveria, ata nuk mund të sigurojnë dot strehim. Sot protestës iu bashkuan edhe shoferët, të cilët protestuan me banorët, duke bllokuar për më shumë se një orë rrugën.
Tashmë jam mëse i bindur se qytetarët vlonjatë e kanë kuptuar përfundimisht se Rama – Kokëdhima-Leli thjesht i kanë përdorur për t’u marrë votat dhe votëbesimin e tyre e përdorën për t’u grabitur pronat.
Reagimi qytetar
Sekretarja e Marrëdhënieve me Publikun dhe Sekretari për Aksionin qytetar në PD, Grida Duma thotë se, situata është alarmante. “Kjo është një situatë alarmante dhe emergjente. Banorët thonë që, nuk kemi dalë ne në rrugë, por ka ardhur rruga tek ne. Situata këtu është me disa standarde dhe bëhen bashkë disa padrejtësi. Bëhet bashkë fakti që këta janë banorë, të cilët janë në trojet e tyre me dhjetëra vite, janë njerëz që kanë ndërtuar në tokat e tyre dhe ata që kanë një çertifikatë shikojnë që për dikë është një çmim tjetër me 320 dhe për dikë tjetër me 395. Me këtë çmim s’mund të kenë më një shtëpi. Ata kanë ndërtuar shtëpi mbi pronën e tyre dhe kjo qeveri e legalizimit falas, është e njëjta qeveri që nuk jep mundësinë edhe pse ata kanë paguar këstet e legalizimit, e jo më falas, por që t’ia njohë për dëmshpërblim atë pjesë që e kanë ndërtuar mbi pronën e tyre.
Situata nuk mbaron këtu, pasi më poshtë është një gjendje edhe më kriminale përsa i përket pronës, pasi janë prishur me dhjetëra shtëpi për një rrugë që nuk është bërë akoma, i kanë nxjerrë jashtë dhe nuk u kanë dhënë dëmshpërblimin dhe jetojnë me qera pa e ditur si do i presë e nesërmja. Situata është e tillë që qytetarët bashkë me opozitën, me PD-në e Vlorës dhe ne të gjithë bashkë me shoqërinë civile, duhet të luftojnë për shtëpitë e tyre, sepse çdokush e di që punohet një jetë e tërë për një shtëpi. Do bllokohet rruga, do merren masa dhe ne si PD do të vijojmë t’i mbështesim qytetarët, sepse kjo që po ndodh këtu është dhunë pushteti dhe mund t’i ndodhë kujdo. Jemi në absurd të madh, sepse janë shpronësuar dhe rruga nuk është bërë dhe dikush të thotë se ka mundësi ta japin edhe për pallate. Kryetari i Bashkisë i thotë dikujt që nuk kam çfarë t’u jap. sepse e dini që kryeministri gënjen. Pra. qytetarët janë në ankth për gjënë më të rëndësishme të jetës së tyre, edhe njerëz me karrige me rroga që nuk dinë se ku të përplasin kokën me 30 mijë lekë të vjetra asistentë. Nuk do ta lëmë me kaq”, tha Duma.
76 metra katrorë është vlerësuar vetëm 29 milionë lekë
Sekretarja e Marrëdhënieve me Publikun dhe Sekretari për Aksionin qytetar në PD, e quajtën të drejtë rezistencën e banorëve dhe i siguruan për mbështetjen e opozitës. “Kam dy kate nga 76 metra katrorë dhe ma kanë vlerësuar vetëm 29 milionë lekë. Kam marrë edhe kredi dhe e paguaj çdo muaj nga 430 mijë. Po tani kush e paguan kredinë?!”, tha një protestues.
“Ne mbetemi të gjithë në rrugë me ato çmime qesharake shpronësimi, me 320 mijë lekë të vjetra për metër katrorë dhe 68 mijë lekë të vjetra për tokën, dhe nuk arrijmë dot të blejmë as një hyrje me dhomë e guzhinë. Jemi të gjithë vlonjatë dhe asnjë nuk është i ardhur”, tha një protestuese.
“Zotëria këtu që është i paralizuar, është vetë i gjashtë në shtëpi me një të punësuar dhe merr vetëm 30 mijë lekë asistencë. Nuk i kanë dhënë ende shpronësimin, sepse i thonë ke tapitë e vjetra dhe na duhen të reja. Ku të mundet ai me këtë gjendje?!”, tha një banor.
“Edi Rama të erdhi, të kërkoi votën me premtimin e një qeverie solidare që do të thotë që njerëzit e pamundur t’i ndihmojmë ne që kemi mundësi. Por ata që kanë mundësitë më të mëdha janë këta në qeverisje dhe ata s’mund t’u nxjerrin nga shtëpia dhe për të qendruar ata kryeministra, apo ministra, për të marrë pronat tuaja me 0 lekë. Të gjithë banorët këtu do të jenë në mbështetjen tënde për ta kthyer në një simbol rezistence dhe proteste këtë dhe në rast se nuk ndalin tek ty, të gjithë ne sot me këta qindra banorë dhe së bashku me PD, herën tjetër do të jemi më shumë dhe ju nuk duhet t’i lironi banesat për t’u nxjerrë në rrugë, sepse duan të bëjnë pallate. Policët nuk mund t’u nxjerrin, sepse s’mund të shkelin ligjin. PD është me ligjin, është për bërjen e investimeve dhe rruga këtu ka përfunduar, por duan t’u nxjerrin, sepse anash rrugës duan të bëjnë pallate. Të përballemi dhe këtë zotëri ta kthejmë në simbol”, u shpreh Salianji.
Katër raporte në 24 orë, shuplakë për Ramën!
Jozefina TOPALLI
Kësaj radhe nuk jam unë, është Departamenti i Shtetit, i cili thotë të kundërtën e asaj që thotë qeveria; është Banka Botërore, që thotë të kundërtën e asaj që thotë qeveria; është Doing Business, që thotë të kundërtën e asaj që thotë qeveria; është Freedom House, që thotë të kundërt e asaj që thotë qeveria, por janë një sërë raportesh të tjera: është rezoluta e Parlamentit Europian, që thotë të kundërtën e asaj që thotë qeveria. Në të gjithë këtë histori të vendit tonë ka një refren: korrupsioni.
“Korrupsioni ka kapur të gjitha degët e qeverisjes në Shqipëri”, thotë Departamenti i Shtetit. Brenda 24 orëve kanë dalë katër raporte, më të zezat për vendin tonë, realiste, duke shprehur atë që ne e ndiejmë çdo ditë; që e prekim çdo ditë; që çdo ministër e di dhe nuk e thotë, por thotë të kundërtën; që çdo deputet këtu në Parlament e sheh dhe e di më mirë se kushdo tjetër, por thotë të kundërtën, për të ruajtur vendin e deputetit, të ministrit, të interesave, të parave që kanë marrë, marrin apo shpresojnë t’i marrin.
Dje, takova disa të njohur në Shkodër. Njëri prej tyre më tha: “Në fshatin tim nuk ka më të rinj, as të reja, nuk dëgjoj më as të qarat e fëmijëve të vegjël. Ata kanë ikur. Në fshatin tim ka vetëm ndonjë shtëpi, ku jetojnë një plak apo një plakë, ose të dy të braktisur aty, sepse të gjithë kanë ikur”. Në një vit nga atdheu ynë, që quhet Shqipëri kanë ikur 100 mijë shqiptarë. Çfarë po ndodh? Të bijtë e tyre paguajnë motrën, e cila nuk ka asnjë të punësuar në shtëpi, që të mbajë nënën dhe babanë. A e kuptoni se ku kemi arritur?
Në qytetin tim, si në çdo qytet tjetër të Shqipërisë, varfëria ka arritur aty ku nuk mban më. Si mund të thotë qeveria, se varfëria është zvogëluar?
Raporti i Bankës Botërore, jo i Jozefina Topallit dhe as i opozitës, thotë: “46,2% e shqiptarëve jetojnë me më pak se 5 dollarë në ditë”. Bëjeni pak llogarinë: 5 dollarë shumëzojeni për 30 ditë, bëjnë 150 dollarë. Sa i takon një familjeje? 600 dollarë!
Më thoni ju: si ta paguajnë ata energjinë elektrike? Si t’i paguajnë librat e fëmijëve në shkolla? Si ta paguajnë qiranë e shtëpive? Me çfarë do ta paguajnë ata shtrenjtësinë e jetesës së tyre, të autobusit, të kuponit? Me çfarë? A e dini se sa ka qenë përqindja në vitet e mëparshme? Mesatarja ka qenë 20%, tani ka shkuar 46,2%, dhe në vitin më të mirë të qeverisjes së Partisë Demokratike ka qenë 12%. Varfëria është trefishuar dhe katërfishuar.
Po mjerimi, po varfëria ekstreme sa është? Jo sipas meje, jo sipas opozitës, por sipas raporteve të Bankës Botërore dhe raporteve të Departamentit të Shtetit, është 5%, ka qenë 1,2%.
Mjerimi ka shkuar aty ku nuk mban më. Po jua them shumë miqësisht: situata ekonomike në vendin tonë është e frikshme, është katastrofike. Hidheni në kosh të plehrave këtë që unë po ju them, por shkoni dhe shikojini, takojini, dëgjojini. Kujt po i thotë qeveria se është rritur punësimi? Ku është rritur punësimi, ku? Në cilin sektor? Në ndërtim? Në shërbime? Në bujqësi? Është katastrofë!
Papunësia është rritur në mënyrë progresive, prandaj njerëzit ikin, prandaj janë 100 mijë shqiptarë që e kanë lënë këtë vend.
Nuk po flas për demografinë e vendit tonë, ku absolutisht lindshmëritë kanë rënë. Shqiptarët ikën, vetëm 2,8 milionë kemi mbetur këtu. Statistikat thonë se pas pak vitesh mbi 1/3-ta e shqiptarëve do të jenë mbi 65 vjeç dhe nuk do të ketë më punonjës të rinj, forcë pune për të pagur pensionet e tyre. Po pse ndodh kjo? Sepse ka një arsye themelore: është korrupsioni. Ka një arsye që renditet e para në listë në të gjitha raportet, të cilët brenda 24 orëve janë hedhur si shuplakë mbi qeverinë aktuale: është korrupsioni, është babëzia.
Raporti i Kontrolli të Shtetit thotë se janë 1 miliard dollarë dëme, të cilat fillojnë nga OSHEE-ja, që me sjelljen kriminale të saj ka bërë që të varin veten njerëz, të ikin njerëz, të ndihen të pashpresë, të ndihen pa perspektivë në këtë vend.
Ndërkohë, çfarë ndodh në anën tjetër? Në anën tjetër kemi modelin e Koços dhe ato të Koçove: “150 tendera do t’i marr unë. Do të marr edhe koncesionet”.
Ka vetëm një arsye të kësaj varfërie dhe të këtij depresioni që ekziston në shoqërinë shqiptare, që e ka emrin korrupsion. Ka një kulturë mjerane në shoqërinë tonë, sepse ata mendojnë se po erdhe në pushtet, pushteti është për t’u shfrytëzuar për të pasuruar veten. Ky është fundi i shoqërisë sonë! Ky është fundi politikës shqiptare dhe kërkon një dënim! Por, për fat të keq, as unë nuk besoj se nëse një ligj nuk i zbatohet, zgjidhja është ndryshimi i këtij ligji, nuk mund ta besoj. Këto ligje që kemi bërë janë ligje të mira, por ne nuk kemi kulturën demokratike, ne nuk kemi ndëshkimin për t’i dënuar ata, të cilët mendojnë se karrigia e ministrit dhe e deputetit u jep mundësinë që motra, vëllai, djali, kunati, kushëriri, nipi, shoku, komshia të pasurohet, kurse të tjerët të vdesin aty ose të ikin në Gjermani.
Ne jemi një komb në hall të madh, një komb si asnjë tjetër në Europë, ndërkohë ky lideri global del në medie, për turpin e tij dhe tonin, dhe tregon se çfarë zgjidhje duhet të bëjë Amerika, kurse ne jemi groposur në krim.
Kanë kaluar dy vjet dhe jemi në vitin e tretë, zoti ministër, ndaj nuk keni më kohë të gjeni justifikime. Që ditën e parë të këtij Parlamenti, bashkë me kolegët e mi, keni folur për krimin në Parlament. Po ligji i dekriminalizimit pse nuk zbatohet? Ne i kemi këtu në Parlament, ne i kemi në krye të bashkive, ndërsa ai tregon se çfarë duhet të ndodhë midis kandidatëve amerikanë. Ne kemi mendimet tona, dhe, natyrisht, nuk biem dakord me disa deklarata, por kush jemi ne që t’u tregojmë amerikanëve se çfarë duhet të bëjnë? Është Kryeministri i Shqipërisë ai, të cilit, me të drejtë, gazetari i CNN-it i thotë: “Ti je duke folur për zgjedhjet e një vendi tjetër”, ndërkohë që vendi i tij është i krimbur në krim, në mjerim, në varfëri, në mafie dhe në korrupsion.
Të dashur kolegë, lexojini këto raporte! Nuk janë të opozitës, janë të Departamentit të Shtetit.
Lexoni raportin e Kontrollit të Shtetit! Nuk është i opozitës, por i institucioneve të pavarura. Janë 1 miliard dollarë dëme. A e kuptoni se çfarë do të thotë? Ky vend po shkon drejt fundit. Sindromi i krizës helenike është afruar, është këtu pranë derës dhe ka vetëm një zgjidhje, jua kam thënë edhe më parë, por po jua them edhe sot: nuk zgjidhet duke ndryshuar nenet e ligjeve, por zgjidhet duke u ngritur për ta përmbysur këtë qeveri; nuk zgjidhet duke ndryshuar ligjet, se ligjet janë të mira, por zgjidhet duke qenë të pastër, me integritet, me kurajë, si dhe duke i dalë përballë atij dhe për t’i thënë: “Ik, se ky vend është tepër i vogël, tepër i vuajtur për të vuajtur akoma më shumë”.
Dua të them se nuk është përsëri opozita, por Doing Business, i cili flet për një rënie jo me 1, jo me 5, por me 35 vende në klasifikimin për lehtësi ndaj biznesit. Pra, është një rrokullisje, gjë që bizneset e dinë më mirë se ne këtu në Parlament.
Jo më larg se dje, Dhoma Gjermane thotë: “Nuk ia vlen të investosh në Shqipëri. Është vendi i fundit në rajon”. Bizneset gjermane e shikojnë Shqipërinë si vendin e fundit ku do të investonin përsëri, sepse, sipas kompanive gjermane, pengesë janë: informaliteti, korrupsioni, mungesa e transparencës në tendera, mungesa e sigurisë ligjore, mungesa e paparashikueshmërisë së politikave ekonomike dhe administratës publike etj., etj. Dhe sikur të mos mjaftonin këto bashkë me 4 raportet të Departamentit të Shtetit, të Bankës Botërore, të Freedom House, të Lirisë së Medieve, Dhoma Amerikane thotë: “Kompanitë serioze miliardere amerikane po ikin nga Shqipëria”. Ky është një alarm dhe arsyeja është korrupsioni. Korrupsioni ka sjellë krimin këtu në Parlament dhe ka vetëm një arsye, sepse ka bashkëpunim të krimit në politikë, të krimit në media, të krimit në biznese etj.
Çfarë duhet bërë? Sigurisht, asgjë nuk bëhet me fjalë. Unë jam e bindur dhe mendoj një mijë herë se çfarë thonë ata qytetarë kur na dëgjojnë ne duke folur këtu në Parlament. Ju mendoni se ata e kanë mendjen nëse ne do të ndryshojmë ose jo ligjin për komisionet hetimore? Jo, as nuk u shkon ndër mend, sepse ata nuk kanë bukë për t’u dhënë fëmijëve të tyre. Ju mendoni se ata e kanë mendjen te ndryshimet që do të bëjmë në ligje apo në Kushtetutë? Jo, ata mendojnë si të mbijetojnë.
Në vitet 2014, 2015, 2016 të mendosh si do të mbijetosh kur varfëria kërcen në mënyrë progresive, është fatale. Është fatale, së pari, për ju si mazhorancë dhe në këtë aspekt ju keni humbur legjitimitetin. Nuk ka 1 milion vota. Mund t’i kesh 1 milion vota, mund t’i kesh marrë ato, por kur varfëria rritet, kur krimi rritet, kur korrupsioni rritet, kjo qeveri ka humbur legjitimitetin.
Në të njëjtën kohë, kjo është një thirrje për opozitën që të ngrihet, sepse ky vend nuk ka më kohë për të humbur; të ngrihet, sepse ky vend nuk ka më shqiptarë për të humbur.
Kur të del tym nga koka, afron ora e hetimit për Ramën e ministrat
I vetmi produkt konkret i vizitës së Ramës në Shtetet e Bashkuara ishte nënshkrimi i një marrëveshjeje në zyrat e FBI.
Rama u thirr në zyrat e FBI vetëm 24 orë pasi Sekretari Kerry deklaroi se korrupsioni në Shqipëri shtrihet në të gjitha degët e qeverisë. Asgjë nuk është rastësi. Problemi madhor që ka sot Shqipëria është korrupsioni dhe kjo është pika që shqetëson jo vetëm shqiptarët, por edhe amerikanët dhe Bashkimin Europian.
Fokusi në ditët, javët dhe muajt e ardhshëm do të jetë pikërisht tek korrupsioni dhe krimi. Pas deklaratës së Departamentit të Shtetit një tjetër deklaratë po aq e fortë erdhi dje nga Parlamenti Europian, i cili kërkonte arrestimin e zyrtarëve të lartë të akuzuar për korrupsion.
Laku në qafën e krimit dhe të korrupsionit që identifikohen direkt me këtë qeveri dhe kreun e saj Rama sa vjen dhe po ngushtohet. Dhimbjet e kokës kanë nisur për Ramën menjëherë sapo ka lënë Shtëpinë e Bardhë dhe ka vizituar FBI. Kjo qeveri dhe këta ministra duhet të nisin numërimin nga fundi. Byroja e Hetimit dhe Prokuroria Speciale kanë shumë punë përpara si në Rumani e Maqedoni. Atje e kanë nisur nga qeveria dhe kryebashkiakët. Kanë hetuar të gjitha aferat e ministrave, kryeministrave si dhe lejet e ndërtimit. Skemat e korrupsionit nuk kanë qenë të ndryshme në Shqipëri.
Në deklaratën zyrtare të Shtëpisë së Bardhë pas takimit të Biden me Ramën kishte një fjali, e cila çuditërisht nuk ishte në deklaratën zyrtare të Kryeministrisë. “Të vazhdojë konsolidimi i reformave”. Dy janë reformat kryesore të këtyre dy viteve të fundit të Shteteve të Bashkuara. Reforma e parë e artikuluar nga ambasadori amerikan menjëherë pas mbërritjes në Shqipëri ka qenë dekriminalizimi, ndërsa reforma ku është përqendruar tani puna e Shteteve të Bashkuara është ngritja e Byrosë së Hetimit dhe Reforma në Drejtësi.
Pa rezultate konkrete në këto reforma beteja ndaj oligarkisë nuk do të japë asnjë rezultat dhe vendi nuk do të mund të bëjë dot zgjedhje të lira.
Departamenti amerikan i Shtetit ka publikuar një raport të plotë mbi shkeljen e të drejtave të njeriut në Shqipëri, ku veç korrupsionit që ka përfshirë çdo sektor të qeverisjes, flitet për rikthimin e torturave dhe kapje të mediave nga oligarkia kriminale në pushtet.
Sa prioritare e kanë SHBA këtë angazhim në Shqipëri e dëshmon edhe fakti se e vetmja marrëveshje e nënshkruar në Uashington nga super delegacioni qeveritar është ajo me FBI, Byronë Federale të Investigimit, për të cilën Rama dhe Tahiri nuk dukeshin aq entuziastë. Të ndjekësh intervistën që Rama dha në televizionin e tij, më shumë gjen komente për kryeministrin e Serbisë, Vuçiç se për këtë marrëveshje, që padyshim ka të bëjë me përpjekjet dhe këmbënguljen e gjatë të SHBA për të krijuar një strukturë të ngjashme në Shqipëri.
Byroja shqiptare e Hetimit, falë angazhimit personal të ambasadorit amerikan Lu, betejës së gjatë institucionale të Partisë Demokratike dhe rekomandimeve të qarta të Komisionit të Venecias do të jetë një strukturë tërësisht e pavaruar dhe jashtë ndikimit të kryeministrit Rama, apo marionetave të tij në qeveri dhe polici.
Mesazhet e qarta të SHBA-së për Ramën në Shtëpinë e Bardhë dhe Kongres bënë që sot ushtarët e tij në Komisionin parlamentar të dakordësohen me pikëpamjet e Partisë Demokratike për qasjen në luftën kundër korrupsionit. Gjithë këto muaj kemi qenë dëshmitarë se si Rama me ekspertët socialistë të shitur si të pavarur lexonin sipas dëshirës rekomandimet e Komisionit të Venecias, apo të ekspertëve amerikanë dhe europianë, deri në atë pikë sa mashtruan opinionin, duke shitur si konsensual me opozitën një projektligj të turpshëm, që e linte Njësinë Speciale të Hetimit në varësi të ministrit të tij.
Degradimi i institucioneve demokratike në Shqipëri është një shqetësim dhe pengesë madhore për zhvillimin ekonomik të vendit. Qeveria, parlamenti, administrata dhe policia të kontrolluara nga banda kriminale dhe korrupsioni që zhvat miliarda euro në vit janë shkak kryesor i thellimit të varfërisë në vend. Ndaj dekriminalizimi dhe Reforma në Drejtësi, krahas Njësisë Speciale të Hetimit janë beteja të opozitës që kanë marrë mbështetjen e hapur të Shteteve të Bashkuara të Amerikës dhe të partnerëve europianë. E pamë edhe kësaj jave në Parlament mënyrën se si Rama instruktonte deputetët e tij që atakonin dekriminalizimin dhe aplikimin e këtij ligji që do të largojë nga Parlamenti, administrata dhe policia vrasësit, trafikantët dhe kriminelët që i dhanë pushtetin Ramës në 2013 dhe morën kontrollin e një sërë bashkish në zgjedhjet e fundit vendore. Njësoj si Rama, për deputetët e tij është më kushtetuese të kesh vrasës si Prenga në Parlament, trafikantë si Ndoka, Bushi, dhe Roshi. Prania e këtyre qelbësirave në institucionet e shtetit është garanci për pushtetin e Ramës, ndaj ai injoron Kushtetutën, ligjin për t’i marrë në mbrojtje sa herë që ata duhet të përballen. E pamë në mënyrën si mbrojti Koçon, Leskajn, Sulin dhe do ta shohim kur të mbrojë Pjerin Ndreun, Sadri Abazin dhe tërë bandën e oligarkëve që merr tendera, fonde publike dhe favore në këmbim të votës dhe forcimit të pushtetit personal të Ramës mbi Partinë Socialiste dhe çdo pushteti tjetër në Shqipëri.
Vazhdimi i reformave në luftën kundër krimit dhe korrupsionit janë porosia, urdhëri ose ultimatumi që Rama ka marrë në Uashington. Implementimi i shpejtë i dekriminalizimit, Reformës në Drejtësi dhe funksionimi i Njësisë së Posaçme të Hetimit do të rikthejë normalitetin në këtë vend, duke rikthyer qeverinë, Parlamentin, dhe institucionet e tjera në këtë vend në shërbim të qytetarëve, në shërbim të zhvillimit ekonomik. Këto reforma i japin fund gallatave të Ramës me shqiptarët mbi kriminelin e Kavajës, i japin fund shërbimeve të kartonit të Prengës për një qeveri kriminale si ai vetë, i japin fund grabitjes me koncesione për shërbime që nxjerrin burrat shtatzënë, i japin fund Beqjes që pasuron Ramën, dhe i japin fund pushtetit të një të babëzituri si Edi Rama që nuk ka lënë sektor të ekonomisë së vendit pa e shkretuar me bandën e rrjepësave që ka mbledhur rreth vetes. Ndaj, këto reforma janë interesi jetik i shqiptarëve, të cilët SHBA kanë dhënë dëshmi se e mbrojnë dhe e mbështesin pa rezerva.
Arben SHAHINI
Takimi i Ramës me Obamën, jo zyrtar
Ndoshta për të justifikuar pse nuk u prit në zyrën e Presidentit Obama, por gjithsesi në mënyrë të panevojshme, Kryeministri Rama bëri disa sqarime dhe “shpjegime” publike rreth protokollit të Shtëpisë së Bardhë.
“Ata që kërkojnë transparencë nga Shqipëria nuk dinë çfarë kërkojnë pasi harrojnë që unë nuk jam Presidenti i Shqipërisë, jam Kryeministri dhe takimi nga pikëpamja protokollare zhvillohet me pritjen nga zëvendëspresidenti dhe pastaj Presidenti bëhet pjesë e takimit”.
Në fakt, pretendimi i Kryeministrit Rama është krejtësisht i pavërtetë: Presidenti Obama pret në Shtëpinë e Bardhë, madje edhe me ceremoni zyrtare protokolli, jo vetëm Kryeministra, por edhe ministra. Mjafton të shikosh takimet e përditshme të Presidentit Obama dhe e kupton që “sqarimi” i Kryeministrit Rama është i gabuar.
Por, Kryeministri Rama ndërkohë ka të drejtë: formati që iu rezervua atij dhe që ai e sqaron saktë, është formati që përdoret për takimet me zyrtarët e tjerë të Shtëpisë së Bardhë të ndryshëm nga Presidenti. Nëse një zyrtar i një vendi tjetër- i cili ka takim me ndonjë zyrtar të ndryshëm nga Presidenti- kërkon të takojë edhe Presidentin, ky i fundit mund t’i bashkohet takimit që po zhvillohet nëse dëshiron. Ky lloj takimi jo zyrtar me Presidentin në protokollin e Shtëpisë së Bardhë njihet si “seancë pune”.
Më poshtë po sqarojmë rregullat protokollare të qeverisë amerikane për vizitat në Shtëpinë e Bardhë, të renditura sipas shkallës së rëndësisë.
Vizitë shtetërore – Është vizita e nivelit më të lartë, e cila i ofrohet vetëm kryetarëve të vendeve – si President ose monarkëve – dhe duhet të jetë me ftesë të Presidentit të SHBA-ve. Vizita përfshin takimin me Presidentin, një darkë shtetërore në Shtëpinë e Bardhë dhe parakalim me roje nderi.
Vizitë zyrtare – Është vizita, e cila i ofrohet kreut të qeverisë, Kryeministrit dhe duhet të bëhet me ftesë të Presidentit të SHBA–ve.
Vizitë zyrtare pune – Është vizita, e cila i ofrohet si një kreu të shtetit ashtu dhe një kreu të qeverisë, por duhet të përcaktohet nga vetë Presidenti i SHBA-ve. Gjatë kësaj vizite diskutohet për politikat ndërmjet dy vendeve.
Vizitë pune – Është vizita, e cila i ofrohet kreut të një shteti ose kreut të qeverisë me ftesë të Presidentit të SHBA-ve. Një “vizitë pune” përfshin një takim me Presidentin në Shtëpinë e Bardhë.
Vizitë private – Është vizita e nivelit më të ulët, e cila i ofrohet një kreu shteti, kreu qeverie, ministri të Jashtëm ose çdo lloj zyrtari të qeverisë që viziton Shtetet e Bashkuara pa ftesën e Presidentit. Vizitori mund të takojë këdo përveç Presidentit. Por, nëse, ai kërkon një takim me Presidentin e SHBA-ve dhe nëse ky takim i mundësohet, ai cilësohet si një “seancë pune”.
“Exit.al”
Kryesore
Continue to the category
