Si u manipuluan shifrat e referendumit të deleve
PS ka shënuar dje fundin e një cikli të një partie dhe instalimin e kultit të një individi me probleme të rënda psikike në krye të PS. Manipulimi i turpshëm i shifrave të referendumit të djeshëm në PS ishte shenjë e qartë se Rama i ka humbur socialistët dhe tashmë i vetmi mekanizëm që ai beson se mund ta mbajë atë gjatë në krye të partisë dhe të pushtetit është ai i manipulimit.
Vetë arsyet se përse u bë ky referendum nuk kanë të bëjnë me ciklin e një partie që ushtron detyrat ndaj anëtarëve të saj në një sistem demokratik. Përmes manipulimit të këtij referendumi, Rama ligjëroi dënimin me zgjedhje të zgjedhjeve në parti. Ky mentalitet i vrasjes së forumeve të një partie sot është një këmbanë për demokracinë. Një individ që nuk bën zgjedhje në parti është i prirur që të njëjtin model ta shtrijë edhe më tej. Ai po paralajmëron ekzekutimin e zgjedhjeve parlamentare përmes manipulimeve. Dje, shndërroi në një farsë një referendum, nesër do të kërkojë të kthejë në farsë edhe zgjedhjet parlamentare.
Si mbërriti Rama deri këtu është e qartë. Ai asnjëherë nuk është votuar. Në të gjithë sukseset e tij politike, ai ka fituar përmes manipulimeve. Në krye të PS u bë me të famshmen frazë, një votë, një pallat. Tani është e qartë se për të mbajtur këtë pushtet për të cilin Blushi heshti atëherë kur ai erdhi në krye të PS, ai përdor të gjitha mekanizmat e pushtetit, që nga presioni dhe deri tek joshjet.
Braktisje masive e referendumit nga socialistët
Të dhënat e djeshme nga burime në qendrat e votimit kanë raportuar për një braktisje në masë të referendumit nga socialistët: Kanë votuar më pak se 25% e anëtarësisë aktuale në rang vendi, ndërsa shifra që është zyrtarizuar nga Rama ka qenë ajo e farsave të dikurshme të PPSH prej 99%.
Në zona të ndryshme është raportuar se ka pasur edhe numër të barabartë të votave mes atyre “pro” dhe “kundër”, por pala që ka qenë kundërshtare e Ramës nuk është lejuar për asnjë moment që të monitorojë procesin. Burime të sigurta të marra nga anëtarë të komisionit të PS Kurbin për rezultatin e referendumit theksuan se edhe se janë telefonuar me qindra herë anëtarët e PS nga drejtuesi i Bashkisë kanë marrë pjesë 534 votues nga këta 4 vota kanë dalë të pavlefshme dhe rezultati 301 me 229.
Duke parë këtë rezultat është ndërhyrë fuqishëm në plotësimin e fletëve për të nxjerrë pjesëmarrje dhe fitues Kryeministrin. Kudo po përflitet rezultati shumë i keq ndaj Ramës.
Si u manipulua me rezultatet
Në Shkodër është raportuar për një sherr të madh të Komisionit të numërimit të votave të referendumit me deputeten Mimoza Hafizi. Komisioni kërkonte që të rriste deri në 85% pjesëmarrjen e socialistëve në referendum, kur në fakt shifrat flisnin se kishin marrë pjesë më pak se 50% e anëtarësisë.
Në Shkodër i kanë marrë me dhunë dje anëtarët për të votuar, duke kërcënuar me vendet e punës!
Në Laç kanë marrë pjesë 230 votues, nga këto 150 pro dhe 80 kundra, dhe kanë shtuar 100 vota, duke e nxjerrë shifrën me 330 votues. Në Mamurras kanë marrë pjesë 190 votues, janë shtuar 50, dhe rezultati real 86 pro, 100 kundra, dhe 4 të pavlefshme.
Manipulimi me anëtarësinë, si u përjashtuan zgjedhësit potencialë
Referendumi së pari ka ngjallur hije dyshimi, sepse nga votimi janë përjashtuar së paku 18 mijë socialistë ose gati 20% e zgjedhësve potencialë.
Në korrik të vitit 2015, në një takim me të rinjtë e PS në Jalë, Rama shpalli objektivin e tij për rritjen e anëtarësisë.
Ai tha në atë takim se, objektivi është që nga 100 mijë anëtarë të PS-së deri në atë moment, anëtarësia e PS-së do të shkojë në 150 mijë, në vitin 2017. Pra, me shifrat e vetë Ramës PS ka humbur saktësisht 18428 anëtarë, në raport me korrikun e kaluar dhe të gjithë ata që janë anëtarësuar në fushatën që pasoi nga korriku deri më tani.
Sepse është bërë ky falsifikim kuptohet lehtë: Që referendumi të quhet i vlefshëm duhet që në votime të dalin më shumë se 50% e anëtarësisë. Por frika se mos shumë nga socialistët bojkotojnë, pasi e kanë kuptuar falsitetin e kësaj gare, i ka shtyrë socialistët ta ulin numrin e votuesve?
Po pse kjo frikë nga bojkoti dhe falsiteti i garës?
Sepse për të shkuar deri në referendumin, qëllimi i të cilit ishte të shmangte garën e kreut aktual me kandidat alternative përballë u bë një seri shkeljesh dhe manipulimesh.
Së pari, sepse vetë referendumi ishte i paligjshëm ashtu siç tha vetë në kongres hartuesi i statutit të ri të PS, Fatmir Xhafa. Ai ishte i paligjshëm, sepse normalisht ai nuk mund të kishte fuqi prapavepruese për një garë që duhej bërë tri vite më parë. Por ai ishte i paligjshëm ashtu sikurse tha Xhafa, sepse nëse socialistët e votuan vetë statutin e ri në kongres, atëherë ata këtë nen e kishin miratuar në këtë statut, prandaj 9 prilli ishte i panevojshëm.
Një tjetër arsye e paligjshmërisë ishte edhe ajo që kapi Ben Blushi. Nëse kodi i zgjedhjeve të PS sanksionon se referendumet nuk mund të organizohen dy muaj para dhe dy muaj pas kongresit, zhvillimi i tij këtë të shtunë e shndërron atë në nul.
Por kalvari i shkeljeve vazhdon: Pyetja e referendumit nuk u miratua në kongres, ai u realizua pa fushatë pro dhe kundër dhe mbi të gjitha pa komisionerë të atyre që e kundërshtojnë atë.
Për të gjitha këto, Rama e shndërroi votimin e 9 prillit në një farsë, aq groteske dhe aq të pabesueshme, sa në fund e zuri frika se mos socialistëve nuk u interesonte kjo butafori dhe nuk shkonin në kutitë e votimit. Ndaj ai u fut në rrugën e manipulimit, të cilën e filloi me pastrimin e listave nga mbi më shumë se 18 mijë zgjedhës (pa përfshirë të anëtarësuarit në PS këtë vitin e fundit).
Hafizi përgënjeshtron PS: U manipulua pjesëmarrja
Sapo është mbyllur proçesi i votimit, në një deklaratë për mediat deputetja socialiste Mimoza Hafizi është shfaqur kritike mbi mënyrën se si u organizua referendumi, ndërsa e quajti të manipuluar proçesin për Shkodrën. Gjatë të gjithë ditës nuk kam arritur të kontaktoj më komisionin zgjedhor dhe as të akreditoj vëzhguesit e mi tha deputetja Hafizi. Madje ajo ju referua monitorimit që i bëri një qendre në Berdicë, ku për 45 minuta votoi vetëm një person. Kritike u tregua edhe me qeverisjen e vendit, duke u shprehur se partia dhe qeveria janë të pandara dhe problemet e brendshme janë reflektuar. Në Shkodër sipas degës lokale të PS pjesmarrja në votime shkoi në 80%, nga 1420 anëtarë të thirrur për të shprehur vullnetin e tyre.
“Ne përfundim është deklarata më e rëndësishme, se ne nuk na u dha mundësi të kemi akses në këtë prooces. Me kodin zgjedhor të PS e kemi të garantuar. Kjo e drejtë nuk na u dha. Kam ardhur që dje që të marr në dorëzim listat e zgjedhjeve, të bëjë akreditimin dhe te monitorojmë procesin përmes vëzhguesve. Pjesëmarrja është nën 50%. Ky është i vetmi rast kur një proces që organizohet dhe monitorohet vetëm nga një palë e vetme. Nëpër ish-komuna kam arritur të gjej një qendër votimi në Berdicë dhe për 45 minuta që qëndrova aty erdhi vetëm 1 votues. Ky proces, i cili nisi si proces i pa rregullt u inicua, u monitorua, u organizua vetëm nga një palë”.
Prokuroria ngre padi penale: Jo të ligjshme motivet e fluturimit
Prokuroria e Shkodrës regjistron procedimin penal për helikopterin e rrëzuar se në Liqenin e Shkodrës janë shkelur rregullat e fluturimit ajror dhe për lëvizje të trupave ushtarake pa të drejtë apo pa një shkak të ligjshëm. “Shkelje të rregullave të fluturimit ajror” dhe “Lëvizje e trupave pa të drejtë”, janë dy akuzat për të cilat do të merren nën hetim edhe eprorët e pilotëve. Burimet nga organi i akuzës së qytetit verior bënë të ditur se, nga verifikimet paraprake, procedimi penal është regjistruar për këto dy vepra penale të parashikuara në Nenin 48 dhe 83 të Kodit Penal Ushtarak. Për veprën penale të “Lëvizjes së trupave pa të drejtë”, mendohet se do të mbajnë përgjegjësi eprorët e pilotëve, pasi kanë lejuar ngritjen e helikopterit pa një urdhër specifik apo plan masash të detajuar dhe arsyetuar për misionin e kryer, siç parashikon rregullorja.
Ligji parashikon që “Komandanti që pa autorizim, urdhër, mision të veçantë ose shkak tjetër të ligjshëm, urdhëron lëvizjen e trupave ose mjeteve tokësore, detare apo ajrore, kryen kundërvajtje penale dhe dënohet me ulje në gradë, me gjobë, nxjerrje në lirim ose me burgim deri në 2 vjet”.
Vepra tjetër penale, për të cilën po vazhdojnë hetimet nga Prokuroria e Shkodrës është ajo e parashikuar në Nenin 83 të Kodit Penal Ushtarak. Ku parashikohet se, “Shkelja nga ushtaraku e rregullave të flutirimit dhe të përgatitjes së teknikës së fluturimit, kur nga këto janë shkaktuar vdekje ose pasoja të tjera të rënda, dënohet me burgim deri në 15 vjet burg”.
Burimet shtuan se, përsa kohë nuk dihet ende se përse helikopteri EC145 me ekuipazh dy pilotët që humbën jetën Florian Deliaj dhe Donald Hoxha dhe të mbijetuarin Gerald Baramuça është ngritur nga baza e Farkës, dyshimet e Prokurorisë fokusohen tek këto dy vepra penale. Burimet shtuan se, Prokuroria e Shkodrës i ka kërkuar Prokurorisë së kryeqytetit të kryejë disa veprime hetimore, siç janë marrja e dokumentacionit në bazën ajrore të Farkës si edhe në qendrën e kontrollit të raportimit në Rinas.
Nga ana tjetër janë ngritur dyshime se, helikopteri i llojit “EC 145” gjatë fluturimit ka pësuar një defekt teknik në bishtin e saj, duke marrë flakë. Të ndodhur në këto kushte, dy pilotët kanë tentuar të ulin në ujë helikopterin që të kenë mundësi të fikin zjarrin. Por në momentin që slitat kanë prekur ujin, jastëku i ajrit të krahut të majtë nuk është hapur dhe helikopteri ka rënë në ujë. Në këtë kohë, thuhet nga informacionet paraprake, dy pilotët nuk kanë arritur të lirohen nga rripat e sigurimit, por kane gjetur vdekjen. I vetmi që ka mundur të shpëtojë është ushtaraku Gerald Baramuça, i cili ishte ulur në pjesën e pasme.
Gjithashtu, nuk dihet ende itinerari i saktë i helikopterit, megjithëse shefi i Shtabit të Përgjithshëm menjëherë pas rrëzimit të helikopterit deklaroi se itinerari i helikopterit ka regjistruar si shkëputje nga baza në Farkë orën 12:10, ndërkohë që kontakti i fundit në fluturim ishte në orën 13:45 minuta të datës 6 prill.
Ndërkohë ende nuk është marrë në pyetje i mbijetuari Baramuça për shkak të gjendjes së tij shëndetësore. Megjithëse ushtria raportoi se helikopteri u nis sipas një programi të planifikuar për një fluturim stërvitor, hetuesit kanë zbuluar se nuk ka patur as një plan stërvitor të detajuar. Ende mbetet e paqartë dinamika se kush ishte piloti kryesor, përgjatë të cilit korridor ajror fluturonte Eurocopteri dhe cilat janë shkaqet e rrëzimit të tij.
Prokuroria thotë se për zbardhjen e dinamikës do të ndihmojë edhe kutia e zezë, e cila u nxor dje nga Liqeni dhe pritet të merret nga ekspertët e kompanisë Eurocopter, që i janë bashkuar kërkimeve për nxjerrjen e mbetjeve të helikopterit të rrëzuar në Liqenin e Shkodrës.
Babai i pilotit Florian Deliaj: Aksidenti më duket paradoksal
Jah Deliaj, babai i pilotit Florian Deliaj, i cili humbi jeten në aksidentin tragjik pas rrëzimit të helikopterit të ushtrisë në Liqenin e Shkodrës ka rrëfyer mes dhimbjes dhe lotëve pasionin e të birit për profesionin dhe momentet e fundit të ndarjes me të. Jah Delia e cilëon paradoksal rrëzimin e avionit dhe i kërkon drejtësisë të zbardhë ngjarjen.
Prej tre ditësh familjarët e Florian Deliajt kanë hapur dyert e mortit. Piloti 43-vjeçar ishte baba i tre vajzave, më e madhja 12 vjeçe dhe më e vogla 6. Mes dhimbjes për humbjen e djalit, babai i 43-vjeçarit rrëfen çastin e fundit kur kishte përcjellë të birin si zakonisht për në punë
-Kur keni komunikuar për herë të fundit me djalin?
Komunikova në 7:15 kur ai dilte në punë. Merrte makinën që tani ka mbetur aty. Merrte dhe nusen e vet.
-Si e mësuat ngjarjen e rëndë?
Ngjarjen e mësova nëpërmjet televizionit, dhe deri në momentin e fundit nuk e besoja që një prej vikimave është im bir. Mora vesh që është një helikopter. E dija që djali ishte në veri. Njëherë është një i vdekur, njëherë është dy. Njëherë është një i plagosur dhe doli dhe derisa në fund emrat dolën.
-Ç’mund të thoni për aksidentin e helikopterit?
Nuk i di ende shkaqet e aksidentit tragjik. Është pak paradoksale që një mjet i testuar nga NATO dhe kur e ballafaqoj me kohën e mirë që ishte dhe kushtet më duket…nuk e di se çfarë ka ndodhur. Kërkoj nga drejtësia që të zbardhet ngjarja.
-Si e përjetuat ngjarjen tragjike?
Për mua është goditje e rëndë, djali nuk më vjen. Falënderoj të gjithë shqiptarët që u bënë pjesë e kësaj dhimbjeje. Për vetë mirënjohjen që po tregojnë shqiptarët, edhe politika nuk është përzjerë. Kur të dalë e vërteta…ne kemi besim se do të dalë shumë shpejt.
-Çfarë pengu ju ka mbetur nga djali?
Jeta e djalit, kjo është pengu kryesor. Famijët që do t’i shoh për ditë duke u rritur pa baba, peng është.
Përmirësohet gjendja e ushtarit që i mbijetoi rrëzimit të helikopterit
Gerald Baramuça, ushtari që i mbijetoi aksidentit të rrëzimit të helikopterit ndodhet ende i shtruar në Spitalin e Traumës. Ai është jashtë rrezikut për jetën, por i mbikëqyrur rreptësisht nga Policia Ushtarake. Gëzon shëndet të mirë ndonëse aksidenti ishte fatal për dy kolegët e tij.
Gerald Baramuça është ende nën kujdesin e mjekëve në Spitalin e Traumës në Tiranë. Zyra e shtypit e këtij spitali bën të ditur se, gjendja shëndetësore e tij është brenda parametrave jetësore. Këtë fundjavë nuk parashikohet të dalë, por të hënën pritet të jepet një vlerësim nga mjekët. Ndërkaq Baramuça vazhdon të mbikëqyret rreptësisht nga Policia Ushtarake.
Ndërkohë një burim nga Spitali i Traumës bën me dije, se për shkak të gjendjes së rënduar psikologjike, ushtarit Baramuça nuk i është thënë lajmi i hidhur për humbjen e jetës së 2 shokëve të tij, kapiten Florian Delia dhe toger Donald Hoxha, me të cilët po fluturonte me helikopterin e ushtrisë. Sipas familjarëve, për momentin atij i kujtohet vetëm ndihma që i ka dhënë një peshkatar i zonës.
Ushtari i plagosur, Gerald Baramuça, kishte menduar se kishin rënë në pjesën malazeze të Liqenit të Shkodrës ndaj edhe kishte kërkuar ndihmë në gjuhën serbo-kroate. “Unë së bashku me Xhixhin, shkuam dhe nxorëm ushtarin e plagosur nga uji. Ai sa na pa duke menduar se kishte rënë në pjesën malazeze të liqenit na kërkoi ndihmë në gjuhën serbo-kroatishte. Më pas përsëriste gjithmonë, “ku është spitali, ku është spitali”, ndërsa na tregoi se kishin qenë tre persona në bordin e helikopterit. Nuk e dimë çfarë plagësh dhe ku i kishte marrë, ndërsa Xhixhi e çoi në spital”, tregon Skënder Cenaj.
Më herët ushtari që i mbijetoi aksidentit të rëndë, në një intervistë për shtyp tregoi çaste para rrëzimit të helikopterit. “Isha i ulur në pjesën e pasme të helikopterit. Para meje qëndronin të ulur dy kolegët dhe shokët e mi, Donaldi dhe Floriani. Në vesh kishim vendosur kufjet dhe unë isha duke bërë një video me celularin tim. Ndonjëherë bënim dhe gallata gjatë rrugës”, deklaroi ai.
Kjo ka qenë e qeshura e fundit për tre shokët. Fluturim patrullimi përfundoi me rrëzimin e helikopterit në liqen. Geraldi nuk mban mend shumë detaje. Ai tregon se ka arritur të dalë menjëherë nga kabina duke notuar në ujë derisa një varkë arriti ta shpëtojë.
Incidenti i tre ditëve më parë solli humbjen e jetëve të kapiten Florian Deliajt dhe toger Donald Hoxhës, që të dy pilotë të talentuar që kishin kaluar disa kurse të gjata trajnimi, si brenda ashtu edhe jashtë vendit.
Kush e shkatërroi “kutinë e zezë” të helikopterit
Specialistët dhe polumbarët kanë arritur të nxjerrin nga uji “kutinë e zezë” të helikopterit të rrëzuar para tre ditësh ku humbën jetën dy pilotë dhe u plagos një ushtarak. Por bëhet e ditur se, “kutia” është e plasur dhe e copëtuar ndryshe nga sa garantohet një objekt i tillë që shërben për gjetjen e shkaqeve të rrëzimit të avionëve dhe helikopterëve.
Siç shihet në foto, disa pjesë të saj janë të ndara nga trupi kryesor i kutisë së zezë, duke krijuar dyshime se të dhënat brenda saj mund të jenë dëmtuar. Nga liqeni ka qenë e pamundur të nxirren pjesë të vogla të saj, kështu që dëmtimi i kutisë së zezë ka ndodhur pas nxjerrjes nga uji. Dëmtimi i kutisë është konstatuar edhe nga prokurorët e Shkodrës, të cilët po hetojnë shkaqet e rrëzimit të helikopterit.
Prokuroria e Shkodrës ka nisur çështje penale pavarësisht se një urdhër i ministres së Mbrojtjes kërkon të kufizojë hetimin brenda institucionit. Organi i akuzës dyshon se janë shkelur rregullat e fluturimit dhe se fluturimi ka qenë pa një shkak të ligjshëm.
“Kutia e zezë” ose “kamera” e helikopterit të rrëzuar në Shkodër u nxorr dje në mesditë nga polumbarët. Ndërkohë, ekspertët francezë të kompanisë Eurocopter, janë rikthyer në vendin e ngjarjes. Për shkak të kushteve të vështira të motit gjatë së premtes, ata bënë vetëm këqyrjen e vendit të ngjarjes, verifikimin e pjesëve të nxjerra nga liqeni si dhe u informuan nga ushtarakët shqiptarë lidhur me të dhënat që kishin grumbulluar.
Helikopteri EC-145 që u rrëzua në liqenin e Shkodrës kishte në bord vetëm dy profesionistë, dy personat që mbetën të vdekur nga rrëzimi. Personi tretë që për fat shpëtoi ishte ushtari profesionist Gerald Baramuça me detyre zjarrfikës. Protokolli e kërkon që helikopteri që kryen misione të gjera sic ishte edhe lëvizja e asaj dite duhet të kishte në bord një person tjetër të specializuar dhe jo një ushtar zjarrfikës. Personi i tretë duhej të ishte tekniku i bordit i helikopterit ose inxhinieri i helikopterit të cilët janë me detyre funksionale dhe marrin pagesën e veshtirësisë për këtë punë që bëjnë. Perkatësisht tekniku i bordit merr 240,000 mijë lekë të vjetra në muaj shtesë mbi pagën mujore dhe inxhinieri i fluturimit 280.000 lekë të vjetra mbi rrogën bazë pikërisht për këtë arsye.
R.POLISI
Banda e Tahirit trafikon edhe arrestimin e vëllait të Alibeajt
Partia Demokratike ka reaguar për fabrikimin e dalë nga zyrat e Policisë së Shtetit për gjoja arrestimin në Gjermani të vëllait të kreut të Departamentit të Rendit dhe Sigurisë, Enkelejd Alibeaj. Në reagimin e PD thuhet se, shpifja e qëllimshme dhe manipulimi i medias, rezultoi një përpjekje e dëshpëruar e Tahirit për të hedhur baltë mbi përfaqësuesin e PD dhe familjarët e tij. “Partia Demokratike dënon fabrikimin e ulët nga Policia nën urdhëra politike, të lajmit për gjoja arrestimin e vëllait të kreut të Departamentit të Rendit dhe Sigurisë, Enkelejd Alibeaj. Kjo shpifje e qëllimshme dhe manipulimi i medias, rezultoi një përpjekje e dëshpëruar e Tahirit për të hedhur baltë mbi përfaqësuesin e PD e familjarët e tij, pasi shpejt u pa se lajmi nuk ishte i vërtetë. Partia Demokratike shpreh indinjatën për sulme të tilla të paprincipta bazuar në gënjeshtra, të organizuara pikërisht nga njeriu më i inkriminuar në vend, Saimir Tahiri me bekimin e shefit të tij. Asnjë presion mjeran si ky nuk e lëkund Partinë Demokratike dhe përfaqësuesit e saj nga beteja e përditshme kundër krimit dhe lidhjeve të qeverisë dhe Edi Ramës me krimin”, thuhet në deklaratën për shtyp të Partisë Demokratike.
Ndërsa kreu i Departamentit të Rendit dhe Sigurisë në Partinë Demokratike, Enkelejd Alibeaj e cilësoi të fabrikuar nga ministri i Brendshëm lajmin e përhapur për arrestimin e vëllait të tij. “Sot banda në Policinë e Shtetit e drejtuar nga kryebanditi Sajmir Tahiri ka shpërndarë një lajm të gënjeshtër për gjoja arrestimin e vëllait tim. Lajmi i dalë nga zyra e Sajmir Tahirit tregon se sa të dëshpëruar janë, se çfarë morali kanë e çfarë janë në gjendje të bëjnë vetëm e vetëm për të baltosur kundërshtarin”, u shpreh Alibeaj në reagimin e tij.
Sipas Alibeajt, qëllimi është i qartë. “Shantazh për t’i mbyllur gojën opozitës e për t’i zhytur të gjithë në llumin e krimit dhe korrupsionit të Edi Ramës e bandës së tij. Njeriu i faktuar nga shërbimet sekrete të vendeve partnere si i lidhur me krimin, njeriu që ve në dispozicion të trafikantëve makinën e tij, partneri i krimit, shpifësi, ordineri do të përgjigjet për këtë sajesë ordinere”, shprehet më tej Alibeaj.
Në përfundim, Alibeaj shprehet se nuk trembet e as nuk shantazhohet nga Saimir Tahiri dhe banda që drejton. “Keqardhje për mediat e keqpërdorura, të cilat sot i detyrohen një ndjesë publike vëllait dhe familjes time. Sa për mua, as nuk trembem as nuk shantazhohem. Përballë do më ketë ditë për ditë, bashkë me opozitën, Saimir Tahiri dhe banda që drejton”, përfundon Alibeaj.
Lajmi për gjoja arrestimin e vëllait të kreut të Departamentit të Rendit dhe Sigurisë, Enkelejd Alibeaj në Gjermani, u publikua dje nga mediat pranë qeverisë, duke iu referuar burimeve jozyrtare të Policisë së Shtetit. Ky lajm i fabrikuar vjen ndërkohë që Alibeaj si drejtues i Departamentit të Sigurisë në PD po udhëheq serinë e denoncimeve për situatën e rëndë të krimit në vend. Në shënjestër të deklaratave të tij ka qenë shpesh ministri i Brendshëm, Saimir Tahiri. Por gjithçka u hodh poshtë nga vëllai i Alibeajt, Taulanti që u shpreh për mediat shqiptare nëpërmjet telefonit se nuk është arrestuar asnjë herë as në Gjermani dhe as në Itali dhe në asnjë vend tjetër ku ka qenë. Ai u tha se është i lirë dhe po konsumon kafe normalisht në Gjermani.
Vëllai i Alibeajt: S’di të jem arrestuar ndonjëherë, jam duke pirë kafe në Gjermani
Taulant Alibeaj, vëllai i kreut të Departamentit të Rendit dhe Sigurisë në PD, Enkelejd Alibeaj ka sqaruar personalisht të vërtetën për fabrikimin e lajmit për gjoja arrestimin e tij. Në një lidhje telefonike me studion e lajmeve News24, Taulant Alibeaj u shpreh se lajmi mbi një arrestim të tij është tërësisht i pavërtetë.
Madje, ai është shprehur për “Panorama” se, jo vetëm që nuk është në qeli, por është duke pirë një kafe në liri të plotë në Gjermani. “Unë nuk e di se çfarë kanë shkruar mediat në Shqipëri, por unë mund t’ju konfirmoj me përgjegjësi të plotë se në këtë moment që jemi duke folur, unë jam ulur dhe jam duke pirë një kafe në Gjermani. Unë nuk kam asnjë problem me policinë gjermane, dhe nuk jam ndaluar asnjëherë të vetme nga autoritetet këtu, madje nuk kam as makinë që të marr ndonjë gjobë”,¬ tha Taulant Alibeaj.
-Zoti Taulant Alibeaj, mediat shkruajnë se ju jeni arrestuar për grabitje me armë në Gjermani. Çfarë mund të na thoni?
Unë nuk di që të jem ndaluar asnjëherë as në Itali, as në Gjermani, as në një vend tjetër ku kam qenë. Pastaj imagjino grabitje me armë. Është vepër penale shumë e rëndë dhe duhet të isha në burg.
-Po ndonjë kontakt me policinë keni pasur?
Unë kam kontakt me familjarët e mi jo me policinë.
-Në këto momente që flasim nuk keni asnjë problem me policinë, nuk jeni në burg?
Si mund të isha në burg nëse jam në lidhje telefonike me ju këtu…
-Ju falenderojmë për këtë komunikim sëbashku
Ju faleminderit juve dhe një ditë të bukur të gjithëve!
R.POLISI
Autizmi, zonjat e para të trupit diplomatik vizitojnë qendrat
Në vazhdim të muajit të ndërgjegjësimit të Autizmit, Qendrat Rajonale 1 dhe 2 (në Farkë dhe Mjull-Bathore, Sauk,) kanë mirëpritur sot 4 gra ambasadore dhe bashkëshortet e ambasadorëve të akredituar me mision diplomatik në vendin tonë. Të shoqëruara nga zonja e parë e vendit, Odeta Nishani, përfaqësueset e trupit diplomatik janë pritur nga presidentja e Fondacionit “Fëmijët Shqiptarë”, Liri Berisha dhe stafi i Fondacionit.
Zonjat e para të trupit diplomatik të akredituar në vendin tonë janë njohur me qendrat e autizmit, shërbimet terapeutike që ofrohen aty, si dhe me modelet e organizimit të punës së ngritur.
Një moment prekës dhe emocionues për këto zonja ishte marrja si dhuratë e flamujve të tyre kombëtarë, punime artizanale nga duart e fëmijëve me çrregullim të autizmit nën asistencën e terapistëve. Këto punime kanë shërbyer jo vetëm si fokus terapie për këta fëmijë, por edhe si model pune integrimi.
Liri Berisha u përcolli zonjave të para një shpjegim të shkurtër mbi këtë çrregullim, mundësitë që ekzistojnë për rehabiltimin e tyre si dhe avantazhet e ndërhyrjes së hershme.
Ndërmjet të tjerash ajo u shpreh: “Solidarizohemi me këta prindër që vuajnë gjithë jetën. Solidarizohemi, duke u dhënë shpresë, besim, duke u dhënë kurajo se ata nuk janë vetëm, por kanë njerëz që i kthejnë sytë edhe nga dhimbja e tyre. Në jetë fëmijët vijnë të gjithë si ëngjëj. Janë shumë të dashur për familjet e tyre, të mezipritur, krijojnë dashuri dhe gëzim, atmosferë krejt të veçantë. Por jo të gjithë janë të njëjtë. Disa vijnë në jetë dhe vrapojnë shumë shpejt, kapin finishin të parët, disa të tjerë janë në karroca, siç janë tetraplegjikët dhe paraplegjikët, dikush ndërton atë që ka projektuar dikush tjetër, kurse në këtë qendër ka fëmijë që vuajnë çrregullimin e spektrit autik. Një shoqëri është e civilizuar atëherë kur të gjithë pjesëtarët janë pjesë e saj dhe punojnë për këtë shoqëri. Autizmi nuk do ilaçe. Autizmi mund të prekë këdo. Dhe logo e Fondacionit tonë është “Autizmi nuk zgjedh”. Puna më e madhe e jona është ndërgjegjësimi dhe sensibilizimi i gjithë shoqërisë t’i kthejë sytë dhe zemrat përpara kësaj dhimbje të madhe që e ka emrin Autizëm”.
Në fund, përfaqësueset e trupit diplomatik ndoqën me shumë interes dokumentarin “Na mbështesni SOT, të jemi të pavarur NESER”.
Bashkëfinancim direkt për çdo student nga buxheti
Kryetari i Partisë Demokratike, Lulzim Basha ka diskutuar programin e Partisë Demokratike për arsimin dhe bujqësinë me të rinj, fermerë dhe banorë të Mulletit, Baldushkut dhe Priskës. Duke iu përgjigjur interesimit të të rinjve për arsimin e lartë, Basha ritheksoi se ligji i arsimit të lartë i hartuar në mënyrë klienteliste do të shfuqizohet dhe në qendër do të vendoset studenti. Të gjithë të rinjve, tha zoti Basha, do t’u garantohet e drejta për arsimim, ndërsa studentët do të mbështeten nga buxheti i shtetit. Tarifat do të ulen përmes bashkëfinancimit direkt për çdo student nga buxheti. Masa e bashkëfinancimit do të përcaktohet nga dega dhe cilësia e universitetit ku studion studenti. Kjo sipas liderit të opozitës do të nxisë konkurrencën mes universiteteve për cilësi, si dhe do të orientojë të rinjtë të studiojnë në bazë të nevojave të tregut.
“Çdo të riu e të reje shqiptare do t’i jepet mundësia për arsim. Do të vendosim studentin në qendër të vëmendjes. Studenti vendos vetë ku do të studiojë. Qeveria përcakton nivelin e mbështetjes. Për shembull, po studiove juridik do të kesh 50 pikë bonus. Po studiove inxhinieri mekanike do të kesh 100 pikë bonus. Po studiove zooteknikë, agronomi do të kesh 120 pikë bonus. Pse?! Sepse unë e di që një inxhinier mekanik, një agronom, nesër brenda tregut shqiptar dhe në bashkëpunim me tregun europian do ta kemi shumë më të lehtë ta punësojmë, pra të krijojmë vlerë të shtuar, sesa një person me një profesion që është më i kudogjendshëm dhe më pak i përdorshëm” është shprehur Basha.
Banorët janë thellësisht të zhgënjyer nga qeveria, e cila sipas tyre vetëm vjedh paratë dhe djersën e tyre.
“Me fjalën ‘rilindje’ duke thënë unë do të bëj shtet këto zotni nuk po bëjnë shtet. Këto po rilindin veten e vet duke vjedh lekët çdo tre muaj që i marrin djersën popullit” është shprehur një nga banorët.
Bujqësia është konsideruar si prioritet kryesor i qeverisjes së demokratëve për nxjerrjen e vendit nga kriza. Për këtë kryetari i Partisë Demokratike ka theksuar se mbështetja nga buxheti për bujqësinë do të jetë në nivelin më të lartë të parashikuar ndonjëherë. Kjo mbështetje prej 1,5% e PBB do të përdoret për investimet kapitale në ndihmë të bujqësisë, infrastrukturës bujqësore dhe për subvencione të drejtpërdrejta për fermerin shqiptar.
“Buxheti i financimit të bujqësisë do të jetë 150 milionë euro në vit. Hapi i parë do të jetë mbështetja direkte për bujqësinë, që është 50 për qind e popullsisë. Mbështetje drejtpërdrejt për fermerët, për familjet e fermerëve me subvencionim të drejtpërdrejtë nga shteti. Se sot edhe ato 5 lekë që shpërndahen, 2.5 lekë i mban hajduti që i thotë vetes ‘shef’, e gjysma tjetër e merr kur paguan gjysmën. Paraja do të shkojë në konton tuaj. E vetmja gjë që do të kontrollohet është që këto para realisht po shkojnë për prodhim bujqësor dhe blegtoral” është shprehur Basha.
Një socialist i zhgënjyer nga mosmbajtja e asnjë premtimi, thotë se ajo votë që i solli në pushtet po ajo votë do t’i largojë një orë e më parë.
“Jam një socialist. Po të kisha frikë nuk do të kisha ardh sot këtu. Nuk kam frikë se deputeti i zonës tonë këtu kur donte votën më kërkoi dorën dhe ja dhashë, me mirëbesim, me programin që më pëlqeu, ia dhashë. Por ai program që ishte nuk është më sot, u tjetërsu, edhe unë tjetërsohem” tha një tjetër banor.
Basha ka theksuar gjithashtu se do të falen kamatëvonesat dhe për familjet në ndihmë ekonomike do të ketë subvencionim të plotë të faturës së energjisë deri në masën 200 kilovat, si dhe do të krijohet një fashë mbrojtëse për shtresat në nevojë.
Në Priskë, një fshat jo shumë larg Surrelit ku ndodhet shtëpia e Kryeministrit, banorët shprehin shqetësimin për infrastrukturën rrugore, mungesën e investimeve në bujqësi dhe mungesën e ujit të pijshëm. Tregu për produktet e tyre ishte po ashtu një tjetër shqetësim.
“Ujë këtu nuk ka. Bën një kokërr domate, çfarëdo që prodhojmë do t’i hedhim në plehra se nuk të lë njeri me i shit poshtë. Fshati do treg. A i mbollëm, ku do ta çojmë?” u shpreh një banor.
“Aksesi në treg do të jetë i lirë dhe pa kufizim, pa NIPT, pa kartë fermeri, me kartë identiteti” tha Basha.
Të rinjtë fshijnë parrullat për Enverin në zyrën e Kokëdhimës në Qeparo
Të rinjtë fshijnë parrullat për Enverin në zyrën e Kokëdhimës në Qeparo
Rama, 91 mijë mbifaturime qytetarëve në vitin 2015
Edi Rama ka vërsulur bandën e OSHEE kundër qytetarëve me një valë të re represioni, abuzimi, mbifaturimi, për të rrjepur sa më shumë para kryesisht nga familjet që po vuajnë krizën ekomonike. Partia Demokratike denoncoi dje mbifaturimin masiv ndaj qytetarëve. Përmes një deklarate për mediat, zëdhënësja e PD, Ina Zhupa tha se në të gjithë territorin e vendit ka nisur fushata masive e mbifaturimeve, duke nisur nga banesat e emigrantëve që janë të pabanuara nga njeri e deri tek shtëpitë e plazhit. “Faturimet shkruhen sipas nevojës për të mbushur arkën e Edi Ramës, e jo sipas konsumit. Vetëm për vitin e kaluar, 91 mijë e 400 qytetarë janë ankuar për faturimet abuzive. Gjahu i preferuar janë familjet që kursejnë energjinë dhe kur matësi tregon pak, atëherë banda e Edi Ramës i kalon në aforfe, duke ua shumëfishuar gjobën. Shtëpitë në zonat e plazhit janë gjithashtu objekt sulmi. Edhe pse ato janë të mbyllura dhe pa konsum, familjarët zbulojnë papritur tarifa të kripura. Faturohen sikur të kenë konsum normal edhe banesa emigrantësh që janë prej kohësh të mbyllura e ku nuk jeton njeri. Ndërkohë që bizneset e mëdha që u përkasin oligarkëve të Ramës trajtohen me përkëdheli dhe lehtësohen në pagesat e energjisë”, u shpreh Zhupa. Ajo u bëri thirrje qytetarëve për mosbindje civile kundër padrejtësive të pushtetit oligarkik. “Paratë që merr me dhunë e me manipulim faturash, Edi Rama i ndan më pas me miqtë e tij, me tendera ku fituesit janë të paracaktuar. Ndërkohë që qytetarët varfërohen çdo ditë, ku çdo ditë Edi Rama gjen një mundësi të fusë dorën në xhepin e tyre e të marrë dhe qindarkën e fundit, ai vetë dhe klientela e tij mbushin thasët dhe janë të shqetësuar për parajsat fiskale. Mbifaturimi është krim dhe ata që e kryejnë këtë krim duhet dhe do të mbajnë përgjegjësi. Qytetarët e abuzuar nga ky mbifaturim, nuk kanë asnjë detyrim dhe ky abuzim është një thirrje për mosbindje civile”, tha zëdhënësja e PD.
Mbifaturimi dhe keqfaturimi
Prej dy vitesh ankesat e qytetarëve për mbifaturimin e faturës së energjisë elektrike sa vijnë e shtohen. Në spektrin e ankesave një vend të konsiderueshëm zënë dhe ankesat në lidhje me mbifaturimin dhe keqfaturimin e energjisë elektrike që janë shkaktuar nga problematika të ndryshme si: mosrakordimi i gjendjes së hedhur në sistem me gjendjen reale të matësit, gabime nga ana e faturuesve, vonesa në hedhjen e të dhënave të matësve të rinj në sistem. Këto problematika rrisin në mënyrë të konsiderueshme peshën financiare që iu ngarkohet abonentëve, duke ulur nivelin e arkëtimeve. Të gjithë këta faktorë kanë sjellë që ankesat në lidhje me mbifaturimin dhe keqfaturimin e energjisë elektrike të jenë konsideruar si problematike edhe për vitin 2014 e për 2015. Për të gjitha këto ankesa, ERE ka kërkuar nga OSHEE sha, informacionin e nevojshëm dhe verifikimin në vend të tyre. Nga të dhënat e disponuara rezultojnë 536 ankesa mbifaturim dhe keqfaturim.
Deputetët holandezë: Integrimi i Shqipërisë, i rrezikuar
Informacionet se janë shtetasit shqiptarë që prijnë në listën e kërkesave për azil, nuk e kanë mirëpritur as deputetët holandezë. Ata madje besojnë dhe paralajmërojnë, se ky fluks prurjesh nga Shqipëria, dëmton procesin e integrimit të vendit në BE. Numri i lartë i azilkërkuesve shqiptarë në Holandë gjatë muajve të fundit ka sjellë reagime të ashpra të deputetëve të këtij vendi. Ata kanë paralajmëruar se rritja e numrit të azilkërkuesve nga Shqipëria, dëmton procesin e integrimit të Shqipërisë në Bashkimin Europian. Malik Azmani, deputet i Partisë VVD: “Unë mendoj që kërkesat për azil nga shqiptarët, por dhe vendet të tjera të sigurta duhet të zgjidhen brenda ditës.
Në qoftë se refuzohen, ata duhet të rikthehen menjëherë në Shqipëri. Unë e kuptoj shumë mirë se për Shqipërinë kërkesat janë të turpshme dhe prandaj e kuptoj nëse shteti do të marrë masa për këtë fenomen. Shqipëria kërkon të bëhet pjesë 3 Bashkimit Europian. A mendoni se e justifikon integrimin kur në Holandë numri më i madh i azilkërkuesve janë shqiptarë? Patjetër vendi duhet t’i plotësojë kushtet, që njihen ndryshe si kriteret të Kopenhagenit. Por ky fluks nuk do t’i ndihmojë Shqipërisë në këtë proces. Në kuadrin e imazhit të Shqipërisë për Holandën kjo nuk do të funksionojë për mirë nëse shqiptarët janë njëkohësisht në procedurat e aplikimit për azil. Aq më tepër në kohën kur shqiptarët ankohen për ushqimin dhe vjedhin… Do t’i përgjigjesha me një deportim të shpejtë që të hanë çorbë në shtëpitë e tyre”.
Mona Keijzer, deputet i Partisë opozitare CDA: “Unë do ta këshilloja qeverinë holandeze që të përshpejtojë procedurat për azil, që njerëzit ta kuptojnë shumë shpejt që do të kthehen. Po ashtu duhet të ndalojmë ndihmën financiare për këta azilkërkues. Por që të ulim fluksin na duhet dhe ndihma e Shqipërisë. Ne na duhet patjetër që qeveria shqiptare t’i këshillojë qytetarët të saj, mos ikni sepse këtu nuk ka shanse për azil”. Jowl Voordewind, deputet i Partisë opozitare CU: “Unë mendoj që është mirë nëse shqiptarët kontribuojnë në vendin e tyre, në vend që të kërkojnë azil. Unë e kuptoj se vijnë në Holandë për punë, sepse në vendin e tyre ka një papunësi të lartë. Por është e qartë që ata nuk janë refugjatë”.
Mohamed Abrini ka pranuar se është personi me kapele në aeroportin Zaventem
Terroristi i dyshuar, Mohamed Abrini i cili u arrestua një ditë më parë në Belgjikë ka pranuar se është personi me kapelë që është filmuar në aeroportin e Brukselit, pak para shpërthimit terrorist.
BBC shkruan se Mohamed Abrini i tha hetuesve se ai ishte në 22 mars pikërisht në vendin ku shpërthyen bombat.
Abrini është ka qenë i shpallur në kërkim edhe në lidhje me sulmet në Paris që vranë 130 njerëz nëntorin e kaluar. Ai është një nga gjashtë burrat e arrestuar të premten në Bruksel. Katër janë akuzuar për vepra terroriste.
Sulmet në aeroportin Zaventem dhe në një stacion të metrosë në Bruksel lanë 32 të vdekur.
Zyrtarët besojnë se personat që kryen sulmet e Brukselit dhe sulmet e Parisit ishin pjesë e të njëjtit rrjet të mbështetur nga të ashtuquajturit Shtet Islamik.
Kryesore
Continue to the category
