Borxhi i jashtëm bruto i vendit arriti në 7.73 miliardë euro me një rritje 1.3 për qind në krahasim me fundin e vitit 2015, sipas te dhënave nga Banka e Shqipërisë. Pjesën më të madhe të këtij borxhi e zënë detyrimet e jashtme të qeverisjes së përgjithshme, të cilat arritën në fund të tremujorit të parë në 3.3 miliardë lekë me një rritje 0.7 për qind nga tremujorin e mëparshëm. Ndërsa detyrimet e korporatave depozituese qëndruan gati të pandryshuara me një vlerë 1.2 miliardë eurosh. Detyrimet e sektorëve të tjerë u rriten me 1.8 për qind më bazë të tremujore duke arritur në 129 miliardë euro. Detyrimet e jashtme që vijnë nga investimet direkte si hua ndërmjet kompanisë arritën në 1.76 miliardë euro nga 1.71 miliardë euro në fund të 2015.
Qeveria e rrit borxhin me 16% në një vit
Sipas raportit të Bankës së Shqipërisë, sektori me peshën më të madhe në stokun e borxhit të jashtëm mbetet sektori i Qeverisë së Përgjithshme. Në harkun kohor të një viti, borxhi i jashtëm i këtij sektori është zgjeruar me 16% dhe në fund të mars 2016 shënon 3,318 milionë euro. Borxhi i qeverisë së përgjithshme përbëhet nga huatë afatgjata, obligacionet dhe dëftesat. Stoku i huave afatgjata u rrit me rreth 342 milionë euro dhe ai i obligacioneve me 121 milionë euro (emetimi i euro bondit në tremujorin e katërt 2015). Huatë e Qeverisë së Përgjithshme përfaqësohen nga huatë e tërhequra pas viteve ’90 dhe ato të riskeduluara, të cilat vazhdojnë të jenë të negociueshme midis palëve. Në fund të periudhës, huatë e riskeduluara përfaqësonin 1% të stokut të huave afatgjata të këtij sektori.
