Në intervistën për emisionin Context në ATV Kosova, drejtuesi politik i Koalicionit Euroatlantik, Lulzim Basha, theksoi rëndësinë e luftës kundër korrupsionit dhe mbështetjes për SPAK. Ai kritikoi ashpër kryeministrin Edi Rama, duke kujtuar se, nën një ton ngazëllimi, ky i fundit kishte deklaruar: “Amerika i tërhoqi ushtarët nga SPAK-u”. Por sot, siç theksoi Basha, mediat shqiptare kanë publikuar lajmin se administrata e ish-presidentit Donald Trump ka rikthyer fuqishëm mbështetjen e specializuar për SPAK, duke e konsideruar luftën kundër korrupsionit një prioritet të sigurisë kombëtare të SHBA.
“Ky është një lajm i mrekullueshëm për shqiptarët dhe për Shqipërinë. Fundi i pandëshkueshmërisë për politikanët e korruptuar është kusht i panegociueshëm për zhvillimin ekonomik dhe reputacionin ndërkombëtar të vendit”, deklaroi Basha.
Ai theksoi se Koalicioni Euroatlantik është e vetmja forcë politike që ka mbështetur me vepra – dhe jo me fjalë – SPAK-un. Basha përmendi projektligjet e depozituara prej më shumë se një viti në Kuvend, të cilat synojnë forcimin e SPAK, vettingun e politikanëve dhe heqjen e imunitetit parlamentar, por që, sipas tij, janë bllokuar nga mazhoranca.
“Prej një viti e gjysmë qëndrojnë në sirtarët e Parlamentit propozimet tona për t’i dhënë më shumë fuqi ligjore SPAK. Nuk guxojnë as ta fusin në rend të ditës, jo më ta votojnë”, tha ai.
Basha foli edhe për standardin që ka vendosur Koalicioni Euroatlantik për kandidatët: secili prej tyre ka firmosur një formular për pastërtinë e figurës dhe është i vendosur në lista të hapura, në dispozicion të votës së qytetarëve dhe të kontrollit të ligjit.
“Ndryshe nga listat e mbyllura të partive të tjera që janë kthyer në streha për politikanë të korruptuar, ne kemi njerëz që nuk kanë frikë nga hetimet dhe nga fundi i pandëshkueshmërisë. Rama dhe Berisha kanë ndërtuar mburoja për veten dhe për të korruptuarit që i rrethojnë, ndërsa ne punojmë për interesin publik dhe për drejtësinë. Sepse interesi më madhor i shqiptarëve është shteti i së drejtës, zbatimi i ligjit dhe lufta e pakompromis kundër korrupsionit”, u shpreh Basha.
