Gara ka filluar për frenimin e sëmundjes infektive që po përhapet në Kinë dhe në vende të tjera. Hera e fundit që një vaksinë u zhvillua në një shpejtësi kaq të madhe ishte gjatë përballjes me një epidemi që po shpërthente, 6 vjet më parë, kur një shpërthim vdekjeprurës i Ebolës ndodhi në Afrikën perëndimore.
Një grup agjensish shtetërore, bamirësish dhe kompanish e mbështetën projektin, gjë që shpejtoi vaksinën kundër Ebolës, me prova që u bënë fillimisht në vullnetarë në tetor të vitit 2014.
Një vaksinë konvencionale ka në përbërje një virus jo – aktiv dhe proteinat përbërëse të tij. Ajo trajnon sistemin imunitar që të njohë patogjenin dhe të prodhojë antitrupa mbrojtës kundër tij, nëse përballet me virusin e vërtetë në të ardhmen.
Midis grupeve të mëdha farmaceutikale, përpjekje po bëhen dhe nga Johnson & Johnson, që po punon me një tëknologji të ngjashme me atë të përdorur për të prodhuar një vaksinë tjetër kundër Ebolës. Përpjekje po bëhen dhe nga Koalicioni për Inovacionet e Përgatitjes Epidemike, që është një partneritet midis disa qeverive, industrive dhe bamirësive, me bazë në Oslo.
Në Kinë, një kompani e quajtur “Clover Biopharmaceuticals”, ka plane ambicioze që të ketë një vaksinë potenciale gati për t’u testuar brenda disa javëve, duke e zhvilluar atë bazuar në disa proteina çelës që ndodhen në koronavirus.
Ndërkohë përpjekje të tjera po bëhen në të gjithë botën, si në Australi apo në Shtetet e Bashkuara.
Kërkimet për zhvillimin e një vaksine janë ndihmuar dhe nga vendimi i autoriteteve të Beijing për të publikuar detaje të koronavirusit sa më shpejt të jetë e mundur, duke mundësuar kështu që shkencëtarët dhe kompanitë e ilaçeve në të gjithë botën të studiojnë sekuencën e gjenomeve të virusit.
Por shkencëtarët kanë paralajmëruar se edhe nëse ata janë të aftë shpejtojnë fazën e hershme të zhvillimit të vaksinës, nevoja për prova klinike rigororoze dhe sfidat e prodhimit, mund të bëjnë që vaksina mos të jetë gati për t’u përdorur në të gjithë botën ne më pak se një vit.
