Nëpërmjet një deklarate për shtyp, Shoqata Antikomuniste e të Përndjekurve Politikë të Shqipërisë, ka reaguar nëpërmjet nënkryetarit të saj, Shpëtim Agolli.
“Ish të përndjekurit politikë kanë qenë shtylla kryesore e Partisë Demokratike dhe si të tillë z.Berisha sa herë ka qenë në pushtet i ka tallur, i ka përbuzur ata duke u krijuar vende pune sa për t’i injoruar.
Ishte po z.Berisha i cili i nxorri me shkop gome ish të përndjekurit politikë të cilët hynë në grevë urie në v.1994 pothuajse në çdo qytet të Shqipërisë në kërkim të të drejtave të tyre të mohuara nga një pushtet të cilët ata vetë në masë e kishin votuar më 22 mars 1992.” – shkruan Agolli në reagimin e tij.
Më poshtë e plotë:
DEKLARATË PUBLIKE E SHOQATËS ANTIKOMUNISTE E ISH TË PËRNDJEKURVE POLITIKË TË SHQIPËRISË
Adresa: Bulevardi “Dëshmorët e Kombit” nr.3
Sa herë ka zgjedhje ish të Përndjekurit Politikë përdoren si mish për top duke mos mjaftuar reprezaljet, vrasjet, burgosjet dhe internimet e mijëra viktimave dhe familjeve të tyre prej diktaturës komuniste, sot ata përballen me injorimin dhe përbuzjen e të gjithë politikanëve shqiptarë sa herë ata vijnë në pushtet.
Sot z.Berisha ftoi tek selia e PD një grup të përndjekurish politikë si pjesëtarë të Departamenteve të Përndjekurve Politikë të PD, apo shoqatë siç i quajti ai, ku i ftoi ata që të bënin programin e tyre i cili do të konsiderohej si një marrëveshje ndërmjet tyre dhe PD, e cila kur të vijë në pushtet e dalë nga zgjedhjet e 11 majit, të konsderohet si e tillë në zbatim të kërkesave të tyre.
Ish të përndjekurit politikë, asnjëherë nuk kanë kërkuar lëmoshë nga shoqëria shqiptare e cila i ka shumë borxhe kësaj shtrese si dhe nga cilido pushtet, përveçëse vendosjes së dinjitetit të nëpërkëmbur nga diktatura komuniste.
Për tre dekada rrjesht, ish të përndjekurve politikë ju janë mohuar shumë të drejta të tyre të munguara megjithëse ato ishin të përcaktuara me ligj.
Ish të përndjekurit politikë kanë qenë shtylla kryesore e Partisë Demokratike dhe si të tillë z.Berisha sa herë ka qenë në pushtet i ka tallur, i ka përbuzur ata duke u krijuar vende pune sa për t’i injoruar.
Ishte po z.Berisha i cili i nxorri me shkop gome ish të përndjekurit politikë të cilët hynë në grevë urie në v.1994 pothuajse në çdo qytet të Shqipërisë në kërkim të të drejtave të tyre të mohuara nga një pushtet të cilët ata vetë në masë e kishin votuar më 22 mars 1992.
Ishte po z.Berisha i cili nuk dënoi krimet e komunizmit me gjithë kërkesën e herë pas hershme të ish të përndjekurve politikë.
Sot z.Berisha pranon se kjo masë duhej të ishte marrë por justifikohet me arsyetimin se nuk e la e majta europiane duke “harruar” se BE ka nënshkruar dy rezoluta në mbështetje të dënimit të krimeve në të gjitha ish vendet komuniste.
Sot z.Berisha premton se të gjithë pronarëve do t’u kompesohet prona e grabitur padrejtësisht duke “harruar” përsëri se ai ka qenë shkaktari kryesor i mohimit të pronës nga viti 1991 e në vazhdim me miratimin e ligjit me nr.7501 për tokat bujqësore si dhe vendosjen padrejtësisht të pronarëve nga të cilët shumica kanë qenë edhe të përndjekur politikë dhe sot enden pambarimisht rrugëve të gjykatave.
Sot z.Berisha i tha atij grupi të mbledhur në seli se pa u plotësuar të drejtat e ish të përndjekurve politikë nuk do të ketë paqe sociale.
Për cilët të përndjekur politikë e ka fjalën z.Berisha pas 34 vjet post komuniste?
Për ata të përndjekur të cilët lanë kockat në tharrjen e kënetave të vendit, në nxjerrjen e kromit dhe piritit nëpër minierat, ndërtimin e rrugëve,aeroportet, portet, pallatet, hidrocentralet etj me punē të papaguar për të cilët me keqardhje shprehim se shumica e tyre ka ndrruar jetë?!
Apo e ka fjalën për familjet e atyre të afërmve të vrarëve me ligj e pa ligj të cilëve nuk ju gjetën eshtrat kurrë dhe z.Berisha nuk ishte në gjendje të bënte një ligj të tillë që ata të preheshin në paqe si çdo i vdekur tjetër pranë familjeve të tyre?!
Për cilët ish të përndjekur politikë e ka fjalën z.Berisha?
Për ata të përndjekur politikë të cilët z.Berisha i përçau në shoqata të ndryshme me qëllim që zëri i tyre të ishte sa më i vagulluar.
Ky është realiteti i hidhur i ish të pērndjekurve politikë me të cilēt edhe sot z.Berisha u tall duke i krahasuar ata me të burgosurin politik Ilir Meta.
Pikërisht me njē prej personave më të rëndësishëm politikē i cili sa herë kishte përvjetorë dhe festa komuniste dilte në krye të tyre me shallin e kuq në qafë dhe me portretin e diktatorit Hoxha në dorë.
Shoqata jonë distancohet nga çdo veprim i tillë injorues dhe tallēs.
Shoqata jonë, një prej shoqatave me antarësinë më të madhe të ish të përndjekurve politikë në vend, me degët e saj në çdo rreth, me Kryetar të saj z.Et’hem Fezollari, ka ndërmarë disa iniciative, përveç aktiviteteve të shumta dhe ka kërkuar nga politika shqiptare e cila të miratojë në Kuvend Statutin e Ri tonin të ndryshuar në të cilin kërkojmë vendosjen e një statusi të veçantë pēr të gjithë ata persona ish të burgosur politikë dhe të internuar të trajtohen me një pension suplementar përveç pensionit të moshës.
Deri më sot shoqata jonë nuk ishte përzierë nē punët dhe konfliktin e brendshëm të Partisë Demokratike, me shpresën se do të gjendej një rrugë e ndërmjetme për bashkimin e saj, por nga sot dhe ditët në vazhdim ne do të dalim me një qendrim të qartë politik për zgjedhjet e 11 majit të v.2025, qëndrim ky i cili do të vendoset nga forumet e saj.
Me respekt
Pēr Kryesinë
N/Kryetari i Shoqatës
Shpëtim Agolli.
