Një makinë është përfshirë nga flakët mesditën e djeshme në qendër të qytetit të Vlorës. Policia informon se ngjarja ndodhi rreth orës 13:10, përballë ambulancës së qytetit. Automjeti tip “Ford” me targë AA 271 EL, me pronarë shtetasin A.R., 29 vjeç, banues në lagjen “Dëshmorët”, ka qenë i parkuar përballë ambulancës kur është përfshirë nga flakët. “Paraprakisht dyshohet se zjarri ka rënë për shkaqe aksidentale, pasi mjeti punonte me lëndë djegëse benzinë. Shërbimi zjarrfikës ka bërë të mundur fikjen e flakëve të zjarrit ku për pasojë kemi vetëm dëmtime të pjesshme të mjetit”, informon policia e këtij qyteti. Grupi hetimor ndodhet në vendngjarje dhe po kryen veprimet e mëtejshme.
Ky është rasti i dytë brenda 48 orëve që makinat shpërthejnë në flakë në qytetin e Vlorës. Ka qenë një makinë tip “Renault” me targa AA 761 JV, e cila ka marrë flakë, ndërsa ishte në ecje. Drejtuesi i makinës dhe pasagjerët nuk kanë pësuar dëmtime nga kjo ngjarje. Ngjarja ka shkaktuar panik tek qytetarët që ndodheshin në afërsi të vendit ku ndodhi ngjarja.
