Shpresat se më shumë të mbijetuar do të gjenden në rrënoja po shuhen në Mandalay, ku shumica e banorëve kaluan një natë tjetër në natyrë pas tërmetit shkatërrues 7.7 ballë që la më shumë se 1700 të vdekur në Myanmar dhe Tajlandë.
Ekspertët nuk e fshehin frikën e tyre se shumë mijëra të tjerë do të vdesin përfundimisht, veçanërisht në ish-Burma me rreth 55 milionë banorë, pavarësisht mobilizimit të komunitetit ndërkombëtar për t’i ofruar ndihmë shtetit aziatik ku lufta civile është ndezur dhe mungesa e burimeve është akute.
Tërmeti i së premtes me magnitudë 7.7 u pasua pak më vonë nga një pasgoditje me magnitudë 6.7, me qendër në Mianmar qendrore. Që atëherë, pasgoditjet janë ndjerë vazhdimisht përgjatë Gajës Sagaing, rreth të cilit jeton një pjesë e madhe e popullsisë së Mianmarit.
Tërmeti, më i forti që ka përjetuar Mianmari në dekada, shkaktoi skena kaosi dhe paniku deri në 1000 kilometra nga epiqendra, në Bangkok, ku të paktën 18 persona humbën jetën, kryesisht për shkak të shembjes së një ndërtese 30-katëshe në ndërtim e sipër.
Në Mandalay, qyteti i dytë më i madh i Mianmarit, i mbushur me grumbuj mbeturinash, intensiteti i përpjekjeve të shpëtimit ishte ulur në mëngjes në krahasim me një ditë më parë, pasi temperatura pritej të arrinte 40 gradë Celsius.
Kushtet tropikale janë një provë e ashpër për qëndrueshmërinë fizike dhe mendore të ekipeve që veprojnë në vendet e fatkeqësive dhe përshpejtojnë dekompozimin e trupave nën rrënoja, duke e bërë procesin e identifikimit të tyre shumë më të komplikuar.
