Deportivo la Coruna synon të rikthejë në Spanjë ish-portierin e Barcelonës, Victor Valdes. Klubi galician ka nisur kontaktet me Middlesbrough për të mësuar qëllimet e anglezëve me të cilët Valdes luajti titullar 28 ndeshje të Premier League gjatë sezonit të fundit. Sevilla dhe Celta Vigo në gjurmët e Nolitos. Klubi andaluzian dhe bardhekaltërit synojnë të afrojnë sulmuesin spanjoll të Manchester City. Këtë e bën të ditur vetë lojtari që thekson se tashmë vendin përfundimtar duhet ta marrë Pep Guardiola. Manchester City planifikon ta huazojë Noliton për një sezon me të drejtë blerjeje për sezonin tjetër.
Sezoni i ri i Premier League merr formë. Kampionati anglez do të nisë në datën 12 gusht dhe do të përfundojë zyrtarisht më 13 maj të vitit 2018. Ende nuk dihen detajet e kalendarit të ri, por ndryshe nga sezonet e shkuara, këtë herë Premier League do të mbyllet rreth 1 muaj përpara për shkak të Botërorit 2018. Për të arritur këtë objektiv, kalendari është ngjeshur pasi mes datave 16 dhjetor-1 janar do të luhen plot 6 ndeshje.
