Kur vendimi i Sekretarit Blinken për ta shpallur “Non Grata” u bë publik, Sali Berisha mund të ishte tërhequr, mund t’i kishte mbledhur deputetët e PD-së, Lulzim Bashën, kryesinë dhe strukturat e tjera drejtuese dhe mund t’u kishte thënë që unë po iki në shtëpi, ndihma e vetme që dua nga ju është të punoni fort për të ardhur në pushtet dhe pastaj të shohim së bashku se ç’mund të bëjmë për ta zgjidhur këtë “hallin” tim.

Në vend që të tregohej i arsyeshëm, Berisha u shfaq më shumë se sa emocional, duke u mbytur në frikën nga përballja me drejtësinë dhe në egon e tejskajshme brenda vetes.

Pavarësisht se përgjatë dy viteve bëri gjithçka për t’i shpëtuar drejtësisë, nuk ia arriti dot.

Ndaj tij ka sot një masë arresti “detyrim paraqitje”, që shumë shpejt do të kthehet në “arrest me burg”, ndaj dhëndrit të tij ka një hetim dhe një masë “arrest me burg”, djali i tij është duke u hetuar dhe shumë shpejt mund të përfundojë në bankën e të akuzuarve, vajza është e shpallur “non grata”, ndërsa njerëz të afërt të klanit të tij janë duke u hetuar për çështje të ndryshme penale.

Sali Berisha u premtoi demokratëve se do ta bënte partinë më të hapur, ata do t’i bashkonte dhe do t’i sillte shumë shpejt në pushtet, mirëpo partinë e hermetizoi, demokratët i futi në luftë vëllavrasëse me njëri-tjetrin dhe grupimi i tij politik është më larg se kurrë nga pushteti, duke humbur çdo përballje me të.

Madje, edhe shfaqjes së përjavshme në Parlament i erdhi fundi.

Tanimë, cirku i deputetëve të “Rithemelimit” nuk i hyn më në punë as qeverisë.

Mbyllja e derës së Parlamentit është akti përfundimtar i “revolucionit”.

“Jeni të përjashtuar, shkoni dhe gjejeni të drejtën ku të doni!”

Imagjino një “revolucion” që do të ndryshojë fatin e vendit, nuk arrin dot të hyjë në ambientet e Kuvendit.

Teksa një pjesë e vogël e deputetëve të tij përplaseshin sot me punonjësit e gardës, Berisha u shfaq më i vetmuar se kurrë.

Ai është duke kaluar “dimrin e vetmisë së madhe”, pushtetit nuk i duhet më, sepse dëmi që i shkaktoi opozitës është i parikuperueshëm për një kohë të gjatë, demokratët e kanë braktisur, sepse i tradhëtoi shpresat dhe besimin e tyre, shqiptarët janë të pandjeshëm ndaj tij, sepse ata e njohin shumë mirë për shkak të kohës së gjatë në politikë.

Foto e vetmisë së Sali Berishës e përmbledh më së miri gjendjen e tij: AI ECËN DREJT FUNDIT, DUKE LËNË PAS KAOS.

Kryebashkiaku i Tiranës, Erion Veliaj i ka qëndruar besnik linjës që ndjek shefi i tij sa herë që përmenden inceneratorët. Njësoj si Rama që hoqi çdo përgjegjësi nga vetja duke e kaluar ate tek vartësit, edhe Veliaj bëri të njëjtën gjë.

“Nëse në këtë landfill dikush ka bërë gabim duhet të mbajë përgjegjësi patjetër dhe kryeministri ka qene i qartë, PS ka qene i qartë, kryesia ka qene e qartë. Por të thuash që tani nuk do të kemi më landfille dhe inceneratorë sepse dikush ka bërë gabim është si të thuash që nuk do bëjmë autostrada dhe spitale.

Në këtë sens ne do të vazhdojmë punën për këtë landfill, por di të them këtë se dikush po kërcen nga belaja për të përfshirë njerëz që janë absolutisht transparent dhe kanë bërë detyrën e tyre për të pastruar qytetin” – tha Veliaj.

Firmën e tij për inceneratorin pa marrë votën e këshillit bashkiak ai e shmangu sërish.

“Gënjeshtra konkrete është që kanë firmosur në emër të qarkut. Kjo është logoja e Bashkisë së Tiranës, është firmosur nga kryetari i Bashkisë së Tiranës, jemi parimisht dakord për sa i përket rolit të bashkisë.

Sa mbetje prodhon Tirana, kur është sezoni i këtyre mbetjeve, në verë ka më pak mbetje se një pjesë e madhe janë pushim. Kështu që kontributi ynë në këtë proces ka qene për të dhënë të gjithë informacionin se sa përballohet në bashkinë e Tiranës.

Kështu që e gjithë legjenda urbane se sa janë ndërtuar në emër të të gjithë qarkut të Tiranës bie poshtë, është përgjigjur më vete kryetari i bashkisë së Vorës, më vete kryetari i bashkisë së Kavajës. Në ato vite kanë qene të forcës politike që i ngre këto akuza” – tha Veliaj.