CDU-ja, Bashkimi Kristjandemokrat Gjerman, mbush në 26 qershor 75 vjet nga dita e themelimit të saj. Grupimet e para kristjandemokrate në Gjermani u krijuan vetëm pak javë pas fundit të Luftës së Dytë Botërore. Më vonë ato u bashkuan në Bashkimin Kristjandemokrat. Objektivi që i vuri vetes partia e re qe garantimi i dinjitetit dhe i lirisë së secilit, mbi bazën e konceptit kristjan për njeriun.

Deri në fundin e Luftës së Dytë Botërore në Gjermani partitë organizoheshin kryesisht përgjatë kufijve konfesionalë ose shtresave sociale. Katolikët p.sh. kishin partinë e tyre, Partinë e Qendrës (Zentrum-Partei). Themelimi i CDU-së ndikoi që kufijtë konfesionalë e socialë të kapërcehen. Si parti popullore tek CDU-në e konsiderojnë të tyre një shumëllojshmëri idesh. Kjo i mundëson kësaj partie, që të reagojë me sukses ndaj sfidave të kohës, duke mbetur partia që e ka qeverisur më gjatë Gjermaninë e pas Luftës së Dytë Botërore.

CDU
Në 75 vjetorin e CDU-së, revista e njohur “Der Spiegel” i kërkoi një vlerësim për sfidat e sotme për këtë parti dhe për Gjermaninë njërit nga figurat e shquara të kësaj partie, ish-Presidentit të Bundestagut, Norbert Lammert. Norbert Lammert ishte për tre mandate, nga viti 2005-2017 President i Bundestagut Gjerman dhe për 37 vjet rresht deputet i Bundestagut. Sot ai i drejton Fondacionin “Konrad-Adenauer”, të afërt me CDU.

“Marrëdhëniet me SHBA të rrezikuara shumë në aspektin operacional”

Pyetjes së redaktorëve se a sheh ai të rrezikuar nga Donald Trumpi në thelb konceptin e Konrad Adenauerit, bashkëthemelues i CDU-së, për integrimin e dyfishtë në Perëndim të Gjermanisë, përmes lidhjes me Francën dhe me SHBA, Lammerti i përgjigjet se “shpreson që ky rrezikim të mos jetë në substancë”. Por ai pranon se marrëdhëniet me SHBA janë të rrezikuara “rëndë” “në aspektin e atmosferës” dhe “gjithnjë e më shumë në aspektin operacional”

Norbert Lammerti mendon se “do të jetë e vështirë që marrëdhëniet të kthehen në status quo-në e mëparshme pas Trumpit”. Kjo në një kohë kur “lidhja me Francën dhe me këtë brenda Evropës dhe nga ana tjetër me Uashingtonin nuk ka alternative (tjetër) serioze”.

Njëkohësisht ai kujton se “integrimi evropian është në interesin e vetë Gjermanisë” dhe se “e vetme Evropa është shumë e dobët në shkallë globale”. Lammert nuk sheh “përveç SHBA””ndonjë fuqi të madhe ndërkombëtare që i afrohet aq shumë vlerave tona”.

“Kohl – një rast fatlum për Gjermaninë në një situatë konkrete historike”
Më pas, Norbert Lammert ndalet në tri kryetarët e CDU-së, që qëndruan për periudha afatgjata rekord në postin e kancelarit: Konrad Adenauer, Helmut Kohl dhe Angela Merkel.

Për Helmut Kohlin, Lammert vlerëson që “Kohl-i ishte në një mënyrë të ngjashme një rast fatlum për Gjermaninë në një situatë konkrete historike, siç ishte Adenaueri pas Luftës së Dytë Botërore. Fuqia më e madhe e Kohlit ishte aftësia për të ngjallur besim te personi i tij.”

Lidhur me planin dhjetëpikësh për ribashkimin e Gjermanisë, që Helmut Kohli e prezantoi në vitin 1989, në Bundestag, Lammerti thotë se me të “ai i befasoi të gjithë”, madje edhe Presidentin e atëhershëm amerikan Georg Bush. Por megjithë këtë rrethanë, fuqitë fituese të Luftës së Dytë Botërore nuk e flakën tej këtë plan, sepse ai që e kishte prezantuar planin “ishte Kohl-i, atij mund t’i besoje”.

Kohli, thotë Lammert, kishte fituar “një potencial të jashtëzakonshëm besimi tek vendet fqinje dhe në botë”, “përmes rolit të tij të jashtëzakonshëm, jo ​​rrallëherë bujar në procesin e integrimit evropian”. Kjo bëri të mundur që “në qendër të Evropës” “të ekzistonte sërish një Gjermani e fortë, e bashkuar”.

“Merkeli i ka polarizuar më pak njerëzit se paardhësit e saj”
I pyetur për vendin që zë Angela Merkel si kancelare, krahasuar me Adenauerin dhe Kohlin, Norbert Lammert thotë se secili nga ata e kishte drejtuar për gati dy dekada Gjermaninë.

Për Merkeli ai thotë se ka ende zhvillime që mund të ndodhin, prandaj “unë vetëm mund të spekuloj për këtë.” Por ai megjithatë beson se “popullariteti i saj do t’i lërë pas paraardhësit e saj”.

Këtë Lammerti e argumenton me faktin që Merkeli i ka polarizuar më pak njerëzit se paardhësit e saj të përmendur. Dhe i ka shtuar shumë vota nga drejtime të ndryshme politike CDU-së.

“Sepse Merkeli ka polarizuar më pak se të gjithë paraardhësit e saj”. “Mendoni për krizën e refugjatëve! Ajo impresionoi njerëz që ndryshe nuk do të kishin votuar kurrë për CDU-në, përfshirë intelektualë dhe artistë.”

Suksesin e madh të Merkelit, edhe në krahasim me parardhësit, Norbert Lammert-i e lidh edhe me stilin e saj të drejtimit.

“Për shkak të mënyrës së saj pa pretendime të drejtimit të postit, të orientuar te detyra, me sa më pak mendjemadhësi që të jetë e mundur; pa interes për të pasur ndonjë përfitim, apo për ndonjë inskenim protokollar”, konkludon Norbert Lammert.

Presidenti Trump ka nxjerrë një urdhër të fortë për të ndalur valën e vandalizmit ndaj monumenteve historike amerikane. “Unë kam autorizuar Qeverinë Federale të arrestojë këdo që vandalizon ose shkatërron ndonjë monument, statujë ose pronë tjetër të tillë Federale në SH.B.A.

dënimi do jetë deri në 10 vite burg, sipas Aktit të Ruajtjes së Përkujtimit të Veteranit, ose ligjeve të tjera që mund të jenë përkatëse”, thotë Trump.

Dhoma e Përfaqësuesve e kryesuar nga demokratët dhe Senati i udhëhequr nga republikanët pritet të zhvillojnë dy votime të rëndësishme këtë javë lidhur me reformën në polici. Të dyja dhomat e Kongresit amerikan, duket se kanë rënë dakord për disa çështje kryesore, por ende jo plotësisht mbi një marrëveshje se çfarë duhet të ndryshojë.

Shkak për iniciativat ligjore në Kongres u bërë vdekja në duart e policisë e afrikano-amerikanit George Floyd, ngjarje që nxiti protesta mbarëkombëtare e mbarëbotërore kundër racizmit dhe përdorimit të forcës nga punonjësit e zbatimit të ligjit.

Një nga çështjet kryesore e cila ka krijuar ndarje mes palëve është ajo e imunitetit të kualifikuar, një parashikim ligjor që e bën më të vështirë për çdo person që të ngrejë një padi kundër një oficeri policie kur mendon se të drejtat e tij civile janë shkelur.
Demokratët duan t’i japin fund imunitetit të kualifikuar, por udhëheqësit republikanë e kanë kundërshtuar ndërsa Shtëpia e Bardhë e ka etiketuar këtë çështje si diçka “që nuk ka gjasa të miratohet”.

“Dhoma e Përfaqësuesve e drejtuar nga demokratët dëshiron të miratojë një projektligj këtë javë që do të shkatërrojë policinë tonë”, shkruante në një postim në tëitter të dielën vonë në mbrëmje Presidenti Trump. “Shpresoj që ligjvënësit dhe ligjvënëset e Kongresit do të luftojnë fort për ta hedhur poshtë atë. Ne duhet ta mbrojmë e ta vlerësojmë policinë tonë, ata na garantojnë sigurinë”, shkruante më tej ai.

Ligjvënësja demokrate Karen Bass në një përgjigje në tëitter ndaj komenteve të Presidentit shkruante: “Projektligji ynë përcakton standarde kombëtare për policinë, siguron trajnime shtesë dhe krijon një regjistër në mënyrë që oficerët e pushuar nga puna të mos merren sërisht në punë. Shumë departamente (policie) janë në favor të projektligjit, por ti dukesh qartë qe nuk e kupton, përpiqu ta lexosh edhe një herë në mbrëmje ose të ta lexojë dikush”.

Javën e kaluar Komisioni i ligjeve i Dhomës së Përfaqësuesve e miratoi masën ligjore, duke vendosur që të zhvillojë një votim të plotë në këtë dhomë të Kongresit gjatë kësaj jave.

Nga ana tjetër udhëheqësi i shumicës në Senat Mitch McConnell tha se ai planifikon të sjellë projektligjin republikan për një votim procedurial në Senat këtë javë.

Të dyja iniciativat ligjore mbështesin rritjen e përdorimit të kamerave që vendosin në trup punonjësit e policisë, ato e shpallin linçimin një krim federal, parashikojnë rritje të trajnimeve për punonjësit e policisë si dhe rrisin sasisë e të dhënave që mbledhin departamentet.

Senatori Tim Scott, i cili po udhëheq përpjekjet e republikanëve në Senat, tha të dielën për rrjetin televiziv ABC se të dyja palët bien dakord për 70 për qind të asaj që është e nevojshme.

Ai vuri theksin tek një dispozitë në masën legjislative republikane, atë të rritjes së ndëshkimeve për oficerët e policisë që paraqesin raporte false, që nuk është pjesë e propozimit të demokratëve.

Presidenti i Serbisë, Aleksandar Vuçiq, do të takohet të shtunën në Uashington me presidentin e Shteteve të Bashkuara, Donald Trump, dhe me të dërguarin e tij për Ballkanin, Richard Grenell, shkruan gazeta amerikane New York Times.

Sipas saj, shkruan REL, këta zyrtarë do të bisedojnë për një nismë që udhëheq SHBA-ja për marrëveshje midis Kosovës dhe Serbisë.

Përndryshe, të shtunën, më 27 janar, në Shtëpinë e Bardhë është paralajmëruar edhe takimi midis udhëheqësve të Kosovës dhe Serbisë, nën organizimin e Grenellit.

Takimi është thirrur pasi Grenell ka thënë se ka marrë garanci se të dyja palët janë pajtuar për të pezulluar përkohësisht fushatën për tërheqjen e njohjeve për Kosovën dhe për përpjekjet e Kosovës për t’u anëtarësuar në organizata ndërkombëtare.

Vetë Grenell, më 15 qershor, ka shkruar në Twitter se nëse ndonjëra palë është e pakënaqur me bisedimet e 27 qershorit, ajo “do të kthehet në status quo, pasi të kthehet nga Uashingtoni”.

Në tekstin kushtuar zgjedhjeve në Serbi, New York Times shkruan të martën se presidenti i Serbisë, viteve të fundit, “ka luftuar me sukses për mbështetjen e fuqive konkurruese në botë – duke mbajtur marrëdhënie të fuqishme me Rusinë dhe duke i forcuar lidhjet me Kinën, derisa Serbinë e ka pozicionuar si anëtare të mundshme të BE-së dhe bashkëbiseduese të SHBA-së”.

Të hënën, Vuçiq bisedoi në Beograd edhe me përfaqësuesin e posaçëm të BE-së për dialogun midis Kosovës dhe Serbisë, Mirosllav Lajçak.

Pas bisedimeve, Lajçak tha se pret që negociatat Kosovë-Serbi të rinisin në korrik, në Bruksel.

Në lidhje me informacionet jozyrtare që ka marrë edhe Radio Evropa e Lirë, se më 25 qershor, në Bruksel, do të rinisë dialogu midis Kosovës dhe Serbisë, Vuçiq ka thënë se nuk ka marrëveshje të tillë, por nuk e ka përjashtuar mundësinë që pala serbe të udhëtojë në Bruksel.

New York Times shkruan se para udhëtimit për në Uashington, Vuçiq do të udhëtojë për në Moskë, ku do të takojë presidentin rus, Vladimir Putin, i cili “beson se çdo marrëveshje për Kosovën duhet të ketë mbështetjen e Këshillit të Sigurimit të Kombeve të Bashkuara, në të cilin Rusia ka të drejtën e vetos”.

Bekim Çollaku, shef i kabinetit dhe këshilltari kryesor i presidentit të Kosovës, Hashim Thaçi, ka thënë për Radion Evropa e Lirë se tema kryesore të takimit në Shtëpinë e Bardhë më 27 qershor do të jenë zgjidhja e problemeve ekonomike, heqja e barrierave tregtare, lëvizja e lirë e njerëzve dhe e mallrave, si dhe investimet në infrastrukturën rajonale.

Dialogu për normalizimin e marrëdhënieve midis Kosovës dhe Serbisë, të cilin e ndërmjetëson Bashkimi Evropian, është ndërprerë në fund të vitit 2018, pasi Kosova u ka vënë taksë 100 për qind mallrave të importuara nga Serbia, për shkak të fushatës së saj kundër pavarësisë së Kosovës.

Taksën që e ka vënë Qeveria e Ramush Haradinajt e ka zëvendësuar më 1 prill me masa reciproke tregtare ish-kryeministri i Kosovës, Albin Kurti.

Shtetet e Bashkuara kanë qenë kundër masave ndaj Serbisë, duke thënë se ato e pengojnë dialogun midis palëve.

Me largimin e Kurtit dhe ardhjen e kryeministrit të ri të Kosovës, Avdullah Hoti, Serbisë i janë hequr të gjitha pengesat tregtare.