Nga dita e Hënë e javës së ardhshme, pritet një lehtësim në lëvizje i masave kufizuese të marra, sipas autoriteteve, me qëllim parandalim e përhapjes së virusit COVID-19.

Mësohet se nga dita e Hënë, nga ora 5 e mëngjesit deri në 5 e gjysmë pasdite, do lejohet dalja pa qenë i nevojshëm autorizimi, siç ndodh aktualisht. Po ashtu, gjatë këtij orari do lejohet dalja e një personi të shoqëruar nga dy të tjerë, por me kusht që të jenë familjarë.

Pas orës 17:30, do mbyllet lëvizja, siç ndodh aktualisht, me përjashtim të kategorive të personave që punojnë dhe u lejohet lëvizja.

Rama: Nga e hëna e ardhshme do të mbeten vetëm Zonat e Kuqe të përcaktuara në hartën bashkëngjitur, bashkitë Shkodër, Kurbin, Krujë, Durrës, Tiranë dhe Fier, ku do të vazhdojë i njëjti regjim oraresh lëvizjeje dhe rregullash të qarkullimit si deri tani. Këto zona do të blindohen me postblloqe dhe nuk do të lejohet hyrje-dalja e automjeteve të paautorizuara

E gjithë pjesa tjetër e vendit do të jetë e gjelbër dhe qarkullimi ndërqytetas me automjet privat brenda gjithë kësaj pjese do të jetë i lirë, me një regjim orar që do të shtrihet deri në orën 21.00 Për këtë pjesë do të mbeten në fuqi vetëm rregullat që ndalojnë grumbullimin e më shumë se pesë personave, aktivitetet kulturore e sportive të çdo lloji, transportin publik si edhe njësitë ekonomike ende të mbyllura

Këtë fundjavë njësoj si fundjavën e shkuar, në të gjithë vendin do të lejohen të qarkullojnë vetëm automjetet që kanë autorizim për punë dhe dalja e këmbësorëve do të bëhet me dy fasha: Deri në orën 09.30 vetëm pensionistët dhe nga ora 10.30 deri në 17.30 prindërit me fëmijët deri në 14 vjeç. Nëse situata me numrat e të infektuarve dhe të të shtruarve në spital vazhdon të jetë e stabilizuar, kjo do të jetë fundjava e fundit me ndalim daljeje për vajzat e djemtë mbi 14 vjeç.

Bisedoi
Rexhep POLISI

Mjeku Ilir Allkja i njohur tashmë për kurajon e denoncimit të mungesës së veshjes speciale të mjekëve, të cilët shkonin të merrnin dhe të dërgonin tek Infektivi pacientët e dyshuar si të prekur me Covid-19 shprehet se, pas këtij denoncimi ka patur reagime të ashpra nga drejtuesit, por një mbështetje të madhe nga opinioni publik.

Në një intervistë për gazetën “RD”, Allkja flet për përballimin e situatës së koronavirusit, marrëdhëniet me kolegët dhe pacientët, për Komitetin e Ekspertëve, si dhe për sulmet që mori nga kreu i Urgjencës Kombëtare pse kërkoi veshje speciale për mjekët.

Njëkohësisht ai iu përgjigj edhe kryeministrit, i cili e sulmoi mjekun edhe mbrëmë gjatë intervistës me gazetarin Çim Peka në “SyriTv”. Allkja shprehet ndër të tjera se, “një foto e imja me veshje speciale, nuk justifikon nisjen dhjetëra herë pa këtë veshje nëpër raste të dyshuara, por as nuk e justifikon dot menaxhimin e dobët të situatës së epidemisë nga qeveria”!

-Doktor Iliri, ju jeni një nga mjekët që ndodheni në vijën e parë të “luftës” ndaj koronavirusit, a mund të na thoni si nis dita juaj e punës?

-Unë bashkë me kolegët e mi, ish-urgjenca e Tiranës jemi stafi Urgjencës së Spitalit polivalent të QSUT. Puna jonë konsiston në asistencën mjekësore jashtë spitalit, në vend-ngjarje, në rrugë, punë, shtëpi. Ne asistojmë nga aksidentet rrugorederi tek dhimbjet e gjoksit (infarktet) apo probleme të tjera kërcënuese ndaj jetës. Gjatë periudhës së pandemisë jemi angazhuar në transportin e të sëmurëve të dyshuar me COVID-19 si dhe atyre të konfirmuar të sëmurë nga ky virus. Realisht jemi kontakti i parë i çdo njeriu që është në rrezik për jetën. Jemi vija e parë e mbrojtjes së jetës, për pasojë jemi edhe më të ekspozuar ndaj rreziqeve të ndryshme si infeksionet, kushtet e papërshtashme të dhënies së ndihmës, etj.

-Si janë marrëdhëniet tuaja me eprorët?

-Shërbimi jonë ka dy shtylla kryesore, administratën qeveritare dhe stafet mjekësore.

Administrata është një kastë burokratësh të cilët merren me politikat e shërbimit si dhe me financimin. Stafet janë të varura nga administrata, është e pashmangshme. Hera herës të dyja palët fajësojnë njëra-tjetrën për dështimet.

Unë do të kritikoja dministrimin, pasi prej andej pres përmirësime, ashtu si edhe eprorët kanë gjithë të drejtën të kritokojnë ne, që japim shërbimin karshi njerëzve në nevojë!

Qoftë si fillim, qoftë si përfundim demokraci do të thotë të kritikosh sistemin, të shfaqësh ide, përmirësime e madje edhe të kundërshtosh, paçka se burokratët duan vetëm lavde dhe jo kritika.

-Si e shikoni përballimin e Covid-19 nga ana e qeverisë?

– Dua të kthehem rreth 6 muaj mbrapa. Personalisht mendoj se strukturat e emergjencave civile dhe mjekësore nuk ishin të përgatitura për kriza si tërmeti i 26 nëntorit dhe aq më pak akoma për epideminë e COVID-19! Dua të shtoj se për epideminë u gjunjëzuan edhe vende me sisteme shumë më solide se sa Shqipëria, por krahasuar me numrin e rasteve për 1 mijë banorë ne mbesim në klasë.

Nëse kujtojmë 26 nëntorin, të gjithë i kemi para syve imazhet e njerzve që lënguan me orë të tëra e dhanë shpirt nën gërmadha, pa u ndihmuar dot, ndërsa ‘specialistët’ e emergjencave që rrinin përballë rrënojave duarbosh, pa mjetet bazë të shpëtimit, pa krikat, pa veshjet, pa kamerat termike, pa qentë e kërkimit, madje pa doreza, e me plot mangësi të tjera. Kjo ishte rrënqethëse për Shqipërinë e viteve 2020!

Qeveria gjithsesi u mburr për menaxhimin ‘perfekt’ të krizës, dhe ne populli jemi mësuar tashmë me fasadën e ‘suksesshme’, por mashtruese dhe gjendjen mizerie.

Në qoftë se kujtojmë kohën kur COVID-19 po gjunjëzonte Italinë, nëpët televizione ‘specialistët’ e qeverisë mezi prisnin që të vinte në Shqipëri epidemia e COVID-19, se gjasme aq të përgatitur ishin për të na mbrojtur.

Në fakt, me mungesat e theksuara, me pajisjet e skaduara që qeveria pajisi mjekët, mua më solli në mend monsieur Thenardieu, një personazh i pashpirt të Hygoit, i cili në kohë lufte vidhte luftëtarët e plagosur.

Kemi parë e dëgjuar për çmime tejet të larta që qeveria blen maska, doreza, material dezinfektimi, ndërkohë që nuk kanë asnjë datë prodhimi apo skadimi, që do të thotë të dyshuara si të pasigurta.

-A funksionon Komiteti Teknik i Ekspertëve?

-Për opinionin tim është një komitet fantazëm! Përbërja dhe lidershipi i Komitetit Teknik të Ekspertëve u bë e njohur për publikun më datë 7 maj 2020, shumë kohë pas formimit. Ne kemi gjithë të drejtat të dyshojmë nëse ka ekzistuar realisht ky komitet, apo politikat e vendimet i prodhonte një njeri i vetëm, kryeministri i vendit!

-Çfarë nuk ka funksionuar mirë, sipas jush?

-Unë nuk jam epidemiolog, por do të gjykoj në kufijtë e profesionit dhe detyrës që bëj.

Çentralizimi i informacionit nëpërmjet njësisë 127 për mua ishte gabim, ose është kryer me qëllim të qartë ndoshta. Kontakti i parë i personave që kishin simptoma apo dyshoheshin të kishin koronavirus u la numri i telefonit 127 dhe jo mjeku i familjes.

Kjo së pari solli çorientim dhe panik në popull, por edhe mbingarkesë në njësinë operative 127 e cila ndoshta mund të ketë kapacitete virtual për marrjen e qindra apo mijëra telefonatave, por ka kufizime në burime njerëzore, sidomos në staf të trajnuar. Numri i punonjësve në sallë ishte i vogël në krahasim me telefonatat në pritje. Një telefonuesi i është dashur të presë mbi 30 minuta në linjë dhe ndodhte që telefonuesit lodheshin në pritje dhe hiqnin dorë së kërkuari ndihmë në numrin 127.

-Si mendoni ju, pse e gjithë përgjegjësia iu ngarkua Urgjencës Kombëtare për përballimin e pandemisë, ndërsa u shmang mjeku i familjes?

-Uroj të ketë qenë një keqmenaxhim, keqkëshillim! Është fakt që numri i operatorëve në sallën e njësisë së koordinimit të Urgjencës Kombëtare është shumë herë më i ulët se sa 1600 mjekë të familjes, por operatorët e njësisë së koordinimit në shumicë janë infermierë dhe shumë pak mjekë.

Në gjithë botën, nga Alaska deri në Tibet, mjeku i familjes njoftohet i pari, si person që jo vetëm që njeh gjendjen e përgjithshme shëndetësore, por edhe ka vëzhguar më për së afërmi pacientin. Mjeku i familjes ka një rol të rëndësishëm dhe primar në shëndetësi; prandaj quhet shërbimi parësor. Ndërsa një operator i 127 është maksimumi një infermier, i cili shpesh nuk ka asnjë përvojë reale pune me të sëmurët përveç asaj nga telefoni.

Mjeku i familjes ka ndjekur e menaxhuar me sukses gjithë epidemitë deri më tani, përse duhej që të anashkalohej në rastin e epidemisë së COVID-19?!

Mjeku i familjes është në gjendje të përcaktojë diagnozën e të gjitha sëmundjeve dhe t’i ndjekë e t’i mjekojë ato vetë, ndërsa operatorët e 127 nuk kanë asnjë qasje me pacientin, maksimumi që mund të bëjnë është të dërgojnë një ekip mjekësor tek pacienti. Por ekipet e mjekëve që monitorohen nga 127-ta janë të papërfillshëm në krahasim me mjekët e familjes. Në rrethin e Tiranës ka maksimumi 7 ekipe të lëvizshme me mjekë për turn, ndërsa mjekë familje ka mbi 450 dhe mbi 1600 të tillë në të gjithë Shqipërinë! Mjeku i familjes ka për detyrë që në raste urgjencash, të shkojë të bëjë vizitën mjekësore në shtëpinë e pacientëve. Përse duhej të shmangej?!

-Si janë marrëdhëniet mes mjekëve dhe pacientëve?

-Mes mjekëve e pcientëve marrëdhinet janë të tronditura. Realisht ka një klimë mosbesimi. Kontribut në këtë klimë kanë padyshim politka, burokracia shtetërore, por edhe media. Nuk përjashtoj edhe sjelljen e papërshtatshme të ndonjë kolegu që keqpërdor profesionin.

Por më thoni ju, a ka mjekë të korruptuar apo politikanë të korruptuar më shumë?

Të gjithë e kanë parë standartin që trajtohen mjekët, për një kallëzim të çfarëdoshëm mjekët kanë përfunduar në pranga, ndërsa asnjë politkan nuk ka përfunduar në pranga pavarsisht denoncimeve për miliona të grabitura.

-Doktor, në ditët e para të luftës ndaj koronavirusit ju denoncuat publikisht mungesën e paisjeve të mjekëve, ndërsa pushteti u hakmorr duke ju pushuar nga puna, ndërkohë pas dy ditësh u riktheu përsëri pas presionit të opinionit publik, a mund të thoni diçka çfarë ndodhi konkretisht?

-Realisht unë denoncova trizhimin aspak profesional dhe nisjen në urgjencë të pacientëve të dyshuar për sëmundje infektive, me kod kardiak, neurologjik, gastroenterologjik, ndërkohë që simptoma (shenja) kryesore e pacientëve ishte temperatura e kolla, shenja që të bëjnë të dyshosh për COVID-19. Rrjedhimisht na nisnin pa veshjen speciale mbrojtëse.

Nuk jam i qartë nëse ky ishte keqmenxhim apo mungesë veshjesh speciale.

Siç dhe e ka vërtetuar vetë drejtori i Urgjencës Kombëtare, me zë dhe figurë në deklaratën e tij më datë 21 prill, në faqen e QKUM (minuta e 9-të e videomesazhit të tij) ishte ky që kishte porositur përgjegjësin tim që unë të pezullohesha.

U riktheva në punë sepse pezullimi im ishte i paligjshëm dhe se në Drejtorinë e QSUT nuk kishte asnjë urdhër pezullimi apo pushimi. Gjithçka e kishte porositur drejtori i Urgjencës Kombëtare.

 -Drejtori i Urgjencës Kombëtare, Brataj arriti deri aty sa të përdorte sulme personale ndaj jush duke përdorur edhe mediat pranë qeverisë, ndërsa ju nuk patët asnjë reagim, pse?

-Personalisht megjithëse nuk kam patur asnjë njohje me Bratajn, e kam përshëndetur ardhjen e tij në krye të Urgjencës Kombëtare pasi besoja që meqenëse kishte punuar disa vite si paramedikal në Torino, Itali do të kish marrë disi nga kultura perëndimore e punës dhe do ta aplikonte këtu.

Unë jam sulmuar në mënyrë të paprinciptë prej tij vetëm sepse kam kritikuar lidershipin, organizimin dhe funksionimin e Urgjencës. Del që është i pazoti që të pranojë mendimin ndryshe e sidomos një zë kritik. Kaq!

 -Kryeministri ju përmendi sërish mbrëmë gjatë intervistës me gazetarit Çim Peka, në Syri Tv, cili është reagimi juaj?

-Dua të sqaroj për të dhjetën herë se, unë kam denoncuar rastet që më kanë nisur pa veshjen speciale në rastet e pacientëve të dyshuar për COVID-19.

Një foto e imja me veshje speciale, nuk justifikon nisjen dhjetëra herë pa këtë veshje nëpër raste të dyshuara, por as nuk e justifikon dot menaxhimin e dobët të situatës së epidemisë nga qeveria!

Videomesazhi im është i qartë dhe i thjeshtë, por kryeministri i vendit tim nuk ka veshë, ka vetëm gojë, si krokodili…

-Faleminderit doktor!

-Faleminderit ju për hapësirën që më jepni në gazetën ”RD”!

Intervista e mbrëmshme e kryeministrit Edi Rama në “Syri Tv” pati disa momente kulmore.

Por në një moment, Rama jo vetëm shmangu përgjigjet, por doli jashtë kontrollit për shkak të një dokumenti që rrëzon të gjithë strategjinë e koncesioneve, sidomos kur bie fjala te inceneratorët.

Në dokumentin për inceneratorin e Elbasanit shihet se si dy persona kanë marrë tenderin 30 milionë euro dhe më pas e kanë rishitur kontratën e tyre për 15 milionë euro.

Një fitim i përbindshëm, kur mendon se për të hyrë në garë atyre iu është kërkuar vetëm një depozitë nga 1 mijë dollarë.

Dokumentin e ka publikuar kreu i Departamentit të Mjedisit në PD, Jamarbër Malltezi.

“Ja pse u shfytyrua Rama për aferën e inceneratorëve! I ka dhënë 30 milionë euro nga buxheti i shtetit (para publike) 2 sekserëve të PS me duar në xhepa për të ndërtuar incenerator me çelësa në dorë, dhe brenda 2 javësh kanë gjetë italian që ta ndërtojë për 15 milionë euro me çelësa në dorë. Dhe nuk dihet nëse italianët kanë gjetur ndonjë kinez ta ndërtojë për veç 3 milionë euro!!! Vjedhje 15 milionë euroshe për 2 javë. Veç kjo foto mjafton që SPAK të veprojë”,shkruan Malltezi.

Ish-Kryeministri Berisha ka denoncuar një tjetër skandal të kryebashkiakut të Ramës për Krujën, Artur Bushi.

Berisha shkruan në një postim në Facebook se, Artur Bushi ka bërë një tender prej 25 milionë lekësh për ruajtjen e buldozierit të bashkisë Krujë!

Postimi i ish-Kryeministrit Berisha

Artur Bushi, njeriu qe mbushi Krujen me kanabis nuk ngopet kurre!

Ketu me poshte keni tenderin e tij prej 25 milione lekesh per ruajtjen e buldozierit te bashkise Kruje! KÇK, kap ç’te kapim! Ndryshe, vidh ç’te mundemi! sb

Miq, Maks Velo, piktori dhe arkitekti i mirenjohur, intelektuali i shquar qe sakrifikoi vite ne burgjet e diktatures per te qene vetja e tij mbylli syte pergjithmone.

Me kete rast shpreh ngushellimet me te ndjera familjes, miqve dhe te afermve te tij dhe lutem qe shpirti i tij te gjeje paqen e merituar. Ngushellime! sb

Ministrja e Arsimit Besa Shahini ka vendosur për shtyrjen e zgjedhjeve në Universitete. Vendimi është marrë pas kontestimeve të shumta që janë bërë nga ana e studentëve dhe pedagogëve, që zgjedhjet nuk mund të mbahen në kushtet e pandemisë.

“Data e zgjedhjeve për organet drejtuese të IAL-ve shtyhet deri në një moment të dytë kur mund të sigurohet pjesëmarrje më gjithëpërfshirëse e studentëve”, deklaron Shahini, ndërsa thekson se “Procesi përgatitor i zgjedhjeve duhet të vazhdojë në mënyrë që IAL-të të jenë gati të fillojnë fushatën zgjedhore menjëherë pas shpalljes së datës”.

“Shpresoj që ky urdhër të mundësojë kthimin e vëmendjes së udhëheqësve të arsimit të lartë publik tek planifikimi i mbylljes së suksesshme të vitit akademik për studentët. #PaktiPërUniversitetin”, mbyll njoftimin e saj Shahini.

Zgjedhjet për drejtuesit e rinj të universiteteve publike ishin kthyer në një debat për shkak të pamundësisë së studentëve për të marrë pjesë në këto zgjedhje, pasi sipas urdhrit të Ministrisë së Arsimit, fushata duhet të niste më 11 maj dhe zgjedhjet të mbahen më 12 qershor.

Ekspertët dhe Universiteti i Tiranës kanë dalë kundër këtij vendimi, ndërsa ditën e sotme pati dhe një padi ndaj ministres Shahini nga ana e Qendresës Qytetare.