Kreu i opozitës, Lulzim Basha ka reaguar sërish ashpër për shembjen e Teatrit Kombëtar me urdhër të Edi Ramës. Basha shprehet se, me shembjen e paligjshme të TK për të pastruar paratë e pista të klientëve të tij, Rama i vuri kazmën themeleve të shoqërisë sonë

Reagimi plotë i kryetarit Basha

Me shembjen e paligjshme të TK për të pastruar paratë e pista të klientëve të tij, Rama i vuri kazmën themeleve të shoqërisë sonë.

Dhuna ndaj qytetarëve dhe gazetarëve është e papranueshme. Aktivistët, artistët, opozitarët e arrestuar duhet të lirohen menjëherë!

Rama është varrmihësi i paqes sociale në vend, varrmihësi i ekonomisë së shqiptarëve, hajduti i pronave publike dhe një kriminel ordiner që ka shkelur dhe uzurpuar çdo pushtet.

Pa shporrur atë, në këte vend nuk do ketë as ligj, as demokraci, as zhvillim dhe as mirëqenie për njerëzit.

Përplasje të forta mes policisë dhe qytetarëve pranë Teatrit Kombëtar. Qytetarët kanë hequr barrierat dhe janë konfliktuar me policët.

Kordoni është çarë dhe FNSH-ja ka përdorur forcën për të mos lejuar qytetarët të ecin më tej. Raportohet se ka disa persona të lënduar dhe të arrestuar nga policia.

Organizata Europa Nostra, që e kishte shpallur monument të mbrojtur kulture Teatrin Kombëtar, reagoi me një mesazh pas shembjes së godinës.

“Ditë e trishtuar për trashëgiminë kulturore në Shqipëri dhe Europë.

Ditë e trishtuar për demokracinë dhe sundimin e ligjit në Shqipëri dhe Europë.

Herët këtë mëngjes, autoritetet shqiptare arrestuan aktivistët e shoqërisë civile dhe nisën shembjen e Teatrit Kombëtar të mbrojtur”, thuhet në mesazh.

Europa Nostra e kishte shpallur Teatrin Kombëtar mes 7 godinave të rrezikuara në Europë dhe kishte ofruar fondet për restaurimin.

Ish-Kryeministri Sali Berisha ka reaguar ashpër për shembjene Teatrit Kombëtar. Berisha shkruan në një postim në Facebook se, Edi Rama ngjan në këtë drejtim me Enver Hoxhën.

“Një barbari kulturore e Edvin Kristaq Xhelatit që të kujton genocidin fetar kulturor të Enver Hoxhës të vitit 1967!”, shkruan Berisha.

“Pabesia ndaj Teatrit dhe qytetarëve”, Basha: Dhuna, paligjshmëria, pabesia ndaj Teatrit dhe hajdutëria nuk do të kenë fund pa u larguar Edi Rama. Do të marrim vendimet tona politike

DEKLARATA E KRYETARIT TË PARTISË DEMOKRATIKE, LULZIM BASHA

Gjëja e parë që bënë, rrëzuan kamerat medias, dhunuan gra, artistë, të rinj, të pafajshëm, dhunuan drejtues të opozitës, për mëkatin e vetëm sepse shkuan në ndihmë të grave që po dhunoheshin. Flamur Noka ja ku është, mund t’ia merrni dëshminë. Vetëm sepse shkoi të ndihmonte dy gra që po trajtoheshin në mënyrë shtatzarake nga policia, përdorën ndaj tij dhunë.

Tani që flasim kryetari i Forumit Rinor ndodhet i shoqëruar në komisariatin nr 6 edhe ai i dhunuar. Dhunë barbare, paligjshmëri dhe siç shikoni këtu kanë sjellë po aq, mos më shumë polici se gjatë protestave të opozitës. Gjithçka ka ndodhur në orët e para të mëngjesit në mënyrën më të pabesë, ndërkohë që këta policë duhet të ishin në shërbim të qytetarëve.

Pyetje: Zoti Basha cilët do të jenë hapat që do të ndërmarrë opozita?

Lulzim Basha: Opozita do të mblidhet sot, koalicioni opozitar do të mblidhet sot dhe do të ndërmarrë veprimet politike. Ajo që çdo shqiptar e kupton sot nga kjo ngjarje është se me Edi Ramën paligjshmëria, dhuna dhe pabesia do të vazhdojnë. Nuk do të ketë fund dhuna, paligjshmëria edhe padrejtësia pa marrë fund kjo qeveri dhe pa u larguar ky njeri. Nuk ka rrugë tjetër.

Pyetje: Cilët janë hapat konkretë zoti Basha?

Lulzim Basha: Hapa politikë do të hedhim. Ne do t’u bëjmë thirrje qytetarëve që të na ndjekin në rrugë politike.

Pyetje: Opozita parlamentare ka bërë thirrje…

Lulzim Basha: Nuk ka opozitë parlamentare. Ne jemi këtu sot edhe për shkak të një grushti individësh të papërgjegjshëm që i dhanë koperturë parlamentit ilegjitim, parlamentit të krimit. Dhe kur ke një parlament të dalë nga krimi, atëherë krimi kthehet në ligj dhe ligji shkelet me të dyja këmbët. Kështu që mos të flasim më me terma që nuk ekzistojnë të paktën për hir të kolegëve tuaj të dhunuar. Nuk e di nëse i keni sytë nga trishtimi apo gazi sytë të skuqur, por ju thashë dhe njëherë: aksioni nisi duke shkatërruar, duke hedhur poshtë kamerat e medias.

Aksion barbar, dhunë barbare në zemër të Europës. Pse? Se u mbrojt një monument i trashëgimisë shqiptare dhe europiane. Dhunë, pabesi, hajdutëri dhe antiligj. Ky është Edi Rama. Hajdutëri dhe babazi e pastër. Natyrisht që ne do të marrim vendimet tona politike, koalicioni do të mblidhet sot dhe forumet më të larta të Partisë Demokratike dhe do të marrim vendimet tona politike.