Kryetari i Partisë Demokratike-Demokratët Euroatlantikë, Lulzim Basha, ka përkujtuar sot 26-vjetorin e Masakrës së Reçakut, ku u vranë 45 civilë të pafajshëm. Në një postim në facebook, Basha e cilësoi këtë tragjedi si një moment vendimtar në rrugën e Kosovës drejt lirisë dhe një thirrje për ndërgjegjen ndërkombëtare kundër spastrimit etnik dhe gjenocidit të regjimit të Millosheviçit.

Basha thekson rëndësinë e drejtësisë për të shëruar plagët e së kaluarës dhe vlerësoi rolin e Ambasadorit William G. Walker, i cili me veprimet dhe librin e tij e bëri të pamundur që krimet e kryera në Kosovë të harrohen.

“I paharruar kujtimi i martirëve të Reçakut,” përfundoi Basha, duke nënvizuar se Reçaku mbetet një simbol i sakrificës dhe i përkushtimit për liri dhe dinjitet.

Postimi i plotë i Bashës:

Masakra e Reçakut 26 vite më parë, ku u martirizuan 45 burra, gra dhe të fëmijë të pafajshëm, mbetet një nga episodet më tronditëse dhe vendimtare në rrugëtimin e Kosovës drejt lirisë. Kjo tragjedi zgjoi ndërgjegjen e bashkësisë ndërkombëtare, duke i hapur sytë për spastrimin etnik dhe aktet gjenocidale që regjimi i Millosheviçit po kryente ndaj popullsisë civile shqiptare.

Sot, Reçaku është dhe do të mbetet simboli i sakrificës së jashtëzakonshme të një populli që luftoi për dinjitet dhe vetëvendosje, si dhe një dëshmi e nevojës së vazhdueshme për drejtësi dhe ballafaqim me të vërtetën.

Drejtësia për Reçakun, ashtu si edhe për të gjitha krimet mizore kundër popullsisë civile në Kosovë, është thelbësore për të shëruar plagët e së shkuarës, që vijojnë të sëmbojnë për shkak të mohimit të tyre.

Mirënjohje e thellë për kontributin e jashtëzakonshëm të Ambasadorit William G. Walker, i cili, si Shef i Misionit Verifikues të OSBE-së, i tregoi botës mbarë, se ajo që po ndodhte nën regjimin e Millosheviçit në Kosovë ishte spastrim etnik, ndërsa me librin e tij “Reçak: Historia e një krimi lufte”, ia dorëzoi historisë aktet barbare ndaj civilëve shqiptarë, duke e bërë të pamundur që ato të harrohen dhe përsëriten.

I paharruar kujtimi i martirëve të Reçakut!

Nga Arbjona Çibuku

Premtimet e Bashkisë së Tiranës për lirimin e hapësirave publike nga makinat e braktisura i ka marrë era, ndërsa banorët vuajnë pasojat.

Kur Lavdrim Xira bleu një apartament 12 vite më parë në Tiranë, hapësirat për parkim ishin një nga arsyet kryesore që e shtynë të zgjidhte zonën e Freskut. Por një dekadë më pas, parkimi është kthyer në problemin e madh të lagjes së tij dhe makinat e braktisura e përkeqësojnë më tepër.

“U bë kohë që ka shumë makina të braktisura që zenë vendet e parkimit,” tha Xira përmes një bisede telefonike.

“Nuk di as ku të drejtohesh se të tallin, si Shqipëri hesapi, nuk ta merr njeri parasysh ankesën,” shtoi ai.

Braktisja e makinave anekënd rrugëve të Tiranës është shqetësim i mbartur për kryeqytetin. Edhe pse Bashkia në bashkëpunim me policitë rrugore dhe atë bashkiake kanë premtuar prej vitit 2018 heqjen e të gjitha makinave të braktisura prej hapësirave publike, asgjë nuk ka ndodhur dhe problemi është përkeqësuar.

Në vitin 2024, kryebashkiaku Erion Veliaj iu rikthye premtimit të vjetër duke deklaruar se makinat e braktisura do të hiqeshin nga rrugët dhe do të zhvendoseshin në Farkë.

“Bëhet fjalë për të hequr nga Tirana edhe ato makina që mund t’iu jetë bërë pluhuri nga 3 gisht dhe nuk i del njeri për zot, sepse o janë braktisur, ose mund të jenë në emigracion dhe rrinë poshtë pallateve,” tha Veliaj, duke e konsideruar çështjen e parkimit emergjencë.

Përtej premtimit të kryebashkiakut, Bashkia e Tiranës duket se nuk ka ndërmarrë asnjë hap për zgjidhjen e problemit, pasi nuk ka caktuar ende një hapësirë për vendosjen e këtyre makinave në territorin e vetë.

“Policia Bashkiake nuk disponon hapësira publike apo vende të destinuara për të depozituar mjetet e braktisura në territorin e Bashkisë Tiranë,” tha Bashkia në një përgjigje me shkrim për Citizens.al.

“Sapo të përcaktohet nga Bashkia Tiranë vendi i qëndrimit të mjeteve të braktisura në territorin e Bashkisë do të merren masa konkrete për zhvendosjen e këtyre mjeteve drejt pikës së bllokimit të mjeteve,” shtoi ajo.

Në mungesë të veprimit nga Bashkia, qytetarët vuajnë pasojat.

Përmes një pyetësori të publikuar online, dhjetëra banorë të kryeqytetit e konsideruan çështjen e makinave të braktisura problem që zgjat me vite, pa marrë asnjë zgjidhje nga Bashkia. Një pjesë ankohen se nuk janë në dijeni të një mekanizmi raportimi, ndërsa të tjerë pohojnë se nuk kanë parë zgjidhje nga institucionet edhe pas ankesave.

Nga 165 qytetarë që e plotësuan pyetësorin, 77 thanë se nuk kishin raportuar, ndërsa 55 të tjerë se nuk e dinin se ku mund të ankoheshin. Një pakicë prej 34 qytetarësh thanë se kishin kërkuar ndihmën e Bashkisë, policisë apo zjarrfikëseve për zhvendosjen e tyre, por në 80% të rasteve nuk kishin marrë asnjë reagim.

Në zonën e Freskut, një qytetar tha se sheshi poshtë pallatit të tij është zaptuar nga makinat që qëndrojnë me muaj ose vite.

“Nuk ka vende parkimi, lënë dhe këto [makina], disa kanë me vite, po të tjera rrinë disa muaj dhe i heqin. Janë dhe zhul, s’e di ku të ankohem, po duhen hequr sa më parë,” tha ai.

Në rrugën “Myslym Shyri” në kryeqytet, gjetja e një vendi parkimi është luftë e përditshme për banorët e saj. Ndaj çdo hapësirë e zaptuar konsiderohet mundësi e humbur.

“Pa ardhur 1 orë vërdallë nëpër lagje harroje të gjesh vend parkimi,” tha një banor i rrugës “Myslym Shyri” për Citizens.al. “Dhe ato dy-tre që janë, i kanë zënë këto makinat, llogarite vet ti tani,” theksoi ai.

Çdo vit në Tiranë, Policia Bashkiake vendos dhjetramijëra gjoba për parkim të gabuar ndaj drejtuesve të automjeteve, por sipas qytetarëve, shmang përgjegjësinë për t’i dhënë zgjidhje problemit të makinave të braktisura.

“Policia Bashkiake bën kontrolle dhe vendos gjoba çdo ditë. Megjthatë, ata pretendojnë moskompetencë në lirimin e posteve të parkimit publik dhe besoj se ndodh e njëjta situatë edhe për mjetet e braktisura,” thotë Ela, një banore që iu përgjigj pyetësorit.

“Policia Bashkiake, që aty afër i vendos gjoba të moshuarve që shesin qepë, duhet shumë mirë të marrë shërbimet për të dërguar në varreza këto makina që gjenden aty prej vitesh,” shtoi një tjetër qytetar.

Mes të anketuarve ka nga ata që janë bërë pjesë e një pingpongu institucional.

“Kur e kam raportuar te Policia Bashkiake, thonë që e ka kompetencë Policia e Shtetit. Kur e kam raportuar te Policia e Shtetit thonë e ka Policia Bashkiake,” tha njëri prej banorëve.

Një eksperiencë të ngjashme ndan edhe një tjetër banore, pasi ankesa e saj për një makinë të braktisur mori si përgjigje pretendimin se mjeti nuk u arrit të konstatohej.

 “Mjeti ka një vit aty, vetëm bashkia nuk e sheh”, përfundoi ajo.

Ku mund të raportoni!

Për të raportuar një makinë të braktisur, qytetarët mund t’i drejtohen Bashkisë Tiranë përmes aplikacionit “Tirana ime” në rubrikën “Raporto”!

Një tjetër formë është Policia Bashkiake, ku qytetarët mund të denoncojnë përmes numrit të telefonit 042419465.

Po ashtu, Policia Rrugore është përgjegjëse për lëvizjet e këtyre mjeteve. Qytetarët mund t’i drejtohen Komisariatit të Policisë Rrugore Tiranë në numrin e telefonit 0688048488./citizens.al