Aleko Dalla nga qyteti i Durrësit tregon në emisionin “Stop” në Tv Klan se në vitin 2024 i kanë prezantuar Elton Jahon, i cili tha se punonte në Ministrinë e Bujqësisë dhe kërkonte të investonte në një stallë sipas një fondi që jepte Bashkimi Evropian. Fondi ishte 420 milionë lekë të vjetra dhe Elton Jaho do të merrte 25% të shumës.

Ai premtoi se do të legalizonte tokën për të cilën mori 1 milionë e 500 mijë lekë. Më pas nxorri një problem me tokën dhe kërkoi edhe 1 milionë e 300 mijë lekë. Më pas kërkoi për veprime noteriale 60 mijë lekë. Deri tani 2 milionë e 860 mijë lekë të vjetra. Çdo gjë ishte në rregull vetëm se Aleko duhet të priste. Ndërkohë që stalla duhet të merrte rrugë, Eltoni i premtoi t’i fuste vajzën në punë në bashkinë e Tiranës dhe kërkoi sërish 1 milionë e 200 mijë lekë për të bërë disa “dhurata”.

Meqë nuk po bëhej asgjë, qytetarit i filluan dyshimet dhe i kërkoi paratë mbrapsht. Elton Jaho premton se do ia kthejë 5 milionë lekë, por thotë se i ka vdekur një i afërm.

Elton Jaho: Do të jap 5 milionë lekë. Po të fal 1 milionë, po t’i fal unë ty. Ta thashë dhe njëherë, jam me shërbim shteti. Gjallë apo vdekur, dua apo s’dua unë, do ti apo s’do ti, ty lekët do të vijnë në shtëpi. Do më japësh vetëm 48 orë…!

Qytetari: Nuk ke 48 orë. Nesër në mëngjes mua më ke aty te vendi.

Elton Jaho: Në qoftë se brenda 48 orëve unë nuk të jap lekët, unë të pres te komisariati i Durrësit ose te Prokuroria e Durrësit. Mua nga ora 9 më ke te shtëpia jote. I kam unë 2 mijë e ca, po thashë të t’i jepja tamam. Ca dhimbje, jam në një vdekje.

Qytetari: Ca personi qe? Ca e pate?

Elton Jaho: E kisha të afërt. E kisha vëlla nga babi. I kam lekët këtu me vete, nesër do të t’i sjell në dorë.

Herën tjetër Eltoni thotë se është sëmurë me tumor.

Elton Jaho: Kam hequr tëmthin dhe kam për të hequr një masë tumoriale këtu te Onkologjiku.

Qytetarja: Kuptoj. Unë jam në Tiranë dhe doja ta takoja pak. Nuk e di, a mund të vij aty te spitali a si t’ia bëjmë?

Elton Jaho: Nuk e di tani. Pak më vonë, se unë do futem tashi, do bëj një mbjellje. Mund të vish nesër në mëngjes këtu? E ke problem?

Qytetarja: Ku, te cili spital të vij?

Elton Jaho: Tek “Nënë Tereza”! Kur të jesh aty, më bëj një telefon!

Më pas, ndodh takimi me Elton Jahon ku sërish thotë se duhet të presin.

Qytetarja: A je shtruar këtu, apo..?

Elton Jaho: Po. jam shtruar këtu 

Qytetarja: Elton, ti i ke thënë, që punon te Ministria e…?

Elton Jaho: Nuk punoj më. Kam ikur.

Qytetarja: A the, punoj te Ministria e Bujqësisë?

Elton Jaho: Po pra, po kam ikur, se kam 2 muaj e gjysmë spitaleve. Kam bërë tre operacione edhe jam me leje tani. Kur të mbarojë leja, do të kthehem prapë.

Qytetarja: Të ka dhënë dhe lekët për gocën ai, që do fuste në punë.

Elton Jaho: Ka dhënë 3 (milionë) për këtë dhe 1 e ca (milionë) për këtë. 4 e 200 janë.

Qytetarja: Sa të dha për gocën, që do fusje gocën në punë?

Elton Jaho: 1 milionë e 200 e ca, e 300.

Qytetarja: Që do e fusje në punë te bashkia?

Elton Jaho: Po! Edhe 3 milionë për atë, 4 milionë. Do prisni ca ditë, sa të mbarojë dhe mbjellja e kësaj që kam bërë!

Pas shumë peripecive, gazetarja e “Stop” arrin ta gjejë Elton Jahon shëndoshë e mirë, por ai sërish premtoi se do të kthejë paratë duke u larguar me taksi./

Instituti Ndërkombëtar Republikan (IRI) sapo ka publikuar Anketën Kombëtare për Shqipërinë, ku spikat një mbështetje e lartë e qytetarëve për SPAK-un, i cili vazhdon të mbetet institucioni më i besueshëm në vend. Shumica e të anketuarve presin më shumë hetime dhe ndëshkime të politikanëve të korruptuar, për shkak se korrupsioni është për ta një ndër shqetësimet kryesore. Ata pohuan se nuk do të mbështesin në zgjedhje ato parti, që përkrahin ligje për të kufizuar punën e SPAK-ut. Drejtori i IRI-t për Shqipërinë, John Fluharty, tha për Zërin e Amerikës se qytetarët mbështesin përpjekjet kundër korrupsionit për të përmirësuar jetën e tyre. Ai theksoi se lufta kundër korrupsionit rikthen besimin e njerëzve tek demokracia.

Anketa Kombëtare e Institutit Ndërkombëtar Republikan (IRI) gjeti se Struktura e Posaçme Kundër Korrupsionit dhe Krimit të Organizuar (SPAK) është sot institucioni më i besueshëm në Shqipëri (76%), e më pas renditen policia, ushtria dhe institucionet fetare, ndërsa institucionet më pak të besueshme janë Kuvendi dhe partitë politike.

Studimi mbështetet në përgjigjet e një mijë e dyqind qytetarëve të moshave nga 18 vjeç deri mbi 56 vjeç.

Pjesa më e madhe e të anketuarve (59%) mendojnë se reforma në sistemin e drejtësisë është e efektshme, ndërsa (70%) e tyre mendojnë se efektshmëria e drejtësisë u rrit pas vetingut të gjyqtarëve dhe ngritjes së SPAK-ut.

Afro gjysma e të anketuarve (47%) mendojnë se krijimi i SPAK-ut është rezultati më i mirë i reformës në drejtësi, më pas vijnë vettingu (27%) dhe (13%) zbehja e ndikimit politik mbi gjykatat.

Pas kryerjes së reformës në drejtësi qytetarët mendojnë se më të rëndësishmet për t’u bërë tani janë luftimi i korrupsionit, hetimi dhe ndëshkimi i politikanëve, si dhe pavarësia nga ndikimi qeveritar.

Ata i besojnë më shumë SHBA-ve (46%) dhe BE-së (37%) për monitorimin e institucioneve të reja të drejtësisë, përfshirë SPAK dhe gjykatat, disa herë më pak kryeministrit (7%), dhe vetëm 1 për qind i besojnë Kuvendit.

Më shumë se gjysma e të anketuarve (51%) nga të gjithë grupmoshat pohuan se nuk do ta përkrahin në zgjedhje asnjë parti, që mbështet ligje për të kufizuar punën e SPAK-ut.

Afro 40 për qind e qytetarëve pohuan se vlerësimi i tyre për SPAK-un do të përmirësohej, nëse SPAK heton politikanë, të cilët ata i kanë mbështetur në të kaluarën.

“Për të tretën herë në anketat tona SPAK-u është institucioni më i besuar në Shqipëri, – tha për Zërin Amerikës, John Fluharty, drejtori i IRI-t për Shqipërinë. – Një numër i madh i qytetarëve pohuan që nëse SPAK-u do të hetonte një kandidat apo parti, që ata kanë mbështetur më parë, kjo do të rriste mbështetjen e tyre për SPAK-un. Akoma më domethënëse është gjetja që nëse njerëzit zbulojnë se kandidati ose partia mbështet kufizimin e SPAK-ut për të bërë detyrën e tij, ata do të kenë më pak gjasa të mbështesin atë parti apo kandidat. Kjo do të thotë se qytetarët kanë shpresë. Ata shohin shpresë në punën e SPAK-ut, shohin shpresë në luftimin e korrupsionit, që më parë nuk e kishin. Kjo është vërtet domethënëse”, tha zoti Fluharty.

Nga ana tjetër, korrupsioni mbetet një ndër shqetësimet kryesore në Shqipëri, teksa 71 për qind e të anketuarve e cilësojnë këtë dukuri si një problem serioz.

Pjesa më e madhe besojnë që korrupsioni është më i përhapur në shërbimet publike si doktorët, mësuesit dhe policët, e më pas ata renditin kryeministrin me kabinetin qeveritar, drejtësinë, drejtuesit e partive politike e të biznesit si dhe zyrtarët vendorë.

Pjesa më e madhe të anketuarve shprehen se problemet më të rëndësishme që përballet vendi aktualisht janë ekonomia me çmimet e larta dhe kostot e jetesës, papunësia dhe korrupsioni, pasuar nga shëndetësia, kriminaliteti dhe migrimi.

Krahasuar me një vit më parë, shqetësimi për ekonominë ka rënë me 11 pikë, por shqetësimi për korrupsionin është rritur me 2 pikë.

Pjesa dërrmuese e të anketuarve pohuan që nëse zgjedhjet mbahen sot, çështjet përcaktuese për votën e tyre janë pensionet, ekonomia dhe antikorrupsioni.

Ata besojnë se arritjet më të rëndësishme të qeverisë aktuale janë infrastruktura, integrimi europian dhe reforma në drejtësi, por tek dështimet më të mëdha të qeverisë qytetarët renditën pensionet, ekonominë, emigrimin dhe korrupsionin.

Qytetarët e anketuar mendojnë se përparësitë kryesore që qeveria duhet të trajtojë janë ekonomia, pagat dhe pensionet, punësimi, shëndetësia dhe lufta kundër korrupsionit.

“Korrupsioni nuk është vetëm një çështje paligjshmërie, por është një çështje ekonomike, sepse ai ndikon në aftësinë e njerëzve për të pasur punë, në koston e jetesës, si dhe në meritokraci, -thotë zoti Fluharty i IRI-t. – Njerëzit e cilësojnë korrupsionin si çështje parësore, por nuk mund ta shkëputin nga çështjet e SPAK-ut, sepse ata po dëmtohen ekonomikisht, dhe e shohin korrupsionin si një nga shkaktarët e dhimbjeve të tyre, rritjes së kostos së jetesës, çmimeve të larta të ushqimeve. Njerëzit pohuan në sondazh që gjërat do të përmirësohen, pasi korrupsioni po trajtohet. Fokusimi kundër korrupsionit është si një Reset Button për vendin, një mundësi për të rivendosur në një kurs të ri gjërat e vendit drejt anëtarësimit në BE, ndryshe sa ndodhën në tridhjetë vitet e fundit”, theksoi drejtori i IRI-t.

Nga Anketa e Institutit Republikan doli po ashtu që më pak se gjysma e të anketuarve (49%) janë të kënaqur me mënyrën si po zhvillohet demokracia në vend, ndërsa gjysma tjetër shprehen të pakënaqur dhe shumë të pakënaqur.

Pjesa dërrmuese e qytetarëve të anketuar besojnë se demokracia është forma më e mirë e mundshme e qeverisjes së vendit.

Por vetëm një e treta e tyre mendojnë se vendi po qeveriset në interes të shumicës së popullatës, ndërsa afro dy të tretat (62%) shprehen se qeverisja punon për interesat e disa grupeve.

Ky perceptim është më shumë i përhapur tek të anketuarit nga 18 deri 35 vjeçarë (72%), por kjo është një përgjigje e qëndrueshme edhe në moshat e tjera nga 36 deri mbi 56 vjeç e lart (59%).

Të pyetur nëse të rinjtë e sotëm kanë një të ardhme të mirë në Shqipëri, më shumë se gjysma e qytetarëve të anketuar (57%) përgjigjen negativisht, kundrejt 40 për qind të atyre që shprehen pro një të ardhme të mirë.

Krahasuar me një vit më parë, përgjigja se rinia nuk ka një të ardhme të mirë në atdhe sivjet është përkeqësuar me 3 pikë. Shumica e të anketuarve në këtë përgjigje negative janë të rinj, por po ashtu janë shprehur njëlloj edhe shumë të anketuar nga të gjithë grupmoshat.

“Gjetjet kryesore të sondazhit, – thotë drejtuesi i IRI-t, John Fluharty, – janë se qytetarët shqiptarë vazhdojnë të kenë shqetësime për ecurinë e demokracisë shqiptare, por ata e duan idenë e demokracisë dhe duan të shohin që të hidhen hapa gjigantë përpara. Ata e shohin SPAK-un si një mënyrë për të ndihmuar, që kjo të ndodhë. Qytetarët mbështesin përpjekjet kundër korrupsionit, sepse ata e kuptojnë që e gjithë kjo lidhet me përmirësimin e cilësisë së jetës së tyre. Lufta kundër korrupsionit është një mënyrë e mirë për të rikthyer besimin e njerëzve tek demokracia, sepse ligji dhe barazia para ligjit është shtylla e demokracisë”, – tha zoti Fluharty.

Lidhur me zgjedhjet e ardhshme, qytetarët shprehin masivisht gatishmëri të lartë për të votuar, ndonëse janë ndarë baras sa i takon pyetjes nëse njerëzit e thjeshtë mund të ndikojnë në vendimmarrjen e vendit.

Afro dy të tretat e të anketuarve (62%) thonë se zgjedhjet apo ofertat në politikën shqiptare janë shumë të kufizuara dhe se forcat e reja politike duhet të ofrojnë alternativa të tjera në zgjedhjet e ardhshme.

Ky mendim mbizotëron në të gjithë grupmoshat. Kjo përgjigje e re vjen tani nga të anketuar, mbi 90 për qind e të cilëve pohuan se në zgjedhjet e kaluara kanë votuar për njërën nga dy a tre partitë më të mëdha.

Aktualisht një e treta e të anketuarve nga të gjithë grupmoshat shprehin pëlqim për partitë e reja, që janë krijuar së fundi. Anketa zbuloi po ashtu se, krahas katër partive më të hershme (PS, PD, PSD, PL), qytetarët shprehin besim edhe në katër parti të reja (Shqipëria Bëhet, Partia Mundësia, Lëvizja Bashkë dhe Nisma).

Drejtori i IRI-it, Fluharty, thekson që partitë politike janë në fund të tabelës së besimit nga qytetarët dhe ky është një mesazh për to.

“Sondazhi, – thotë zoti Fluharty, – nuk i sheh zgjedhjet si një garë kuajsh kokë më kokë; se kush fiton ato, nuk është aq e rëndësishme, sa biseda se kujt i përkasin partitë politike: A i përkasin ato një grupi njerëzish, që kanë të njëjtat pikëpamje, apo që besojnë tek një individ. Ka një hendek midis në të kuptuarit thelbësor për qytetarët se cilës parti i përkasin, çfarë përfaqësojnë ato, çfarë ideologjie dhe programesh kanë, sepse kur njerëzit qëndrojnë të lidhur me individë të veçantë, gjithmonë ka një pyetje për motivin e kësaj”, shtoi drejtori i IRI-t për Shqipërinë.

Në anketën e IRI-t vetëm një pakicë (16%) tha se nuk ka gjasa që të votojnë në maj, për shkak se sipas tyre, vota dhe zgjedhjet nuk kanë rëndësi, se asnjë kandidat apo parti nuk i frymëzon dhe nuk i përfaqëson.

Shumica e të anketuarve (58%) besojnë se zgjedhjet e ardhshme do të jenë të lira, përballë 40 për qind, që mendojnë të kundërtën.

Pjesa dërrmuese e të anketuarve që pritet të votojnë për PS-në (90%) mendojnë që zgjedhjet e majit do të jenë të lira, ndërsa tre të katërtat e atyre që pritet të votojnë PD-në shprehen se zgjedhjet nuk do të jenë të lira.

Pjesa më e madhe e të anketuarve (58%) besojnë se KQZ-ja është e aftë të organizojë dhe të mbikëqyrë zgjedhjet, por pjesa tjetër (41%) kanë pak ose aspak besim tek KQZ-ja.

Anketimi zbuloi një shqetësim në rritje të qytetarëve për dhunë të mundshme në zgjedhje, sa afro dyfishi i një viti më parë. Një vit më parë këtë shqetësim e shprehën 27 për qind të qytetarëve, ndërsa sot ata janë afro dyfishi (45%). Pjesa dërrmuese e të anketuarve që e ngrejnë këtë shqetësim mbi dhunën e mundshme në zgjedhje i përkasin asaj pjese, që mendohet se voton për PD-në.

Sa i takon mbështetjes së politikanëve, në sondazh spikatin diferencat e ndjeshme midis kryeministrit socialist Edi Rama (35%), përballë kryetarit të PD-së Sali Berisha (14 për qind), por në skajin tjetër të tabelës besimi për figura të tjera është po a q i lartë (26%), sa edhe mosbesimi i plotë tek asnjë politikan (28%).

Mbi 60 për qind e të anketuarve besojnë dhe shpresojnë se e ardhmja e tyre do të jetë më e mirë, ndërsa pjesa tjetër (afro 40%) nuk kanë shumë shpresë për një të ardhme më të mirë, por pohojnë madje se kanë frikë, shqetësim e pasiguri për të ardhmen dhe nuk besojnë tek ndonjë përmirësim për këtë.

Më shumë se gjysma e të anketuarve nga IRI (52%) pohuan se vendi po shkon në drejtimin e duhur, një shifër kjo me 6 pikë në rënie krahasuar me një vit më parë (58%). Megjithatë qeveria Rama gëzon një aprovim të përgjithshëm nga më shumë se gjysma e të anketuarve (58%), edhe për sa i takon efektshmërisë (55%).

Shumica dërrmuese e qytetarëve (74%) pohuan se janë të informuar mjaftueshëm mbi zgjedhjet e ardhshme, por duan më shumë informacion mbi programet partiake dhe kandidatët e tyre.

Nga ana tjetër, pjesa dërrmuese (88%) e të anketuarve thanë se nuk kanë parë gjatë 12 muajve të fundit ndonjë aktivist partiak në zonën e tyre./VOA

Kryeministri Edi Rama, zaptues i krejt pushteteve dhe me fuqi vendimesh e ligjesh klienteliste si “Sulltani” i Shqipërisë, ka nisur të ri-formatojë kupolën oligarkike me emra të rinj, të lidhur prej vitesh në interesa biznesesh dhe pazare me të, me familjarë e klane të tij.

Dajlan Avdia, personazhi i botës së krimit ndërkombëtar me rezidencë në Gjermani dhe biznese lojrash fati e kullash në Shqipëri, thuhet se do të jetë bosi i plotfuqishëm pranë Edi Ramës, që do menaxhojë pazaret pas zgjedhjeve të 2025-ës, që ka deklaruar se do fitojë mbi 90 mandate.

Gjatë 11 viteve në pushtetin e Edi Ramës, mafiozi Dajlan Avdia, ka qëndruar në hije, duke menaxhuar afro 60% të aktivitetit të kazinove e basteve me grupin “APEX”, por ka qenë dhe përfitues i shumë lejeve për pallate e kulla në qendër të Tiranës.

Dy muaj më parë, Dajlan Avdia, i njohur si mik ndikues i kryeministrit Edi Rama e të vëllait Olsi Rama, i është futur investimit të resorteve në bregdetin jugor, si terren pa rrezik për të pastruar miliardat e siguruara me punë të pista të qeveritarëve e trafikantëve.

Këtë skemë pastrimi parash, Dajlan Avdia e ka nisur në muajin nëntor 2024, me lejen që i dha miku i tij Edi Rama, për investimin e një resorti në 68 hektarë tokë shteti buzë detit pranë Kalasë së Lëkurësit në Sarandë, me pallate, hotele me 5 yje, pishina, qendër tregtare dhe vila.

Brenda sipërfaqes është 3.3 hektarë tokë, që krye- bashkiaku i Himarës, Vangjel Tavo ia grabiti shtetit me dokumente false, ndërsa tre muaj para se të zgjidhej kryetar, ia shiti Dajlan Avdisë me 3.7 milionë Euro, për të cilën, thuhet se është shitje fiktive e pa deklaruar në ILDPKPI.

Këtë projekt turistik gjigand, me vlerë totale afro 500 milionë Euro, Dajlan Avdia do ta investojë 100% vetë dhe do ta ndërtojë me kompaninë e tij “TDT&Partners”, por pa deklaruar burimin e të ardhurave, kur sipas të dhënave zyrtare, deri në 2018 kur shiti aksionet e tij te “APEX”, kishte vetëm 1.3 milionë Euro fitime, ose sa 35% e vlerës që deklaroi në blerjen e tokës së Vangjel Tavos.

Ndërsa në dosjen e lejes së resortit poshtë Kalasë së Lëkursit në Sarandë, KKT nuk ka asnjë raport nga bankat dhe as nga Drejtoria e Parandalim-Pastrimit të Parave, që të faktojë se me çfarë aktiviteti është marrë Dajlan Avdia në Gjermani e Shqipëri dhe sa të ardhura ka.

Por SHISH e Antikrimi, referuar dhe raporteve të agjencive partnere anti-mafie, i kanë raportuar kryeministrit Edi Rama dhe strukturave të drejtësisë shqiptare, se Dajlan Abdi, i cili vepron me mbiemrin “Avdia” qysh prej vitit 2010, po pastron paratë e tij të zeza të grupeve mafioze e qeveritarëve me ndërtime në Shqipëri.

Me skemë “lavatriçe”, është investimi për kullën ngjitur me sahatin e Tiranës; 3 kullat pas Presidencës; kompleksi me 10 e 11 kate dhe 3 kate parkim nëntokë te rruga “Vellazën Huta”; kulla “Rainbow Center” në ish-Bllok, ku Dajlan Avdia ka bashkëpunuar me Tomë Doshin.

Por sipas raporteve të SHISH, Dajlan Avdia ka nga 30-50% investime dhe në 11 kulla, resorte e pallatesh të tjera në Tiranë, Durrës, Vlorë e Lalz, fshehur si investitor ilegal me kompanitë e tij “Invest Society”, “Techno Alb”, “National Construction” e “Coast Investment Albania”.

Informacionet thonë, se pas zgjedhjeve të 2025-ës, në të cilat, Edi Rama ka deklaruar një fitore cilësuese; diktues te Babloku për pazare, nuk do të jenë më Bashkim Ulaj, Rrok Gjoka e Pëllumb Salillari etj, por vetëm Dajlan Avdia, si bosi i ri drejues i grupit oligarkik.

Pas kullave e resortit në Sarandë, Dajlan Avdia pritet të marrë licenca për bastet dhe licenca me 65 ha për kultivim kanabisi; por fuqia e tij pranë Edi Ramës do ketë aq ndikim, sa ai do vendose se kush do marrë leje kullash, resortesh, tituj ‘Investitor strategjik’, pasuri shtetërore dhe ata që do bëhen klientë të rinj te oborri i Bablokut e ata që do nxirren jashtë “tepsisë”./Pamfleti