Sekretari i përgjithshëm i Kombeve të Bashkuara, Antonio Guterres, e dënoi fuqishëm përshkallëzimin e luftimeve pranë kryeqytetit të Libisë, Tripoli, dhe bëri thirrje për ndalimin e menjëhershëm të dhunës.

Thirrja pasoi një sulm ajror të forcave të komandantit Khalifa Haftar në aeroportin Mitiga, në lindje të Tripolit. Guterres tha se “kërkon ndalimin e menjëhershëm të të gjitha operacioneve ushtarake, në mënyrë që të qetësohet situata dhe të parandalohet konflikti i përgjithshëm”.

Thirrje për armëpushim bëri edhe shumica e komunitetit ndërkombëtar, përfshirë Shtetet e Bashkuara. Forcat e Ushtrisë Kombëtare të Libisë, grup që udhëhiqet nga gjenerali Khalifa Haftar, nisën një ofensivë të enjten e kaluar, me qëllim marrjen e kontrollit të Tripolit nga Qeveria e kryeministrit Fayez al-Serraj, e cila mbështetet nga OKB-ja.

Kjo qeveri e unitetit e kontrollon kryeqytetin, por autoriteti i saj nuk njihet nga një administratë paralele në lindje të Libisë. Gjenerali Haftar është aleat i qeverisë rivale në qytetin lindor Tobruk. Kryeministri Al-Serraj e akuzoi atë për përpjekje për grushtshtet dhe tha se ushtarët e tij rebelë do të përballen me forcën.

Libia është shkatërruar nga dhuna dhe paqëndrueshmëria politike prejse sunduesi Muammar Gaddafi është rrëzuar nga pushteti dhe është vrarë në vitin 2011. “Sulmi i Haftarit dhe i Ushtrisë Kombëtare të Libisë në Tripoli e ka intensifikuar luftën për pushtet, e cila e ndan vendin e pasur me naftë dhe gaz që nga përmbysja e Gaddafit në vitin 2011”, vlerëson agjencia e lajmeve Reuters.

Vlerësim të ngjashëm bën edhe agjencia Associated Press, e cila thotë se ofensiva e Ushtrisë Kombëtare të Libisë mund ta kthejë këtë vend në luftë civile.

Sipas BBC-së, shumë pak është besuar se Haftar do ta nisë këtë ofensivë – edhe pse ka kërcënuar me të për kohë të gjatë – sepse është menduar se pjesëmarrja e tij në bisedime për më shumë se një vit, do të blinte kohë derisa të arrihej një zgjidhje e re politike nëpërmjet negociatave dhe një procesi të mundshëm zgjedhor.

“Diplomatët janë të shqetësuar sepse mënyra dhe koha e sulmit nënkuptojnë se ai nuk ka gjasa të tërhiqet, nëse nuk mposhtet”, shkruan BBC, për të shtuar: “Haftar beson se mund të sigurojë një vend në përbërjen e ardhshme politike të Libisë nëpërmjet mjeteve ushtarake”.

Gjenerali Haftar e ndihmoi Gaddafin të merrte pushtetin në vitin 1969, përpara se të armiqësohej me të dhe të shkonte në mërgim në SHBA. Haftar u kthye në Libi në vitin 2011, pasi nisi kryengritja kundër Gaddafit dhe ai u bë komandant i rebelëve.

Ministria e Shëndetit Publik e Libisë tha se së paku 25 njerëz janë vrarë dhe 80 janë plagosur nga luftimet pranë Tripolit – përfshirë edhe civilë, edhe ushtarë. Së paku 2,800 njerëz ikën nga dhuna, bënë të ditur Kombet e Bashkuara.

Izraelitët po votojnë të martën në zgjedhjet parlamentare në një përballje të ashpër ndërmjet kryeministrit Benjamin Netanyahu me ish shefin e shtabit të ushtrisë, Benny Gantz.

Anketat para votimeve treguan se partia Likud e zotit Netanyahu dhe ajo “Bardh e Blu” e e zoti Gantz, mund të fitojnë një numër të përafërt të vendeve në Knessetin me 120 ligjvënës.

Nëse kjo ndodh, zoti Netanjahu, 69-vjeçar, mund të ë fitojë një mandat të pestë, në një koalicion me partitë më të vogla të krahut të djathtë që janë aleate me të. Derisa fushata po përmbyllej, Benjamin Netanyahu, rikujtoi votuesit për miqësinë e ngushtë me presidentin amerikan, Donald Trump.

Ai e falënderoi udhëheqësin amerikan – “mikun tim të shtrenjtë” – për përgjigjen e së hënës në “kërkesën time” për të shpallur Rojat Revolucionare të Iranit, si organizatë terroriste.

Presidenti Trump u është përgjigjur kërkesave të zoti Netanyahu përfshirë shpalljen e sovranitetit të shtetit hebraik mbi Rrafshnaltën e Golanit të Sirisë, një territor që u pushtua në luftën gjashtëditëshe të vitit 1967; njohjen e Jerusalemit si kryeqytetin e Izraelit dhe duke zhvendosur ambasadën amerikane nga Tel Avivi; si dhe duke tërhequr Shtetet e Bashkuara nga marrëveshja bërthamore me Iranin.

Zoti Netanyahu, i përballur me akuzat për korrupsion, u vu në përpjekje ditëve të fundit për të nxitur votuesit e tij konservator duke u zotuar se do të aneksojë vendbanimet në Bregun Perëndimorë, një veprim që nëse ndodhë, do t’i jap fund çdo shprese të mbetur për të krijimin e një shteti të pavarur palestinez përkrah Izraelit.

Benny Gantz, 59 vjeçar, e cilësoi të “papërgjegjshëm” zotimin e Netanyahut. Ai tha se e mbështetë një “marrëveshje paqeje të mbështetur nga bota”. Gantz e portretizoi veten su forcë bashkuese në Izrael dhe tha se është koha për ta larguan Netanyahun nga pushteti.
“Mjaft më Bibi”, tha zoti Gantz në një video mesazh duke përdorur nofkën me të cilën njihet gjerësisht Benjamin Netanyahu.

Nëse fiton, Netanyahu është në rrugë për t’u bërë udhëheqësi që ka qëndruar në gjatë në pushtet në Izrael duke kaluar një nga themeluesit e Izraelit, David Ben-Gurion.

Presidenti turk, Recep Tayyip Erdogan po përdor gjithë peshën e tij politike në përpjekjet për të përmbysur rezultatet e zgjedhjeve lokale në Stamboll, sipas së cilave partia e tij AK ka humbur.

Duke folur para gazetarëve të hënën para se të shkonte në Moskë, zoti Erdogan vuri në pikëpyetje vlefshmërinë e votës. “Ne, si parti politike kemi vërejtur krim të organizuar dhe disa aktivitete të koordinuara”, tha ai.

Deri tani, zoti Erdogan dukej se ishte tërhequr nga debati gjithnjë e më i ashpër politik lidhur me suksesin e partisë opozitare Republikane të Popullit (CHP) në Stamboll. AKP-ja në Stamboll po sfidon rezultatin e zgjedhjeve të 31 marsit, në përpjekje për të përmbysur epërsinë prej 24 mijë votash të Ekram Imamoglut ndaj Binali Yildirimit.

Përpjekjet e AKP-së e ngushtuan epërsinë, duke e çuar në 15 mijë. Por rinumërimi i 300 mijë votave të pavlefshme pothuajse ka përfunduar. AKP-ja po kërkon tani një rinumërim të plotë të afro 10 milionë votave.

Presidenti Erdogan hodhi gjithashtu idenë e një përsëritjeje të votimit në Stamboll.
“Askush nuk ka të drejtën të thotë ‘Fitova’ me një diferencë prej 13 mijë ose 14 mijë votash”, tha ai.

“Ne bëmë një premtim. Ne thamë se do të mbronim votat në kutitë e votimit, dhe ashtu bëmë. Pasi mbrojtëm votat në kutitë e votimit, kemi vazhduar të bëjmë të njëjtën gjë në procesin që e pasoi atë”, shtoi ai.

Ideja e përsëritjes së votimit u shpërfill nga udhëheqësit e opozitës. “Të përsëritësh zgjedhjet deri kur të fitojë AKP-ja, është diçka që ndodh në diktaturat afrikane. Ka shembuj të tillë”, tha udhëheqësi i Partisë së Mirë, Meral Aksener.

Me tensionet politike në rritje lidhur me votimet e debatueshme, udhëheqësi i CHP-së, Kemal Kilicdaroglu, ia la përgjegjësinë Komisionit të Lartë të Zgjedhjeve, për t’i dhënë fund mosmarrëveshjes.

“Çfarëdo që ka bërë AKP-ja deri tani, nuk i ka ndryshuar rezultatet. Anëtarët e Komisionit të Zgjedhjeve duhet veprojnë në mënyrë të pavarur dhe të vendosin në përputhje me ligjin. Bëhet fjalë për fatin e demokracisë sonë”, tha zoti Kilicdaroglu.

Shumica e Komisionit përbëhet nga të emëruar të zotit Erdogan dhe qeverisë. Vendimet e tij për rinumërim kanë ngjallur tashmë dyshime për paanshmërinë e tij.

“Organizmi i mbikqyrjes së zgjedhjeve, YSK që duhet të jetë i pavarusr dhe që do të marrë vendimin për apelimin për Stambollin, deri tani ka pranuar 86 për qind të kërkesave të AKP-së për rinumërim, vetëm 12 për qind të atyre të CHP-së dhe 0 për qind të HDP-së (pro-kurde)”, shkruante në Twitter Sonar Cagaptay, drejtor i Programit të Studimeve për Turqinë në Uashington.

Megjithatë YSK-ja hodhi poshtë kërkesën e AKP-së për një numërim të plotë të votave për zgjedhjet bashkiake në Ankara, ku CHP-ja fitoi kontrollin e qytetit pasd 25 viteve. Në Stamboll, komisioni hodhi gjithashtu poshtë apelimin për përsëritjen e zgjedhjeve për një distrikt bashkiak.

Analisti Atilla Yesilada i Partnerëve për Burime Globale tha se ndërhyrja e Presidentit Erdogan në debat, ndryshon relievin politik.

“Megjithëse YSK-ja ka treguar në një farë mase se ka shtyllë kurrizore gjatë këtij debati, nuk duhet të gënjejmë veten. Asnjë entitet në Turqi nuk ka guxim t’i bëjë ballë zemërimit të Erdoganit”, tha ai.

Kritikët paralajmërojnë se përmbysja e rezultatit dhe përsëritja e zgjedhjeve në Stamboll, do ta shuante çdo besim të turqve në sistemin politik demokratik të Turqisë.

Vëzhguesit thonë se rreziqet politike dhe ekonomike do të ishin të konsiderueshme nëse zgjat beteja politike për Stambollin që ka qenë baza politike e Erdoganit për 25 vjet.