Pak minuta para nisjes zyrtare së protestës së opozitës, ka ardhur edhe reagimi ish kryeministrit Sali Berisha.
Përmes një postimi në rrjetet sociale, Berisha shkruan se, e gjithë Shqipëria ka dalë në rrugë kundër qeverisë.
“Tirana sot si kurrë ndonjëherë më parë ul qepenat dhe derdhet ne shesh”, shkruan Berisha.
Janë dhjetëra mijëra qytetarë që po vërshojnë nga e gjithë Shqipëria drejt Tiranës për të marrë pjesë në protestën kundër qeverisjes së Edi Ramës.
Nga të dhënat zyrtare që vijnë vetëm nga Partia Demokratike bëhet fjalë për mijëra shqiptarë që janë nisur drejt kryeqytetit me mjete dhe rrugë të ndryshme.
Sipas informacioneve nga qarqe të ndryshme të vendit janë nisur më shumë se 60 mijë protestues.

Në një kohë që mijëra protestues janë nisur nga rrethet drejt Tiranës për protestën e opozitës që do të nisë pas pak minutash, nuk kanë munguar as rastet kur policia ka ushtruar presione, madje edhe me gjoba, kundër drejtuesve të mjeteve që vijnë në kryeqytet.
Një rast të tillë sjell edhe anëtari i Kryesisë së PD, Jamarbër Malltezi.
“Trafik i renduar tek “Shqiponja” se policia ndaloi një autobuz me targë të dyshimte, se i fillonte me SH… Gjithëe autobuzi buçiste “Poshte komunistat!”, shkruan Malltezi.

Ish-deputeti i PD, Luçiano Boçi, nga kryqëzimi i Bradasheshit ku është bërë edhe organizimi i qytetarëve të qarkut Elbasan për protestën e sotme në Tiranë, ka deklaruar se policia po provokon protestuesit.
Në një prononcim për TV Ora, Boçi tha se Drejtoria e Tatimeve po ndalon drejtuesit e autobusëve. Ai shtoi se, do t’i përgjigjen çdo provokimi.
“Ne kemi ngulmuar tek masiviteti, protesta është paqësore. Por këto që ndodhin në kryqëzimet e rrugëve mund të krijojnë precedent të rrezikshëm që zemërimi dhe revolta të shprehet në sheshin para kryeministrisë. Ne jemi për protestë paqësore, por do t’i përgjigjemi me çdo lloj monedhe çdo provokimi që vjen nga forcat e rendit. Ka pasur irritim të qytetarëve për ta shprehur zemërimin. Unë gjykoj që të gjitha këto do konvergojnë në pikën e vlimit në Tiranë”, u shpreh Luçiano Boçi.

Emocionalisht kryeministri Edi Rama duket se është në ditët më të vështira. Ankthi dhe frika e protestave ia zënë frymën dhe si një mundësi për ta marrë me sportivitet, gjithnjë zgjedh të ikë kur Tirana është në revoltë.
I ka bërë “baltë” udhëtimet në Vlorë dhe tashmë po zgjedh qytete të tjera dhe gjithnjë në Jug të vendit. Me trup në takime me administratën e tij dhe me mendje nga Tirana, kryeministri këtë herë duket se do ketë momentet më të vështira. Opozita ka paralajmëruar ditën e nesërme një protestë të madhe, duke lënë surprizë edhe kohëzgjatjen, ku po diskutohet që protestuesit të rrethojnë kryeministrinë në shenjë simbolike dhe të qëndrojnë me ditë të zgjatura.
Ky do ishte simbolikisht edhe akti i parë i largimit të Edi Ramës. Si një shtetar që trembet nga populli i tij, Rama e ka të pamundur që të mbërrijë në kryeqendrën e politikës dhe institucioneve qëndrore, për aq kohë sa në rrugë ka protesta, qofshin ato edhe krejt paqësore.
Fati i Ramës nuk varet prej tij, por nga vendosmëria e opozitës, që tashmë nuk njeh asnjë institucion dhe ndodhet e gjitha në rrugë. Nëse në Tiranë protesta do të vijojë, ka edhe një tjetër rrezik për të nxitur përplasje, pasi Erion Veliaj më datë 17 ka planifikuar festime të “mëdha” për rastin e Ditës së Verës. Këtë kërkon edhe Edi Rama, mundësisht incidente, për ti përdorur më pas si kauzë para ndërkombëtarëve.
I gatshëm për ta bërë, madje mjeshtër në nxitje të dhunës dhe krijimit të përçarjes do jetë Lali Eri, që përderisa ka marrë konfirmimin si kandidat për një mandat të dytë të bashkisë Tiranë është i devotshëm ti verë flakën vendit.

Vetë Rama nuk është në gjendje të tregojë forcë, përkundrazi gjithnjë i largohet frymës protestuese për të zënë vend në Kalanë e Beratit, me shpresë se deri aty nuk do mbërrijnë fryma e revoltës.
Nisma e beftë opozitare me djegien e mandateve ishte ataku i parë “kardiak” për Ramën, që gjithsesi do të donte për justifikim të një “demokracie hibrite” opozitën në Parlament. Të tallej me të, ta anatemonte, e në fund me forcën e kartonëve të vendoste ashtu siç ai di vetë.
Në çdo protestë kryeministri braktis zyrën, por këtë kurrë nuk e ka konsideruar si problem, për aq kohë sa edhe ai vetë është i bindur se nuk ka qeverisur me akte, ligje e nisma, por nëpërmjet rrjeteve sociale, teksa paraqet një Shqipëri vituale, jashtë realitetit.
Largimi i Ramës nga Tirana kur ka protestë, është edhe një tjetër tregues, pasi ai po luan rolin e përçarësit që në Shqipërinë e vogël të ketë vetëm dy grupime: ata që protestojnë dhe shqipërinë e tij vituale që feston, punon në administratë dhe bën propagandë në rrjetet sociale dhe mediat e blera prej tij.
Kjo protestë është ndryshe, sidomos nëse zgjat në kohë! Rama mund të pësojë “atakun tjetër kardiak”, edhe në Berat, i rrethuar nga muret e kalasë.
Boldnews.al

Qindra qytetarë janë nisur nga Shkodra për të ardhur në Tiranë ku do të zhvillohet protesta e opozitës së bashkuar. Por përveç qytetarëve që jetojnë çdo ditë në vend, protestës i janë bashkuar edhe emigrantë që jetojnë jashtë shtetit.
Një prej tyre, Naim Hasani i ardhur nga Britania e Madhe, është shprehur për News 24 se, të gjithë shqiptarët dhe qytetarët e ndershëm duhet të protestojnë kundër regjimit kriminal të Rilindjes dhe për të mbrojtur votën e lirë.
Ai bëri thirrje që protesta të jetë paqësore për t’i treguar botës se shqiptarët janë një komb qytetar që nuk e do diktaturën.
“Ata që rrinë në Amerikë, Kanada, Australi kanë arsye shumë të forta për të protestuar sot kundër Rilindjes, kundër instalimit të regjimit kriminal të Rilindjes në Shqipëri. Populli, shpirti, demokracia, liria, barazia dhe drejtësia duhet të triumfojnë në Shqipëri. Shqipëria dhe shqiptarët të mos mbeten më delja e zezë e Evropës por të përparojnë, të ecin përpara me të drejta të plota si anëtarë të BE-së, përfshi të drejtën për të votuar si qytetarë të lirë.
Unë kam ardhur nga Britania si kryetar i PD-së në Britani dhe bashkë me mua kanë ardhur edhe emigrantë të tjerë, të cilët kërkojnë që në Shqipëri të vendoset liria, në Shqipëri të vendoset e drejta e votës, shqiptarët të mos kenë nevojë të largohen dhe të emigrojnë përditë dhe ta lëshojnë Shqipërinë por të ndërtojnë Shqipërinë këtu bashkë si shqiptarë e qytetarë të lirë të Europës.

Ftoj të gjithë shqiptarët kudo që janë, qytetarët e ndershëm t’i bashkohen protestës së sotme të opozitës, të PD-së dhe liderit të saj Lulzim Basha. Kjo është protesta për lirinë, është beteja për drejtësinë, është beteja për votën e lirë që i intereson çdo shqiptari kudo që është. Nisja nga Shkodra, simboli i demokracisë, tregon që shqiptarët janë të vendosur për t’i thënë jo ‘Rilindjes’, për t’i thënë jo regjimit që është instaluar në Shqipëri.
Shpresojmë dhe besojmë që protesta të jetë ndër më demokratiket, më paqësoret dhe t’i tregojnë shqiptarët botës se ne jemi një komb qytetar, një komb që nuk do komunizmin, një komb që nuk do diktaturën, një komb që nuk do krimin dhe bandat. Fitore shqiptarëve!”, tha emigranti.

Policia po ushtyron terror ndaj protestuesve që vijnë nga rrethet duke ngitur postblloqe dhe duke vënë gjoba shoferëve p[a asnjë shkak.
Bëhet e ditur se, policia ka marrë urdhër nga lart që të ndalojë sa të mundë protestuesit që vijnë nga e gjithë Shqipëria për në Tiranë. Në Kamëz autobusët dhe furgonët që vijnë nga veriu janë bllokuar për më shumë se dy orë nga policia duke krijuar edhe revoltë tek qytetarët.
Në të gjithë rrugët hyrëse të kryeqytetit janë ngritur postblloqe policie që ndalojnë dhe gjobisin makinat, autobusët apo furgonët.
Kështu ka ndodhur edhe në autostradën Milot-Fushë Krujë, ku patrulla policie kanë ndaluar makinat duke i gjobitur.
Siç duket me urdhër nga gjeneral Sandër Lleshi, gjithçka bëhet për të frikësuar qytetarët për të mos dalë në protestë, por askush nuk ka bërë mbrapa në rrugëtimin e tij drejt Tiranës për të protestuar kundër Edi Ramës.