SHBA dhe talibanët kanë bërë hapa reale në çështjen e tërheqjes së trupave të huaja dhe në masat antiterror. Sapo të kenë përfunduar këto çështje, në tryezë do të jenë bisedime midis palëve afgane dhe një armëpushim.
SHBA dhe negociatorët e talibanëve i quajtën përmbledhtazi përparim raundet e fundit të bisedimeve të paqes. Por ende nuk është rënë dakord për një plan kohor për tërheqjen e trupave të huaja, u tha të martën. Bisedimet 16 ditore në kryeqytetin e Katarit, Doha, prodhuan një “projekt” marrëveshjeje për një plan kohor për tërheqjen e trupave dhe dhënien e sigurisë për masa antiterror, tha i dërguari special i SHBA, Zalmay Khalilzad në twitter.
“Kushtet për paqe janë përmirësuar. E qartë është se të gjitha palët duan t’i japin fund luftës. Megjithë të përpjetat dhe të tatëpjetat, ne i mbajtëm gjërat në linjë dhe bëmë hapa reale përpara”, tha diplomati amerikan i lindur në Afganistan.
Talibanët kanë mbajtur një sërë raundesh me bisedime me negociatorët e SHBA, por deri tani kanë refuzuar të negociojnë drejtpërdrejt me qeverinë afgane ose të angazhohen për një armëpushim, përballë sulmeve të përditshme.
Talibanët konfirmojnë përparimin
Raundi i fundit i bisedimeve në janar i bëri SHBA dhe talibanët që të bien dakord për një “projekt kornizë” për tërheqjen e trupave dhe për masa antiterror. Uashingtoni po kërkon garanci që talibanët nuk do të lejojnë që Afganistani të përdoret nga militantët për të ndërmarrë sulme terroriste jashtë vendit. Kjo ishte arsyeja, pse SHBA ndërhynë ushtarakisht pas sulmeve të 11 shtatorit 2011. “Paqja kërkon dakordim në katër çështje: siguri kundër terrorizmit, tërheqje trupash, dialog ndërafgan dhe një armëpushim të gjerë”, tha Khalilzad.
Në një deklaratë, talibanët konfirmuan që “është arritur përparim” për kohën e tërheqjes së trupave dhe për siguri për masa antiterror. “Për momentin, të dyja palët do të reflektojnë për përparimin e arritur me lidershipet e tyre dhe do të përgatiten për takimin e ardhshëm, për të cilin do të caktohet data nga ekipet negociatore”, thuhet në deklaratë.

Kryeministri i Kosovës Ramush Haradinaj thotë, se edhe dy këshilltarët e Kancelares gjermane, Markel, Jan Hecker dhe Matthias Lüttenberg, i kërkuan atij heqjen e taksës ndaj Serbisë.
Kryeministri i Kosovës, Ramush Haradinaj, kritikoi bashkësinë ndërkombëtare për presionin që po i bëhet Prishtinës zyrtare për ta hequr taksën ndaj prodhimeve të Serbisë në mënyrë që t’i hapet rruga dialogut me Kosovën. Haradinaj thotë, se nuk i pranon kushtet e Serbisë. Kryeministri kosovar tregoi se edhe dy këshilltarët e kancelarës gjermane, Angela Merkel, që vizituan Kosovën dhe Beogradin, i kërkuan atij që ta heqë taksën ndaj prodhimeve të Serbisë dhe Bosnjes e Hercegovinës, në mënyrë që t’i hapet rruga dialogut.
“Pozicioni i Berlinit është i qartë, dialogu është i rëndësishëm dhe ai duhet të vazhdojë, taksa është pengesë, hiqeni taksën”, tregoi kryeministri Ramush Haradinaj qëndrimin që kishin dy këshilltarët kryesorë të Kancelares së Gjermanisë, Angela Merkel, Jan Hecker dhe Matthias Lüttenberg.
Kushti i Serbisë për vazhdimin e dialogut me Kosovën është që qeveria e Kosovës ta heqë taksën. Këtë po e kërkon edhe bashkësia ndërkombëtare, së fundi edhe SHBA-ja përmes nënsekretarit amerikan për ҁështje politike, David Hale dhe Gjermania përmes dy këshilltarëve kryesorë të Merkelit, Jan Hecker dhe Matthias Lüttenberg, të cilët vizituan Kosovën dhe Beogradin.
Kjo situatë e ka nervozuar kryeministrin kosovar Ramush Haradinaj, i cili tha se Serbia po nxjerr kushte që mos të hyjë në dialog me Kosovën. Pra, Kosova sipas tij nuk po e bllokon dialogun, por Serbia, ndërsa, bashkësia ndërkombëtare nuk mund të bëjë presion te Serbia, por i bën presion viktimës (Kosovës).

“S’kam lyp garanci. Kam fol për kontratë. I besoj Amerikës dhe kur ata thonë diçka e di se është ashtu. Por, për shumë arsye ne po kërkojmë një kontratë me elementet përbërëse të saj, përfshirë ekonominë dhe tregtinë e lirë. Kjo është ajo që po kërkojmë. Garanci më të madhe se njohja e Amerikës s’mund të kemi. Megjithatë, për marrëdhëniet Kosovë-Serbi na intereson të dimë elementet e kontratës. Unë u besoj amerikanëve dhe si të më thonë kjo është formula, unë u besoj. Ne po kërkojmë kontratë të dimë ka shkon dialogu. Dialogun e ka bllokuar Beogradi, sepse ata thonë se pa u heq taksa s’ka dialog. S’e kemi bllokuar ne”, tha kryeministri Haradinaj, duke bërë të ditur edhe njëherë qëndrimin e tij, se nuk u nështrohet presioneve dhe nuk e heq taksën ndaj prodhimeve të Serbisë, derisa kjo e fundit nuk e njeh pavarësinë e Kosovës.
Ramush Haradinaj, pranon se me presidentin Hashim Thaҁi dhe partnerin e tij të koalicionit, kryetarin e kuvendit Kadri Veseli, kanë pikëpamje të ndryshme në disa pika, përfshirë edhe taksën ndaj Serbisë, por sipas tij, janë unik për platformën për dialog, që u miratua ditë më parë në kuvendin e Kosovës.
“S’mund të thuhet se Kosova s’po flet me një zë. Kemi delegacionin që është votuar edhe me ligj dhe ky është uniteti i Kosovës. Jemi të gatshëm të dialog, kur të jenë pala tjetër gati ne i presim”, tha Haradinaj.
E pala tjetër Serbia, pos që kërkon nga Kosova heqjen e taksës për ta vazhduar dialogun, thotë se edhe platforma për dialog e Prishtinës e ka vështirësuar mundësinë e dialogut, dhe në thelb sipas Presidentit të Serbisë, Aleksandër Vuciq, ”Platforma e Prishtinës është bllokim i dialogut Kosovë-Serbi”.
Presidenti i Serbisë tha se “qëndrimi i Beogradit karshi situatës së re të krijuar do të jetë i vendosur, serioz dhe i përgjegjshëm”.
“Në një afat relativisht të shkurtër kohor do të ndërmarrë masa përmes të cilave do të reagojë ndaj mospërmbushjes së obligimeve nga marrëveshja e Brukselit, vendosjes së taksës ndaj mallrave serbe dhe ndërprerjes së dialogut me Serbinë nga ana e Prishtinës”, tha Aleksandër Vuciq, thuhet në një komunikatë të Presidencës së Serbisë. Vuçiq thuhet më tej “ka paralajmëruar prej kohësh përfaqësuesen e Lartë të BE-së, Federica Mogherini dhe ekipin e saj se miratimi i platformës së Prishtinës nuk lë vend për kompromis dhe si e tillë ajo është kundër dialogut”.
Kuvendi i Kosovës, të enjten e javës së shkuar miratoi platformën e dialogut, ku Prishtina zyrtare e ka vënë një kusht për t’u përfshirë në dialogun për marrëveshjen finale me Serbinë. Kushti i saj është që përpara se të ulet në tryezën e bisedave në Bruksel, “do zotimin paraprak të delegacionit serb se e ka autoritetin që të bjerë dakord për njohjen e shtetit të Kosovës”.
“Marrëveshja përfundimtare, gjithëpërfshirëse dhe ligjërisht e detyrueshme Kosovë-Serbi, duhet tё jetë e qartë dhe pa dykuptimësi”, thuhet në platformën e Prishtinës.

Parlamenti britanik të martën hodhi poshtë planin e Kryeministres Theresa May për shkëputjen nga Bashkimi Evropian.
Votimi me rezultatin 391 kundër dhe 242 pro, ka gjasa ta vonojë procesin Brexit ose ta çojë në dështim të plotë.
Votimi i së martës ishte një goditje e fortë për Zonjën May dhe kërcënon pozitën e saj si kryeministre.
Votimi e lë vendin pa ndonjë rrugë të qartë, vetëm 17 ditë përpara afatit përfundimtar për largimin nga Bashkimi Evropian.
Parlamenti është thellësisht i ndarë për çështjen se si do të veprohet me procesin Brexit dhe nëse do të thirren zgjedhje të reja apo një referendum i dytë.
Përpjekje të dëshpëruara
Rezultati i votimit me siguri do të intensifikojë kërkesat që zonja May të japë dorëheqjen ose të thërrasë zgjedhje përgjithshme.
Shumë ligjvënës konservatorë do të dëshironin të zinin vendin e saj si udhëheqëse partiake dhe kryeministre, por deri tani nuk ka asnjë kandidat me peshë dhe rezultati i zgjedhjeve të përgjithshme, nëse mbahen, është i paqartë.
Plani i zonjës May, i negociuar me kujdes me Bashkimin Evropian, do të kishte përcaktuar kushtet për daljen e planifikuar të Britanisë më 29 mars.
Nëse Parlamenti nuk ndërmerr ndonjë hap tjetër, Britania do të largohet nga blloku në atë datë pa një marrëveshje.
Mbështetësit e shkëputjes këmbëngulin se një marrëveshje do të ishte diçka e mirë, por shumica e ligjvënësve dhe ekonomistëve thonë se ajo do të ishte katastrofike.

Parlamenti pritet të votojë të mërkurën nëse do të refuzojë apo jo mundësinë e një shkëputjeje “pa marrëveshje”, ndërsa të enjten do të votohet nëse do të kërkohet një shtyrje e afatit të 29 marsit.
Zonja May i kërkoi me forcë Dhomës së Komuneve të miratonte versionin e saj të fundit të marrëveshjes për shkëputjen e Britanisë që ajo negocioi të hënën me Presidentin e Komisionit Europian Jean-Claude Juncker.
Udhëheqësja britanike tha se zoti Juncker ra dakord për “ndryshime të sanksionuara me ligj”, për të siguruar që kufiri midis Irlandës – anëtare e BE-së – dhe Irlandës së Veriut – pjesë e Britanisë – të mbetet i hapur pas shkëputjes.
Por duket se ndryshimet nuk ishin të mjaftueshme për ligjvënësit, të cilët në janar votuan me shumicë dërrmues kundër planit të kryeministres.
Kancelarja gjermane Angela Merkel tha se BE-ja ka bërë “propozime të qarta dhe të largpamëse” për të zbutur shqetësimet e Britanisë lidhur me marrëveshjen.
Por ajo iu shmang pyetjes nëse ishte e gatshme për të shtyrë daljen e Britanisë nga BE-ja nëse ligjvënësit britanikë nuk bien dot dakord për një plan.