Nënkryetari i PD, Edi Paloka,  në një deklaratë sot nga selia blu, tregoi arsyet pse Sandër Lleshi nuk mund të jetë Ministri i ri i Brendshëm.
Paloka tha: “Parlamenti i hapi sot rrugën drejtimit të Ministrisë së Brendshme nga një tjetër ushtar i Edi Ramës, fundi i të cilit do të jetë i njëjtë: shërbëtor i një kryeministri, peng i krimit të organizuar.
Sandër Lleshaj nuk do ta luftojë dot krimin, se pushteti politik i shefit të tij varet nga blerja e votës me bandat.
Sandër Lleshaj është produkt i një qeverie ilegjitime, që qëndron në pushtet me të paktën 15 mandate të blera.
Nuk do ta luftojë dot krimin, pasi Edi Rama e ka vendosur atje për të mbrojtur Vangjush Dakon që ka blerë vota për të. Pas denoncimeve, Dako sot duhej të ishte në burg.
Sandër Lleshaj është pjesë e paktit të Edi Ramës me krimin që blen vota.
Sandër Lleshaj ka mundësinë të tregojë s enuk është kukull: ai duhet të tregojë se nuk do ta pengojë arrestimin e Vangjush Dakos që bleu vota për tepsinë e Ramës”.
Deklarata e plotë e Nënkryetarit të PD, Edi Paloka
Parlamenti i hapi sot rrugën drejtimit të Ministrisë së Brendshme nga një tjetër ushtar i Edi Ramës, fundi i të cilit do të jetë i njëjtë- shërbëtor i një kryeministri peng të krimit të organizuar.
Sandër Lleshaj nuk ka për ta luftuar dot krimin, sepse pushteti politik i shefit të tij varet nga blerja e votës nëpërmjet bandave dhe krimit të organizuar.
Sandër Lleshaj është produkt i një qeverie ilegjitime, që qëndron në pushtët me të paktën 15 mandate të blera.
Sandër Lleshaj nuk do ta luftojë krimin që ble vota për të, sepse Edi Rama e ka emëruar atje për të mbrojtur nga arrestimi i menjëhershëm Vangjush Dakon, simbolin e blerjes së pushtetit politik të Edi Ramës nëpërmjet krimit të organizuar.

Për këtë krim, i provuar edhe nga përgjimet e dosjes 339, të denoncuar nga opozita, Vangjush Dako duhet të ishte sot në burg!
Përsa kohë Vangjush Dako dhe çdo ministër, deputet, kryebashkiak apo drejtues i Partisë Socialiste, pjesë e dosjes 339, apo e ndonjë dosje tjetër nën hetim për krimin e blerjes së votës, do të jenë jashtë burgut, do të thotë se Sandër Lleshaj është pjesë e paktit të Edi Ramës me krimin që blen votat.
Sandër Lleshaj e ka shumë të thjeshtë të provojë që sot se nuk është një kukull: ai nuk duhet të pengojë arrestimin e Vangjush Dakos.
Përgjimet e dosjes 339 kanë faktuar se Vangjush Dako është në komunikim të vazhdueshëm me bandat para, gjatë dhe pas zgjedhjeve, duke shkëmbyer me pasuri dhe pushtet votat e blera për tepsinë e Edi Ramës.
Përgjimet zyrtare të prokurorisë nga dosja 339 nxjerrin në pah marrëdhënien e ngushtë të Vangjush Dakos me bandën e Avdylajve, trafikantë ndërkombëtarë droge nga Amerika latine në Europë, të cilët i ka përdorur në fushatë për të blerë zgjedhjet. Përgjimet faktojnë gatishmërinë dhe garancinë e Vangjush Dakos për t’i mbaruar punë bandës. Mosarrestimi i Dakos është prova e shkatërrimit total të prokurorisë së krimeve të Rënda.
Mosarrestimi i Dakos hedh në erë alibitë qesharake për suksesin e reformës në drejtësi.
Në Shqipëri nuk ka për të patur as drejtësi, as luftë kundër krimit dhe asnjë zhvillim normal pa u ndëshkuar krimi elektoral që mban në pushtet qeverinë ilegjitime të Edi Ramës!

Koncesioni për ndërtimin dhe mirëmbajtjen e rrugës Milot-Balldre do t’i kushtojë qytetarëve shqiptarë dyfishin e vlerës së parashikuar fillimisht nga qeveria. Ndërtimi dhe mirëmbajtja e 17,2 kilometrave rrugë, që në dhjetor 2017 ishte parashikuar të kushtonte 114 milionë euro, tani do të kushtojë rreth 216 milionë euro.
Kjo është kostoja që ka kërkuar të kompensojë fituesja e koncesionit 13 vjeçar, kompania A.N.K shpk me pronar Agim Kolën.
Më poshtë Exit.al shpjegon se si u dyfishua pa asnjë shpjegim nga qeveria kostoja e rrugës Milot-Balldre.
Kronologjia e koncesionit të rrugës Milot-Balldre
Në dhjetor 2017, qeveria publikoi relacionin zyrtar të buxhetit të shtetit 2018, ku përfshihej edhe një përmbledhje e koncesioneve të planifikuara për këtë vit. Fondi buxhetor për ndërtimin dhe mirëmbajtjen e rrugës Milot-Balldre, 17,2 kilometra të gjatë, ishte planifikuar 14,3 miliardë lekë, pra, rreth 114 milionë euro.
Gjatë muajve të parë të 2018-ës, kompania A.N.K shpk, me pronar Agim Kolën, i bëri qeverisë një ofertë të pakërkuar për këtë rrugë. Më 27 qershor 2018, Qeveria miratoi dhënien e një bonusi prej 8,5 për qindësh kësaj kompanie dhe lajmëroi se së shpejti do të hapte tenderin për këtë rrugë, ku mund të merrnin pjesë në garë dhe kompani të tjera.
Më 23 korrik 2018, Ministria e Infrastrukturës dhe Energjisë hapi tenderin për ndërtimin dhe mirëmbajtjen për 13 vjet të rrugës. Në njoftimin zyrtar të tenderit, fondi limit ishte rritur në 20,8 miliardë lekë, ose gati 162 milionë euro, pra gati 50 milionë euro më shumë se fondi fillestar i planifikuar në parashikimin buxhetor. Justifikimi për rritjen me rreth 50 milonë euro të kostos ishte ndërtimi i sinjalistikës dhe sistemit të ndriçimit të rrugës.

Më tetor 2018, Ministria e Infrastrukturës dhe Energjisë shpalli kompaninë A.N.K shpk fituese të koncesionit, pikërisht me vlerën e fondit limit të tenderit pra rreth 162 milionë euro, afërsisht 9 milionë euro për kilometër. Punimet parashikojnë rreth 15,6 kilometra rrugë automobilistike me 6 korsi, një tunel me gjatësi 850 metra dhe dy ura, atë të Matit me gjatësi 620 metra dhe atë të Drinit me gjatësi 223 metra.
Pas ndërtimit, kompania A.N.K shpk do ta mirëmbajë rrugën për 13 vite.
Gjatë këtyre 13 viteve qeveria do t’i shlyejë kompanisë gjithë koston e rrugës dhe do të paguajë mbi të një përqindje fitimi (apo interesi). Si rezultat, duke llogaritur dhe këtë përqindje qeveria do t’i paguajë kompanisë A.N.K sh.p.krreth 27 miliardë lekë, pra, rreth 216 milionë euro. Kjo vlerë është thuajse dyfishi i kostos së parashikimit fillestar të kostos të bërë më pak se një vit më parë.
Projekti është pjesë e Projektit 1 Miliardë
Ky projekt është pjesë e paketës “1 miliardë Euro’ investime me kontrata PPP. Ai ishte i katërti në listën e projekteve të kësaj pakete, pas projekteve të Rrugës së Arbrit, aksit Thumanë-Kashar dhe rrugës Orikum-Dukat.
Rruga e Arbrit do të ndërtohet nga kompania Gjoka sh.p.k dhe do të kushtojë rreth 240 milionë euro. Rruga Thumanë-Kashar, e cila do të kushtojë 225,8 milionë euro do të ndërtohet nga kompania Gener 2 sh.p.k, ndërsa ajo Orikum-Dukat me gjatësi 15 kilometra do të kushtojë 58 milionë euro dhe do të ndërtohet nga kompania Gjikuria sh.p.k.
Të gjithë këto kontrata kanë qenë “oferta të pakërkuara” dhe fitues të tenderëve kanë qenë kompanitë që kanë bërë kërkesën e pakërkuar.
Kjo paketë investimesh përmes Partneritetit Publik Privat është kundërshtuar nga Fondi Monetar Ndërkombëtar, Banka Botërore dhe Departamenti Amerikan i Shtetit, të cilat shprehen se këto lloj investimesh koncesionare janë jo vetëm jotransparente dhe kufizojnë konkurrencën, por ato do të rrisin ndjeshëm borxhin publik të vendit, duke vënë në rrezik situatën financiare të Shqipërisë.

Kryeministri Rama akuzoi sot presidentin Meta se ka refuzuar pa të drejtë dhe pa bazë ligjore dekretimin e Sandër Lleshit si Ministër i Brendshëm.
Sot gjatë seancës parlamentar, Kryeministri Rama deklaroi:
“Nuk figuron gjëkundi kompetenca e refuzimit të ministrave që gëzojnë besimin e kryeministrit. Edhe pse Kushtetuta nuk i njeh presidentit të Republikës as shprehimisht as me nënkuptim kompetencën për të refuzuar anëtarët e qeverisë, presidenti ka formuluar një letër pa asnjë referencë ligjore.
Kushtetuta i ka të përfshira të 12 kompetencat e presidentit, por askund nuk e ka atë që të rrëzojë ministrat.”
Por deklaratat e Kryeminsitrit bien ndesh me Kushtetutën, sepse sipas nenit 98, pika 1 të Kushtetutës:
“Ministri emërohet dhe shkarkohet nga Presidenti i Republikës, me propozim të Kryeministrit, brenda 7 ditëve.”
Për më tepër Kryeministri Rama, sërish në shkelje të Kushtetutës që cakton afatin “7 ditë”, deklaroi se do t’i lërë edhe pak ditë kohë presidentit Meta të reflektojë për kandidaturën e Sandër Lleshit:
“Do vendosim në qeveri ministrin e brendshëm të refuzuar nga presidenti, natyrisht në postin e zëvendësministrit dhe do i japim ca ditë kohë presidentit ta bluajë si çështje, por do i japim kohë edhe vetes për të hedhur hapin tjetër.”
Ky është rasti i parë që Presidenti i Republikës nuk dekreton propozimin e Kryeministrit për një ministër.
Në këto kushte, siç Exit.al ka shpjeguar më parë, Kryeministri Rama duhet të paraqesë një kandidaturë të re për postin e Ministrit të Brendshëm.

Kryetari i PD, Lulzim Basha ka pasur një bashkëbisedim me banorët e Pirgut në Maliq. Basha foli për alternativën e opozitës për ringritjen e bujqësisë, e cila mbështetet në 3 shtylla: subvencionet direkte, Investimet në infrastrukturë dhe mbrojtja prodhimit vendas me tarifat doganore. Po ashtu, ai bëri një deklaratë me shumë interes për rritjen e pensioneve.
“Në rastin e bujqësisë nuk ka nevojë të shpikim rrotën. Politikat për të mbështetur bujqësinë funksionojnë njësoj, si në Europë, edhe të fqinjët tanë, Maqedonia dhe Kosova. Buxheti ynë për subvencionet vitin e parë do të jetë 150 milion euro dhe do të vazhdojë duke u rritur sipas projeksionit tonë, siç do të vazhdojë të rritet edhe prodhimi i bujqësisë shqiptare“, tha Basha.
Duke bërë një krahasim me fondet që parashikon buxheti 2019 vetëm për një grusht koncesionesh korruptive në pronësi të qeverisë apo klientë të saj, Basha tregoi edhe burimin e financimit për ringritjen e bujqësisë.
“100 milion euro do të harxhojë vitin e ardhshëm, po e lamë, vetëm për 10 oligarkë Edi Rama. Vetëm për tre inceneratorët, që janë makina të prodhimit të parave, Arben Ahmetaj do të marrë 22 milion euro për veten e tij, t’i fusë në xhepat e tij. Ne do t’i japim fund koncensioneve korruptive që na e kanë çuar kilometrin e rrugëve në 25 milionë euro”, theksoi kreu i opozitës në takimin me banorët e Maliqit.

Pjesë e alternativës qeverisëse të opozitës është edhe rritja e pensioneve, paratë për te cilat do të gjenden tek dhënia fund e abuzimit me tenderat që, vetëm vitin e kaluar llogariten në rreth 500 milionë euro.
“Ne do të nisim që prej ditës tonë të parë në pushtet, rritjen e pensioneve. Rritja e parë do të jetë në nivelin e 200 mijë lekëve dhe deri në fund të mandatit, pensioni minimal në Shqipëri do të jetë 250 mijë lekë të vjetra për pensionist”, u shpreh Basha.
Kryetari I opozitës i ftoi banorët e Maliqit t’i bashkohen opozitës për të bërë të mundur që vendin të mos e qeverisë pakica, por shumica reale e këtij vendi që përkrah projektet konkrete të opozitës për zhvillimin e vendit.
“Asgjë prej këtyre nuk mund të vijë pa një rotacion politik, pa një transformim total, që është po aq i nevojshëm sot sa para 30 vitesh. Para 30 vitesh kishim 13 anëtarë të Byrosë Politike që nuk mendonin për njerëzit, por mendonin vetëm për veten e tyre. Edhe sot kemi 5 banditë, 5 oligarkë dhe 5 politikanë që mendojnë vetëm për veten e tyre. Para 30 vitesh ata e kishin bërë Shqipërinë kopësht zoologjik të stalinizmit. Edhe sot këta 15 Banditë e oligarkë e konsiderojnë gjithë Shqipërinë çifligun e tyre”, u shpreh Basha.