Dorëheqja e ministrit të Brendshëm, Fatmir Xhafaj, zbuti përplasjet në radhët maxhorancës, të cilës iu tronditën së fundmi ekuilibrat e brendshëm pas arrestimit të dy-ish deputetëve Arben Ndoka e Arben Çuko dhe publikimit të përgjimeve të Vangjush Dakon me anëtarë të klanit kriminal Avdulaj.
Nga ana tjetër, media e majtë po shpërndan tymnajën se, njëkohësisht, se me largimin e Xhafajt, edhe opozita humbi shënjestrën kryesore politike. Por, në fakt, largimi i Xhafajt nuk e ka zbutur dhe nuk mund ta zbusë aksionin opozitar, i cili deri më tani ia ka dalë shumë mirë që të zbulojë lidhjet e krimit të organizuar me segmente të rëndësishme të qeverisjes së Edi Ramës.
Fatmir Xhafaj, megjithëse vuri nën kontroll thuajse total Policinë dhe Prokurorinë, nuk arriti të mbulonte raportet që funksionarë të lartë të Partisë Socialiste kishin me persona të krimit të organizuar. Madje, në disa raste ai mendohet se është personi që ka ideuar publikimin e informacioneve kompromentuese për figura të rëndësishme të partisë së tij, të cilët dëmtonin rëndë figurën e njerëzve pranë Edi Ramës.
Informacionet e njëpasnjëshme për lidhjet e Taulant Ballës me njerëz me të shkuar dhe të tashme kriminale, si edhe përgjimet e Vangjush Dakos me Avdulajt e Shijakut dyshohet se kanë “rrjedhur” nga zyrat e Fatmir Xhafajt.
Numri dy i Partisë Socialiste u paraqit në media si një njeri që nuk merrte asnjë masë paraprake për të fshehur lidhjet e tij me eksponentë të krimit. Ai u shfaq si mik i Mond Begos, i dënuar me 20 vjet burgim në Itali për trafik narkotikësh. Për më shumë se dy ditë, Balla u mundua ta sfumonte këtë informacion.

Por, kur e kuptoi se nuk kishte zgjidhje tjetër, ai u detyrua të pranonte publikisht miqësinë familjare me Mond Begon. Informacionin për këtë lidhje, me shumë mundësi e kishin në dispozicion grupet e vëzhgimit të Policisë dhe Ministrisë së Brendshme të Xhafajt.
Gjithashtu, përgjimet e Vangjush Dakos me Avdulajt, aktualisht gjenden vetëm në dosjen hetimore të prokurorisë, e cila i ka marrë nga veprimet policore. Këto përgjimet konsiderohen “sekret hetimor” dhe ato nuk mund të jenë në duart e askujt tjetër, përveçse të prokurorëve të çështjes dhe oficerëve të Policisë që po ndjekin hetimin.
Por, siç rezultoi të Enjten e kaluar, përgjimet për Dakon përfunduan në duart e Sali Berishës dhe gazetarit Ylli Rakipi. Ekzistojnë vetëm dy mundësi për “rrjedhjen” e përgjimeve për Dakon- ose nga Prokuroria, e cila ishte nën kontrollin total të Fatmir Xhafaj, ose nga Policia, e cila de facto kontrollohej plotësisht nga Fatmir Xhafaj. Pra, të dy rastet të lidhin me një emër të vetëm-Fatmir Xhafajn.
Publikimi i përgjimeve për Dakon mendohet se është pika e fundit në gotën e mbushur të përplasjeve mes Edi Ramës dhe Fatmir Xhafajt. Në këtë konflikt, natyrisht fitorja anoi nga personi me më shumë pushtet-kryetari i Partisë Socialiste.
Megjithatë, largimi i Fatmir Xhafajt nuk i sheshoi problemet e Edi Ramës dhe qeverisë së tij për lidhjet me krimin. Fakti që Xhafaj nuk do të mbajë më portofolin e Ministrisë së Brendshme, nuk i fshin lidhjet e Vangjush Dakos me Avdulajt, nuk i zeron lidhjet e Taulant Ballës me Mond Begon e të tjerë.
Madje, për më tepër, ikja e Xhafajt mund të nxjerrë në pah edhe të tjera lidhje të zyrtarëve të lartë socialistë me botën e krimit, të cilat i mbante të fshehura, për sa kohë ishte Ministër i Brendshëm.

“Boldnews.al”

Kryeministri Edi Rama u prit mbrëmjen e sotme me protesta dhe flakadanë nga qytetarët e Kukësit, pas vendosjes së taksës për “Rrugën e Kombit”.
Pritja me protesta nuk ka kaluar pa u komentuar nga kryeministri Rama, i cili i quajti ata si grup zoologjik, e menjëherë pas kësaj ka ardhur edhe reagimi i kryetarit të PD-së së Kukësit, Arif Rexhmati.
Me anë të një postimi në rrjetet sociale, kryetari i PD në Kukës, Arif Rexhmati, reagoi me ashpërsi ndaj këtyre komenteve të Ramës.
“Si hajdut që është erdhi natën në Kukës, por mori me vete urrejtjen që mbolli për kuksianët. Ne jemi luanë të lirë, shimpanze në kopsht zoologjik është Rama, ofezat për Kukësin dhe kuksianët iu kthyen mbrapsht”, shkruan ai.
Kujtojmë se Rama tha: “Më vjen keq që një pjesë e atyre që kishin ardhur për të marrë pjesë në takim, për shkak të sallës ishin të detyruar të rrinin jashtë dhe të shikonin atë grupin zoologjik, që ishin mbledhur në hyrje. Kemi një kundërshtar tejet të dëshpëruar dhe njerëzit e dëshpëruar bëjnë gjëra të dëshpëruara”.

Pyetje: Zoti Basha ju deklaruat se nuk ka dhe nuk do të ketë proces normal institucional me këtë qeverisje dhe po ashtu pak më parë në mbledhjen e Grupit Parlamentar i keni vendosur deputetët para faktit se përballja me qeverinë do të jetë më shpejt se sa mendohet, a mund të dimë pak më shumë, se kush janë rrugët e përballjes me qeverinë? Po përgatiten protesta?
Basha: Nuk ka asnjë mister se përballja po zhvillohet dhe do të zhvillohet jo pa sukses. Ky është rasti i vetëm kur kemi një kryeministër i cili vazhdon të qëndrojë në detyrë, ndonëse janë larguar dy ministra të brendshëm njëri pas tjetrit, për shkak të aferave kriminale. Dhe ky është rezultat dhe meritë e qëndresës dhe përballjes sonë.
Po mos të ishte për përballjen e opozitës, në momente të veçanta edhe krejt e vetme, sot Sajmir Tahiri do të ishte një Ministër “i nderuar” i Brendshëm, apo jo? Siç i rrihte shpatullat pa fund Edi Rama.
Sot Vangjush Dako do të ishte një shembull i…
Gazetari: I akullores…
Basha: I akullores, supermen-it, menaxhimit të Durrësit.
Sot Fatmir Xhafa do të ishte njeriu që “i dha Shqipërisë Reformën në Drejtësi”. Por në fakt sot Sajmir Tahiri nuk është as Ministër, as deputet, është në hetim dhe hetimi do të vazhdojë, pavarësisht broçkullave që qarkullojnë lart e poshtë e do të thellohet, mos sot nesër. Nuk do t’i shpëtojë përgjegjësisë që në krye të Ministrisë së Brendshme e ktheu në një organizatë kriminale që bashkëpunonte me kriminelët për trafikun e drogës.
Fatmir Xhafa është larguar, por nuk do t’i shpëtojë përgjegjësisë penale, për atë që s’ka ndodhur në 28 vite: përdorimin e policisë dhe prokurorisë për të fabrikuar prova dhe dëshmitarë të rremë kundër denoncuesve, gazetarëve dhe kundërshtarëve politikë.
Vangjush Dako do të arrestohet. Do të përfundojë atje ku e ka vendin, sëbashku me Elvis Rroshin e Gent Dajën. Nuk ka asnjë mundësi që as Taulant Balla, as Damian Gjiknuri, as Arben Ahmetaj, asnjë nga kupola socialiste që është përfshirë në këtë mega proçes mafioz të shitblerjes së votës, ti shpëtojë përgjegjësisë penale.

Të gjitha këto janë objektivat e opozitës. Vijmë me një bilanc me të paktën 350 zyrtarë dhe politikanë të larguar për shkak të ligjit të dekriminalizimit, me dy ministra të brendshëm të larguar për shkak të luftës opozitare dhe të luftojmë ta thellojmë këtë bilanc duke larguar nga politika, politikanët e inkriminuar dhe duke i çuar ata para drejtësisë. Ky në vetvete është edhe elementi kryesor i dekriminalizimit të zgjedhjeve.
Sa kohë që këta njerëz vazhdojnë të administrojnë pushtet politik, çdo reformë në letër do të mbetët në letër. Por ama kur këta të humbasin postet politike dhe të vendosën para një drejtësie të vërtetë e të pavarur, ky do të shërbejë si shembull dhe paralajmërim për këdo që mendon të përsërisë apo të përfshihet në bashkëpunim kriminal për të tjetërsuar votën e shqiptarëve. Pa zgjidhur këtë problem, asnjë problem nuk zgjidhet në Shqipëri.
Sa kohë që qeveria e dalë nga kriminelët, me mandate të dhuruara nga krimi, ka preokupim pikërisht mbrojtjen dhe fshehjen e këtyre lidhjeve, padyshim që do të vazhdojë kjo situatë ku jemi.
Nuk mund të ketë qeverisje, nuk mund të ketë zgjidhje apo adresim të problemeve të qytetarëve, por do të kemi një qeveri që ka pushuar së qeverisuri, sepse është uzurpuar nga një organizatë kriminale siç është kthyer sot Rilindja e Edi Ramës.
Pyetje: Zoti Basha, për ta bërë këtë PD duhet të vijë në pushtet. A është gati PD për të ardhur në pushtet e për të qeverisur shqiptarët?
Basha: Padyshim që Partia Demokratike disponon të gjithë potencialin politik dhe njerëzor, vizionin dhe programin për të ju ofruar shqiptarëve, një qeveri të pastër nga krimi dhe lidhjet kriminale, të pastër nga konflikti i interest nga oligarkët që kanë zaptuar ekonominë dhe me një vizion të qartë për të kthyer jo vetëm thjeshtë konkurencën politike, por konkurencën e lirë në ekonomi që do të ofrojë një jetë më të mirë dhe mundësi për të gjithë shqiptarët.
Por, kjo kalon përmes këtij procesi. Ne duhet ta kuptojmë se Edi Rama dhe kjo e keqe, janë produkt i bashkëveprimit kriminal me krimin e organizuar. Ka ardhur me vota të vjedhura, ka ardhur me vota të manipuluara e të vjedhura nga krimi.

Gjëja e parë që shqiptarët duhet të kuptojnë është se vota është shumë e rëndësishme.
Nëqoftëse vota shitet, vjen në pushtet krimi dhe kur krimi vjen në pushtet nuk ka më vëmendje për ty, nuk ka më vëmendje për njerëzit e thjeshtë. Prandaj, për të larguar këtë të keqe dhe jo vetëm dhe jo thjesht Edi Ramën, do ta largojmë pa diskutim, detyra e opozitës është e pazëvendësueshme dhe ne po bëjmë çdo gjë që të arrijmë këtë gjë, këtë detyrë.
Mirë është që edhe media të bëjë pjesën e vet : hetimin, denoncimin, debatin, diskreditimin e këtij regjimi të uzurpuar nga një organizatë kriminale dhe të ndihmojnë vetëdijesimin e njerëzve për rëndësinë që ka vota. Ndërsa garantimi i kësaj vote, përmes dekriminalizimit të zgjedhjeve, shërbehet nga beteja jonë e përditshme, nga largimi i Xhafës, siç u shërbye nga largimi i Tahirit. Po shërbehet kështu duke vazhduar betejën tonë për arrestimin e Vangjush Dakos dhe Dakove të tjerë, për vënien para drejtësisë dhe dënimin e krimeve elektorale të Edi Ramës.
Nuk do të ketë as drejtësi, as luftë kundër krimit dhe as zhvillim ekonomik dhe shpresë për Shqipërinë, pa dënuar krimin e krimeve që është krimi elektoral.
Kjo është rruga në të cilën kemi vepruar me vendosmëri, shpeshherë të izoluar e të braktisur, sulmuar, të censuruar.
Gjykoj se sot, shumë më shumë shqiptarë i janë bashkuar kësaj beteje, që është betejë për të gjithë vendin, nuk është betejë vetëm për një parti politike, dhe shumë më shumë të tjerë po vetë ndërgjegjësohen dhe t’i bashkohen betejës për të çliruar politikën nga krimi dhe zgjedhjet nga kriminelët që është beteja për të rikthyer pushtetin tek njerëzit. Është beteja që qeveria e dalë nga vota e njerëzve, të ketë preokupim kryesor jetët e njerëzve.
Partia Demokratike siç ka qëndruar fort, do të vazhdojë të qëndrojë fort në këtë betejë me disa rezultate domethënëse deri më sot dhe të jeni të bindur se rezultatet do të vazhdojnë.