12 qershor 2018: tre ditë para debutimit në Kupën e Botës, kombëtarja spanjolle u godit nga një “tërmet” i madh. Reali i Madridit publikoi një komunikatë krejt absurde dhe të pamenduar, duke njoftuar se trajneri i Spanjës Julen Lopetegui do të merrte drejtimin e Los Blancos sapo të përfundonte Kupa e Botës në Rusi.
Habia ishte e madhe sa për stilin e Realit, që nuk tregoi maturi në publikimin e kësaj historie, ashtu edhe për faktin se Lopetegui kishte rinovuar me Spanjën deri në vitin 2020, firmë e hedhur 9 ditë para dorëheqjes së Zinedine Zidane nga stoli i Realit.
José Luis Rubiales, presidenti i Federatës Spanjolle, udhëtoi me urgjencë për në Krasnodar, deklaroi se nuk ishte informuar fare për bisedimet e trajnerit me Realin dhe se Florentino e kishte telefonuar 5 minuta para publikimit të lajmit në faqen zyrtare të Realit, pa lënë hapësira që lajmi të jepej pas Botërorit.
Vazhdimi dihet, Rubiales e pushoi nga puna në 13 qershor Lopeteguin, i cili mori rrugën për në Madrid, pas largimit mes lotësh nga kombëtarja.
106 ditë kanë kaluar që nga stërvitja e parë
Nëse gjithçka shkon sipas atyre që shkruhen në mediat spanjolle, sot pasdite Lopetegui do të pushohet nga puna. Sot drejtoi stërvitjen e paradites, të parën e drejtoi më 16 korrik, vetëm 106 ditë më parë. Një fillimsezoni i pranueshëm, me ndonjë fitore të bukur si ajo ndaj Romës, por më pas erdhi një humbje e rëndë në Sevilje dhe rënie nuk u ndal më, me humbje ndaj CSKA, Alaves, Levante e Barcelona.
Tani, 139 ditë pas largimit nga Spanja, Lopetegui paguan pasojat e një vendimi të nxituar dhe tmerrësisht të gabuar. Pa Botëror e pa Madrid, karriera e Lopeteguit merr një goditje të fortë, sepse gjithçka u menaxhua shumë keq dhe do të mbahet mend në histori si një ndër figurat më tragjike të Realit.

Ajo e Eric Swaffer, pilotit të helikopterit që transportonte pronarin miliarder të Leicester City, është një histori heroizmi.
Së bashku me të dashurën e tij, Izabela Roza Lechowicz, pilote e dytë e mjetit të rrëzuar mbrëmjen e së shtunës, pas ndeshjes kundër West Ham, Swaffer, i cili kishte kuptuar se diçka nuk shkonte me helikopterin, u përpoq me të gjitha forcat ta largonte sa më shumë atë prej turmës së njerëzve poshtë, edhe pse i ndërgjegjshëm se ky mund të ishte veprimi i fundit që do të bënte në këtë jetë.
5 ishin viktimat e tragjedisë: manjati tajlandez Vichai Srivaddhanaprabha, që e bleu klubin e futbollit për 39 milionë paundë në vitin 2010 dhe 6 vjet më vonë e çoi në fitimin e titullit në Premier League; ish-mbretëresha tajlandeze e bukurisë, Nursara Suknamai, asistenti i pronarit, Kaveporn Punpare si dhe dy pilotët.
Swaffer besohet të ketë shpëtuar shumë jetë me përpjekjet e tij për ta larguar mjetin me probleme nga tifozët në terren.
Homazhet kanë vërshuar nga të gjitha anët për të dhe për manjatin e konsideruar një bamirës që nuk do të harrohet lehtë.
“Nuk kam takuar kurrë një njeri si ti në jetën time. Ti preke zemrat e të gjithëve. E ndryshove futbollin përgjithmonë. I dhe shpresa të gjithëve se e pamundura mund të bëhet e mundur”, ka qenë mesazhi i ngushëllimit të portierit të Leicester, Kasper Schmeichel.
Ekspertët dyshojnë se shkak i fatkeqësisë është bërë mosfunksionimi i helikës së bishtit të helikopterit, çka bëri që mjeti 6 milionë paundësh AgustaWestland të dilte nga kontrolli në një mënyrë të cilën asnjë pilot, sado i mirë, nuk do ta menaxhonte dot.

Një ditë pas konfirmimit se në aksidentin tragjik që përfshiju në flakë helikopterin e pronarit të Leicester-it, duke lënë të pajetë atë dhe katër persona të tjerë, pothuajse të gjithë ekipet kanë shprehur ngushëllimet e tyre për këtë tragjedi.
Vichai Srivaddhanaprabha përshkruhej si një njeri me zemër të madhe që bëri Leicester-in të besojë. Në komunikimin prekës të klubit të Leicesterit shkruhej:
“Me keqardhje të madhe dhe me zemër të thyer konfirmojmë se presidenti ynë, Vichai Srivaddhanaprabha, ishte një ndër personat që humbi jetën tragjikisht mbrëmjen e së shtunës kur helikopteri në të cilin ndodhej ai dhe katër persona të tjerë ka marrë flakë jashtë stadiumit King Power Stadium. Asnjë nga personat në bord nuk ka mbijetuar.”
Në bord ndodhej piloti dhe e dashura e tij si zv. pilote, ata njiheshin si çifti i pilotëve që kishin udhëtuar botën në kabinë me njëri-tjetrin, z. Swaffer dhe znj. Lechowicz.
Dëshmitarët e quajtën pilotin hero pasi kishte arritur të bëjë zbritjen shumë pranë stadiumit duke mos lejuar që helikopteri të hynte në stadium e të bënte një tragjedi akoma më të madhe.
Edhe drejtori sportiv i klubit Jon Rudin ishte planifikuar që të ishte në festë në helikopter por kishte ndryshuar plane në moment të fundit.
Në bord ka qenë krahu i djathtë i pronarit të klubit Kaveporn Punpare dhe “mbretëresha bukurisë” Nursana Suknamai të cilët konsideroheshin pjesë e familjes.
Portieri i Leicesterit që ka parë shpërthimin e helikopterit ka thënë: “Nuk mund të besoj se çfarë kam parë. Nuk dukej e vërtetë,” ndërsa ka vijuar me fjalë prekëse për drejtuesin:
“Nuk kam takuar kurrë një njeri si ti, ti ndryshove futbollin. Na dhe shpresë të gjithëve që e pamundura mund të bëhet e mundur”.

Barcelona zgjohet euforike këtë të hënë vjeshte, pas një tjetër fitoreje historike kundër Real Madridit, që do të regjistrohet për shumë vite në retinën e të gjithë katalanasve. Faqet e para të mediave katalanase, sigurisht, janë një pasqyrim i asaj gjendjeje lumturie për “manitën” ndaj rivalit më të madh, Real Madridit.
“Sport” del me titullin “Al carrer” (në rrugë), duke njoftuar shkarkimin zyrtar të Lopetegui në orët e ardhshme dhe regjistrimin e një “manite historike” të re kundër të bardhëve. Artikujt dhe opinionet e kësaj gazete lavdërojnë punën kolektive të Barçës dhe menaxhimin e trajnerit Valverde.
Gjithashtu, evidentohet ndeshja e madhe e Suarez (tre gola) dhe Arturo Vidal, që vulosi rezultatin. “Mundo Deportivo”, nga ana tjetër, flet për “manita vdekjeprurëse” dhe zgjedh Gerard Pique si protagonist. Qendërmbrojtësi katalanas është në foto me dorën e tij, përsëri, duke treguar pesë gishtat si në rastin e fitores 5-0 të vitit 2010.
Duke hequr paralele me tetë vite më parë, titulli i “L’Esportiu” është “pesë pa dhjetë”, natyrisht shoqëruar me foton e Piqué, duke treguar dorën e tij për audiencën në “Camp Nou”, të dielën.