Kryetari i komisionit të Çështjeve Europiane në Bundestag, Gunther Krichbaum, ripërsëriti kërkesat e ndërkombëtarëve për qeverinë shqiptare. Para pak muaj më parë, përmes një interviste në media, Krichbaum foli për hetime ndërkombëtare për Ramën. Ndërkohë, konfirmohet zyrtarisht që arrestimet e fundit të bandës së drogës janë bërë me ndërhyrjet e ndërkombëtarëve.
Ai propozoi edhe hetime ndërkombëtare për rastet e përfolura të deputetëve shqiptarë që kanë rekorde kriminale. Të rëndësishme, sipas tij, mbeten progresi në luftën kundër korrupsionit, krimit të organizuar dhe reformimi i sistemit të drejtësisë.
Kreu i Bundestagut tha se, pa realizuar këto reforma nuk mund të kërkohet hapje e negociatave për Shqipërinë.
Intervista me Gunther Krichbaum, kryetar i Komisionit të çështjeve Europiane në Bundestag
Pyetje: Sa e vështirë është të bindeni kolegët tuaj në Bundestag për hapjen e negociatave të Shqipërisë, kur thuhet se në Parlamentin shqiptar ka 19 raste deputetësh me të dhëna kriminale?

Gunther Krichbaum: “Ne jemi në favor të zgjerimit, sepse kjo ofron më shumë stabilitet në rajon. Së shpejti, do të shqyrtojmë hapjen e kapitujve 35 dhe 32 në kuadrin e negociatave të anëtarësimit me Serbinë dhe jam optimist që kjo do të realizohet në fund të vitit. Pika tjetër e axhendës është Shqipëria. Shqipëria është një vend kandidat, por vendi duhet të realizojë reformat, pasi hapja e negociatave nuk është automatike. Qeverisë i kërkohet të bëjë progres të dukshëm në luftën kundër korrupsionit, krimit të organizuar dhe reformimin e sistemit të drejtësisë. Ne duam të shohim një sistem drejtësie të pavarur, krijimin e strukturave të besueshme dhe forcimin e shtetit ligjor. Në të gjitha këto, ne jemi shumë larg hapjes së negociatave. Qeveria shqiptare duhet të tregohet ambicioze në realizimin e reformave, që ne të konsiderojmë hapin e ardhshëm të integrimit. Ajo që përmendët në pyetjen tuaj përbën një pikë shumë të ndjeshme për ne. Në duam të shohim dekriminalizimin e Parlamentit të Shqipërisë. Prezenca e deputetëve me të dhëna kriminale në Kuvend është e papranueshme. Këto raste duhet të trajtohen nga drejtësia. Pëndryshe hapja e negociatave nuk mund dhe nuk do të ndodhë”.

Pyetje: Deputetë të Parlamenti Europian janë shprehur se lajmet që vijnë shpeshherë nga Shqipëria janë shokuese dhe se situata në Shqipëri ngjan me filmat me kauboj: Një deputet shqiptar që shtin mbi qytetarët, një tjetër që ka qenë i burgosur për drogë dhe i akuzuar për vrasje, një tjetër që godet deputetët e opozitës në Kuvend, për mos t’u ndalur te akuzat e korrupsionit. Si janë parë këto ngjarje në gjirin e Bundestagut?
Gunther Krichbaum: “Sigurisht që duket shumë e çuditshme. Kjo është e qartë. Por nga ana tjetër, është e rëndësishme të zhvillohen hetime neutrale, objektive dhe të besueshme. Në rastet kur autoritetet nuk janë në gjendje që të kryejnë hetime të tilla, atëherë lind nevoja për hetime ndërkombëtare. Ne duhet të dijmë ekzaktësisht se ç’ka ndodhur për çështje të ndryshme dhe c’është më e rëndësishmja që fajtorët të çohen para drejtësisë”.
Pyetje: Ju përmendët hetim ndërkombëtar në rastin e dekriminalizimit ? E keni fjalën për një mbështetje ndërkombëtare për të hedhur dritë mbi ngjarjet apo flisni vërtet për hetim?
Gunther Krichbaum: “Kam dyshimet e mia për rezultatet që paraqiten aktualisht nga qeveria. Nëse tregohem i drejtpërdrejtë, ato kanë ngjyrime jo bindëse. Ne nuk duam të shohim një mjegullnajë, por një tablo të qartë të rrethanave . Madje, besoj, që edhe qytetarët e Shqipërisë duhet të jenë të interesuar për të pasur një rezultat të besueshëm dhe si rrjedhim ndoshta është në interesin e vetë qeverisë për të kërkuar hetime ndërkombëtare nga institucione apo organizata ndërkombëtare që merren me verfikimin dhe vëzhgimin e proçesit”.
Pyetje: Për të marrë vendimin tuaj në Bundestag për hapjen e negociatave të anëtraësimit, ju bazoheni në raportin e Komisionit Europian. A është ky raport që përcakton vendimin tuaj, pasi shpeshherë krijohet përshtypja që shtete anëtare janë shumë më të ashpra sesa Komisioni Europian në qëndrimin e tyre?

Gunther Krichbaum: “Ne mbledhim informacionet tona, gjatë vizitave në Shqipëri, përmes kontakteve me institucionet apo organizatat joqeveritare. Raporti i Komisionit Europian është një prej raporteve të shumta mbi të cilat ne bazohemi. Ne marrim në konsideratë raportin e Bankës Botërore për klimën e biznesit në Shqipëri apo Transparency International për luftën kundër korrupsionit si dhe raportet tona. Pra, duke u bazuar në të gjitha këto, ne krijojmë një tablo të plotë për vendin, në bazë të të cilës vendosim nëse duhen hapur ose jo negociatat. Pra, raporti i Komisionit Europian nuk është i vetmi, ndonëse i rëndësishëm por sërish jo i vetmi raport i rëndësishëm. Janë parlamentet e shteteve anëtare që vendosin, nëse duhet dhënë drita jeshile apo jo për hapjen e negociatave,. Qeveria gjermane duhet të kërkojë aprovimin e Bundestagut për hapjen e negociatave me Shqipërinë. Unë aktualisht nuk mund t’i rekomandoj kolegëve të mi në komisionin e çështjeve europiane, që jep edhe orientimin e qëndrimit të Bundestagut dhe as kolegëve të mi të tjerë në Bundestag hapjen e negociatave me Shqipërinë për arsyet që përmenda. Dhe pa aprovimin e komisionit tonë nuk mund të ketë hapje negociatash. Qeveria gjermane është e detyruar të kërkojë aprovimin e Bundestagut gjerman për hapjen e negociatave.
Pyetje: Ka patur një komunikim nga autoritetet shqiptare që Gjermania ofron mundësi për punëtorët e kualifikuar shqiptarë në Gjermani? Kryeministri shqiptar para pak javësh deklaroi se ka një ofertë për 200 shqiptarë të kualifikuar që të punojnë në Gjermani.

A do të thotë kjo që ne mund të shkojmë drejt një përcaktimi të kuotave për qytetarët e kualifikuar shqiptarë, apo është një ofertë e vlefshme vetëm për një herë? 
Gunther Krichbaum: Së pari, azikërkuesit shqiptarë nuk kanë asnjë lloj perspektive që të pranohen në Gjermani. Ata refuzohen në 99,9 % të rasteve. Kjo pasi ne na duhet të krijojmë kapacitetet nevojshme për personat që vijnë nga luftrat dhe konfliktet dhe kanë të drejtë për mbrojtje ndërkombëtare siç është rasti i refugjatëve në Siri. Bombat ruse po prekin dhe civilët në Siri. Lidhur me kuotat, duhet të bëjmë të qartë, që nëse ka vende pune të lira në Gjermani për qytetarë jogjermanë, këto vende i rezervohen qytetarëve të kualifikuar të shteteve anëtare.
Shqipëria nuk është shtet anëtar. Do të duhen vite derisa Shqipëria të bëhet anëtare. Gjatë kësaj kohe është shumë e rëndësishme përgatitja e Shqipërisë për anëtraësimin, pasi kur bëhesh anëtar ka një konkurrencë shumë të madhe brenda. Shqipëria duhet të forcojë stukturat shtetërore dhe të krijojë klimën e nevojshme të biznesit dhe sigurinë ligjore për të thithur investime e huaja. Mua më duket, se ajo që i shërben interesit të Shqipërisë nuk është që të dërgojë punëtorët e saj të kualifikuar në Gjermani, por të mos lejojë rrjedhjen e trurit, duke tërhequr bizneset e huaja të vijnë në Shqipëri për të krijuar vende të reja pune.

Kryetari i opozitës, Lulzim Basha ka deklaruar sot se zgjedhjet vendore mund të jenë edhe zgjedhje të përgjithshme. Basha foli gjatë takimit me fermerët e Kosmaçit në Vaun e Dejës.
“Një test i madh po afron: vitin e ardhshëm do të kemi zgjedhjet vendore, të cilat mund të jenë fare mirë në të njëjtën kohë fare mirë edhe me zgjedhjet e përgjithshme të parakohshme, do të jenë një shans i jashtëzakonshëm që ju të ushtroni të drejtën që keni për të vendosur se çfarë qeverisje doni. Unë jam këtu për t’ju komunikuar bindjen time se gjithë problemet mund të zgjidhen nëse ushtroni me mençuri zgjedhjen e drejtuesve të duhur si në nivel lokal edhe qendror”, deklaroi Basha ndër të tjera.
“Kemi qeverinë e gabuar, qeverinë që mendon vetëm për xhepat e saj. Këtë duhet ta ndalim, këtë e keni në dorë ju. Mjafton t’i shkatërrojmë mekanizmin me të cilin kanë sunduar këto 5 vite. Ju marrin juve taksat, ju lënë në mëshirë të fatit, ju lënë me sytë se kush po vjen e kush po na sjell dhe pastaj ju lëshojnë babanët e tomdoshët e ditmirbushatët ditën e zgjedhjeve për t’jua prishur mendjen me një 50 mijë lekësh apo 20 mijë lekësh apo 100 mijë lekësh. Kjo duhet të marrë fund.
Dhe do të marrë fund. Shqiptarët janë vetëndërgjegjësuar. Unë e shoh këtë kudo. Dhe ju do të keni prapë mundësinë të zgjidhni qeverinë që doni dhe ta mbani përgjegjëse për premtimet. Jo të rrini kështu, sa herë të ketë fushata të vijnë e të bëjnë gallata e të zhduken”, theksoi kreu i opozitës në takim.
“Jemi futur në një rreth vicioz. E blejnë pushtetin me lekë dhe e përdorin për të vjedhur më shumë. Në këtë rreth vicioz janë një grup pushtetarësh që përfitojnë, por humb i gjithë populli. Në asnjë vend nuk janë braktisur fermerët si në Shqipëri, ka qeveria e Edi Ramës, as Kosova, sheti më i ri, as Bosnja se Maqedonia jo e jo”, u shpreh me tej Basha në takimin me fermerët.

Basha në bashkëbisedimin që ka nisur me fermerët e fshatit Kosmaç vërejti se problemet aty ishin thuajse të ngjashme si në Myzeqe vetëm për shkak të mungesës së vëmendjes shtetërore.
“Këtu vij për herë të parë, tha Basha, por paska disa ngjashmëri me Myzeqenë, e kam vizituar disa herë. Kushtet klimaterike janë të favorshme, tereni është i favorshë, kultura e punës është e mirë, prodhimi i bollshëm. Por ka dy probleme, problemi i parë që nuk ka asnjë lloj mbështetje financiare nga shteti dhe problemi i dytë, aksesi në treg jo vetëm nuk ndihmohet, por pengohet nga shteti dhe mungesa e vëmendjes shtetërore”, u shpreh Basha.
Një specialist i bujqësisë me përvojë i tha Bashës se, e kemi pritur tre herë kryeministrin këtu në Kosmaç dhe na ka premtuar, por nuk ka bërë asgjë nga ato që tha. Pas tij kanë ardhur edhe deputeti i zonës, edhe ministri i Bujqësisë, por asnjë zgjidhje nuk ka ardhur prej tyre. Ndaj për çdo gjë janë detyruar t’i drejtohen kryetarit të bashkisë që u ka afruar tre mjete për ndihmë dhe çdo gjë tjetër të nevojshme për të zgjidhur problemet.

Operacioni i kapjes së një organizate të dyshuar për trafikun e drogës me qendër në Shijak duket se është kryer me kërkesë dhe nën trysninë direkte të qeverisë gjermane.
Të gjithë personat e arrestuar duket se janë pjesë e një organizate të drejtuar nga anëtarët e familjes Avdyli në Shijak, që kryente trafik droge mes Shqipërisë dhe Gjermanisë.
Duket se edhe ngarkesa prej 613 kilogramë kokainë e kapur nga policia në shkurt 2018, pasi kishte hyrë në Portin e Durrësit nga Kolumbia, me pritës Arbër Çekajn, ka qenë pjesë e aktivitetit të të njejtit grup.
Arben Çekaj u largua duke u fshehur në Gjermani ku u kap nga policia vendase, e cila refuzoi ekstradimin e tij për shkak të një hetimi në Gjermani.
Burime të besueshme të prokurorisë pohuan për Exit.al se Çekaj ka vendosur të bashkëpunojë me drejtësinë gjermane dhe ka nxjerrë detaje dhe emra të personave të përfshirë në trafikun e heroinës dhe kokainës drejt Gjermanisë.
Pas këtij informacioni, qeveria gjermane ka ushtruar trysni ndaj qeverisë shqiptare për arrestimin e personave të këtij grupi kriminal—katër nga drejtuesit më të lartë të policisë, hetuesisë dhe qeverisë gjermane kryen vizita blic në Tiranë në fillim të tetorit për të detyruar qeverinë shqiptare të godiste një nga organizatat kryesore që realizonte trafikun e drogës nga Shqipëria në Gjermani.
Kjo trysni çoi në dy operacionet e fundit të policisë shqiptare për zbulimin dhe asgjesimin e laboratorit të heroinës në Has dhe goditjes së organizatës Avdyli në Shijak.
Për t’i dhënë operacionit ngjyrat e një goditje frontale ndaj krimit nga policia shqiptare duket se në të është përfshirë edhe një operacion fasadë për arrestimin e Klement Balilit, i palidhur me organizatën Avdulaj.

Por një fakt tjetër i rëndësishëm po mbahet sekret. Organizita Avdyli është grupi kriminal për të cilin Prokuroria e Krimeve të Rënda ka një hetim në ngarkim të kryebashkiakut të Durrësit Vangjush Dako. Edhe pse nuk është bërë asnjëherë publike zyrtarisht nga prokuroria, prokuria ka përgjime të bisedave të Dakos me Avdylajt për blerje dhe sigurim votash në shkëmbim të kontratave për punë publike të Bashkisë Durrës.
Ky fakt u denoncua në publik nga Partia Demokratike para një viti. Vangjush Dako paditi në gjykatë PD-në për shpifje, por gjykata vendosi në maj 2018 kundër Dakos, pasi duket se siguroi të dhëna për ekzistencën e hetimit.
Duket se kërkesa gjermane ka qenë shpëtim për Prokurorinë e Krimeve të Rënda, pasi ajo ka gjetur një rrugëdalje që të arrestojë Avdylajt pa prekur Dakon dhe për të varrosur kështu hetimin mbi Dakon. Gjithsesi, kjo mbetet për t’u parë në javët e ardhshme.
Më poshtë është kronologjia e ngjarjeve që çuan në arrrestimin e antërave të grupit Avdyli, përfshi trysninë gjermane për këtë operacion.
4 Maj 2018 — Arbër Çekaj u arrestua në Duseldorf të Gjermanisë.
Gusht 2018 — Gjermania bllokon ekstradimin në Shqipëri të Arbër Çekajt, duke informuar palën shqiptare se ai ishte nën hetim për trafik droge mes Shqipërisë dhe Gjermanisë.
Shtator 2018 — Arbër Çekaj pranon të bashkëpunojë me policinë gjermane për të hetuar grupet kriminale që trafikojnë drogën drejt Gjermanisë përmes Shqipërisë.
3 tetor 2018 — Sekretari i Shtetit në Ministrinë e Brendshme Federale të Gjermanisë Stephan Mayer vizitoi Tiranën dhe takoi Ministrin e Brendshëm Fatmir Xhafaj. Tema kryesore e bisedimeve ishte shkëmbimi i informacioneve për të luftuar bandat e krimit të organizuar që vepronin në Shqipëri dhe Gjermani.

8-11 Tetor 2018 — Zëvendës Presidenti i Zyrës Federale të Krimit (BKA), Peter Henzler dhe drejtuesit të lartë të policisë kriminale të Gjermanisë zhvilluan një vizitë pune në Shqipëri. Ata takua Ministrin Xhafaj dhe drejtuesit më të lartë të policisë dhe prokurorisë shqiptare dhe nënshkruan fillimin e një projekti bashkëpunimi për hetimet e përbashkëta të titulluar ORCA. Në konferencën e shtypit me Zv. Drejtorin Henzler, Ministri Xhafaj konfirmoi hetimet e përbashkëta gjermano-shqiptare në lidhje me trafikun e drogës ku përfshihet edhe Arbër Çekaj:
“Ka një ndryshim në këtë gjë, nuk është çështje ekstradimi më, por është çështje hetimi të përbashkët.
…Kemi disa operacione të suksesshme të realizuara gjatë këtij viti dhe kemi disa hetime të përbashkëta në proces, të cilat janë diskutuar midis përfaqësuesve të Policisë Kriminale gjermane dhe Policisë shqiptare dhe janë të nivelit operacional.”
17 tetor 2018 —Drejtori i Përgjithshëm i Policisë gjermane, Dieter Romann vizitoi Tiranën dhe takoi Ministrin e Brendshëm Fatmir Xhafaj. Në konferencën e përbashkët për shtyp, Romann dhe Xhafaj njoftuan se mes dy vendeve do të ketë bashkëpunim të ngushtë dhe shkëmbim informacionesh për të luftuar krimin e organizuar. Gjatë së njejtës konference për shtyp, Ministri Xhafaj njoftoi se në ditët në vazhdim, policia e shtetit do të bënte arrestime të rëndësishme.
19 tetor 2018 — Policia e Hasit zbuloi një laborator të përpunimit të heroinës dhe kokaine në Has. Policia sekuestroi 182,5 kilogramë morfinë dhe 22 litra lëndë të lëngshme që përdoreshin për prodhimin e heroinës. Gjatë operacionit policia arrestoi të paktën 10 persona, por emrat e tyre nuk u bënë publikë.
21 tetor 2018 — Në një operacion në Durrës e Shijak, policia arrestoi pesë anëtarë të familjes Avdyli, me në krye Flamur Avdylin, Gjevi Ndokën dhe 14 persona të tjerë si pjesë e një grupi të strukturuar që prodhonin dhe trafikonin heroinën dhe kokainën e prodhuar në laboratorin e Hasit.

Gjevi Ndoka, i njohur me pseudonimin “Xhevi” është vëllai i ish-deputetit Arben Ndoka, i cili po ashtu u arrestua dje. Deri më tani policia ka raportuar se ish-deputeti Ndoka është arrestuar për “tjetërsim pronash” përmes falsifikimit të dokumenteve dhe nuk ka lidhje me trafikun e drogës.
Policia arrestoi, gjithashtu, ish-deputetin e PS dhe ish-drejtorin e Përgjithshëm të Burgjeve Arben Çuko. Sipas gazetares Klodiana Lala, Çuko u zbulua, se merrte rryshfete nga të dënuarit në këmbim të lejes, nga përgjimet e anëtarëve të bandës Avdylaj. Po sipas Lalës, Arben Çuko dhe Arben Ndoka janë kapur në përgjimet e të njëjtës bandë, megjithëse zyrtarisht Ndoka akuzohet për “tjetërsim pronash”.
Po më 21 tetor 2018, policia e Durrësit ndërmori një operacion në Durrës për të arrestuar Lulzim Berishën, të liruar nga burgu në dhjetor 2016. Urdhërarresti për Berishën ishte lëshuar nga prokuroria si pjesë e bandës së Avduljave. Sërish Lala pretendon se Berisha kishte marrë përsipër trafikimin e drogës nga Hasi, përmes portit të Durrësit drejt Gjermanisë, ku ndodhet edhe biznesmeni i arrestuar për 613 kilogramë kokainë Arbër Çekaj.
22 tetor 2018 — Në një konferencë të përbashkët shtypi prokurori–polici, Shefja e Prokurorisë së Krimeve të Rënda Donika Prela pohoi se ish-deputeti Ndoka akuzohet për tjetërsim pronash. Por ajo fshehu faktin se vëllai i tij u arrestua në të njejtën ditë arrestuar si pjesë e bandës Avdulaj.
Po më 22 tetor 2018, policia la të lirë Flamur Avdylin, pa dhënë arsye se pse. Flamur Avdyli njihet si pronari i disa bizneseve në Durrës dhe Shijak, mes të tjerash dhe një hotel luksoz me emrin “Germany” në Durrës.