Drejtuesit e Bashkimit Europian (BE) dhe krerët e disa shteteve të rëndësishme të kontinentit e pritën me buzëqeshje gjetjen e kryeministrit Edi Rama, i cili i priti në Tiranë me një shfaqje animacioni, ku figurat kryesore politike Unionit ishin shformuan në fëmijë, me anën e Inteligjencës Artificiale.

Po ashtu, drejtuesit e lartë ndërkombëtarë, të cilët gjenden në Shqipëri këtë fundjavë, në kuadër të Samitit të Komunitetit Politik Europian, u rreshtuan për të vënë firmën në një flamur të shformuar të BE-së, me siguri, pa e ditur se ai ishte simbol i Partisë Socialiste së Ramës në zgjedhjet e shumë-kontestuara parlamentare, të zhvilluara vetëm pak ditë më parë, në 11 Maj 2025.

Shoë, sa ekzotik, aq edhe anadollak i kryeministrit shqiptar, nisi paraditen e së Premtes, ku ai iu ul në gjunjë homologes së tij italiane, Xhorxhia Meloni. Dhe, natyrisht, nuk mungonin as atletet, të cilat Rama nuk i harron thuajse asnjëherë në evente të rëndësishme ndërkombëtare.

Natyrisht, ky spektakël i tepruar tërhoqi kureshtjen e xhaketave të zymta të Brukselit, NATO-s, Londrës e Parisit. Të mbledhur në kryeqytetin shqiptar për një takim me shumë rëndësi, ku diskutohej për Sigurinë e Europës dhe mënyrat e reja për të përballuar konfliktin vrastar mes Rusisë dhe Ukrainës, pak humor dhe adrenalinë me ngjyra nuk dukej aspak keq për ta.

Të mësuar në ftohtësinë e Brukselit apo të zyrave të tyre, ata, me shumë mundësi, as nuk e çojnë ndërmend të kryejnë shpenzime të tepruara për Samite zyrtare. Jo se nuk i dëshirojnë këto evente, por disiplina e rreptë financiare, si edhe institucionet e organizatat që monitorojnë përdorimin e fondeve publike, nuk i lejon që të ndërmarrin kapriçio të tilla.

Ndaj, titullarët e Bashkimit Europian dhe shteteve kryesore të kontinentit ndihen mirë, kur një vend si Shqipëria, me një drejtues si Rama, i cili nuk e ka aspak problem që të shpenzojë miliona euro për drita dhe shkëlqim.

Nën parimin se “po të duan të mos më votojnë”, me kartën e fitores së kundërshtuar të zgjedhjeve të fundit parlamentare, me institucione kontrolluese dhe të drejtësisë në një situatë që është më e pakta t’u thuhet anemike, kryeministri Edi Rama është i gatshëm të shpenzojë fondet publike, vetëm për të plotësuar për një ditë të vetme ndjenjat e tij narciste.

Kllounada me faturë milionëshë

E gjithë kllounada e kreut të qeverisë shqiptare, kushtoi, jo pak, por pesë milionë euro më e pakta. Në një vend, ku pensioni mesatar është 100 euro, fatura për të bërë të buzëqeshur liderët europianë në Tiranë është një “masakër” financiare, por edhe sociale e ekonomike.

Në 4 Prill 2025, Këshilli i Ministrave, nën drejtimin e zëvendëses së Ramës, Belinda Balluku, miratoi vendimin për një shtesë fondi në llogaritë e disa institucioneve. Fondi ishte rreth 4.6 miliardë lekë të vjetra ose rreth 4.5 milionë euro.

Qëllimi: Shpenzime për organizimin e punimeve të Samitit të Komunitetit Politik Europian (EPC) në datën 16 Maj 2025.

Pjesa më e madhe e fondit, rreth 3.5 milionë euro, kaluan në llogarinë e Drejtorisë së Shërbimeve Qeveritare. Pjesa tjetër, rreth 1 milionë euro, në llogaritë e Ministrisë së Brendshme, për t’u shpërndarë në mënyrë thuajse të barabartë mes Gardës së Republikës e Ministrisë së Brendshme, të dyja struktura që do të angazhoheshin për sigurinë e Samitit.

Pas marrjes së këtij fondit, Drejtoria e Shërbimeve Qeveritare ka shpallur plot 25 procedura prokurimi, natyrisht, në kushtet e urgjencës, të gjitha janë “me negocim”, pra me përzgjedhjen e kompanive nga vetë institucioni publik.

Shpenzimet e Drejtorisë së Shërbimeve Qeveritare, rreth 3.5 milionë euro, janë të gjitha objekte dhe shërbime, të cilat nuk janë dhe nuk mund të kthehen në asete të qëndrueshme.

Krahas faturës së çmendur 2.3 milionë euro për blerje kontenierësh,  shpenzimi i radhës me vlerë më të lart, rreth 80 milionë lekë të vjetra, është për banera një-përdorimësh, të cilët, në përfundim të Samitit, do të përfundojnë në landfillin e tejmbushur të Sharrës.

Një pjesë e rëndësishme e fondit shkoi për makina me qera, mbi 70 milionë lekë të reja. Ndërsa, numri më i madh i procedurave tenderuese ishte për blerje shërbimi për video, audio, foni dhe, nuk kishte si të mungonte, seti i fotografive.

Dhuratat ceremoniale për titullarët e Bashkimit Europian dhe vendeve të ndryshme të kontinentit shkojnë mbi 30 milionë lekë të vjetra ose rreth 30 mijë euro.

Shërbimet e ndriçimit dhe ekranet LED, në të cilët u shfaqën “bebi-liderët” kanë një faturë më së paku 100 mijë euro.

Këto janë vetëm pjesa më e dukshme e shpenzimeve publike për Samitin Europian, i cili, sipas axhendës, nuk ka asnjë lloj lidhjeje me ndonjë interes të Shqipërisë ose, më së paku, të Ballkanit Perëndimor./Boldnews

Ish-kandidati i partisë ‘Koalicioni Euroatlantik’, Shemsi Prençi, është shprehur se kryedemokrati Sali Berisha nuk bëri përpjekjet e duhura për të futur në të njëjtin koalicion partitë e tjera të opozitës, që sipas tij, morën 220 mijë vota.

Komentet Prençi i bëri në ‘Ditari i Pasdites’ me gazetaren Bruna Çifligu në A2 CNN, ku tha se Berisha harxhoi më shumë energji për të futur brenda koalicionit ‘Aleanca për Shqipërinë Madhështore’ parti që nuk kishin vota, sesa subjektet politike që kishin më shumë mbështetje qytetare.

Ai tha gjithashtu se nëse të gjitha partitë opozitare do të bashkoheshin në një front të vetëm, do të krijohej një frymë e cila sipas Prençit, do të sillte të paktën 100 mijë vota shtesë për opozitën dhe do të parandalonte fenomenet e tjetërsimit të votës, shkruan A2 CNN.

“Lidershipi i opozitës më shumë energji harxhoi për të marrë në koalicion parti inekzistente që nuk kanë marrë asnjë votë, që s’kanë patur as kandidatë brenda koalicionit. Partitë që kanë patur kandidatë, si Partia e Lirisë, Partia e Re Demokratike e drejtuar nga Sali Shehu, ka marrë 1400 vota.

Pra të konsumosh energji për të marrë një parti me 1400 vota dhe të mos konsumosh energji për të futur brenda koalicionit 220 mijë vota, që janë gjithsej 7 parti politike të opozitës, kjo nuk është largpamësi e një lideri që synon rotacionin politik. Do ishte krijuar edhe fryma, do të ishin edhe mbi 750 mijë vota. Berisha ka deklaruar në media që Lapaj, Agron Shehaj, Lulzim Basha, janë paterica të Partisë Socialiste.

Nëse do vijojmë t’i bëjmë qejfin Sali Berishës, ne e kemi groposur demokracinë. Nëse do vijojmë të jemi kriticienë racionalë për fenomenet që kanë ndodhur në zgjedhje, ne i bëjmë mirë PD-së, demokracisë, por edhe vetë Berishës. Fryma e një opozite të bashkuar lëviz të paktën 100 mijë vota në Shqipëri. Pastaj kjo frymë parandalon edhe fenomenet e tjetërsimit të votës”, tha Prençi, shkruan A2 CNN.

Dalin në dritë të tjera detaje se si krimi ka përfituar nga qeveria. Ndonëse Babloku pretendon se nuk ka mafie dhe Shqipëria nuk është narkoshtet, faktet po dalin përditë sheshit.

Dje, Policia, SPAK dhe Antimafia italiane zhvilluan një aksion të bujshëm në Durrës, ku u godit grupi i Troplinëve. Një ndër emrat e shënjestruar më të rëndësishëm është Elvis Doçi, i njohur si Visi i Pojës. Ai është nipi i Xhevdet Troplinit, i cili thuhet se ka udhëhequr deri vonë organizatën. Por tani e kanë marrë në dorë nipërit e tij, Elvis Doçi dhe Fatmir Troplini.

Dje, SPAK sekuestroi disa kompani, hotele e bare në emër të Elvis Doçit dhe anëtarëve të tjerë të bandës. Por e vetmja kompani që nuk u vu nën sekuestro është “Eldemar Construction”.

Dje denoncuam se si kjo kompani kishte marrë leje ndërtimi për të ndërtuar hotel në Durrës. Mirëpo ajo nuk ka qenë leja e vetme. Rezulton se Rama, pak muaj para zgjedhjeve, ka dhënë leje ndërtimi për resort te Shkëmbi i Kavajës.

“Eldemar Construction” ka krijuar kompaninë “Rock Of Kavaja” dhe e ka autorizuar të aplikojë për leje zhvillimore te Shkëmbi i Kavajës. Në shtator të vitit 2024, asaj i është miratuar leja.

“Rock Of Kavaja” ka lidhur më pas marrëveshje me “Accor” për të sjellë në Shqipëri rrjetin e famshëm të hoteleve “Pullman”.

Projekti i resortit

“Leje Zhvillimi për objektin: ‘Hotel 10 dhe 11 kate mbitokë me 3 kate shërbimi nëntokë’, me vendndodhje Shkëmbi i Kavajës, Bashkia Durrës, me subjekt zhvillues shoqërinë ‘Rock of Kavaja’ sh.p.k.”, thuhet në vendimin e Këshillit Kombëtar të Territorit.

Por jo vetëm kaq, kompania “Eldemar Construction” rezulton se është pjesë e kompanive që janë futur te procesi i rindërtimit dhe kanë përfituar lehtësira dhe fonde nga shteti.

Vetë kompania pranon se është përjashtuar nga TVSH, pasi ka kontribut në procesin e rindërtimit. Të gjithë e dimë masakrën që u bë me rindërtimin, pasi të gjitha bizneset që u përfshinë kanë mbushur xhepat. Elementi tjetër është se gjatë qeverisë së Ramës, rezulton se “Eldemar Construction” ka pasur fitime kolosale. /Pamfleti

Gjatë ditëve të fushatës elektorale, shumë media transmetuan pambarimisht një spot elektoral për kandidatin socialist të Sarandës, Vasil Llajo. Në këtë spot, zoti Llajo përshkruhej si bir i Sarandës, që kishte ardhur me mision në politikë për të ndihmuar njerëzit. Paralelisht me spotet ai u shfaq shpesh në shumë emisione prime time.

Cdo kandidat është në të drejtën e tij të bëjë fushatë. Por problemi është se PR i zotit Llajo financohet edhe me paratë e buxhetit, për pacientët që dergjen në spitalet publike të vendit.

Një ditë pasi ishin numëruar votat dhe Vasil Llajo ishte shpallur fitues nga lista e hapur në qarkun e Vlorës, në llogarinë e kompanisë së tij, Layo, mbërritën 154 mijë euro. Dërguesi i parave ishte buxheti i shtetit, përmes Spitalit Universitar të Traumës.

Ky ishte vetëm kësti i radhës, që qeveria derdh në llogaritë e kompanisë së deputetit të saj.

Layo sh.p.k është pjesë e një grushti kompanish, të cilat kontrollojnë tregun e pajisjeve spitalore në Shqipëri, veçanërisht atë që lidhet me protezat ortopedike.

Sipas të dhënave nga thesari i shtetit, në pesë vitet e fundit, Layo ka marrë gati 3.5 milionë euro pagesa nga paratë e qytetarëve për furnizimin e spitaleve me proteza. Por Layo është vetëm njëra nga kompanitë, përmes të cilave zoti Llajo merr bekime nga buxheti. Kompania tjetër është Sëissmed.

Edhe kjo kompani, e cila furnizon pajisje mjekësore, ka marrë gati 2 milionë euro të tjera nga autoritetet publike kontraktore. Muajt e shkuar opozitë kërkoi me ngulm djegien e mandatit të deputetit tjetër socialist Vullnet Sinaj. Kjo pasi disa institucione kishin blerë 35 mijë euro produkte në rrjetin e tij të marketeve.

Vasil Llajo, ende nuk është bërë deputet zyrtarisht. Por 35 mijë euro ai i thith në javë nga buxheti i shtetit. Në finale, Vasil Llajo nuk është përjashtimi, por rregulli.

Kjo është një maxhorancë që ka qenë gjithmonë e zhytur thellë në konfliktin e interesit. Deri në pikën që një pjesë e madhe e deputetëve të saj, ishin aksioner drejtëpërdrejtë në kompani që merrnin miliarda nga fondet publike. Pjerin Ndreu, Sadri Abazi, Safet Gjici e shumë të tjerë ishin të mandatuarit me duart në thesin e parave publike.

Paralelisht me këta, kjo maxhorancë ka prodhuar edhe ministra me kompani familjare, që merrnin asete publike apo dhe status të veçantë. Dhe në fund, ishin dhe aksionerët e fshehtë të skemave 5D.

Nëse ka një moçal, në politikën shqiptare ai është ky. Zotit Llajo thjesht i ka rënë barra ose fati i madh të jetë pjesë e tij. Me mision për t’u shërbyer njerëzve. Por edhe për të futur ngapak duart tek paratë e qytetarëve./Kapitali.al

Prokuroria e Posaçme (SPAK) ka sekuestruar një pronë të kryebashkiakut të arrestuar Erion Veliaj dhe bashkëshortes së tij Ajola Xoxa, e cila ndodhet me masë sigurie “detyrim paraqitje”.

Prona e sekuestruar ndodhet në zonën e Kodrës së Diellit në Tiranë. Organi i akuzës bën me dije se “ekzistojnë të dhëna konkrete që të çojnë në dyshimin e arsyeshëm se shtetasit nën hetim Erion Veliaj dhe Ajola Xoxa kanë konsumuar edhe elementët e veprës penale të “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim.”

Sipas SPAK, nga të dhënat konkrete të mbledhura deri në këtë fazë të hetimit paraprak, ekziston dyshimi i arsyeshëm i bazuar në prova se Veliaj dhe Xoxa kanë interesa pasurore faktike mbi dy pasuri (njëra prej të cilave shtesë pasurie), të cilat janë fqinje me apartamentin që ndodhet në Selitë, (rezidenca Kodra e Diellit), ku aktualisht këta shtetas jetojnë.

NJOFTIMI I SPAK:

Prokuroria e Posaçme kundër Korrupsionit dhe Krimit të Organizuar ka regjistruar procedimin penal Nr. 27 të vitit 2024, që bën fjalë për veprat penale të “Korrupsioni pasiv i funksionarëve të lartë shtetërorë ose i të zgjedhurve vendorë”, “Korrupsioni aktiv i funksionarëve të lartë shtetërore ose të zgjedhurve vendorë”, “Pastrimi i produkteve të veprës penale ose veprimtarisë kriminale”, “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, “Deklaratat e rreme përpara oficerit të policisë gjyqësore” dhe “Veprime që pengojnë zbulimin e së vërtetës”, parashikuar nga neni 260, 245, 287/2, 257/a/2, 305/b e 301 i Kodit Penal.

Pas kryerjes së veprimeve hetimore në kuadër të këtij procedimi penal, Prokuroria e Posaçme ka arritur në konkluzionin se ekzistojnë të dhëna konkrete që të çojnë në dyshimin e arsyeshëm se shtetasit nën hetim E. V. dhe A. X. kanë konsumuar edhe elementët e veprës penale të “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, parashikuar nga neni 257/a/2 i Kodit Penal. Për këtë shkak, më datë 20.05.2025 emrat e këtyre shtetasve janë regjistruar në regjistrin e njoftimit të veprave penale, duke i atribuuar veprën penale cituar më lart.

Në vijim, me kërkesën e Prokurorisë së Posaçme të datës 20.05.2025, Gjykata e Posaçme e Shkallës së Parë për Korrupsionin dhe Krimin e Organizuar me vendimin Nr. 342 Akti datë 22.05.2025 ka vendosur:

1. Caktimin e masës së sigurimit pasuror “sekuestro preventive”, mbi pasurinë e paluajtshme:
Pasuria nr. dhe shtesë me numër pasurie, ‏regjistruar në ASHK në emër të subjektit tregtar “A. K.” shpk;

Nga të dhënat konkrete të mbledhura deri në këtë fazë të hetimit paraprak, ekziston dyshimi i arsyeshëm i bazuar në prova se shtetasit nën hetim E. V. dhe A. X. kanë interesa pasurore faktike mbi dy pasuri (njëra prej të cilave shtesë pasurie), të cilat janë fqinje me apartamentin që ndodhet në Selitë, (rezidenca Kodra e Diellit), ku aktualisht këta shtetas jetojnë.

Sqarim: Çdo person prezumohet i pafajshëm derisa nuk vërtetohet fajësia e tij me vendim gjyqësor të formës së prerë.