Moisi Habilaj, personi i arrestuar sot në Itali, është një nga tre vëllezërit Habilaj, të cilët u bënë të njohur për publikun për shkak të akuzave publike ndaj tyre për trafik droge në drejtim të Greqisë dhe Italisë.
Fillimisht, akuzat ndaj vëllezërve Habilaj u bënë nga Dritan Zagani, ish-punonjës i shërbimit anti-drogë në Policinë e Fierit dhe më parë punonjës i Policisë Kufitarë në Vlorë. Zagani ishte informuar dhe si rrjedhojë, kishte kryer hetime ndaj vëllezërve Habilaj për përfshirjen e tyre në trafik droge. Për të kryer këto hetime duket se, Zagani ndau dhe kërkoi informacion nga oficerë të misionit të Gurdia di Finanza në Shqipëri. Të gjitha faktet e mbledhura, ai ia kaloi eprorëve të tij.
Në mënyrë të pashpjeguar, në vend që faktet e grumbulluara prej tij të referoheshin në Prokurori nga Policia e Fierit dhe e Vlorës, Dritan Zagani u akuzua nga Policia për dekonspirimin e aksioneve të saj, duke pretenduar ndër të tjera se, shkëmbimet e informacionit me oficerët e Guardia di Finanza ishin bërë në shkelje të ligjit.
Për këtë arsye, ai u arrestua nga Prokuroria dhe u la në arrest shtëpie nga Gjykata në pritje të mbylljes së hetimeve ndaj tij.
Zagani theu arrestin shtëpiak dhe u arratis nga Shqipëria. Ai kërkoi strehim politik, i cili iu dha nga autoritetet zvicerane.
Pas largimit nga Shqipëria, Zagani deklaroi se akuzat dhe arrestimi ishin hakmarrje ndaj tij nga ministri Saimir Tahiri, për shkak se ai kishte hetuar tre vëllezërit Habilaj. Sipas Zaganit, Habilajt ishin kushërinj të Sajmir Tahirit dhe kishin mbrojtjen e tij për trafikimin e pangacmuar të drogës. Zagani akuzoi se, Tahiri kishte vënë në dispozicion të tyre makinën e tij vetiake, makinë tip “Audi” me targë AA 003 GB, me të cilën Habilajt kryenin trafikun e drogës drejt Greqisë, duke qenë se policët kufitarë nuk guxonin të kontrollonin makinën personale të ministrit të tyre.
Saimir Tahiri u përgjigj se, ai nuk kishte asnjë lloj lidhje me vëllezërit Habilaj dhe makinën ua kishte shitur atyre, mbasi ishte bërë ministër dhe nuk i njihte dhe nuk kishte asnjë lidhje me ta.
Pas kësaj deklarate, në media u publikuan të dhëna që tregonin se makina “Audi” AA 003 GB që përdornin vëllezërit Habilaj ishte në fakt e regjistruar në emër të ministrit Tahiri.
Përballë këtyre dëshmive, ministri Tahiri u detyrua të pranonte se makina ishte ligjërisht ende në pronësi të tij dhe e regjistruar zyrtarisht në emër të tij. Këtë gjë, ai e shpejgoi duke thënë se: Tahiri nuk e kishte deklaruar ligjërisht shitjen-dhe për pasojë nuk kishte kaluar letrat në emër të Habiljave-sepse nuk donte që të ardhurat nga shitja t’i sekuestroheshin nga Përmbarimi gjyqësor, pasi me vendim gjykate ai duhet t’u paguante dëmshpërblim për shpifje ndaj fëmijëve të ish-Kryeministrit Berisha, të cilin nuk donte ta paguante, duke deklaruar se nuk kishte para.
Ky deklarim ishte pranim i shkeljes së ligjit dhe evazionit fiskal nga ministri Tahiri, por kjo gjë nuk u hetua nga askush.
Pas disa ditësh, në media doli një e vërtetë tjetër: Ministri Tahiri kishte udhëtuar të paktën dy herë në Greqi me makinë “Audi” AA 003 GB muaj, pasi ai kishte deklaruar që e kishte shitur makinën tek Habilajt.
Këtë fakt të ri, Tahiri e shpjegoi me justifikimin se udhëtimet e tij në Greqi ishin private dhe duke mos dashur të përdorte makinën zyrtare për qëllime private, u kishte kërkuar Habiljave t’ja linin makinën për këto udhëtime. Kjo deklaratë e re e tij hodhi poshtë deklaratën e mëparshme, se ai nuk kishte lidhje me Habilajt, përtej faktit që u kishte shitur atyre një makinë.
Nën trysninë e këtyre fakteve publike dhe akuzave të vazhdueshme të opozitës, Prokuroria e Fierit nisi hetimin në lidhje me kushërinjtë Habilaj dhe përdorimin e makinës së tyre për trafik droge. Por hetimi u pushua pas pak muajsh me arsyetimin se nuk u gjetën prova për akuzat kundër tyre.
Pas këtij vendimi, ministri Tahiri përshëndeti ndërprerjen e hetimeve ndaj kushërinjve të tij me një mesazh në faqen e tij në Facebook:
“Tani që Prokuroria vërtetoi gënjeshtrat e policit në arrati, Shqup-it i humbi edhe llumi i rrenave. Ky është nga ato rastet kur gënjeshtra të përplaset në fytyrë, e shqupistave u është nxirë faqja tashmë. Politika që ndërtohet mbi të vërteta, ka vlerë gjithmonë. Gënjeshtra është grykëse, nuk ngop kurrë. Kjo vlen dhe për shqupistat”.
Arrestimi i njërit prej vëllezrve Habilaj si pjesë e një grupi kriminal të trafikimit të drogës hedh dritë të re mbi akuzat e vjetra për aktivitetin e dyshuar kriminal të vëllezërve Habilaj dhe lidhjet e dyshuara të ministrit Tahiri me ta dhe aktivitetin e tyre.
Nga aksioni i policisë italiane, sot është bërë i ditur edhe një fakt interesant, që në pamje të parë duket se mund të konfirmojë një akuzë të hershme ndaj grupit të Habiljave. Policia italiane pohoi se, grupi i arrestuar në Itali, ku bën pjesë Moisi Habilaj, ka dërguar në maj të vitit 2015 një sasi prej 800 kg marijuanë nga Shqipëria, sasi e cila u sekuestrua nga policia italiane në atë kohë.
Në të njëjtën periudhë, në maj 2015, deputeti demokrat Enkelejd Alibeaj akuzoi vëllezërit Habilaj se kishin vjedhur nga Komisariati i Vlorës një furgon me 800 kilogramë kanabis sativa të sekuestruar, dhe ministrin Tahiri që kishte krijuar lehtësira për mundësimin e kësaj vjedhjeje.
Ministri Tahiri e hodhi poshtë akuzën e opozitës dhe policia, si në të gjitha rastet e tjera kur janë akuzuar vëllezërit Habilaj, nuk ndërrmori asnjë veprim.
Arrestimi i Moisi Habilajt në Itali ndoshta do të shërbejë për fillimin e zbardhjes jo vetëm të aktivitetit të dyshuar kriminal të vëllezërve Habilaj, por edhe të pozicionit të ish-ministrit Tahiri në lidhje me ta. Dyshimet ndaj tij nuk u zhdukën asnjëherë dhe ndoshta ato do të sqarohen përfundimisht.

“MeridioNews”

Në brigjet e Ballkanit, në kohën e ngarkimit të drogës, organizata e drejtuar nga Moisi Habilaj, kushëri i ish-ministrit shqiptar, ka pasur bashkëpunimin e policisë. Ndërsa destinacionet e plazheve zgjidheshin pas inspektimeve të kujdesshme, duke përfshirë Riposto, Acireale dhe Sirakuze.
“A e pe furgonin e policisë që kaloi?”. “Atë me dritat e bardha? A është i yni?”. “Të gjithë janë tanët këtu!”. Është nata e 6 majit të vitit 2015 dhe përballë bregdetit shqiptar, në brigjet e Porto Palermos, anija e peshkimit “Fatima” është gati për të ngarkuar një ngarkesë të rëndësishme me marijuanë që do të transportohet në Siçili. Në bord është Moisi Habilaj, kushëri i ish-ministrit të Brendshëm shqiptar që konsiderohet nga hetuesit italianë kreu i grupit kriminal që organizonte trafikun e drogës, përpiqet të qetësojë Rosario Giuliano, pronari i varkës që është nisur nga Riposto për të marrë 880 kilogramë drogë. Habilaj hip tek “Fatima” dhe jep urdhra, me saktësi dhe qetësi. Një qetësi që, duke iu referuar përgjimeve të bëra nga Guardia di Financa siçiliane, lind nga vetëdija se policët shqiptarë, të cilët duhet të kontrollojnë janë bashkëpunëtorët e tij. Burri, në veçanti, paralajmëron Giuliano-n mbi rrugën që duhet të ndjekë pa shkelur në Greqinë fqinje. “Më thirri polici, i cili më shpjegoi, që të mos iu afrohesh ujërave greke … duhet të shkosh gjithnjë drejt, pas 6-7 milje nuk duken më dritat, duhet të ecësh edhe 2-3 milje, pastaj hyn. Nuk duhet të gabosh, vëllai im”.
Biznesi në boshtin Shqipëri-Siçili shkonte kështu: një vajtje-ardhje e vazhdueshme midis vendit ballkanik dhe juglindjes së ishullit nga ana e Habilajve dhe pjesëtarëve të tjerë të grupit. Takime me blerës nga Katania dhe Raguza, si Antonio Riela dhe Angelo Busacca. I pari ishte përfaqësues në Katania për disa familje mafioze të interesuara në blerjen e marijuanës. I dyti është një tregtar për fruta-perime me shumicë në tregun e Vittorias, i arrestuar muajt e shkuar pasi ka shfrytëzuar punëtorët në serrat e tij. Dhe është pikërisht në mes të Katanias, Lentinit, Augustas, Modikas dhe Vittorias që lëvizin subjektet që u arrestuan dy ditë më parë nga Gico e Guardia di Finanza e Katanias, me urdhër të prokurorit siçilian.
Një biznes në lulëzim, i cili është vënë në krizë nga sekuestrimet e vazhdueshme nga ana e policisë italiane. Është vetë Moisi Habilaj, që në një pikë, është duke bërë llogaritë e të ardhurave dhe shpenzimeve. Paratë që pret prej katanezëve arrijnë shifrën e 1 milion e 670 mijë euro, ndërsa borxhet që duhet të shlyejë në Shqipëri, arrijnë në 600 mijë euro. Dhe midis atyre që quhen më “problematikë” janë “Renato dhe shteti”. I pari është një nga furnizuesit shqiptarë. Por është mbi të gjitha në të dytën që u fokusua kureshtja e hetuesve, sipas të cilëve, pas fjalës “shtet” janë fshehur forcat e policisë shqiptare të paguar nga Habilajt.
Por ka edhe më shumë. Gjithnjë duke shfletuar borxhet që duhet të paguhen, udhëheqësi i dyshuar i organizatës përmend emrin e Saimirit. “Tridhjetë, thotë Habilaj, duhet t’ia shpie Saimirit”. Magjistratët italianë theksojnë se aludohet me shumë mundësi për kushëririn e tij Saimir Bashkim Tahiri, ish-ministër i Brendshëm dhe deputet. Një emër i rëndësishëm që rikthehet edhe në një tjetër pasazh të çështjes, kur kujtohet një nga udhëtimet e Habilajt, në shoqërinë e mikut të ngushtë Sabaudin Çelaj, midis Shqipërisë dhe Siçilisë që është bërë në bordin e një “Audi A8” në emër të vetë Tahirit, kur ishte ministër. E njëjta akuzë ishte ngritur në të kaluarën e afërt në Shqipëri, për një udhëtim të trafikantëve në Greqi dhe në atë rast politikani pohoi se ai vetë ia kishte shitur makinën në të zezë kushëririt të tij.
Vizitat e përsëritura në Siçili, përveç takimeve për të negociuar (që zhvillohen kryesisht në parkingun e spitalit në Lentini, në tregun e Vittorias, në Modika dhe në lagjen Pigno të Katanias), janë përdorur për të bërë inspektime të dobishme për të gjetur plazhet dhe portet më të mira ku të zbarkonin. Një shqetësim i ardhur nga dështimi i dërgesës që arrin në Augusta, në natën e 25 tetorit të 2013. Një gomone me në bord katër burra duhet të shkarkojë 1.650 kile marijuanë në plazhin e quajtur Baia del Silenzio (Gjiri i Heshtur), midis Brukolit e Agnone Bagni. Por për të prishur planet e shqiptarëve vijnë karabinierët, të cilët janë njoftuar nga një sinjalizim. Nis një arratisje midis shkëmbinjve që i kushton një prej trafikantëve, Çelaj, plagosjen në një nga këmbët dhe orë të gjata fshehjeje për të mos u arrestuar. Për ta ndihmuar, sipas rindërtimit të përgjimeve, është roja i një pallati, mik i një prej blerësve katanezë të drogës, që për të evituar arrestimin e merr në makinën e tij. “Ma çoi Zoti atë burrë, thotë Çelaj pasi ka shpëtuar, jam fshehur gjatë gjithë natës, pastaj kur u larguan, kapërceva kangjellat dhe jam lënduar, bëra dy-tre hapa dhe erdha këtu”. Në këtë rast Habilaj ankohet për interesin e paktë të katanezëve për organizimin e ngarkesës. “Nëse do të kisha një kallashnikov do t’i kisha vrarë të gjithë, bam bam bam”, thotë duke iu referuar karabinierëve.
Kjo është arsyeja pse, për ngarkesën e ardhshme, inspektimet janë më të kujdesshme: Monitorohen portet e Pozzillo-s, Santa Maria La Scala, Santa Tecla dhe Riposto, por edhe plazhet e Praiola-s dhe ajo e Sant’Anna-s, gjithnjë në Riposto.
Deri në muajt e parë të vitit 2017, kur organizata, vepronte ende në elementet kryesore të saj, pavarësisht sekuestrimeve të pësuara, përpiqet që të organizojë një ngarkesë të re nga deti që duhej të mbërrinte në Portopalo të Capo Passero, ku droga duhej të ruhej në një magazinë që pastaj t’iu shitej katanezëve. Një plan, i cili u prish nga arrestimet e operacionit “Rosa dei venti” që shkaktoi një tërmet të vërtetë politik në Shqipëri, ku opozita bën thirrje për arrestimin e ish-ministrit Tahiri, ndërsa kryeministri Edi Rama siguron: “Shqiptarët kanë nevojë të dinë të vërtetën, drejtësia duhet t’i shkojë deri në fund”.