Deputeti i Partisë Demokratike, Tritan Shehu ka mbështetur Rzolutën e Asamblesë Parlamentare të Këshillit të Europës, të miratuara sot në Strasburg, e cila i cilëson krimet e ISIS si krime kundër njerëzimit dhe genocid. Përmes një postimi në rrjetin social “Facebook”, deputeti demokrat thekson se, vendime të tilla synojnë t’i japin fund krimeve ndaj njerëzimit, ndërsa sjell edhe fjalën e tij mbështetëse të mbajtur në Asamble. “Këta kriminelë të financuar, të organizuar, të grumbulluar në shtetin e tyre të errësirës, nuk tentojnë vetëm të vrasin mijëra njerëz, të shfrytëzojnë pasuritë, të përdhunojnë gratë, të implementojnë skllavërinë, por dhe shumë më tepër, kërkojnë të shkatërrojnë njeriun si qenie njerëzore, civile e pjesë të një shoqërie të të drejtës, të shkatërrojnë të gjithë shoqërinë tonë, kulturën tonë, vlerat tona. Pra përpara nesh nuk kemi të bëjmë vetëm me një grup kriminal, por me një mekanizëm të gjithë të krijuar e organizuar, të terrorit e aksionit, që nuk ka kufij moralë e gjeografikë, që sulmon botën mbarë, që konsideron armik për t’u vrarë ose kthyer në skllav, cilindo që nuk bën pjesë në organizatën e tyre kriminale. Ky është realiteti tragjik i këtij terrorizmi e radikalizmi, është e vërteta që më shumë dhimbje nuk mund ta mohojmë ose të bëjmë si struci që e fut kokën në rërë për të mos parë realitetin. Ne duhet ta njohim për ta përballuar e mundur atë. Në këtë kontekst unë jam krejt dakort me dokumentin e paraqitur, duke vënë në evidencë që krimet e realizuara nga ISIS, në të gjithë dimensionet e tyre, karakteristikat, përfshirjen, elementët etj, krijojnë strukturën e krimeve të luftës, krimeve kundër njerëzimit e genocidit, dhe kështu duhet të përballohen e ndëshkohen”, thotë ndër të tjera Shehu në reagimin e tij.

Deputeti i Partisë Demokratike, Flamur Noka është paraqitur pasditen e djeshme në mbledhjen e Byrosë parlamentare në ambientet e Kryesisë së Kuvendit, ku ka paraqitur pretendimet e tij për qëndrimin e djeshëm në Parlament. Në mbledhjen e djeshme të Byrosë diskutohej kërkesa e Partisë Socialiste për përjashtimin me 10 ditë të deputetit Flamur Noka nga punimet e Kuvendit. Pasi la ambientet e Kryesisë së Kuvendit, deputeti Flamur Noka tha para mediave se ai nuk ka shkelur Rregulloren e Kuvendit, por sipas tij ka qenë kryeministri Rama ai që ka folur me fjalor rruge. “Turpi i këtij Parlamenti sot është të përjashtosh një deputet pse kërkon fjalën për procedurë dhe institucion për një të drejtë të tij, sipas rregullores. Neni 49, pika një e Rregullores së Kuvendit, thotë se kur një deputet kërkon fjalën për procedurë, ajo jepet menjëherë. Ju e patë që deputeti Noka kërkoi fjalën për procedurë, as më pak as më shumë, e vetmja gjë që bëra tepër është që insistova. Dëgjova një kryeministër në sallë që fliste me një zhargon rruge. Kërkova fjalën për procedurë që t’i kërkoja kreut të Kuvendit që t’i tërhiqte vëmendjen kryeministrit të mos fliste me zhargon rruge, ndërsa ai në vend që ta bënte këtë, përjashtoi deputetin.
Këtë që po e them tani ia paraqita me zë e figurë para Byrosë parlamentare”, u shpreh Noka.
Deputeti i Partisë Demokratike, Flamur Noka, ka folur për qëndrimin e mbajtur ndaj tij në seancën e djeshme plenare nga kreu i Kuvendit, Gramoz Ruçi. Në dalje të Parlamentit, pas mbylljes së punëve të Kuvendit, për shkak të përjashtimit të deputetit Noka, ky i fundit thotë se, “ky është një atentat që i bëhet demokracisë dhe fjalës së lirë”. “Ato komente që kam patur për të bërë, i kam bërë. Këtu është atentat ndaj demokracisë. Kanë vënë në krye të Kuvendit ministrin e Sigurimit për t’i mbyllur gojën opozitës”, u shpreh Noka. Në seancën e djeshme plenare, pas bllokimit të foltores së Kuvendit nga deputetët demokratë, kryeparlamentari Ruçi vendosi përjashtimin e deputetit Flamur Noka. Pas kësaj u ndërpre seanca për të rifilluar në orën 17:00. Por edhe rifillimi i seancës plenare, e gjeti deputetin Noka të ulur në ndenjësen e tij, duke mos pranuar të lërë sallën e Kuvendit. Kjo bëri që kreu i Kuvendit, Gramoz Ruçi të vendosë sërish ndërprerjen e seancës, duke e shtyrë për ditën e sotme.

Ish-Kryeministri Berisha ka akuzuar direkt ministrin e fundit të policisë kriminale të diktaturës se ka marrë si mision shkatërrimin e Parlamentit. Reagimi i Berishës erdhi menjëherë pasi Ruçi mori vendimin për të përjashtuar deputetin Noka, i cili kërkoi fjalën për procedurë dhe pasi iu mohua fjala kërkoi të flasë nga podiumi i Parlamentit.
Berisha ka kujtuar se rregullorja është e qartë se deputetit i jepet fjala për procedurë sa herë ta kërkojë.
“Siç e shihni, ministri i fundit i policisë kriminale terroriste të diktaturës hoxhiste ka marrë përsipër një mision, shkatërrimin përfundimtar të institucionit qendror të demokracisë që është Parlamenti. Ju konstatoni se ai, për herë të dytë ju mohon të drejtën e fjalës për procedurë, e cila është e drejta më bazike, jo vetëm në Parlamentin shqiptar, por në të gjithë parlamentet e botës dhe asambletë parlamentare ndërkombëtare, përfshi këtu edhe samitin botëror të OKB. E drejta e procedurës është një e drejtë që nuk mund të shkelet kurrë. E shkel vetëm një njeri që do të shkatërrojë Parlamentin shqiptar.
Këta kanë frikë dhe nga Parlamenti, por të jenë të sigurtë që çmimin më të madh do ta paguajnë ata vetë. Nuk ka ndodhur kurrë në histori që në mënyrë kaq të vendosur të mos respektohet e drejta e fjalës për procedurë si sot”, tha Berisha.

-Është e vërtetë që ju ka ofenduar Kryeministri?
Nuk kanë asnjë rëndësi ato të tjerat, sigurisht ato kanë procedurën e vetë, por kapitale është. Si ta thotë mendja që mund të më ofendojë mua Edi Rama?! Po ai të nderon çdo fjalë që të thotë. Edvin Shullazi! Problemi themelor është se kemi të bëjmë me mohimin e të drejtës së fjalës për procedurë. Ju e patë çfarë kanë bërë këta. Kanë bërë ligjin për minoritete, me të cilin jam plotësisht dakort, me të cilin plotësohet nga ana ligjore për minoritetet Kushtetuta e Shqipërisë. Kush e paraqet këtu atë ligj? E paraqet Ministria e Jashtme, a thua se minoritetet të jenë shtete të jashtme brenda territorit të Republikës së Shqipërisë. Pse e bën këtë ai? Ai e bën këtë për ta patur si trofe personale në kuadrin e dështimit total, apo të diplomacisë më të dështuar që nga koha e diktaturës deri sot. Megjithatë fjalët u thanë. Problemi themelor është mohimi i të drejtës për procedurë. E drejtë që në çdo samit ndërkombëtar, në çdo asamble ndërkombëtare kurrë nuk mohohet.

-A ka skenar opozita për të bllokuar Kuvendin?
Mazhoranca ka një skenar për të mashturar qytetarët, por ju jeni këtu, dhe konstatoni se gjithçka filloi me mohimin e të drejtës së fjalës për procedurë të deputetit Flamur Noka. Lexoni nenin përkatës të rregullores se çfarë thotë. Ajo thotë se “deputeti që kërkon fjalën për procedurë i jepet menjëherë fjala. Nëse e kërkon gjatë kohës që tjetri flet, atëherë e merr fjalën, pasi të mbarojë ai që po flet. Nëse e kërkon pas fjalës, përpara diskutimit tjetër, ai që kërkon fjalën për procedurë ka përparësi absolute”. Por këta nuk kanë përparësi funksionimin e Parlamentit, përparësi këta kanë shkatërrimin. Këta janë shumicë e drogës, e krimit, shumicë e krimit dhe ndjehen të tmerruar në në çdo moment, çdo sekondë aty ku janë.

Ish-Kryeministri Berisha i është përgjigjur interesit të mediave në Kosovë në lidhje me diskutimet mbi pajisjen e qytetarëve kosovarë me pasaportë shqiptare.

-Zoti Berisha, dje Presidenti Meta u përball me një kërkesë nga Presidenti Thaçi për pajisje me pasaportë shqiptare për qytetarët e Republikës së Kosovës në mënyrë që të thyhet muri shengen për qytetarët e Republikës së Kosovës
Së pari, unë përkrah dhe mbështes çdo hap që njëhson praktikat e shqiptarëve në Shqipëri dhe Kosovë. Së dyti, lidhur me problemin konkret unë mendoj se një qëllim tjetër më madhor duhet të qëndrojë prapa këtij propozimi të drejtë. Pra është e domosdoshme që qeveria e Kosovës dhe qeveria shqiptare, të firmosin si dy vende të pavarura, por që ndajnë një komb unik, të firmosin marrëveshjen mbi shtetësinë, në përputhje me të cilën çdo shqiptar që banon në Shqipëri do të ketë automatikisht në një formular dhe shtetësinë e Republikës së Kosovës dhe anasjelltas. Kjo është parashikuar në një vendim të qeverisë së mëparshme të vitit 2012, në të cilën duke studiuar me vëmendje legjislacionin…. Ju e dini që ka ekzistuar një dekret i Presidentit i vitit 1992, që i njihte shtetësinë shqiptare shqiptarëve kudo që jetonin në trevat e tyre ose në botë. Ky dekret, për fat të keq, nga pozicione albanofobike u la mënjanë dhe u bë një ligj, i cili pengonte në mënyrat më maksimale marrjen e shtetësisë shqiptare nga shqiptarët. Megjithatë, duke e studiuar atë ligj me ekspertët më të mirë arritëm që të bëjmë një vendim, në përputhje me të cilin, shqiptarët kudo që ishin, përveçse në Republikën e Kosovës, merrnin shtetësinë shqiptare kundrejt mbushjes së një formulari nëse e dëshironin atë. Për Republikën e Kosovës, duke qenë se kemi të bëjmë me një vend të pavarur, ky vendim parashikon një marrëveshje ndërshtetërore midis dy shteteve Shqipërisë dhe Kosovës, që t’u njohin qytetarëve të tyre të drejtën e shtetësisë që dëshirojnë ose të dy-shtetësive.

– Kjo garantohet me Kushtetutën e Kosovës…
Edhe me Kushtetutën e Shqipërisë plotësisht, është e stamposur në preambulën e Kushtetutës së Shqipërisë dhe ky do ishte hapi që mund të bëhej pa asnjë lloj problematike, pasi unë nuk di vend në Rajon që të mos ketë adaptuar këtë për kombin e tij si të tillë, unik. Edhe ne duhet ta adaptojmë. Uroj që propozimi i zotit Thaçi të merret në mënyrë më serioze dhe qeveritë të përgatisin marrëveshjen për të drejtën e shtetësisë së shqiptarëve kudo që banojnë. Kjo pastaj zgjidh dhe probleme të tjera, por ne nuk mund të rrimë pa u dhënë shqiptarëve këtë të drejtë një minutë e më parë.

– A mund të sjellë kokëçarje për Shqipërinë që mund t’i hiqet e drejta edhe shqiptarëve të Shqipërisë të udhëtojnë pa viza?
Nuk synon kjo çështje e Shengen. Kjo synon vendosjen e një norme kombëtare që është jetike për kombin shqiptar. Pse paskan të drejtë kombe të tjera përreth të aplikojnë të drejtën e shtetësisë për bashkëkombasit e tyre në vende të tjera dhe nuk qenka problem kjo? Nuk mund të jetë Shengen një pengesë në asnjë rrethanë. Sikundër dua të them këtu, se në mënyrë absolute Kosova është një nga vendet që ka standardet më të mira përsa u përket kritereve ose kërkesave për heqjen e vizave.
Nuk arrij të kuptoj se pse qënka demarkacioni një kriter në këtë mes. Demarkacioni mund të jetë një kriter në avancimin e procesin e integrimit, kurse heqja e vizave është një e drejtë që u është njohur dhe vendeve, të cilat ndofta dhe për 100 vitet e ardhshme nuk kanë ndërmend të integrohen në BE.

– Megjithatë nuk ishte një përgjigje pozitive me automatizëm nga Presidenti Meta.
Zoti Ermal, unë mendoj se çështja duhet kapur në themel, dhe themeli duhet të jetë marrëveshja ndërqeveritare për t’i dhënë përgjigjen e plotë dhe përfundimtare çështjes së shtetësisë së shqiptarëve në Shqipëri dhe në Kosovë. Kjo çështje duhet të marrë zgjidhje. Shqiptarët duhet të kenë të drejtë të mbajnë cilën shtetësi që të duan, t’i mbajnë të dy shtetësitë po të duan, qeveritë nuk mund të bëhen pengesë për këtë.

– Megjithatë analistët e quajnë presion të zotit Thaçi në drejtin të BE në mënyrë që të lëvizë më shpejt dhe të heqë dorë nga kërkesa apo kushti siç është demarkacioni për procesin e liberalizimit të vizave.
Unë në fakt nuk jam njeri që besoj shumë në presionet ndaj Brukselit sepse BE, mendoj unë, nuk mund të presohet nga qeveritë e vendeve të Ballkanit, por shqiptarët kanë njëmijë e një motive për t’i dhënë përgjigje përfundimtare të drejtës së shtetësisë së tyre, sepse kjo ka bërë me probleme shumë herë më themelore se sa vizat, ka të bëjë me çështje pronësie dhe garancie pronësie, ka të bëjë me çështje investimesh, ka të bëjë me një seri çështjesh që marrin përgjigje dhe zgjidhjen më të mirë. Natyrisht nuk mund të injorohet dhe problemi i vizave, por jo si formë presioni, sepse nuk mendoj se vendet periferike të Europës mund të bëjnë presione të madha në metropolet e saj.

Marrë nga Radio “Dukagjini”

Vendimi i kryetarit të Kuvendit, Gramoz Ruçi për të përjashtuar nga seanca deputetin e PD-së, Flamur Noka, ndërkohë që të njëjtin standard nuk përdori për gjuhën fyese të kryeministrit Edi Rama, ka shkaktuar pakënaqësi te demokratët. Deputetja e PD, Fatbardha Kadiu e konsideron komunizëm të vitit 2017-të vendimin e Ruçit për t’i hequr të drejtën e fjalës Nokës, ndërkohë që Ramës nuk i tërheq dot vëmendjen. “Kryeministri ofendon parlamentarët, por Ruçi nuk i tërheq dot as vëmendje. Noka kërkon të flasë në Parlament, e drejtë themelore e njeriut dhe Ruçi e përjashton. Ky është komunizmi i vitit 2017”, shkruan Kadiu.