Ish-Kryeministri Berisha priti në një takim Presidentin e Fondit shqiptaro – amerikan të Ndërmarrjeve, zotin Michael Granoff. Zoti Berisha shprehu vlerësimin e tij më të madh për suksesin e projekteve të Fondit shqiptaro – amerikan të Ndërmarrjeve në tërësi në Shqipëri si dhe investimet serioze që janë bërë në të gjitha fushat nga ky Fond. Ai shprehu kënaqësinë që projekti i rindërtimit të qëndrave urbane, një inisiativë e nisur që në vitin 20011, është projekti i vetëm që ecën në Shqipëri dhe kjo falë financimit dhe ekspertizës së Fondit. Presidenti Granoff e informoi zotin Berisha se, projekti më i fundit në këtë drejtim do të jetë Vlora, ku Fondi do të investojë një shumë të madhe për rindërtimin e qendrës së Vlorës. Gjithashtu në takim u diskutua për projektin e Fondit në arsim dhe në fusha të tjera. Në këtë kontekst, zoti Berisha i shprehu mirënjohjen më të thellë presidentit Granoff, bordit dhe punonjësve të Fondit, që me përkushtimin e tyre të madh, dashurinë për Shqipërinë e shndërruan Fondin shqiptaro-amerikan të Ndërmarrjeve në historinë më të suksesshme në të gjitha vendet ish-komuniste. Në takim zoti Berisha dhe zoti Granoff diskutuan për problemet kryesore në Shqipëri që janë krimi dhe korrupsioni dhe pamundësinë totale për t’i luftuar, për shkak të lidhjeve të Ramës dhe qeverisë me to, çka po largon investimet e huaja. Biseda ishte e hapur dhe miqësore.
Thaçi kundër Gjykatës Speciale kërkon vizat
Pendimi i Kreut të Shtetit të Kosovës për themelimin e Gjykatës Speciale për Krimet e Luftës në Kosovë, nuk mund të prodhojë asnjë efekt në raport me vet Gjykatën, por as ndonjë reagim të opinionit karshi kësaj Gjykate, vlerësojnë njohësit e zhvillimeve politike dhe të aspekteve juridike në Kosovë.
Presidenti i Kosovës, Hashim Thaçi, gjatë prezantimit të një raporti për perceptimin publik rreth Gjykatës Speciale, të organizuar nga disa organizata joqeveritare në Prishtinë, e ka cilësuar themelimin e Gjykatës Speciale, “proces të padrejtë historik ndaj Kosovës”. Ai ka theksuar se ka pranuar ta udhëheqë këtë proces, si kompromis, me premtimet e faktorëve ndërkombëtarë, për liberalizim të vizave, për formimin e ushtrisë, pranimin e Kosovës në organizatat ndërkombëtare, si dhe rritjen e numrit të njohjeve nga vendet e ndryshme.
Politologu Ramush Tahiri, duke folur për Radion “Evropa e Lirë”, ka theksuar se reagimi i Presidentit Thaçi, vjen si pasojë e zhgënjimit me faktorët e caktuar ndërkombëtarë, që nuk realizuan kompromiset, për të cilat opinioni vendor nuk ka pasur informacione në kohë reale. Por, siç thotë Tahiri, pendimi i Kreut të Shtetit lidhur me çështjen e Gjykatës Speciale, nuk do të mund të ketë asnjë ndikim në punën e kësaj të fundit.
“Kjo Gjykatë nuk mund të abrogohet, sepse nuk pritet që Kuvendi të rishqyrtojë dhe të marrë vendim tjetër, megjithëse kishte disa përpjekje në të kaluarën, para disa muajve në Kuvendin e Kosovës. Kjo është thjeshtë një lloj, ndoshta, shfajësimi – që kjo Gjykatë po punon – i Hashim Thaçit, tash në funksionin e Presidentit. Por, nuk mendoj që do të ketë ndonjë ndikim praktik, përveç që do të ketë ndikim në marrëdhëniet e Kosovës ose të vet presidentit me faktorin ndërkombëtar”, thotë Tahiri.
Por, eksperti i çështjeve juridike – kushtetuese, Mazllum Baraliu, profesor në Universitetin e Prishtinës, thotë për Radion “Evropa e Lirë” se është krejtësisht e parëndësishme nëse janë penduar ose jo drejtuesit e institucioneve të Kosovës lidhur me Gjykatën Speciale. Sipas tij, Presidenti Thaçi, i cili në kohën e nisjes së procesit për themelimin e Gjykatës Speciale ishte në pozitën e kryeministrit, është dashur t’i bëjë publike kompromiset.
“Është pendim ose jo, kjo është jorelevante. Si zakonisht, eksponentët e institucioneve tona, kanë qenë vazhdimisht në funksion të kërkesave të bashkësisë ndërkombëtare. Ndërkaq, kjo që tash ai (Thaçi) po thotë se ka pasur një kompromis, për këtë kompromis ne nuk kemi ditur. Është dashur që atëherë, ata dhe ky vet, të këmbëngulin që kur bëhen marrëveshje të tilla, kompromisi të ketë mekanizma garantimi, që ato të realizohen dhe jo që Kosova vazhdimisht të humbë”.
Por, a mund të krijojnë efekte në opinionin publik deklaratat e Presidentit Thaçi, lidhur me Gjykatën Speciale?
Politologu Tahiri shpreh mendimin se kjo deklaratë mund ta nxisë opinionin, por mendimi dhe reagimi eventual i opinionit nuk mund të ndikojë në punën e Gjykatës Speciale.
“Reagime të opinionit do të ketë, sepse askush, duke përfshirë edhe vet presidentin, nuk janë të amnistuar nga hetimi i kësaj Gjykate dhe nga procesi i drejtë dhe i ndershëm që do të mundësohet, varësisht prej dispozitave ligjore që janë paraparë me këtë ligj. Mirëpo, kjo punë nuk ndihmon, sepse opinioni dhe ndikimi i opinionit në proceset gjyqësore është i pavarur prej punës së vet Gjykatës”.
Profesor Baraliu nuk pret reagim nga opinioni, për shkak se sipas tij, reagimi i Presidentit është i vonuar.
“Ndoshta është reagim i vonuar edhe i vet Presidentit, për shkak se atëherë është dashur të veprojë dhe të mos lejojë kompromise të tilla që të mos realizohen edhe në dobi të Kosovës, që të përfitojë diçka edhe Kosova dhe jo vetëm të humbë, siç është rasti me Gjykatën Speciale, e cila me të vërtetë është e padrejtë”.
Presidenti Thaçi, megjithatë ka deklaruar se Gjykata Speciale “do të jetë vetëm një pikë drejtësi”, siç ka thënë ai, “në detin e padrejtësive që kanë ndodhur në Kosovë”. Ai ka ngritur pikëpyetjen se “a do ta nxjerrë të vërtetën dhe a do të sjellë pajtim ndëretnik”, Gjykata Speciale, e cila pritet që në një të ardhme shumë të afërt të procedojë me rastet e para.
Nuk ka pavarësi për Katalonjën
Udhëheqësit e Katalonjës u tërhoqën në minutën e fundit nga shpallja e pavarësisë, duke pezulluar zbatimin e rezultatit të referendumit për t’u shkëputur nga Spanja, dhe vendosën t’i lenë kohë negociatave me qeverinë qendrore të Madridit.
Duke folur para Parlamentit të Katalonjës, Presidenti rajonal Carles Puigdemont i bëri thirrje Madridit të hyjë në dialog. Ai tha se Katalonja ka fituar të drejtën për pavarësi.
Puigdemont mbajti një fjalim para Parlamentit rajonal, për herë të parë që nga referendumi i debatueshëm një javë më parë, i cili doli me një rezultat të thellë të katalanëve që votuan për shkëputje. Referendumi u shpall i paligjshëm nga qeveria dhe Gjykatat në Madrid.
Një numër biznesesh, përfshirë dy banka kryesore të Spanjës, një kompani e rëndësishme e telekomunikacioneve dhe një grup ndërtuesish, si dhe një protestë masive gjatë fundjavës në Barcelonë nga 350 mijë katalanë që kundërshtonin shkëputjen, filluan të ndikojnë mes të moderuarve që janë të alarmuar për perspektivën e një kolapsi ekonomik dhe trazirave civile.
Ata bënë thirrje për një pauzë dhe për më shumë përpjekje për të hapur negociata me qeverinë e qendrës së djathtë të kryeministrit Mariano Rajoy, i cili është nën presion nga partia e tij të mbajë një qëndrim të prerë me separatistët. Kryetarja e Bashkisë së Barcelonës, Ada Colau, argumentoi të hënën në mbrëmje kundër shpalljes së pavarësisë, duke thënë se do të kërcënonte bashkëjetesën sociale.
Aktivistët opozitarë protestojnë në Tbilis
Policia është përleshur me aktivistët opozitarë gjeorgjianë, të cilët po protestonin kundër vendimit të këshillit të qytetit të Tbilisit, për t’i dhënë një ngastër tokë kompanisë së ndërtimit, të lidhur me miliarderin, Bidzina Ivanishvili.
Tetë aktivistë janë ndaluar gjatë trazirave, afër ndërtesës së këshillit në qytetin e Tbilisit.
Qindra aktivistë opozitarë kanë protestuar afër ndërtesës, duke kërkuar të hyjnë brenda për të marrë pjesë në mbledhjen e këshillit ku do të diskutohet çështja e tokës.
Ivanishvili ka krijuar partinë “Georgian Dream” që rrëzoi partinë e Saakashvilit, duke ardhur në fuqi përmes zgjedhjeve parlamentare të viteve 2012.
Shqipëria, tjetër raund eliminatoresh
Në datën 19 tetor, Shqipëria e 17-vjeçarëve do të nisë një tjetër raund eliminatoresh pas suksesit të vitit 2014, ku arriti të kualifikohej në Elite Round. Kuqezinjtë bëjnë pjesë në Grupin 2 kualifikues të Europianit bashkë me Spanjën, Kroacinë dhe Lihtenshtejnin. Një grup shumë i vështirë, por jo i pakalueshëm për trajnerin Xhemal Mustedanagiç, i cili doli përpara gazetarëve në konferencën për shtyp i mbushur me optimizëm dhe me besim se skuadra e tij mund t’ia dalë edhe përballë superfuqive si Spanja e Kroacia. Fillimisht, ai u ndal te puna pozitive e bërë nga Panucci dhe Bushi, duke u shprehur se ndeshjet e zhvilluara nga dy skuadrat e tyre pasqyrojnë një rritje progresive të futbollit shqiptar. Në vijim, trajneri boshnjak i 17-vjeçarëve u ndal te faza eliminatore që starton në datën 19 tetor kundër Kroacisë në “Selman Stermasi” dhe vazhdon më pas me përballjet ndaj Spanjës dhe Lihtenshtejnit po në vendin tonë, pasi e gjithë kjo fazë do të luhet në Shqipëri.
“Ashtu si çdo vit tjetër kemi një grup të vështirë. Kemi luajtur më përpara me Holandën, Zvicrën, Italinë, Maqedoninë, por unë mendoj që ky aktuali është grupi më i vështirë, pasi Spanja është një skuadër me traditë dhe shumë talente. Ata bashkë me Kroacinë janë favoritë, por ne kemi një ekip të mirë dhe mund të bëjmë një surprizë në këto eliminatore. Qëllimi jonë është që të bëjmë një prezantim të mirë dhe të kualifikohemi në Elite Round. Duhet të luajmë mirë dhe do të synojmë të luajmë futboll modern, por duhet parë se sa do të na lejojë ekipi kundërshtar. Gjithsesi, qëllimi jonë është që t’i shërbejmë sa më shumë ekipit të parë. M’u bë qejfi kur pashë Ndojin me ekipin A dhe në të ardhmen duhet ta furnizojmë sa më shumë skuadrën e parë”, u shpreh Xhemal Mustedanagiç.
Me një karrierë të gjatë drejtuese, Mustedanagiç ka punuar edhe në Kroaci dhe ky mund të jetë një avantazh për kuqezinjtë në ndeshjen e parë. Trajneri boshnjak kërkon t’i bëjë një surprizë të hidhur skuadrës rivale, pasi për të kjo ndeshje ka edhe aromën e një derbi. “Kam punuar me U-17 dhe U-19 të Kroacisë, por edhe me Dinamon e Zagrebit dhe e kam vëzhguar Kroacinë, pra dëshira ime është t’i bëjmë një surprizë edhe pse nuk është e lehtë. Kam evidentuar disa pika të dobëta të Kroacisë dhe aty do të tentojmë t’i godasim”, tha ai.
Ka punuar në Kroaci, por e tashmja e tij është Shqipëria. Mustedanagiç e shikon me optimizëm të ardhmen e futbollit shqiptar, madje ai bën një parashikim befasues. “Do ta shikoni që në të ardhmen, Shqipëria do të jetë edhe në Europian edhe në Botëror. Në të ardhmen, Shqipëria për lojtarët që luajnë jashtë do të jetë zgjedhje e parë. Marr si shembull Zvicrën, ku shqiptarët do të mendojnë si zgjedhje të parë Shqipërinë”, tha Mustedanagiç.
Gjatë konferencës së shtypit, ai prezantoi edhe listën me 24 lojtarët e grumbulluar për këtë fazë eliminatore, ku bie në sy prania e një numri të madh emrash që aktivizohen në ekipet shqiptare.
54 për qind e të intervistuarve: Kemi paguar ryshfet
Me nepotizmin vjen dhe korrupsioni. 54 për qind e të intervistuarve shqiptarë raportojnë se kanë paguar ryshfet në një institucion shëndetësor në 12 muajt e fundit, ndërsa 19 për qind kanë korruptuar një gjyqtar ose prokuror dhe 14 për qind i kanë dhënë ryshfet një polici. Siç vëren raporti:
“Shqipëria duket të jetë bindshëm përpara ekonomive të tjera në rajon, kur bëhet fjalë për përhapjen e ryshfetit”.
Së fundmi, të dhënat nga Barometri Ballkanik tregojnë se pothuajse gjysma e të intervistuarve shqiptarë raportojnë se nuk janë në gjendje të mbajnë shtëpinë e tyre në mënyrë adekuate të ngrohtë, ndërsa 69 për qind nuk kanë para qoftë dhe për një javë pushimi në vit. 39 për qind e të intervistuarve nuk janë në gjendje të paguajnë qiranë e tyre ose faturat e shërbimeve.
Pra, kjo është e vërteta e qartë që del nga raporti: në krahasim me pjesën tjetër të Ballkanit Perëndimor, korrupsioni dhe varfëria qeverisin në Shqipëri dhe ekziston vetëm një zgjidhje: vendi të futet në BE dhe qytetarët të mund të largohen ligjërisht nga vendi.
Çmenduri për Kane
Real Madrid e dëshiron me çdo kusht yllin e Tottenhamit, Harry Kane dhe kërkon të bëjë çmenduri në merkaton e verës. Sipas Diario Gol, Real Madrid e ka marrë seriozisht transferimin e sulmuesit anglez, Harry Kane nga Tottenhami. Diario Gol shkruan se Los Blancos janë të gatshëm t’i sakrifikojnë tre yje për Kanen.
Thuhet se Reali do t’i ofroj Tottenhamit yjet si Gareth Bale, Luka Modriç dhe Karim Benzema për Kanen. Më herët është raportuar se kampioni i Spanjës dhe Evropës është i gatshëm t’i ofroj Tottenhamit 2000 milionë euro për sulmuesin anglez. Mbetet të shihet gjatë verës së ardhshme se çka do të ofroj Real Madrid për Kanen. Real Madridi është i gatshëm që ta shesë Gareth Bale. Sipas “El Confidencial”, Real Madrid është i gatshëm që ta shesë yllin e saj, Gathet Bale. Bale po ka probleme të vazhdueshme me lëndimet, derisa kjo po i shkakton probleme trajnerit të Los Blancos, Zinedine Zidanes. Kështu, thuhet se nëse Real Madrid merr një ofertë prej 100 milionë eurove është e gatshme ta shesë uellsianin.
Gjatë afatit kalimtar të kësaj vere, Bale ishte kërkuar nga menaxheri i Manchester Unitedit, Jose Mourinho. Ndërkohë, Real Madridi është i interesuar për blerjen e portierit të Manchester Unitedit, David De Gea, megjithëse De Gea ka rënë edhe në radarin e Paris Saint-Germain, raporton e përditshmja sportive franceze, “Le10 Sport”. PSG e ka prioritet portierin spanjoll, pasi hoqi dorë nga ai i Atletico Madridit, Jan Oblak, për shkak të çmimit të lartë, 100 milionë funte.
Ndërkohë, Barcelona nuk heq dorë nga Philippe Coutinho dhe kërkon ta transferojë që në janar. Sipas të përditshmes sportive katalane, Mundo Deportivo, Philippe Coutinho ka një marrëveshje me Liverpoolin që të largohet në janar. Coutinho shpreson që klubi nga Anfield do ta mbajë premtimin, derisa shpreson që të realizojë ëndrrën, duke u transferuar në Barcelonë.
Sipas “Mundo Deportivos”, Barcelona ende është kontakt me ish-yllin e Interit. Gjatë verës, Barcelona kishte bërë çmos që ta transferojë brazilianin, por Liverpool u ka rezistuar milionave të klubit nga La Liga. Mbetet të shihet në janar, nëse Coutinho do t’i bashkohet Barcelonës, apo ky transferim do të shtyhet deri në verën e ardhshme.
Arlind RAMA
INSTAT e konfirmon: Çmimet e librave për nxënësit u rritën
Denoncimeve të prindërve, por edhe të opozitës për rritjen e teksteve shkollore për këtë vit akademik, Ministria e Arsimit iu përgjigj menjëherë si akuza të pavërteta e madje politike. Sipas Ministrisë së Arsimit, tekstet shkollore për këtë vit akademik nuk pësuan rritje dhe vijuan me të njëjtin nivel të një viti më aprë. Por ndryshe nga sa pretendon ministria, shtatori është muaji më intensiv i blerjeve për prindërit që kanë fëmijë për të shkolluar. Thuajse 80 për qind e furniturës së shkollës me libra dhe mjete kancelarie blihen gjatë këtij muaji. Mirëpo për shkak të kërkesës së lartë të njëjtët artikuj pësojnë një rritje jo të zakontë të çmimeve gjatë shtatorit.
Sipas INSTAT ritmet vjetore të rritjes së çmimeve në librat dhe artikujt shkollor ishte 2.5 për qind në shtator, teksa në muajt e mëparshëm ky ndryshim ishte poshtë vlerës 1.
Për shkak të ndryshimit të kurrikulës, furnizimet e shkollës vit pas viti plotësohen me elementë të rinj. Çdo lëndë përveç pajisjeve bazë libra fletore, laps dhe stilolaps, ka edhe mjete të veçanta pune që aplikohen gjatë vitit.
Sipas një vëzhgimi që “Monitor” bëri gjatë ditëve të para të shtatorit në kulmin e sezonit të blerjeve u vu re se, rritja e çmimeve ka përfshirë më së shumti Tiranën, ku blerjet janë më intensive për shkak të numrit më të lartë të nxënësve dhe për rrjedhojë edhe kërkesës më të lartë për mjete shkollore. Në disa kancelari në Tiranë, rritja e çmimeve ka qenë më e lartë se 20%.
Në të kundërt, çmimet e veshjeve për fëmijë pësoi rënie të mëtejshme në shtator. INSTAT pohon se çmimet e veshjeve dhe këpucëve për fëmijë pësuan ulje përkatësisht me -2.2 dhe 2%. Në SHBA sipas një sondazhi të Deloitte, familjet i ndajnë shpenzimet për shkollën, 50 për qind për veshjet dhe 50 për qind për mjete shkollore. Ndërsa për një familje me të ardhura të ulta në Shqipëri harxhimet për mjetet dhe librat i kalojnë ato për veshjet. Shkollimi në Shqipëri po bëhet gjithnjë e më i shtrenjtë, më shumë për shkak të rritjes së çmimeve të shërbimeve arsimore sidomos në sektorin publik.
Kanë qenë vetë prindërit ata që kanë ngritur shqetësimin, ndërsa kanë deklaruar se këtë vit pavarësisht deklaratave të Ministrisë së Arsimit se çmimet do të jenë po të njëjtat, ndihet një rritje e ndjeshme e tyre. Por edhe pse çmimi i shitjes nuk ka ndryshuar për shumë prej librave krahasuar me vitin e kaluar, prindërit e nxënësve shprehen për mediat se çmimet aktuale janë të larta dhe të papërballueshme.
“Librat shkojnë 60 mijë lekë. Ka dhe shpenzime të tjera, jo fletore, jo lapsa, mjete të tjera, domethënë 100 mijë lekëshi, dhe i bie barabartë me 2/3 e pensionit tim. Është e vështirë për t’u përballuar, do rrimë pa bukë, t’i japim fëmijës librin”, shprehet një qytetar.
Çmimet e teksteve të reja, të cilat iu nënshtruan procesit të vlerësimit nga Ministria e Arsimit dhe Sportit për vitin shkollor 2017-2018, propozohen nga subjektet dhe vlerësohen nga Ministria e Arsimit dhe Sportit, sipas metodologjisë së mëposhtme: Çmimet e teksteve dorëzohen nga subjektet në MAS, në zarf të mbyllur, sipas udhëzimeve përkatëse dhe i nënshtrohen procesit të vlerësimit.
Pas përfundimit të afatit të dorëzimit dhe vlerësimit të teksteve, Komisioni i Vlerësimit të Teksteve Shkollore, i ngritur në MAS, në prezencë të shtëpive botuese apo subjekteve, bën hapjen dhe leximin e çmimeve të propozuara për tekstet nga subjektet dhe një kopje të procesverbalit të hapjes e vë në dispozicion të palëve pjesëmarrëse në proces. Pas përfundimit të procesit të vlerësimit dhe renditjes së teksteve, për tekstet që rezultojnë fituese, MAS bën përllogaritjen dhe vlerësimin e çmimit mesatar aritmetik, ose çmimit tavan të teksteve të miratuara.
Memushaj në formacionin e dështimeve të Serisë A
Janë luajtur vetëm 7 javët e para në Serinë A, por megjithatë, “La Gazzetta dello Sport” ka ndërtuar formacionin me futbollistët e dështuar deri në këtë moment në kampionat. Mes emrave si Bertolacci, Cerci, Douglas Costa është edhe mesfushori i Kombëtares shqiptare Ledian Memushaj.
Një sezon më parë ishte kapiteni dhe një ndër futbollistët më të mirë të Pescara-s. Por edhe pse skuadra e tij ra në Serinë B, Memushaj u transferua në fundin e merkatosë së verës te Benevento.
Megjithatë, kur janë luajtur 7 javët e para, vlonjati ende nuk ka arritur të tregojë më të mirën e tij, ndoshta edhe për pasojë të lojës së dobët dhe pa rezultate të të gjithë skuadrës ku ai bën pjesë, pasi deri tani kanë koleksionuar vetëm humbje dhe mbajnë vendin e fundit në renditje me 0 pikë.
Edhe në Kombëtaren shqiptare, në dy ndeshjet e fundit ndaj Spanjës dhe më pas Italisë në Shkodër, Memushaj nuk arriti të ngrihej në nivelin e treguar në sezonin e kaluar.
Prodhuesit i kërkojnë qeverisë të përmirësojë klimën e biznesit
Bashkimi i Prodhuesve shqiptarë në një takim me ministren e Shtetit për Mbrojtjen e Sipërmarrjes, kanë diskutuar rreth përmirësimit të klimës së biznesit, si dhe fokus të bisedës ka qenë edhe ulja e informalitetit.
Kërkesat e parashtruara ministres Sonila Qato, nga Bashkimi i Prodhuesve Shqiptarë, në kuadër të përmirësimit të sektorëve të ndryshëm të prodhimit vendas ishin:
– Përmirësimi i klimës së biznesit nëpërmjet përforcimit të mekanizmave të dialogut publik-privat, duke kërkuar përfshirjen e këtij organizmi në grupe punë, tryeza teknike, komitetet dhe këshillat që do të marrin në shqyrtim ekonominë dhe çështjet e sipërmarrjes prodhuese. Si një masë paraprake u kërkua ndërhyrja në Ligjin për Konsultim Publik, duke kërkuar vendosjen e penaliteteve për nëpunësit ose zyrtarët publik, të cilët nuk e respektojnë këtë ligj.
– Ulja e informalitetit nëpërmjet shtrirjes së inspektimeve edhe te subjektet informale. Mbështetja e futjes së skemës së TVSh-së dhe në tregun e shitjes në pakicë. Rishikimi i legjislacionit për Shoqëritë e Bashkëpunimit Bujqësor, duke formalizuar dhe përsosur më tej strukturën organizative, në nivel lokal dhe kombëtar. Hartimi dhe implementimi i regjistrit elektronik të fermës, kartës elektronike të fermerit, si dhe krijimi i Qendrës Kombëtare të Agrobiznesit.
– Rritja e standardizimit dhe konkurrueshmërisë si faktor kyç për sfidën Evropiane dhe atë Ballkanike. Analizë të situatës aktuale të ekonomisë në krahasim me rajonin dhe për të parë avantazhet krahasuese. Propozim për ngritjen e një grupi pune me ekspertë nga ministri i Shtetit për Mbrojtjen e Sipërmarrjes dhe me përfaqësues nga Bashkimi i Prodhuesve shqiptarë ku të diskutojnë dhe të japin zgjidhje problematikave të hasura nga sipërmarrësit prodhues vendas në sektorë të ndryshëm. Nxitja e eksporteve me vlerë të shtuar, rishikimi i tarifave për shërbimet portuale etj.
Kryesore
Continue to the category
