Nga Ermal Peçi

Endri Shabanin personalisht nuk e njoh, përveç disa mesazheve shumë qytetare që kemi shkëmbyer. Kjo pasi kam dashur ta ftoj në “Intervistën e Ditës”, që drejtoj në Dritare TV. Në fakt kam vite që e kam dëgjuar aktivizmin e tij në “Nismën Thurrje”, që kur ajo drejtohej nga Besjan Pesha(njeriu, i cili nuk la parti pa qenë nga; PS,PD,LSI e ku ta di tjetër). Deri në momentin kur Besjani u mënjanua dhe Shabani “mori frenat” e Thurjes. Endri është një djalë i qytetar, i artikuluar dhe kurrajoz, i cili ka dorëzuar dhe dosje të funksionarëve të PS-së, në SPAK, si dhe ka ngritur zërin për padrejtësi. Le të kthehemi tek arsyeja se pse vendosa të shkruaja këtë letër; jo vetëm për të pasur një qartësi me njerëzit, por edhe pse natyra ime karakteriale nuk mund ta mohojë tikun ideologjik që lëviz brenda sistemit neurologjik.
Endri Shabani dje tregoi një papjekuri politike me reagimin për t’i thënë jo një bashkimi në zgjedhje me Lulzim Bashën dhe Partinë Demokratike Euroatlantike që ai drejton. Ishte papjekuri sepse vetë Shabani në daljet e tij politike e ka përjashtuar Bashën nga kjo klasë e vjetër politike, por mbi të gjitha në politikë nuk bën asnjë mëkat në qoftë se negocion. Edhe nëse në fund llogaritë politike nuk bëhen, ti nuk e nënshkruan marrëveshjen. Pavarësisht se ka mbaruar në Londër, Shabani një djalë i ri dje foli me gjuhën e vjetër të politikës shqiptare që ndryshe vepron e ndryshe flet. Të gjithë ne e dimë që Shabani ka bërë disa takime me Bashën, për të folur e diskutuar mundësinë e një koalicioni me bazë të gjerë. Nuk dua të futem në analiza se çfarë e shtyu Shabanin të reagonte në atë formë, se nuk është ky qëllimi i shkrimit.
Në 24 Gusht të këtij viti publikova shkrimin tim “Për t’i futur thikën pas shpine Lulzim Bashës”; një shkrim që analizonte se kush ishte kundërshtari i vërtetë i Ramës, por gjithashtu e për të shpjeguar se pse dinosaurët e vjetër politikë, ekonomikë dhe kriminalë do bëjnë çmos për të eliminuar Lulzim Bashën nga skakiera politike.
E riktheva këtë shkrim jo se ka lidhje me Shabanin, por për t’i kujtuar forcave të reja politike se në qoftë se sot ka një arsye që loja politike u hap dhe flitet për ta është e akti politik i Bashës për të përjashtuar Berishën, i cili solli shkatërrimin politik, jo vetën në, PD por edhe në klasën politike. Ka një paqartësi të madhe politike mes aktorëve të rinj sepse aleancën ju nuk do e bëni me emrin, por me parimet, pra kjo është politika.
1-Mbajtja e kontakteve me partnerët strategjikë SHBA dhe BE;
2-Forcimi i institucioneve të drejtësisë dhe mbështetja e tyre;
3- Listat e hapura.
Këtë duhet të flasin forcat e reja politike sot, a bashkohen rreth parimeve sepse në fund të ditës politika kjo është, ajo çfarë beson dhe çfarë përfaqëson.
Prandaj pavarësisht qëndrimeve shumë të kundërta ideologjike ndjej një respekt për Arlind Qorrin sepse është i qartë dhe i vendosur në pikëpamjet e tij politike.
Sot që flasim Basha udhëheq një subjekt politik me organizim kapilar, të cilën asnjë nga forcat e reja nuk e ka dhe ky është fakt. Në çdo vend të Shqipërisë Basha ka struktura dhe është i vetmi politikan, i cili i ka mbijetuar dhe nga komploti McGonigal. E lëre me intrigat e kurthet që bëhen nga Rama-Berisha dhe enturazhi i tyre. Prandaj sot askush prej forcave të reja politike nuk ka një strukturë të ngritur, por as eksperiencën për të kuptuar se terreni politik është shumë më ndryshe nga dalja në media apo pëlqyeshmëria në rrjetet sociale.
Prandaj Endri; ju dhe forcat e reja mund të zgjidhni çfarë të doni, mund ta shpallni armik dhe Bashën ta keni kundërshtar në zgjedhjet e 2025-ës, por koha do ta tregojë se pse e bëtë dhe a do t’ju japë të drejtë. Unë di të them vetëm kaq! Që copëzimi i opozitës ka vetëm një humbës, e kjo dihet që është Shqipëria. Ka dhe një fitues, që e ka emrin Edi Rama. Ju më pas vendosni vetë!

Zyrtari i Partisë Socialiste në Durrës, Jurgis Çyrbja, takohej me personin në kërkim Altin Hajri tek varrezat e zonës, në një vend që ata e quanin në bisedat e tyre në aplikacionin “Sky” “…ke varrezat, ke Mimi…”.

Këto takime të funksionarit shtetëror, Jurgis Çyrbja, tashmë të arrestuar nga Prokuroria e Posaçme SPAK, realizoheshin në një periudhë kur Altin Hajri, ishte shpallur në kërkim për ngjarjen e rrëmbimit dhe më pas vrasjen e më tej zhdukjen e kufomës së Jan Prengës në kompleksin e tij “Golden” në Shijak.

Frekuentimi i zonës së varrezave ishte bërë disa herë, pasi zona mund t’i jetë dukur më e sigurtë dhe larg syrit të policisë dhe banorëve të zonës.

Në bisedat e zbardhura në “Sky”, rezulton se Altin Hajrit i është arrestuar në Tiranë kunati i tij, Julian Gjoshi.

Dhe për të shpëtuar këtë individ janë impenjuar avokati, Çyrbja dhe një mik i këtij të fundit me emrin “Ols”.

Altin Hajri i shkruan Jurgis Çyrbes, sikur të ishte një rrobaqepës jo si një person në kërkim nga policia, ku pasi e falenderon për ndihmën e madhe që i ka dhënë për kunatin e arrestuar, kërkon nga Çyrbja masat trupore për një person të quajtur “Ols”, i cili sipas bisedës ka dhënë një ndihmë të çmuar në zgjidhjen e këtij rasti të arrestimit të kunatit me armë pa lejë.

Në dosjen e siguruar nga gazetari i “Ora News”, Elton Qyno, del se SPAK, ka analizuar komunikimet në aplikacionin “SkyECC”, që i përkasin kohës së 17 dhjetorit deri në 29 dhjetor 2020, ku evidentohet njohja e mëparshme mes funksionarit të PS-së në Durrës, Jurgis Çyrbja dhe personit në kërkim, Altin Hajri.

Në disa komunikime të zhvilluara në “Sky”, shfaqen kërkesat e personit të shpallur në kërkim nga policia, Altin Hajri, që i ka bërë Çyrbjas, për të ushtruar ndikim tek drejtuesi i Komisariatit të Policisë Shijak, kundrejt premtimit për të paguar dhe shuma monetare, me qëllim lejimin e ndërtimit të një banese nga një familjar i tij, i cili është djali i xhaxhait të Altin Hajrit.

Altin Hajri i shkruan Çyrbes duke i thënë se:

“…Mëngjesi vëlla, Daci jam… Zemra nigjo pak, don me be një shtëpi Shaba im Shijak… e nimojm dot japim naj kafe atij shefit që të filloj punë me shpiat…”.

Ndërkohë në vijim del përmes bisedave se planifikimi i takimeve që do realizoheshin mes të kërkuarit Altin Hajri dhe Jurgis Çyrbjas, në të njëjtin vend, ku ishin takuar dhe më parë në një zonë tek varrezat, që sipas dy bashkëbiseduesve baza është “ke varrezat…ke mimi…”.

“…Ajde aty ke lagjia, ku jena taku. Ke lagja jam, ajde takojm ke varrezat…. Ke mimi…”.

Ndërkohë, në vijim të bisedave të zhvilluara në “Sky” mes datave 19 janar 2021 deri në 26 janar 2021 evidentohet fakti i arrestimit në qytetin e Tiranës të kunatit dhe një mikut të bashkëbiseduesit Altin Hajri, të thirrur “Boli”, për veprën penale të “Mbajtje pa leje të armëve luftarake”.

Ka rezultuar se në 18 Janar 2021 nga ana e punonjësve të policisë pranë komisariatit Nr.2 në Tiranë janë arrestuar me një pistoletë pa lejë tip “Beretta”, Julian Gjoshi, i cili është kunati i Altin Hajrit dhe miku i tij, Edvin Barçi i thirur me nofkën “Boli”.

Sipas gazetarit të Ora News, Elton Qyno, Julian Gjoshi, rezulton të jetë dënuar në 23 dhjetor 2021 nga gjykata e Tiranës për akuzën e “Mbajtjes pa lejë të armëve të zjarit dhe municionit” dhe “Drejtimin e mjetit në gjëndje të dehur”.

Në bisedat e zhvilluara Altin Hajri, i bën kërkesë për ndihmë Jurgis Çyrbes për lirimin apo ndryshimin e masës së sigurimit personal për njërin nga të arrestuarit, kundrejt ofrimit dhe të shumave monetare, duke sugjeruar, ndryshimin e personit që posedonte armën pa lejë dhe dëmtimin e gjilpërës së armës së zjarrit, përpara kryerjes së ekspertimit nga Policia Shkencore.

Ky veprim kërkohej me qëllim përjashtimin e kunatit të Altin Hajrit, Julian Gjoshi nga përgjegjësia penale, duke nxjerë pistoletën të paaftë për të bërë qitje në testin e ekspertimit balistik që do bënte policia.

Altin Hajri i shkruan Jurgis Çyrbes si më poshtë vijon:

“…se kan kap kunotin tim me pistoletë… Mos bëjmë naj gjë. Ështw kunati me gjith atë bolin që rrin aty ke unë. Paktën ta maj një dali nji, shif naj “arrest shpia”. Sa lek dun veç ta qisim. Me fol direkt, se dun kap tani. Se mos bëjnë provën. Japim 10 mijë euro veç të na e prishi atë mrrokllën (Pistoletën)…”.

Më tej, Altin Hajri vijon ti shkruajë Jurgis Çyrbes duke i thënë se:

“…se arma qeka veç për gishtat…se po se marove ti s’kam kujt me i thën, me veç prish gjëlponën. Kërkoje vëlla, sa lek të dojn veç du t’ja maroj se më mytën kalamajt daja…. Jepi 20 mijë euro sa dojn ai, veç ta mbarojë…. Më 21 del në gjyq. Faleminderit dhe prej teje, të fala bëj Mikut tat Olsit…”.

Gjithashtu, nga komunikimet e zhvilluara mes dy protagonistëve që i përkasin datës 28 janar 2021, Altin Hajri i kërkon Jurgis Çyrbjas, që të diskutonte me një lidhjen e tyre, rreth informacionit që kishte marrë se mund të arrestohej nga policia e Tiranës.

“…që t`i thotë drejtorit Tiranë, shif të foli pak e shok se kam informacion për atë drejtoria Tiranë që dun me kap…”,-i shkruan personi në kërkim Altin Hajri, zyrtarit të PS në Durrës, Jurgis Çyrbes.

Në komunikimet në vijim në aplikacionin “Sky”, Altin Hajri i shkruan Jurgis Çyrbes që të falenderojë personat që e ndihmuan për mbylljen e problemit të kunatit të tij, Julian Gjoshi, moment gjatë të cilit i ka kërkuar që ta ndihmonte lidhur me problemin që kishte me organet ligj zbatuese.

Altin Hajri i shkruan Jurgis Çyrbes sikur të ishte një rrobaqepës jo si një person në kërkim nga policia, ku pasi e falenderon për ndihmën e madhe që i ka dhënë për kunatin e arrestuar, kërkon nga Çyrbja masat trupore për një person mikun e tij të quajtur “Ols”, i cili sipas bisedës ka dhënë një ndihmë të ç’muar në zgjidhjen e këtij rasti të arrestimit të kunatit me armë pa lejë.

Ndër të tjera personi në kërkim i shkruan Jurgis Çyrbjas si më poshtë vijon:

“…ma kanë dhonë fjalën, veç po presin një letër porosi dhe jam “ok” vëlla. Ka mundësi ai se është burri mirë ky tani, që është Ministër vlla. E ka shum shok me than shife vet aman, se më prishin shumë punë, se po i rregulloj ishalla këtë muaj që vjen. Dhe Ols, e ka bo punën e vet vëlla, thuaj faleminderit shum thuj…. Mos harro se e ka bo punën e vet se i kishte thonë avokatit, është porosia shefit. Për Ols vëlla, plus ka qën ke avokati vet 2 herë, e ka bo punën e vetë. A kupton ça po të them. Për atë mikun tat që pate shku ti po të them takoje, thuj falemindërit dhe më bjerë masat t’i boj nja dy kustume që t’ja çosh. Po për zotin është porosia shefit, kishte thënë avokati i kishte thon dum avokat po për zotin e mall e ka bë të vetën. Më tha avokati, e ka bo si burrat ai tha se ai nuk përzihet tha, se avokati e ka robin e vet ai, rrofsh vëlla. Shif aman të bojnë ca ndryshime këtu ke lagja dhe ja dy vene tjera që ti marim 100 për 100. Ok shum mirë ke bë, meri masat me stil t’ja mar, ja dy Kustume…”.

Ndërkohë në bisedën e datës 6 shkurt 2021, Altin Hajri, i kërkon Jurgis Çyrbes të ndërhyjë lidhur me ndalimin nga policia e Durrësit, të një mikut të tij për mbajtje pa leje të armëve të ftohta.

“…shif aman bëj ndonjë telefonatë, kanë ndaluar mbrëmë një kasap viçesh, po ka pas thikat në makinë budallai dhe e kanë mbajtur mbrëmë në DR…”-i shkruan Altin Hajri, Çyrbes.

Gjithashtu, veç kësaj Altin Hajri dhe në datën 6 mars 2021 i shkruan Çyrbes, që të interesohet në polici pasi sipas Hajrit “…kishin ndaluar njërin për një aksident dhe se ishte robi…”.