Kina thotë se do të mbështesë Kombet e Bashkuara në marrjen e masave të mëtejshme kundër Koresë së Veriut në përgjigje të provës së fundit bërthamore.
“Duke pasur parasysh zhvillimet e reja në gadishullin korean”, tha të enjten ministri i Jashtëm, Wang Yi gjatë një konference shtypi në Pekin, “Këshilli i Sigurimit duhet të përgjigjet më tej dhe të marrë masat e nevojshme” për të zgjidhur krizën.
Por zoti Wang theksoi gjithashtu se, “sanksionet dhe presioni” duhet të bëhen krah për krah me “dialogun dhe negociatat” me Phenianin. Kina është aleati më i madh diplomatik dhe ekonomik i Koresë së Veriut dhe pretendon se sanksionet më të forta kundër Phenianit nuk do të jenë të mjaftueshme për të ulur tensionet në gadishullin korean.
Të mërkurën në Shtëpinë e Bardhë, Presidenti amerikan, Donald Trump tha: “do të shohim se çfarë do të ndodhë”, kur u pyet nëse ai do të miratojë veprime ushtarake kundër Koresë së Veriut, duke shtuar se, “kjo nuk është zgjedhja e parë”. Presidenti Trump foli pas një bisede telefonike me Presidentin e Kinës, Xi Jinping.
I pyetur nga “Zëri i Amerikës” për çfarë bisedoi me udhëheqësin kinez lidhur me Korenë e Veriut, zoti Trump u përgjigj se, “Presidenti Xi kërkon të bëjë diçka për Korenë e Veriut”, por nuk është e qartë “nëse ai do të jetë në gjendje apo jo”.
Trump e cilësoi bisedën e tij me Presidentin Xi “si shumë, shumë miqësore”, duke shtuar se, “ishte një telefonatë shumë e mirë dhe zgjati shumë”.

Qëndrimi i Rusisë
Rusia është duke mbështetur gjithnjë e më shumë një strategji të kontrollit të armëve, për ta pranuar Korenë e Veriut si një shtet bërthamor, duke mos u pajtuar me Shtetet e Bashkuara dhe deri në njëfarë pike edhe me Kinën, që mbështesin vendosjen e sanksioneve për ta detyruar Phenianin të ulet në bisedime për çarmatim bërthamor.
Ndërsa u takua me presidentin koreanojugor në Vladivostok, presidenti rus Vladimir Putin bëri thirrje përsëri të enjten për dialog në zgjidhjen e krizës bërthamore me Korenë e Veriut dhe tha se nxitja e histerisë ushtarake rreth krizës së Koresë së Veriut ishte kundërproduktive dhe mund të shkaktojë një katastrofë globale. Ai tha gjithashtu se nuk është e mundur të zgjidhet kriza e Koresë së Veriut vetëm me sanksione dhe presion.
Duke u bërë jehonë komenteve të udhëheqësit rus, Alexander Nikitin, kreu i një institucioni akademik që drejtohet nga Ministria e Jashtme ruse, tha në një forum ndërkombëtar të mbrojtjes në Seul të enjten, se ka ardhur koha të ndalim kërkesën për një “çmilitarizim bërthamor të menjëhershëm për Korenë e Veriut dhe të ndjekim bisedime realiste të kontrollit të verifikueshëm të armëve”.
“Sanksionet, kufizimi i furnizimeve ushqimore dhe karburantit, nuk janë një metodë që do ta sjellë Korenë e Veriut në tryezën e bisedimeve”, tha zoti Nikitin që drejton Qendrën për Sigurinë Euro-Atlantike në Institutin Shtetëror të Moskës për Marrëdhënie Ndërkombëtare.
Akademiku rus sugjeroi trajtimin e Koresë së Veriut njësoj si Indinë dhe Pakistanin, dy vende ndaj të cilave u anashkaluan sanksionet nga Shtetet e Bashkuara në vitin 2001, edhe pse ato testuan hapur armë bërthamore dhe refuzuan të nënshkruanin Traktatin për Mospërhapjen e Armëve Bërthamore. Sipas këtij traktati, vetëm Shtetet e Bashkuara, Rusia, Britania, Franca dhe Kina janë të lejuara të kenë armë bërthamore.

Kërkesa për sanksione të reja
Shtetet e Bashkuara kanë qarkulluar tek vendet anëtare të Këshillit të Sigurimit, një projektrezolutë për sanksione të reja ndaj Koresë së Veriut, duke kërkuar votimin e saj të hënën.
Projektrezoluta, që arriti të sigurohej nga “Zëri i Amerikës”, bën thirrje për embargo të naftës, benzinës dhe gazit të lëngshëm ndaj Koresë së Veriut.
Pheniani importon gati të gjithë naftën dhe gazin nga Kina dhe pa të, ekspertët thonë se ekonomia do të bllokohej shumë shpejt.
Projektrezoluta synon gjithashtu të ndërpresë eksportet e tekstileve të Koresë së Veriut që i sjellin vendit qindra miliona dollarë të ardhura në vit.
Ajo kërkon gjithashtu të forcojë kufizimet mbi mundësitë e Koresë së Veriut për të dërguar qytetarët e saj për të punuar në vende të huaja, që zakonisht iu kërkohet të dërgojnë pagat e tyre tek qeveria e Phenianit.
Presidenti rus, Vladimir Putin është bashkuar me Kinën në kundërshtimin e sanksioneve për Veriun, duke këmbëngulur se negociatat janë e vetmja mënyrë për të zgjidhur çështjen. Të dy vendet kanë bërë thirrje për një kompromis që kërkon që Pheniani të heqë dorë nga programi i armëve, në këmbim të dhënies fund të manovrave të përbashkëta ushtarake vjetore mes Shteteve të Bashkuara dhe Koresë së Jugut.

SHBA-Koreja e Jugut përfundojnë instalimin e sistemit të mbrojtjes nga raketat
Ndërkohë, në Korenë e Jugut përfundoi të enjten instalimi i një sistemi të debatueshëm të mbrojtjes nga raketat, sistem i prodhimit amerikan, që synon mbrojtjen nga një goditje e mundshme nga Koreja e Veriut. Një autokolonë kamionësh transportoi katër raketahedhës që përbëjnë Sistemin e Mbrojtjes Ajrore në Lartësi (THAAD) në një fushë të vjetër golfi në qytetin jugor të Seongjut, ku do t’u shtohen dy raketahedhësve që tashmë janë operacionalë. Autokolona, e shoqëruar nga 8,000 policë, u desh të kalonte përmes një turme prej 400 demonstruesish, të cilët kishin organizuar një protestë duke u ulur në rrugën që të çonte për në vendin e vendosjes së sistemit të mbrojtjes nga raketat.
Banorët dhe aktivistët kanë ngritur shqetësime lidhur me zërat për rreziqe shëndetësore për shkak të radarëve të fuqishëm të sistemit dhe mundësisë që qyteti të bëhet një objekt i sulmeve nga Koreja e Veriut.
Kina dhe Rusia gjithashtu e kundërshtojnë vendosjen e sistemit THAAD në Korenë e Jugut, duke përmendur shqetësimet e tyre të sigurisë kombëtare. Pekini paraqiti një protestë zyrtare në Seul të enjten mbi komponentët shtesë të sistemit THAAD.

Pamjet duket se u ngjasojnë atyre të fillimvitit 2015. Në mbrëmjen e së mërkurës, në stacion gjendej edhe Sali Aliaj, ish-taksist, nga Mitrovica. Me disa valixhe në duar, së bashku me gruan dhe dy fëmijët, tha për Radion Evropa e Lirë se ia ka mësyrë Gjermanisë, përmes Serbisë.
“Pa viza, pa asgjë… në dorë të Zotit, ku të mundemi do të shkojmë diku të punojmë, se këtu nuk ka perspektivë, nuk ka punë, asgjë. Do të shkoj zorit e lloçit, veç të dalë diku në punë e ta fitoj bukën”, ta zoti Alija.
Përfaqësues të agjencive, të cilat mbajnë relacione të rregullta udhëtimi me autobus Kosovë-Serbi, tregojnë se në ditët e fundit është rritur interesimi i qytetarëve për të udhëtuar në drejtim të Beogradit.
Përparim Pushkolli, menaxher i shitjes së biletave në agjencinë “Adio Turs”, tha për Radion Evropa e Lirë se, kohëve të fundit është shtuar numri i udhëtarëve drejt Serbisë.
“Nuk e di se ku ata po shkojnë, por këto dy-tri ditët e fundit është e vërtetë që ka një fluks nga stacioni i autobusëve në Prishtinë. Kryesisht të rinj që po dalin”, tha Pushkolli, duke shtuar se nuk e di saktë cili është destinacioni i fundit i udhëtarëve të tyre.
“Ky fluks, e kam fjalën për të mërkurën dhe të martën, ngase më herët nuk ka pasur. Po i shfrytëzojnë autobusët tanë deri në Beograd, mandej çka bëjnë nuk e di”, tha Pushkolli.
Megjithatë, të dhënat zyrtare flasin se nuk bëhet fjalë për, siç thuhet, ikje në masë, siç ka pasur në muajt e parë të vitit 2015. Atëbotë, qytetarët e Kosovës shfrytëzonin qytetin Suboticë të Serbisë, i cili gjendet afër kufirit me Hungarinë.
Çdo ditë nga stacioni i autobusëve në Prishtinë për në Beograd, nisen nga pesë autobusë në linjën e rregullt. Përfaqësues zyrtarë të stacionit të autobusëve në Prishtinë hedhin poshtë pohimet se ka fluks ikjesh.
Sheqir Abazi, koordinator i ndërrimit tha për Radion Evropa e Lirë, se nga stacioni i autobusëve aktualisht janë duke operuar linjat e rregullta dhe nuk ka kërkesa për linja të reja.
“Nuk ka fluks të njerëzve që shkojnë jashtë vendit. Kemi pesë nisje gjatë 24 orëve që operojnë në drejtimin Prishtinë–Beograd. Prej tyre, dy nisje paradite dhe tri pasdite. Të mërkurën në ndërrimin e tretë kam punuar unë. Janë dhënë 40 bileta si çdo herë që jepen për relacionin Prishtinë-Beograd”, tha Abazi.
Edhe në qendrën për menaxhimin e stacionit të autobusëve në Beograd, thonë se nuk ka numër të shtuar autobusësh, përveç pesë linjave të rregullta që qarkullojnë në relacionin Prishtinë–Beograd. Sipas të dhënave nga kjo qendër, në vitin 2015, numri i autobusëve në këtë linjë sillej nga 10 deri në 12 në ditë.
Mbrëmjen e së mërkurës kishte më shumë njerëz se zakonisht, por disa prej tyre thoshin se kishin dalë të shtyrë nga kureshtja për të parë nëse ka ikje.
Edhe autoritetet e rendit kanë hedhur poshtë pohimet për diçka të tillë.
Policia e Kosovës ka njoftuar se, “janë ndërmarrë veprime për verifikim të informacioneve dhe bazuar në punën operative të zyrtarëve policorë dhe në bashkëpunim me Ministrinë e Transportit dhe Infrastrukturës, si dhe autoritetet tjera, është konstatuar se nuk bëhet fjalë për kurrfarë eksodi të qytetarëve dhe nuk ka vend për shqetësime të tilla”.

Sekretari i Shtetit, Rex Tillerson është zotuar të kryejë një riorganizim madhor të Departamentit amerikan të Shtetit. Të mërkurën, kryetari i Komisionit të Dhomës së Përfaqësuesve për Marrëdhënie me Jashtë, Ed Royce, ishte i pranishëm në një takim që u mbajt në Departamentin e Shtetit, ndërsa një numër ish-ambasadorësh dhe udhëheqësish biznesi dorëzuan një raport me rekomandime për reformimin e Departamentit të Shtetit. Ky grup dypartiak ekspertësh thotë se është e nevojshme për ta fuqizuar Departamentin e Shtetit, në një kohë ndryshimesh të mëdha dhe të shpejta të sfidave dhe kërcënimeve globale. Korrespondentja e “Zërit të Amerikës”, Cindy Saine njofton nga Departamenti i Shtetit.
Kryetari i Komisionit të Jashtëm të Dhomës së Përfaqësuesve, republikani Ed Royce, tha se ai e ka shprehur qartë mendimin e tij se nuk i mbështet shkurtimet e thella në Departamentin e Shtetit dhe në Agjencinë për Zhvillim Ndërkombëtar, të propozuara nga administrata Trump.
“Kur administrata njoftoi 30 për qind shkurtime, unë shpreha shqetësim dhe thashë se ne duhet t’i mbështesim dhe jo t’i ndërpresim programet e antiterrorizmit, të zbatimit të ligjit dhe ato humanitare, përballë shtimit të rreziqeve sot”, tha zoti Royce.
Ed Royce i kërkoi sekretarit të Shtetit, Rex Tillerson, që të veprojë me shpejtësi për të plotësuar vendet bosh të zyrtarëve të lartë, si në Departamentin e Shtetit, edhe në ambasadat amerikane në vende të ndryshme të botës.
“Punonjësit e Departamentit kanë nevojë për një zinxhir komande të efektshëm, me qëllim që të zbatojë politikat e administratës dhe detyrat kryesore të sigurisë kombëtare”, tha zoti Royce.
Një grup dypartiak ish-ambasadorësh ishin dakord me këtë qasje, duke thënë se raporti i tyre argumenton se është e nevojshme që Departamenti i Shtetit të fuqizohet, duke pakësuar numrin e sektorëve dhe zyrave dhe për ta bërë të detyrueshëm trajnimin e punonjësve të nivelit të mesëm.
“Ne nuk mund të përballojmë të kemi një Departament Shteti të dobët, me mungesë fondesh, të drejtuar jo mirë, të patrajnuar siç duhet dhe me shumë burokraci. Ne duhet ta fuqizojmë dhe përmirësojmë atë, në mënyrë që të japë më tepër rezultate”, tha ish-ambasadori Crocker.
Një ish-zyrtar i lartë për financat në Departamentin e Shtetit tha se, kostoja e sigurisë diplomatike është rritur së tepërmi që nga koha e sulmeve terroriste të 11 shtatorit të vitit 2001.

Mandatari për formimin e qeverisë së re të Kosovës, Ramush Haradinaj do të përballet të shtunën me votimin në Kuvendin e Kosovës për kabinetin qeverisës, i cili sipas Kushtetutës, do të marrë besimin për qeverisjen e vendit për katër vitet e ardhshme.
Seanca është caktuar për pasdite, nga ora 16:00. Zgjedhja e qeverisë kërkon mbështetjen prej të paktën 61 deputetëve.
Ndonëse, kryetari i Kuvendit të Kosovës, Kadri Veseli, ka paralajmëruar mbajtjen e seancës për votimin e qeverisë së re të Kosovës, për ditën e shtunë, Haradinaj, ende nuk i ka emrat e atyre që do të jenë pjesë e kabinetit qeveritar.
Të paktën, kështu ka deklaruar vetë zoti Haradinaj, i cili ka thënë se ende nuk i ka emrat e ministrave, të cilët do t’i drejtonin dikasteret në qeverinë e tij.
“Jemi duke i bërë përgatitjet për seancë, për nesër (e shtunë). Seanca mund të jetë pasdite. Besoj që jemi në rregull me përgatitjet. Është traditë – unë e kam bërë këtë edhe në vitin 2004 – që kur e thërret seancën, në këtë rast grupi parlamentar, seancën për qeverinë, për programin qeverisës, që me kërkesën së bashku të dorëzohet edhe një program. Por, ky nuk është program i PAN-it, sepse ai bëhet pas një kohe dhe i prezantohet Parlamentit, shoqërisë dhe të gjithëve, por vetëm qëllimet qeverisëse, si dhe lista e kabinetit. Jam duke e plotësuar, por kam vështirësi, sepse nuk m’i kanë sjellë ende krejt emrat”, tha Haradinaj.
Në qeverinë e re, pritet që dikasteret të drejtohen nga Partia Demokratike e Kosovës, Aleanca për Ardhmërinë e Kosovës, Nisma për Kosovën, Aleanca Kosova e Re, Lista Serbe dhe komunitetet e tjera pakicë.
Partia Demokratike e Kosovës, kryesia e së cilës ka mbajtur mbledhje të premten, ka paralajmëruar se në mbrëmje, i dorëzoi zotit Haradinaj emrat e ministrave nga kjo parti.
Lideri i kësaj partie, Kadri Veseli ka thënë se emrat do të publikohen shumë shpejt.
“Do të jenë njerëz që kanë kapacitete morale dhe intelektuale dhe në të njëjtën kohë nuk kanë asnjë pengesë ligjore apo etike që të jenë ministra”, tha Veseli.
Në anën tjetër, Lista Serbe, një ditë më parë ka theksuar se lidhur me pjesëmarrjen në qeverinë e Kosovës do të konsultohet me presidentin serb, Aleksandar Vuçiç, si dhe me shefin e zyrës për Kosovën në Qeverinë e Serbisë, Marko Gjuriç.
Por, i mandatuari për krijimin e qeverisë së re të vendit, Haradinaj, ka theksuar se në vend tashmë është krijuar një traditë e bashkëpunimit me serbët e Kosovës dhe pret që kjo traditë të vazhdojë edhe me Listën Serbe.
“Kjo traditë është e mirë në Kosovë. Çdo qeveri e formuar ka bashkëpunuar me të zgjedhurit e serbëve. Edhe unë jam i hapur të bashkëpunoj me Listën Serbe, pra, me të zgjedhurit e komunitetit serb, sikurse edhe me komunitetet e tjera. Është një komunikim korrekt, por nuk mund të flas për ndonjë epilog tani”, tha Haradinaj.
Sidoqoftë, krijimit të qeverisë së re, i është hapur rruga pas zgjedhjes së kryetarit dhe nënkryetarëve të Kuvendit në seancën e ditës së enjte. Kjo seancë ishte vazhdimi i shtatë i seancës, e cila kishte nisur më 3 gusht. Deri ditën e enjte, koalicioni PAN-nuk kishte arritur të siguronte votat e nevojshme për zgjedhjen e Kadri Veselit në postin e kryetarit të Kuvendit, si dhe nënkryetarëve të tij, në mënyrë që ta përfundonte procesin e konstituimit të legjislativit.