Ish-Kryeministri Berisha ka reaguar pas sekuestrimit të 4 tonëve të drogës nga policia italiane. Në një postim në Facebook Berisha e cilëson si një sukses tjetër spektakolar Noriega-Haki Droga në eksportin e kanabisit! Kapet jahti me 4 tonë hashash i nisur nga Lezha!
“Të dashur miq, në një sukses të ri për rritjen e eksportit të kanabisit, Noriega dhe Haki Droga nisën nga Lezha për në gadishullin e Apenineve jahtin e mbushur me 4 tonë kanabis. Vetëm pesë ditë më parë, në kulmin e operacionit prej 1000 uniformash blu, policia italiane kapi një skaf me 2,3 tonë kanabis. Pra miq, në 5 ditë dyshja famoze Noriega-Haki Droga eksportuan 6.2 tonë kanabis. Ky është një sukses spektakolar. Bravo, aferim dyshja më famoze e drogës në Europë!”, shkruan Berisha.
4 tonelatat e drogës nga Shqipëria u sekuestruan mëngjesin e djeshëm nga policia italiane dhe Guarda di Finanza. Mediat italiane raportojnë se, vlera e drogës së sekuestruar përllogaritet mbi 20 milionë euro.

Pas publikimit të letrës së Haki Çakos, që ngrinte shqetësimin se radarët që monitorojnë hapësirën detare shqiptare nuk janë funksionalë, Ministria e Mbrojtjes nuk vonoi të reagonte, duke hedhur poshtë këtë pretendim të drejtorit të Përgjithshëm të Policisë së Shtetit.
Nëpërmjet një njoftimi për mediat, Ministria e Mbrojtjes bën me dije se sistemi i integruar i vëzhgimit të hapësirës detare është tërësisht funksional, që kur është intaluar në vitin 2009.
“Qendra Ndërinstitucionale Operacionale dhe strukturat e tjera të sigurisë kanë përmbushur detyrimet e veta ligjore, në mënyrën më të mirë të mundshme”, thuhet ndër të tjera në reagimin e Ministrisë së Mbrojtjes.
Ky reagim erdhi pasi u zbulua një letër që drejtori i Policisë së Shtetit, Haki Çako i kishte drejtuar më 31 gusht ish-ministrit teknik të Brendshëm, Dritan Demiraj, duke iu ankuar lidhur me funksionimin e radarëve që monitorojnë hapësirën detare në Shqipëri.
Çako ka bërë me dije se disa prej operacioneve nga ana e policisë për kapjen e gomoneve me drogë, kanë dështuar pasi nuk janë dhënë informacione të sakta për vendndodhjen e gomoneve që trafikojnë drogë.

Si u justifikua Çako për gomonet me drogë drejt Italisë

Më 31 gusht, drejtori i Policisë së Shtetit, Haki Çako i ka nisur një letër ish-ministrit të Brendshëm teknik, Dritan Demiraj, ku e njofton se aksionet antidrogë të policisë në det kanë dështuar falë mosfunksionimit të radarëve të vëzhgimit. Çako i sjell si shembull Demirajt dështimin e operacionit të mbrëmjes së 11 gushtit, ku policia nuk mundi të kapë një gomone që ishte nisur dy kilometra nga plazhi i Zvërnecit. Sipas Çakos, qendra kishte dhënë koordinata të pasakta të lëvizjes së gomones me drogë.
Sipas kreut të policisë, radarët janë aq problematikë, sa ka pasur raste kur gomonet e policisë viheshin në ndjekje të njëra-tjetrës. “Mosdhënia e informacionit krijoi konfuzion dhe pati raste kur mjetet që merrnin pjesë në operacion filluan të ndiqnin njëra-tjetrën në hapësirën detare”, shkruhet në letrën që ka publikuar “News24”.

Ermal Fatajt do t’i duhet të qëndrojë në burg edhe 30 ditë të tjera si i dyshuar se aksidentoi për vdekje turisten 15-vjeçare Ksenia Riok, në Ksamil, 45 ditë më parë. Laboratori i Policisë Shkencore nuk ka mundur të përfitojë një profil gjenetik nga krahasimi i fijeve të flokëve të gjetura në skafin e Fatajt, me ato të viktimës.
Në raportin e dorëzuar në limitin e afateve ligjore, ekspertët kanë sqaruar se në këtë rast duhet të kryhet analiza e ADN-së mitokondriale. Kjo analizë nuk mund të kryhet në vendin tonë, pasi laboratori nuk disponon pajisjen. Për këtë arsye, prokurori ka kërkuar zgjatjen e afateve të paraburgimit me 30 ditë të tjera, derisa të gjendet një mundësi tjetër për të bërë krahasimin.
Nuk sqarohet nëse kjo analizë mund të bëhet në një laborator privat në vend apo do të dërgohet jashtë. 31-vjeçari Fataj do të vazhdojë të qëndrojë edhe një muaj tjetër në qeli. Ai e ka mohuar autorësinë e ngjarjes dhe i vetmi dyshim që e mban në burg është që fijet e flokut, të gjetura në helikën e skafit të tij, mund të jenë të viktimës.
Ngjarja e rëndë ku hum,bi jetën turistja ruse ndodhi më 21 korrik të këtij viti. Një prej dëshmitarëve deklaroi se 15-vjeçarja ruse u godit nga një motor uji që ishte brenda zonës së ndaluar për këto mjete. Sipas të pranishmit, pasi ka çarë vajzën dhe ka parë që në ujë kanë nisur shenjat e gjakut, drejtuesi i motorit të ujit është larguar me shpejtësi, ndërsa një person me një varkë të thjeshtë ka nxjerrë në breg trupin e viktimës. Dëshmitari rrëfen se 15-vjeçarja kishte 20 minuta që nga momenti që e pa ruajtësi i varkave dhe policia është vonuar gati gjysëm ore për të ardhur në vendin e ngjarjes.
“Në tragjedinë që ndodhi në tre ishujt e Ksamilit, vajza është goditur me jetsky brenda kufirit të ishullit dhe personi me motorin e ujit është larguar sapo ka parë njollat e gjakut. Policia po e fsheh faktin që ka qenë një jetsky në ujë. Një person që rri tek varkat që marrim çdo ditë e nxori viktimën nga uji. Ajo ishte e goditur dhe kishte mbi 20 minuta nga momenti që e kishte parë ky. Ai mori në moment policinë dhe ata vonuan gati gjysmë ore, ndërkohë që jetsky u fut brenda kufirit që nuk lejohet dhe që është vetëm për pushuesit që notojnë. Ai që e ka vrarë është zhdukur dhe policia asgjë s’po bën për ta kapur. Theksoj, që nga deti vajzën e ka nxjerrë ky që transportonte njerëz për në ishull me një barkë të vogël. Ajo kishte çarje në trup dhe goditje në kokë”, u shpreh atëherë pushuesi, i cili ishte i pranishëm në vendngjarje.

Policia holandeze ka arrestuar një shqiptar dhe një lituanez pasi u kapën me një sasi të madhe kokaine. Siç raportojnë mediat lokale, shqiptari 25-vjeçar dhe lituanezi 28 vjeç, u kapën në North Brabant, zonë jugore e Holandës. Kokaina u gjet në makinën e lituanezit, i cili po udhëtonte së bashku me të riun shqiptar. Në automjet, policia gjeti 12 kilogramë kokainë. Mbi ta është ngritur akuza e trafikut të lëndëve narkotike dhe pritet të dalin para gjykatës për masën e sigurisë.
Dy të dyshuarit janë arrestuar dhe akuzohen për trafik droge. Shqiptari dhe bashkëpunëtori i tij u kapën në North Brabant, në jug të Holandës. Mediat holandeze nuk kanë bërë të ditur identitetin e 25-vjeçarit shqiptar që u kap me 12 kg kokainë.

Kapet me 23 kg heroinë një shqiptar në Greqi

Policia greke kapi dje një sasi prej 23 kilogramësh heroinë në Athinë me vlerë 350 mijë euro, ndërsa në pranga ranë 5 persona. Tre prej tyre ishin shqiptarë, të cilët drejtonin këtë rrjet droge. Mediat greke kanë zbardhur të tjera detaje rreth të arrestuarve. Shtypi grek shkruan se njëri prej shqiptarëve të arrestuar ka pseudonimin “Maradona”. Ai është 27 vjeç kurse identiteti nuk i është bërë publik.
Dy shqiptarët e tjerë të arrestuar janë 45 vjeç dhe një grua 39-vjeçare. Në pranga ranë edhe dy grekë bashkëpunëtorë të tyre, 19 vjeç dhe 41 vjeç. Sipas hetimeve të policisë, heriona shpërndahej në qytetet e Selanikut, Patras dhe Larisës.
Heroina paketohej dhe mbi të kishte mbishkrime që korrenspondonte me destinacionet ku do të trafikohej, konkretisht me qytetet e sipërpërmendura. Gjatë operacionit antidrogë, policia e Athinës bllokoi të gjithë zonën ku shqiptarët mbanin të fshehur heroinën. Droga u gjet në laboratorin e grupit kriminal. Përveç heroinës, autoritetet sekuestruan edhe 16 kg përzierës, 38 gramë marijuanë dhe 525 euro.

Një 31-vjeçar shqiptar me profesion kamerier në Saint-Denis në Forest të Belgjikës është ekzekutuar me armë zjarri natën midis të martës dhe të mërkurës. Mediat vendase shkruajnë se viktima është Kreshnik Gjini, i cili u vra rreth orës 00:30 të mëngjesit të djeshëm, pak metra larg kafenesë ku punonte prej rreth 6 muajsh.
Dy autorët e ngjarjes janë ende në kërkim. Sipas një dëshmitari, i cituar nga prokurori publik në Bruksel, viktima po shkonte në drejtim të automjetit të tij në parkingun e Forest Abbey, që ndodhej pak metra nga kafeneja.
Atje u shfaqën dy burra të maskuar dhe hapën zjarr në drejtim të tij. “Duke lënë një kafene, viktima dhe një dëshmitar ecin në parkingun e Abbey për të marrë makinën e tyre prapa. Viktima kthehet drejt automjetit dhe qëllohet nga dy burra”, detajon dëshmitari. “Autorët pastaj ikin nga parku i Abbey”, vijon ai.
“Viktima vdiq në vend pas dy plumbave që mori”, tha zëdhënësi i zyrës së prokurorit publik të Brukselit, Ine Van Wymersche, në një deklaratë. Viktima me origjinë shqiptare i njohur nga të gjithë si njeri i rregullt, është përshkruar nga shumë klientë si “i hapur, miqësor dhe bujar”.
Hetues, ekspertë të mjekësisë ligjore dhe ata të balistikës, shkuan në vendngjarje për hetimet. Autorët po kërkohen në mënyrë aktive.
Kreshnik Gjini njihej si person i rregullt në Belgjikë ku edhe punonte prej disa muajsh në një lokal të quajtur Saint-Denis në Forest. Mediat belge hedhin dyshime se vrasja mund të ketë si motive ngjarje të ndodhura në Shqipëri. Gjini më 30 gusht të vitit 2008 ka tentuar të vrasë me armë zjarri një person në Rrëshen. Në ngjarje është përfshirë edhe vëllai i tij Besmiri, i cili mbeti i plagosur aksidentalisht nga një plumb që e qëlloi në pjesën e dorës nga vëllai i tij.

Tre persona mbetën të plagosur në një aksident rrugor në Tiranë. Ngjarja ndodhi pasditen e djeshme rreth orës 15:25 në zonën e Freskut në Tiranë. Sipas informacioneve të policisë, të plagosur janë dy vajza dhe një djalë, të cilët u transportuan për në spital.
“Mjeti tip ‘Volkswage’ me drejtues shtetasin E.D., është përplasur me mjetin tip ‘Fiat’ me drejtues shtetasin K.L, ku si pasojë e përplasjes është dëmtuar drejtuesi i mjetit tip ‘Fiat’, shtetasi K.L., dhe pasagjeret po në këtë mjet, shtetaset B.Ç., dhe H.B., të cilët janë jashtë rrezikut për jetën”, sqaron policia.
Forcat e zjarrfikësve ndërhynë shpejt për të nxjerrë një nga të plagosurit që kishte mbetur i bllokuar. Grupi hetimor po punon për zbardhjen e rrethanave dhe shkaqeve të përplasjes së mjeteve.

Një operacion i madh kërkimi ka nisur në Zvicër dhe më gjerë, pasi një shqiptar i dënuar për vrasje dhe me rrezikshmëri të lartë është arratisur nga burgu. Bëhet fjalë për shqiptarin nga Kosova me emrin Bashkim L., 35 vjeç i cili është arratisur gjatë natës mes së premtes dhe të shtunës së javës së kaluar nga burgu qendror i Friburgut në Zvicër.
Lajmi është bërë publik sot nga policia e Friburgut, e cila ka kërkuar nga qytetarët që të japin informacione nëse e shikojnë të arratisurin. Sipas policisë, dyshimet janë që ai të jetë larguar nga Zvicra dhe të ketë mbërritur në Kosovë, theksojnë mediat zviceriane.
Bashkim L., ishte dënuar në vitin 2013 për vrasjen e një shqiptari nga Kosova, por që jetonte në Itali, pas përplasjeve për kontrollin e territoreve të shitjes së drogës. Policia e ka shpërndarë foton e shqiptarit nëpër të gjithë Zvicrën dhe e ka shpallur në kërkim ndërkombëtar shqiptarin nga Kosova.

Ndërtimi i një inceneratori për grumbullimin e mbetjeve spitalore, por edhe veterinare dhe më pas asgjësimin e tyre pranë një zone të banuar në Shijak ka futur në konflikt banorët dhe bashkinë e këtij qyteti me firmën kontraktuese, por edhe me Ministrinë e Mjedisit.
Banorët shprehen kundër ndërtimit të këtij impianti, duke e akuzuar firmën se po merr përsipër asgjësimin e mbetjeve të konsideruara të dëmshme ende pa krijuar teknologjinë e duhur. “Ndotja e ajrit, gazrat ku do të çlirohen? Do të çlirohen në ambient. Po ndeze zjarr për të djegur barishte po ndotet ajri”, u shpreh një banore. Një banor tha se, “shtëpia ime është 50 metra, ja ku është. Jam kundër kësaj nuk diskutohet, nuk ikim nga këtej po nuk u rregullua ky”.
Por përfaqësues të firmës gjatë marrjes në pyetje të policisë kanë deklaruar se disponojnë një leje mjedisore nga Ministria e Mjedisit dhe se kanë kapacitetet e duhura për këtë impiant.
Vetë Bashkia e Shijakut, e cila nuk e ka dhënë miratimin për këtë impiant thotë se kompania e ka nisur aktivitetin në mënyrë të paligjshme. “Është një leje 32b që quhet, e cila është dhënë për autoklavën, asgjësimin e një pjese të mbetjeve spitalore dhe tashmë ka dashur që të marrë një leje të dytë për incenerim të mbetjeve dhe janë totalisht jashtë çdo lloj norme”, tha Valbona Mazerka.
“Kur njoftimi është bërë sot në orën 10 ishte konsultim me publikun dhe deri në këto momente kushtet që ka paraqitur subjekti të paktën tek raporti që ka marrë DRM-ja e Durrësit nuk përkon me bazën ligjore dhe me atë çka është reale brenda”, tha Albiona Mehmeti.
Akuza se gjithçka është ndërmarrë pa transparencë dhe pa zhvilluar asnjë dëgjesë publike me përfaqësues të komunitetit, ka nxitur edhe policinë të shoqërojë dhe të marrë në pyetje përfaqësuesit e firmës. Gjithsesi sipas ligjit bashkia duhet të thotë fjalën e saj nëse miraton apo jo ndërtimin e një impianti përpunimesh mbetjesh urbane që në rastin konkret nuk ka ndodhur. Pritet fundi i hetimeve për të zbardhur çështjen në fjalë.