28 është numri i të mbyturve në sezonin veror e 2017, ndoshta ky numër do të ishte më i vogël nëse do të ishin marrë masa dhe gjërat do të funksiononin siç duhet në Shqipëri.
Ligji shqiptar parashikon krijimin e një ambienti të sigurt për turistët e huaj dhe shqiptar. Një VKM e dalë në 18.05.2016 në Nenin 6. Pika c, parashikohet që pushteti lokal që jep ambientet me qira, bizneseve private duhet t’i detyrojë ata në bazë të VKM që të ndërtojnë një kullë vrojtimi dhe të punësojnë një vrojtues.
Gazetari i emisionit Stop ka bërë një investigim në qytetet bregdetarë dhe asnjë prej tyre nuk ka një vrojtues që të qëndrojë në punë për t’i ardhur në ndihmë pushuesve që mund të gjenden në rrezik kur janë me pushime.
Në 27 prill të vitit 2017 është tenderuar nga agjencia Kombëtare e Bregdetit një kullë me shumën prej 41 milion lekë të vjetra, adresa e dhënë është në Dhërmi.
Gazetari ka shkuar në Dhërmi për të parë, se ku është kulla, se çfarë ka ajo që kushton aq shumë. Por edhe pse gazetari kontrolloi të gjithë vijën bregdetare në Dhërmi nuk gjeti asnjë kullë që të kishte të bënte me tenderimin e Agjencisë së Bregdetit.
E vetmja kullë që ishte në Dhërmi ishte një kullë e cila ishte ndërtuar nga një subjekt privat.
Por gazetari nuk e ka lënë më kaq, ai ka kontaktuar me Auron Taren kreun e Agjencisë së Bregdetit, i cili tha se publikimi i tenderit 41 milionë lekë për një kullë që nuk u bë kurrë, është lapsus. Ndërsa investimi në kulla pa njerëz, është thjesht shumë parash e hedhur dëm.
Auron Tare: Në fakt tenderimi që është që bërë në Maj dhe në Qershor dhe është një tenderim i mbartur nga viti i kaluar për vendosjen e 13 kullave të cilat janë dhe në dokumentacion me një vlerë prej 5 milion lekësh të vjetra, nga subjekti që u fitua. Këto kulla janë vendosur në Vlorë, Lungomare, Orikum dhe plazhin e vjetër sipas kërkesës së bërë nga Bashkia e Vlorës, për arsye të fluksit të vizitorëve. Këto kulla, 13 copë brenda këtij tenderimi janë vendosur në plazhin e Vlorës.

Edhe pak orë mund t’i duhen Ermal Fatajt për të provuar sërish aromën e lirisë. 45 ditë pasi u vu në pranga si autor i dyshuar për vrasjen aksidentale në plazhin e Ksamilit të 15-vjeçares ruse Ksenia Riok, dosja ndaj Fatajt nuk përmban provën kryesore; ekspertizën e ADN-së për fijet e flokëve të gjetura në helikën e skafit të tij. Që prej korrikut, Laboratori i Policisë Shkencore ende nuk ka kthyer përgjigje nëse qimet e gjetura në pjesën e poshtme të mjetit lundrues të 31-vjeçarit Ermal Fataj, i përkasin apo jo 15-vjeçares ruse. Mungesa e një raporti për përgjigjet e ADN-së mbi fajësinë e Ermal Fataj, mund të ndikojë në lirimin e tij nga burgu.
31-vjeçari u arrestua pas një aksidenti të ndodhur në korrik në plazhin e Ksamilit, ku mbeti e vdekur 15-vjeçarja Ksenia Riok. Gjykata e Sarandës kishte vendosur masën e sigurisë atë të arrestit me burg 45 ditor ndaj autorit të dyshuar. Por mesa duket Prokuroria nuk po arrin të provojë fajësinë ndaj të dyshuarit kryesor të saj për këtë ngjarje.
E mërkura e 6 shtatorit pritet të jetë afati i fundit i qëndrimit në izolim për Ermal Fatajn. Deri në këtë fazë të hetimeve Laboratori i Policisë Shkencore nuk ka arritur të krijojë një raport të plotë mbi përgjigjet e analizave të gjetura në helikën e skafit të 31-vjeçarit, për të përcaktuar se të kujt ishin fijet e flokut. Një element thelbësor ky, për vijimin e hetimit.
Pa këtë akt-ekspertimi dhe pa një kërkesë për shtyrjen e afateve të mbajtjes pas hekurave të biznesmentit, atëherë ndaj këtij të fundit prevalon pafajësia dhe mund të ndiqet në gjendje të lirë. Gjatë deklarimit në polici, Fataj kishte theksuar se ka qenë duke lundruar në momentin kur ka ndodhur ngjarja dhe nuk ka ndjerë asnjë goditje. Në të kundërt, kishte pohuar ai do t’i kishte dhënë ndihmën e parë 15-vjeçares Kseniya Ryok. Nëse edhe biznesmeni 31-vjeçar do të dali i pafajshëm, atëherë ky do të jetë rasti i dytë që kjo ngjarje regjistrohet për autor. Një vit më parë, për një histori të ngjashme u akuzua edhe Fatmir Kuçi, për aksidentin me vdekje të një tjetër turisti rus, ngjarje kjo e ndodhur në zonën e livadhit në Himarë. Fatmir Kuçi mori pafajësinë në apel dhe çështja u pushua.
Ngjarja e rëndë ku hum,bi jetën turistja ruse ndodhi më 21 korrik të këtij viti. Një prej dëshmitarëve deklaroi se 15-vjeçarja ruse u godit nga një motor uji që ishte brenda zonës së ndaluar për këto mjete. Sipas të pranishmit, pasi ka çarë vajzën dhe ka parë që në ujë kanë nisur shenjat e gjakut, drejtuesi i motorit të ujit është larguar me shpejtësi, ndërsa një person me një varkë të thjeshtë ka nxjerrë në breg trupin e viktimës. Dëshmitari rrëfen se 15-vjeçarja kishte 20 minuta që nga momenti që e pa ruajtësi i varkave dhe policia është vonuar gati gjysëm ore për të ardhur në vendin e ngjarjes.
“Në tragjedinë që ndodhi në tre ishujt e Ksamilit, vajza është goditur me jetsky brenda kufirit të ishullit dhe personi me motorin e ujit është larguar sapo ka parë njollat e gjakut. Policia po e fsheh faktin që ka qenë një jetsky në ujë. Një person që rri tek varkat që marrim çdo ditë e nxori viktimën nga uji. Ajo ishte e goditur dhe kishte mbi 20 minuta nga momenti që e kishte parë ky. Ai mori në moment policinë dhe ata vonuan gati gjysmë ore, ndërkohë që jetsky u fut brenda kufirit që nuk lejohet dhe që është vetëm për pushuesit që notojnë. Ai që e ka vrarë është zhdukur dhe policia asgjë s’po bën për ta kapur. Theksoj, që nga deti vajzën e ka nxjerrë ky që transportonte njerëz për në ishull me një barkë të vogël. Ajo kishte çarje në trup dhe goditje në kokë”, u shpreh atëherë pushuesi, i cili ishte i pranishëm në vendngjarje.
Ai shton më tej se situata në Ksamil është me të vërtetë e frikshme, duke qenë se as 200 metra larg bregut të detit lundrojnë me shpejtësi motorë uji, të cilët rrezikojnë seriozisht jetën e të gjithëve dhe askush nuk bën as një gjë për të ndalur këtë rrëmujë të madhe.

Shqiptari i arrestuar në Itali gjatë një operacioni të Guardia di Finanza-s, ku u sekuestruan 2.3 tonë marijuanë që vinte nga Shqipëria, ka kyçur gojën para gjykatës italiane. Mediat italiane raportonin dje se, shqiptari me iniciale K.D., 24 vjeç, dhe italiani Andrea Reccia, 63 vjeç (i arrestuar gjithashtu gjatë operacionit) nuk kanë folur para gjykatëses së Ascoli Piceno, Rita De Angelis. Për të dy, gjykata vendosi që të qëndrojnë në burg për arsye hetimore.
Gjatë natës duke u gdhirë e shtunë, në San Benedetto në Tronto, u kap sasia e konsiderueshme e drogës që sipas zv/prokurores të Ascoli Pieno, ishte nisur nga Shqipëria, raportuan mediat italiane.
Droga e nisur nga Shqipëria dhe e mbërritur natën në Itali, mësohet se ishte shkarkuar në deltën e lumit Tronto dhe më pas e ngarkuar në një furgon. Policia kishte marrë informacione për këtë ngarkesë droge dhe i ka bërë pritë furgonit, ku udhëtonin edhe të arrestuarit.
Brenda mjetit janë gjetur 40 pako me kanabis sativa. Më pas, motovedetat e Guardia Di Financës të nisura nga Ancona dhe Tronto kanë gjetur në det edhe 73 pako të tjera me kanabis që ishin hedhur nga trafikantët.
Gomonia e drogës ishte larguar me shpejtësi dhe italianët e kanë ndjekur deri në kufirin e ujëra territoriale kroate, ku edhe kanë ndërprerë ndjekjen. Pranë vendit ku ishte shkarkuar droga janë gjetur edhe 25 bidona benzinë për të furnizuar gomonen.

Një 30-vjeçar shqiptar është arrestuar në Itali, pasi është kapur me 8 kilogramë kokainë. Arrestimi është bërë të enjten e kaluar, kur policia rrugore e Veronës ndaloi një makinë “Peugeot 407” me targa belge, e cila drejtohej nga shqiptari.
Kontrolli zbuloi shtatë “bukë” kokaine, me peshën totale 8 kilogramë që e kishte fshehur pas sinjaleve të pasme të makinës. 30-vjeçari me iniciale I.X., u arrestua dhe të shtunën në mëngjes u paraqit para gjyqtarit, i cili vendosi masën e sigurisë arrest në burg.

Tre shqiptarë kapen me heroinë dhe euro në Athinë

Gjatë një operacioni të zhvilluar nga policia greke në Athinë është zbuluar një magazinë droge dhe janë vënë në pranga 5 persona, 3 prej tyre shtetas shqiptarë. Sipas mediave greke në një magazinë në Aspropirgo të Athinës janë sekuestruar 23 kg heroinë; 38.8 gramë marijuanë; 16.5 kg përzierës; 1 karabinë dhe 525 euro. Mësohet se droga magazinohej në Athinë dhe shitej në Selanik, Patra dhe Larisa. Për sa i përket të arrestuarve ata janë dy meshkuj shqiptarë 27 dhe 45 vjeç, një femër shqiptare 39 vjeçe dhe dy grekë 19 dhe 41 vjeç.
Policia greke ka asgjësuar një laborator të përpunimit të drogës, ndërsa ka sekuestruar dhe një sasi të madhe heroine. Përfundimi i operacionit është komunikuar të martën në mesditë, nga drejtori i sigurimit publik të Atikës, gjeneral major Christos Papazafeiris. Sipas tij, në pranga janë vënë pesë persona, tre shtetas shqiptarë, njëra prej të cilave femër, si dhe dy shtetas grekë. Të arrestuarit janë të moshës nga 19 deri 45 vjeç.
Laboratori funksiononte në një kamp romësh, në pjesën perëndimore të Athinës. Por nuk është thënë nëse edhe të vetë të arrestuarit ishin romë. Policia ka sekuestruar më shumë se 23 kg heroinë, të ambalazhuar në 49 paketa me peshë afërsisht 500 gramë secila.
Gjithashtu është dhe një sasi prej 16,5 kg lëndë stimuluese që përdoret në përpunimin e heroinës, si dhe një sasi e vogël kanabisi, e paketuar në doza të vogla gati për shitje. Sipas policisë, heroina e përpunuar në atë laborator, trafikohej në zona të ndryshme të Greqisë dhe kryesisht në Selanik, Patra dhe Larisa. Madje janë gjetur dhe qese plastike bosh, por që kishin etiketa ku shkruheshin emrat e këtyre qyteteve. Janë sekuestruar gjithashtu një furgon, një armë gjahu, një sasi e vogël parash, tetë celularë, etj.

Ditën e djeshme dy vëllezër hipën në tarracën e një pallati 5-katësh nga ku kërcënuan me vetëvrasje. Ata argumentonin se shtëpia e tyre, me dokumente të rregullta do t’i kalojë padrejtësisht ish-pronarëve. Një ngjarje e tillë ka alarmuar shumë qytetarë dhe policinë, e cila ka arritur të negociojë me dy vëllezërit Bejko.
Ndërkohë, pasi zbritën nga pallati, njëri prej vëllezërve Bejko, Damini tha në një lidhje telefonike me “Ora News” se po u vidhen banesat. Damin Bejko deklaroi se e kishte njoftuar Kryeministrin Rama një ditë më parë për këtë çështje. Ai zbuloi mesazhin ku ia kishte parashtruar të gjithë problemin e familjes së tij dhe të vëllait, sikundër e apelonte të ndalonte tragjedinë e radhës.
“Mund të ndodhë si te ai prindi i Korçës para 6 muajve, ia kam cilësuar dhe Kryeministrit në mesazh, mund të ndodhë ai veprim. Nuk kam ku t’i çoj dhe shkolloj fëmijët. Një fëmijë e kam 4 vjeç dhe tjetrin 13. Po gëzohesha këtë vit që t’i çoja në bankat e shkollës dhe të kopshtit, por këta njerëz nuk më lënë, duan të shkatërrojnë familjet, nuk pyesin për njerëzit e thjeshtë.
Janë bërë avokatë të çështjes dhe mbrojnë pisllëkun, hajdutllëkun, falsifikimin. Çertifikata që zotërojnë zotërinjtë është blerë me para në dorë në korridoret e hipotekës. Është e vërtetuar në gjyq para prokurorit, para gjykatësve.
Gjykatësi Rexhep Bekteshi që në mënyrë të prerë vendosi: Është shkelur vendimi i Gjykatës së Lartë dhe çertifikata ka dalë 6 muaj me vonesë. Çështjen ia kaloi direkt Prokurorisë. Prokuroria fle gjumë. Ne endemi sipër tarracave për t’u flijuar.
Në rast se do të ndodhë përsëri ju them jo ky rast, por do të jetë edhe më ekstrem. I kam marrë parasysh të gjitha. Derisa unë do të dal në rrugë të madhe me familjen, nuk kam asnjë lloj zgjidhje apo mundësie për strehim, unë do të detyrohem të marr një akt të tillë”, shprehet Damian Bejko.
Dy vëllezërit Bejko në Durrës hipën në majën e një pallati dhe kërcënuan se do të hidhen nga aty. Ngjarja ndodhi në lagjen nr.11 të qytetit bregdetar. Nga hetimet e para të policisë mësohet se shkak është bërë kthimi i banesave të tyre tek ish-pronarët. Ata hipën në tarracën e pallatit ku jetojnë pasi Përmbarimi do t’i nxjerrë nga shtëpia dhe kërcënuan me vetëvrasje për vendimin e gjykatës. Policia shkoi menjëherë në vendngjarje, dhe pas negociatave dy vëllezërit zbritën nga tarraca e pallatit.

Një makinë është djegur mesditën e djeshme në fshatin Panaja të Vlorës. Burime nga policia lokale kanë bërë të ditur se rreth orës 14:10, në Sallën Operative Vlorë ka ardhur një telefonatë se në aksin rrugor Novoselë-Vlorë, tek mbikalimi në Panaja, ka marrë flakë një makinë. Policia së bashku me shërbimin zjarrfikës kanë shkuar në vendngjarje, duke bërë të mundur fikjen e zjarrit.
Nga verifikimi paraprak i policisë ka rezultuar se ka qenë mjeti tip ”Ford Focus”, me targë AA 875 NV, i djegur pothuajse pjesërisht, me drejtues mjeti shtetasin E.A., 22 vjeç, banues në Risili, Vlorë. Nga zjarri në automjet nuk ka persona të dëmtuar. Grupi hetimor po punon për zbardhjen e plotë të shkakut të rënies së zjarrit në automjet.

Një aksident me vdekje ka ndodhur mëngjesin e djeshëm pranë rotondos së Kolonjës në autostradën Fier-Lushnjë. Një banor i zonës, 72-vjeçari Kimet Hoxha nga fshati Ardenicë ka humbur jetën i përplasur nga një makinë. Autori nuk ka ndaluar për t’i dhënë ndihmën e parë, por është larguar me shpejtësi nga vendi i ngjarjes. Policia e Lushnjës tha se, ngjarja ka ndodhur rreth orës 05:40, në fshatin Ardenicë, ndërsa nuk është identifikuar mjeti që shkaktoi aksidentin dhe se ka nisur hetimet. Mjeti që ka shkaktuar aksidentin është larguar nga vendi i ngjarjes. Grupi hetimor po punon për identifikimin e mjetit dhe të personit që e drejtonte si edhe për zbardhjen e plotë të rrethanave të ngjarjes.
Po ashtu një aksident i rëndë ka ndodhur mesditën e me në aksin rrugor Lezhë-Laç ku janë përplasur dy automjete. Për pasojë kanë mbetur të plagosur disa persona. Policia ka shkuar në vendin e ngjarjes, ndërsa nuk bëhen të ditura shkaqet e aksidentit.

Një person i akuzuar për korrupsion është vënë nën hetim nga Policia e Tiranës. Miratim Mezini, 34 vjeç, banues në Tiranë u ndalua gjatë ditës së djeshme, pas videos së publikuar gjatë së hënës në emisionin investigativ “Stop” të Televizionit “Klan”. Ndalimi i tij u bë, pasi duke qenë me detyrë administrator i një shoqërie punësimi, duke i marrë një shumë prej 320 euro një personi e ka pajisur atë me çertifikatë trajnimi për përfundimin e kursit profesional, ndërkohë që nuk i është nënshtruar testimit teorik dhe praktik.
Nga hetimet e kryera rezulton se çertifikata e lëshuar nuk është pasqyruar në regjistrat e Amzës. Në cilësinë e provës materiale janë sekuestruar 70 çertifikata kursi profesional dhe dy regjistra Amze. Ndaj të dyshuarit, materialet iu referuan Prokurorisë së Tiranës për veprat penale “Korrupsion pasiv në sektorin privat” dhe “Falsifikim i dokumenteve”.
Kamera e fshehtë e emisionit investigativ u ndal në Agjencinë Shqiptare të Punësimit, e licencuar për trajnime në profesione të ndryshme. Administratori Miratim Mezini siç mund të shihni në videon më poshtë negocion me qytetarin dhe pas disa bisedave pranon që qytetari në fjalë të marrë një çertifikatë 3-mujore trajnimi për “punime dekorative dhe gipsi”.
Pasi paguan 320 euro, shtetasi i interesuar është “i trajnuar” në punimet e gipsit dhe gati për tregun gjerman të punës, edhe pse nuk ka bërë asnjë ditë të vetme trajnim.