Mbi 100 vatra zjarri dhe mijëra hektarë me pisha të djegura vetëm në muajin gusht në Gjirokastër. Për fat të mirë nuk pati dëme në banesa dhe në njerëz, por dëmi në natyrë është i pallogaritshëm. Me logjistikë të dobët, infrastrukturë të vështirë, të paktë në numër, por megjithatë forcat zjarrfikëse thonë se bënë gjithçka mundën.
“Ne vetëm në muajin gusht kemi pasur 87 vatra zjarri, 3 zjarre të tjera në godina si dhe tre ndërhyrje në shtëpi, Ndërhyrjet operacionale kanë qenë mbi 100”. Sipas shefit të zjarrfikësve Kujtim Bizhga, shumica e zjarreve kanë qenë të qëllimshëm nga banorë të zonës. “Zjarret nuk i shkaktoi natyra, por dora e njeriut në shumicën e rasteve”, thotë ai.
Pyjet e mrekullueshme përballë Ujit të Ftohtë u shkrumbuan gjatë kësaj vere. Banorët që jetojnë në këtë zonë shprehen se, të gjithë zjarret kanë qenë të qëllimshme, ndërkohë që policia nuk ka vepruar në asnjë rast. Sipas tyre, mafia e drogës që vitin e kaluar ka pasur epiqendër Tepelenën, po hap toka të reja për mbjelljen e kanabisit.
Që trafikantët e drogës të mbështetur nga kreu i Bashkisë Tepelenë, Tërmet Peçi, janë zotër të territorit në këtë rreth, u vërtetua vitin e kaluar, kur nuk ra asnjë zjarr, pasi vendi ishte i mbushur me qindra parcela me kanabis me lejen dhe mbrojtjen e forcave të policisë. Këtë vit, trafikantët të mbështetur edhe nga policia po djegin pyjet për të hapur toka për mbjelljen e kanabisit.
Në Qarkun e Fierit, gjatë stinës së verës janë regjistruar 356 raste zjarresh. Për pasojë janë djegur me dhjetëra hektarë me pyje dhe pemë frutorë. Në lidhje me këtë situatë, prefekti i Qarkut Vasil Bregu zhvilloi një takim me përfaqësues të Bashkisë dhe Policisë. Për përballimin e Emergjencave, Bregu kërkoi një bashkëpunim më intensiv mes institucioneve. Në qendër të takimit ka qenë dhe aksioni kundër ndërtimeve pa leje, për të cilin prefekti tha se nuk synon terrorizmin e qytetarëve, por orientimin e tyre drejt rrugës ligjore. Po ashtu, prefekti apeloi për rehabilitimin e rezervuarëve dhe kanaleve kulluese për t’i paraprirë reshjeve të shiut gjatë stinës së dimrit, të cilat vitet e kaluara kanë shkaktuar përmbytje.

Ulja e nivelit të Liqenit të Shkodrës për shkak të thatësirës ka nxjerrë në sipërfaqe një anije avullore austro –hungareze, e cila mendohet se i përket shekullit të 19-të. Ky mjet lundrimi me gjatësi 20 metra dhe 4 metra i gjerë dëshmon se rreth 100 vjet më parë ujërat e Liqenit të Shkodrës kanë qenë të lundrueshëm edhe nga mjete të mëdha. Në gjuhën teknike ky mjet quhet Pirroskaf. Nxjerrja e saj nga uji dhe ekspozimi në bregun e liqenit, do të ishte një vlerë e shtuar për turizmin e Shirokës.
Anija është ruajtur në gjendje të mirë nën ujë dhe i vetmi dëmtim që ka pësuar është në pjesën e poshtme aty ku ka marrë edhe goditje nga një mjet shpërthyes, që i ka shkaktuar edhe mbytjen. Anija ndodhet prej vitesh nën pushtetin e barishteve dhe mbetjeve të tjera, por gjithçka është gjetur në këtë anije, i është dërguar me një raport të saktë, Ministrisë së Kulturës.
Mendohet se ajo ka qenë anije ushtarake, ndërsa prania e një avulloreje të tillë është një rast i rrallë e ndoshta unik në Ballkan. Sipas historianëve, në Itali janë disa që ruhen për turizëm. Anija avullore ushtarake që banorët e Shirokës e quajnë anija austriake, nuk është prekur asnjëherë prej tyre. Ajo ruhet në ujërat e liqenit si diçka me vlerë për të cilën duhet të kujdesen organizmat përkatës për ta kthyer në një objekt të vizitueshëm dhe me vlera historike.

Ish-Kryeministri Berisha ka bërë publike një video të gjendjes së disa prej reparteve në Qendrën Spitalore Universitare “Nënë Tereza” në Tiranë. Gjendje e mjerë në Spitalin “Nënë Tereza”! Lexoni mesazhin dhe shikoni videon e qytetarit dixhital’, shkruan ish-Kryeministri Berisha në Facebook, duke e shoqëruar edhe me mesazhin e qytetarit.
“Përshëndetje zoti Sali Berisha. Ndodhem te Spitali “Nënë Tereza” për t’i bërë një vizitë një njeriut tim, por kur pashë një pacient të sëmurë në një krevat kam ngelë pa mend. E kishin vënë si në sedilet e Ifa-ve të Enverit, se krevat unë s’mundem ta quaj këtë. Po të dërgoj dhe foton. Me respekt”, shkruan qytetari.

Në Divjakë autobuzët e linjës Çermë-Divjakë po digjen sapo hidhen në qarkullim. Nuk dihen ende shkaku i këtyre ngjarjeve, por shoferët thonë se kjo ndodh për shkak të konkurrencës. Ky është autobuzi i tretë që digjet brenda tre muajve. Dy janë djegur tërësisht, ndërsa autobuzi i tretë pjesërisht. Pronarët e tyre kanë lajmëruar policinë për ngjarjen, por deri tani nuk janë zbuluar autorët. Djegia e autobuzëve urban të linjës Çermë-Divjakë ka ndezur frikën e shoferëve të kësaj linje. Leonidha Spaho dhe Viktor Prifti, janë shoferët e autobuzëve, i fundit u dogj dy ditë më parë në rreth rrotullimin e Çermës. Dyshimet për djegien e urbanëve sipas tyre, bien mbi konkurrencën në treg.
Pas djegies së autobuzëve të fundit, Prokuroria e Lushnjës ka nisur hetimet ndaj disa shoqatave të linjës së transportit urban që operojnë në zonën Lushnjë-Divjakë dhe Çermë-Divjakë. Konkurenca për marrjen e linjës së transportit urban janë dyshimet e vetme edhe të pronarëve të autobuzëve të djegur.

Një kultivues droge në Krujë ushtron terror tek qytetarët, ndërsa policia nuk e arreston. Denoncimi është bërë nga ish-Kryeministri Berisha pas mesazhit të marrë nga një qytetar nga Kruja. Sipas qytetarit, mbrëmjen e djeshme në fshat ka plasur arma për pronësinë e një rruge dhe policia nuk ndërhyn, pasi i përfshirë në konflikt është shtetasi Tonin Troksi.
“Në shtetin e Noriegës, çunat e krimit janë në anën e trafikantit! Lexoni denoncimin e qytetarit dixhital!”, shkruan Berisha.
“Mirmrama Doktor. Jam një banues i fshatit Murqinë të rrethit Krujë. Mbrëmë rreth orëve të darkës për pak ndodhi një tragjedi në fshatin tim ku unë banoj. Në lagjen “Bregu Budullës” janë ngritur tensionet për hapësirën e një rruge lagjeje. Po përlesheshin me pistoleta, ndërsa tensionet nuk janë zbutur, por e kundërta ka ndodhur, janë nxehur më shumë. Ju bëj me dije juve se, zoti Tonin Troski është i armatosur dhe kultivant i bimëve narkotike si dhe përdorus i drogës, po bën terror në lagje. Policia është në dijeni, por nuk po bën asgjë… Ju lutem Doktor unë që po ju shkruaj të ngelem anonime…”, shkruan qytetari.

Policia italiane ka bërë të mundur arrestimin e një shqiptari, pasi gjatë një kontrolli në banesën e tij i janë gjetur 15 kilogramë heroinë, e cila në treg kap vlerën e 500 mijë eurove. 43-vjeçari me origjinë shqiptare, emri i të cilit nuk bëhet i ditur për arsye hetimi, nuk është një emër i panjohur për policinë italiane.
Karabinierët kanë qenë duke bërë një kontroll të rastësishëm dhe kanë ndaluar shqiptarin, por në makinën e tij u gjetën disa doza heroinë, të cilën ai do ta shiste. Ai është shoqëruar në kazermë dhe gjatë marrjes në pyetje ka gënjyer për banesën e tij. Më pas policia ka nisur hetimet dhe kur ka mbërritur në vilën e tij në Lazzate ka zbuluar në dhomën e gjumit një qese plastike që përmban 200 gramë marijuanë, ndërsa në brendësi të një frigoriferi në bodrum 15 kilogramë heroinë. Sipas mediave italiane vlera e drogës së sekuestruar kap shifrën e 500 mijë eurove.

Disa pushues kosovarë u grabitën dhe u vodhën nga një pronar varkash. Policia arriti ta zbulojë dhe ta vendosë në pranga 23-vjeçarin Andi Sulo, banor i Durrësit. Kapja e tij u bë në lagjen Nr.13 Plazh, ndërsa ishte duke i vjedhur çantën me 200 euro, 5 telefona celularë dhe sende personale disa shtetasve kosovarë, një grup ansambli, të cilët kishin ardhur me pushime. Gjithashtu, nga veprimet hetimore të kryera u dokumentua se ky person për motive të dobëta, ka goditur me grushta shtetasin B.L. 25 vjeç, banues në Kosovë.
Një 42-vjeçar ka mbetur i plagosur pas një sherri me një 27-vjeçar, i cili e ka goditur më pas me thikë. I plagosuri me iniciale B.H u qëllua mbrapa Pallatit të Kulturës në Tiranë dhe mbeti i plagosur lehtë. Ai ishte duke debatuar me 27-vjeçarin Azgan Cengu. Dyshohet se sherri mes tyre ndodhi për shitjen e disa dozave kanabis, ndërsa Policia e Tiranës thotë se shkak ishin motivet banale.
Autori i plagosjes, 27-vjeçari Cengu u arrestua menjëherë nga uniformat blu dhe ju sekuestruan 13.25 gram kanabis. Kurse në banesë ju gjetën edhe 282 gram të tjera lëndë narkotike. Azgan Cungu akuzohet për “Plagosje e lehtë me dashje” dhe “Prodhim dhe shitja e lëndëve narkotike”.

Ky sezon turistik njihet si turizmi i vdekjes. Sipas statistikave, gjatë këtij sezoni turistik janë mbytur në det 28 persona, turistë të huaj dhe pushues vendas. Kjo është një shifër tepër e lartë, po ta krahasosh me vendet e Europës. Rasti më i fundit është ai i mbytjes së një turisteje çeke në plazhin e Radhimës në Vlorë. Ka qenë një telefonatë që ka njoftuar policinë se në vendin e quajtur Rexhina në Radhimë, është mbytur një shtetase. Efektivët e policisë kanë konstatuar se bëhej fjalë për një shtetase çeke, 74 vjeç, me inicialet R.M. Sipas dëshmitarëve, ajo është futur në det për t’u larë, por ka humbur jetën.
Pas humbjes së jetës së turistes çeke ka reaguar edhe ish-Kryeministri Berisha. Në një postim në Facebook, Berisha shkruan, sezoni turistik i mbytjes së 28 turistëve apo 5 herë më shumë se në të gjitha brigjet e Europës. Berisha akuzon qeverinë për shpërdorim taksash dhe mosmbrojtjen e pushuesve në brigjet shqiptare nga rreziku i ujit.
“Sezoni turistik i mbytjes së 28 turistëve apo 5 herë më shumë se në të gjitha brigjet e Europës! Brigjet e Shqipërisë, brigjet e askujt! Në Radhimë ndodhi mbytja e radhës. Një turiste çeke humbi jetën në det, mbytja e dytë në Vlorë në 4 ditët e fundit dhe e 28-ta e këtij sezoni turistik. Në harkun kohor dy mujor ujërat e brigjeve të detrave tona sikur të ishin brigjet e një vendi pa shtet, gllabëruan në thellësitë e tyre 28 jetë apo 5 herë më shumë jetë pushuesish se sa ujërat e brigjeve të të gjithë kontinentit”, shprehet Berisha.
Ish-Kryeministri Berisha më tej i shpreh ngushëllimet familjes së viktimës dhe dënon me ashpërsi kujdesin zero të qeverisë për sigurinë e jetës së pushuesve në plazhe. “Shpreh me këtë rast ngushëllimet më të sinqerta familjes së viktimës, dënoj me ashpërsi kujdesin zero të autoriteteve qendrore dhe lokale të vendit si dhe indiferencën dhe papërgjegjshmërinë e tyre ndaj rrezikut të ujit. Theksoj se kjo është një indiferencë kriminale.
Çdo turist apo pushues vendas derdh me shpenzimet e tij si taksa, qindra e mijëra lek në buxhetin e shtetit gjatë qëndrimit të tij me pushime. Kurse kjo qeveri as dhe autoritetet lokale nuk kanë shpenzuar qoftë dhe një qindarkë për mbrojtjen dhe sigurimin e tyre nga rreziku i ujit. Përveç kësaj, qeveria, me industrinë e mafies, skafet që ka favorizuar, ka rritur shumë rrezikun për jetën e turistëve në ujërat e plazheve tona.
Me këto zhvillime nxihet reputacioni turistik dhe Shqipëria bëhet vendi i tragjedive ujore, pa llogaritur ato rrugore, më të mëdha individuale të turistëve nga mbarë bota!”, shkruan Berisha.
Një nga shkaqet që turistët e huaj kanë braktisur plazhet tona ka qenë pasiguria në plazhe dhe rritja e numrit të grabitjeve të turistëve. Një turiste gjermane ka rënë pre e hajdutëve në Syrin e Kaltër në Sarandë, ku kishte zgjedhur të shijonte këtë bukuri të rrallë të natyrës shqiptare.