Në vetëm 18 muaj Ousmane Dembele ka kaluar nga një rezervë në radhët e Rennes në blerjen e dytë më të shtrenjtë në historinë e futbollit. Pas shumë e shumë tentativash Barcelona arrin më në fund ta shkëpusë lojtarin nga radhët e Borussia Dortmund, por ndihmesën më të madhe katalanasve, në realizimin e këtij operacioni, ua ka dhënë vetë sulmuesi. Në një intervistë të dhënë, talenti 20-vjeçar ka treguar se vendosi të braktiste seancat stërvitore tek verdhezinjtë, në momentin që vuri re se drejtuesit e klubit gjerman nuk e dëshironin largimin e tij. Sipas Dembele kjo ishte mënyra e vetme që ai të largohej nga Borussia Dortmund.
“Në fillim isha i qetë, pasi klubet ishin në fazën e tratativave. E dija që duhet të ruaja qetësinë. Më pas vendosa të mos paraqitesha në stërvitje. Nuk doja të shkoja. Gjithmonë kërkoja një justifikim vetëm për të mos u stërvitur. Nëse kjo marrëveshje nuk do të ishte realizuar, atëherë do të ndihesha keq. Dëshiroja me çdo kusht të firmosja për këtë skuadër”, tha Dembele.
Të zësh vendin e Neymar nuk është e lehtë, por Dembele i ka idetë e qarta përsa i përket kësaj pjese. “Neymar është një prej futbollistëve më të mirë në botë. Unë jam i ri dhe jam këtu për të mësuar gjëra të reja dhe të jap më të mirën time. Objektivi im i parë është të integrohem sa më shpejt me pjesën tjetër të grupit, të përmirësohem çdo ditë e më shumë dhe më pas shpresoj të fitoj sa më shumë tituj”, u shpreh ai.
Talenti 20-vjeçar mund të ishte transferuar sezonin e kaluar tek Barcelona, por preferoi të qëndronte tek Borussia edhe për një tjetër sezon, në mënyrë që të rritej akoma edhe më shumë si futbollist. Në fund të intervistës, francezi u shpreh se admirimi i tij për Messin ka nisur që kur ai ishte 8 vjeç.

Pasi mori tri “shuplaka” nga Spanja dhe do të detyrohet të kualifikohet për në Botëror përmes “play off”-it, trajneri Xhan Piero Ventura ka komentuar sfidën përpara se të linte fushën e “Santiago Bernabeu”-t. “Në përgjithësi u pa diferenca e kualitetit mes dy formacioneve. Mirëpo, duhet të pranoj që shumë gjëra ia dhuruam ne Spanjës, duke bërë shumë gabime. Pësuam dy gola që mund të shmangeshin, një me faull dhe tjetrin me goditjen e parë që morëm në portë.
Mëkat që ndodhi kështu. Portieri i tyre De Gea bëri tri pritje të rëndësishme. Ndeshja mund të ishte hapur”, tha fillimisht trajneri i kombëtares italiane. Ai theksoi se tani skuadra e tij e ka për detyrë të mundë Shqipërinë dhe të tjerat. Numri një i Italisë tha se Spanja nuk është humane dhe bën gjëra të çmendura në fushën e lojës. “Ne jemi njerëzorë, ndërsa ata jo…”, tha Ventura, deklaratë që lë të kuptohet diferencën e madhe që ekziston mes dy skuadrave.
Kombëtarja “axurre” vuajti shumë inferioritetin numerik në mesfushë dhe aty dukej se Spanja dominoi gjithçka, por i pyetur për këtë fakt trajneri i Italisë tha se ka nisur një projekt që nuk mund ta ndryshojë për një ndeshje. “Nuk futa një mesfushor tjetër, sepse jemi duke zhvilluar një projekt dhe e dimë se ku duhet të mbërrijmë. Nuk ndryshoj për një ndeshje”, sqaroi ai.
Trajneri i Italisë e di shumë mirë që tani nuk i falen më hapa falsë. “Tani e kemi detyrim fitoren me Shqipërinë dhe skuadrat e tjera të grupit. Duhet të grumbullojmë sa më shumë pikë për kualifikimin. Fillimisht kemi si objektiv të shkojmë në Botëror, por pastaj është e kotë që të eliminohemi pas 3 ndeshjesh aty. Duhet të rritemi. Jo të gjithë lojtarët e mi kanë luajtur 3-4 finale Champions-i në karrierën e tyre”, përfundoi trajneri Ventura.
Mesfushori i Real Madridit, Isco në përballjen kundër Italisë, tregoi klasin e tij me dygolëshin e realizuar. Faqet e para të gazetave në Spanjë nuk ngurruar të thurin elozhe për Iscon. “Mundo Deportivo”, gazetë pranë klubit të Barcelonës nuk ngurron ta etikojë 25-vjeçarin “hyjnor”. Një tjetër media e shkruar “Marca” e etikon atë me nofkën “abuzuesi”. Kohët e fundit Isco u shfaq si njeriu kyç në lojën e Realit të Madridit dhe tashmë të njëjtën gjë është duke bërë edhe në kombëtaren iberike. Është një futbollist që bën diferencën duke krijuar superioritet dhe thuajse e pamundur t’ia rrëmbësh topin nga këmbët, produktiv gjatë gjithë 90 minutëshit. Tekniku i “Los Blancos” për shkak të formës së shkëlqyer që po kalon Isco, është detyruar të ndryshojë formacionin e skuadrës nga 4-3-3 në 4-3-1-2, në mënyrë që 25-vjeçari të pozicionet pas dyshes sulmuese.

Holandës i ka mjaftuar një fitore 3-1 ndaj Bullgarisë për të ngjallur përsëri shanset e saj për pjesëmarrjen në Botëror, edhe pse “Tulipanët” në fakt duken në garë për vendin e dytë në grup dhe jo për të parin. Skuadra e Advokat triumfoi dalë dygolëshit të Proper dhe atij të Roben në një ndeshje ku çdo rezultat tjetër do të kishte bërë thuajse të pamundur kualifikimin e tyre, qoftë edhe në play off. Fitorja e Suedisë me shifrat 4-0 në ndeshjen tjetër të luajtur pasdite në grup sigurisht që nuk e bën të lehtë kualifikimin, pasi skandinavët kanë tre pikë avantazh ndaj holandezëve. Por ata shpresojnë që të marrin pikë të plota në dy ndeshjet e fundit për të siguruar të paktën vendin e dytë, pasi Franca duket e qetë në vendin e parë.
Ndërkohë, Ishujt Faroe kanë marrë fitoren e dytë të eliminatoreve dhe janë ngjitur në kuotën e 8 pikëve, si asnjëherë më parë në historinë e tyre. Skuadra e drejtuar nga Lars Olsen, mundi Andorrën me shifrat 1-0.
Kombëtarja e Portugalisë ka fituar në udhëtim ndaj Hungarisë me rezultat minimal 1:0, duke mbajtur kështu gjallë shpresat për kualifikim direkt. Golin e vetëm dhe të fitores e shënoi Andre Silva, pas një asistimi të Cristiano Ronaldos në minutën e 48’. Pas kësaj fitoreje Portugalia mbetet në vendin e dytë në Grupin B me 21 pikë, 3 më pak se sa Zvicra në vendin e parë, por që kanë edhe një ndeshje për të zhvilluar kundër njëra-tjetrës.

Belgjika është skuadra e gjashtë që siguron biletën për në Botërorin 2018. “Djajtë” e drejtuar nga Roberto Martinez arritën një fitore të rëndësishme në Greqi 2-1, që i zyrtarizon në vendin e parë të Grupit H me 22 pikë në 8 ndeshje. Jan Vertonghen kaloi në avantazh miqtë në minutën e 70, por Zeca vendosi baraspeshën 3 minuta më vonë. Njeriu që siguroi biletën e botërorit për Belgjikën është Romelu Lukaku, që në minutën e 75 realizoi golin e fitores për Belgjikën. Në ndeshjet e tjera të këtij grupi, Bosnje-Hercegovina shkatërroi 4-0 Gjibraltarin. Edin Dzeko hapi serinë e golave dhe më pas Kenan Kodro dyfishoi për t’ia lënë radhën Senad Luliç. Sërish Dzeko në minutën e 85 realizoi edhe golin e dytë. Takimi tjetër mes Estonisë dhe Qipros po në këtë grup u mbyll me fitoren minimale 1-0 të vendasve.
Ndeshjet e së dielës në Grupin A dhurojnë një surprizë të madhe, barazimin e Francës në transfertën e Luxemburgut. Të besuarit e Didier Deschamps nuk arrijnë të shënojnë në fushën e skuadrës modeste, duke hedhur hapin fals dhe duke rihapur çështjen e vendit të parë në grup pasi shkon në kuotën e 17 pikëve, 1 më shumë se Suedia që shkatërroi 4-0 Bjellorusinë. Emil Forsberg në minutën e 18 zhbllokoi ndeshjen, ndërsa Christoffer Nyman 4 minuta më pas shënoi edhe golin e dytë. Marcus Berg e mbylli pjesën e parë me rezultatin 3-0, ndërsa Andreas Granqvist nga pika e bardhë e 11-metërshit vulosi suksesin e thellë të nordikëve. Nuk hasi vështirësi as Holanda që kaloi 3-1 Bullgarinë. Davy Proepper startoi festën në “Amsterdam Arena” që në fillim të ndeshjes, ndërsa Arjen Robben e ndali topin në rrjetë gjatë pjesës së dytë. 120 sekonda më pas Georgi Kostadinov rihapi ndeshjen, por sërish Davy Proepper në të 80-ën vulosi suksesin e skuadrës portokalli që mbetet në lojë për vendin e dytë me 3 pikë më pak se Suedia.
Në Grupin B, Zvicra ruan bindshëm kryesimin pas fitores 3-0 në transfertën e Letonisë. Seferoviç dhe më pas Dzemaili e Rodriguez i dhuruan një fitore të lehtë skuadrës së Petkoviç që udhëheq me 24 pikë klasifikimin, 3 më shumë se Portugalia që kaloi 1-0 Hungarinë me një gol të shënuar nga Andre Silva. Takimi tjetër mes Ishujve Faraoe dhe Andorras u mbyll me rezultatin 1-0.

Rezultat historik për Luxemburgun ndaj një France të shpërfytyruar. Në fakt për shumë mund të jetë çështje e fatit të keq, për të tjerë faji nuk është jetim, por i tëri i Giroud gjithsesi, rezultati zhgënjyes 0:0 ndaj Luxemburgut modest në krahahasim me formacionin plot yje të francezëve, komplikon ndjeshëm situatën e kualifikimit në Botërorin Rusi 2018 për këta të fundit. Për Francën ky ishte një turp, shkruan e përditshmja sportive “L’Equipe”, pra për blutë tashmë parashikohet një vjeshtë e nxehtë, shto dhe faktin që Suedinë e ndan vetëm një pikë nga Franca, për të mos thënë më pas që në çështje golash suedezët diferencohen nga një rezultat më i mirë.
Por mbetet ende për t’u parë sepse pas transfertës në Luxemburgut, Suedia pritet të përballet jo më pak se sa me Holandën, ndërsa Franca pas ndeshjes në Bullgari do të presë edhe Bjellorusinë. Rezultati i vetëm pozitiv i Luxemburgut ndaj Francës datonte që në shkurtin e vitit të largët 1914. Ndaj dhe e përditshmja më e madhe sportive në vend, “L’Equipe” shkruan se e tërë Europa do të përqeshë tashmë Francën. Në artikullin e saj ajo ngel në klasë Giroud, të cilin e etiketon të padobishëm. Vlerësohet shumë keq me gjithë impenjimin maksimal Mbappé, gjithashtu notë ngelëse shkon dhe për Pogba. Kurzawa e Koscielny gjithashtu nuk bëjnë përjashtim. “L’equipe” shpëton vetëm Lloris dhe Kanté, si dhe kritikon Dechamps. Për sa i takon trajnerit është e vështirë të shpjegosh të pashpjegueshmen, përfundon artikullin “L’Equipe”.

Izraeli në kaos përpara ndeshjes me Italinë. Eran Zahavi, protagonisti kryesor i asaj fitoreje të thellë me shifrat 3-0 që izraelitët arritën ndaj Shqipërisë në “Elbasan Arena” vitin e kaluar, në Grupin G kualifikues të Botërorit Rusi 2018-të, i ka dhënë lamtumirën ekipit përfaqësues vetëm një ditë përpara sfidës shumë të rëndësishme ndaj Italisë, që do të zhvillohet në Reggio Emilia. Të gjithë e mbajnë mend atë që bëri Zahavi në Shqipëri.
Në takimin ndaj kuqezinjve sulmuesi realizoi 11-metërshin e golit të avantazhit, falë dinakërisë së tij provokoi Etrit Berishën, me këtë të fundit që u largua nga fusha me karton të kuq, duke fituar një tjetër 11-metërsh, të cilin e humbi pasi u ndal nga Alban Hoxha, ndërsa dha edhe asistin e golit të 3-të. Krisja e Zahavit me Federatën izraelite të Futbollit ndodhi pas ndeshjes ndaj Maqedonisë, sfidë në fund të së cilës sulmuesi, i cili aktivizohet në kampionatin kinez u vërshëllye nga tifozët e pranishëm në stadiumin e Hafias.
Humbja 0-1 ndaj përfaqësueses ballkanase nuk u përtyp aspak nga fansat e Izraelit, të cilët nisën të kritikonin ashpër kapitenin, i cili i acaruar nga ky fakt hoqi nga krahu shiritin duke e hedhur në tokë. 30-vjeçari në intervistat pas ndeshjes bëri një tjetër veprim të gabuar, duke deklaruar se u kërkonte falje të gjithë atyre që e mbështesin dhe e duan, por jo tifozëve që e vërshëllyen në stadium. Gjestet e Zahavit nuk u pëlqyen aspak drejtuesve të federatës, të cilët e përjashtuan pa afat lojtarin. Por me të mësuar vendimin Zahavi nëpërmjet një postimi në Instagram publikoi tërheqjen e tij nga përfaqësuesja izraelite. Diçka që askush s’e priste dhe që e bën akoma edhe më të vështirë situatën te Izraeli para sfidës së kësaj të marte ndaj Italisë.
Riyad Mahrez mund të ishte një lojtar i Man. United për këtë sezon me operacionin që dështoi në momentet e fundit para mbylljes së merkatos. “Daily Star” zbulon se fantazisti algjerian kishte arritur akordin personal me Djajtë e Kuq, por për shumë arsye të tjera klubet nuk mundën të përfundonin transferimin. Për Mahrez u përfol edhe për një kalim te Barcelona dhe Chelsea, por për të dytin vit radhazi lojtari nuk arrin të largohet nga Leicester City.