Saimir Çullhai ka refuzuar të tregojë se në duart e kujt do të binin tre kallashnikovët që ai kishte nisur me DHL nga Tirana drejt Londrës. Armët u zbuluan nga stafi i sigurisë në seksionin e mallrave në Aeroportin e Rinasit pak çaste para se të përfundonin në avion dhe vetë ai u gjet nga gjurmët e gishtave që kishte lënë në pako.
Por 32-vjeçari nga Shijaku ka preferuar të mbajë pozicion mohues. Nuk pranon të jetë personi që i ka organizuar trafikun. Kamerat e sigurisë së pikës së DHL-së në Durrës, nga ku u nisën pakot të premten, e kanë fiksuar, por ai thotë se vetëm i ka nisur pakot për llogari të dikujt tjetër. Rrjedhimisht, nuk ka si të flasë për pritësit e armëve.
Një tjetër i implikuar është shpallur në kërkim. Antiterrori në Shqipëri është vënë në kërkim të N.F, nga qyteti i Durrësit. Policia britanike dyshon se tre kallashnikovët shqiptarë do të përfundonin në duart e celulave terroriste ose në bandat e krimit të organizuar.
Vetëm muajin e shkuar, policia gjeti 79 armë të destinuara për në Angli, të fshehura në pako me pajisje motorike për makinat. Në Tiranë, antiterrori ka shtuar masat nisur nga sulmet terroriste në Londër dhe Barcelonë.Autoritetet nuk e kanë bërë publike adresën e personit që do t’i priste armët në Londër, por kanë vënë në alarm partnerët britanikë.
Në Britani, autoritetet dyshojnë se kallashnikovët mund të jenë porositur nga anëtarë celulash terroriste që kanë kontakte me bandat shqiptare. Përdorimi i tyre në sulme terroriste është pista e parë ku po hetohet, nisur edhe nga fakti se Londra është në shenjestër të terroristëve të ISIS. Por nuk përjashtohet mundësia që armët të mbeteshin në duart e kriminelëve shqiptarë që veprojnë në Angli, ku zotërojnë trafikun e drogës.

Identifikohet autori i dytë

Identifikohet autori i dytë i dyshuar si i përfshirë në trafikun ndërkombëtar të armëve. Ai është shtetasi Neritan Faria, 42 vjeç, banues në Shijak. Faria është fqinj me Sajmir Çullhajn. Policia e ka shpallur në kërkim 42 vjeçarin, i cili dyshohet si autori kryesor i tentativës për trafikun e armëve nëpërmjet pakove të postës nga Shqipëria në drejtim të Britanisë së Madhe.
Pjesët e armëve automatike kallashnikov ishin mbështjellë me rroba dhe destinacioni i tyre përfundimtar ishte Britania. Ndaj tij ka dëshmuar sot edhe i arrestuari Çullhaj, i cili ka deklaruar se ishte ai që i kishte dhënë porosi për të dërguar pakot në postë.

Hetimet

Hetimet kanë zbuluan se të enjten në mesditë, Saimir Çullhai dhe fqinji i tij, Neritan Faria nga Shijaku, kishin dorëzuar në filialin e një poste të shpejtë në Durrës, tri pako në të cilat gjendeshin pjesët e kallashnikovëve. Të dy ata janë fiksuar nga pamjet e kamerave të sigurisë së filialit të postës. Kutitë postare mbanin emrat e dy të moshuarve Pajtim Rexhepi e Vangjel Tola. Të dy këta të fundit, kanë mbetur të çuditur, ndërsa janë pyetur nga policia. Ata nuk njiheshin me të arrestuarin dhe mikun e tij të shpallur në kërkim. Pakot mbanin si adresë dërgimi Londrën dhe emrin e dy personave në Britaninë e Madhe. Për këtë shkak, më parë zyrës së Skotland Yard, i është nisur një informacion policor.
Mediat britanike shkruajnë se autoritetet në Londër, që janë në alarm nga terrorizmi, dyshojnë se kallashnikovët mund të përdoreshin për sulme terroriste, ose nga grupe shqiptare të krimit të organizuar që veprojnë në Angli.

Gjykata “arrest me burg” për Çullhain

Gjykata e Tiranës dha dje masën e sigurisë “arrest me burg” për Saimir Çullhain, 32-vjeçarin nga Shijaku, i cili tentoi të dërgonte me postë në Londër tre pako me kallashnikovë. Çullhai tha para Gjykatës se, nuk e dinte se çfarë kishin brenda, pakot dhe se vetëm po ia postonte ato, një miku. “Nëpërmjet një mikut tim me emrin Tani, që më tha se do të çonte pako në Britani, shkova tek DHL-ja për t’i dorëzuar, por nuk e dija çfarë kishin brenda ato. Unë shkova me makinën e tij tek DHL-ja. Vetëm kur më arrestoi Policia, e mësova se çfarë kishin brenda pakot”, tha Çullhaj në gjyq.
Nga ana tjetër, burime nga Prokuroria thanë se, kanë prova të mjaftueshme që e përfshin këtë person në këtë veprimtari, ndërsa kanë nisur hetimet, në bashkëpunim edhe me autoritetet e huaja, për të zbuluar edhe personin që do të bënte pritjen e pakove në Mbretërinë e Bashkuar, emri i të cilit dyshohet të jetë i rremë. Sipas akuzës, Çullhai është fiksuar nga kamerat e sigurisë. Është parë targa e makinës që ka qenë Çullhai që ka dorëzuar pakot.
Saimir Çullhai u arrestua nga policia të shtunën, si dhe u shpall në kërkim një person tjetër, bashkëpunëtor në këtë tentativë për trafik ndërkombëtar të armëve luftarake në Rinas. Në njoftimin e policisë thuhej se u arrestua Saimir Çullhai, 32 vjeç, banues në Shijak, i dënuar më parë për “Trafikim të narkotikëve”, si dhe u shpall në kërkim shtetasi N.F., 47 vjeç, banues në Durrës. Në kuadër të proçedimit penal të nisur për këtë ngjarje është bërë e mundur të dokumentohet veprimtaria kriminale e shtetasve të sipërpërmendur, të cilët në datë 23.08.2017 rreth orës 18:00 kanë bërë dërgimin e tre pakove me një prej agjensive të dërgesave postare, të cilat janë konstatuar gjatë skanimit në Aeroportin “Nënë Tereza”. Brenda pakove janë konstatuar tre armë zjarri automatik model 56, të çmontuara. Pakot kishin si destinacion Mbretërinë e Bashkuar.
Sipas policisë, personit të arrestuar gjatë kontrollit fizik në momentin e arrestimit iu gjetën në trup 220 gramë lëndë narkotike kanabis sativa. Gjithashtu, gjatë kontrollit në banesën e shtetasit të shpallur në kërkim u gjetën 4.5 kg lëndë narkotike kanabis sativa si dhe 32 bimë narkotike të kultivuara.

Armët drejt Anglisë, “Daily Mail”: Çullhai mori urdhër

Autoritetet shqiptare kanë zbuluar një komplot, ku tre pako me armë do të niseshin nga aeroporti i tyre dhe kishin për destinacion Britaninë e Madhe. Sipas Policisë, dyshimet ishin se armët do të përdoreshin për ndonjë sulm terrorist të mundshme, apo ishin pjesë e krimit të organizuar. Armët e llojit kallashnikov, ishin të fshehura në tri kuti postare. Stafi i sigurimit i gjeti armët në pjesën e ngarkesës së aeroportit të Tiranës para se ata të ishin ngarkuar, shkruan “Daily Mail”.
Ato ishin të mbështjellë në peshqirë dhe qese brenda kutive DHL që përmbante edhe rroba dhe letra. Policia anti-terror ka rritur vëzhgimin pas sulmeve terroriste në Londër dhe Barcelonë.
Zyrtarët nuk kanë zbuluar adresën e synuar të shpërndarjes, por thanë se kanë njoftuar homologët e tyre në Mbretërinë e Bashkuar.
I dyshuari për këtë rast nga autoritete shqiptare është Sajmir Çullhai, 32 vjeç, i cili u arrestua në Shqipëri pas konfiskimit të armëve. Thuhet se ai kishte marrë urdhra për të lëvizur armët tri ditë para se të dërgonte pakon të premten.
Ai ka refuzuar të japë më shumë detaje se nga vijnë armët, se për çfarë do të përdoreshin ose për marrësit e tyre të synuar. Detektivët gjithashtu po hetojnë një njeri i njohur me inicialet N.F. nga qyteti i Durrësit. Zëdhënësi i DHL-së nuk i është përgjigjur kërkesës lidhur me rastin në fjalë.

Një nga zonat e Shqipërisë që u përfshi më së shumti nga flakët gjatë kësaj vere që vazhdojnë të përpijnë pyjet është ajo e Tepelenës. Pyjet e mrekullueshme përballë Ujit të Ftohtë po vazhdojnë të shkrumbohen edhe pse temperaturat kanë rënë. Banorët që jetojnë në këtë zonë shprehen se, të gjithë zjarret janë të qëllimshme, ndërkohë që policia nuk vepron. Sipas tyre, mafia e drogës që vitin e kaluar e ka pasur epiqendër Tepelenën, po hap toka të reja për mbjelljen e kanabisit.
Që trafikantët e drogës të mbështetur nga kreu i Bashkisë Tepelenë, Tërmet Peçi janë zotër të territorit në këtë rreth, u vërtetua vitin e kaluar, kur nuk ra asnjë zjarr, pasi vendi ishte i mbushur me qindra parcela me kanabisi me lejen dhe mbrojtjen e forcave të policisë. Këtë vit trafikantët të mbështetur edhe nga policia po djegin pyjet për të hapur toka për mbjelljen e kanabisit. Përditë zjarret përpijnë pyjet edhe në zonat turistike, ndërsa policia nuk ndërhyn.
Ish-kryeministri Berisha ka reaguar për djegien e qëllimshme të pyjeve në Tepelenë për të hapur toka për mbjelljen e jkanabisit. Berisha ak postuar një video ku dallohet një sipërfaqe toke që po digjet. Me pamjet e bëra natën, të cilat i ka publikuar në Facebook, Berisha thotë se ndodhet në zonën e “Ujit të Ftohtë” në Tepelenë.
Berisha gjithashtu, nuk lë pa ironizuar Ramën dhe qeverinë e re të tij, të cilën e bëri zyrtare ditën e djeshme në Asamblenë e Partisë Socialiste. “Zjarr në Tepelenë përballë Ujit të Ftohtë tani që kemi Timonierin me Xhafën që nuk iu cënon hashashin!”, shkruan Berisha në Facebook.
Një ditë më par ëish-Kryeministri Berisha publikoi mesazhin e një qytetari nga Delvina I cili e informonte për djegien e ullishtave. “Qytetari dixhital denoncon: Ullishtat e Delvinës në flakë, asnjë s’po merr asnjë masë!”, shkruante Berisha nëFacebook.
Për këtë masakër pyjore nga zjarret e qëllimshme për të hapur toka për mbjelljen e kanabisit ka reaguar edhe kreu i Departamentit të Mjedisit në PD, Jamarbër Malltezi. “Ia vunë flakën Tepelenës. Hapen tokat e reja për drogën se siguruan mbrojtje për trafiqet”, shkruan Malltezi në një postim në Facebook.
Zjarret vijojnë të shkrumbojnë pa ndërprerje pyje e kullota në Jug të vendit. Një zjarr masiv ka rënë në fshatin Vrisera në Gjirokastër pasditen e të dielës. Nga flakët u rrezikua edhe godina e Bashkisë së Dropullit si dhe shkolla e fshatit. Forcat e zjarrfikëses së Gjirokastrës janë në luftë me flakët. Drejtori i PMNZSH Gjirokastër, Kujtim Bizhga tha se zjarrvëniet janë të qëllimshme.
“Situata paraqitet mjaft e vështirë, kjo është një zjarrvënie e qëllimshme”, u shpreh ai.
Po ashtu njoftohet se edhe në Delvinë një zjarr i madh ka rënë, duke djegur një bllok me gështenja dhe disa ullinj të vjetër në moshë. Zjarrfikëset e kanë të pamundur që të futen për të shuar zjarrin, pasi terreni është malor dhe i thyer. Banorët e zonës po punojnë për izolimin dhe shuarjen e flakëve.

356 zjarre në Fier gjatë verës

Në qarkun e Fierit, gjatë stinës së verës janë regjistruar 356 raste zjarresh. Për pasojë janë djegur me dhjetra hektarë me pyje dhe pemë frutorë. Në lidhje me këtë situatë, prefekti i qarkut Vasil Bregu zhvilloi një takim me përfaqësues të bashkisë dhe policisë.
Për përballimin e emergjencave, Bregu kërkoi një bashkëpunim më intensiv mes institucioneve. Në qendër të takimit ka qenë dhe aksioni kundër ndërtimeve pa leje, për të cilin prefekti tha se nuk synon terrorizmin e qytetarëve por orientimin e tyre drejt rrugës ligjore.
Po ashtu prefekti apeloi për rehabilitimin e rezervuareve dhe kanaleve kulluese për t’i paraprirë reshjeve të shiut gjatë stinës së dimrit, të cilat vitet e kaluara kanë shkaktuar përmbytje.

Minatorët angazhohen të shuajnë flakët në Martanesh

Flakët që vazhdojnë të jenë aktive prej disa ditësh në zonën e Martaneshit po rrezikohen dhe banesat. Zjarri rrezikon minierat prandaj shumë minatorë janë angazhuar vullnetarisht bashkë me shërbimin zjarrfikës për të shuar flakët. Gjithashtu dhe zjarri i rënë prej 3 ditësh në fshatin Skuraj të Kurbinit vijon ende. Pavarësisht ndërhyrjes nga ajri si dhe me mjete rrethanore ende nuk arritur që të shuhen plotësisht flaket. Sipërfaqja e malit të djegur është e konsiderueshme duke sjelle dëme në masivin pyjor të kësaj zone.
Një zjarr i fuqishëm ka përfshirë masivin pyjor të fshatit Bërzanë në Njësinë Administrative të Zejmenit në Lezhë. Vatra e zjarrit është pikasur nga banore të zonës në orët e pasdites, ndërsa është përhapur me shpejtësi në një sipërfaqe të konsiderueshme duke rrezikuar dhe banesat. Në zonë kanë mbërritur menjëherë forcat zjarrfikëse dhe punonjësit e shërbimit pyjor duke mbajtur nën kontroll situatën që zjarri mos ti afrohet zonës së banuar.
Gjatë pasdites së djeshme ka patur dhe ndërhyrje me helikopter nga ajri por pa mundur që të shuhen flaket. Sipas të dhënave zjarri vijon të djegë pyjet ndërsa vëmendja është përqendruar në mbrojtjen e zonës së banuar nga flaket. Deri më tani është djegur një sipërfaqe e konsiderueshme me pyll lisi dhe shkurre.

Zjarret vazhdojnë të djegin pyjet në të gjithë vendin

Zjarret vazhdojnë të djegin vendin, pavarësisht rënies së temperaturave. Pyjet vijojnë të shkrumbohen nga zjarret e qëllimshme të ndihmuar nga era. 6 vatra kanë qenë aktive gjatë ditës së djeshme, ndër to njëra në kodrat e Ardenicës. Flakët kanë rrezikuar sërish mansatirin e vjetër dhe antentat e televizioneve, ndaj është dashur ndërhyrja nga ajri edhe me helikopter. Pas disa orëve, zjarri u shua, por ka shkaktuar dëme të mëdha. Ndërkohë, zjarret vazhdojnë në Lezhë, në pyjet e Skurajt.
QARKU LEZHË
Zjarri i rënë disa ditë më parë në sipërfaqen pyjore me shkurre dhe pisha në fshatin Skuraj, Kurbin vijon të jetë aktiv. Shërbimi zjarrfikës ka punuar për të shuar flakët, por për shkak të erës së fortë dhe terrenit malor nuk kanë arritur ta izolojnë. Ditën e sotme helikopteri dhe disa forca ushtarake po punojnë të shuajnë zjarrin.
QARKU SHKODËR
Vijon operacioni për shuarjen e vatrave të zjarrit në fshatin Karmë të Pukës. Terreni malor e ka vështirësuar punën e zjarrfikësve. Në orët e para të mëngjesit janë rindezur disa vatra të vogla zjarri.
QARKU DIBËR
Zjarri i rënë dy ditë më parë në fshatin Muhurr Dibër është shuar. Shërbimi zjarrfikës e kishte të pamundur të shuante zjarrin për shkak të terrenit të thyer malor. Pas ndërhyrjes me anë të helikopterit është bërë i mundur izolimi dhe shuarja e tij.
QARKU FIER
Në fshatin Kolonjë Lushnjë ka rënë zjarr në një sipërfaqe me shkurre, pisha dhe ullinj. Në ndihmë të zjarrfikësve të Lushnjës kanë shkuar edhe ata nga Fieri. Nga flakët rrezikohej Manastiri i Ardenicës si dhe antenat e transmetimit të montuara në fshatin Kolonjë. Pas një pune të gjatë të zjarrfikësve dhe të mbështetur nga një helikopter zjarri është shuar.
QARKU GJIROKASTËR
Në fshatin Selckë Dropull ka rënë zjarr në një sipërfaqe me shkurre dhe pisha. Banorë të zonës dhe forca ushtarake kanë shkuar në vendngjarje dhe kanë punuar për shuarjen e zjarrit. Zjarri ka rrezikuar dhe banesat e fshatit. Për këtë është ndërhyrë me anë të helikopterit, i cili ka shuar zjarrin.
QARKU ELBASAN
Janë riaktivizuar vatrat e zjarrit të rëna në Poroçan, Gramsh. Për shkak të terrenit malor zjarrfikëset nuk kanë mundur të shuajnë zjarrin. Si pasojë u dogj një sipërfaqe rreth 15 ha me pyll ahu dhe pishe.

Flakët e zjarrit rrezikojnë Manastirin e Ardenicës

Në fshatin Kolonjë Lushnje nga flakët rrezikohej Manastiri i Ardenicës si dhe antenat e transmetimit të montuara në fshatin Kolonjë. Pas një pune të gjatë të zjarrfikësve dhe të mbështetur nga një zjarri është shuar.
Në Gjirokastër në fshatin Selckë Dropull ka rënë zjarr në një sipërfaqe me shkurre dhe pisha ku janë rrezikuar dhe banesat e fshatit. Për këtë është ndërhyrë me anë të helikopterit i cili ka shuar zjarrin.
Në fshatin Porocan të Elbasanit si pasojë e zjarrit është djegur një sipërfaqe prej 15 hektarës me pyll ahu dhe pishe. Po ashtu dhe në në fshatin Muhurr të Dibrës zjarri është shuar me anë të helikopterit.

R.POLISI

Një 59-vjeçar i dënuar me burg për jetë është arrestuar në Greqi. Xhemal Dule është dënuar për një vrasje të kryer në vitin 1998 në Vlorë. “Në datë 11.01.1998, rreth orës 19.00 në lagjen “Partizani”, Vlorë, pas një konflikti për motive të dobëta, Xhemal Dule, në bashkëpunim me djalin e tij F. Dule kanë vrarë me armë zjarri automatik shtetasin E.B.”. Arrestimi i tij në Athinë, Greqi më 24 gusht 2017, u bë me qëllim ekstradimi drejt vendit tone.
Xhemal Dule është shpallur në kërkim ndërkombëtar, pasi Gjykata e Rrethit Gjyqësor Vlorë me vendim penal nr. 62, datë 18.04.2000, e ka dënuar këtë shtetas me burgim të përjetshëm, për veprën penale “Vrasje me paramendim, e kryer në bashkëpunim” dhe “Mbajtja pa leje e armëve luftarake” parashikuar nga nenet 78-22 e 278/2 të Kodit Penal. Emri dhe fotoja e tij ishte në listën e personave të shpallur në kërkim nga Interpoli.

Radhë të gjata automjetesh janë regjistruar në pikën e kalimit kufitar të Kakavijës me Greqinë. Qindra automjete kanë pritur për më shumë se 4 orë për të hyrë në territorin grek. Shkak është bërë shtimi i kthimit të emigrantëve, ndërsa pala greke punonte vetëm me dy sportele në hyrje dhe dy në dalje.
Të dhënat zyrtare të Policisë Kufitare bëjnë me dije se gjatë orëve të fundit, 2474 shtetas shqiptarë kanë hyrë për në Greqi. Përballë fluksit, pala greke ka shtuar sportelet pas ndërhyrjes së palës shqiptare.

Një shqiptar është gjetur i vdekur në ballkonin e shtëpisë së tij në Borgosatollo të Italisë. Mediat italiane bëjnë me dije se shqiptari me nënshtetësi italiane, u kërkua nga të afërmit e tij, por më vonë u gjet i pajetë në ballkon. Sipas hetimeve të para, shqiptari 42-vjeçar kishte një plumb në kokë. Mediat italiane shkruajnë se motivet e gjestit tragjik duket se janë të lidhura me jetën sentimentale të burrit.

Është përfshirë nga flakët një autobus me pasagjerë shqiptarë që udhëtonin drejt shtetit fqinj. Mediat lokale greke raportojnë se autobusi ishte në ecje në autostradën Patras –Korinth, ndërsa u dogj në tunelin Panagopoula.
brenda tij po udhëtonin 48 persona të cilët ishin nisur nga Shqipëria dhe destinacion kishin Athinën. Shoferi sapo ka parë flakët, ndaloi mjetin dhe nxori pasagjerët jashtë duke bere keshtu qe asnjeri prej pasagjereve te mos pesoje lendime.