Shorti i Europa League duket se ka favorizuar paksa Skënderbeun, duke evituar ekipe me peshë në Europë, por që do të rezervojë një ndeshje në një prej stadiumeve më të vështirë për shqiptarët, në Beograd. Skënderbeu do të jetë pjesë e Grupit B, që përbëhet nga Dinamo Kievit, Young Boys dhe Partizani i Beogradit.
Ashtu siç pritej shorti ka favorizuar kuqezinjtë e Milanit, të cilët duke qenë edhe në vazon e parë të Europa League ka rënë në grup me ekipe më të lehta në letër, përbërja e së cilës është Austria e Vjenës, Rijeka dhe AEK.
Ndërkohë që shorti nuk është treguar aspak “zemërmirë” për ekipin e Etrit Berishës, Atalantën, e cila do të ketë në grup ekipe si Lyon, Everton dhe Apollon.

Skërderbeu është i destinuar për të shkruajtur historinë e futbollit shqiptar teksa për të dytën herë vendos emrin në fazën e grupeve të Europa League në harkun e 3 sezoneve. Kësaj radhe kjo arritje vjen falë kalimit të 4 tureve në fushë, jo si dy sezone më parë ku përfitoi nga skema e re e Champions League pas eliminimit në Play Off. Fati e deshi që përballë të ishte Dinamo e Zagrebit, ashtu si dy vite më parë në fazën Play Off të championsit. Por kësaj radhe eksperienca nuk ishte më një armë në favor të kroatëve, të cilët në harkun e 180 minutave u eklipsuan nga Skënderbeu që meritoi në fushë këtë rezultat historik.
Presidenti Takaj i kënaqur për kualifikimin. “Arritjet janë të mëdha. Një klub i fortë matet nga financat, të lejon të afrosh lojtarë cilësorë. Nuk është rastësi që jemi këtu. E dinim që kishim një rival të lehtë që në raundin e parë, por nuk kemi nënvlerësuar asnjë nga kundërshtarët. Nuk dua të merrem me të shkuarën. Falenderoj të gjithë ata që na mbështetën sot. Ishin të mrekullueshëm. Arritjet vijnë kur ke një mbështetje kaq të madhe. Të kalosh Dinamon është arritje e madhe. Nuk i trëmbemi askujt. Nuk duhet të punojmë vetëm për klubin, por edhe për lojtarët. Kënaqemi për të gjithë ata që kanë qenë pjesë e jona. Frika më e madhe ishte nga fundi, pasi ishim me 10 lojtarë”, u shpreh Takaj.
Orges Shehi pas kualifikimit në fazën e grupeve në Europa League deklaroi se: “Eshtë kënaqësi e madhe kemi luajtur dhe para dy vjetësh në Europa League, por duke eliminuar skuadra kaq të forta na dha një emocion të jashtëzakonshëm. Sa më përket mua kam thënë që do e lë pas Europës dhe do e mbaj fjalën”.
Latifi i emocionuar për kualifikimin dhe i trishtuar për largimin nga skuadra pohoi se: “Normalisht që çdo ndarje ka emocionet e veta. Jam munduar të jap më të mirën. Jam i mërzitur që po largohem po kështu e ka futbolli. Primare për ne ka qenë kualifikimi. Një kualifikim i tillë ka përfitime ekonomike për të dyja palët. Unë e kam Digitalbin dhe do ta ndjek gjithmonë Skënderbeun. Kam kaluar momente të bukura me këtë skuadër”.
Vangjeli pas kualifikimit u shpreh i emocionuar për këtë arritje, duke deklaruar se: “Emocione të mëdha, sukses i merituar. Shpresojmë që ta shijojmë sa më shumë dhe sa më gjatë kualifikimin për në grupet e Europa League. Presidenti më bindi të qëndorja, personalisht se kisha menduar që do të qëndroja kaq gjatë. E dinim që Dinamo është një ekip i fortë, por ne nuk i trembeshim këtij fakti”.
Osmani i emocionuar për kualifikimin deklaroi se: “Para ndeshjes me Vlorën birra për të gjithë. E kemi përshëndetur Latifin ashtu siç di vetëm Skënderbeu. Shehi dhe unë do ta lëmë të dy në një kohë. Orgesi nuk do të heqi dorë. Ky është momenti më i vështirë i jetës time, pas humbjes së vëllait tim, ketë sukses ia dedikoj nënës dhe vëllait”.

Roma dhe Inter do të ndeshen të shtunën në mbrëmje, në fushën e lojës, por dy klubet po arrijnë kulmin edhe në përballjen në merkaton verore. Kështu, pasi zikaltrit i morën trajnerin Spalletti, tentuan të afrojnë disa futbollistë të Romës, por pa ia arritur qëllimit. Këtë javë, përballja mes dy klubeve po bëhet për të marrë shërbimet e sulmuesit çek të Sampdorias, Patrick Schick. Të dy klubet kanë prezantuar ofertë të njëjtë ndaj Sampdorias dhe verdhekuqtë kanë mbështetjen e presidentit Ferrero, ndërsa zikaltrit janë zgjidhja e parë e sulmuesit çek.
Gjatë ditës së mërkurë, legjenda e Romës, Francesco Totti dhe trajneri Di Francesco, ‘zbritën në fushë’ dhe takuan Schick, për ta bindur të zgjedhë kryeqytetin. Por, në mbrëmje erdhi edhe kundërpërgjigja drejtuesve të Interit, të cilët darkuan me menaxherët e sulmuesit çek, në tentativë për të mbyllur marrëveshjen. Deri ditën e shtunë pritet të mësohet se kush do ta ketë fituar betejën për Schick dhe më pas do t’i lihet vendi fushës së lojës, për një tjetër përballje spektakolare.
E ardhmja e Patrick Schick do të vendoset përfundimisht gjatë ditës së sotme, nga vetë futbollisti. Transferimi i sulmuesit çek ishte kthyer në një telenovelë të vërtetë verore. Kështu, pasi ngjalli interes në shumë klube, Schick zgjodhi bardhezinjtë e Juventusit, të cilët hoqën dorë më vonë, pas disa problemeve në zemër, që u konstatuan gjatë vizitave të 21-vjeçarit. Por, pasi kaloi me sukses testet e dyta mjekësore, çeku përfundoi sërish në qendër të merkatos së shumë klubeve. Së fundi, Inter dhe Roma janë klubet që ndodhen shumë pranë transferimit të tij dhe siç njofton klubi i Sampdorias, Schick do të bëjë të ditur vendimin e tij mbi zgjedhjen e klubit të ardhshëm, gjatë ditës së sotme.

Monaco hedh sytë nga Belotti

Largimi i mundshëm i Kylian Mbappe ka bërë që Monaco të rikthehet në merkato në kërkim të një sulmuesi. Alternativat për klubin nga principata për të zëvendësuar 18-vjeçarin janë tre, Diego Costa, Kasper Dolberg, dhe Andrea Belotti. Drejtuesit e Monaco vazhdojnë bisedimet me Torinon, përsa i takon shumës që presidenti i granatave Cairo kërkon, pasi nuk duan të paguajnë klauzolën prej 100 milionë eurosh. Klubi nga “Stade Louis II” për të arritur te italiani është gati të derdhë në arkat e Torinos shumën e 80 milionë eurove plus bonuse.

Marchisio shuan zërat

Ka mjaftuar publikimi i një fotoje në rrjetin social “Instagram” nga ana e vet të përfshirit në thashethemet e merkatos verore, për të treguar se pozicioni i tij është i palëkundur, i qartë dhe që nuk lë vend për interpretime. Pas fjalëve të Marottës, është vet Marchisio që largon zërat e merkatos për një transferim të mundshëm te Milani. Fotoja me fanellën e Juves dhe me dorën te stema e skuadrës, në zemër, flet mëse qartë: përjetësisht te Juve, padyshim!
Një veprim ky që tregon se mesfushori juventin mendon vetëm për bardhezinjtë, aspak për Milanin apo për Chelsean. “Princi” mban në zemër vetëm fanellën e “Zonjës së vjetër”, e për ta treguar këtë nuk lodhet të shkruajë gjatë. “Princi nuk preket”, ishte shprehur Marotta pak ditë më parë, fjalë që gjejnë edhe konfirmimin e vet lojtarit.

Valencia serish në merkato

Te Valencia merkato nuk është mbyllur me afrimet Gabriel Paulistës nga Arsenali dhe Murillos e Kondogbia nga Interi. Trajneri Marcelino Garcia Torral u ka kërkuar drejtuesve edhe dy përforcime të tjera, një qendërmbrojtës dhe një sulmues. Me të ardhmen e Ezequiel Garay-it që mbetet në pikëpyetje, Valencia përpara se të mendojë për blerjet duhet të largojë nga skuadra 4 futbollistë që nuk bëjnë më pjesë në planet e trajnerit. Bëhet fjalë Aymen Abdenour, Fabian Orellanan, Luis Nanin dhe Vinicius Araujo.

Cristiano Ronaldo bëri një shaka me Gianluigi Buffon gjatë shortit të Champions League 2017-2018. Disa e quajtën batutë pa kripë atë të portugezit, por shumica qeshën, njësoj siç bëri edhe Leo Messi.
Kur Reshmin Choëdhury, prezantuesja e eventit në Forumin Grimaldi të Monakos, e pyeti portugezin se kush ishte goli i tij i preferuar në Champions, Cristiano u përgjigj kështu: “Goli i fundit, ai që i shënova këtij plakushit këtu”.
CR7 iu referua portierit 39-vjeçar të Juventusit, të cilit i shënoi dy gola në finalen e Kardifit, që Reali e fitoi me rezultatin 4-1. Publiku dhe vetë Buffon shpërthyen në të qeshura nga kjo batutë, që bëri të qeshte edhe Leo Messin, i cili ishte ulur pranë portierit veteran.
UEFA ka përzgjedhur Kristiano Ronaldon si sulmuesin më të mirë për vitin 2017, por Ylli i Real Madridit ka fituar edhe një tjetër trofe individual, duke u shpallur lojtari më i mirë i vitit nga UEFA. Portugezi për këtë çmim ka mposhtur dy superlojtarë, Leo Messin e Barcelonës dhe Gianluigi Buffonin e Juventusit. Ky është çmimi i dytë radhazi për Ronaldon dhe i treti në përgjithësi, pasi e kishte fituar edhe në vitin 2014.

Qatip Osmani: Mendoj se ndeshja duhet të mbaronte në barazim. Morëm një gol për gabimin tonë, por unë jam i kënaqur me lojën dhe tani duhet të përqendrohemi në kampionat. Shfrytëzoj rastin t’i uroj Skënderbeut kualifikimin. Shorti na rezervoi kundërshtarin më të fortë të mundshëm, por fakti që luajtëm kundër Milanin ishte eksperiencë e bukur për ne.
Shkëndija prej dy vitesh i ka shkuar afër kalimit në fazën e grupeve. Tani do të orientohemi në kampionat, por na duhen disa perforcime. Mendoj se është viti i duhur për të fituar edhe kampionatin.
Buba Hasani: Gjithmonë është e vështirë të luash kundër Milanit. Nuk ndikuan emocionet si në Milano. Dhamë më të mirën dhe shpresojmë që në të ardhmen të jemi në fazën e grupeve të Europa Leagues. Nuk patëm fat me shortin, disa lojtarë nuk kanë shumë eksperiencë emocionet bënë të veten. Në këtë ndeshje të dytë treguam vlerat tona. Duhet të jemi krenarë për atë që kemi bërë. Duhet të fokusohemi për të arritur objektivat tona.
Cuculi: Mbas një jave zhgënjyese në Milano treguam një fytyrë tjetër. Milani është shtatë herë kampion i Europës. Besoj se nuk i zhgënjyem tifozët dhe pritshmëritë e tyre. Kam parim në jetë që kurrë nuk humb, fitoj ose mësoj. E quaj një mësim të mirë për të ardhmen. Shpresoj që të fitojmë kështu edhe në kampionat. Kam qenë i dëmtuar, por dëshira ishte e madhe për të mos i lënë çunat. Dhashë më të mirën time. Nuk është mëkat të humbësh me Milanin. Do të mbështesim Skënderbeun që na përfaqëson në Europa League, falenderojmë Digitalbin, që si gjithmonë na ka mbështetur.
Trajneri i Shkëndijës, Qatip Osmani tha se humbja 1:0 ndaj Milanit ishte për arsye të gabimit në mbrojtje. Por, ai është shumë i lumtur me paraqitjen e lojtarëve të tij në këtë takim. “Goli erdhi pas një gabimi në mbrojtjen tonë, por në përgjithësi jam shumë i kënaqur me lojën. Tani do të koncentrohemi në kampionat”, tha Osmani.

Ousmane Dembele padyshim që ka qenë protagonisti i kësaj merkatoje verore. Talenti 20-vjeçar i Borusias së Dortmundit tashmë ka privilegjin të jetë i pari lojtar, për të cilin klubi historik i Barcelonës do të derdhë më shumë se 100 milionë euro, në arkat e klubit gjerman, në mënyrë që të përmbyllë tratativat e transferimit të tij. Dembele premton shumë për të ardhmen, por vetëm një vit më parë kartoni i tij nuk vlente më shumë se sa 15 milionë euro, shumë kjo që Dortmundi i pagoi klubit të Rënnes për nënshkrimin e tij, ndërkohë që sot i riu francez e shumëzon me 10 vlerën e tij. 105 milionë është fondi që katalanasit do të çelin për sulmuesin, ndërkohë që 45 milionë janë variabël. Gjithsesi, nga transferimi i tij tek Barcelona nuk do të përfitojë vetëm Dortmundi, pasi 15 milionë euro të tjera do të shkojnë në arkat e Rënnes, që kishte ruajtur një përqindje të vogël të kartonit të lojtarit.
Pas transferimit të Neymar këtë verë tek francezët e Paris Saint Germain, Barcelona shënjestroi dy emra të cilët, i kategorizoi si kandidatët idealë për të zëvendësuar mungesën e brazilianit, i pari ishte Philip Coutinho dhe tjetri Ousmane Dembele, që tashmë është rrugës për në “Camp Nou”, duke u kthyer kështu në futbollistin më të vlerësuar të kësaj merkatoje pas Neymar. Transferimi me këtë shumë marramendëse për një lojtar 20-vjeçar që vetëm një vit më parë vlerësohej shumë herë më pak, sigurisht që është shoqëruar edhe me polemika, por kjo nuk e ndali Barcelonën ta çojë deri në fund objektivin e saj. Dembele do të veshë fanellën blaugrana, duke mbajtur mbi shpatulla vlerësimin dhe pritshmëritë e këtij klubi.
Drejtuesit e klubit katalanas janë takuar të enjten në mbrëmje me klubin gjerman në Monaco, ku është mbajtur shorti i Ligës së Kampionëve, ku edhe është arritur akordi për kalim të Dembeles të gjiganti katalunas. Takimi ka zgjatur deri në orët e para të ditës së premte dhe sipas gazetës “Marca” çmimi është 104 milionë euro plus 45 milionë të tjera bonuse. Po ashtu, Barcelona ka arritur marrëveshje edhe me lojtarin që përfaqësohet nga familja e tij, e të cilët kanë filluar festën për kalimin e lojtarit te katalunasit. Dembele pritet që të ateroi sot në Barcelonë dhe të bëhet zyrtarisht lojtar i këtij ekipi.
Gjatë ditës së sotme talenti i Borussia Dortmundit, Ousmane Dembele, pritet që të zyrtarizohet si lojtar i ri i Barcelonës. Por, pas Dembeles, i cili Barcelonës do t’i kushtoj 105 milionë euro, Drejtuesit e ekipit katalunas po mundohen që ta transferojnë edhe Philippe Coutinhon nga Liverpool, shkruan “Mundo Deportivo”.
Liverpool ka refuzuar tri oferta të Barcelonës për Coutinhon, e fundit ishte rreth 125 milionë euro. Por, pavarësisht insistimit të Liverpoolit për mbajtjen e brazilianit, Barcelona do të bëjë çmos që deri më 31 gusht ta sjell ish-yllin e Interit në “Camp Nou”.
Aventurë e re në La Liga për Sergi Samper. Mesfushori i talentuar do ta vazhdojë karrierën tek Las Palmas. Barcelona e ka huazuar lojtarin 22-vjeçar për një sezon te klubi nga ishujt Kanarie. Te Las Palmas, Samper do të ketë shumë më tepër hapësira në formacion dhe do të ketë mundësinë për të spikatur.

Luciano Spalletti do të rikthehet në Olimpico teksa fati e deshi që shumë shpejt, që në javën e dytë të jetë kundërshtar i verdhekuqve. Tek Roma ka nisur një epokë e re, pasi për herë të parë tifozët duhet të mësohen pa idhullin e tyre, kapitenin legjendar Francesco Totti që pritet të jetë në tribunë në rolin e drejtuesit. Sigurisht që Totti dhe Spalleti nuk u ndanë në mënyrën më të mirë të mundshme, por që të dy kanë dhënë shumë për fanellën e Romës. Me Spallettin në krye verdhekuqtë ishin një makinë golash edicionin e kaluar, duke regjistruar sulmin e dytë më të mirë me 90 realizime, 4 më pak sesa Napoli. Shumë larg ishte Juventusi por mbi të gjitha edhe Interi, që në fund të edicionit të shkuar arriti kuotën e 72 golave, pavarëisht se në formacion ishte kapiteni Mauro Icardi, autor i 24 rrjetave në kampionat.
Sezoni i ri ka nisur ndryshe, me Romën që iu fal vetëm një perle të Kolarov në sfidën hapëse në Bergamo ndaj Atalantës, ndërkohë që zikaltërit e nisën me klas sezonin, duke shënuar plot 3 herë në portën e Fiorentinës. Nuk është cudi një ecuri e tillë edhe pse është e vështirë të bëhen konstatime që në javën e parë. Por tashmë është e ditur që Spalleti është një trajner i cili pëlqen futbollin e bukur, futboll me të cilin Roma është personifikuar prej vitesh. Për këtë arsye, pavarësisht polemikave që mund të ketë patur midis tij dhe Tottit, rikthimi në Olimpico mbetet i vecantë, për më shumë kur bën të ditur se nga verdhekuqtë duhet mësuar se si mund të bëhesh një skuadër e madhe. Roma-Inter është një sfidë e rëndësishme e futbollit italian, por të shtunën në mbrëmje ka dicka speciale në të.

Spanja, kundër Italisë rikthen David Villan

Spanja do të prezantohet me disa surpriza interesante për sfidën vendimtare kundër Italisë të shtunën e ardhshme në Barnabeu. Trajneri Julian Lopeteguei ka rikthyer në skuadrën e tij sulmuesin David Villa i cili mungon që prej 3 vjetësh, ndërsa rezervon debutimin për milanistin Suso dhe injoron mbrojtësin Marcos Alonso që po kalon një moment të artë me Chelsean. “Kam grumbulluar 26 lojtarë sepse 7 prej tyre rrezikojnë ndeshjen ndaj Lichtenstein për shkak të kartonëve”, theksoi Lopetegui në konferencën e shtypit. Në vijim ai e pranoi se vendimi për të rikthyer Villan është disi i çuditshëm , por shtoi se pavarësisht aktivizimit të tij në SHBA, ai mund të jetë i vlefshëm me eksperiencën që ka. Villa nuk luan me Spanjën që prej ndeshjes së fundit të iberikëve në ndeshjen e fundit të Kupës së Botës 2014. Me Spanjën numëron 59 gola në 97 ndeshje të luajtura. Një tjetër emër i papritur në listën e Lopeteguit është edhe katalanasit, gerarg Deulofeu. Ish sulmuesi i Milanit që aktualisht mban të vëshur fanellën e Barcelonës, e ka nisur sezonin në mënyrën më të mirë me dy asiste në ndeshjen kundër Real Betis.