Kur vjen puna tek interesat dhe pazaret mafioze, PS dhe LSI bashkojnë gjithnjë votat, ashtu siç dje Rama dhe Meta kanë gjetur gjuhën për të kaluar një projekt mafioz që ka të bëjë me mbetjet urbane në Tiranë. Këshilli Bashkiak i Tiranës ka miratuar dje vendimin për zgjerimin e kompetencave të operimit të saj, duke monopolizuar këtë shërbim në Tiranë dhe rrethinat e saj. Pra, kompania ku është ortak Erion Veliaj, që është e njëjta kompani që ka privatizuar dhe parkingjet në Tiranë dhe që deri më sot operonte në zonën urbane të Tiranës, që nga 1 qershori do të operojë dhe në zonat periferike të saj, çka do të thotë se i gjithë fondi dhe taksat që paguajnë qytetarët e Tiranës për këtë shërbim do të merret nga një dorë e vetme. Është e njëjta kompani, e cila ka marrë në pronësi dhe ish-Parkun e Autobusëve në Tiranë, por dhe asete të tjera të kryeqyetit. Është pikërisht kjo kompani, e cila dështoi të bënte diferencimin e mbetjeve, por që ishte dhe furnizuesja kryesore e landfillit të Sharrës, ku u vra 17-vjeçari Ardit Gjoklaj. Një histori e pastër korrupsioni dhe mafioze plehrash që dje bashkoi votat e dy aleatëve që në këtë prag fushate duket sikur kanë nisur një konflikt me njëri-tjetrin, por nuk është e njëjta gjë kur bie fjala për mafien e plehrave dhe paratë që gjeneron ajo. Projektvendimi mori 31 votat e PS-LSI, duke i dhënë jetë një ideje të planifikuar nga Veliaj që përpara se të merrte Bashkinë e Tiranës, atë të monopolizimit të pastrimit të qytetit. Vlera e kontratës për pastrimin e mbetjeve në zonën e qendrës ose e ashtuquajtura zona e kuqe, është 2.5 milionë euro, e cila shtohet me një vlerë 10% në momentin që fillon mbledhja e diferencuar e mbetjeve nga kompania. Nga 1 qershori 2017, zona zgjerohet me 50% dhe nga 1 qershori 2018, do të mbulojë të gjithë territorin e bashkisë. Sipas kryetarit të bashkisë, Erion Veliaj, me futjen e kompanisë së re të pastrimit të qytetit në shtator, riciklimi nga kazanët e mbetjeve do të ndalohet. “Në Tiranë do të jetë e ndaluar hyrja në çdo kosh mbeturinash dhe nxjerrja e të gjitha mbetjeve jashtë tij për të kapur një kanoçe ose një shishe plastike”, tha Veliaj gjatë një takimi me drejtuesit e ndërmarrjeve të pastrimit në qershor. “Çdo nxjerrje nga koshi, nxjerr qindra, mijëra, miliona mikrobe. Kjo i ka të gjitha premisat ta kthejë qytetin e Tiranës në një zonë epidemike nëse vijon kështu”, shtoi ai. Veliaj u ofroi atyre që do të humbisnin të ardhurat nga grumbullimi i plehrave në kazanë të punësoheshin në impiantin e riciklimit në Sharrë. “Ata që punojnë sot duke zbrazur koshat, Bashkia e Tiranës është gati që sot t’u ofrojë një vend pune me pagesë, me sigurime shoqërore, jo në të zezë në impiantin e riciklimit në Sharrë”, shtoi ai. Trumpetimi me të madhe i Veliajt mbi këtë projekt dukshëm ka pasur si qëllim bërjen e kësaj afere fakt të kryer, pasi kompania ka zgjeruar kompetencat e saj gati javë para se vednimi të mriatohej në Këshillin Bashkiak.

Lidhjet me mafian italiane

Eco Tirana, një kompani me kapital italian dhe të Bashkisë së Tiranës, duket se nuk është vetëm kaq. Gazeta më e vjetër në Itali, “Roma” ka zbardhur detaje të frikshme në lidhje me njerëzit e vërtetë që kanë marrë në dorë fushën e plehrave në Sharrë. “Çështja e 1300 kontenierëve me lëndë kimike nuk është e vetmja në Shqipëri”, shkruan ajo në një artikull ku është në qendër vendi ynë dhe ekomafia. “Burimet tona thonë se oreksi i mafias së plehrave ka bërë që të gllabërohet edhe fusha e shkatërrimit të plehrave në periferi të Tiranës, ajo në Sharrë, që nuk ndodhet shumë larg nga qendrat e banuara. Aty ende digjen plehra dhe Bashkia e Tiranës ka vendosur që t’ja besojë një kompanie italiane. Disa sipërmarrës nga Italia e Veriut kanë dalë si persona që do ta marrin. Njerëz të pastër, besojmë. Por ndërhyrjet, bonifikimi dhe sistemimi i kësaj fushe kushton miliona euro. Pas kësaj marrëveshjeje duket se qëndrojnë disa emra të njohur të ekomafias, të cilët arrijnë të futen gjithmonë dhe kudo. Një përgjim i bërë nga Antimafia citon dy personazhe të mafias së Ndraghetës, të cilët flasin pikërisht për fushën e plehrave në Tiranë, atë të Sharrës. “Kjo është një punë fiks për ne. Një operacion që nuk duhet humbur”, thuhet në përgjimet e zbardhura nga gazeta italiane “Roma”.

Shkrimet e mediave italiane, lidhjet e Gaçit të  Ramës dhe Veliajt me mafien e plehrave

Më 22 Qershor 2016 u themelua në Tiranë kompania “Eco Albania”. Kjo kompani është bashkëpronësi e Bashkisë së Tiranës (51%) dhe kompanisë ‘ASGM Holding Albania’ (49%). Aktualisht kjo kompani ka një kontratë ekskluzive me Bashkinë e Tiranës që synon ingranimin e saj në formë monopoli në trajtimin e mbetjeve të qytetit. Aksionari AGSM-Holding-Albania në dukje është një kompani e Bashkisë së Veronës, por zbardhja e interesave përbërës të kësaj kompanie zbulon se ajo është e ndarë në: AGSM Verona – 75% dhe AMIA – Verona 25% Kompania AMIA-Verona përfaqësohet nga shtetasi Andrea Miglioranzi dhe është kompani private, e cila ka një akses të veçantë në Bashkinë e Veronës. Zoti Miglioranzi më herët ka qenë i përfshirë si përfaqësues i disa kompanive të tjera italiane, të cilat janë hetuar nga Prokuroria italiane si kompani nën kontrollin e organizatës kriminale Ndragheta. Biznesmeni Miglioranzi është njeri tepër i afërt i kryebashkiakut të Veronës, Flavio Tosi. Kryebashkiaku Tosi nga ana tjetër ka qenë subjekt i një skandali mediatik, sepse pak kohë pasi ai kishte mohuar çdo lidhje me organizatën Ndragheta, në media u publikua një foto e tij, ku pozonte në një përqafim vëllazëror me shtetasin Antonio Giardini, i cili konsiderohet si lojëtar i rëndësishëm i organizatës mafioze. Aktualisht Bashkia e Veronës dhe kompanittë AGSM-Verona dhe AMIA-Verona dyshohen si kompani nën tutelën e organizatës ‘Ndrangheta’. Ka patur disa sinjale në media dhe në dosje hetimore që lidhin personazhet, ndonëse një hetim më i thelluar do të nevojitej për të verifikuar dhe dokumentuar më qartë përfshirjen e interesave të organizatës mafioze në këtë histori. Nga ana tjetër, nëpërmjet pamjeve filmike dhe dokumenteve zyrtare, rezulton se ingranimi i ‘klanit Veronez’ në projektin e riciklimit ka nisur në vitin 2014, kur deputeti rilindës Artan Gaçi shkoi në Verona dhe kërkoi zyrtarisht mbështetjen në kompaninë AMIA-Verona, për të hyrë në Shqipëri. Vizita e Gaçit u pasua nga dy vizita të Edi Ramës, i cili u takua në Itali me kryebashkiakun e Veronës, Tosi. Ky i fundit erdhi më pas në Durrës ku u fol për një projekt kulturor, por interesat e vërteta të takimeve lidheshin me biznesin e riciklimit. Pas takimeve me Ramën, kryebashkiaku i Veronës, Flavio Tosi, nisi kontaktet me Erion Veliajn dhe dy bashkitë nënshkruan dhe marrëveshjen mes tyre dhe krijuan kompaninë e përbashkët ‘Eco Tirana’. Indiciet, dokumentet publike, fotot e publikuara, hetimet e disa personazheve të lidhur nga Prokuroria italiane, çojnë në gjurmët e implikimeve të organizatës Ndragheta, duke ngritur dyshime të arsyeshme se Edi Rama ka vendosur të bëjë biznes me këtë organizatë dhe t’ua japë atyre monopolin e riciklimit. Të njëjtat kompani italiane kanë dështuar që të aplikojnë të njëjtën skemë në Rumani, Bosnje apo Kroaci. Këto ishin disa nga denoncimet e bëra sot nga ish- Kryeministri Berisha në Parlament. Ky i fundit disa prej tyre i lexoi në gjuhën italiane, duke shkaktuar të qeshura mes deputetëve socialistë.

Rikthimi i shtresës së mesme, e cila në këto katër vite të qeverisjes Rama pësoi një goditje të rëndë, duke u asgjësuar ishte premtimi i Lulzim Bashës dje në takimin me banorët e Njësisë Bashkiake nr. 5 në Tiranë. Duke folur për programin ambicioz të PD, Basha tha se, një nga shtyllat kryesore të programit është pikërisht mbështetja e shtresës së mesme. Ai foli gjithashtu për vendosjen e taksës së sheshtë 9%. Basha bëri të ditur gjithashtu, se një nga masat që do të ndërmerren menjëherë do të jetë shfuqizimi i taksës për transferimin e pronave, një taksë abuzive kjo që jo vetëm rrjep qytetarët, por njëkohësisht edhe shërben si përgjues ndaj veprimeve të tyre me pronat. “Ekonomia sot është në ditët më të zeza, pagat e ulëta, çmimet e larta, shëndetësia në kolaps total, këto janë prioriteti numër një i Republikës së Re dhe i imi si kryeministër i vendit pas 25 qershorit. Nuk ka asnjë prioritet tjetër më të rëndësishëm se ekonomia. Ditën tonë të parë në zyrë do e nisë zbatimi i planit tonë ekonomik, hapi i parë do jetë ulja e TVSH dhe taksa 9%. Çlirimi i vërtetë ekonomik që do të gjenerojë vetëm përmes uljes së TVSH 400 milionë euro. Kjo është taksa e fshehtë, dhe çfarë bëjnë këta me këto 400 milionë, palma e fasada. Shtresat e mesme, profesionistët mjekët, inxhinierët, që rëndohen nga tatimi progresiv do të kenë gjithashtu taksën e sheshtë 9%, 32 mijë lekët e para do të jenë të patatuara dhe tatimi për gjithë pjesën tjetër do jetë 9%. E njëjta gjë edhe për tatimin mbi dividentin, do të zerohet jo, sepse e bëjmë këtë për të mbështetur kapitalistët. por për të mbësjtetur sipërmarrjen që këto para t’i investiojnë dhe t’i riinvestojnë. Taksa e transferimit të pronës do të anullohet, do kemi një tarifë fikse prej 30 mijë lekësh të reja. Shteti makut që përgjon kush shiti shtëpinë, kush apartamentin, apo tokën vetëm për t’i marrë taksën dhe për të abuzuar me të. Xhirimi i vlerave ekonomike që vjen përmes transferimit të pronës nuk do të tatohet përmes vetëm kësaj tarife të vogël, që do t’i japë frymëmarrje ekonomisë”, bëri të ditur Basha. “Republikë e Re ishte ëndrra dhe premtimi që lindi nga ky bashkim i paprecedent i shqiptarëve që nga rënia e diktaturës. Sot, Republika e Re është një realitet që do të fillojë të funksionojë me votën e shqiptarëve më 25 qershor. Deri dje, i kishin shpallur sot po turren kush e kush ta fusë kokën në çadrën e lirisë. Edi Rama shpalli kryengritjen kundër Republikës së Vjetër dhe ka dalë në fushatë me dy gishta. Por në fakt, Republika e Vjetër po vazhdon edhe disa, zakonin e saj. Po mundohet ta kthejë në cirk këtë fushatë, kanë dhjetë ditë që flasin me batuta, fotomontazhe, me tuta, me poturre. Dua t’i them çdo shqiptari, ajkës së Tiranës dhe çdo qytetari në skajin më të lartë të vendit, mos u merrni me poturet e Ramës, pyeteni ku i ka 300 mijë vendet e punës që premtoi, taksat e ulëta ku i ka, pensionin e 13, ku i ka shëndetësinë falas, ku i ka subvencionet për fermerët shqiptarë, pyeteni për këto dhe po ta pyesni për këto, ju siguroj që ai nuk do përgjigjet. Dora e shtetit u zhyt thellë në xhepat tuaj në këto katër vite. 1.5 miliardë euro vetëm nga taksat e rritura, mori ç’bëri me këto lekë? Ai vendosi të mos mbante asnjë premtim, sepse kishte të tjera prioritete. Sepse Shqipëria për të nuk janë njerëzit, nuk janë as hallet, as problemet tuaja të përditshme, Shqipëria për të është një skenë e madhe, ku ka vënë në shfaqje veten e tij. Shqipëria për të janë pikturat, qypat me baltë, ekspozitat, ndeshjet e futbollit. Shqipëria për të është një grusht oligarkësh.  Më 25 qershor, numri 6 PD, që është bashkimi i gjithë forcave opozitare nuk është thjesht dhe vetëm një konkurent politik është shumë më shumë se kaq, është dera që i mbyllet njëherë e mirë republikës së politikanëve është porta që i hapet republikës së njerëzve të thejshtë të këtij vendi”, u shpreh Basha. Kreu i opozitës, Lulzim Basha gjatë takimit elektoral me banorët e Njësisë nr.5 në kryeqytet sulmoi qeverinë PS-LSI, duke theksuar se pas 25 qershorit, partitë klienteliste nuk do të jenë pjesë e Republikës së Re. Ndërsa, ju bëri thirrje demokratëve të larguar që të rikthehen në shtëpinë e lirisë dhe të braktisin partitë klienteliste. “Ëndrra më e madhe që po bashkë po i japim jetë do të jetë transforimimi më i madh i Shqipërisë që nga pluralizmi. Këtu nuk mund të ketë, e nuk do të ketë, kompromis me të keqen, kompromis me matrapazë, me shushunjat që ngjiten mbas axhendave ambicioze dhe i kthejnë ato në pluhur. E dini për kë e kam fjalën apo jo, dhe i kemi pasur dhe vetë në shpinë. Matrapazët nuk kanë vend, nuk do kenë as Pazar të vjetër, as Pazar të ri, as drekë peshku as drekë ngjalash në Republikën e Re. Ndaj ju bëj thirrje çdo qytetari dhe në veçanti atyre që janë skllavëruar me të padrejtë nga partitë klienteliste të Republikës së vjetër, ky është momenti t’i braktisin, t’ua hedhin në fytyrë teserat që i kanë përdorur si tollona, e të kthehen këtu në shtëpinë e lirisë, në këtë bashkim të jashtëzakonshëm të qytetarëve, ne i mirëpresim”, deklaroi Basha.

Rimëkëmbje ekonomike dhe vende të reja pune

Kreu i Partisë Demokratike, Lulzim Basha, thotë se me marrëveshjen e 18 majit vendoset një standard demokracie, që e lidh fatin e politikanit me atë të qytetarit. Në një takim me banorët e Farkës, Basha tha se, “Demokraci e vërtetë është kur qytetarët kanë në dorë politikanët, dhe jo e kundërta”. Sipas kryedemokratit, theksi do të vihet në luftën ndaj kanabisit dhe ndaj koncesioneve që rëndojnë xhepat e qytetarëve. “Rama nuk mbajti asnjë premtim. Thotë se, ekonomia është e mirë, sepse rrethohet nga ata të hashashit e të koncesioneve që kanë mbushur thasët me paratë e shqiptarëve. Me ata rri nga mëngjesi në darkë. Shqipëria dhe Tirana nuk janë ata. Ky s’do t’ia dijë, sepse e ka mendjen te timoni. Makinë s’ka, i ka mbetur vetëm timoni. 400 mln euro i ka kushtuar Rilindja urbane palmat. 400 mln euro është baraz me dyfishimin e gjithë pensioneve të shqiptarëve. Njerëzit nuk janë dele. Duhet të kenë punë, kujdes shëndetësor, shkolla, rrugë. Kur t’i kenë këto vijmë te palmat. Është gati të bëjë akrobacira, vetëm të mos merret me problemet dhe ato që ka premtuar. Më kollaj shitet hashashi në Shqipëri sesa një tufë sallate në Tiranë”, tha Basha. Sakaq, ai është ndalur tek programi i Partisë Demokratike, duke u shprehur se fokusi është punësimi dhe ekonomia. “Rama nuk flet, sepse bilanc nuk ka. Vende pune s’ka, 300 mijë shqiptarë i çoi në azil. Për mua, Shqipëria jeni ju. Prioriteti numër 1 është ekonomia juaj e familjeve tuaja, punësimi i të rinjve, mirëqenia e fshatit. Nuk do jem njeri i shfaqjeve dhe i teatrit. Do jem kryeministër i ekonomisë, i njerëzve të thjeshtë, i punësimit. Ulja e taksave dhe ulja e TVSH do çlirojnë miliona euro që sot zhduken. Do t’i japim ekonomisë injeksion kapitali, xhiro dhe vende pune. Një model që ka funksionuar në Europën Perëndimore dhe do funksionojë edhe këtu. Do ketë anulim të taksës Rama prej 240 lekë. Karburanti do jetë më i liri në Ballkan.  Karburanti është gjaku i ekonomisë dhe unë do të luftoj natë e ditë për uljen e çmimit të energjisë. Parashikojmë kreditim të brendshëm, investime të huaja, që do t’i japin ekonomisë frymëmarrje. 100 mln euro subvencione për fermerët. Paketa e subvencioneve do të jetë më e madhja që ka njohur ndonjëherë Shqipëria. Do zerohet kostoja e mekanikës. Do vendos tarifat doganore proporcionale me subvencionet që marrin fermerët e huaj. Djersa e fermerëve shqiptarë do peshojë po aq sa e europianëve. Tregtia e lirë në kurriz të fermerëve shqiptarë merr fund në 25 qershor. Rama ju thotë merrni kredi. Ne themi jo kredi, por mbështetje si e gjithë Europa. Të rinjtë shqiptarë që mbarojnë shkollën e lartë do të kenë në dispozicion 10 mije stazhe me 200 mijë lekë të vjetra në muaj si praktikë pune që t’i lidhim me tregun e punës. Kjo nuk do të jetë si lëmoshë sociale, por si masë ekonomike për punësimin e të rinjve”, u shpreh Basha.

Dashamir Shehi: Koha për një kontratë të madhe me shqiptarët

Kreu i LZHK, Dashamir Shehi ftoi dje gjithë qytetarët e Tiranës e gjithë Shqipërisë të nënshkruajnë kontratën e madhe me opozitën e bashkuar për të nisur rrugën e transformimit të Shqipërisë. “Sapo më shkruajti një mik dhe më tha zgjedhjet janë çështje serioze përtej batutave dhe sensit të humorit, unë dua të them se zgjedhjet janë vërtetë serioze. Kemi një kundërshtar përballë, të cilit i ka rënë morali politik deri në fund, duke bërë çdo gjë që është e mundur për të ndenjur në pushtet. Nëse këta burra që janë sot në pushtet, nëse mund t’u themi burra, do kishin qenë serioz me këtë popull, do ishin sjellë seriozisht me punën që kanë marrë përsipër për qeverisjen e Shqipërisë, të jeni të sigurtë që ne këtu sot mblidheshim kot. Por ne jemi këtu, sepse këta zotërinj na kanë dhënë një shans të madh, duke abuzuar përditë, duke gabuar përditë, duke ushtruar një arrogancë të paparë, këta e kanë tepëruar aq shumë sa duhet të ikin një ditë e më parë. Ne e kemi për detyrë, e gjithë opozita e bashkuar me PD në krye duam ta qeverisim Shqipërinë, t’iu propozojmë që të lidhim një kontratë të madhe për ta qeverisur vendin edhe më mirë nga sa e kemi qeverisur vet. Ne do të hyjmë në garë me veten, kjo është sfida jonë, dhe do ta fitojmë”, tha Shehi i pranishëm në hapjen e fushatës në Njësinë nr.5, në Tiranë.

Pampuri: Do jem zëri i çdo qytetari në Parlament

E dyta në listën demokrate për Qarkun e Tiranës, psikologia e njohur Orjola Pampuri, ftoi dje gjithë qytetarët e Njësisë Bashkiake nr. 5 në Tiranë të bëhen pjesë e projektit të Republikës së Re, projekt, i cili do të jetë mbështetja e fuqishme për çdo shqiptar dhe shqiptare jo vetëm në Tiranë, por në çdo cep të vendit. “Të gjithë së bashku po punojmë për një qëllim të vetëm, ajo është fitorja e 25 qershorit. Së bashku me struktruat, me të rinjtë dhe të rejat e Njësisë nr.5 kemi nisur një rrugëtim ku kemi ecur familje më familje, çdo biznes, pensionistë, studentë, të cilët përballen me tarifat të larta, biznese që përballen me taksa të larta, pensionistë, të cilët kanë punuar një jetë dhe sot jetojnë pa dinjitet për shkak të ekonomisë, kemi takuar persona, të cilët janë të pamundur ekonomikisht, por nuk marrin ndihmë ekonomike. Jemi nisur së bashku dhe do tia dalim më 25 qershor dhe në katër vite kam premtuar se do të jem prezent në Njësinë nr.5 për të qenë zëri i tyre dhe për të gjithnjë aty kur ata të kenë nevojë”, tha Pampuri.

Tropojanët përbuzën Ramën dje në pseudotakimin që ai kishte planifikuar për të hapur fushatën elektorale të Partisë Socialiste atje. Vetëm një grusht i vogël njerëzish dhe këta familjarë, farefis i kandidatëve të Ramës kishin dalë në takim, ndërsa pjesa tjetër ishte sjellë posaçërisht me autobusë nga Tirana. Duke i paraprirë dështimit të tij, Rama kishte porositur enkas mbushjen e pesë autobusëve me militantë, të cilët shoqëruan Ramën dje në Tropojë, e më pas në Kukës e në Has, me qëllim mbushjen e takimeve elektorale të tij në këto zona. Por ndërsa tropojanët, hasjanët dhe kuksjanët i dhanë përgjigjen e merituar Ramës duke bojkotuar takimet elektorale të tij, ata janë bashkuar të gjithë fuqishëm me projektin e Bashës për Republikën e re. Basha hapi fushatën elektorale në Tropojë ku prezantoi aty ekipin fitues dhe programin ambicioz të Partisë Demokratike për rimëkëmbjen ekonomike të shqiptarëve dhe gjithë vendit në tërësi. Kryetari i opozitës Lulzim Basha tha në Tropojë, se në ditën e parë të Republikës së re, ai do të jetë kryeministri i njerëzve të thjeshtë, punësimit dhe taksave të ulëta. Republika e re ka një plan konkret për ekonomi të fortë pa të cilën nuk mund të ketë qytetarë dhe shtet të fortë, tha Basha. “Vendimi im i parë do të jetë ulja e TVSH-së, taksa e sheshtë 9%, qindra milionë euro do të jenë në xhepat tuaja. Konsumi do të rritet, paraja do të qarkullojë, investimet kapitale do të rriten, kreditimi do të nisë, mijëra vende pune do të krijohen, energjitë pozitive do të çlirohen. Unë do të luftoj ditë e natë, prej orës time të parë për vendet e punës, për punësimin tuaj, për punësimin e rinisë”. Çdokujt do t’i jepet mundësia të ketë të ardhme më të mirë nën qeverisjen e tij, tha Basha. “Për këtë jam futur në politikë. Nuk jam futur për rehatinë time sepse jetën time arrita ta ndërtoj para se të futesha në politikë. Ju e dini, mundësia m’u dha fare i ri të studioj në Holandë, në Universitetin e Utrechtit ku mbarova me rezultate të shkëlqyera në të drejtë ndërkombëtare. U punësova dhe punova me përkushtim në Tribunalin e Hagës, ku punova me skuadrën që përgatiti aktakuzën kundër kasapit të Ballkanit, Sllobodan Millosheviçit. Vazhdova punën time në Organizatën e Kombeve të Bashkuara në ndihmë të vëllezërve dhe motrave tona në Kosovë. Ia dola me djersën e ballit, me punën time të shkëlqej në çdo mundësi që m’u dha dhe ndërtova një jetë të mirë për veten time dhe për familjen time”, tha Basha. Po lideri demokrat tha se ka ardhur koha që çdo i ri, çdo shqiptar të ketë sot shanset që ai pati dhe për këtë do të punojë ai. Nën logon e Partisë së Demokratike të themeluar nga Azem Hajdari dhe Sali Berisha, ka ardhur koha të hapim derën e Shqipërisë europiane, theksoi nga Tropoja kryetari i Partisë Demokratike, Lulzim Basha.

Shqipëria përmendet për herë të parë me shqetësim në Raportin vjetor europian të Drogave të vitit 2017, publikuar gjatë ditës së djeshme nga Qendra europiane e Monitorimit të Drogave dhe Varësisë nga Droga, me seli në Lisbonë (EMCDDA).
Raporti bazohet në informacionin që EMCDDA merr nga shtetet anëtare të BE, shteti kandidat Turqia dhe Norvegjia. Ndryshe nga viti i kaluar, ku Shqipëria nuk përmendej, në raportin e 2017-s vendi ynë veçohet si për rritjen e kultivimit të kanabisit, ashtu dhe për faktin se ajo po bëhet një rrugë kryesore e trafikimit të narkotikëve në Europë.
“Raportet e fundit e vënë theksin në ndryshimet në rrugën e trafikut të narkotikëve, me rritje të trafikut si të barit të kanabisit, ashtu dhe vajit të kanabisit nga Ballkani Perëndimor, veçanërisht Shqipëria, e lidhur me rritjen e kultivimit të kanabisit në këto vende”, thuhet në raportin vjetor të EMCDDA për vitin 2017.
Në një publikim të mëparshëm të EMCDDA, “Raporti i Tregjeve të Drogave në Europë 2016”, në bashkëpunim me Europol, që botohet një herë të tre vjet, thuhet se vendet kryesore të prodhimit të kanabisit në rajonin e Ballkanit, përfshirë Shqipërinë, Serbinë, Bullgarinë dhe në njëfarë mase Kosovën, furnizojnë tregjet e Europës Qendrore dhe Europës Lindore. Shqipëria duket të ketë qenë një prodhues i rëndësishëm (raporti i referohet dhe zhvillimeve në Lazarat dhe mbylljes së prodhimit aty).
Greqia, ku prodhohet gjithashtu kanabisi, është një pikë e rëndësishme hyrëse në BE për kanabisin shqiptar, që shpërndahet në disa shtete anëtare, përfshirë Italinë, Kroacinë, Hungarinë, Republikën Çeke dhe Austrinë. Një pjesë e kanabisit shqiptar mund të shitet dhe në Europën Perëndimore, si në Gjermani ose Francë. Për më tepër, Europol bën të ditur se kanabisi me fuqi të ulët trafikohet në Holandë dhe përdoret për të prodhues kanabis të fortë, që më pas destinohet për tregjet e Mbretërisë së Bashkuar.
Shqipëria dhe Holanda duket të jenë nyjet kryesore të shpërndarjes për vajin afgan të kanabisit (Europol, 2015), sipas Raportit të Tregjeve të Drogave në Europë 2016.
Në hartat e publikuara nga raporti, shihet që Shqipëria ndodhet si në rrugën e trafikut të barit të kanabisit, ashtu dhe të vajit të kanabisit.
Raporti thekson se grupet shqiptare të krimit të organizuar vlerësohet se janë të përfshirë në tregtimin e vajit afgan të kanabisit, kryesisht në Europën Qendrore dhe Lindore përmes Holandës dhe Mbretërisë së Bashkuar.

Demiraj: Luftë pa kompromis ndaj drogës

Ministri i Punëve të Brendshme, Dritan Demiraj u njoh me gjetjet e Raportit vjetor europian të Drogave të vitit 2017, publikuar gjatë ditës së djeshme nga Qendra europiane e Monitorimit të Drogave dhe Varësisë nga Droga, me seli në Lisbonë (EMCDDA), ku Shqipëria përmendet në veçanti për rritjen e kultivimit të kanabisit dhe trafikimit të narkotikëve në Europë.
Ministri i Punëve të Brendshme, Dritan Demiraj shprehet thellësisht i angazhuar për ta nxjerrë Shqipërinë nga harta e kultivimit dhe trafikimit të lëndëve narkotike.
Ministri Demiraj ka filluar një komunikim intensiv jo vetëm me drejtuesit e Policisë, por edhe me drejtuesit e agjencive të tjera, si drejtorin e Shërbimit Informativ, prokurorin e Përgjithshëm dhe prokurorin e Krimeve të Rënda, për të pasur një reagim më të koordinuar për një luftë pa kompromis ndaj këtij fenomeni.
Kjo luftë do të shtrihet që nga kontrolli tërësor i territorit të Republikës së Shqipërisë deri tek shkatërrimi i grupeve kriminale që merren me trafikimin e lëndëve narkotike dhe të implikuarve nga radhët e punonjësve të Policisë.
Ministri Demiraj përgëzon punën goditëse të Policisë së Shtetit në parandalimin dhe trafikimin e lëndëve narkotike dhe garanton mbështetje të plotë të të gjitha strukturave për zbatimin e Planit të Veprimit kundër Kultivimit dhe Trafikimit të Kanabisit 2017–2020.

Trafiku i drogës Shqipëri-Itali, 1 ton drogë e sekuestruar, 61 të arrestuar

Policia italiane përmes një operacioni antidrogë ka goditur në Catania, organizatën e trafikut të drogës Shqipëri-Itali. Një operacion i madh është ndërmarrë nga policia e Ragusa-s në Itali dhe Guardia di Finanza e Comos, kundër një rrjeti që trafikonte drogë nga Shqipëria në Itali.
Në vazhdën e operacionit të koduar “Balkan” janë nën hetim 61 persona, 37 mes të cilëve shqiptarë (6 ende në kërkim) dhe 24 italianë, të gjithë me origjinë siçiliane. Gjatë hetimeve, që nisën në vitin 2012, ka pasur bastisje në shumë qytete italiane; më e rëndësishmja në Catania, ku u sekuestruan 1,000 kg marijuanë.
Ditët e fundit janë arrestuar promotorët dhe organizatorët e trafikut, të gjithë shqiptarë. Në pranga është vënë: Fation Hoxhaj, 40 vjeç; Mandi Hoxha i njohur edhe si Gentian Hoxhaj, 37 vjeç, Erson Zhuka, 41 vjeç dhe Roland Kalemaj, 41 vjeç, raportojnë mediat lokale.
Hetimi zgjati disa vite dhe në të janë përfshirë dhjetëra hetues, të cilët kanë arritur të rindërtojnë të gjithë zinxhirin e trafikut të marijuanës nga Shqipëria në Itali. Ngarkesa të mëdha janë nisur nga Shqipëria për në Itali.
Policia e shtetit në Itali dhe Guardia di Finanza, për më shumë se një vit e gjysmë kanë punuar veç e veç dhe pastaj kanë kombinuar hetimet në fazën përfundimtare, për të identifikuar furnizuesit shqiptarë. Një total, 61 persona do të gjykohen me akuzën se kanë qenë pjesë e organizatës kriminale të dedikuar për trafikimin e drogës.