Pas Interit, Stefano Pioli nis një aventurë të re në stolin e Fiorentinës duke pasuar në këtë detyrë portugezin, Paulo Sousa. Lajmin e bën të ditur vetë klubi toskan nëpërmjet një komunikate zyrtare ku thekson se Pioli do të marrë menjëherë drejtimin e skuadrës. Si lojtar, Pioli ka luajtur 156 ndeshje me fanellën e Fiorentinës mes viteve 1989-1995. Trajneri i ri do të firmosë një kontratë 2-vjeçare me opsion për një tjetër sezon. Stefano Pioli ka një eksperiencë të madhe në Serie A ku ka drejtuar Bolognan, Lazion dhe Interin gjatë sezonit të fundit.
Kulmin e karrierës si trajner ai e ka arritur në Romë me skuadrën e Lazios, të cilën e kualifikoi në Champions League menjëherë pas sezonit të tij të parë si bardhekaltër. Në sezonin e fundit, ai mori drejtimin e Interit duke mos arritur të bindë drejtuesit e klubit zikaltër për të vazhduar projektin me skuadrën milaneze. Me Interin, ai arriti të fitonte 12 nga 16 ndeshjet e para në krye të stolit, por mbyllja e sezonit rezultoi fatale për të pasi skuadra zikaltër nuk arriti të kualifikohej për në zonën europiane.

Fabio Coentrao ishte i vetmi që mungoi në festën me skuadrën në “Bernabeu” për fitoren e Champions League, një sinjal i rëndësishëm për largimin e tij këtë verë. Mësohet se mbrojtësi do të rikthehet në Portugali te Sporting Lisbon ku do të luajë si i huazuar për një sezon. Coentrao ka një kontratë deri më 2019 me Real Madridin dhe një pagë prej 3.5 mln euro, por Sporting do të mbulojë vetëm 10% të pagës, pra 350 mijë euro për huazimin e tij.

Te Leicester City janë të dorëzuar për largimin e Riyad Mahrez dhe tashmë po kërkojnë pasuesin e tij, të cilin e kanë gjetur. Sipas shtypit anglez, drejtuesit kanë shënjestruar Gylfi Sigurdsson, i cili ishte një nga më të mirët te Swansea sezonin e kaluar duke kontribuar me 9 gola në mbijetesën e ekipit. Për ta shkëputur nga Swansea oferta nga Leicester është 35 mln euro, ndërsa me lojtarin islandez akordi është arritur prej ditësh.

Borussia Dortmund nuk ka pritur gjatë që ta gjejë pasardhësin e Thomas Tuchelin, i cili u largua nga skuadra në fund të sezonit. Ekipi nga Bundesliga trajner të ri e ka emëruar holandezin, Peter Bosz, i cili së fundi e ka drejtuar Ajaxin. “Peter Bosz është trajneri i ri i Dortmundit. Kontrata do të zgjasë deri në vitin 2019”, thuhet në njoftimin e klubit.
Që pas largimit nga drejtimi i Dortmundit, Thomas Tuchel po pret ofertën e duhur për të rinisur aventurën në stol teksa disa prej tyre i ka refuzuar. Një prej tyre është ajo e Bayer Leverkusen ku sipas agjentit të tij nuk është në lartësinë e trajnerit gjerman. Ai tha se Tuchel për momentin do të marrë disa pushime dhe do të ndjekë zhvillimet në merkato, por sipas mediave gjermane, Tuchel synon të trajnojë në Premier League.

Adnan Januzaj rikthehet nga huazimi te Sunderland, por nuk pritet të qëndrojë te Manchester United pasi nuk është në planet e Jose Mourinhos. Për talentin me origjinë shqiptare janë disa ekipe të interesuara, ndërsa oferta më interesante është ajo e Marseille në kampionatin francez. Rudi Garcia është gati t’i ofrojë vendin e titullarit për sezonin e ardhshëm mesfushorit 22-vjeçar, i cili mund të pranojë për të provuar vetën jashtë kampionatit anglez.

Firma mungon, por Luciano Spalleti është trajneri i ri i Interit. Ende nuk ka asgjë zyrtare, por tashmë zikaltërit kanë emrin e ri të teknikut që do t’i udhëheqë ata për sezonin e ardhshëm. Do të jetë ish-trajneri i Romës, ai që do të drejtojë anijen e Interit, ku sigurisht objektivi kryesor është rikthimi i skuadrës në Champions. Mes palëve ende nuk është firmosur asnjë kontratë, por është vetë Spalleti ai që ka deklaruar se çdo gjë është në rregull dhe se është shumë i lumtur që do të drejtojë një skuadër si Interi.
“Jam i lumtur. Çfarë pres nga udhëtimi? Duhet ta mbajmë një konferencë për shtyp, pastaj nëse punojmë në mënyrë korrekte i bëjmë gjërat e rregullta. Nënshkrimi? Jemi ende me të vjetrën, i bëjmë të gjitha me një shtrëngim duarsh”, ka deklaruar Spaletti pas arritjes në Milano. “A jam i kënaqur të punoj me Sabatinin? E tepërt ta them, është njeri i mirë dhe di të punojë nën presion, është e lehtë të punosh me persona që kanë respekt, cilësi dhe kontakt me atë që i rrethon”, ka shtuar ai. Spalletti në sezoni e fundit e ka drejtuar Romën, derisa në të kaluarën ka udhëhequr ekipet si: Zenit, Empoli, Sampdoria, Venezia, Udinese dhe Ancona.
Ndërkohë drejtori sportiv i ekipeve të Suning ka dhënë vlerësimin e tij për Spalletin, duke e cilësuar atë si një personazh, i cili ka kapacitetet për të arritur gjëra të mëdha. Në orët e ardhshme do të vijë dhe prezantimi i trajnerit, ku do të bëhen publike detaje nga akordi i arritur. Përsa i përket çështjes së Perisiç, drejtues të klubit zikaltër, deklarojnë se nuk kanë biseduar me të, fakt që ndoshta shton dyshimet për një largim të mundshëm të kroatit. Kandidatët që kanë shfaqur interes për të pasur në dispozicion shërbimet e sulmuesit të krahut, nuk mungojnë. Man.United ka ofruar 52 milionë euro. Largimi i tij për Interin konsiderohet si i nevojshëm për shkak të fair play-t financiar.

Real Madrid do të bëjë disa ndryshime në skuadër gjatë kësaj vere, duke larguar shtatë lojtarë. Pavarësisht se Real Madrid këtë sezon fitoi La Ligan dhe Ligën e Kampionëve për të dytin vit radhazi, trajneri Zinedine Zidane do të bëjë disa ndryshime. Ai nuk është i kënaqur me disa lojtarët, të cilët pritet të largohen gjatë kësaj vere, ndërsa të tjerë të do të ofrohen në skuadër, shkruan “AS”.
Tashmë dy lojtarë janë larguar Pepe dhe Coentrao. Njërit i kishte skaduar kontrata, ndërsa i dyti do të huazohet në Sporting Lisbona. Por, rrugës së tyre janë edhe pesë futbollistë të tjerë, të cilët nuk kanë vend në skuadrën e trajnerit francez.
I pari që do të largohet është James Rodriguez, për shkak të minutazhit të vogël dhe mospërshtatjes në stilin e lojës së Zidane. Për të njëjtën arsye do të largohet edhe sulmuesi Alvaro Morata, i cili para një sezoni u kthye në skuadër nga Juventus.
Largim tjetër i madh është edhe ai i portierit Keylor Navas, i cili nuk dëshiron të jetë portier i dytë, pasi Reali pritet që gjatë kësaj vere të transferojë portierin e Manchester Unitedit, David de Gea. Dy largimet e tjera më pak të dhembshme janë ai i mbrojtësit të djathtë Danilo dhe i sulmuesit të talentuar Mariano.
Sulmuesi i Realit të Madridit, Alvaro Morata nuk ka marrë ende asnjë vendim për të ardhmen pas një sezoni plot dritëhije në aspektin personal, çka ka bërë që të nisë një ankand i vërtetë. Milani në Itali është skuadra që ka shfaqur hapur interesin për të veshur kuqezi bomberin iberik, por futja në lojë e skuadrave angleze e komplikon misionin për klubin piemontez. Milan i ka bërë Moratës një ofertë konkrete nga e cila mund të përfitojë rreth 6 milionë euro në sezon, por Morata mbetet i pavendosur pasi ai është shumë i lidhur me ngjyrat bardhezi ku shpërtheu duke lënë gjurmë në futbollin italian.
Dashuria për Juventusin për momentin e mban Moratën larg Serie A dhe nga kjo situatë përpiqet të përfitojë Jose Mourinho. Largimi i paralajmëruar i Zlatan Ibrahimoviç e ka vënë në lëvizje trajnerin luzitan për të gjetur zëvendësuesin ideal të suedezit. Të gjitha rrugët e çojnë Mourinhon në Madrid, por gjithashtu në garë për të është edhe Chelsea. Fakti që klubet angleze nuk e kanë aspak problem çështjen e parave, mund ta shtyjë sulmuesin drejt ishullit.
Te Manchester United, Morata e ka vendin e titullarit të sigurt, por nuk mund të thuhet e njëjta gjë për Chelsean ku Diego Costa mbetet zgjedhje e parë. Gjithsesi, e ardhmja e bomberit të bluve mbetet ende mes Kinës dhe Anglisë dhe një largim i mundshëm i tij në Azi do ta hidhte menjëherë në sulm Antonio Conten, i cili nuk dëshiron të humbasë cilësi në repartin e tij të avancuar.