Ministri i Brendshëm, Dritan Demiraj, ka nxjerrë një udhëzim ku punonjësit e Policisë së Shtetit dhe ata të Gardës së Republikës e kanë të ndaluar të marrin pjesë dhe kontribuar fizikisht ose financiarisht në një parti politike.
Me anë të një udhëzimi që përcakton saktësisht rolin dhe detyra e punonjësve të Policisë e të Gardës, para, gjatë dhe pas procesit zgjedhor, ministri i Brendshëm, Dritan Demiraj, u kujton atyre se janë të depolitizuar.
Ndërsa në udhëzim, ai saktëson se punonjësit e Policisë e të Gardës së Republikës nuk mund të përfshihen në fushatën zgjedhore, edhe pasi të kenë përfunduar orarin zyrtar të punës së tyre.

UDHEZIMI

Prioriteti kryesor i ministrit të Brendshëm, Dritan Demiraj, ndër tre objektivat e mandatit të tij janë zgjedhjet e 25 qershorit. Në takimin e tij të parë, si kreu i këtij dikasteri me drejtorin e Përgjithshëm të Policisë, Haki Çako, dhe drejtues të tjerë të Policisë, Demiraj paralajmëroi masa të ashpra, deri në burgim, për çdo punonjës policie që do të influencojë në mbështetjen e ndonjë partie politike.
Ndërsa, së fundmi, ai ka shpërndarë një udhëzim, ku sqaron konkretisht se çfarë u ndalohet punonjësve të Policisë së Shtetit dhe të Gardës së Republikës. Punonjësit të Policisë së Shtetit i ndalohet të jetë anëtar i një partie ose organizate politike, si dhe të mbështetë fushatën e një partie, organizate politike, të një anëtari partie politike apo të një kandidati të pavarur, duke marrë pjesë ose kontribuar fizikisht ose financiarisht.
Kurse punonjësit të Gardës së Republikës i ndalohet të sillet dhe të mbajë qëndrime që cenojnë natyrën e depolitizuar të Gardës, si dhe anëtarësimi e pjesëmarrja në veprimtari të partive a të shoqatave politike. Në udhëzim citohet edhe Neni 116 i Rregullores së Policisë, që flet për rrjetet sociale, në bazë të të cilit efektivëve u ndalohet të shprehin qëndrime politike.

Prokurori ka nisur hetimet për zyrtarët dhe drejtorët e shkollave dhe të shëndetësisë të përfshirë në fushatën zgjedhore. Bëhet e ditur se, pas shkarkimit të dhjetëra zyrtarëve dhe kallëzimit të tyre në Prokurori me motivacionin se janë përfshirë në fushatën elektorale, organi i akuzës ka nisur hetimet për çdo rast. Në këtë hetim janë përfshirë disa Prokurori të rretheve si Berat, Durrës, Tiranë, Shkodër dhe veprimet hetimore po kryhen për akuzën e shpërdorimit të detyrës dhe detyrimin e qytetarëve për të marrë pjesë në aktivitete politike.
Pjesa dërrmuese e të larguarve janë përfaqësues të Lëvizjes Socialiste për Integrim. Vetëm të shtunën, ministri i Drejtësisë Gazmend Bardhi urdhëroi shkarkimin e 8 zyrtarëve në varësi të tij, 5 drejtorë burgjesh, 2 hipotekash dhe drejtorin e Përmbarimit Gjyqësor në Durrës. Sipas ministrit është e provuar që këta ish-zyrtarë janë përfshirë në fushatën e partive politike dhe në Prokurori kanë dorëzuar prova që i implikojnë.
Këto prova po verifikohen nga Prokuroria dhe në ditët në vijim nëse do të jetë e nevojshme do të thirren për t’u pyetur edhe personat e kallëzuar. Hetimet kanë nisur edhe për drejtorë në arsim e shëndetësi të përfshirë në fushatën zgjedhore.

Nipi i Zani Çaushit bën fushatë për Edi Ramën në Vlorë. Denoncimi është bërë nga ish-Kryeministri Berisha pas një mesazhi të dërguar nga një qytetar nga Vlora. Qytetari nga Vlora shkruan se numri dy i listës së PS për deputete në Vlorë, Vilma Bello shkon shtëpi më shtëpi me nipin e famëkeqit Zani Çaushi për të kërkuar votën.
“Nipi i Zani Çaushit, dora vetë. Në foto, numri dy për deputete në Vlorë, Vilma Bello, shtëpi në shtëpi me Ervis Çaushin (personi me bluzë blu). Lexoni mesazhin e qytetarit dixhital”, shkruan Berisha.
Përshëndetje doktor. Kjo në foton që po ju dërgoj është kandidatja për deputete e Partisë Socialiste, numri 2 në listë në Vlorë, Vilma Bello. Por shikoni me kë shkon shtëpi më shtëpi për të kërkuar votën. Personi në krah të saj me bluzë blu, i shëndoshë është Ervis Çaushi, nipi i famëkeqit Zani Çaushi, djali i vëllait. Si mund të pretendosh të dalësh në fushatë shtëpi më shtëpi e t’u kërkosh votën qytetarëve me këta njerëz që kanë terrorizuar qytetin në vitin ’97?”, shkruan qytetari nga Vlora.

Kryetari i Bashkisë së Durrësit, Vangjush Dako lejon ndërtimin e pallateve pa leje në këmbim të votave për PS-në. Denoncimi është bërë nga ish-kryeministri Berisha pas një mesazhi të dërguar nga një qytetar nga Durrësi. Duke cituar qytetarin dixhital, Berisha shkruan se Gjushi ka urdhëruar forcat e policisë që të mos bëjnë asnjë veprim ndaj atyre që po ndërtojnë pa leje në qytetin bregdetar. “Qytetari dixhital dononcon Gjushin, i cili po lejon ndërtime të shumta të pallatave në Durrës pa leje kundrejt votave. Lexoni mesazhin e tij”, shkruan Berisha.
“Para disa ditësh të kam dërguar një sms në lidhje me emërimet në polici të hajdutëve të votave. Sot, po të tregoj se kjo vjedhje ka filluar. Konkretisht në Durrës, Gjushi ka urdhëruar policinë të mos procedojnë asnjë person që po kryen ndërtime pa leje. Këtyre, Gjushi u dërgon betonin e tij dhe u merr votat. Ky fenomen po ndodh kudo. Në Durrës, unë kam raste konkrete ku forcat e policisë kanë shkuar dhe me urdhër të Gjushit janë larguar pa kryer asnjë veprim. Kështu po ikin shumë vota të PD në drejtim të PS”, shkruan qytetari.
Gjatë ditëve të fundit, jo vetëm në qytetin e Durrësit, por edhe në bregdet kanë lulëzuar ndërtimet pa leje. Disa pallate kanë ngritur katin e parë, ndërsa shumë të tjerë kanë hapur themelet dhe po punohet natë e ditë që punimet të përfundojnë sa më shpejt të jetë e mundur.
Disa ndërtime pa leje dhe pa projekt po kryhen në buzë të detit në plazhin e Durrësit, gjë e cila është në kundërshtim të plotë me të gjitha ligjet. Betonieret e Gjushit dërgojnë beton papushim, ndërsa policia nuk ndërhyn.
Po ashtu, edhe nga plazhi i Currilave e deri në afërsi të Shkëmbit të Kavajës, vija bregdetare është kthyer në një kantier ndërtimi. Punimet, ndërtimin e objekteve shumëkatëshe, i kanë kthyer këto zona turistike në një vend aspak të përshtatshëm për pritjen e turistëve. Përballë këtij fenomeni shkatërrues për turizmin, ku vetëm pak metra larg bregut të detit ndërtimet vijojnë pa pushim, ndërsa kryetari i Bashkisë së Durrësit, Vangjush Dako, urdhëron forcat e policisë që të mos ndërhyjnë.
Vangjush Dako po kafshon çdo vit e më shumë plazhet publike jo vetëm me ndërtime pa leje, por edhe duke i kaluar ato tek privatët. Madje, kulmi është se në Bashkinë e Durrësit këtë gjë e thonë me mburrje. “Në vijën bregdetare nga Ura e Dajlanit deri tek Shkëmbi i Kavajës, do të lëmë në dispozicion të pushuesve vetëm tri ose katër parcela të vogla, ku qytetarët do të qëndrojnë pa paguar”, ka deklaruar drejtori i Tatimeve në Bashkinë e Durrësit. Sipas tij, për qytetarët e varfër “do të kenë mundësi për të pushuar pa paguar tek “Apolonia” dhe “Hekurudha” dhe në bregdetin e Rrushkullit”. Ky është një rast i pa precedent për çdo vend demokratik, ku një qytet që shpenzon mbi 30 milionë euro për projekte faraonike si sheshi qendror, Veliera, Pishina olimpike, u heq qytetarëve të vet të drejtën universale për të shijuar detin dhe rërën pa pagesë. E gjitha kjo po bëhet në emër të mbajtjes së plazheve pastër, por në fakt është një shfrytëzim barbar i pasurisë publike nga pazarxhinjtë e Dakos.
Në Durrës, janë bërë ndërtime pa leje në det. Të gjithë këta objekte shkarkojnë ujërat e ndotura në det në mënyrë abuzive, duke bërë që niveli i i ndotjes në vijën bregdetare nga Currilat e deri në plazhin “Iliria” të jetë mjaft shqetësues. Në një masë të madhe, lokalet pranë bregut të detit nuk kanë kanalizime, ndërsa rasti më flagrant i konstatuar gjatë inspektimit kanë qenë inertet e ndërtimit të derdhura në det, për të cilat janë vënë gjoba, ndonëse ende nuk  po punohet për pastrimin e bregdetit.

Një konflikt me armë ka tronditur qytetarët në qendër të Durrësit mbrëmjen e djeshme. Sipas burimeve, ngjarja ka ndodhur rreth orës 22:30 në bulevard. Bëhet e ditur se, dy të rinj janë konfliktuar me njëri-tjetrin në afërsi të një bilardo, pranë Pallatit të Kulturës, në Bulevardin “Dyrrah”.
Gjatë grindjes, njëri prej të rinjve ka nxjerrë armë dhe ka qëlluar disa herë. Fatmirësisht nga të shtënat nuk ka pasur të plagosur. Autori është larguar menjëherë nga vendngjarja. Policia ka shkuar menjëherë në vendin ku ndodhi konflikti i armatosur dhe ka shoqëruar djalin tjetër, që u përfshi në konflikt. Në vendngjarje janë gjetur edhe gëzhojat e shtëna, nga i riu që ende nuk është identifikuar nga policia.

Ish-drejtuesi i Policisë së Shtetit, Haki Hasanbegaj u lirua dje nga Gjykata e Krimeve të Rënda. Haki Hasanbegaj, ish-shefi i Rendit në Vlorë arrestuar katër muaj më parë se ndihmonte një grup kriminal që kultivonte kanabis në Tepelenë dhe Vlorë, është liruar nga Gjykata e Krimeve të Rënda.
Togat e zeza kanë ndryshuar masën e sigurisë për ish-zyrtarin e policisë nga arrest me burg në arrest shtëpie me mbikëqyrje elektronike. Dy muaj me parë, Gjykata e Lartë liroi Gani Abazin, ish-shefin e Rendit të Komisariatit të Tepelenës edhe ai i dyshuar se ndihmonte të njëjtin grup kriminal.
Pavarësisht ndryshimit të masës së sigurisë, Prokuroria thotë se është e provuar se dy ish-policët kanë bashkëpunuar me grupin kriminal. Prova më e fortë për këtë grup kriminal janë përgjimet telefonike. Sipas hetimeve, Haki Hasanbegaj ka patur lidhje të ngushta me Elton Çiçën, i vrarë në një atentat në zonën e ish-Bllokut në muajin maj të vitit të kaluar.
Sipas hetimeve, të paktën në dy raste, zyrtarët e policisë kanë bashkëpunuar me trafikantët, ku policia arriti të sekuestrojë më shumë se dy ton kanabis në dy aksione.
Ish-shefi i Rendit në Drejtorinë e Policisë së Vlorës, Haki Hasanbegaj u arrestua në shkurt të këtij viti me akuzën e kultivimit të lëndëve narkotike në kuadër të grupit të strukturuar kriminal, pasi lejonte dhe favorizonte me vetëdije kultivuesit e drogës në zonën e Tepelenës dhe Vlorës.

Gjykata e Krimeve të Rënda i caktoi masën e sigurisë “arrest me burg” 4 të arrestuarve, të dyshuar si pjesë e dosjes së trafikut të drogës nga Laguna e Vilunit drejt Italisë. Gjyqtarja e gatshme, zhvilloi seancat gjyqësore me dyer të mbyllura, duke pranuar kërkesën e Prokurorisë që të dyshuarit Renato Çaushi, Andrea Mita, Kasem Piluri dhe Altin Rramolli, të qëndrojnë në qeli deri në përfundim të hetimeve. Gjykata arsyetoi vendimin, duke thënë se janë siguruar biseda telefonike e prova të ndryshme që ngrenë dyshime të arsyeshme, se 4 të arrestuarit janë përfshirë në rrjetin e trafikut të drogës.
Vetë të dyshuarit dhe avokatët mbrojtës, nuk pranuan argumentimin e Gjykatës, që sipas tyre, është i pa bazuar në prova dhe ligj. E për këtë fakt dhe të tjera që do të sigurohen në ditët në vazhdim, avokatët thanë se do të ankimojnë vendimin e arrestit pranë Gjykatës së Apelit për Krime të Rënda. Sipas avokatëve, akuza e trafikut të drogës në bashkëpunim nuk qëndron dhe të gjitha veprimet e tjera proceduriale janë të paligjshme, me arsyetimin se janë kryer tej çdo afati hetimor, pasi kjo çështje ishte mbyllur dhe personat përgjegjës janë dënuar.
Nga ana tjetër sipas Prokurorisë, të 4 të arrestuarit dyshohet se janë pjesë e grupit që furnizonin me drogë rrjetin e organizuar nga Shkodra që merrej me trafik droge nga Laguna e Vilunit. Për llogari të këtij hetimi, janë shpallur në kërkim edhe disa persona të tjerë mes tyre biznesmenë të njohur. Sipas policisë, 4 të arrestuarit dhe personat e shpallur në kërkim dyshohet se janë pjesë e rrjetit prej 7 personave tashmë të dënuar në formën e prerë nga Gjykata e Krimeve të Rënda me 54 vite burg në total. Të dënuarit Mikel Hoxha, Ervis Sulo, Indrit Rraja, Leonidha Dhimojani, Mirjan Vitaj, Alfred Syli dhe Kristjan Lokaj ishin personat që kryenin transportin e drogës nga Laguna e Vilunit drejt Italisë. Ndërsa të 4 arrestuarit e fundit dyshohet se janë personat që siguronin drogën dhe e dërgonin në Shkodër nga ku më pas nisej drejt Italisë me skaf nga Laguna e Vilunit. Të dënuarit dhe 4 të arrestuarit e fundit në shtator të 2014 tentuan të kalojnë drejt Italisë me skaf një gomone me rreth 600 kg drogë.

Edukatorja e një kopshti privat, u arrestua nga Policia e Tiranës me akuzën e ushtrimit të dhunës ndaj dy fëmijëve dhe shpërdorimit të detyrës. Dhuna u denoncua nga prindërit e dy fëmijëve, pasi kishin parë shenja dhune. Pretendimi i tyre u konfirmua nga pamjet e kamerave të sigurisë.
Një edukatore e një kopshti privat të kryeqytetit u vu në pranga për ushtrim të dhunës fizike ndaj fëmijëve.
Denida Rexhepi, 30 vjeç u denoncua nga dy prindër të ndryshëm, shtetaset me  inicialet J.B dhe M.L, që kishin vënë re shenja të dhunës në trupat e dy fëmijëve të tyre. Pas denoncimit policia sekuestroi pamjet filmike të kopshtit që gjendet në rrugën “Nikolla Lena”. Në to shihej se si edukatorja kishte ushtruar dhunë në të paktën dy raste ndaj të miturve. Filmimet u përkasin datave 30 dhe 31 maj.
Shkak për dhunën dyshohet se është bërë fakti se dy fëmijët janë grindur me njëri-tjetrin. Policia ka marrë deklarime të punonjësve dhe administratorëve të kopshtit, si dhe të disa prindërve. Ndërsa të miturit e dhunuar janë pyetur nga hetuesit në prani të prindërve dhe të një psikologu të autorizuar.
Aurora Cici, psikologe e kopshtit, thotë se ka mbetur e tronditur nga rasti. Policia dyshon se rastet e denoncuar nuk janë të vetmit dhe se pre e dhunës ka rënë edhe një vajzë e mitur. Për këtë arsye po verifikohen edhe filmimet e ditëve të tjera të kamerave të sigurisë.

Persona të armatosur dhe të maskuar grabitën nën kërcënimin e armëve 10 mijë euro në një banesë në qytetin e Fierit. Grabitësit janë futur në banesë dhe kanë kërcënuar me armë pjesëtarët e familjes, duke i detyruar të tregonin ku i mbanin paratë. Ngjarja e rëndë ka ndodhur rreth orës 4:00 të mëngjesit të së dielës. Pas dhunës së ushtruar ndaj dy familjarëve, njëra nga vajzat e shtëpisë është detyruar të tregojë eurot. Maskat, pasi kanë marrë 10 mijë eurot janë larguar me një makinë që i priste disa metra larg shtëpisë.
Po ashtu, persona të armatosur dhe të maskuar grabitën nën kërcënimin e armëve një banesë në qytetin e  Elbasanit. Ngjarja ka ndodhur gjatë natës në lagjen “Emin Matraxhiu” të qytetit. Sipas burimeve, dy persona të maskuar kanë hyrë në banesën e shtetasit Sh.E, 48 vjeç dhe pasi e kanë kërcënuar me armë, kanë grabitur një sasi të konsiderueshme eurosh. 48-vjeçari ka njoftuar policinë, e cila gjeti pranë vendit të ngjarjes dy kapuçë dhe një levë hekuri, të cilat janë hedhur nga autorët pas grabitjes së kryer. Policia bëri të ditur se po punon për identifikimin dhe kapjen e autorëve.