Shefi i Komisariatit të Policisë së Vaut të Dejës, Edmond Metko u shkarkua dje nga detyra nga ministri i Brendshëm, Dritan Demiraj, për shkak se bashkë me shoferin tij kërcënuan reporterin e Partisë Demokratike. Ngjarja e rëndë ka ndodhur mëngjesin e djeshëm, para se të zhvillohej mitingu i çeljes së fushatës në Vaun e Dejës.
Burime nga vendi i ngjarjes bënë të ditur se, reporteri i PD po udhëtonte me makinë për të marrë pjesë në mitingun e opozitës, ku ishte i pranishëm edhe kryetari Basha. Ai ka parakaluar makinën e shefit të komisariatit për të pasqyruar aktivitetin e opozitës, por kryepolici i Vaut të Dejës i ka bllokuar rrugën makinës së reporterin dhe pasi ka dalë nga makina e ka kërcënuar, duke i thënë se do t’i vërë prangat.
“Kush je ti që më parakalon mua. Unë të vë prangat në vend dhe të rras në burg”, i ka thënë kryepolici reporterit të PD. Edhe shoferi i tij e ka kërcënuar reporterin, megjithëse ky i fundit i ka sqaruar se po shkonte në aktivitetin e opozitës për ta pasqyruar në media.
Lajmin e bëri të ditur kryetari i opozitës, Lulzim Basha, gjatë hapjes së fushatës në Shkodër. PD hapi dje fushatën elektorale në Vaun e Dejës i pranishëm ishte vetë Basha.
Rasti është denoncuar me shpejtësi te ministri i Brendshëm, Dritan Demiraj, i cili ka shkarkuar nga detyra shefin e komisariatit të policisë. Ky është incidenti më serioz i regjistruar deri më tani që nga hapja e fushatës elektorale.
Shkarkohet kryepolici i Vaut të Dejës, kërcënoi reporterin e PD
Ministri Demiraj pret ambasadorin italian për zgjedhjet dhe drogën
Ministri i Punëve të Brendshme, Dritan Demiraj, priti në takim ambasadorin e Republikës së Italisë në Tiranë, Alberto Cutillo, me të cilin biseduan rreth bashkëpunimit të frytshëm dypalësh.
Ambasadori italian Cutillo i shprehu ministrit Demiraj përgëzimet për postin e ministrit të Punëve të Brendshme, në këtë moment delikat dhe të rëndësishëm për vendin. Ai i parashtroi ministrit Demiraj, bashkëpunimet e rëndësishme ndërmjet dy palëve dhe shprehu dëshirën për t’i vijuar dhe zgjeruar ato.
Ministri i Brendshëm, Demiraj u përqendrua tek prioriteti i mandatit të tij, duke iu referuar luftës me zero tolerancë kundër kultivimit dhe trafikimit të lëndëve narkotike, garantimin e një procesi zgjedhor të qetë dhe mos përfshirjes së Policisë në proces, si dhe garantimin e një sezoni turistik të sigurt.
Pak ditë më parë, ministri Demiraj zhvilloi një takim me ambasadorin e Mbretërisë së Bashkuar, Duncan Norman. Ministri Demiraj i shprehu ambasadorit ngushëllimet më të sinqerta për aktin e rëndë terrorist që ndodhi në Manchester dhe mori jetën e 22 personave të pafajshëm. Ministri i Punëve të Brendshme, Demiraj diskutoi me ambasadorin edhe për prioritetet e tij në krye të Ministrisë, duke u përqendruar tek garantimi i një procesi të qetë dhe të sigurt zgjedhor, luftën pa kompromis kundër kultivimit dhe trafikimit të lëndëve narkotike, kundër përdorimit të parave të trafikimit të drogës dhe blerjes së votës.
Sulmi kimik në mitingun e opozitës, analizat dërgohen në Gjermani
Instituti i Mjekësisë Ligjore i ka kthyer përgjigje me shkrim Prokurorisë së Tiranës se nuk ka mundësi, që brenda një kohe të shkurtër të përcaktojë shkakun e helmimit të 140 pjesëmarrësve në mitingun hapës së fushatës të Partisë Demokratike. Përveç pamundësisë, nëse këto analiza do të kryheshin në Tiranë do të kishin një kosto të lartë, të cilën buxheti i Mjekësisë Ligjore nuk e përballon. Janë rreth 32 mijë substanca kimike, të cilat duhet të kalonin në sitën e ekspertëve.
Në këtë mënyrë, hetuesit do t’i nisin një letër porosi autoriteteve gjermane, ku do të kërkojnë ndihmën e tyre. Analizat e 20 personave, të cilët janë me kartelë mjekësore, pasi kanë qëndruar dy ditë në spital do të dërgohen në një laborator gjerman.
Grupi hetimor shpreson që brenda disa ditësh të ketë përgjigjen e saktë se çfarë solli helmimin e pjesëmarrësve në miting. Për Prokurorinë është një hetim kompleks dhe i vështirë. Prokuroria dyshon se, shkak mund të jenë bërë edhe ndriçuesit që u përdoren në miting. Ndërkohë, një tjetër ekspertim do të ketë për rrobat e personave të helmuar. Në dosjen e referuar pranë Prokurorisë së Tiranës, policia thotë se në përfundim të aktivitetit elektoral të PD për zgjedhjet parlamentare 2017, disa pjesëmarrës në të u regjistruan në kartela për ndihmë mjekësore, me simptomat e skuqjes së fytyrës, syve dhe qafës. Të tjerët janë paraqitur në spital për këshillim mjekësor, duke e çuar numrin e të dëmtuarve në 146.
Demiraj merr pjesë në ceremoninë mortore të efektivit të policisë
Ministri i Brendshëm, Dritan Demiraj sëbashku me drejtorin e Përgjithshëm të Policisë së Shtetit, Haki Çako, morën pjesë dje në ceremoninë mortore të punonjësit të policisë, Lorent Duli, i cili humbi jetën tragjikisht në krye të detyrës. Demiraj ishte edhe në familjen e të ndjerit ku shprehu ngushëllimet më të thella në emër të Ministrisë së Brendshme dhe shprehu gatishmërinë për mbështetje të pakursyer. Po ashtu, ministri Demiraj vizitoi në spital edhe dy efektivët e plagosur, duke u uruar shërim të shpejtë.
Ngjarja e rëndë ndodhi të mërkurën në fshatin Fitore. Punonjësit e policisë kishin përfunduar së kryeri kontroll territori mbi parandalimin e kultivimit të lëndëve narkotike, në zonat e Devollit të Sipërm dhe po ktheheshin nga shërbimi. Mjeti tip “Mitsubishi” me targa Policia 0305, ka dalë nga rruga dhe për pasojë ka ndërruar jetë punonjësi i Policisë shtetasi Lorent Duli 27 vjeç, (me detyrë SPZ në Njësinë Administrative Miras) si dhe janë plagosur tre punonjës të tjerë shërbimi, të cilët janë duke marrë mjekim në Spitalin e Bilishtit.
Shkaku paraprak i aksidentit dyshohet të ketë qenë humbja e kontrollit nga ana e drejtuesit Duli, punonjësi i cili humbi jetën. Grupi hetimor po punon për zbardhjen e rrethanave të aksidentit.
Dy fëmijë amerikanë të zhdukur prej dy ditësh
Dy adoleshente amerikanë janë shpallur të humbur në Tiranë nga familjarët e tyre. Këta të fundit shtojnë se të miturit janë me probleme mendore dhe mund të kenë vendosur të largohen. Ata nuk janë kthyer në shtëpi prej dy ditësh. Tadgh Bailey – Kay 17 vjeç është 1.80 m i gjatë dhe ka të veshur xhinse blu, bluzë bojë qielli, këpucë kafe dhe nuk ka flokë.
Ndërsa Tavish, i cili është 14 vjeç, është 1.50 m i gjatë, me flokë të zezë të prera shkurt dhe ka të veshur xhinse blu, bluzë jeshile dhe këpucë gri. Dy të miturit nuk flasin shqip dhe familjarët bëjnë apel për ndihmë, pasi jeta e tyre është në rrezik për shkak të çrregullimeve serioze mendore dhe në sjellje. Për herë të fundit, ata janë parë në Zonën e Kodrës së Diellit dhe Liqenit Artificial në Tiranë. Për çdo informacion mbi këta persona, qytetarët mund të telefonojnë familjarët në numrin 0 69 921 0052. Kushdo që mund t’i shohë dy djemte amerikanë është i lutur t’i mbajë deri sa të dorëzohen në polici apo pranë familjes.
Për të ndihmuar në identifikimin e tyre, familja jep këto detaje:
-Tavish Taog Bailey-Kay- është 14 vjeç, rreth 1.50 m i gjatë, me flokë të zeza të shkurtra, vetulla kafe i veshur me xhinse, bluzë ngjyrë gri dhe atlete.
-Tadgh Magnus Bailey-Kay, 17 vjeç është rreth 1.80 m i gjatë, pa flokë, sy kafe, i veshur me xhinse dhe bluzë me jakë V ngjyrë blu.
Sipas raportimeve të para të qytetarëve dy vëllezërit janë parë duke lypur në zonën e Laprakës dhe dyshohet se mund të jenë larguar drejt Durrësit.
Dy fëmijët kanë probleme të shëndetit mendor ndaj dhe identifikimi dhe gjetja e tyre deri tani ka qenë e pamundur.
Zëvendëskryeministrja me Llallën për zgjedhjet
Zëvendëskryeministrja Ledina Mandia zhvilloi dje një takim me prokurorin e Përgjithshëm, Adriatik Llalla. Në këtë takim, Mandia bisedoi me prokurorin e Përgjithshëm për një bashkëpunim maksimal në ndjekjen me përparësi dhe hetimin e rasteve abuzive, të cilat dëmtojnë procesin e zgjedhjeve të lira dhe të ndershme, duke i kërkuar që kjo të formalizohet dhe përmes një marrëveshje bashkëpunimi ndërinstitucionale mes Këshillit të Ministrave, Prokurorisë, Komisionit Qendror të Zgjedhjeve dhe Komisionerit për Mbikëqyrjen e Shërbimit Civil, njoftojnë burime zyrtare nga Kryeministria. Gjatë bashkëbisedimit, zv/kryeministrja nënvizoi rëndësinë e rolit të organit të Prokurorisë, në hetimin e rasteve të përdorimit të burimeve njerëzore, financiare dhe logjistike të administratës shtetërore, gjatë procesit zgjedhor për vitin 2017. Ajo i kërkoi prokurorit të Përgjithshëm në mënyrë specifike që të hetohet në drejtim të rasteve të përdorimit të burimeve të siguruara nga veprimtaritë e paligjshme. Prokurori i Përgjithshëm, shprehu vullnetin dhe angazhim maksimal, si dhe është dakordësuar për formalizimin e një marrëveshje bashkëpunimi ndërinstitucional. Më parë, zv/kryeministrja ka realizuar takime edhe me kryetarin e KQZ-së dhe komisionerin e Mbikëqyrjes së Shërbimit Civil me të cilët është rënë dakord për një marrëveshje bashkëpunimi ndërinstitucionale, e cila pritet të nënshkruhet së shpejti.
Shkodranët në këmbë me Bashën
Shkodranët pritën fuqishëm dje Lulzim Bashën dhe ekipin e tij fitues në hapjen e fushatës elektorale për zgjedhjet e 25 qershorit. Kreu i PD, Basha e nisi fjalimin e tij me një dedikim të veçantë, ndërsa tha se, pa Shkodrën e pa shkodranët nuk do të kishte Parti Demokratike. “Si Kryetar i Partisë Demokratike, partisë që është simboli i demokracisë dhe i pluralizmit në këtë vend më lejoni tiu them pa Shkodër e pa shkodranë nuk ka Parti Demokratike, nuk ka demokraci, nuk ka liri, ju e keni provuar këtë jo thjeshtë me fjalë, jo vetëm me vepra, por me peshën e rëndë të sakrificës në altarin e demokracisë, askush nuk e harron, Shqipëria ia di për nder përjetë shkodranëve. Liria dhe demokracia është në radhë të parë e mbi të gjitha vepra e Shkodrës heroike, e Shkodrës së lirisë e Shkodrës së qendresës. Ndër vite, Shkodra ka qenë bastioni i lirisë, në 90 ditë të bashkimit më të madh të shqiptarëve për zgjedhjet e lira e të ndershme, Shkodra ishte guri i themelit, shtylla kurrizore, forca e Republikës së Re, ushtria e pamposhtur e të nesërmes që po vjen”, u shpreh Basha. Kreu i PD shprehu mirënjohjen ndaj shkodranët për qendresën e tyre të fuqishme në 90 ditët e protestës së Shehin e Lirisë për zgjedhjet e lira dhe të ndershme. Basha tha se, sot falë sakrificës së shkodranëve dhe gjithë shqiptarëve që u bashkuan në Sheshin e Lirisë vendi do të ketë zgjedhje të lira dhe të ndershme. “Në 90 ditë e sprapsëm planin ogurzi të republikës së vjetër për të vjedhur vullnetin e qytetarëve shqiptarë. Ju u ngritët dhe nuk u ulët, sprapsja e republikë së vjetër është vepër e juaja. Rrëzimi i gjysmës së qeverisë së krimit dhe drogës është fitorja juaj. Është vetëm gjysma e punës, gjysma tjetër bëhet me votën e bashkuar të shkodranëve dhe gjithë shqiptarëve më 25 qershor. Por sakrifica juaj ja vlejti, sot anë e mbanë Shqipërisë, e dinë dhe duhet ta dinë zuzarët, matrapazët, ata që blejnë dinjitetin dhe votën e shqiptarëve se marrëveshja politike që e detyroi të sprapsej republikën e vjetër dhe Edi Ramën asnjë përveç frikës nga bashkimi juaj, nuk e detyroi të sprapsej”, tha Basha. Kreu i PD paralajmëroi marrjen e masave të ashpra për të gjithë ata që shkelin ligjin, duke u përfshirë në fushatë elektorale. Teksa përmendi shkarkimin e disa funksionarëve që ishin përfshirë në fushatë, Basha paralajmëroi se ky është vetëm fillimi dhe se të gjithë që do të shkelin ligjin, qoftë edhe duke tentuar të mbledhin karta identiteti do të përfundojnë në fund. “Ai u spraps kur pa vendosmërinë tuaj për të mos lejuar më zgjedhje farsë në këtë vend. E sot që flasim, ministrat janë garant të kësaj marrëveshje. Do të shkarkohet çdo zyrtar që përdor ofiqin dhe pushtetin për të diktuar apo për të shtrembëruar vullnetin e qytetarëve në zgjedhje. Ky është vetëm fillimi! Ju themelues të republikës së re, qytetarët anëembanë tashmë jeni gardianë të votës suaj, të lirisë suaj, mos kini frikë të denonconi pranë PD, pranë shtabeve tona elektorale dhe ju që jeni mësuar të shkelni ligjin harrojini gjobat, prekët një kartë identiteti minimumi një vit në burg. Ndatë thasë me miell për të marrë votën minimumi një vit burg, nuk luhet më me votën, nuk luhet më me popullin. Këtë e vendosi Republika e Re”, u shpreh kreu i PD. Basha tha se, demokratët vijnë në këto zgjedhje më të bashkuar se kurrë, ndërsa të majtët vijnë në këto zgjedhje të përçarë për shkak të pazareve. “Fushata ka nisur, dhe unë jam sot këtu me nderin dhe peshën e madhe të prezantimit të ekipit tim në Shkodër, pjesë e ekipit fitues në mbarë Shqipërinë. Ne vijmë në këto zgjedhje më të bashkuar se kurrë. Për herë të parë në 27 vite të gjitha partitë e djathta, e gjithë opozita është e bashkuar në një sigël, nën siglën e Partisë Demokratike me numrin 6, në një kauzë, atë të Republikës së Re, ndërkohë që kundërshtarët tanë janë të përçarë, I përçau tepsia, i përçau pushteti, i përçau pazari, kanë një javë që vetëm për qytetarët nuk flasin”, tha Basha. Kreu i PD në hapjen e mitingut elektoral në Shkodër, ka theksuar se mazhoranca aktuale e kërkon votën e qytetarëve për 4 vitet e ardhshme vetë për t’u pasuruar, dhe kjo tashmë duket qartë dhe në fushatën e tyre elektorale. Sipas tij PS-LSI, në asnjë pikë të fushatës së tyre nuk përmendin qytetarët, por atakojnë njëra-tjetrën me synimin e vetëm se kush të marrë pjesën më të madhe të pushtetit dhe pasurisë nga xhepat e qytetarëve shqiptarë. “Në katër vite për ta pushteti ishte një mjet pasurimi dhe asnjë ditë të vetme për të përmirësuar jetën e qytetarëve. Ata vijnë në këtë fushatë pa kauzë, pa bilanc dhe të përçarë, ne jemi të bashkuar, më të fortë se kurrë, sepse kauza jonë është kauza juaj, kauza e qytetarëve shqiptarë. Vendimet që kam marrë për ekipin fitues kanë patur për qëllim evidentimin e mozaikut të qendresës, demokracisë, kontributit dhe të së ardhmes. Këto nuk janë asnjëherë vendime të lehta, por janë vendime që më takojnë t’i marr, ashtu siç duhet dhe do të marr vendimet që do të përmirësojnë ekonominë tuaj, financat dhe kapitalin. E nisa me vendimin e duhur për ekipin fitues të Republikës së Re”, është shprehur Basha.
Basha falenderon deputetët që kanë përfaqësuar Shkodrën
Kryetari i Partisë Demokratike, Lulzim Basha, ka falënderuar publikisht deputetët e PD që kanë përfaqësuar Shkodrën në Parlament. “E nisa me vendimet e duhura për ekipin fitues të Republikës së Re. Më lejoni të falënderoj nga zemra, përfaqësuesit e Shkodrës në Parlamentin që shkoi, duke nisur me znj.Jozefina Topalli, Irma Koplikun, Gjovalin Bzhetën dhe veçanërisht Helidon Bushatin”, tha Lulzim Basha ndër të tjera. Ndërsa theksoi se për herë të parë opozita hyn në këto zgjedhje më e bashkuar se kurrë, ku të gjitha forcat opozitare garojnë nën një sigël të vetme që është ajo e PD-së. “Fushata ka nisur dhe unë jam sot këtu të prezantimit të ekipit tim fitues. Ne vijmë në këto zgjedhje më të bashkuar se kurrë. Ju shkodranët e dini fare mirë si dhe unë se për herë të parë e gjithë opozita është nën një sigël në atë të PD-së me numrin 6-të, në kauzën e Republikës së Re, ndërkohë që kundërshtarët tanë janë të përçarë, i përçau pushteti dhe pazari. Kanë një javë që vetëm, për qytetarët nuk flasin, por për timonin. Për ata pushteti ishte vetëm një mjet pasurimi dhe jo mjet për të punuar për qytetarët. Ata po zihen për tepsinë. Ata vinë në këtë fushatë pa kauzë, pa bilanc, ne jemi të bashkuar”, deklaroi Basha. Pasi akuzoi Edi Ramën dhe Partinë Socialiste për korrupsion, tendera e koncesione, Basha përmendi sulmoi LSI-në, duke përmendur edhe shkarkimin nga ministri teknik i Drejtësisë të regjistruesit të ZVRPP Shkodër, Mondi Ndou, që është edhe kandidati i LSI për deputet në këtë qytet. “Është një parti që nuk mbjell as palma, e ka mendjen vetëm tek tepsia. Janë ata, të cilët këtu në Hipotekën e Shkodrës e jepnin pronën e gjyshit vetëm po të merrje teserën e LSI-së. Tepsia mori fund, matrapazët morën fund. Sot, iku drejtori i Hipotekës, nesër ikën hipoteka e pushtetit. Nuk ka më pazar me partitë e tepsisë”, tha kryetari i PD, Lulzim Basha.
Berisha ironizon fushatën e Ramës në Pukë
Ish-kryeministri Sali Berisha ka komentuar takimin elektoral në Pukë të Edi Ramës. Ish-kryeministri shkruan në faqen e tij në Facebook, se Rama ka censuruar qytetarët dhe nuk i ka lënë ata të shprehen. “Pa realizime, asnjë premtim i mbajtur, asnjë projekt serioz të realizuar dhe pa program, por vetëm me llogje, llogje e përralla, kësaj here jo me mbret apo sulltan, doli Edi Rama para pukjanëve. Ai filloi me formulën e mashtrimit ‘shumë kemi bërë dhe më shumë të bëjmë’, pra sikur pukjanët nuk janë aty që kur ka mbirë lisi dhe nuk dinë asgjë, pra sikur ata vijnë nga një planet tjetër! Ai në takim foli për lopë, për dele, gomerë, por jo për mbarështrimin e tyre, por duke krahasuar njerëzit me to. Si hokatar, të shkretit i ka mbetur në gojë gënjeshtra e Sahatit të Tiranës, që sipas tij u ndal ditën që Lulzim Basha e përzuri atë nga bashkia e kryeqytetit. Pastaj, si për t’ju thënë dëgjoni ju pukjanë se ju nuk kuptoni se çfarë është qeveria, programi, premtimet, realizimet dhe projektet e saj, prandaj po detyrohem për t’ua bërë të kuptueshme ju o ‘katunarë’, të përsëris e të bëhem bajat duke përsëritur në çdo takim shembullin e makinës dhe të shoferit pasi ju vetëm kështu merrni vesh sepse keni hipur në makina dhe keni parë shoferë me sy. Pas kësaj, Rama, njëlloj si në Dibër, përsëri censuroi pukjanët, të cilët, aty për aty i thanë: o kryeministër, ne e dimë se ti ke hallin tënd për timonin, por ne kemi halle të tjera të dhembshme. Ne duam punë, punë për të ushqyer veten dhe fëmijët tanë se po na kthen legjendën e misrit, duam që taksat tona të mos vidhen dhe të shndërrohen në vila e saraje luksoze për qeveritarët, duam të rriten rrogat dhe pensionet, se me rritjen e çmimeve sot marrim më pak se 4 vjet më parë, se Pukën qytet nuk e bëre ti dhe se ti ke investuar në Pukë dhe të gjithë Veriun të marrë së bashku, pra në tre qarqet e Veriut, më pak se sa në dy rrethe të vogla, pra se në Patos dhe Tepelenë. ‘Ti shoku Rama e përçmon Pukën dhe Veriun, – i tha pukjani, – ndaj dhe ne nuk kemi votë për ty. Votat tona kësaj radhe janë për PD-në dhe Luzim Bashën’”.
5 drejtorë presion nxënësve dhe mësuesve për zgjedhjet
Ministria e Arsimit, tashmë e drejtuar nga ministrja teknike Mirela Karabina, ka bërë publikë emrat e mësuesve dhe zyrtarëve të arsimit që dyshohet se janë të përfshirë në fushatë elektorale. Përmes një njoftimi për shtyp, Ministria e Arsimit sqaron se ndaj personave në fjalë ka informacione që janë aktivizuar në fushatë dhe i ka paralajmëruar se janë nën monitorim për t’u vërtetuar raportimet ndaj tyre. Janë gjithsej shtatë zyrtarë dhe mësues, të cilëve do u verifikohet aktiviteti i tyre dhe që do të ndëshkohen me masa disiplinore sipas rastit siç parashikon ligji në rast se u vërtetohet veprimtaria e tyre në fushatë elektorale.
Emrat
Në njoftimin e shpërndarë nga zyra e shtypit e Ministrisë së Arsimit bëhen me dije dhe emrat e personave që janë nën monitorim. Janë kryesisht shefa të zyrave të arsimit në rrethe, por edhe mësues të thjeshtë. Rasti më specifik është ai i shefes së arsimit në Bulqizë, e cila ka arritur deri aty sa t’i bëjë dhe presion nxënësve dhe mësuesve për përfshirje në fushatë elektorale. “Ministria e Arsimit dhe Sportit në respektim të të drejtave kushtetuese dhe në vijim të deklaratave zyrtare të Departamentit të Administratës Publike është e angazhuar të përmbushë të gjitha detyrimet ligjore të përcaktuara për mbarëvajtjen e procesit mësimor, si dhe të drejtat politike të nëpunësve civilë përgjatë fushatës zgjedhore. Në këtë kuadër, në të gjitha takimet zyrtare me përfaqësuesit e institucioneve arsimore, autoritetet e Ministrisë së Arsimit dhe Sportit kanë informuar të gjitha strukturat në varësi, mbi detyrimet dhe kufizimet që nëpunësit e administratës, në veçanti, kanë për përmbushjen e kalendarit të programit mësimor dhe rregullat e sjelljes dhe të veprimtarisë së tyre brenda afateve kohore të përcaktuar për të gjithë nëpunësit dhe drejtuesit. Mbi bazën e informacioneve të raportuara, Ministria e Arsimit dhe Sportit ka konstatuar përfshirjen e disa drejtuesve e punonjësve arsimorë në fushatën elektorale, duke ushtruar presion në forma të ndryshme tek nxënësit dhe mësuesit dhe është duke bërë verifikimet e duhura mbi bazën e përcaktimeve ligjore, për personat e poshtëshënuar: Përgjegjëse e Zyrës Arsimore, Kurbin, znj. Majlinda Shalsi-Cara; Përgjegjës i Zyrës Arsimore, Gramsh, z. Xhevit Dermyshi; Përgjegjës i Zyrës Arsimore, Has, z. Selman Qema; Mësuese në gjimnazin “Ibrahim Rrugova” Tiranë, znj. Arjana Metaliaj; Mësues në gjimnazin “Asim Vokshi” në Bajram Curri, z. Afrim Brahaj; Përgjegjëse e Zyrës Arsimore, Bulqizë, znj. Bedrie Manjani, e cila përveç pjesëmarrjes në fushatë në kundërshtim të plotë me përcaktimet ligjore, ka bërë presion të hapur ndaj mësuesve për përfshirjen e nxënësve në fushatë elektorale gjatë orarit mësimor (10:00-13:00). Ministria e Arsimit dhe Sportit do të vijojë monitorimin e të gjithë institucioneve për të garantuar respektimin e të drejtave politike të nëpunësve civilë, si dhe zbatimin e përpiktë të përcaktimeve ligjore”, thuhet në njoftimin e Ministrisë së Arsimit.
Fenomeni
Në fakt marrëveshja e firmosur më 18 maj këtë kishte si qëllim, shmangien e përfshirjes së administratës në fushatë zgjedhore. Problemi u rëndua, sidomos kur bëhet fjalë për arsimin, gjatë kohës kur Rama ndërmori takime me ata që votojnë për herë të parë, e cila është dhe pjesa, e cila në mendësinë e tij mund të joshet më lehtë në këto prag votimesh. Nga të gjitha anët e vendit vinin pamje të autobusëve të mbushur me nxënës që shkonin nga një rreth në tjetrin, për të mbushur takimet e Ramës. Natyrisht në krye të këtij aksioni ishin drejtorët e drejtorive arsimore, por dhe drejtorët e gjimnazeve. Kulmi do të ishte kur zhvilloi takimin e Tiranës, ku mësimi u bë me orë të shkurtuara, madje u premtua dhe ditë pushimi të nesërmen për ata që do të merrnin pjesë në këtë takim elektoral. Bëhet fjalë për takimin ku ish-drejtoresha e Doganave do e krahasonte Ramën me Skënderbeun. Por jo vetëm kaq. Përfshirja e PS-së me anë të FRESSH në gjimnaze ishte kthyer në një gangrenë dhe për mësuesit, pasi ata që angazhoheshin në fushatë për Ramën u ishte dhënë e drejta me anë të një urdhri të pashkruar që jo vetëm të mos merrnin pjesë në mësime, por dhe notat të vendoseshin fiktive, duke dhënë kështu shembullin më të keq për të rinjtë. Nga ana tjetër, janë kjo kategori personash, të cilët shkojnë gjimnaz më gjimnaz duke premtuar bursa apo të drejta studimi, të gjitha në këmbim të një vote në zgjedhjet e përgjithshme. Firmosja e marrëveshjes ku ministria kaloi me drejtues teknikë dhe ndryshimet në Kodin Penal, pritet ta frenojnë në maksimum këtë fenomen.
Ministria e Shëndetësisë pezullon lejet vjetore
Pas Ministrisë së Financave edhe ministri i Shëndetësisë urdhëron pezullimin e lejeve vjetore për periudhën nga 1 qershori deri më 25 qershor 2017. Urdhri për anulimin e lejeve vjetore është për punonjësit e ministrisë dhe institucionet e varësisë së ministrit të Shëndetësisë, Arben Beqiri. “Të gjithë nëpunësit që janë duke kryer lejen vjetore njoftohen për ndërprerjen e saj. Urdhri, planifikimi i lejeve për punonjësit e shëndetësisë do të bëhet pas datës 26 qershor. Urdhri i ministrit Beqiri mban datën 1 qershor 2017”.
Daul: Mos i votoni ata që ju çojnë në qorrsokak
Presidenti i Partive Popullore Evropiane (PPE), Joseph Daul, nga Gjilani, ju ka bërë thirrje qytetarëve të Kosovës që mos t’i votojnë ata që ju çojnë në qorrsokak, por votoni Lidhjen Demokratike të Kosovës dhe kandidatin e saj Avdullah Hoti, i cili e çon Kosovën në Evropë. “Brenda dy javësh do të merren vendime të mëdha për Kosovën. Unë i porosit votuesit që të mos zgjedhin që ta çojnë Kosovën në një qorrsokak, por të votojnë LDK-në për një të ardhme evropiane”, ka thënë Daul. Presidenti i PPE, grupit më të madh parlamentar në Parlamentin Evropian, ka thënë se më 11 qershor Kosova do të marrë një vendim shumë të rëndësishëm, do të shkojë drejt një qorrsokaku dhe konflikteve të brendshme, ose do të vendosë t’i zgjedhë deputetët e LDK-së, që do ta çojnë Kosovën në një të ardhme evropiane. Ai ka vlerësuar lart kandidaturën e Avdullah Hotit për kryeministër duke thënë se ai është një frymë e re për të cilën Kosova ka nevojë. “Unë kam pasur kënaqësinë ta takoj z. Hoti dhe besoj që keni bërë një zgjidhje të duhur për ta çuar Kosovën në një të ardhme të mirë. Është i ri dhe kompetent, është një frymë e re dhe është njeri për të cilin Kosova ka nevojë”, ka thënë Daul. Ai e ka falënderuar kryeministrin Isa Mustafa, për ruajtjen e vlerave të LDK-së, të cilat i ka ruajtur edhe në raste kur ka qenë i rrezikuar, nga gazi lotsjellës dhe molotovi. Kryeministri i Kosovës, Isa Mustafa, e ka vlerësuar lart mbështetjen që po i jep LDK-së PPE-ja, me pjesëmarrjen e presidentit të saj në Kosovë, Joseph Daul.
Mustafa e ka falënderuar kryetarin e Degës së LDK-së dhe njëkohësisht kryetarin e Gjilanit, Lutfi Haziri, për mbështetje që i ka dhënë profesor Hotit. Kandidati për kryeministër, Avdullah Hoti, ka thënë se me fitoren e koalicionit të djathtë do të përfundojë koha kur institucionet shtetërore kanë punuar për interesa personale. “Ju garantoj se ky koalicion do të merret me temat më të vështira për vendin dhe do t’i kryejë me sukses ato. Me fitoren e koalicionit të shpresës do të marrë fund edhe koha kur institucionet e shtetit kanë punuar për interesa të tre-katër personave dhe tani e tutje ato do të jenë në shërbim të qytetarit”, ka thënë Hoti. Ai ka shtuar se është shumë i kënaqur me entuziazmin dhe pjesëmarrjen e përkrahësve të koalicionit në secilin vend të Kosovës që e kanë vizituar dhe me këtë entuziazëm do ta mbyllim fushatën me fitoren e 11 qershorit. Kryetari Haziri ka thënë se kandidati për kryeministër nga LDK-AKR-Alternativa, Avdullah Hoti i ka të gjitha tiparet për të qenë një kryeministër i suksesshëm në Kosovë. Ai ka thënë se të gjithë deputetët e koalicionit të djathtë do të votojnë të gjitha vendimet e mëdha që do t’i sjellë kryeministri Hoti në Kuvend.
Kryesore
Continue to the category
